Rabenschlacht

Welt ir in alten mæren wunder hœren sagen von recken lobebæren, sô sult ir gerne dar zuo dagen. von grôzer herverte, wie der von Bern sît sîniu lant erwerte

Vor dem künege Ermrîche, daz tuon ich iu bekant. der wolte gewalticlîche ertwingen Rœmisch lant: Bâdouwe Garte und Berne, daz wolte er allez einic hân vil gerne.

Dem tete er wol gelîche, als mir ist geseit. dem herren Dietrîche vrumte er manic starkez leit. mit roube und mit brande wuoste er in in eigem sinem lande.

Nû sult ir hœren gerne von grôzer arebeit, wie der vogt von Berne sît gerach sîniu leit an Ermrîche dem ungetriuwen. swaz er ie begie daz kom im sît ze riuwen.

Nû hœret michel wunder hie singen unde sagen. sich hebet an besunder beidiu weinen unde clagen und jâmer alsô starke, der geschach ûf Rœmischer marke.

Der künec von Rœmisch rîche bestuont wan einec jâr (daz wizzet sicherlîche) nâch dirre hervart (daz ist wâr) in Hiunischen landen. in rouwen sîn man die dâ wârn bestanden.

Vür die selben stunde, als ich vernomen hân, kom nie ûz sînem munde, alsô mir ist kunt getân, guot wort von Ermrîche. swaz ieman tet, er gehabt sich trûreclîche.

Mit disen herzenswæren, die her Dietrich, als ich iu wil bewæren, truoc vil heimlich und vil tougen in sîm muote, in rouwen harte sîne helde guote.

Er lebte mit getwange naht unde tac, und treip daz alsô lange, daz er niht anders enphlac wan starkez leit und michel sorgen. alsô quelt er sich âbent unde morgen.

Des phlac er alsô verre, als mir ist geseit, von Berne der herre, dem was getriulîchen leit umb den küenen Alpharten. er beweint ouch dicke den starken Helmscharten.

Allen den winder er mit leide ranc. er gehabte sich vil swinder, grôziu nôt in des betwanc. im truobten oft sîn ougen. des nam war vrou Helche alsô tougen.

Dô sich des niht wolde mâzen der herre Dietrich noch sîn weinen lâzen sô rehte unmæzlich, daz begunde merken sêre vrou Helche diu milde und diu hêre.

Si trahte in ir muote, als ich vernomen hân, diu reine und diu guote vil dicke sprechen began ‘owê, nû hôrte ich harte gerne, jâ herre, waz wirrt dem vogt von Berne,

Daz er sô clegelîche gebâret alle wege? er treit heinlîche grôzez leit in sîner phlege. ich wesse gerne waz im wære. möht ich, ich geringet im sîn swære.’

Dô sprach gezogenlîche der marcgrâf Rüedegêr ‘küniginne rîche, ich weiz wol sîniu herzen sêr und allez daz im wirret. jâ ist sîn vil daz in vreuden irret.’

Dô sprach vrou Helche drâte mit zühten alzehant ‘her Rüedegêr, nû râte, ûz erwelter wîgant. wol bedarf ich dîner lêre. nu erwar vil rehte an dem recken hêre,

Ob im in Ezeln lande ieman iht habe getân. vil gerne ich daz bekande, wold er ez ieman wizzen lân. ‘owê, jâ ist mir harte swære umb den tugenthaften Bernære.’

‘Ich tuon, vil liebiu vrouwe’ sprach Rüedegêr zehant. ‘vil wol ich des getrouwe, mir sage der künec von Rœmisch lant sînen kumber volleclîche. er gebâret, des ich wæne, trûreclîche’.

Dan gie der marcgrâf Rüedegêr über hof zehant. gebiten wart dô niemêr, dô er den Bernære vant, mit unverzagtem muote sprach mit zühten Rüedegêr der guote

‘Edel vogt von Berne, ich bin umb sus niht daher komen. ich bæt dich harte gerne, wan ich hân daz wol vernomen, dû ringest mit grôzen sorgen. ez ist starkez leit in dînem herzen verborgen.

Sage mir waz dir werre, durch die triuwe dîn. Etzel mîn herre und Helche diu vrouwe mîn, die nimt des michel wunder, waz daz sî daz dû clagest sô besunder.

Alle dîn herzenswære ist in mit triuwen leit. nû sage mir dîn mære, küener recke unverzeit, daz ichz dien immermêre.’ dô sprach mit zühten von Berne der hêre

‘Wol mac ich in dem herzen weinen unde clagen umb mînen grôzen smerzen, den muoz ich leider eine tragen und dicke weinen in dem muote. jâ riuwent mich die edelen helde guote,

Die ich in Rœmisch lande alle vloren hân. owê der grôzen schande, daz ich mich niht gerechen kan an dem künege Ermrîche! daz riuwet mich vil sêre sicherlîche’.

‘Dar umbe clage nicht sêre’ sprach der marcman, ‘vil edeler vürste hêre! vil wol ich daz vernomen hân an vroun Helchen mîner vrouwen, man muoz dich schiere in Rœmisch lande schouwen.’

Dô sprach der Bernære mit zühten alzehant ‘mir sint wol kunt diu mære, daz der künec von Hiunisch lant mir hilfet mîner êren und tuot daz gerne swie wirz an gekêren.’

‘Dû solt dich clage mâzen’ sprach der marcman, ‘und ouch dîn weinen lâzen. swaz dir Ermrîch hât getân, daz wirt vil wol gerochen. ich hân ez umb sus niht gesprochen.’

Ûz dem unmuote den Bernære nam Rüedegêr der guote. er sprach ‘dar umbe dû dich scham, und merke daz vil tougen, ez sol niemen trüebe sehen dîniu ougen.’

Dô was ez an daz ende komen allez an. si viengen sich bî hende her Dietrich und der marcman, si giengen über hof mit gewalde si sâhn bî Etzeln manegen recken balde.

Ezele der rîche vil güetlîchen sprach ze dem herren Dietrîche, als er in an gesach ‘gote willekomen ir beide! swenn ich iuch sihe sô ist mir niht ze leide.

Ir benemet mir mîn swære’ sprach Ezele zehant. ‘sælic sî daz mære, daz ir mir wurdet erkant! dâ von hân ich hiute wünne. ir sît mir lieber dann dehein mîn künne.’

‘Got lâz mich mit gesunde’ sprach her Dietrich ‘geleben noch die stunde, edel künec von Hiunisch rîch, daz ich gedien die hôhen êre. iuwer triwen vergizze ich nimmer mêre.’

Vrou Helche diu reine ûf den palas (nû merket waz ich meine) mit ir vrouwen komen was reht als man ezzen wolde. man satzte die herren als man solde.

Mit hôchvertigem muote man ob dem tîsche saz. Ezel der vil guote des vil selten vergaz, er trôste den Bernære ‘nû vrôut iuch, unverzagter recke mære!

Wir sulen volle hôchzît benamen hinte hân. daz wil ich râten âne strît, von Berne vürste lobesam, ir sult iuch darzuo rihten, wir wellen eine hôchzît hinte tihten.

Bî vrouwen Herrâte sult ir ligen hinaht. dar zuo bereit iuch drâte, sîn ist rehte alsô gedâht.’ dô sprach mit zühten der von Berne ‘swaz ir und mîn vrouwe welt, daz leiste ich gerne.’

‘Sô sît hôhes muotes, künec von Rœmisch lant. lîbes unde guotes’ sprach Etzele zehant ‘verlâze ich iuch nimmermêre. ‘ich gelige tôt od ir gwinnet wider Rœmisch êre.

Zem allerêrsten meien, ob ichz geleben sol, swaz ich hân geheien, (daz geloubet mir wol) von silber und von golde, daz gib ich durch iuwern willen ze solde.

Ich wil iu mit gelte hundert tûsent man lâzen ze helfe, die besten die ich gwinnen kan, ûf den künic Ermrîchen. er gesigt uns an od er muoz uns entwîchen.’

‘Ich wil ouch iu niht liegen’ sprach marcgrâf Rüedegêr ‘noch nieman dâ mit triegen, von Rôme edeler künic hêr. zwei tûsent helde guote die vüere ich iu mit unverzagtem muote.’

Dô sprach ûz blüender jugende Nuodunc der junge degen und ouch mit reiner tugende ‘driu tûsent recken ûz gewegen vüer ich iu, vogt von Berne: daz geloubet mir mit rehten triuwen gerne.’

Bitrolf der Stîrære sprach gezogenlîch ‘hôher Bernære, sô wil ich iu in Rœmisch rîch driu tûsent recken bringen: dâ mit hilf ich iu Rœmisch lant ertwingen.’

Mit unverzagtem muote sprach Dietleip der helt ‘vier tûsent recken guote die hân ich selbe ûz gewelt, die lâze ich mit iu rîten. ich wil ouch selb durch iuwern willen strîten.’

Dô sprach Gotel der marcman ‘herre her Dietrich, ân helfe wil ich iuch niht lân, daz geloubet ir mir wærlîch. zwei tûsent helde mære die bringe ich iu mit mir, her Bernære.’

Dô sprach der recke Blœdelîn ‘ich wil ouch dâ hin. versmâht iu niht diu helfe mîn, enruochet ir wie arm ich bin. ze velde, ûf allen strâzen wil ich iu zwelf hundert recken lâzen.’

Hornboge von Bôlân sprach zem Bernær ‘vünf tûsent recken ich hie hân, daz sint allez degene mær. die wil ich’ sprach der starke ‘iu ze helfe vüern ûf Rœmisch marke.’

Walther der Lengesære sprach dô al zehant ‘dêswâr, her Bernære, und wæren nâher mîniu lant, ich bræhte iu helde guote. die hulfen iu mit unverzagtem muote.

Doch wil ich daz niht lâzen, ich welle mit iu dar. ob ez iu kumt ze mâzen, so geleiste ich noch wol, daz ist wâr, aht hundert werder recken. jâ helfent iu vil gerne die kecken.’

‘Ich wil nemen niemens solt, daz wizzet al zehant’ sprach von grôzen Ungern Îsolt. ‘ich hân brâht in Hiunisch lant, als ich iu hie bediute, niun tûsent man, mâge unde liute.

Die füert mit iu gein Berne, herre her Dietrich. ich hilfe iu wærlîch gerne ûf den ungetriuwen Ermrîch. wir sulen niht belîben, wir sulen in ûz al der werlt vertrîben.’

‘Ich bin ouch ûf der reise’ sprach von Lunders Helphrîch. ‘nû prüeven michel vreise dem ungetriuwen Ermrîch! wir strîten nâch dem rehte. ich hân sehs tûsent man, ritter unde cnehte,

Die in scharphen strîten unverzaget sint. die sulen mit iu rîten, getriuwer Dietmâres kint, dâ wir Ermrîchen vinden: wir rechen uns an wîben unde an kinden.’

‘Dâ müezen werden siechen und bluotigiu velt’ sprach her Dietrich von Kriechen. ‘wir retten Rœmischen gelt mit tiefen verchwunden: wir tuon den schaden des sêre wirt enphunden.’

Îrinc der mære balde hinvür gie. er sprach zem Bernære ‘wizzet daz ich iuch nie gelie; sît ich iuch ie bekande. ich wil iu bringen siben tûsent wîgande.’

Norpreht von Bruoveninge sprach ‘ich bin iu bereit. mich wegent harte ringe zehen tûsent recken gemeit ze vüern iu, vogt von Berne. die helfent iu getriulîch unde gerne.’

Dô sprach Erwin von Elsentroie ‘wol mich, daz ich ie wart! ich bringe iu mit schoie zwelf tûsent recken an die vart. hey, daz sint allez degene in scharphen strîten küene und bewegene.’

‘Sol dan diu reise vür sich gên’ sprach her Paltram, ‘sô wil ich hie niht bestên: dar zuo alle die ich hân, die volgent mir von hinne. ich hân tûsent recken, als ich mich versinne.’

Sintram der kecke zuo dem Bernære sprach ‘ich und manic recke wir wellen iuwern ungemach rechen mit rehten triuwen. kum wir an Ermrîch, ez muoz in sêre geriuwen.’

Astolt von Mûtaren sprach alsam ein degen ‘ich wil daz ouch bewæren, daz ich mich ie hân bewegen lîbes unde guotes, her Dietrich, durch iuch und bin noch des muotes.

Anderthalp tûsent kastelân mac ich gewinnen wol, in mînen phlegen ich die hân: dâ mit ich iu helfen sol Rœmisch lant ze retten. wir suln Ermrîchen alsô enphetten,

Daz er die herzensêre lange muoz clagen unde ouch immermêre muoz von disen dingen sagen. ich weiz wol, her Bernære, kum wir ze strîte, ez werdent setel lære.’

Dietmâr von Wienen sprechen dô began ‘her von Berne, ich wil iu dienen mit allen den die ich hân. fünfzehen tûsent helde starke die vüere ich ûf Rœmische marke.’

Dô sprach von Ôstervranken der herzoge Herman ‘her Dietrich, welt ir mir danken, sô wil ich iu bî gestân mit einlef tûsent mîner recken. wir sulen Ermrîchen alsô wecken,

Daz er unz an sîn ende muoz leit mit jâmer tragen und winden sîne hende und wâfen immer mêre clagen.’ ‘daz sol nieman widersprechen, mac ich’ sprach Wolfhart, ‘sô wil ich mich rechen.’

Von Beiern her Diepolt sprach als ein helt guot ‘vogt von Berne, ich bin iu holt. aht tûsent recken hôchgemuot die trouwe ich wol gewinnen. die vüere ich iu mitsamt mir von hinnen.’

Dô sprach von Gran Wolfgêr ‘ich belîbe niht underwegen. zweinzic tûsent recken hêr die hân ich in mînen phlegen. hey, daz sint helde mære! die helfent iu rechen iuwer swære.’

Von Sibenbürgen Tibalt, (bruoder vroun Herrât was der mære helt balt) er sprach mit zühten an der stat ‘künec von Rœmisch lande, versmâhent iu niht sehzehn tûsent wîgande,

Die vüere ich iu zewâre ûf Rœmische marc Ermrîchen ze vâre’ sprach der junge recke starc. ‘welt ir mirs getrouwen, ir müezet mich in iuwerm dienste schouwen.’

Richolt von Ormenie ouch mit zühten sprach ‘ich und mîner bruoder drie, uns sol ze dienste wesen gâch iu, rîcher künec von Rôme. sît uns wan holt und gebt uns daz ze lône.

Wir bringen ûz unser marke drizic tûsent man. die muge wir’ sprach der starke ‘wol mit guotem vollen hân. dâ mit diene wir iu, herre, zwei ganziu jâr nâhen unde verre.’

Hinvür trat von Salnicke der herzoge Berhtram ‘nimmer ich gelicke, unde ouch alle die ich hân, man muoz mich’ sprach der werde ‘in iuwerm dienste sehen ûf Rœmisch erde.’

Von Kunstenôbel Wickêr dô niht lenger sweic. ‘ist iu liep mîn wer’ dem Bernær er güetlîchen neic, ‘des bringet ir mich inne. zwelf tûsent man vüere ich iu von hinne.’

Dô sprach gezogenlîche der marcgrâf Berhtunc ze dem herren Dietrîche ‘aller tugende ursprunc daz bist dû, vogt von Berne. wir sulen dir mit triuwen helfen gerne.

Mîn mâc ist vil nâhen diu schœne Herrât. nû lâ dir daz niht versmâhen, ob dir mîn helfe ze staten stât, ich bring dir einlef tûsent recken ræze, die hiute mîn her Etzel wider sæze:

Ob sî im vîent wæren, er müest ûf si sorge hân. nû merke an mînen mæren’ sprach der unverzagte man, ‘jâ sint ez helde stæte. si kunnen ze urlîuge wîser ræte.’

Nû merkt ân missewende, waz ich gesaget hân. nû hât diu helfe ein ende, die dem von Bern wolden gestân ûf den künic Ermrîche. nû hœret andriu mære sicherlîche.

Swaz iu von herten strîten ie wunders ist geseit, bî iemannes zîten, von grôzen herverten breit, deist ein tou wider ditz mære. dô gewan ein her alrêrste der Bernære,

Daz nie her sô starke kom in Rœmisch lant. sich hebet ûf Rœmisch marke starker roup unde brant. vür wâr ich daz bevinde, dâ geschach leit maneger muoter kinde.

Des werde im verteilet, des schulde ez erste was! sîn sêl sî ungeheilet! wand ich an buochen nie gelas von sô grôzen untriuwen. des sol ouch mich sîn schade cleine riuwen.

Ich meine Ermrîche, von dem manegiu leit sint komen sicherlîche, als ich iu ê hân geseit. des enkalt er sît vil sêre, er gap darumb den lîp und al sîn êre.

Merket ir besunder, hie hebe ich wider an, hapt ez niht vür wunder, nû wil ich iuch wizzen lân diu rehten mære drâte: nû nimet her Dietrich vroun Herrâte.

In dem wîten palas, dâ selbe Etzel saz, dâ vil der hôhen recken was (vürwâr hœret daz) und manic werdiu vrouwe, alrêste ich vreude an dem Bernære schouwe.

Michel wart diu hôchzît, als ich vernomen hân. sich gesamte ê noch sît nie sô manic edel man in Hiunischen rîchen. daz tâten si ze liebe Dietrîchen.

Vrou Helche diu milde was unmâzen vrô. tugende si nie bevîlde. si sprach zem künege Etzel dô ‘nû tuo hiute vürstelîche durch den unverzagten Dietrîche.

Dâ bite die recken alle ûf dem palas wît, daz si komen mit schalle ûf den hof in kurzer zît mit rossen und mit schilten.’ daz tâten si vil gerne durch die milten.

Etzel gie balde dâ er die recken vant. er bat si mit gewalde unde ouch güetlîch zehant daz si sînen willen tæten. des gewerten in die starken und die stæten.

‘Ir edelen recken ziere, nû ruochet alle komen baltlîchen unde schiere, als ir habt selbe wol vernomen, vür den sal mit hôhem muote. daz diene ich umb iuch mit lîb und mit guote.’

Gebiten wart niemêre dâ von manegem man. durch des Bernæres êre balde gâhen man began ze herberge manneclîche. da bereiten sich die recken ellensrîche.

Dô hiez man balde springen, als ich vernomen hân, snelleclîchen bringen diu ûz erwelten kastelân. die guoten niuwen schilde die sande den recken vrou Helche diu milde.

Die recken vil vermezzen sâzen ûf diu kastelân. dâ wart des niht vergezzen, si zogten vür sich ûf den plân. vür den palas rîche kômen mit schall die recken lobelîche.

Der buhurt der wart herte vor dem palas. manic widergeverte mit hertem dringen dâ was. ahi, die buckel rîche die wurden von den stœzen herticlîche

Da zebrochen harte sêre den recken vor ir hant. nû vernemet noch mêre: diu hôhen rîchen gewant wurden gezerret cleine. man sach den hof geströuwet von gesteine.

Ûz den guoten schilden vielen si ze tal. vrou Helche diu milde diu hiez dar geben âne zal diu cleider unverschrôten, die samît unde manegen phelle rôten.

Dirre buhurt werte vil nâch unz ûf die naht. swer dâ guotes gerte, dem gap man es volle maht. von silber und von golde hiez vrou Helche geben swerz nemen wolde.

Der hof vor dem palas aller lac gestreut. allez daz dâ indert was, daz wart mit guote verreut. man gap, swer dâ nemen wolde. daz wolde got, daz ez nû wesen solde!

Nû merket vil besunder, waz ich iu wil sagen. mich nimt des michel wunder, war komen sîn bî disen tagen rehtiu milte und êre. des ist verphlegen leider al ze sêre.

Jêsus von himel rîche, war tuot nû diu werlt daz guot? daz man sô lesterlîche ze allen zîten dâ mit tuot! vervluochet sî der werlde jugende, die mit guote solten begên tugende!

Getriuwe und êrbare was diu werlt bî alten tagen. ditz ist ein wârez mære, ir habt ez ofte hœren sagen. nû ist diu tugent verswunden, mit schanden lebt diu werlt bî disen stunden.

Nu verwîzet man mir sêre mîn vluochen und mîn clagen, daz ich sô gar die êre hân überlebt bî disen tagen. ich bite des noch zewâre, daz wold got, wære ich tôt vor manegen jâre!

Ich wil mich clage mâzen, wand ez vervæht mich niht, und al mîn vluochen lâzen. swaz grôzer schande nû geschiht, dar ûf ahtet man nû cleine. nû sîn vür sich verteilet und unreine!

An mînem altem mære hebe ich wider an wie der Bernære die schœnen vrouwen wolgetân nam zeinem wîbe. dar an ich nû stæte belîbe.

Dô diu naht begunde zuo sîgen unde gân, (nû hœret hie ze stunde) dô was ez komen dar an, daz der künic Etzel wolde ezzen gân, als er ze rehte solde.

Welt ir nû gerne schouwen, sô hœret vil bereit. manic schœniu vrouwe und manic hêrlichiu meit, die mit vroun Helchen giengen, bî handen si die edelen ritter viengen.

Si stuonden ûf dem palas, als mir ist geseit, dâ daz gesidel bereit was Etzeln dem künige gemeit. gewünschet wart dâ dicke, dâ gie entwer wunder vil der blicke.

Vrou Helche diu süeze nîgen began, si teilte ir werde grüeze mit manegem tugenthaften man. daz tetes den recken allen ze êren. ir herze kundes manege tugent lêren.

Alle die dâ wâren, die muosten des jehen, daz si bî ir jâren nie niht sô schœnez heten gesehen ûf der erde in allen rîchen als vroun Herrât die vil tugentlîchen.

Si was alsô schœne, als ich vernomen hân, daz ich si immer krœne beide vür vrouwen und vür man. ez wart in Hiunisch rîche mit schœne nie geborn ir gelîche.

Etzel der rîche ûf stuont vor manegem man. den herren Dietrîche hiez er dô sitzen gân ze der schœnen Herrâte: er weste wol daz er des willen hâte.

Swaz ir bî iemannes tagen her habt vernomen od swaz ir ie gehôrtet sagen, des bin ich an ein ende komen mit disem einen mære. nû vernemt wie ich iu daz bewære.

Allez daz mit vreuden was über al den sal. in des küneges palas hôrt man diezen den schal von jungen und von alden. sich freuten dâ die bliden zuo den balden.

Dâ was michel êre von maneger hande spil. nû vernemet mêre, waz ich iu bescheiden wil: si sâzen âne swære. hie mit wil ich enden daz mære.

Ez wart nie schœner hôchzît bî aller künege tagen weder ê noch sît, als wir daz buoch hœren sagen. ir leides si vergâzen. unlange si nâch ezzen dâ sâzen.

In einer kemenâte ein bette was bereit. der vrouwen Herrâte volgte manec hêrlichiu meit: dô gie mit Dietrîche her Rüedegêr und Etzel der rîche,

Und Hildebrant der alde, Wolfhart und Elsân, und Hûnolt der balde und von Bôle Berhtram. daz wâren edele recken ze allen stunden, die wol ir herren aller êren gunden.

Ir bette was berihtet, als ich iu wol bescheiden mac, vil rîchlich getihtet. dar ûfe sicherlîche lac rîchiu declachen von Troyande, die besten sîdn ûz aller heiden lande.

Nû lâze wir diu mære belîben under wegen. vor dem Bernære kniete manic hôher degen. daz tâten si im ze êren, si hulfen im mit triwen sîn vreude mêren.

Da beleip nieman inne, als ich vernomen hân, wan vrou Helch diu küneginne, dâ her Dietrich slâfen solde gân. mit freuden si sich machten slâfen: vrou Helche des dô lachte.

Ir segen güetlîche si über si dô tete. vrou Helche diu rîche nam urloup an der stete ûz der kemenâte. da beleip her Dietrich bî vroun Herrâte.

Mit vrœlichem muote die naht unz an den tac von Berne der guote dâ vil lieplîchen lac mit armen umbevangen. ir leit daz was mit liebe zergangen.

Wie lieplich si dâ lâgen, dâ wær lanc von ze sagen, oder wes si phlâgen: daz wil ich vürbaz verdagen. ab als ich mich versinne, zwischen in was lieplîchiu minne.

Rehte alsam ein rôse bran alle zît ir munt. diu süezen wort lôse kund si sprechen zaller stunt. uns saget dick daz mære, süeziu wort benement grôze swære.

Vrou Herrât und her Dietrich die lâgen unz an den tac bî einander lieplîch, als ich iu wol bescheiden mac, unz an den liehten morgen. si wâren ze ende komen gar ir sorgen.

Als von himele lûhte der wunnecliche tac, vroun Helchen des bedûhte, dâ si bî Ezelen lac, owê der grôzen leiden mære! ir troumte wie ein wilder tracke wære

Gevlogen alsô balde durch ir kemenâten dach, und nam ir mit gewalde, daz si ez mit ir ougen sach, owê! ir liebe süne beide. er vuort si hin ûf eine breite heide.

Si hete in ir goume, waz den kinden geschach. si sach in dem troume, daz si der grîfe zebrach. vor leide si erwahte, ûz dem slâfe unsanfte si erschrahte.

Der troum der seite ir mære, als ez ouch sît ergie, dô si dem Bernære ir liebiu kint ze helfe lie. owê der jungen künege hêre! die gesach si leider lebende nimmermêre.

Vrou Helche diu gie drâte mit zühten alzehant in eine kemenâte, dâ si ir juncvrouwen vant. die wahte si güetlîche. dâ mite gie diu küneginne rîche,

Dâ si Blœdelîne den werden recken sach. hœret ûf die triuwe mîne, wie vrou Helche dô sprach ‘herre Blœdel, küener recke hêre, nû brinc mir balde den marcgrâven Rüedegêre.

‘Daz tuon ich willeclîche, edel vrouwe guot.’ dan gie der recke rîche, (unverzaget was sîn muot) und seite diu mære Rüedegêre dem milden sunderbære.

‘Stant ûf, wil dû schouwen, edel Rüedegêr, vrou Helchen mîne vrouwen: diu hât mich gesendet her. die solt dû balde gesprechen.’ ‘ir gebot ich nimmer wil zebrechen.’

Ûf stuont der hôchgemuote, an streich er sîniu cleit, Rüedegêr der guote. im volgten recken gemeit. si gâhten bî den stunden, dâ si die tugenthaften Helchen funden.

Wellet ir nû biten, ich wil iuch wizzen lân, ez was an den zîten der künic Etzel ûf gestân. mit vrœlichem schalle die hôhen wârn ze hove komen alle.

Vrou Helche diu gie drâte mit ir vrouwen dan zuo der kemenâte. dô was her Dietrich ûf gestân. dô gruozte in minneclîche vrou Helche diu edele und diu rîche.

‘Genâde, liebiu vrouwe’ sprach her Dietrich. ‘triuwe ich an iu schouwe, ir grüezet güetlîchen mich. got füege mir die stunde, daz ich iuch lange sehe mit gesunde!’

‘Ir habt vreude deste mêre, und sol ich lange leben, edel recke hêre, iu wirt noch von mir gegeben, des ir iuch gevröut ze allen stunden. ich hân iuch ze einem vriunde mir ervunden.’

Michel wart dô der schal ûf dem palas. mit vröuden lebte über al allez daz dâ indert was. die küenen helde guote die bereiten sich mit vrœlichem muote.

Dar kômen mit crefte die recken ûf den plân. dâ wart mit ritterschefte der buhurt herte getân. dâ mit si dienten gerne dem unverzagten vürsten von Berne.

Der buhurt werte lange, wol ûf mitten tac. si riten mit gedränge, daz man niht anders dâ phlac. ze kurzwîlen si gerten, si riten alle die wîle ez diu ors erwerten.

Daz gesidele was bereitet vür den palas. man sach dâ nider gebreitet vil manegen phelle ûf daz gras. mit vrœlichem muote gie dort her vrou Helche diu guote.

Mit maneger hôhen vrouwen ze wunsche wol gecleit muoste man des tages schouwen manege hêrliche meit. bî handen si sich viengen, ie zwô und zwô neben einander giengen.

Dâ was vreude und wunne, des muoste man wol jehen. ich hœre, der liehten sunne und ir vil lûterlichem brehen, daz sich dem niht gelîche. ir schîn überliuhtet elliu künicrîche.

Neben der sunne schîne ich gelîchen sol ûf die triuwe mîne, daz geloubet mir wol, die vröuwen hêrlichen, die dâ giengen mit vroun Helchen der rîchen.

Nû lâze wir daz mære belîben under wegen und sagen sunderbære, wes dâ mêre wart gephlegen. mit vreuden si sâzen, mit liebe si ir leides vergâzen.

Diu hôchzît werte sehs wochen gar. swer guotes dâ gerte, dem gap man daz mit vollen dar. vrou Helche diu reine diu gap den recken golt und edel gesteine,

Die guoten mœre schœne und ouch diu castelân. ir tugende ich iemer crœne, ich mein die vrouwen wolgetân. vrou Helchen die milden. si gap den recken diu ors mit den schilden.

Alsô disiu hôchzît ein ende hete genomen, nû sult ir hœren âne strît, wiez an daz ende ist bekomen. nu vernemt ez alle gerne, nû bereitet sich der vogt von Berne.

Ân alle missewende sult ir daz vernemen. ez hât nû hie mit ende. iu mac ze hœren wol gezemen ditze starke mære. nû wil sich heben heim ze lande der Bernære.

Nu vernemet endelîche rehte waz ich sage, und hœret al gelîche. ez geschach an Sant Jörgen tage, sô der walt und diu erde allez ist geblüemt in süezem werde.

Dô wâren mit schalle alle die komen, die nôtgestalden alle, als ir ê habt vernomen, die dem von Berne wolden ûf Ermrîchen helfen, als si solden.

Diu starke samenunge ze Ezelburc was, ez jâhen alte und junge und allez daz dâ indert was, daz ûf der breiten erde nie zesamne kom sô manic recke werde.

Was daz nicht ein unbilde? als ich iu sagen mac, daz breite gevilde zweier tageweide lanc lac mit liuten bedecket. alrêst wirt Ermrîch mit leide erwecket.

Nû hœret starkiu mære, diu ich iu sagen wil. und merket sunderbære, sô künde ich iu des wunders vil und wil iu daz bescheiden. nû lât iu ditze mære niht leiden.

Dô daz her starke allez was bereit in Hiunischer marke, als man mir vür wâr hât geseit, dô muost man jâmer schouwen, dô sach man weinen manege werde vrouwen.

Ez het Etzel der rîche bî den selben tagen zwêne süne hêrlîche, als wir daz buoch hœren sagen. vil liep wârn si im beide, an in lac sîner vreuden ougenweide.

Die jungen künege hêre die gingen al zehant mit grôzer herzensêre, als uns daz mære ist bekant, vür vroun Helchen die guoten. dô gie si gegen den kinden wol gemuoten.

‘Gote willekomen ir beide, vil liebe süne mîn! mîn blüendiu ougenweide, daz müezt ir endelîchen sîn, mîn ôstertac, mîn meie. swenn ich iuch sihe, waz ich dann vreuden heie!’

Si kuste lieplîche diu kint an ir munt. die jungen künege rîche sprâchen an der selben stunt ‘genâde, liebiu muoter! owê, wær nû ieman hie sô guoter,

Wir bæten harte gerne’ sprach Scharphe der degen, ‘wir wolten mit dem von Berne gein Rœmisch lant after wegen. wir sæhen et harte gerne, dâ von er heizt, die guoten stat ze Berne.

Muoter, liebiu vrouwe, nû bitet den herren mîn, als ich iu des getrouwe, ob ez mit hulden muge sîn, daz er uns der reise günne. dâ varnt hin unser mâge und unser künne.

Die schaffe er uns ze huote dâ hin ûf den wegen. die küenen recken guote die habent uns in ir phlegen und lâzent uns niht werren. nû mant umb uns Ezeln unsern herren!’

Vrou Helche trûriclîchen diu kint ane sach. zuo den künegen rîchen si vil güetlîchen sprach ‘der bete sult ir iuch mâzen, liebiu kint, ir sult die reise lâzen.

Ez kumt iu niht ze guote, daz sult ir ûf mir hân. slehtes ûz dem muote sô sult ir dise reise lân. ir muotet kintlîchen. ez stêt niht wol in Rœmischen rîchen.

Ez wurd mir lîhte ein riuwe und lieze ich iuch dar’ sprach diu vil getriuwe. ‘ich vürhte leider vür wâr die Ermrîches unstæte, nu belîbt hie heime und volget mîner ræte.

Swie gerne iuch behuoten ûf der reise alle zît die küenen und die guoten, kumt ez danne in den strît, owê, sô wirt iwer vergezzen, sô sît ir tôt’ sprach diu vil vermezzen.

‘Dar umb sult ir niht sorgen. liebiu muoter mîn. naht und alle morgen sô welle wir sicher sîn bî dem herren Dietrîche. er behüetet uns wol, daz wizzet sicherlîche.’

Hie mit disem mære kom Ezel gegân und ouch der Bernære, als ich vür wâr vernomen hân. Ezel vant sicherlîche sîne liebe süne beide gelîche.

Als diu vrouwe guote Ezeln ane sach, mit trûrigem muote diu rîche küneginne sprach. ir truobten sêre d’ougen. dô vrâgte si der künic Etzel tougen

‘Mich wundert in dem sinne, vrouwe wol getân, edeliu küneginne, wer hât iu leides iht getân? jâ müet mich harte sêre iuwer weinen, küneginne hêre.’

‘Dâ hât mir ze leide niemen niht getân. Ezel, dîne süne beide die wellent des niht rât hân, si welnt an disen zîten mit dem her in Rœmisch lant rîten.

Des bitent si dich sêre. edel künic rîch, durch dîn selbes êre, nû wende dû ez heimlich. owê, jâ vürhte ich der stunde, ich gesehe si niemermêre mit gesunde.’

‘Daz wirt nimmermêr mîn wille und râtes ouch niht. offenlîch noch stille, mit mînem râte ez nimer geschiht. wes muotet ir tumben beide! überhebt mich unde iuch grôzer leide!’

Dô sprach trûreclîche Orte der junge degen ‘Ezel, künic rîche, wir belîben nimmer underwegen. von diu lâz uns ûz der huote. dâ vert hin sô manic recke guote,

Die ouch dâ wellent schouwen Berne und Rœmisch lant. wil dû uns des getrouwen, wir loben dir daz hie zehant: sô wir komen hin ze Berne, wir rîten vürbaz niht, wil dû daz sehen gerne.’

‘Redet drumbe swaz ir wellet, nimmer ez geschiht. swaz ir mir vor gezellet, ich lâze iuch dar benamen niht. swaz iu dâ geschæhe ze leide, dar umbe stürbe ich, liebe süne beide.’

Dô sprach der vogt von Berne ‘nû lâzet mir diu kint, sît si sô rehte gerne der reise sô gar vlîzec sint. ich gelâze si nimer ûz der huote: ich schaffe ze in die edelen helde guote,

Die si ûf allen strâzen habent in ir phlegen. si müezen sich des mâzen’ sprach von Berne der degen, ‘daz si indert vürder rîten, swâ ich si lâze daz si mîn dâ bîten.’

Ezel der rîche sprach dô an der stat ze dem herren Dietrîche ‘jâ vürhte ich Ermrîches rât. wirt er der kinde inne, er wendet dar zuo alle sîne sinne,

Wie er si verrâte und in getuô den tôt.’ her Dietrich sprach drâte ‘des sol uns nimmer werden nôt. ich geschaffe in solhe veste, dar inne si habent ruowe unde reste.’

‘Nu erlâzet si der reise, durch got, her Dietrich. machet mir niht vreise’ sprach Ezel der künic rîch. ‘gewurre mir iht an den kinden, dar umbe müeste ich immermêre swinden.’

‘Uns kan niht gewerren’ sprach Orte der degen. ‘ich getrouwe mînem herren, er læt uns niht under wegen. wendet ir uns der reise, künic hêre, so geseht ir uns vrô nimmermêre.’

Mit weinendem munde vrou Helche sprach zehant güetlîche dâ ze stunde zem künege von Hiunisch lant ‘Ezel, mîn lieber herre, dich manent dîniu kint alsô verre:

Lâ si albalde rîten, sît sis niht rât wellent hân! und besende an disen zîten beidiu mâge unde man, und bevilch dû, künic rîche, diu lieben kint dem herren Dietrîche.’

‘Mir nâhent michel smerze, daz geseht ir, vrouwe, wol. mir siuftet sô daz herze, mir werdent d’ougen dicke vol. mir nâhent herzensêre, swiez sich gevrüeget’ sprach Etzel der hêre.

‘Ir sult iuch des wol borgen’ sprach Orte zehant. ‘war umbe welt ir sorgen, edel künec von Hiunisch lant? wir behüeten wol ze wâre, daz wir den vînden inder komen ze vâre.’

Vrou Helche tugentlîche zem Bernære sprach ‘sô dir got der rîche, dû solt dich rihten dar nâch, des bit ich dich und Etzel mîn herre: ich bevilhe dir mîn liebiu kint alsô verre.

Mich muoz alrêste riuwen diu reise in Rœmisch lant. hin ze dînen rehten triuwen’ sprach vrou Helche zehant ‘antwurte ich dir, Bernære, die mînen lieben süne, die degen mære.’

‘Welt ir mirs getrouwen’ sprach her Dietrich, ‘mit gesunde sult irs schouwen schiere wider in Hiunisch rîch. daz habt ûf mînen triuwen, ir reise sol iuch nimmer geriuwen.’

Urloubes dô gerte her Dietrich zehant. mit weinen in gewerte diu küniginne ûz Hiunisch lant. her Dietrich huop sich drâte dâ er vant die schœnen Herrâte.

Urloup kurzlîche nam er an der stunt. die küneginne rîche kuste er dicke an den munt: alsô tet si in hin widere. sî gesach in leider trûric sidere.

Helche diu rîche, als mir ist geseit, diu hete heinlîche ir lieben kinden bereit zwelf tûsent wîgande, die si mit ir lieben kinden sande.

Die selben küenen recken wârn helde vil bewegen. do bevalch si den kecken die vil unverzagten degen, ir liebe süne beide. sît gehôrte si ir an in vil leide.

Vrou Helche hiez den Bernære vil balde zuo zir gân. si sprach ‘recke mære, drîzec tûsent recken wil ich dir lân, die habe von mir ze stiuwer.’ dô dancte ir vil güetlîch der gehiuwer.

Mit liehtem golde swære hiez vrou Helche laden vümf hundert soumære. des hete si vil cleinen schaden, want si tete ez gerne. daz gap si ze stiuwer dem von Berne.

Ez wirt nimmermêre, als wir hœren sagen, von küneginne hêre sô miltiu vrouwe getragen als vrou Helch diu reine. ir guot was al der werlde gemeine.

Als sich der Bernære des goldes underwant, urloup nam der mære von vroun Helchen al zehant und neic gezogenlîchen allen disen hôhen vrouwen rîchen.

Ez möhte got erbarmen hie an dirre stunt, vrou Helch umbevie mit armen, als mir daz buoch ist rehte kunt, ir liebe süne hêre. si gesach si leider lebende nimmermêre.

Die herren an ir hende wîste vrou Helche dan des hoves an daz ende. dâ sâzen si ûf diu kastelân. dâ muost man jâmer schouwen. diu kint kustn ir muoter unde ir vrouwen.

Dâ hin gein Rœmisch lande riten dô diu kint. die jungen wîgande wurden dâ erslagen sint. owê der jæmerlîchen vreise, diu an in geschach! vervluochet sî diu reise!

Der weinenden blicke, owê, waz der geschach! vrou Helche vil dicke nâch ir lieben kinden sach. owê, jâ sagt ir ir herze umb diu kint allen den smerzen.

Ir vil liehten ougen diu wurden ofte rôt. den segen si vil tougen nâch ir lieben kinden bôt. vür die selben stunde gesach man nie lachen von ir munde.

Etzel der rîche mit dem here reit unz hin ze Saders sicherlîche, alsô hât man mir geseit. dâ was sîn widerkêre: vür die zît gesach er diu kint nimmermêre.

Hin zogte mit gewalde der herre Dietrich mit manegem recken balde durch Saders ûf gein Isterrîch ûf eigen sîne marke. nû hœret von einem sturme starke.

Sich hebt in Rœmisch lande nôt und ungemach. von roube und von brande grôziu nôt aldâ geschach. von strîte michel wunder nû sult ir alrêst hœren besunder.

Als der vogt von Berne was komen in Rœmisch lant, dô sâhen in vil gerne die sînen recken al zehant. die kômen ouch mit schalle: in enphiengen wol die Lamparten alle.

Reinher von Meilân mit hêrlichen siten, und von Bôle Berhtram die kômen ûz der stat geriten, als sî enphâhen wolden ir erbeherrn, als si ze rehte solden.

Als Reinher von Meilân den Bernær ane sach, als ein unverzagter man der ûz erwelte recke sprach ‘got willekomen, vogt von Berne! wir sehen iuch mit rehten triuwen gerne.

Iuwer kunft in Rœmisch lant ist uns ze staten komen: ze vreuden ist ez uns bekant. ich enweiz, habt ir diu mære vernomen von dem künege Ermrîche: der lît mit here ze Raben gewalticlîche.’

‘Des mac wol werden guot rât’ sprach her Dietrich. ‘dâ ze Raben vor der stat muoz uns künic Ermrîch in kurzen zîten schouwen im ze schaden, des wil ich gote getrouwen.’

‘Daz vüege got der guote!’ sprach her Rüedegêr. ‘niht anders ich nû muote’ sprach der hôhe recke hêr ‘wan daz wir Ermrîchen vor der stat ze Rabene bestrîchen.

Dâ sule wir an im rechen manegen ungetriuwen rât. ich wil niht anders sprechen: swaz er untriuwen hât, daz müeze got rihten! vogt von Bern, wir suln uns darzuo phlihten,

Daz uns ieman vinde âne wer ûf den wegen. Ermrîchs ræte sint swinde: im wartent ouch die snelle degen, die ez wol geturren wâgen. nû hüeten uns vor sînen swinden lâgen.’

Hie mit disen mæren ritens vür sich dan, als ichz iu wil bewæren unde ouch wol bescheiden kan. gegen Bâdowe mit gewalde zogte von Berne der recke balde.

Si bewâgen sich der reise, als ichz vernomen hân. daz kom sît ze vreise manegem Ermrîches man, die drumbe tôt gelâgen. dô gie ez alrêst an ein starkez wâgen.

Als der vogt von Berne ze Bâdowe was komen, (nû sult ir hœren gerne, des ir ê niht habt vernomen und ouch von niemen sidere) dô leite sich daz starke her nidere.

Ûf daz hêrliche velt, als ich iu wil sagen, manic wünneclîch gezelt wart dâ ûf geslagen. dô leiten sich die geste mit gewalte ze Bâdowe vür die veste.

Dô sprach der Bernære wider sîne man ‘der mir sagte nû diu mære, wem ist diu stat undertân? daz weste ich harte gerne.’ alsô sprach der werde vogt von Berne.

Mit zühten sprach an der stunt der alte Hildebrant ‘deist under uns niemen kunt, edel künec von Rœmisch lant. wir werden sîn schier inne. ich ervar ez wol, als ich mich versinne.’

Der werde vogt von Berne vür die stat selbe reit. er wolde ervarn gerne, als ich iu ê hân geseit, wer houptman in der stat wære. daz sagt man schiere dem hôhen recken mære.

Er begunde halden nâhen ûf dem burcgraben. ûz der stat si daz wol sâhen si trahten ‘solde wir dich haben in unsern phlegen hinne, wir schieden dich von witzen und von sinne.’

Der unverzagte Helphrîch ruofen dô began einen recken lobelîch, den sach er an der zinne stân ‘heid! nû sage, recke guote, des ich dich vrâge’ sprach der hôchgemuote.

‘Wem wartet disiu veste? wer ist hie houptman? vil gerne ich daz weste, wen hât hie Ermrîch verlân? daz hôrte ich harte gerne, des vrâget iuch mîn herre von Berne.’

Dô sprach der degen Rienolt ‘ir vrâgt irn wizzet wes. iu ist niemen hie sô holt. oder waz welt ir des? wir vürhten iuch vil cleine. disiu stat dient iu vürbaz seine.

Wir haben einen houptman’ sprach Rienolt der degen, ‘daz sult ir rehte verstân, er kan wol urliuges phlegen. der tuot iu noch vil leide. sînen namen ich iu wol bescheide.

Rûmolt ist er genennet von Burgonie lant. den man vil wol erkennet. mit ellenthafter hant hât er bî sînen zîten wunder getân in manegen herten strîten.’

Dô sprach der recke Helphrîch ‘möhte daz geschehen, den werden recken lobelîch den wolde wir gerne sehen. mir ist wol kunt sîn ellen: ich und er, wir wâren ê gesellen.’

‘Den werden recken ziere den muget ir hiute sehen vor der stat vil schiere. swaz uns dar umbe mac geschehen, daz well wir lîden gerne. wolde uns geben vride der herr von Berne,

Sô tæte wir riterschaft noch hiute ûz der stat. wir sehen wol die grôzen craft, die der von Berne bî im hât. im wartent helde guote, die unverzaget sint in ir muote.’

‘Vride sî iu gebannen’ sprach her Dietrich. ‘vor allen mînen mannen sît âne sorge sicherlich. dar umb zwîvelt ir nimêre: tuot ritterschaft, des habt ir immer êre.’

‘Sul wir danne rîten ân angest vür die stat?’ dô sprach an den zîten her Dietrich ‘daz ist mîn rât.’ dan schiet der vürste mære, zuo den sînen reit der Bernære.

Dar nâch in kurzen zîten, als mir gesaget ist, dô sach man dort her rîten in vil kurzlîcher vrist mit speren und mit schilten ûz der stat die küenen und die milten.

Manic schœne kastelân sach man vor der schar, als ich vür wâr vernommen hân: ditze mære daz ist wâr. do bereiten sich engegene, ahei, die küenen Dietrîches degene,

Die tjostieren wolden durch prîs al zehant, die ouch vil gerne dolden, dâ von in êre wart bekant. heyâ, ez wâren helde guote. jâ nenne ich iu die degene hôchgemuote.

Nû hœret an den mæren, wie mir ist kunt getân. daz ein was von Bechlæren Rüedegêr der marcman: daz ander was von Bruovinge Nuodunc, den ouch wac vil ringe

Manlîchez ellen: des was er ein helt. sol ich iuz allez zellen, waz der recke ûz erwelt hât getân bî sînen zîten? er was ein helt in stürmen unde in strîten.

Daz dritte was von Lunders der starke Helphrîch. nû schouwet ditze wunder, daz sich dâ huop sicherlich. ahi, daz vierde was der starke Îsolt ûz Hiunischer marke.

Ir kastelân verdecket ze brîse wâren wol. ûz herzen wart gewecket manlîchez ellen, als man sol. ahi, ûf diu ors si sâzen, den buneiz si ze rehter tjoste mâzen.

Mit manlîchem ellen zogte ouch dort her Rûmolt mit sînen gesellen. der wâren drîzec oder mêr. si hielten under helme ûf dem ringe schône sunder melme.

Gedrabet under schilte ûf des ringes zil kom Rüedegêr der milte, als ich iu bescheiden wil, ûf eim brûnvarwen marke. gegen der tjoste hielt der recke starke.

Dô kom mit heldes muote her gegen im geriten Rûmolt der guote mit vil manlîchen siten. ahi, vür wâr ich iu bescheide, von stat triben si diu ors beide.

Si kunden ebene rîten schône mit dem sper. ir schenkel ze bêden siten die sach man vliegen entwer sam ez gewünschet wære. heiles wunschte Rüedegêren der Bernære.

Si trâfen bêde gelîche mit ritterlîcher hant. die recken ellens rîche, als mir ist rehte bekant, durch ir helme wende vertâten si diu sper mit ellens hende,

Daz diu drumstücke ze schivern vlugen entwer. man sach riechen den rücke von ir orsen hin unde her. nît si zesamne hâten, diu sper si manlîchen vertâten.

Ir schilde wâren von rîcher koste die si vuorten vor ir hant. wider ûf die tjoste kômen si beide gerant. dar triben si mit grimme, si stâchen diu sper durch die ringe,

Und ouch durch beide schilte, als ich vernomen hân, daz die recken milte, als mir ist rehte kunt getân, dâ muosten vallen beide. ir vriunde sâhen in ietwederhalp leide.

Doch hete getroffen sêre der milte marcman Rûmolt den recken hêre. des muoste er immer schaden hân. er moht sîn niht gelougen: im brast daz bluot ûz ze beiden ougen.

Si gelâgen durch die êre von den orsen nider. ez gemuote si vil sêre manegen tac dar nâch sider. von stat truoc man si beide. dem Bernære geschach an Rüedegêren leide.

Dar nâch zogten ûf die tjoste zwên ellenthafte degen, der wâpen mit rîcher koste was vil kürlich gewegen. ir namen wil ich iu nennen: si sint des wol wert, daz man si sol erkennen.

Von Lunders her Helphrîch der eine was genant, daz ander ein vürste rîch, geborn von Îrlant was der hôchgemuote: Sigebant sô hiez der helt guote.

Daz ich iu nû bescheide, daz ist diu wârheit: si wâren starc beide, von den ich iu hân geseit. in stürmen unde in strîten muost man si sêre vürhten ze allen zîten.

Gezimiert riterlîche wârens beidesant. si riten sicherlîche diu besten ors diu man dâ vant. ahi, si wâren stætes muotes, vil bewegen lîbes unde guotes.

Die recken vil vermezzen sâzen ûf ir marc. ez enwart dâ niht vergezzen, zwei sper unmæzlîchen starc diu vuorten si in ir handen. mit bewegem muote si zesamne randen.

Ir schenkel vlügelingen ze beiden siten dar si liezen dar clingen. si nâmen vîntlîchen war, wâ si treffen wolden: des warten si, als si ze rehte solden.

Diu sper von grôzer crefte zebrâsten von ir hant. si wârn an riterschefte zwêne recken ûz erkant, die küensten und die besten: des jach man in von vriunden und von gesten.

Mit bewegem muote ûf ir helme zehant die küenen helde guote heten diu sper schiere verswant. si riten vîntlîchen, diu ors muosten von ir stichen wîchen.

Manlîches muotes si wielten hie ûf disem wal. die dâ den prîs behielten, daz ist ouch in mîner zal. lât iu daz mær niht leiden: die Ermrîches muosten sigelôs danne scheiden.

Si wurden sô geletzet, als mir ist kunt getân, und sô sigelôs gesetzet, daz si des hœne muosten hân und schaden immer mêre. si beiagten dâ harte cleine êre.

Hie beleip vor der stat der herre Dietrich, als man mir gesaget hât, untz an den andern morgen sicherlich. nû sult ir hœren gerne, dô seic daz her ûf gegen Berne.

Mit vrœlichem muote daz her mit schalle reit. von Rœmisch lant der guote der was stolz und gemeit. ir leit daz was verborgen, si heten ûf die vînde cleine sorgen.

Als ze Berne komen was daz her von Hiunisch lant, dô wart geslagen ûf daz gras manec gezelt al zehant. vil vreuden si phlâgen, mit hôchvart und mit schalle si lâgen.

Schône und hêrliche wart ir dâ gephlegen. si wâren guotes rîche, alle Dietriches degen. ouch gap er in noch mêre, er tete an in die vürstenlîchen êre.

Des andern morgens, als ez tagte, dô kom ein bote gerant: alsô man mir sagte, den hete Friderich gesant ze dem herren Dietrîche. der sagte im diu mær von Ermrîche.

Er kom gegangen schiere vür den Bernær alzehant. dô seite der recke ziere dem edelen künege von Rœmisch lant diu starken niuwen mære, wie grôz daz Ermrîches her wære.

Als der vogt von Berne den boten an gesach, nû sult ir hœren gerne, wie rehte güetlîche er sprach ‘heyâ, nû sage an, helt guote, daz diene ich umb dich’ sprach der hôchgemuote.

‘Nû sage mir bediute’ sprach her Dietrich, ‘wie vil mac haben liute der ungetriuwe Ermrîch? getar ich im wider rîten? daz weste ich harte gerne an disen zîten.’

Dô sprach mit triuwen Alpher ‘herre Dietrich, ez ist allez daz komen mit wer dem ungetriuwen Ermrîch daz indert lebt ûf der erde. ich wæn her immermêr sô grôzez werde.’

‘Hâst ab dû daz geahtet, nû wie vil mac ir sîn? od ieman getrahtet, daz sage mir ûf die triuwe dîn. ez ergê mir swie got welle, swaz halt man mir der eise vor gezelle.’

Alpher der mære ze dem vogt von Berne sprach ‘geloubt mir, her Bernære, grœzer her ich nie gesach bî allen mînen zîten. ez möht al diu werlt mit sorgen gein im rîten.

Nû merket vil besunder’ sprach der küene man, ‘ist daz niht ein wunder, daz ich dâ gesehen hân: ich sach sîn her gescharte, niun hundert vanen ûf einiger warte.

Dar nâch sach ich rîten vil manic schare breit. bî den selben zîten ahte manic recke gemeit: eilf hundert tûsent oder mêre die hât Ermrîch: daz wizzet, künic hêre.

Maht dû nû der recken guoten vollen hân, der starken und der kecken’ sprach der unverzagte man, ‘des ist dir nôt wærlîche. ja vürhte ich, wir entrinnen Ermrîche.’

‘Dû trœst uns untrœstlîche’ sprach der marcman. ‘wir wellen sicherlîche doch dar umbe daz nicht lân, ze vlüste od ze gwinne welle wir besehen, wer ab dem wale entrinne.

Nû sult ouch ir niht bîten und bereitet iuch dar zuo, sît ez gêt an ein strîten, sô râte ich wol waz man tuo. daz nû ist daz beste, ir lâzet hinder iu alsô die veste:

Ob man dar vlühtic kêre, daz wir danne haben trôst. ich vürhte harte sêre, dâ werdent setel erlôst. ir sult des wol getrouwen, dâ werdent liehte helme verhouwen.’

‘Dû redest niht unrehte’ sprach her Dietrich. ‘ir ritter unde ir cnehte, nû bereit iuch alle gelîch. ir sult umb nihtiu sorgen. wir sulen uns von stat heben morgen.’

Dô hiez vil balde springen der vürste lobesan, des nahtes ze hove bringen beidiu mâge unde man. daz tâten si vil drâte. dô wart der herre Dietrich ze râte

Mit vriunden und mit gesten, mit mâgen und mit man, mit den aller besten, die er inder mohte hân. nû bit ich iuch’ sprach der Bernære, ‘daz ir mir râtet, edele recken mære.

Disiu sorge ist niht ringe, dâ wir mit umbe gân. wie tuo wir disem dinge, daz râtet’ sprach der küene man, ‘sô ez uns beste kome ze mâzen. nû sprecht, wâ welle wir diu kint lâzen?’

Dô sprach der Stirære, Dietleip der hôchgemuot ‘edel Bernære, ich sage iu rehte waz ir tuot. wir râten al gelîche, lât hie ze Bern die jungen künege rîche.

Dâ sint si wol verborgen vor aller missetât. sô durfe wir nicht sorgen umb si, swie ez uns ergât. si sint ân angest hinne’ sprach Dietleip, ‘als ich mich versinne.’

Dô sprach der vogt von Berne ‘ez ist ouch alsô guot. ich wil ez leisten gerne, diu kint sint hie wol behuot. wir suln si vil vrœlîch vinden. nû râtet ir, wen lâze ich bî den kinden?’

‘Daz tuot der iuwern einen, swelhen sô ir welt, Elsân den vil reinen’ alsô sprach Rüedegêr der helt. ‘der phligt ir wol mit êren unze wir zuo in herwider kêren.’

‘Râtet ir mir daz mit schalle’ sprach her Dietrich, ‘sô sendet nâch im alle und bevelhet im die künege rîch mit samt mir’ sprach der mære. nâch Elsân sande dô der Bernære.

Alsô der alte Elsân ze hove komen was, her Dietrich unde Etzeln man die wârn gesezzen ûf ein gras. dô si den edelen recken ane sâhen, do begunden si in güetlîche enphâhen.

Dô sprach der Bernære ze dem starken Elsân ‘nû wol mich, recke mære, daz ich dich sô getriuwen hân. hiut bevilhe ich dir alle mîn êre, der ich in dirre werlt sol leben immer mêre.

Hiut antwurte ich dir verre ûf die triuwe dîn’ sprach von Bern der herre ‘die lieben juncherren mîn, aller mîner sælden wünne. si sint mir lieber dann dehein mîn künne.

Und gedenke, herre Elsân, wie mir bevolhen sint vor manegem unverzagtem man mîner vrouwen Helchen kint. getriuwer recke guoter, ich bevilhe dir diu kint als got sîn muoter

Bevalch Sant Jôhan, dô er nam den tôt. nû behüete, herre Elsân, dich und diu kint vor aller nôt; und gip mir dîn triwe an disen zîten daz dû diu kint iht lâzest furder rîten.

Die stige solt dû verdürnen innen unde vor. ahte niht ûf ir zürnen, lâ si nindert komen vür daz tor ûf stige noch an strâzen. oder wirret den kinden iht, sô muost dû mir dîn leben lâzen.

Leben lîp und êre an in beiden stât. dû solt merken sêre, mîn wurde nimmermêre rât, wære niht ir muoter vrou Helche mîn vrouwe. dû sihst wol, swaz ich in Rœmisch lant gebouwe,

Daz kumet von ir helfe und von ander niemen mêr. si hât mir mit gelfe geschicket manegen recken her. heyâ, und wære niht diu guote, sô lebte ich iemer mit trûrigem muote.

Und habe ûf mînen triuwen phant, helt Elsân, und wæren dir elliu lant gewalticlîchen undertân, geschiht mir iht leides an den kinden. daz kan ich noch dû nimmer überwinden.

Sô tœte ich dich entriuwen, mit mîn selbes hant. ez kumet dir ze riuwen, des dû immermêre bist gephant an lîbe und an guote. nû lâ diu kint ninder ûz dîner huote.

Noch bevilhe ich dir mêre’ sprach her Dietrich ‘ûf alle dîne êre Dietheren den künic rîch, den lieben bruoder mîne. den antwurte ich dir ûf die triuwe dîne.

Hin ze einem hôhen phande ich dirs enpholhen hân. ich wold von Rœmisch lande mit vürzihte hiute gân, ê ich die herren lieze, ich vertrüege lîhter, daz man mich verstieze.’

‘Ich lâze in niht gewerren’ sprach Elsân der degen. ‘mîner lieben herren wirt mit triuwen wol gephlegen. got helf mir wan der stunde, daz ich iuch alle sehe wol gesunde.

Ob ich iuch doch niht alle gesunde süle gesehen, sô gebe got dazz sô gevalle daz iu sælde müeze geschehen. an allen iuwern dingen lâze iu got baz danne wol gelingen!’

‘Nu gesegen dich got, Elsân! wir wellen hinnen varn. dir ist Berne undertân. dû solt ez allez wol bewarn, als ich dir des getrouwe. got vüege daz ich dich vrœlîch geschouwe!’

Der Bernær trûreclîche ze Dietheren sprach ‘bruoder, künic rîche, nû habt hie guoten gemach, und habt in iuwer huote die hôhen edelen jungen künege guote.

Ir sît der jâre ein wênic elter dann si sint. nû lât ûz iuwern phlegen niht der tugenthaften Helchen kint. wellent si inder rîten, daz understât mit vuoge zallen zîten.

Behüet iuch vor den schulden, vil lieber bruoder mîn. ich gebiute iu bî mîn hulden, daz ir iuwer rîten lâzet sîn ûz der stat ze Berne. gedenket, bruoder Diether, dar an gerne,

Daz unser lant mit swære leider vaste stât: und wizzet’ sprach der mære, ‘ob uns inder missegât an vroun Helchen kinden, sô müeze wir ouch immermêre swinden.

An êren und an guote’ sprach her Dietrich. ‘an vürstenlîchem muote müez wir verderben sicherlich. verlies wir Hiunisch marke, sô sî wir tôt immermêre’ sprach der starke.

‘Dâ von sult ir gedenken, waz ich iu enpholhen hân. ir lât iuch niht bekrenken die jungen künege wol getân. durch got, belîbet hinne! diu kint sint tump, sô habt ir bezzer sinne.

Unverzagter Elsân, nu gedenke an mîniu leit, gedenke waz ich dir enpholhen hân unde ouch vor hân geseit. nu behalte mir mîn êre, daz wil ich umb dich dienen immermêre.

Vröude unde wünne stêt an dir allesant. vriunde unde künne daz stêt in dîn eines hant. des phlic hin ze dînen triuwen. nû lâ dich dînen dienest niht geriuwen.

Kumen dir diu mære, daz wir vlühtic worden sîn’ sprach der Bernære, ‘sô hüete bî den triuwen dîn, des bite ich dich vil gerne, sô lâz ûz dînen phlegen niht die stat ze Berne.

Und walte guoter sinne, helt vil lobelîch. besitze dich hie inne der ungetriuwe Ermrîch, so verzage niht, recke hêre, und volge des, als ich dich iezuo lêre.

Sî daz dû diu mære ieman hœrest sagen’ sprach der Bernære, ‘daz ich ze tôde sî erslagen, sô lâ dich nieman triegen und lâ dir die stat niht an erliegen’.

Mit zühten sprach dô Elsân ‘nû saget mir, herre mîn, ir sult mich rehte wizzen lân, wem sol ich wartende sîn, dâ iuch got vor behüete, verdurbet ir? vil sêre mich daz müete.’

‘Daz wil ich dir bescheiden’ sprach her Dietrich. ‘got behüete uns vor allen leiden!’ alsô sprach der künic rîch. ‘sô soltû, recke starke, Etzeln warten von Hiunischer marke.

Und gip im mit gewalde diu kint und die stat. ich weiz wol’ sprach der balde, ‘daz er daz nimmer gelât, er behalte wol sîn êre an mînem bruoder dar nâch immer mêre.’

‘Daz tuon ich vil gerne’ sprach her Elsân. ‘die stat hie ze Berne die mache ich Etzeln undertân. ich wil gote ab wol getrouwen, ir sult si noch vil lange selbe bouwen.’

‘Daz stêt allez in sîner hant.’ sprach her Dietrich, ‘der dâ Jêsus ist genant, der hôhe got von himel rîch. er sol ouch mîn reht bedenken und helfe mir mînen vînt bekrenken!

Des bite ich dich vil sêre, gewaltiger Crist! durch dîner marter êre, nû hilf mir ouch in dirre vrist, daz ich mîn leit gereche! und velle ouch mich, ob ich unrehte spreche!

Hilf mir wan nâch mînen schulden, als ich reht hân. swaz ich muoz jâmers dulden, dâ bin ich vil unschuldec an! alsô sprach der werde vogt von Berne ‘swaz ich sünde dâ begên, daz tuon ich vil ungerne.’

Vroun Helchen süne beide die kômen dô gegân. in was von herzen leide, daz si solten hie bestân. daz clagten si vil sêre. dâ trôste si vil manic recke hêre.

Hie mit disem mære kom der marcman. er sach mit grôzer swære die sînen lieben herren stân. wol trôst er si beide. er sprach ‘junge künege, war umb ist iu sô leide?’

Dô sprach clagelîche Scharphe der junge degen ‘ir herren lobelîche, nû lât ir uns under wegen. owê, daz ist uns ein herzensêre, wirn wizzen ob wir iuch gesehn immer mêre.

Owê des grôzen smerzen, der hiute an mir geschiht! wie ist mînem herzen, swenn iuch mîn ouge scheiden siht dâ hin zuo dem strîte! ich vürhte hart daz ichs niemêr erbîte,

Daz ir kumt her widere ûz der starken nôt.’ daz geschach ouch leider sidere, wan si kuren den tôt, vroun Helchen süne beide. si ligent noch ze Raben ûf der heide.

‘Ir jungen künege hêre, ir sult niht verzagen.’ alsô sprach Rüedegêre ‘nû lâzet iuwer grôzez clagen. ir sehet uns schiere gesunde hie ze Berne in vil kurzer stunde.’

Die jungen künege rîche kuste der marcman. harte clagelîche wart ein weinen dâ getân. owê der grôzen herzensêre! si gesâhen an einander nimmermêre.

Dietleip der Stirære der kuste ouch diu kint. owê der leiden mære! er gesach si nimmermêre sint. leider dâ wurden trüebiu ougen, dâ weint vil manic edel recke tougen.

Ez kuste weinunde der küene Blœdelîn mit siuftundem munde die vil lieben herren sîn. owê, dô gie ez an ein scheiden. sich huop grôzez weinen von in beiden.

‘Nû siuftet niht ze sêre’ sprach her Baltram. ‘gedenket, künege hêre, waz an iu êren sol gestân und lât iu niht wesen leide. gedenket waz ir iuwerm vater gehiezet beide,

Und Helchen mîner vrouwen, do ir urloup nâmet dan. gedenket an daz schouwen’ sprach der unverzagte man, ‘daz si tete nâch iu beiden. si beweinte vil sêre iuwer scheiden.

Ir clagelîch hende winden’ sprach her Baltran, ‘daz si tete nâch iu kinden, dâ sult ir wol gedenken an. mir ist daz kunt an disen zîten, si überwindet nimmermêr iuwer rîten.

Ir weinen âne mâzen, des vergizze ich nimmermê. ir clagen wil ich lâzen: mir tuot tûsent stunt als wê Etzel mîn lieber herre. dar an sult ir durch got gedenken verre.

Sîn weinen bitterlîche daz tuot mir wê genuoc. gedenket, künege rîche, wie er sich gein dem herzen sluoc. daz lât iu gên ze herzen und überhebet in maneges grôzen smerzen.’

Beidiu junge und alde kusten dô diu kint. owê der leide manicvalde! si gesâhens nimmermêre sint leider mit gesunde âne dâ ze Rabene vil tôtwunde.

Dar gie der Bernære dâ er diu kint gesach. der edele recke mære mit trüeben ougen zuo in sprach ‘nu gehabt iuch vil wol beide, und behüete iuch got vor allem herzen leide!’

‘Alsô phlege got iwer hinwidere, herre her Dietrich!’ die treher vielen nidere von ir ougen sicherlich ûf die hende und ûf diu cleider. daz was diu leste schidunge beider.

Baz danne hundert stunt kuste her Dietrich sînen bruoder an den munt und ouch die jungen künege rîch. als tâtens in ouch vil dicke. got mohte erbarmen die weinenden blicke.

Hie mit disem mære wart urloup genomen. nû ist ez sunderbære allez an daz ende komen. daz sult ir hœren gerne, danne vuor daz her und bliben diu kint ze Berne.

Nû gêt ez an ein strîten, daz muoter kint becleit. nû hœrt an disen zîten, ob ez iu ê niht ist geseit, wie daz her von Hiunisch lande Ermrîchen wuoste mit roub und mit brande.

Sô manegen recken balde gewinnet nimmermêr kein künec mit gewalde als von Berne der recke hêr. si sigen müezeclîche hin ze Raben gegen Ermrîche,

Dâ man dâ solde strîten, als ez ouch sît ergie. dô was ez an den zîten. als ich iu wil bescheiden hie, in dem herbest nâhen. der nebel was grôz, dâ von si wênic gesâhen.

Daz her von Hiunisch lande leite durch die marc der die strâze wol bekande, Hildebrant der recke starc, ûf velde und ûf stigen. dâ hin gegen Raben begunde daz her sigen.

Dô daz her von Berne wol raste lanc gereit, nû sult ir hœren gerne, wie mir daz buoch hât geseit. owê, der jâmer twanc sêre dâ ze Bern die jungen künege hêre.

Bi handen sich dô viengen der reinen Helchen kint. mit Diether si giengen, (alsô sagte man mir sint) dâ si ir meister vunden. si bâten Elsânen bî den stunden.

Si knieten vür in nidere und bâten in zehant. daz kom in ze schaden sidere, daz ist mir wærlîch wol bekant. si kusten in an die hende. owê, dô nâhent leider in der ende.

‘Elsân, meister herre’ sprach Orte der degen, ‘wir manen dich vil verre. wir sîn hie in dînen phlegen: nû gunne uns ze rîten vür die stat, wir kumen in kurzen zîten.

Wir wolden schouwen gerne ditze bou sô hêrlîch, die stat hie ze Berne. und læge diu in Hiunisch rîch, wes bedörft wir danne mêre? sîn hete mîn vater Etzel immer êre.’

Mit triuwen sprach dô Elsân ‘vil liebe herren mîn, die bete sult ir slehtes lân, wande des mac niht gesîn. mîn êre stêt ze phande dem unverzagtem künec von Rœmisch lande.

Ir sult hie inne bîten. ich getar iuch ninder lân, ich lâze iuch ninder rîten. daz sult ir âne zorn hân. wær iht daz iu leide geschæhe, den tôt ich gerner an mir selhen sæhe.’

‘Jâ well wir ninder verre rîten’ sprâchen diu kint. ‘Elsân, lieber herre, wir sîn niht sô gar blint. wir behüeten uns in der mâze, daz uns niht gewirret ûf der strâze.’

‘Nû überhebt mich maneger swære’ sprach her Elsân. ‘jâ vürhte ich den Bernære, gegen dem ich mich vertriuwet hân. ez möht mich lihte geriuwen, und wær doch immer kranc an mînen triuwen.’

‘Swaz dû unbillîche nû begêst dar an, gegen dem herren Dietrîche ich daz wol versüenen kan. ez kumet dir niht ze swære. wer wænstû, der ez sage dem Bernære?’

‘Lâz uns al balde rîten’ sprach her Diether. ‘wir weln mit niemen strîten, wir vüern deheiner slahte wer. wir kumen her wider schiere, daz geloube mir’ sprach der degen ziere.

Dô sprach der starke Elsân ‘nû sît der bete gewert. hinder iu wil ich niht bestân: sît ir ze rîten gerne gert, sô mac ich daz niht lâzen, ich wil mit iu rîten ûf die strâzen.’

Vrô wurden sicherlîche diu kint wol getân. die jungen künege rîche die gâhten vrœlîchen dan, dâ si diu marc vunden. si sâzen ûf diu ors bî den stunden.

Die hôhen künege wandels vrî die gâhten ûz der stat. si kômen leider alle drî ûf ein unrehtez phat. dem begundens nâch rîten. si truoc diu selbe strâze bî den zîten

In selben ze leide ze Rabene ûf den sant über die breiten heide, als mir daz mære ist bekant, (vervluochet sî diu reise! an in geschach vil jæmerlîchiu vreise)

Ê daz sich her Elsân berihte ûz der stat. nû wil ich iuch wizzen lân, wie man mir gesaget hât. owê, dô gâhte er nâch den kinden. er kunde si umb die stat ninder vinden.

Dô sluoc er sich ze herzen. grôz was sîn ungemach. dô tobte er von dem smerzen, dâ er der kinde niene sach. owê, dô mêrte sich sîn swære, vor leide weinte dô der degen mære:

Wan im sô vil ze leide bî sînem leben nie geschach. ûf der breiten heide er diu kint ninder sach. owê, dô muoste er stille halden: ‘nû muoz ich mit jâmer immer alden.

War sol ich nû kêren, ich armer Elsân? der mich daz kunde lêren!’ vil lûte ruofen er began. im was leit âne mâze, im antwurt leider niemen ûf der strâze.

Vür wâr ir daz geloubet, daz ich iu sagen wil: vreuden wart er beroubet, sînes leides wart sô vil. owê, dô reit er allez umbe. er wânde er vund die jungen künege tumbe.

In herzen und in gebete lac sîn ungemach. vor dem starken nebele er der kinde niene sach. owê, si riten im ûz den ougen. do begunde er suochen diu kint alsô tougen.

Er trahte in dem muote alsam ein trûric man. vil ofte sprach der guote ‘owê, waz hân ich getân! nû muoz ich immermêre hinvür leben mit grôzem herzen sêre.’

Er trahte in sînem muote ‘ich weiz wol daz diu kint in selben niht ze guote nâch dem her gestrichen sint. owê, nû werdent si versêret. si sint wan zuo dem here hin gekêret.’

Dô gurte er sînem Blanken baldeclîchen baz. mit manigem gedanken ûf daz kastelân er saz. owê, im was von herzen leide, dô reit er nâch den kinden ûf die heide.

Nû hœret vremdiu mære, diu tuon ich iu kunt; und merket sunderbære, waz ich iu sage an dirre stunt von den jungen künegen rîchen. die brâht niht guotes leider sicherlîchen

Ûf eine unrehte strâze dâ hin vür Raben nider, diu truoc si in der mâze dâ in geschach vil leide sider. owê, dâ nâmen si den ende von des ungetriuwen Witegen hende.

Welt ir hœren nû den strît, den wil ich iu sagen. nu vernemet rehte an dirre zît von grôzem weinen unde clagen. si kômen sicherlîche in ein tal, die jungen künege rîche.

Si heten allen den tac dem here gestrichen nâch. vür wâr ich iu daz sagen mac, in was unmæzlîchen gâch, owê, jâ meine ich, zuo dem leide, dâ sî erslagen wurden ûf der heide.

Die edelen künege hêre muosten ir rîten lân. si heten gestrichen sêre. do begunde ouch vaste sigen an diu naht in ze leide. si beliben alle drî ûf der heide

Unz an den andern morgen daz ez begunde tagen. mit vil grôzen sorgen sprach Diether, als ich iu wil sagen, ‘nû râtet, liebe herren’ sprach Diether, ‘ich vürhte grôzen werren,

Daz unser meister Elsân uns vil gesuochet hât. wir haben sêre missetân, wir sîn ze verre von der stat.’ ‘daz ist niht ein michel wunder’ alsô sprach her Orte besunder.

Diether der künic hêre hete sorgen vil. er sprach ‘mich wundert sêre, daz der nebel sich niht ûf lâzen wil. daz beswæret mich entriuwen. jâ vürhte ich, uns muoz diu vart geriuwen.’

Si gurten dô ir marken mit williger hant. die jungen künege starke die kêrten dâ mit über lant gegen dem mære nidere. dâ vant man si erslagen leider sidere.

Wol ze vruoimbizzît dô kômen si geriten ûf eine schœne heide wît. nû vernemt mit guoten siten, da erbeiztens ûf der heide, her Diether und vroun Helchen süne beide.

Si trahten vil besunder ‘jâ herre, wâ muge wir sîn?’ ‘des hât mich michel wunder’ sprach Diether ‘ûf die triuwe mîn. wir sîn missekêret, uns hât diu wîsheit unrehte gelêret.’

Hie mit disen sachen begunde ez werden lieht, sich begunde der nebel ûf machen. des hân ich missaget nieht, vil heiter schein diu sunne. nû vreu ich mich’ sprach Scharphe ‘dirre wunne.’

‘Wâffen, heiliger Crist’ sprach Orte zehant, ‘wie rehte schœne hie ist ditze hêrliche lant! owê, vogt von Berne, ir muget wol hie wonen immer gerne.’

In den selben zîten, als man mir sagte sint, dô sâhen dort her rîten den starken Witegen diu kint. owê, er was in komen ze nâhen! diu kint sprâchen wider einander dôs in sâhen

‘Jâ herre got der guote, wer mac jener recke sîn, der mit sô vrevelem muote dort haldet? trûtgeselle mîn, daz soltû uns bescheiden, weder ist er ein Cristen oder ein heiden?

Er haldet sô vrechlîche, er mac wol ein recke sîn. er ist hôhes muotes rîche, wæne ich ûf die triuwe mîn. welle wir zuo im rîten? er gebâret rehte sam er welle strîten.

Er haldet under schilde mit manlîcher wer.’ do erblihte ouch in der milde, owê, der junge Diether. do begunde er siuften tougen, im wurden sêre trüebe sîniu ougen.

Ein leit im in daz herze rehte von grunde schôz. do gedâhte er an den smerzen und an die untriuwe grôz, die er an im hete begangen. sîn lîp wart mit leide bevangen.

Vroun Helchen süne beide sâhen an Diethern wol, daz im was vil leide. ir ougen wurden von weinen vol. owê, si vrâgten in der mære, waz im sô snelle dâ geschehen wære.

‘Mir mac wol wesen leide’ sprach Diether der lobesan. ‘der dort haldet ûf der heide, der hât mir leide getân. owê, sold ich mich an im rechen, daz tæte ich gerne: waz mac ich mêr sprechen?’

‘Nû vrâge ich dich vil verre’ sprach Orte der degen, ‘Diether, lieber herre, wer ist der recke vil bewegen? wil dû uns in nennen, er komt sô hin niht, wir suln in an rennen.’

Mit manegen herzenleiden sprach Diether zehant ze sînen herren beiden ‘er ist Witege genant. heyâ, sold er von mîner hende iezuo hie kiesen den ende!’

‘Nû sî wir junge recken’ sprach Scharphe zehant, ‘wir sulen an den kecken und houwen sînes schiltes rant. wir müezen mit im strîten, und getar er unser ûf der heide erbîten.’

Her Witege der rief sêre. dô er diu kint ersach, der edele recke hêre vil unvorhtlîchen sprach ‘nû sagt mir, recken mære, sît ir gesinde von dem Bernære?’

‘Des werdet ir wol inne’ sprach Diether zehant. ‘owê, war tât ir iuwer sinne, dô ir verkouftet unser lant? daz arnet ir vil sêre, ir müezt noch drumbe geben lîp und êre.

Weizgot, her Witege, ir kumet sô hin niht. ir müezet hiute gelten die ungetriuwen geschiht. jâ büezet ir die schande, ir lât uns iuwer houbet zeinem phande.’

‘Ir redet kintlîche’ sprach Witege al zehant. ‘waz bestêt iuch Rœmisch rîche? varet wider in Hiunisch lant! und strâfet mich niht sêre, od ir beschouwet Hiunisch lant nimmermêre.’

‘Owê, zage ungetriuwer, wie tarstû sô offenbâr gestrâfen künege sô tiuwer! daz muostû arnen vür wâr.’ mit kintheit si dô sâzen ûf diu ors, der zageheit si vergâzen.

Eine strâzes nider ruhten über ein tiefez tal, diu scharphen swert si zuhten. owê, dô nâhent in ir val! gegen Witegen si dô randen, si vuorten bariu swert an ir handen.

Die hôhen künege rîche, als ich vernomen hân, die riten sicherlîche driu ûz erweltiu kastelân. owê, si wâren grimmes muotes, si bewâgen sich des lîbes und des guotes.

Als Witege der starke diu kint her rîten sach, dô gurte er sînem marke: vil baldeclîchen daz geschach. owê, der recke vil vermezzen der kom mit zorne ûf sîn ors gesezzen.

Er dâhte in sînem sinne ‘da ist et niht anders an. ê daz ich iu entrinne, ez muoz mir an daz leben gân.’ owê, dô nam er Schemmingen ze beiden sporn, dô liez er dar clingen.

Gelîch einem degene bungieren dô began Scharphe der bewegene reit den starken Witegen an. owê, mit grimmigem muote zuhte daz swert der junge degen guote.

Er lie dar nâher clingen mit ellenthafter hant. dô heten si gedingen, als mir daz buoch ist bekant. owê, si wâren küene beide: des gelac ir einer tôt ûf der heide.

Witege der hêre rante Scharphen an mit einem scharphen gêre. er traf, als ich vernomen hân, owê, den jungen künic rîchen ûf sîne brust, daz wizzet sicherlîchen.

Er traf den künic hêre tiefe in den lîp, daz dar nâch immer mêre zen Hiunen beweinte manic wîp. owê der jæmerlîchen stunde! er kom von danne nimmermêr gesunde.

Idoch swie kint wære Scharphe der junge degen, jâ saget uns daz mære, er werte sich mit starkem slegen. doch muoste er leider sterben, von dem starken Witegen gar verderben.

Scharphe der junge herre vrumte manegen slac ûz sînem herzen verre. ahî, waz er manheit phlac! er vaht mit heldes muote. owê, daz kom im leider niht ze guote.

Nû seit uns daz mære, wie wol her Scharphe streit. swie starc her Witege wære und swaz man wunders von im seit, doch sluoc im zwô wunden vroun Helchen sun, her Scharphe bî den stunden.

Dirre grôze smerze der tet Witegen wê und lac im in dem herzen. nû sult ir vernemen mê. mit grimme er Mimmingen zuhte, an den jungen Scharphen er dô ruhte.

Mit einem slage sô herte traf er dô daz kint. manlîch er sich werte, alsô sagte man mir sint. leider des enphie er herzensêre, er kom hin zen Hiunen nimmer mêre.

Daz ich iu nû bescheide, daz ist diu wârheit. gelîche si trâfen beide, Witege und Scharphe, als man seit. owê, der künec von Hiunisch rîche der lac dâ tôt, daz wizzet sicherlîche.

Ich stên der mære unlougen, swer mich der vrâgen wil: zwischen sînen ougen dâ stach er im des tôdes zil. durch hirne und durch zende sluoc er daz kint mit manlîcher hende.

Ê daz der künic rîche kom tôt ûf daz lant, daz wizzet sicherlîche, daz swert mit ellenthafter hant het er geriden vaste: er sluoc Witegen ûf den helm daz viuwer dar ûz glaste,

Daz die herten spangen brâsten sunder wanc. er moht sîn niht erlangen, sîniu maht diu was ze kranc. iedoch schôz Witege der starke mit dem slage nider von dem marke.

Ahî, nû sult ir mezzen und rehte daz verstân und ouch des niht vergezzen, wær Scharphe gewahsen zeinem man, ez müesten elliu rîche im gedient hân vil gewalticlîche.

Dô starp von Witegen hande der junge künic rîch. tôt zuo dem lande schôz Scharphe nider sicherlich. owê, dô sâhen in vil leide, ich meine dise edele künege beide.

Mit grimmigem muote rante her Orte dar. daz kom im niht ze guote leider sît, daz ist wâr. heid, dô saz ûf Schemmingen her Witege mit manlîchen sinnen.

Dô hete er bar in der hant Mimmingen daz edel swert. her Orte ûf Witegen kom gerant. dâ wart strîtes gegert. ahî, wie sich beide werten! mit grimme si ûf die helme berten,

Daz daz wilde viuwer ûz den swerten spranc. Orten vil tiuwer sînes bruoder ende twanc. owê, er hiete in gerne gerochen, dar an hân ich niht unrehte gesprochen.

Der künec ûz Hiunisch rîche ûf Witegen vaste wac harte manlîche manegen bitterlîchen slac. owê, jâ riuwent si mich leider, ir harnasch was niwan sumercleider.

Orte der mære habte Witegen vaste an, er sluoc im slege swære. der sweiz Witegen durch die brünne ran. owê, vil dicke weint der guote sînen bruoder Scharphen mit trûrigem muote.

Als der helt Witege sach, daz er niht moht komen dan, mit grimmegem muote er dô sprach als ein unverzagter man ‘owê, künec von Hiunisch rîche, ir habt getân hiute vil kintlîche.

Nu gedenkt in iuwerm muote’ sprach der küene man, ‘edel künic guote, ich hân iu leides vil getân. noch volget mîner lêre: vart iuwer strâze, dran geschiht iu êre.

Ich slahe iuch vil ungerne, daz sult ir vür wâr hân. ich vürhte den vogt von Berne, dem ir ze helfe sît verlân. heid, und hæt ir guote sinne, so entwîchet ir mir kurzlîch von hinne.’

‘Wærlîch, mordære, ez muoz dîn tôt nû sîn. du erarnest sunderbære den vil lieben bruoder mîn, der hie tôt lît ûf der heide. daz kumt dir noch hiute ze leide.’

‘Neinâ, künic rîche, nû lâz dînen zorn, und gedenke sicherlîche, ez ist ein schedel baz verkorn dann ob sîn wirt ie mêre. belîbestû gesunt, deist dînem vater ein michel êre.’

‘Bœswiht aller tugende, zwiu wænstû, daz ich sî? der mir in mîner jugende immer solde wonen bî, dâ hâstû mich von gescheiden. mir muoz mîn leben immer mêre leiden.’

Daz swert ze beiden handen nemen er began. zesamne si geranden. zwei ûz erweltiu kastelân mit nîde si dô twungen. si sluogen ûf die helme dazs erclungen.

Mit zorne si sich wanden, michel was ir nît. diu swert an ir handen diu wâren scharph an der zît, owê, si sniten gar ze sêre. daz überwant ouch Orte nimmermære.

Si triben an einander umbe ein harte lange stunt. Orte der tumbe machte Witegen drier wunden wunt. owê, daz half in lützel leider! Etzel muost sich ânen ir beider.

Mit grimme si dô rungen ein harte lange zît. diu swert in ir handen clungen, si vâhten einen herten strît. ditz ist ein wârez mære: geloubet mir, swie küen her Witege wære,

Er kom in michel sorge von dem jungen degen. er hete sîn allez horge und schônte sîn mit den slegen: des het er vil nâch sêre enkolten von dem jungen künege hêre.

‘Noch moht irz allez lâzen’ sprach Witege zehant. ‘ez kumet iu niht ze mâzen, wirt iu mîn grôzer zorn bekant, sô slahe ich iuch entriuwen. sô ez danne geschiht, waz hilfet mich mîn riuwen?’

‘Ich sol dich bringen inne, wes ich willen gên dir hân. dû kumest sô niht hinne, dû vil ungetriuwer man. dû giltest mir ûf der heide mînen bruoder, an dem ich mir sihe vil leide.’

Underdiu was ûf daz marc komen Diether. dar treip der edele vürste starc mit vil manlîcher wer. do bestuonden si in beide die jungen künege, Witegen ûf der heide.

Si vrumten herteclîche manegen starken slac ûf Witegen sicherlîche. si striten allen einen tac unz gegen dem âbunde. daz kom ir einem leider ze ungesunde.

An disem mære ich vinde, vil herte was ir strît. si sluogen slege swinde, si heten ûf einander nît in herzen und in muote. daz kom in leider sît niht ze guote.

Si habten in an vil sêre mit slegen âne zal. die jungen künege hêre die triben Witegen ûf dem wal hin und her vast umbe. owê, si wârn ze strîte gar ze tumbe.

Vor unde hinden liefen si in an. im wart von slegen swinden zewâre nie sô wê getân sam von den jungen herren. daz kom in leider sît ze grôzem werren.

Si habten in an sô vaste mit slegen ûf dem plân. daz viuwer rehte erglaste ûz ir helmen, daz ez bran. owê, die recken ûz erkorne die bestuont alrêst her Witege mit zorne.

Daz swert ze beiden handen nam der küene man. zesamne si dô randen, als ich vür wâr vernomen hân, mit grimmigem muote, Witege der starke und die helde guote.

Owê der leiden mære, diu zwischen in geschach! dar umbe ist mir vil swære. Witegen wart von grimme gâch. owê, des muoste enkelten sêre von Hiunisch lant der junge künic hêre.

Mit dem guoten swerte, daz Witege dô truoc, Orten er dô gerte. krefticlîche er dar sluoc, mit manlîcher hende sluoc er den künic nider unz ûf die zende,

Durch daz hirne nidere und durch den drüzzel dan. daz beweinte tiure sidere manic Etzelen man. owê, ze lebene er niemer phlac: er sluoc in durch daz houbet daz er tôt gelac.

Von Hiunisch lant der herre von dem orse schôz ûf daz lant vil verre. daz was ein unbilde grôz: ahî, alsô tôuwunde spranc ûf daz kint bî der selben stunde.

Witegen dem starken sluoc ez einen slac, daz er viel von dem marke und dar nidere gelac. owê, dô was ouch ez ergangen, den jungen künic hete der tôt gevangen.

Dô starp von Witegen hende der künec von Hiunischlant. er nam dô den ende unde starp ouch al zehant. owê, do gelâgen si ûf der heide, nû sint si tôt, vroun Helchen süne beide.

Diethern von Rœmisch lande wart von herzen leit. er nam daz swert ze hande, dar lief der degen unverzeit. ûf Witegen er dô berte, mit grimme sich her Witege dô werte.

Si liezen in strît enblanden, in was von herzen zorn. diu swert in ir handen den edelen recken ûz erkorn begunden erclingen sêre, man mohte ez hœren einer mîle lanc od mêre.

Si vrumten gremlîche ûf einander manegen slac. dâ von Diether der rîche leider sît tôt gelac. si begunden zürnen beide, si trâten ein langez phat ûf der heide.

Dietheren harte sêre sîner herren tôt betwanc. dem jungen recken hêre daz bluot ûz den ougen spranc. owê, ja geschach im nie sô leide, ân do er von Witegen selb starp ûf der heide.

Die slege von ir swerten clungen vreislîch. ze lebne si niht gerten. Diether der künic rîch der sluoc ûf Witegen sêre. dô wold er rechn die jungen künege hêre.

Mit grimmigem muote liefen si an einander an. die edelen helde guote wârn von den orsen gestân. ir slege hullen vaste, daz viuwer rehte von ir ougen glaste.

Nû hœret sunderbære, wie uns daz buoch las. mir kündet daz mære, wâ von Diether sô lange genas, daz wil ich iu bescheiden. lât ir iu daz mære niht leiden.

Von sô tumben jâren, als wir hœren jehen, alle die dô wâren, die Diethern hêten gesehen, die sagten von im mære, daz sîn gelîch mit snelheit ninder wære.

Beidiu dar unde dan, Diether vil dicke spranc. Witegen wegen er began manegen slac ân sînen danc. owê, daz vrumt ab in vil seine, er was im an den creften gar ze cleine.

Nû wil ich iu bescheiden hie an dirre zît: zwischen in beiden werte lange der strît, unz daz der tac wolde scheiden hin, als er tuon solde.

Swie kint her Diether wære, er tete doch Witegen wê. mir seit vür wâr daz mære, (nû ruochet ir vernemen mê) starker wunden viere sluoc Witegen Diether der ziere.

Daz muote Witegen sêre, er warf den schilt ûf daz lant. Witege der degen hêre nam daz swert in beide hant. ze einander si dô ruhten, diu scharphen swert si dô mit zorne zuhten.

Witege mit grimme lief Diethern an. owê, dô wac in ringe Diether der vürste wolgetân. verteilet sî dem swerte! er traf in an der stat, dâ er sîn gerte.

Nû hœret ditze mære, wie ich vernomen hân, und ouch die swinden swære. Witege der ungetriuwe man sluoc vil crefticlîchen ûf Diethern den jungen künic rîchen.

Daz swert durch daz ahselbein und durch den lîp nider wuot. zwîvel ist des dehein, ez was unmâzen guot. owê, daz was ein grôzer smerze: er sluoc enzwei leber unde herze.

Owê der grôzen schande, diu Witegen wart bekant! der künec von Rœmisch lande sprach ûz dem tôde sâ zehant ‘owê, bruoder Dietrîche, ich gesihe dich nimmermêre sicherlîche!’

Dem edelen künege werde diu craft gar besleif. nider zuo der erde mit beiden handen er dô greif und bôt si zuo dem munde zuo unsers herren opher sâ ze stunde.

Mit andâht und mit riuwe dâ sîn ende was. Diether der getriuwe lie sich nider ûf daz gras, ûf rahte er sîne hende: ‘ich bite dich, herre, durch willen dîner urstende,

Daz dû dich ruocht erbarmen über mîne grôze nôt und über mich vil armen durch dînen heiligen tôt. owê, nû mac et ich nimêre.’ dâ mit starp der edele künic hêre.

Disen grôzen smerzen weinen dô began mit allem sînem herzen Witege der ungetriuwe man. dô kuste er an den stunden Diethern in alle sîne wunden.

‘Und solde ich dich noch heilen von aller dîner nôt, got müeze mir verteilen, dar umbe wolde ich ligen tôt. owê, nû muoz ich sicherlîche alliu lant rûmen vor Dietrîche.’

Im was von herzen leide endelîch genuoc. sîne hende beide er im selben in diu ougen sluoc. ‘owê dirre leiden mære, der nû gevreischet von mir der Bernære.’

Er gie ze Schemmingen und wolde rîten dan. an allen sînen dingen geswichen im diu craft began. ahî, dô wart im êrste leide, er muost sich nider legen ûf die heide.

Nû ist endelîche daz mære ze ende komen. die jungen künege rîche die habent nû den tôt genomen. owê, nû riuwent si mich sêre: nû überwindet ez vrou Helche nimmermêre.

Nû lâze wir daz mære mit disen dingen stân. ir wizzet wol sunderbære, wie ez umb die herren ist ergân: welt ir nû erbîten, sô sage ich iu von stürmen und von strîten.

Nû wil ich sicherliche heben wider an den strît von Ermrîche, als ich vür wâr vernomen hân, und ouch von dem von Berne. disen strît den sult ir hœren gerne.

Als der herre Dietrich mit dem here was komen hin ze Raben vil gewalticlîch, als ir wol habt vernomen, ahi, im warten helde balde. dô leiten si sich nider mit gewalde.

Welt ir nû hœren gerne, diu hêrlichen gezelt diu hiez der von Berne slahen nider ûf daz velt. ahi, mit unverzagtem muote rotierten sich die küenen helde guote.

Sumelîche hât des wunder, daz daz her sô lange lac. nû hœret vil besunder: daz man dâ strîtes niht enphlac, dâ was ein vride gebannen beidenthalbe von ir bêder mannen.

Die wîl daz her mit vride lac ûf der heide wît, in der vrist dort geschach von den kinden der strît. owê, daz enweste niemen leider, des muost sich Etzel ânen sîner süne beider.

Daz her mit grimmen zorne gegen einander lac. die recken ûz erkorne, als ich iu wol gesagen mac, die rieten zuo dem strîte. mit disem mære ich iu niht langer bîte.

Nû wil ich niht vergezzen, ob ir ez hœren welt, den strît wil ich mezzen. man sach manegen kûrlichen helt zogen über gevilde. man sach dâ vliegen vanen unde schilde.

Der werde vogt von Berne zuo den sînen sprach, (daz sult ir hœren gerne) dô er dort her zogen sach Ermrîches helfære. der was sô vil, als uns saget daz mære,

Tal unde lîten daz was allez vol. nû hœrt an disen zîten, waz ich iu mêre sagen sol. der künec von Rœmisch lande sprach zuo dem alten Hildebrande

‘Nû habe in dînem muote durch die triuwe dîn, edel recke guote, zele waz der vanen muge sîn. vil gerne ich daz bekande. ez ist al diu werlt in Rœmisch lande.’

‘Dar umb sult ir niht sorgen’ sprach her Hildebrant, ‘ich nenne iu unverborgen die vanen alle hie zehant. nû hœret an disen zîten, ich sihe dort her ein breite rote rîten.

Dâ vor ein vane vliuget unmæzlichen breit. daz ouge mir niht liuget’ sprach Hildebrant der unverzeit. ‘heiâ, jâ sint ez helde guote, in scharphen strîten mit bewegem muote.

Diu rote diu dort her siget, diu ist mir wol erkant. der vane der dâ mit stiget, den vüeret Fruot von Tenelant’. daz wâffen wil ich nennen, daz ir ez vürbaz muget wol erkennen.

Daz was ein lewe von golde rôt in einem vanen wîz. nû sult ir hœren grôze nôt. dar an lac grôzer vlîz mit alsô rîcher koste. diu schar hielt vîntliche gein der tjoste.

Darnach wie vil der schare wæren mit dem vanen breit, daz ist mir ein kundez mære. man hât mir endelîch geseit, drîzec tûsent helde ir wâren, man sach si harte manlîch gebâren.

Nû vernemet mit guoten siten grôzes wunders mêr. ez kom ein schar dar nâch geriten, daz wâren et ouch recken hêr, die ich kan wol genennen, die muost man in scharphen strîten dicke erkennen.

Daz was von Normandie der künic Herman und sîner bruoder drie, als ich vür wâr vernomen hân. ahî, daz wâren ouch die kecken, die man dâ heizet ûz erwelte recken.

Einen vanen hêrlich den vuorte er an der hant. der ûz erwelte künic rîch der was in strîten wol erkant. man widersaz in sêre. des muoste enkelten manic recke hêre.

Rôt unde grüene der vane was gestalt. Herman der küene hete recken dâ gewalt zweinzec tûsent volleclîche. dâ mit wolde er dienen Ermrîche.

Bî den selben zîten dô kom geriten her, die ouch wol torsten strîten, wol drîzic tûsent ode mêr. heiâ, daz wâren recken mære, die tâten schaden dem edelen Bernære.

Welt ir nû gerne vernemen, sô tuon ich iu kunt. iu sol ze hœren wol gezemen, ich wil iu sagen an dirre stunt: ez wâren helde starke, geboren von Messie ûz der marke.

Walkêr was genennet der helt vil hôchgemuot, den man vil wol erkennet, dâ man mit strîte wunder tuot. der wolde Ermrîche helfen ûf den küenen Dietrîche.

Dar nâch zogte mit gewalde, daz sage ich iu vür wâr, Gunther der vil balde mit maneger hêrlichen schar. owê, der vuorte helde starke, die tâten schaden ûf Rœmischer marke.

Einen vanen grasgrüene vuort her Gunther. selbe was er küene, er machte leider âne wer vil manegen Etzeln recken. grôzez mort tâten dâ die kecken.

Dar nâch in kurzen zîten dô zogte ûz der stat, die ouch wolden strîten, als man mir gesaget hât, zwelf tûsent wîgande. die wâren komen von Westvâlen lande.

Ir aller houpherre, der zwelf tûsent man, von dem huop sich dâ werre. sînen namen ich iu wol nennen kan. Erwin was er genennet, den man in scharphen strîten wol erkennet.

Dô zogte ûf daz gevilde der küene marcman. vierzic tûsent schilde die wârn im einen undertân. ahî, die wâren von Westvâle. die Hiunen widersâzn in vaste bî dem mâle.

Wie sîn vane was gestalt, daz wil ich iuch wizzen lân, den dâ vuorte der helt balt. der was hêrlich getân. ahî, daz was ein strûz wilde, gar swarz in einem wîzen schilde.

Sturmgêr von Hessen ouch mit schalle zuo reit mit schœnen scharen sehsen. daz wâren helde vil gemeit, ahî, die getorsten wol gestrîten mit den vînden swinde ze allen zîten.

Sîvrit von Niderlant der zogte dar nâch. einen vanen rôt in der hant man den vürsten vüeren sach. sehs und zweinzic tûsent degene die vuort von Niderlant Sîvrit der bewegene.

Môrunc von Engellande der vuorte vierzec schar. nieman in dâ bekande wan Hildebrant, daz ist wâr. einen vanen guote den vuorte selbe der vürste hôchgemuote.

Daz was ein pantel silberwîz, als ich vernomen hân, (dar an lac manic spæher vlîz) daz velt swarz als ein ram. owê, daz wâren helde stæte, die rieten ûf den von Berne swinde ræte.

Vünfzehn tûsent wîgande die rîten ouch dort her mit dem von Grüenlande, der hiez der herzoge Strîtgêr. der daz nû hœren wolde, sîn vane was gepruoft von liehtem golde.

Wie solde ich iu genennen die recken ûz erkant? wand ich mac niht erkennen daz drîzigst teil ir allersant. ir sult ab wizzen sicherliche, dâ wâren vier und vünfzic vürsten rîche.

Der schal wærliche was âne mâzen grôz. daz velt sicherliche von des heres craft erdôz. si herbergten vaste von der stat wol anderthalbe raste.

Man staht die vanen alle nider ûf den plân. mit einem starken schalle lâgen Ermrîches man. ahî, nû sult ir hœren gerne, dô aht sîn her der werde vogt von Berne.

Mit unverzagtem muote sprach her Dietrich ‘ir edele helde guote, swaz iuwer sî von Hiunisch rîch, ir sult iuch dar nâch phlihten. mich dunket daz sich die vînde rihten

Sam si wellen strîten: dem gebârent si gelîch. nû sul ouch wir niht bîten’ sprach der künec von Rœmisch rîch. ‘nu bereitet iuch mit schalle. ir sult gedenken hiute dar an alle,

Daz uns niemen mac scheiden ûf dirre heide wît, die lieben zuo den leiden. nu bedenket daz an dirre zît, ir vriunde und ir geste. wizzet daz uns verre sint die veste.

Ir gürtet vlîzecliche diu guoten kastelân und gebâret manlîche. ez mac niemen understân, ez gêt hiute an ein vehten. bitet got, daz er uns helfe nâch dem rehten,

Und uns hiute bedenke durch sînen bittern tôt und unser vînde bekrenke: sô überwind wir unser nôt. wie wol ich des gote getrouwe! des wis ze dînem kinde bote, himelisch vrouwe!

Nû mane ich iuch noch mêre’ sprach her Dietrich, ‘ir edele recken hêre, ir sult gedenken sicherlich und traht in iuwerm muote, als ez uns allen kumen sule ze guote.

Ich sihe dort her sigen die Ermrîches man, die vanen vaste stigen. ez muoz et nû an ein strîten gân. nû kum uns got ze helfe! si zogent dort her mit einem grôzen gelfe.’

‘Des sol werden guot rât’ sprach her Rüedegêr. ‘swie vil ab Ermrîch recken hât an disen strît brâht mit im her, wir mugen ê niht ersterben. nû lâze uns got den sic an im erwerben

Durch sîner marter êre!’ sprach der marcman. ‘ir edelen recken hêre, nû gedenket dar an, wir sîn von einem lande. gedenket dar an wie uns Etzel sande

Ze helfe dem von Berne dâ her in Rœmisch rîch. manlîch unde gerne helfet retten dem herren Dietrich sîn êre und sîne marke. des lônet iu mit guote der vil starke.’

‘Wir sîn gemanet lîhte’ sprâchen Etzeln man. ‘nû tuot iuwer bîhte, ir edele recken lobesan, gegen gote andæhtecliche. daz râte ich iu mit triuwen sicherliche.’

Mit gemeiner menige vallen man began nider an ir venige, alle Dietrîches man. ein bischof was ir bihtigære. wider den beclagten si sich aller ir swære.

Si wurden bihtec âne wer, als ich vernomen hân. ez wâren under dem her vierhundert cappelân, die hôrten ir bîhte schône. got der vuogte in craft mit sînem lône.

Dô die recken lobelichen ir bîhte heten getân, die armen zuo den rîchen, dar nâch ruofen man began ‘nû gâhet, helde, balde! ir heizt iu diu ors bringen mit gewalde!

Dort zogent her die vînde, daz sehet ir alle wol. wir sullen vehten hiute daz daz gevilde werde vol von manegem edelen tôten. wir sulen ros und liute nider schrôten,

Helme unde schilde und swaz wir kumen an. wir tungen daz gevilde, daz man enouwe sehe gân den bach von dem bluote. daz ist mîn wille’ sprach Wolfhart der guote.

‘Wir suln uns alsô rechen’ sprach der wüetende man, ‘mit scharen durch si brechen, daz man offen sehe stân halsperg unde helme. dâ wil ich vehten’ sprach Wolfhart ‘sunder melme,

Daz von mînen handen muoz vliezen daz bluot. ich sol mînen anden rechen’ sprach der helt guot. ‘ich gemache setel lære, daz man dâ von muoz immer sagen mære.’

Nu vernemet sunderliche, waz ich iu sagen wil. die recken ellensrîche die heten hôher vreuden vil gegen disem starken strîte. ‘ahi’ sprach Wolfhart, ‘wie ich hiute rîte!’

Diu ûz erwelten kastelân diu wâren elliu komen, diu man ze strîte solde hân, als ir ê wol habt vernomen. ahî, dô garten sich mit schalle zuo dem strît die küenen recken alle.

Verdecket wurden dô diu marc in manegen herten stâl. die ûz erwelten recken starc die heten zageheit nider mâl. si wâren vestecliche ze scharen gewegen gegen Ermrîche.

Der zageheit si vergâzen, daz sage ich iu vür wâr. ûf diu ors si sâzen. nû sult ir hœren sunderbâr iteniuwiu mære. mit zühten sprach dô der Bernære

‘Ich wolde iu râten gerne, ir helde lobelich, uns ist diu stat ze Berne leider verre sicherlich. nû varen wîsliche. ez sint kündege liute bî dem künege Ermrîche,

Die wol kunnen vâren der liute ûf alle wegen. si habent bî ir jâren maneges strîtes gephlegen. ahî, si lâzent sich niht schrecken. jâ sint ez allez ûz erwelte recken.’

‘Daz ist niht ein wunder’ sprach Wolfhart der helt. ‘ir gellt dest mêr under’ sprach der recke ûz erwelt. ‘ich vürhte mir niht sêre: ist ir vil, wir slahen ir deste mêre.

Raben unde gîre die wartent âne zal. edel Dietleip von Stîre, nû schouwe nider ûf daz wal: si wartent vaste der tôten. si enruochten wær wir alle nû verschrôten.

Nû habet manlîch herze und unverzagten muot. ez ist ein cleiner smerze, der schade den man uns hiute tuot. ir neigt iuch under schilde, ir tunget vast mit tôten daz gevilde.’

Der künec von Rœmisch rîche unvorhtecliche sprach ‘ir helde lobeliche, nû riht iuch alle dar nâch. ich sage iu daz in triuwen, wir sulen Ermrîche schaden briuwen,

Daz er ez überwinde hinevür nimmermê. und schaffet daz man vinde, ê daz der starke strît ergê, solhe sinne in iuwerm muote, daz Ermrîche nimmer kume ze guote.’

‘Nû volget mîner lêre’ sprach der milte marcman: ‘dar an geschiht iu êre, daz sult ir slehtes ûf mir hân. nu gebiet in kurzen zîten: bitet mâge und ouch die liute rîten.

Daz râte ich endeliche’ sprach Rüedegêr der degen. ‘ir sehet wol Ermrîche, der hât die sînen alle gewegen. nû tuot ir sam, vogt von Berne: daz sehe wir sicherliche alle gerne.’

Dô sprach der herre Dietrich als ein getriuwer helt ‘ir küene recken lobelich, nû schaffetz selbe swie ir welt. des volge ich iu vil gerne swenne ir welt’ sprach der vogt von Berne.

‘Sô wil ich rotemeister wesen’ sprach her Rüedegêr. die besten hiez er ûz lesen, gebiten wart dâ niht mêr. nû zweient sich diu mære. mit zühten sprach dô der Bernære

‘Sô ir nû ûz gezellet mâge unde man, sô schafft mich swar ir wellet: daz wil ich âne zorn lân. ez gêt nû an ein strîten. mit swem ir welt, dâ heizet mich mit rîten.’

‘Sô wil ich râten gerne’ sprach der marcman, ‘edel vogt von Berne, drîzic tûsent sult ir hân der edelen welrecken. dir leistent getriuwen dienest die vil kecken.

Swaz der von Stîrmarke hie allezan sîn, Dietleip, degen starke, die sulen warten dem vanen dîn. ich weste gern diu mære, wie vil der dînen nôtgestalden wære.’

‘Des bringe ich dich wol inne, milter marcman. als ich mich versinne, zweinzec tûsent recken ich hie hân. ahî, daz sint allez recken, die turren ez in strîte vol gestrecken.’

Von Kriechen her Dietrich Rüedegêren ane sach. einem degene vil gelîch mit unverzagtem muote er sprach wider den vogt von Berne ‘ich gevaht bî mînen zîten nie sô gerne

In allen stürmen herten, des sult ir iuch an mich lân. ich und mîne geverten, uns wartent ahzehn tûsent man. mînen vanen wil selbe ich leiten: wir suln uns in iuwerm dienste hiute arbeiten.

Von Lunders her Helphrîch sprach als ein wîgant ‘zwelf tûsent helde lobelich wartent hie mîner hant. ahî, die slahent slege swinde, si habent sich bewegen wîb unde kinde.’

Hinvür trat her Îrinc als ein helt guot. ‘wir haben getrahtet unser dinc’ sprach der recke hôchgemuot. ‘sehzehn tûsent volleclîche die habe wir hie, künec von Rœmisch rîche,

Ich und mîn bruoder Erewin, daz wizzet vür wâr. habt daz ûf den triuwen mîn, swar ich kêre mit der schar (des sit ân alle swære) die helfent iu mit triuwen, unverzagter Bernære’.

Gotel der marcman sprach zem künec von Rœmisch lant ‘sehs und zweinzec tûsent recken ich hie hân, des sult ir hân ûf mir phant. die geturren wol gestrîten. mit dem vanen wil ich selbe rîten.’

Von Antioch her Îmiân sprach als ein helt guot ‘under mînem vanen ich hie hân vierzic tûsent recken hôchgemuot. ahî, daz sint die dâ strîtent! Ermrîche si noch hiute ze leide rîtent.’

Dô sprach von Bruovinge der starke Norpreht ‘mich vreut ein guot gedinge, wir vahten alle umb daz reht. sehs und drîzec tûsent helde guote die wartent mir mit unverzagtem muote.’

‘Daz ist ein schar hêrlich’ sprach her Rüedegêr. ‘ob got wil, ez sol Ermrîch gewinnen solich herzensêr, daz er unz an sîn ende dar umb muoz immer winden sîne hende.’

Von grôzen Ungern Îsolt sprechen dô began ‘vogt von Berne, ich bin iu holt und dar zuo alle die ich hân, des bringe ich iuch wol inne. ich hân hie vünfzec tûsent man, als ich mich versinne.’

Einen vanen breiten, künic Dietrich, den wil ich selbe leiten, ûf den ungetriuwen Ermrîch. ahî, wir kumen im ze leide! man siht noch hiut die tôten ûf der heide.’

Nuodunc unde Rüedegêr die heten in ir phlegen zweinzic tûsent recken hêr. ahî, daz wâren allez degen in stürmen unde in strîten! si worhten manegiu wunder bî ir zîten.

Hinevür trat mit gewalde her Walther zehant. der küene und der balde sprach wider den künec von Rœmisch lant ‘vil edeler Bernære, dû solt ouch hœren mîniu mære.

Vrou Helche diu milde hât dir gesendet her vünfzec tûsent schilde, (ich wæn aber wol, ir sî mêr) und als manic ors verdecket. Ermrîch wirt mit riuwen erwecket.

Der houbetman sol ich sîn, si wartent mîner hant. Etzel der herre mîn hât den vanen her gesant, der ze Hiunisch lant gehœret. die vînde werdent noch hiute gestœret

Mit jâmer und mit leide, dazz muoter kint beweinen muoz. noch hiute ûf dirre heide mache wir lebens mit tôde buoz und manegen satel lære.’ ‘daz vüege got!’ sprach der Bernære.

Nû hân ich niht vergezzen od ich habe iu genant, alle die sint gemezzen, die dem künec von Rœmisch lant mit triuwen helfen wolden. die heten sich gescharet als si solden.

Nû gêt ez an ein strîten, als mir gesaget ist. si wâren an den zîten mit vil manlicher vrist ûf diu guoten ors gesezzen. von stat zogte daz her vil vermezzen.

Nû sult ir hœren vür wâr, wie man mir hât geseit. in der vorderisten schar der werde vogt von Berne reit. ahî, der künec von Rœmisch lande valte des tages manegen tôten zuo dem sande.

Selb er den vanen vuorte vor der breiten schar. ahî, wie erz ruorte in dem strîte! daz ist wâr. diu her sigen begunden gegen einander kürlich bî den stunden.

Beide berge unde tal diezen began. harte michel was der schal, ob ir ez rehte welt verstân. man hôrt dâ michel krachen, dô sich diu her begunden ûf machen.

Welt ir nû hœren gerne, wie mir ist geseit: nâch dem vogt von Berne Dietleip von Stîre reit mit drîzectûsent recken. ahî, die vuorten einen vanen kecken.

Nâch Dietleip dem Stîrære zogt her Rüedegêr. dem volgten sunderbære zweinzictûsent recken hêr. ir sult vür wâr gelouben, si begunden Ermrîchen sêre rouben.

Nâch Rüedegêr dem milden zogt her Blœdelîn mit ahzehn tûsent schilden. ahî, daz muosten ouch recken sîn! si vuorten ein vanen schœnen. dô wolte got Ermrîchen hœnen.

Her Dietrich von Kriechen het dâ manegen man. des wart vil der siechen mit starken wunden vreissan. si worhten starkiu wunder. des muoste Ermrîch geligen under.

An êren und an guote vil leide im geschach. got liez in ûz der huote. sich üebete sîn ungemach, untz ez gie an al sîn êre. daz diente er wol: waz touc der rede mêre?

Nû hete sich mit schalle daz her gar bereit. si wârn zen rossen alle. als man mir vür wâr hât geseit, die biderben und die starken sâzen alle gewâpent ûf den marken.

Mit zühten sprach her Helphrîch als ein wîs man ‘edel künec von Rœmisch rîch, woldet irz âne zorn lân, einen rât riet ich iu gerne, der iu ze vrumen hulfe, her von Berne,

Und ouch der Ermrîche an alle sîn êre gât.’ si sprâchen alle gelîche ‘daz wære uns ein vil guot rât. nû rât an, helt mære, dâ mit wir überwinden unser swære.’

‘Des wil ich iu berihten’ sprach Helphrîch der degen. ‘ir sult iuch dar nâch phlihten und sendet balde after wegen zweinzic tûsent recken. jâ nenne ich iu die küenen und die kecken.

Ez nâhent alzan zuo der naht’ sprach her Helphrîch. ‘dar umb ich des listes hân gedâht, daz sage ich iu, her Dietrich. wir mugen Ermrîchen nimmer baz gewinnen, daz wizzt endelichen.

Dâ müezt ir mich selb ane manen, daz ich wâr hân. wir haben Ermrîches vanen’ sprach der unverzagte man. ‘den vüere wir ze leide Ermrîche morgen ûf die grüenen heide.

Alle die naht sul wir rîten’ sprach her Helphrîch ‘und hie niht langer bîten. wir suln den künic Ermrîch von êrn und von guote scheiden. nû lâzet iu mînen rât niht leiden.

Als ez morgen tagen welle, (nu vernemt mit guoten siten) sô sul wir Ermrîches her allez haben umberiten. wir suln des niht erwinden, Ermrîches vanen sul wir dann ane binden.

Und habt in iuweren sinnen, waz ich gesprochen hân. sô dan diu her beginnen von stat zogen ûf den plân und daz man welle strîten, sô sul wir hinden an die vînde rîten.

Sô wænet Ermrîche, wir gehœren in an. den vanen hêrliche widersitzet nieman. ahi, wie wir si danne enphetten! unser lant wir von Ermrîche retten.

Die mit dem vanen rîten, die sol man ûz wegen. dâ mit sol man niht bîten’ alsô sprach Helphrîch der degen. ‘ich weste ez harte gerne, wer suln si sîn?’ sprach der vogt von Berne.

‘Welt ir, die wil ich nennen, die iu dâ hin sint guot. ir mugt si gerne erkennen. ez sint recken hôchgemuot, edel vogt von Rœmisch rîche. ich wil ir einer sîn’ sprach her Helphrîche.

‘Sô sî daz ander Ortwîn, der recke hôchgemuot, und habet ûf den triuwen mîn, er ist iu zuo der reise guot. der dritte recke mære daz sî Dietleip der Stîrære.

Sô sî daz vierde Sindolt ein recke ûz erkorn. wir geben Ermrîch den solt dâ von muoterkint wirt vlorn. daz vümfte sî der kecke Îsolt, ein unverzagter recke.

Daz sehste sî her Sintram, den lâze ich hie nieht. daz sibende sî her Baltram. und kumet uns der morgen lieht, sô brüef wir herzen swære. Ermrîche mache wir vil setel lære.

Daz ahte sî her Blœdelîn, ein recke lobelîch. daz niunde sol von Kriechen sîn der unverzagte Dietrich. des zehenden mac ich niht vergezzen, daz sî her Nuodunc der vil vermezzen.

Mit uns sol ouch rîten Gotel der marcman. der hilfet uns ze strîten. dannoch sul wir einen hân, der uns die strâze leite. daz sî her Hildebrant der unverzeite.’

Nû hân ich iu geahtet mit ûz genomen phlegen und ebene getrahtet die vil unverzagten degen, die küenen und die ræzen. von danne huoben sich die widersæzen.

Sehs und zweinzic tûsent kastelân die vuortens mit in dar, diu besten diu si mohten hân. disiu mære diu sint wâr. Hildebrant der was wisære al dâ hin, geloubet mir diu mære.

‘Nû vüege uns got der guote, daz wir in kurzer stunt’ sprach Hildebrant der hôchgemuote ‘an einander sehen wol gesunt. sô kan uns niht gewerren.’ urloup nam Hildebrant ze sînem herren.

Si gâhten über gevilde alle die naht. si riten niwan die wilde. dâ si dâ heten hin gedâht, dar kômen si âne sorgen, rehte dô in lûhte der morgen.

Von dem here wol mîle lanc erbeizten si ûf daz wal. ir sinne wâren niht ze kranc. si leiten sich nider in ein tal, dâ kund si gesehen niemen. dâ strihten si daz harnasch mit den riemen.

Nû sult ir hœren âne strît, ich wil iu sagen sâ. rehte unz an vruoimbizzît lâgen si in der huote dâ. dar nâch in kurzen stunden diu starken her ûf machen sich begunden.

Nu lât iuch niht verdriezen und vernemet über al. sich huop ein starkez diezen und ein vreislîcher schal. berc und tal nâch krahte, dô sich daz Ermrîches her ûf mahte.

Dô hiez künic Ermrîch blâsen daz herhorn. daz erhôrte Helphrîch. dô sprach der recke ûz erkorn ‘nû sul wir niht langer bîten. ich sihe daz her alzan von stat rîten.

Nû sitzet ûf diu kastelân!’ sprach Helphrîch der wîgant. ‘wir suln niht langer hie bestân.’ ‘wer wil den vanen hie ze hant vor uns allen vüeren? wir sulen ez mit strîte vaste rüeren.’

‘Ich wil des vanen selbe phlegen’ sprach her Helphrîch. ‘nu gedenket, ûz erwelte degen, wie iuch mant her Dietrich. helfet weren im sîn êre. daz dient er mit guot umbe iuch immer mêre.’

Hie mit disem mære si nâch dem here riten. die recken lobebære die zogten mit vil senften siten unz daz si kômen alsô nâhen, daz si diu her zesamne bresten sâhen.

‘Habt ir gegürtet diu marc?’ sprach her Helphrîch. dô sprâchen die recken starc ‘wir sin bereit alle gelîch.’ ‘bungieret swenne ir wellet, sô sî diu vriuntschaft elliu ûz gezellet.’

Die helme ûf gebunden heten si zehant. Helphrîch zuo den stunden nam den vanen in die hant. er sprach ‘nû schrîet alle gelîche ahtschavelier Bern!’ daz tâten si manlîche.

Diu ûz erwelten castelân diu nam man mit den sporn. diu molte begunde ûf gân. dar trîben die recken ûz erkorn mit unverzagtem muote. daz kom Ermrîche niht ze guote.

Diu sper si schiere verstâchen ûf Ermrîches man. die schefte si zebrâchen, als ich vür wâr vernomen hân. dar nâch griffens zuo den swerten. der Ermrîches si ze grimme gerten.

Si begunden ûf si dringen mit vreislîchen slegen. si liezen dar clingen die starken Dietrîches degen. si striten bî den stunden, des die Ermrîches man vil tiure enphunden.

Si riten si dar nidere rehte alsam ein strô. si mohten sich niht gehaben widere. des wâren die Dietrîches vrô. si tâten schaden grôzen: si sluogen die angeleiten zuo den blôzen.

Si liezen inz enblanden, als si des twanc diu nôt. diu swert in ir handen diu wârn von bluote vaste rôt. owê, der mort was dâ niht cleine. daz bruofte allez Ermrîch der unreine.

Daz breite gevilde allez vol von tôten lac. helme unde schilde, als ich vür wâr wol sagen mac, die wurden dâ verschrôten. ungezalt vielen ze tal die tôten

Beidenthalbe nidere ûf daz breite wal. die Ermrîchs sluogen ouch hin widere. si vielen vaste âne zal. owê, daz velt lac getunget. Wolfhart des tages vaste junget.

Daz was ein michel wunder, daz ebene unde tal (nû merket vil besunder) lac allez vol überal. owê, dâ sturben helde guote. die tôten sach niemen vor dem bluote.

Herte dô wider herte vil eislîchen streit. swinde was daz geverte, alsô hât man mir geseit. owê der jæmerlichen swære! dâ wart erslagen manic recke mære.

Wol unz über mitten tac werte der strît. dâ was slac wider slac, dar nâch haz wider nît. den solt arnten si vil tiuwer. si sluogen rehte, daz daz wilde viuwer

Niht wæher ûz ir helmen vlouc, sam ez vuorte ein wint. ze vehten si dâ niht entrouc. daz beweinten wîp unde kint leider sît vil sêre. si kômen widere lebende nimmermêre.

Von ir slegen wæte ein schal, dâ maht gein crefte ranc, daz beide berge unde tal von ir starken slegen clanc. an dem mære ich daz vinde, ir slege wâren bitter unde swinde.

Dâ was niht wider kêrens an. sich hebet alrêst der strît. dô kom man wider man mit zorne an der selben zît. owê der jæmerlichen stunde, des man mit strîte alrêste dâ begunde!

Die schiver von den scheften vaste vlugen entwer, dâ diu her mit creften und ouch mit manlîcher ger durch einander brâchen. owê, wie si dâ sluogen unde stâchen!

Die ringe sich entranden und ouch die helme lieht. diu swert in ir handen (des missesage ich nieht) durch die halsperge wuoten. dâ sturben die grimmen zuo den guoten.

Ez wâren die besten dâ zuo einander komen. man sach daz viuwer glesten, als ich vür wâr hân vernomen, vil liehte ûz ir schilden. owê, wie si an einander zilden

Mit tiefen verchwunden durch manegen halsperc! niht anders sî kunden, si worhten tievellîchiu werc. man sach daz velt dâ tungen. die Hiunen sturben zuo den Amelungen.

Die Dietrîches degene die liezen dar gân. alsô tâten her engegene die küenen Ermrîches man. an einander si sich houten, daz velt si mit den tôten vaste bouten.

Ze lebene si niht gerten, daz wart dâ vil wol schîn. ez kunde von swerten ein sturm nimmer herter sîn. si stâchen, si sluogen, grôzen haz si ûf einander truogen.

Wol unz über mitten tac werte dirre strît, daz man anders dâ niht phlac. nû hœret an dirre zît. als der mitte tac begunde sigen zuo, dô kom ouch an der stunde

Der edele Bernære mit manlîchen siten und manic recke mære. si heten al den tac gestriten von ir walstat her engegene. alrêst kômn zesamne die Dietrîches degene.

Dâ wart unmæzlîchen grôz der starke herschal. daz gevilde allez nâch dôz, alsam tete berc unde tal. starc was ir messenîe. Hornbogen volgten schœner schare drie.

Welt ir nû hœren gerne, mit wem der dâ was: er diente dem von Berne, alsô uns daz buoch las. er vrumte Ermrîche grôzen schaden, daz wizzet sicherliche.

Die Dietrîches recken die stuonden ûf daz lant. die starken und die kecken die liezen ruowen alzehant diu ors sicherlichen. sî hiezen den sweiz ab in strîchen.

Die helme si ab gebunden, als man mir sagte sint. an den selben stunden, dô vuogte in got einen wint, der kuolte in ir herze. dô huop sich aber Ermrîches smerze.

Mit zühten sprach her Rüedegêr als ein helt guot ‘wir sulen bîten nû niht mêr, ir küenen recken hôchgemuot. bereitet iuch an disen zîten: ich sihe dort her ein starke rote rîten.

Dâ vor ein vane vliuget, der verret harte wol. mîn sin mich niht entriuget: ich wil râten, als man sol, daz wir uns wegen alle. man biuzt uns an mit einem starken schalle.’

Si gurten den marken mit willen underwant, die küenen und die starken, mit vil werlîcher hant. ûf diu kastelân si sâzen. ir rote si in dem starken sturme mâzen.

An den selben zîten, dô daz wart getân, dô sach dort her rîten Rüedegêr der marcman, ahi, einen recken guote, der was aller rôt von dem bluote.

Er selbe und sîn kastelân was allez bluotvar. solde er tûsent wunden hân, daz wil ich sprechen vür wâr, er möhte sô eislîche niht sîn gewesen, daz wizzet sicherliche.

Wolfhart der starke reit den selben an. der saz ûf einem marke, dem besten daz diu werlt ie gewan. ahi, daz wil ich iu nennen, daz ir ez an dem mære mugt erkennen.

Valke was daz ors genant, als ich vernomen hân. ez was daz beste über elliu lant, des hôrte ich jehen manegen man. als ich mich kan versinnen, des wart ouch der von Berne sît wol innen

In manegen herten strîten, dâ er ez inne reit. ez sweich im nie bî sînen zîten, als mir vür wâr ist geseit. heid, ez was ân mâzen stæte. ez vlouc über velt rehte alsam ez wæte.

Nû hœret sunderbære, waz ich iu tuon bekant. Starcher der vil mære kom Wolfharten an gerant. diu sper si beide verswanden, si wâren starc in armen unde in handen.

Wolfharten den recken er von dem orse stach den küenen und den kecken. dô daz her Dietrîch gesach, daz wart im harte swære. mit grimme reit dar der Bernære.

In twanc unmæzlîche ein grimmiger zorn. der künec von Rœmisch rîche sluoc ûf den recken ûz erkorn mit beiden sînen handen: er schiet Starchern von allen sînen landen.

Er wunte in harte sêre durch einen helm guot, daz dem recken hêre beidiu hirne unde bluot ûz brast dâ ze sînen ougen. er sprach ‘dû maht des slages niht gelougen.’

Ouch sluoc Starcher der mære, als ich iu tuon bekant, dem küenen Bernære den schilt enzwei vor der hant mit manlîcher hende. dâ mit nam her Starcher den ende.

Nider von dem kastelân viel er ûf daz gras: der vil unverzagte man harte schiere tôt was. von Berne der starke zôch sich alzehant zuo dem marke.

Ditze edel kastelân gewan her Dietrîch, als ich vür wâr vernomen hân, alrêste des tages sicherlich. ahi, ez kom im sît ze guote: ez gevreute in harte dicke in sînem muote.

Dar nâch in kurzen zîten (welt ir vernemen mêr) dô sâhen si zuo rîten die edelen welrecken hêr: die kecken zuo ir handen, die heten gesamnet sich von manegen landen.

Sîvrit von Niderlant reit in der vordristen schar. einen vanen vuorte er in der hant harte guoten, daz ist wâr. heid, jâ volgten im die kecken: er hete mêr danne drîzic tûsent recken.

Manec verdecket kastelân man dâ vüeren sach. welt ir, ich wil iuch hœren lân, wie der vogt von Berne sprach ‘ir mæren helde guote, nû trahtet mit unverzagtem muote.

Ich sihe dort her rîten vil manegen wîgant: die wellen mit uns strîten. des sît gewarnet alzehant, und râtet, liebe gesellen, wen wir der unsern an si schicken wellen.’

‘Wer tæte ez sô billîche’ sprach Wolfhart zehant ‘als ir, künec von Rœmisch rîche? wir vehten wan umb iuwer lant.’ dô sprach der vogt von Berne ‘ich tuon ez selbe billich unde gerne.

Die mir nû helfen wellen, die sitzen ûf diu marc.’ ‘wir sulen die vînde erschellen’ sprach Wolfhart der recke starc ‘daz si des sêre enphinden. wir scheiden si von wîben und von kinden.’

Vierzec tûsent recken die wâren nû geschart. die küenen und die kecken in liehten brünnen wol bewart, ahi, ûf diu ors si sâzen. si kêrten in gelîchen ebenmâzen

Und zogten under schilde aldâ hin zehant. Rüedegêr der milde sprach wider den vogt von Rœmisch lant ‘owê, ez gêt nû an ein strîten. ich sihe dort einen den tiuristen rîten,

Den elliu diu rîche manlîch hânt ûz erkant. ez ist sicherliche der hôhe künec von Niderlant. ahi, im volgent helde guote.’ alsô sprach Rüedegêr der hôchgemuote.

‘Daz ist ein grôziu vreise’ sprach her Wolfhart. ‘si geriuwet liht diu reise, daz si die starken widervart gesagent nimmer mêre. si lâzent uns hie ir lîp unde ir êre.’

Si zogten müezecliche vür sich ûf daz velt. die helde ellensrîche die gâben bluotigen gelt ûf der breiten heide. in geschach dâ beidenthalbe leide.

Dô der vogt von Berne mit sîner rote was komen, (nû sult ir hœren gerne, wie ich an dem mære hân vernomen) ahi, mit ellenthaftem muote was ouch komen Sîvrit der guote.

Zwischen in beiden was ez niht ze wît, daz wil ich iu bescheiden. si hielten unlange zît die edeln künege rîche. Sîvrit reit an den starken Dietrîche.

Zwei scharphiu sper si vuorten in ir ellens hant. mit zorne si diu ors ruorten, si kômen ûf einander gerant. si warten vîntlîche ietweder des andern sicherliche.

Welt ir nû hœren gerne, sô tuon ich iu bekant: den werden vogt von Berne traf der künec von Niderlant mit einem stiche swinde, als ich ez an disem mære vinde,

Durch den schilt vesten und durch den halsperc. von nœten muoste bresten daz herte stæline werc. er hete vil nâch den ende genomen von Sîvrides hende.

Wie er sich erwerte, daz tuon ich iu kunt: od waz in ernerte, daz sult ir hœren hie ze stunt. daz tete ein hemd sîdîne, daz truoc er under dem halsperge sîne.

Dar in vier heiltuom lâgen versigelet alle zît, diu sîn vil vaste phlâgen, swenne er reit in den strît. ich wil iuch des bewîsen, dar ûf wider want daz sperîsen.

Der schaft muost abe bresten von disem stiche starc. von sînen creften vesten muost sich biegen daz marc. doch sult ir hœren gerne, Sîvrides vergaz ouch niht der vogt von Berne.

Er traf vil williclîche mit manlîcher hant Sîvrit den künic rîche, als mir daz mære ist bekant. den helm durch beide wende stach er daz sper slehte unz an daz ende,

Daz man sach ze stücken die drumes zol ûf gân. dar begundens rücken die starken Dietrîches man: als tâten her engegene die unverzagten Sîvrides degene.

Ze sturme si sich wanden an der selben zît, si zuhten diu swert ze handen. sich huop ein grimmiger strît. owê, wie si ir leit râchen! mit den roten si durch einander brâchen.

Ze lebene si niht gerten. dâ wart ein suonestac. man hôrte von ir swerten manegen bitterlîchen slac ûf die helme clingen. jâ heten si ze lebene niht gedingen.

Swinde was ir geverte. maht gegen der sterke vaht. beidenthalbe man sich werte. der strît werte unz an die naht. owê, si stâchen unde sluogen, an einander si vil cleine vertruogen.

Den solt si arnten tiuwer leider ûf dem wal. daz grimme wilde viuwer sach man vliegen âne zal ûz helmen und ûz schilden. dâ gelâgen die argen zuo den milden.

Si sturben sunder melme vaste âne zal. si sluogen durch die helme, daz daz houbet und diu hirneschal enzwei sich allez trande. mort tâten die von Etzeln lande.

Die starken Sîvrides man die wâren ouch bewegen. si liezen vast dar nâher gân. swaz si erreichten mit den slegen, vür war ich iu bediute, si sluogen beidiu ros unde liute.

Si liezen inz enblanden, grimmic was ir zorn. die ringe si entranden, die starken recken ûz erkorn. si houten tiefe wunden, die dar nâch wurden nimmermêr gebunden.

Si bruoften grôzen smerzen. grimmic was ir nît. si wâren hertes herzen. si vâhten einen starken strît. vür wâr ir daz geloubet: si sluogen durch diu hersnier ab diu houbet.

Daz sagte man mir sidere, die wîle der tac schein, unz ûf den gürtel nidere den lîp und ouch daz ahselbein houwen si begunden. daz wâren ungefüege tiefe wunden.

Man sluoc dâ eteslîchen gar ob der gürtel abe, daz wizzet sicherlichen. sich ringte Sîvrides habe, er vlôs dâ edele recken. sich gulten ouch vil tiure dâ die kecken.

Si enwolden niht entwîchen beidenthalben dan. si liezen dar strîchen baz danne ich iuz gesagen kan. mort tâten die vil kecken. man sach die gêre in den halspergen stecken,

Daz ez dâ zuo dem herzen hinden ûz brast. owê des grôzen smerzen! dâ starp manic werder gast. vil cleine was ir barmen. man sach manegen wunt in houbet unde in armen.

Was daz niht ein wunder diu nôt diu dâ geschach? nû merket vil besunder, manegen man dâ rîten sach, dem houbet unde zende allez was enzwei, dar zuo ab die hende.

Der jâmer was manicvalt, michel was diu nôt. owê, dâ sturben helde balt. daz breite velt daz was rôt. owê, überal von bluote. da gelâgen ûz erwelte degene guote.

Dirre sturm werte die naht unz an den tac, daz man niht anders gerte niwan daz man vehtens phlac. owê, dô was vil cleiniu wunne. als des morgens ûf gie diu sunne,

Dô lebte dâ nieman, daz sage ich iu vür wâr. der zweier rîchen künege man die wâren tôt alle gar: ir lebt wênic bî den stunden. dennoch si des sturmes niht erwunden.

Her Sîvrit und her Dietrîch die wâren ûf dem wal zesamne komen sicherlich. ungehiuwer was der schal, der dâ clanc von ir swerten. mit nîde se beide an einander gerten.

Die edeln recken milde, daz ist mir wol bekant, die heten die schilde gar gehouwen von der hant. si vâhten sam si wunnen. diu ougen in vor zorne rehte brunnen.

An einander si dâ muoten mit slegen, daz ist wâr. die halsperge rehte gluoten von der hitze sunderbâr. daz mac ich unsanfte lîde: heizer tunst der rouch ûz ir lîbe.

Die slege ungehirmlichen clungen ûz ir hant. si liezen dar strîchen die küenen recken ûz erkant. si getorste niemen scheiden, ez mohte ouch niemen komen zuo in beiden.

Si wâren bêde tumbe und grimmic gemuot, si triben einander umbe die hôhen edeln recken guot. der sweiz von in schræte, ein swinder wint von ir swerten wæte.

Si werten lange an ir wer, als mir daz buoch ist kunt. durch daz creftige her sluogens vier und drîzec stunt. vil wît wârn ir gazzen. si begunden mit slegen einander vür vazzen.

Si vâhten mit einander hie ein harte lange zît, daz si sich geschieden nie. harte swinde was der strît. doch kom ez zuo den stunden, ê daz si des strîtes vol erwunden,

Dô hete der von Berne den künec von Niderlant, welt ir ez hœren gerne, gevetelt vür mit heldes hant. er sluoc die slege vreislîchen, her Sîvrit muoste allez vor im wîchen.

Dô in her Dietrîch brâhte wider an die walstat, der Bernær gedâhte, als man mir gesaget hât, und lief dar an der stunde, als er immer allermeiste kunde.

Harte crefticlîche sluoc er einen slac Sîvride dem ellens rîchen, daz er nider vor im gelac gestrahter in dem schilde. sigelôs wart der küene und der milde.

Dô der herre Dietrîch den andern slac dar bôt, her Sîvrit der lobelîch rief vil lûte, des gie im nôt, ‘edel künec von Rœmisch rîche, lâ mich leben, sô tuost dû vürstenlîche!’

Den guoten Palmungen er dem vogt von Berne gap. des het er in betwungen. er liez in leben, als er in bat. iedoch sprach her Dietrîch mit sinnen ‘her Sîvrit, ichn lâz iuch niht komen hinnen.’

Er bevalch in sehs recken hie an dirre zît. die huoten des kecken. her Dietrîch kêrt widr in den strît mit ahttûsent helden guoten. ein starkez her kom mit dem milden Fruoten.

Des wâren sehzehn tûsent man, als mir ist geseit. die rante der starke Nuodunc an mit manegem degen unverzeit. owê, sich huop an den zîten zwischen in ein grimmigez strîten.

Fruote von Tenemarken vuort einen vanen breit. sich huop von dem starken beidiu nôt und arebeit. von stat si dors sprancten, diu sper si vil müezeclîchen sancten.

Nuodunc der mære der reit Fruoten an. hie mit ich daz bewære, dâ kom man wider man mit grimmigem muote. dâ liezen si die zageheit ûz der huote.

Diu sper si verstâchen, dâ huoben si mit an. die schefte si zebrâchen. dô wart langer niht verlân, si ruhten zuo den swerten. mit dem grimmen tôde si an einander werten.

Vil rehte man nû merke, waz ich sagen wil. diu craft vaht gegen der sterke. dâ geschach schaden harte vil, mit strîte si sich wurren, diu ors von den stichen sêre kurren.

Die küenen recken milden, die vehtens niht entrouc, die sluogen daz ûz den schilden und ûz den helmen viuwer vlouc. die halsperge vesten die muosten vor ir grimmen slegen bresten.

Si begunden sêre koufen daz Ermrîches golt. die tôten lâgen ze houfen. verteilet müeze sîn der solt, den si dâ enphiengen! der recken slege gar ze verche giengen.

Man hôrt die slege hellen ûf manegem helme lieht. die starken und die snellen die schônten an einander nicht. si wurfen, si stiezen, mit den swerten si die tiefen wunden miezen.

Mich nimt des immer wunder, wie si ez mohten erwern. ir slege sô besunder muosten ûz von beine swern. mit grimme si daz wal trâten, dâ si sich des lebens bewegen hâten.

Dâ was nôt und ungemach leider âne zal. die tôten man vallen sach von den orsen ûf daz wal. die jungen und die alden, ez sturben dâ die tumben zuo den balden.

Swaz iu von herten strîten ie wunders ist geseit bî iemannes zîten, daz ist ein cleiniu arebeit wider disen sturm starken. si vielen ungezalt von den marken.

Die den mort dâ tâten, die sint mir wol bekant, die sich des bewegen hâten, daz si bürge unde lant nimmermêr wolten beschouwen. si begunden êrst die herten ringe houwen.

Die halsperge sich lôsten von ir herten slegen. ich enweiz wes si sich trôsten. die vil unverzagten degen die vâhten sam ez brünne, dâ was niwan wê und lützel wünne.

Daz starke wilde viuwer ûz ir helmen spranc. ir slege wârn ungehiuwer, grôzer zorn si des twanc. swen si mohtn erlangen, umb den was ez alzehant ergangen.

Der grimme zorn wahte ûz ir herzen grunt. si sluogen daz ez krahte, daz ist mir endelîchen kunt. diu swert clungen in ir handen, mit slegen si die liehten helme entranden,

Daz si sich muosten klieben unz ûf die patwât. die leiden zuo den lieben, als man mir gesaget hât, die gelâgen dâ tôte. si gulten sich bêdenthalbe vil genôte.

Herte der sturm was, als ich vernomen hân. man sach bluomen unde gras mit bluote allez enouwe gân. die helme und die schilde die lâgen ungezalt ûf der vilde.

Slac dâ wider slac gelac hin unde her. si striten allen den tac. wâ geschach daz iemêr? si tâten schaden herten, beidenthalben si sich manlîch werten.

Nuodunc der guote kecklîchen vaht, und gegen im der milte Fruote. der strît werte unz an die naht. nu geloubet mir diu mære, her Dietleip der edele Stirære

Der hete mit heldes muote einen recken bestân. Marke hiez der guote. er was ein ûz erwelter man in stürmen unde in strîten. er begie vil manic wunder bî sînen zîten.

Von Alzey her Volkêr den bestuont her Paltram. daz wâren zwêne recken hêr, als ich vür wâr vernomen hân, mit lîbe und mit guote. si wâren unverzaget in ir muote.

Von Lunders her Helphrich, daz tuon ich iu bekant, der kom harte manlîch an einen recken gerant. des namen wil ich iu nennen, daz ir in an dem mære muget erkennen.

Er was von Pârise, Baldunc sô hiez er. er warp nâch hôhem prîse, dar zuo was im harte ger. owê, die zwêne helde mære die sluogen ûf einander slege swære.

Gotel der marcman der bestuont mit ellens hant einen recken lobesan, des name ist mir wol erkant. Wikêr was er genennet, den man in manegem strîte wol erkennet.

Îrinc der mære mit manlîchen siten der kom sunderbære an einen recken geriten, der hiez Hiuzolt von Grüenlande. owê, niht guotes leider in dar sande.

Blœdelîn der kecke, als mir daz mære ist kunt, den bestuont ein recke mit starker craft an der stunt. ich wil des niht vergezzen, Sturmholt hiez der vil vermezzen.

Von Swangöu was er geborn. er hete an sîner schar zwelf tûsent recken ûz erkorn: daz ich iu sage, daz ist wâr. owê, die nâmen dâ den ende allermeist von Blœdelînes hende.

Nû hœret starkiu mære, diu ich iu tuon bekant. Walther der Lengesære der bestuont mit ellens hant Heimen den vil starken. si sâzen bêde ûf zwein guoten marken.

Von Kriechen her Dietrîch den bestuont an der zît ein edel recke lobelîch. nû sult ir hœren âne strît, wie der ist geheizen. den sach man dâ tiefe wunden meizen.

Bitrunc von Môrlande hiez der volcdegen. vil wol man in bekande. er was ein vürste ûz gewegen mit manlîchem ellen, ich künd iu sîn tugent nimmer vol gezellen.

Îsolt der guote der bestuont mit ellens hant, der küene hôchgemuote, einen recken ûz erkant. der hiez Gêrolt von Sahsen. er was mit starken strîten wol gewahsen.

Von Salnike her Berhtram den bestuont ein recke guot, den ich genennen vil wol kan: Sigehêr hiez der hôchgemuot. er was von Zæringen, er hete zuo dem lebne niht gedingen.

Nû hœret disiu mære, waz dâ die recken tuont. Wolfhart der lobebære einen recken dâ bestuont, den küensten und den besten, den si über beidiu her dâ inder westen.

Von Norwæge hiez er Buozolt, als mir ist geseit. der was den Hiunen niht ze holt: des kômen si in arebeit. Buozolt und Wolfharte die kômen gein einander wol gescharte.

Rüedegêr von Bechelæren, als ich hân vernomen an disen starken mæren, was her gegen im bekomen der marcgrâve Balther von Etzelingen. dô huop sich ein vreislîchez dringen.

Hildebrant der alde, als mir ist gesaget, der küene und der balde, den bestuont ein recke unverzaget, Tibân von Gurdenwâle. sich huop ein grôzer sturm bî dem mâle.

Von Antioch her Imiân, ein mærer helt guot, den bestuont, als ich vernomen hân, ein rîcher vürste hôchgemuot. der was vermæret wîten, den man dâ wol erkande in allen strîten.

Daz was von Wurmz Gunther, als mir gesaget ist. mit vil manlîcher wer was er ein recke ze aller vrist. der edele künic hêre pruofte den Hiunen manic herzen sêre.

Den unverzagten Gêrnôt bestuont her Eckewart. des gelac dâ manic helt tôt. des sî vervluochet diu vart, die si in Rœmisch lant ie getâten! Ermrîch der hete si alle verrâten.

Nentwin von Elsentroye der kom ouch in den strît. den bestuont mit grôzer schoye Wolfkêr der starke bî der zît. ahi, zesamne kômen dô die kecken. des sturben dâ die küenen welrecken.

Ruodwin von Treisenmûre der kom dort her geriten. den huop ouch vil untûre (nû vernemet mit guoten siten) vehten ze allen stunden. dem hân ich einen geverten vunden.

Den wil ich iu nennen, ob ir ez hœren welt, daz ir in muget erkennen. Friderich hiez der helt: er was von Sêlande, den man in vremden landen wol erkande.

Her Stuotfuhs von Rîne (nu vernemet âne zorn ûf die triuwe mîne) den bestuont ein recke ûz erkorn, des ich niht mac vergezzen: Sigemâr sô hiez der vil vermezzen.

Er was dâ ze Engellande ein gewaltic künic rîch. zweinzec tûsent wîgande die wârten im dâ volleclîch. owê, die wurden erslagen sidere, der kom nie deheiner lebendec widere.

Von Brûnswic Tirolt ein vürste was genant. dem wârn die Hiunen niht ze holt. an den kom her Sigebant. ahi, die wâren küene beide, si gelâgen ouch sît tôt ûf der heide.

Nû wil ich vürbaz setzen, als mir ist kunt getân. Ortwîn von Metzen, der bestuont einen küenen man. der was lantgrâf dâtz Düringen. der liez ouch mit strîte dar clingen.

Der was geheizen Markis, ein recke unverzagt. in herten stürmen was er wîs, alsô hât man mir gesagt. er kunde wîse ræte: er was starc milde unde stæte.

Sindolt der mære reit Witegouwen an. vil wol ich daz bewære, si wâren zwêne kecke man. do bestuont Witegîsen Berhtramen, den küenen und den wîsen.

Welt ir nû hœren gerne, sô wil ich iuch wizzen lân, wen der vogt von Berne in dem sturme sol bestân. ahi, daz wil ich iu mezzen, des enwil ouch ich nû niht vergezzen.

Ahi, daz ist von Sahsen der küene Liudgast. des ellen was gewahsen, daz im dar an niht gebrast bî allen sînen zîten. daz het er wol erzeigt in manegen herten strîten.

Von Mîssen her Liudgêr ouch niht sus beleip: Bitrolf der marcgrâve hêr bestuont in, als mir ist geseit. der lantgrâve Uolrîch von Tegelingen, den wil ich brüeven ouch ze disen dingen.

Den bestuont her Albrant, ein ûz erwelter degen. ich tuon iu rehte daz bekant, dâ wâren recken vil bewegen lîbes unde guotes, in dem strîte zorniges muotes.

Nû sult ir merken ebensleht, sô tuon ich iu kunt. von Bruoveningen Norpreht der bestuont an der stunt einen edelen vürsten rîchen in scharphen strîten vil behagenlîchen.

Môrunc was er genant, als ich vernomen hân, ein werder recke ûz erkant. des muoste im jehen manic man, daz er daz beste tæte. er kunde ouch die wîslichen ræte.

Von Sibenbürgen Marholt der kom ze voller zît. der was Ermrîche niht ze holt. nû sult ir hœren âne strît, Gêrhart der hôchgemuote der kom dar, daz was ein helt guote.

Nu hân ich iu gemezzen die ellenthaften degen, und niemens dâ vergezzen, die dâ wol strîtes mohten phlegen. nû gêt ez an ein strîten, daz maneger dâ des urteils muoz erbîten.

Zesamne si staphten die recken ûz erkorn. vîntlîchen si kaphten. sich huop ein grimmiger zorn. diu scharphen swert si vuorten, alrêste si ez manlîchen ruorten.

Zesamne si drungen, der sturm der wart starc. die liehten helme erclungen, vaste kurren diu marc. si houten tiefe wunden. sich huop ein grôzer wuof bî den stunden.

Man sach daz viuwer glesten ûz den swerten guot. die helme muosten bresten, dar ûz schræte daz bluot. ez enwart nie strît sô herte. harte jæmerlîch was daz geverte.

Ûf der heide wîte worhten si diu starken werc. in dem starken strîte wart vil manic halsperc durchhouwen und durchschrôten. dâ gelac harte vil der tôten.

Dâ sturben helde guote und recken ûz erkorn. si wuoten in dem bluote an maneger stat unz über die sporn. si wurben nâch des tôdes ende. ir wâfen vaste sniten in ir hende.

Dô schrîren die hie wâfen vaste ûf dem wal: sô wâren die entslâfen, die âhten cleine ûf den schal. owê der jæmerlîchen swære! lûte rief dô Wolfhart der mære

‘Wir suln daz velt vüllen hiute mit den scharn, daz man mit den züllen ûf dem bluote müeze varn. ahi, dâ sih ich mîn tunge!’ alsô sprach Wolfhart der junge.

Die starken Hiunen alle die liezen dar gân in dem sturm mit schalle. daz viuwer ûz ir helmen bran sam ez ein blâsbalc blæte. daz bluot immer nâch den slegen schræte.

Lungel unde herze muoste enzwei gân, daz was ein grôzer smerze. dâ vaht man wider man sam si der tiuvel vuorte. ahi, wie ez Wolfhart dâ ruorte!

Diu barmunge was cleine diu zwischen in dâ was. velt unde steine, dar zuo bluomen unde gras was allez rôt von bluote. nû riuwent mich die edelen helde guote.

Der schal von ir hande der was unmâzen grôz. man sach ûf dem lande der erde harte wênic blôz. diu rote an einander muote. diu heide was swarz dâ si ê bluote.

Man sach die schilde vliegen vaste von ir hant. uns welle daz buoch liegen, die halsberge wurden ouch entrant vil vaste und vil sêre, daz si ez überwunden nimmer mêre.

Man sach daz bluot rinnen vaste über velt. als ich mich kan versinnen, dâ was vil jæmerlîch der gelt. si sluogen, si stâchen, ine weiz waz si an einander râchen.

Die liehten herten helme die mohten niht gestân. die recken sunder melme die ranten vaste einander an. diu ors sich muosten biegen, man sach daz viuwer ûz den swerten vliegen.

Si gelâgen vaste under beidenthalbe dâ. nû merket ditze wunder, ez geschach nie anderswâ ein sturm alsô herte. die liehten halsperge man verscherte.

Arme unde hende die wurden hin geslagen. ê daz der sturm næm ende, ich wil iu endelîchen sagen, si sturben et alle geliche. grôzen schaden nam dâ Ermrîche.

Beidiu ebene unde tal was vil nâch allez vol mit den tôten über al. ich enweiz waz ich iu sagen sol. si muosten et alle belîben. owê der mære diu ir schœnen wîben

Sît kômen heim ze lande! daz was ein michel clagen. si wurben nâch dem phande, dâ von ir noch hœret sagen. daz kom et allez von Ermrîchen. des müeze im got an dem urteile geswîchen!

Und gewinn sîn nimmer ruoche weder dort noch hie! daz ich im alsô vluoche, daz moht ich gelâzen nie. jâ muost von sînen schulden manic man den grimmen tôt dulden.

Si liezen dar strîchen die recken hôchgemuot. si wolten niht entwîchen einander, daz was niht guot. des muosten si dâ sterben. si wolden beidenthalben ruom erwerben.

Si begunden vaste grimmen mit slegen durch unde durch und ûf einander limmen. man sach velt unde vurch allez sweben mit bluote. da gelâgen ûz erwelte recken guote.

Si wurden gerochen sidere die dâ lâgen tôt ûf dem wal. sô vielen dâ drîzec nidere von den orsen ze tal, der ân houbet, der ân hende. si nâmen alle jæmerlîchen ende.

Vaste schrei her Wolfhart, als ich hân vernomen. der was mit grimmiger vart her wider durch die vînde komen. owê, der edele helt guote der was aller rôt von dem bluote.

Beidiu helm unde schilt daz was zerhacket gar. er was mit wunden gezilt, disiu mære diu sint wâr. er hete ouch sich vergolten, grôzen jâmer si von sînen handen dolten.

Die jungen und die alden die mohten niht mê. die starken und die balden den geschach von slegen wê. vil michel was ir swære. nû sult ir hœren diu vil starken mære.

Die schar zesamne drungen vaste ûf dem wal, die alden und die jungen. harte michel was der schal. bewegen si sich hâten, ein swindez phat si mit den vüezen trâten.

Si wâren strîtes vlîzec dort und ouch hie. sô vielen dâ wol drîzec. solh wunder gesâht ir nie bî allen iuwern zîten. ez gie alrêst an ein hertez strîten.

Diu nôt diu was manicvalt von ir slegen starc. dâ sturben die helde balt, dar zuo diu ûz erwelten marc. owê der jæmerlîchen leide! da gelâgen recken tôt ûf der heide.

Die tiefen wunden herte die wurden dâ geslagen. niemen den andern nerte. mîn viere mohten niht gesagen die nôt noch daz wunder. ir gelac dô beidenthalp vil under.

Si stâchen, si miezen die edelen brünne lieht mit swerten und mit spiezen. einer schônte des andern nieht. des muosten si verderben und des grimmen tôdes dâ ersterben.

Ez geschach bî niemens zîten ein mort alsô grôz in allen herten strîten. die gêre man durch die brünne schôz, daz si in dem lîbe stahten. den grimmen zorn si ûz ir lîben wahten.

Welt ir nû hœren gerne, waz wunders dâ begie der werde vogt von Berne, daz wil ich iu bescheiden hie. daz ist mir ein kundez mære, zwei tûsent man sluoc dâ der Bernære.

Der edele vürste mære, alsô mir ist bekant, der rîche Bernære der rette vaste sîniu lant vor dem künege Ermrîche. sîniu leit diu rach er williclîche.

Lîbes unde guotes wâren si bewegen. manlîches muotes sach man die ûz erwelten degen. si striten mit grimme, als ich mich an dem mære versinne.

Welt ir nû gerne vernemen daz mære an dirre zît, sô mac iu harte wol gezemen: ich wil iu sagen, wie der strît ein ende nam ze leste. dâ sturben beide vriunde unde geste.

Unz an den einleften tac werte dirre strît, als ich vür wâr wol sagen mac. diu vil starke heide wît lac elliu vol von tôten. dâ wurden helme und schilde vil verschrôten.

Diu ûz erwelten kastelân gelâgen ouch dâ tôt. als ich vür wâr vernomen hân, daz velt was über al rôt von maneges mannes bluote. da verdurben ûz erwelte recken guote.

Nû merket vil besunder an disen mæren ouch, was daz niht ein wunder? der tunst von ir lîben rouch in allem dem gebære, sam ob ieslîcher an gezündet wære.

Ich gehôrt bî mînen zîten an buochen nie gelesen, in allen landen wîten ist nie kein strît sô herte gewesen sam der ze Raben sicherliche. des müeze got verteilen Ermrîche!

Mich muoz des immer wunder hân, wie siz erwerten ie. daz selbe spricht noch manic man, man vrâget dort unde ouch hie, wie si daz ie erwerten daz lange vehten mit den scharphen swerten.

Swinde was daz geverte ûf der heide breit. die liehten helme herte man mit swerten gar durchsneit, daz daz bluot muost dar ûz rinnen, als ich mich an dem mære kan versinnen.

In disem sturme vreislîch der dâ gie entwer, dô kom der herre Dietrîch gedrungen bitterlîch dort her. der edele und der ziere den heten bestanden edeler recken viere.

Si liezen ûf in dringen mit slegen âne zal. michel was daz clingen, daz velt allez nâch erhal. si striten sam si tobten. bewegen wâren die hôchgelobten.

Der edele künec von Rœmisch lant houwen began. er frumt dâ nider ûf den sant manegen unverzagten man, tôte unde wunde, daz iu daz nieman vol gesagen kunde.

Sînen schaden rach er tiuwer mit eislîchen slegen. er sluoc vil ungehiuwer ûf die Ermrîches degen. er rach sich an in sêre, daz si ez überwunden nimmer mêre.

Fruote von Tenemarke mit grimme dort her gie mit eime sturme starke. solhes wunders gesâht ir nie als von sînen handen. in widersâzen sêre die von Hiunisch landen.

Er truoc in sîner hende ein wâpen alsô breit. dâ von nam den ende vil manic recke gemeit. er lie dar nâher strîchen, er kom mit slegen an den starken Dietrîchen.

Die zwêne recken milde küene und ûz erkant die liezen die schilde und nâmen diu swert in bêde hant. si gunden an einander loufen. dô wolden si ir leben beide verkoufen.

Mit grimmigem muote sluogen si dar. die vrechen helde guote die nâmen vîntlîchen war, wâ si treffen kunden. si vâhten grimmeclîche bî den stunden.

Man hôrte ir slege hellen über berc und über tal. die küenen und die snellen die sluogen vaste âne zal daz in daz viuwer lûhte. nune weiz ich, wes den Bernære bedûhte.

Sô er almeiste mohte, an Fruoten er dô lief. er tete als im getohte. er holte ûz sînem herzen tief einen slac sô herticlîchen: des enkalt vil sêre Fruote der rîche.

Er traf in mit dem swerte vaste sunder melm reht dâ er sîn gerte ûf den liehten guoten helm. des slages mohte er niht gelougen. im spranc daz bluot ûz beiden sînen ougen.

Nû merket rehte waz ich sage. dô der slac was ergân, (hier an ich iuch niht verdage) Fruote der unverzagte man der begunde zehant vallen. daz erbarmte sêre sînen recken allen.

Er hete den künic hêre sô sêre nider geslagen, daz er dar nâch immer mêre muoste mære dâ von sagen. ez was vil nâch gewesen sîn ende. er rahte dem Bernære beide hende.

Daz erbarmte alsô sêre den künec von Rœmisch lant. er sûmte sich niht mêre, er zuhte in ûf sâ zehant. vor dem tôde er in nerte: er stuont über in selbe unde werte.

Nû wizzet sicherliche, und wær des niht gewesen, Fruote der rîche wære nimmermêr genesen vor Dietrîches recken. alsô nerte her Dietrîch den kecken.

Den tugenthaften Fruoten bevalch er al zehant, den milten und den guoten, dem unverzagten Hildebrant. daz tete der Bernære umbe daz daz er ân angest wære.

Nû sult ir hœren gerne noch mêre an dirre zît. der werde vogt von Berne kêrt aber wider in dem strît. ahi, er liez imz wol enblanden, er gap daz edel swert ze beiden handen.

Gelîche einem wurme werte noch sîn craft. in dem herten sturme erzeigte er sîne meisterschaft. er vaht vil menlîchen, er wold in dem sturme niemen entwîchen.

In den selben zîten dô sach her Dietrîch zwêne recken dort her rîten. do begunde er gâhen sicherlich. owê, dô sach er an den stunden den einen recken harte sêre wunden.

Wer der selbe wære, den er dâ wunden sach, daz ist mir ein kundez mære. alsô uns daz buoch verjach, owê, jâ was ez sicherliche von Lunders der starke Helphrîche.

Der in dâ hete bestanden, daz was ein helt guot, unverzaget ze sînen handen. Môrunc hiez der hôchgemuot. owê, jâ hete er Helphrîche ze tôde erslagen, wan daz ez wande her Dietrîche.

Dem edelen Bernære dem wart unmâzen gâch, dô er sunderbære Helphrîchen in den nœten sach. owê, dar lief der ûz erkorne: er nam daz swert mit grimmigem zorne.

Als er almeiste kunde, sluoc er einen slac Môrungen an der stunde, daz er gestrahter vor im lac. owê, dô nâhent im der ende. er sluoc in durch den helm unz ûf die zende,

Daz der recke milte ê tôt gelegen was. er gelac in dem schilte leider tôt ûf dem gras. owê der grôzen herzenswære! dise nôt klagte der Bernære.

Alsô der recke Môrunc den lîp hete verlorn, daz wold mit triwen ein recke junc rechen biderbe und ûz erkorn: daz was Môrholt von Îrlande. an den starken Bernære er rande

Mit einem guoten marke, als mir gesaget ist. Môrholt der vil starke der schôz an der selben vrist ûf den Bernære (daz was im komen nâch ze grôzer swære)

Mit einem scharphen gêre unmæzlîchen breit, der ze beiden ecken sêre und vil vreislîchen sneit. nu geloubet mir diu mære, dô nerte got den edelen Bernære.

Der werde vogt von Berne der was ouch an in komen. er wolt sich rechen gerne, ze beiden handen het erz swert genomen. er was erzürnet sêre, daz überwant Môrholt nimmer mêre.

Er sluoc in ob dem satelbogen durch den halsperc, des enhân ich niht gelogen. er schriet in tiefe in daz verch, daz er bî der stunde von der stat kom nimmermêr gesunde.

Gunther von Rîne mit einer breiten schar, ûf die triuwe mîne, der was ouch nû komen dar. owê, der vuorte die vil kecken, die wâren zuo ir handen welrecken.

Rüedegêr der marcman und ouch her Dietrîch die ranten Guntheren an mit manegem recken lobelîch. owê, dô gie ez an ein houwen: daz beweinten sît die vil schœnen vrouwen.

Diu sper si ûf stâchen mit creften, daz ist wâr, die schefte si zebrâchen beidenthalben in der schar. mit grimme si dar ruhten, mit zorne si diu scharphen swert zuhten.

Alrêst wart herte der strît, daz wizzet sicherlich. zesamne truoc si der nît die hôhen recken ellens rîch. si bewâgen sich des guotes, si wâren ûf einander grimmes muotes.

Alrêst kômen mit schalle zesamne diu her. die küenen recken alle die griffen vaste zuo der wer. mit grimmigem zorne vâhten êrst die recken ûz erkorne.

Si liezen dar clingen mit eislîchen slegen. michel was daz dringen von den recken ûz gewegen. owê, sich huop alrêst ein strîten. man sach daz bluot in tal unde in lîten

Harte vaste rinnen hin unde her. si striten âne sinnen, in was zuo zeinander ger. owê, vil michel was diu swære, si machten alrêst manegen satel lære.

Bluotic wart diu heide von maneges mannes bluot. owê der grôzen leide! mich riuwet manic helt guot, der dâ nam den ende. nû bitet alle, daz got Ermrîch schende!

Gelîche si sich wâgen vür unde wider. tôt si gelâgen ûf dem wale leider sider. vil michel was diu vreise, des wart sît vil manic armer weise.

Diu swert von ir handen entwer vaste vlugen. ze strîte si sich wanden, diu scharphen wâfen si zugen. si sluogen durch die ringe. niemen ich sîn leben ûz dinge.

Si sluogen durch diu houbet diu hirne rehte enzwei. vür wâr ir daz geloubet, vil lûte dô maneger schrei. owê, der jâmer der was veste. dâ sturben die vriunde und die geste.

Si worhten bî den stunden tiuvelischiu werc. si sluogen tiefe wunden durch manegen herten halsperc. ez wart bî niemans zîten sô manic man erslagen in sturme und in strîten.

Si striten alsô lange her unde hin. si wurben mit getwange umb einen jæmerlîchen gwin. si sluogen ûf einander vaste. daz wilde viuwer von ir ougen glaste.

Ze lebene niemen gerte ûf des strîtes zil. manegen man dâ werte der starken wunden alsô vil. nît si ûf einander truogen, die swinden slege si grimmeclîchen sluogen.

Durch helm und durch hirnschal wurden slege dar geslagen unz ûf den drüzzel ze tal. dâ was wuofen unde clagen, diu sper durch herze gestochen, die gêre in tiefen wunden ab gebrochen.

Nâch des tôdes ende wurben si zehant. mit manlîcher hende si satzten diu vil swaren phant, diu erlôst wurden nimmêre. nû riuwent mich die edelen recken hêre.

Nû vernemet mit guoten siten, waz ich iu sagen mac. diu her heten mit einander gestriten rehte unz an den zwelften tac. reht an dem zwelften morgen (disiu mær sag ich iu unverborgen)

Dô wâren bêdenthalben diu her vil nâch erslagen. si muosten sich mit bluote salben die küenen recken zuo den zagen. owê der starken unmuozen! diu ors wârn tôt, dô striten si ze vuozen.

Herte wider herte gie dâ vaste entwer. swinde was daz geverte. die vâhten hin, sô dise her. owê, der solt wart jæmerlîche von dem unverzagten Dietrîche.

Mit grimmigem zorne huop sich der schal. die recken ûz erkorne die tungeten vaste daz wal mit manegem edeln tôten dâ wurden hende und houbet ab geschrôten.

Leit was Ermrîche, michel was sîn clagen. er rief gewalticlîche, als ich iu nû wil sagen ‘nû wol ûf, al die mînen! ir slahet Dietrîchen unde al die sînen!’

Sturmgêr der mære ze Ermrîchen sprach ‘ûf den Bernære sol niemen wesen ze gâch. jâ hât er vil noch recken, die werent sich, der starken und der kecken.’

Dô sprach der künic Ermrîch als ein witzic man ‘weiz ab iemen sicherlich, wie vil mac Dietrîch noch liute hân?’ dô sprach mit gewalde her Heime der starke und der balde

‘Wil dû daz hœren gerne, künic Ermrîch, ez hât der vogt von Berne wol vierzictûsent volleclîch: ahi, und sint daz die besten, in herten strîten die vil nôtvesten.’

‘Daz wære ein michel wunder unde ein starkez dinc’ sprach Ermrîch besunder. ‘wer solt mit in hân gerinc? owê, so ist mîn her gar ze cleine. sô gebâr wir gein in gar ze seine.

Si sigent mit gewalde vaste gegen uns dort her. nû schaffet daz, helde balde, der sturm gêt iezuo vaste entwer. nû wert iuch wîcræzen: uns bestênt die küenen widersæzen.’

Heime und Witegîsen die heten in ir phlegen, des wil ich iuch bewîsen, wol ahzehen tûsent degen. ahi, daz wâren helde stæte, die sluogen durch die ringe daz daz bluot ûz schræte.

Heime und Witegîsen die leiten die schar. nû wil ich iuch bewîsen, wer gegen in kom, daz ist wâr. daz tet Rüedegêr der milde, dem volgten sehzehen tûsent schilde.

Si truogen in ir handen manegen starken gêr. vil wênic si bekanden barmunge noch herzen sêr. ahi, die küenen unbetwungen harte vaste gein einander rungen.

Her Heime der mære, daz tuon ich iu bekant, der truoc sunderbære Ermrîches vanen an der hant. die schilde si bî riemen viengen, beidenthalbe si ze vüezen giengen.

Heime und her Rüedegêr liefen an einander an. gebiten wart dâ nimêr, dâ wart wunder getân. ahi, zesamne si dô stiezen, grimmeclîch si ûf einander miezen.

Ez mohte vor ir herten slegen der stahel niht gestân. si begunden diu bot legen mit starken wunden vreissân. ahi, die recken ellens rîche die sluogen ûf einander tiuvellîche,

Daz vil vaste daz bluot durch die ringe dranc. si heten zornigen muot. der strît was âne mâze lanc. an einander si vil cleine schônten, mit tiefen wunden si vil vaste lônten.

Si sluogen durch die ringe rehte daz ez bran. niemen ich ûz dinge, dâ starp man wider man. die halsperge sich entranden, daz bluot ran in nider an den handen.

Dirre strît herte wert unz ûf mitten tac. Heime der starke sigelôs dô gelac. sîner ahzehntûsent manne der kômen wan zwelfe dô von danne.

Si lâgen unbescholten, daz wil ich iu sagen. si heten sich vergolten und vil sêr hin wider geslagen. ez gelâgen dâ die kecken, ez lebten wan sehzic Rüedegêres recken.

Heime daz wal rûmte, dô er den sic het vlorn. niht langer er sich sûmte, hin vlôch der recke ûz erkorn. er sagte Ermrîche ‘wir sin sigelôs worden sicherliche.’

Wernher von Wernhers marke der sûmte sich niht mêr. zehen tûsent recken starke die volgten dem vürsten hêr. owê, die wolten Ermrîche helfen ûf den küenen Dietrîche.

Si drungen mit schalle ûf den breiten plân neben einander alle. vaste gâhen man began. owê, dâ huop sich ein strîten. si kômen zesamne an einer lîten.

Wer gein Wernhere kom an der vart, daz wil ich iuch wizzen lân. daz tete der starke Wolfhart und mit im zehen tûsent man. heiâ, daz wâren die vil kecken. dô kômen alrêste zesamne welrecken.

Die liezen inz enblanden, als mir ist geseit, dem herzen und den handen. zorn wider zorn dâ streit. owê, des enkulten si vil tiuwer, ir slege wâren swinde und ungehiuwer.

Si sluogen durch die kophe und durch die helme lieht. si vielen als ein hophe, des missesage ich nieht. owê, vil tief wârn ir wunden. si schrîren alle wâffen bî den stunden.

Vür unde widere daz viuwer vaste spranc. die tôten vielen nidere, der tôt si jæmerlîch betwanc. owê, alsô kuren si den ende. mort begie Wolfhart mit ellens hende.

Lûte bî der stunde Wolfhart ruofen began als er almeiste kunde ‘nû wert iuch, Dietrîches man! wir mugen niht entrinnen, jâ kan niemen komen lebende von hinnen.

Von diu gelt iuch willeclîchen. da enist niht anders an, ir lât dar nâher strîchen’ sprach der unverzagte man. ‘ir tunget vast die wilde. werfet von den handen die schilde,

Und nemet diu swert mit creften, gerâten sî iu daz. wir müezen uns beheften, ez enkom uns nie baz.’ des volgten si im alle, si liefen dar mit einem grôzen schalle.

Als tâten her engegene die Ermrîches man. die küenen dietdegene die sluogen, daz daz viuwer bran ûz ir helmen vaste. si sluogen sêre daz ez rehte erglaste.

Die recken ûz erkorne die heten sich bewegen mit grimmigem zorne. die starken Dietrîches degen die striten manlîche, si râchen sich an dem ungetriuwen Ermrîche.

Do ez nâhenen begunde zuo der naht dan, owê der leiden stunde! do gelâgen vriunde unde man alle tôt dâ nidere. daz wolde rechen Ermrîch sidere

Vil vaste an dem von Berne, als ich vernomen hân. nû sult ir hœren gerne, wie mir ist kunt getân. als diu naht komen solde und daz der tac von dannen scheiden wolde,

Wernher von Wernhers marke und alle sîne man (was daz niht ein wunder starke?) die muosten tôte dâ bestân. dâ mit was ez allez ergangen, Ermrîch was mit jâmer bevangen.

Die dannoch lebendec wâren, die huoben dô die vluht, man sach dâ gebâren niemen mit manlîcher zuht. von danne si dô gâhten, zuo der stat si baltlîchen nâhten.

Hin vlôch der künic Ermrîch (daz tuon ich iu bekant) und ouch her Sibeche sicherlich. an den kom Eckehart zehant. daz kom im wol ze mâze, er vie den ungetriuwen ûf der strâze.

Als in hete gevangen der küene Eckehart, er sprach ‘nû muost dû hangen. nû wol mich dirre reise wart! nû sint gerochen mîne herren, nû kan mir leides nimmer niht gewerren.’

Nû hœret sicherliche grôzez wunder sagen. ûf der vluht wart Ermrîche niunhundert man dannoch erslagen. owê, jâ clage ich clegelîchen, daz si niht selbe sluogen Ermrîchen.

Nû hœret disiu mære, diu ich iu tuon bekant. Eckehart der lobebære der hete Sibechen al zehant twerhes ûf daz ros gebunden, er vuorte in nacket durchez her bî den stunden.

Vrô wart der Bernære, ein ende nam der strît. dô kurzte sich sîn swære. dô gebôt er bî der zît den jungen und den alden, dar zuo den blîden und den balden

‘Nû gêt ir recken über al balde an dirre stunt und suocht die tôten ûf dem wal. und vindet ir iemen undr in wunt, sô hebt in ûz dem bluote.’ daz tâten alzehant die helde guote.

Nû hœret vürbaz mêre von weinen und von clagen. grôz was diu herzensêre, dô man die tôten sach tragen an die trucken ûz dem bluote. in der zît kom Elsân der guote.

Als in der vogt von Berne erbeizen nider sach, nû sult ir hœren gerne, wie güetlîche er zuo im sprach. wol enphie er in von verren. sîn êrstiu vrâge daz was umb die herren.

‘Sage an, herre Elsân, ûf die triuwe dîn, der vrâge mac ich niht rât hân, wie stêt ez umb die herren mîn? wie gehabent si sich beide? trœste mich nâch mînem herzenleide.’

Elsân der guote sînen herren ane sach. mit trûrigem muote er zuo dem Bernære sprach ‘herre, nû vrâget mich niht mêre; ich hân verlorn die jungen künege hêre

Und mînen juncherren den lieben bruoder dîn. in sol ab niht gewerren, des wil ich got getrûwent sîn.’ owê, als er vol sagt diu mære, dô begunde ouch weinen der Bernære.

Sîn herze wart erschrecket mit riuwen al zehant. der vane was gestecket ûf dem wale in den sant. owê der clegelîchen swære! mit siuften sprach dô der Bernære

‘Herre, ist ab hie ieman. der iht wizze umb diu kint? mich muoz des michel wunder hân, daz si bî dem vanen niht sint. owê, stüend ez et umb si rehte! dô hiez er gâhen ritter unde cnehte.

‘Niemen sol erwinden, mâge unde man. ez muoz mir nâch den kinden an alle mîne êre gân. owê mir immer mêre! nu verliuse ich alrêst guot und al mîn êre.’

Dô der Bernære alsô clagen began, dô kom mit herzenswære Helphrîch der vil küene man. owê, dô viel der helt starke vür tôt nider von sînem marke.

Die sînen hende beide er zesamne tiure sluoc mit jâmer und mit leide, dâ in sîn herze zuo truoc. sprechen er begunde mit veinden ougen und mit clagendem munde.

Der edele recke mære vie sich selb in daz hâr. daz gesach der Bernære, er lief vil baltlîchen dar. owê, der edele vürste rîche der sprach zuo dem küenen Helphrîche

‘Sage an, helt guote, waz ist dir geschehen? dû clagest mit trûregem muote. jâ herre, waz hâstu gesehen? daz weste ich harte gerne.’ dô sprach her Helphrîch wider den vogt von Berne

‘Wizzet ir niht der mære, vogt von Rœmisch rîch, und ouch der herzenswære? die jungen künege lobelîch die sint erslagen beide und iuwer bruoder Diether ûf der heide.’

Nû hœret endelîche, wie ez dort geschach. von Berne der vil rîche daz hâr ûz der swarte brach ‘owê mir immer mêre! alrêst hân ich verloren lîp und êre.’

Zuo dem guoten marke gâhen er began. dô volgten im vil starke beidiu mâge unde man. owê, gâhen er begunde, dâ er die herren vant vil tôtwunde.

Bî Raben ûf dem sande dâ lâgen diu kint. über si dô rande her Dietrîch, der si rach sint. owê, mit vil trûrigem muote, mit triuwen sprach der edel helt guote.

Dô was ouch komen Rüedegêr und Gotel der marcman, und ander manic recke hêr, der ich genennen niene kan. owê, bî handen si sich viengen, über ir liebe herren si dô giengen.

Dô viel der Bernære ûf die herren sîn mit clegelîcher swære. im wart dô jâmers nôt schîn. owê, er kuste si in die wunden: ‘nû hân ich alrêst mînen jâmer vunden.’

Er nam die hende beide, in diu ougen er sich sluoc. ‘owê der grôzen leide! daz mich mîn muoter ie getruoc, daz müeze got erbarmen! nu beschuof er nie deheinen man sô armen.

Owê und iemer mêre ach, daz ich ie wart geborn!’ daz hâr er ûz der swarte brach, der edele recke ûz erkorn. vil sêre er weinen gunde. ‘nû sî vervluochet diu zît und diu stunde,

Und sî vervluochet der tac’ sprach her Dietrîch, ‘dâ mîn geburt ane lac! daz riuwet harte sêre mich. owê, wer sol mir nû getrouwen! sô manz nû seit vroun Helchen mîner vrouwen,

Diu spricht mir ûf mîn triuwe hinnevür immer mê. owê der herzen riuwe! mir ist wirs danne wê.’ owê, er kust die herren beide. ‘nu geschach bî mînen tagen mir nie sô leide.’

Dô sprach der marcgrâf Rüedegêr wider den künec von Rœmisch lant ‘ir muget wol clagen immermêr: iuch hât got hôhe gephant. owê, nû riuwet ir mich sêre. Hiunisch lant gesehet ir nimmermêre.’

‘Owê mir, armer Dietrîch, wê und immer wê! verliuse ich alsô Rœmisch rîch, war zuo bin ich immermê? owê, mîn jâmer der ist veste. got vüege daz mir daz herze schiere ab breste!’

Zuo dem herzen sêre slahen er began. ‘got, durch dîner marter êre und durch daz bluot, daz von dir ran, nû lâ mich iezuo sterben und des grimmegen tôdes gar verderben!’

Hende unde vüeze grimmen er began. ‘got mich tœten müeze, sît er mir niht êren gan, und gesende mir den ende!’ er begunde bîzen in arm unde in hende.

‘Ich bite iuch, muoter unde meit, künegin von himelrîch, daz ir bedenket mîniu leit!’ sprach der herre Dietrîch. ‘wâfen hiute und immer mêre sî geschriren über mîn leben und mîn êre!’

Ein gelît ûz sîner hende bîzen er began. ‘got schiere mich geschende, unsælde sî mir ûfgetân! nimmermêr werd ich geheilet, elliu vreude sî mir widerteilet!

Des bite ich vlîzeclîche dich, vil heiliger got! ich armer Dietrîche, ez hat der tiuvel sînen spot alrêst ûz mir gerihtet! unsælde hât sich ze mir gephlihtet.

Mîn wirt nû nimmermêre in dirre werlde rât. swelhez ende ich kêre, man sprichet an islîcher stat nâhen unde verren ‘seht, daz ist der verrâten hât sîn herren!’

Daz sprechents al gelîche, swie unschuldic ich bin. owê, armer Dietrîche, wâ wil dû nû kêren hin? wie sol ich nû gebâren? daz wold got, wære ich tôt vor manegen jâren!’

Die jungen künege tumbe die nam her Dietrîch, er kêrt si bêde umbe, er sach ir wunden vreislîch. owê, dô wart im êrste leide. nû merket rehte waz ich iu bescheide.

Er schoute die tiefen wunden, die wâren harte wît. er sprach an den stunden ‘ich sihe wol an dirre zît, mit einem kurzen worte: die wunden sint mit Mimmunges orte

Geslagen und gehouwen, daz ist mir wol bekant. ich wil des got getrouwen, er werd dar umbe noch geschant! owê, verworhter übeltæte, daz wolde got, daz ich dich bî mir hæte!’

‘Dâ vür gert ich niht mêre’ sprach her Dietrîch. ‘mîne herzen sêre die geriche ich vil gewislîch. nû lâz mich got niht ersterben, ich müeze noch den sic an dir erwerben!’

Daz ich iu nû bescheide, daz ist diu wârheit. dem Bernær was sô leide, alsô man mir hât geseit, daz im ûz beiden ougen daz bluot ran, des bin ich âne lougen.

In dirre herzensêre, die her Dietrîch clagte Rüedegêre, dô sprach der marcgrâf lobelîch ‘vil edel vogt von Berne, möht ich iu gehelfen, daz tæt ich vil gerne.’

Hin gie der Bernære, da er sînen bruoder vant. sich huop ein ungebære von dem recken al zehant. owê, wer mohte daz verlâzen? dâ was michel weinen âne mâzen.

‘Nû breitet sich mîn werre und mêret sich mîn clagen. owê, bruoder, herre, daz ich niht lige bî dir erslagen! daz clage ich gote vil tiuwer.’ im wâren dougen rôt alsam ein viuwer.

‘Herre got, bedenke die mînen grôzen nôt. den lîp mir niht bekrenke und lâ mich ê niht sterben tôt unz daz ich mich gereche! ine weiz waz ich mêr dar umbe spreche.

Mîner vreuden ôstertac hân ich nû verlorn. owê, waz tugent an dir lac, junger recke ûz erkorn! wie hât mich got von dir gescheiden! mir muoz mîn leben immermêre leiden.

Mîn vreude und mîn wünne ist mit dir gelegen. dû wær mîn næhstez künne. owê, welch ein volcdegen ûz dir gewahsen wære, mir ze trôste’ sprach der Bernære.

‘Dîner liute und dîner mâge wær dû ein meien tac, der milt ein glîchiu wâge. ahi, waz dîn herze tugende phlac! owê, daz ist nû gar zergangen. nû bin ouch ich mit jâmer gar bevangen.

Dû wær der tugende heie sleht alle zît, dar zuo ein blüender meie. owê, wie daz nû nider lît! nu gesiht man nimmer mêre von dir weder tugende noch êre.’

Sich selben er bî dem hâre mit bêden handen vie, er roufte sich ze wâre. so getâne clage gehôrte ich nie in allen mînen zîten. in der vrist dô sach man Witegen rîten.

Vaste über heide gâhen er began. in disem herzenleide sprach Rüedegêr der marcman ‘owê, wes bît ir, vogt von Berne; welt ir sehen iuwern vînt vil gerne?

Sô gâhet zuo dem marke, ûz erwelter degen!’ ûf spranc der vil starke, im was bereit zuo den wegen Valke daz ros guote. dar ûf saz er mit trûrigem muote.

Sîn leit begunde in grîfen, grimmic was sîn zorn. dô liez er nider slîfen dem orse in die sîten die sporn. owê, dô reit er ûf die heide. dô sach er beide liebe unde leide.

Welhez daz liebe wære, daz er dâ gesach? daz ist mir ein kundez mære rehte als ez dô geschach. daz liep was an den zîten, daz er sach Witegen vor im rîten.

Dô was daz daz leide, daz im dâ wider gie, daz er sîne herren beide und sînen bruoder tôten lie. owê, daz was ein grôz gebreste. er sprach ‘armez herze, daz dû bist sô veste!’

Dô sûmten sich niht mêre die Etzelen man. mit samt Rüedegêre vaste gâhen man began. owê, im was von herzen leide, si mohten dem Bernære niht gevolgen ûf der heide.

Si muosten hie belîben, daz sage ich iu vür wâr. her Dietrîch gund dar trîben daz edel ros sunderbâr. heid, der edel vogt von Berne der hete et Witegen erriten vil gerne.

Daz edel ors lief vaste, vil willic was sîn muot. daz wilde viuwer glaste von den îsen, als ez dicke tuot. owê, dô clagte der Bernære, alsô mir ist kunt ditze mære.

Ruofen er begunde Witegen vaste an, als er almeiste kunde ‘nû bîte, ellens rîcher man! durch willen aller vrouwen, lâ mich durch ir willen dîne manheit schouwen!

Bist dû ein welrecke, sô læst dû dich erbîten, in scharphen strîten kecke. nu erbeize mit manlîchen siten, unz daz ich dich errîte.’ ‘ich behüetez wol’ dâht Witege ‘daz ich bîte.’

Her Dietrîch rief vil sêre über schiltes rant ‘nû bîte, degen hêre’ sprach der recke zehant, ‘durch willen aller meide, daz ich âne strît alsô von dir iht scheide.

Und gedenke dar an, recke, durch die tugende dîn’ sprach von Berne der kecke, ‘daz dû der küenen einer wil sîn in stürmen unde in strîten. bistû küene, sô soltû mîn bîten.’

Ie lengr, sô ie mêre her Witege von im reit. er vorhte in harte sêre, alsô hât man mir geseit. er getorste niht gebîten. dô rief aber her Dietrîch bî den zîten

‘Owê, Witege herre, nû tuo alsam ein man, und gedenke dar an verre, waz dû manheit hâst getân und erbît mîn ûf der heide und scheide mich von mînem herzen leide,

Daz ich von dînen schulden hie enphangen hân. ich muoz jâmer dulden. daz hastû mir allez getân. owê, nu erbeize, helt guote, und erlœse mich von trûrigem muote.

Ich mane dich harte verre durch alle ritterschaft, sage an, Witege herre, durch dîne manlîche craft, des ich dich nû vrâge: jâ bit ich dich, daz dich des iht betrâge.’

Mit disen starken mære wolt er in ûf hân, der edele Bernære: dô mohte ez leider niht ergân. owê, her Witege was im ze wîse. Witege sprach ze Rienolden lîse

‘Lieber ôheim mîne, nû gâhe vür dich hin. jâ vürhte ich sêre dîne: gar ân angest ich selbe bin, möhtestû nû komen hinne! ich genæse wol, als ich mich versinne.’

Der edele Bernære aber ruofen began ‘küener degen mære, wurd dû ie ein biderbe man, so erbeize zuo mir nidere. ich weiz wol, ich kom nimmermêr widere.’

Witege wolt niht bîten, daz was dem Bernær leit. an den selben zîten sprach von Berne der unverzeit ‘owê und owê immermêre!’ alsô sprach von Berne der hêre.

‘Nû sage an, herre Witege, wie werten sich diu kint, die von dînen schulden ûf der heide erslagen sint? owê, daz hôrte ich harte gerne, woldestû mirz sagen’ sprach der vogt von Berne.

‘Waz heten dir ze leide die herren getân, den dû ûf der heide ir leben hâst gewunnen an? owê, waz ræch dû an den kinden? nû mac et ich dich leider niht vinden

Nâch mîn selbes muote, als ich des willen hân. noch beite, helt guote! dû gesigest mir værlîch an: ich bin tôt in liden und in henden. ob dû niht bîtest, sô müez dich got schenden!

Sant Gangolf und Sant Zêne die müezen dir bî gestân! owê, nû sint doch iuwer zwêne’ sprach der ellenthafte man. heid, nû kêrâ, helt, nû kêre! slehestû mich, des hastû immer êre.

Berne und Meilân daz wirt dir gegeben, dar zuo allez, daz ich hân: und benimestû mir daz leben, sô wirt dir Rœmisch rîche ledeclîche’ sprach her Dietrîche.

‘Nû kêre, helt mære, durch elliu werdiu wîp!’ sprach der Bernære ‘ich weiz wol, daz dû mir den lîp benimest ûf dirre heide. nû scheide mich von grôzem herzenleide.’

Dô sprach der helt Rienolt ze Witegen al zehant ‘nû diene wir der vrouwen solt, ûz erwelter wîgant. waz wirret uns daz bîten? er kan uns beiden nimmermêr gestrîten.’

Witege der starke ze Rienolten sprach ‘nû gürte dînem marke und lâ dir hinnen wesen gâch! und sûmen uns niht mêre, od wir vliesen beide leben und êre.’

Unervorhticlîche sprach her Rienolt ‘ich næm niht Rœmisch rîche und dar zuo aller Kriechen golt, daz man mich an vlühte vunde. ich wil benamen bîten hie ze stunde.’

‘Neinâ, lieber ôheim mîn, des entuo dû niht. und lâ dir daz gerâten sîn: wizze daz dir liep dâ von geschiht. nû volge mir, recke hêre, od wir gesehen an einander nimmermêre.’

‘Daz sî, als got welle’ sprach Rienolt der wîgant. ‘Witege, trûtgeselle, ez muoz versuochen ê mîn hant an dem Bernære.’ ‘sô phlege dîn got!’ sprach Witege der mære.

Dô sprach aber Rienolt, Witegen swestersun ‘ôheim, dû gedenken solt, vliehen daz ist niemen vrum, heid, nû bîte, recke mære! jâ slahe wir benamen den Bernære.’

Witege sprach mit zorne ‘dû redest alsam ein kint. recke ûz erkorne, du enweist wie des Bernæres tücke sint. owê, nû sihestû wie er limmet, rehte alsam ein hûs, daz dâ brinnet.’

‘Daz ist niht ein wunder’ sprach Rienolt der degen. ‘wir slahen in besunder âne schaden ûf den wegen, getarst et dû gebîten. nû sichz an, ich wil eine mit im strîten.’

‘Ich sihe wol, trût neve mîn, dû wilt et hie bestân. nû muoz ich mich bewegen dîn, da enist nû niht anders an. erkandestû, recke mære, Dietrîchen als ich, dû vluhest den Bernære.

Rienolt, helt guoter, nû müez got phlegen dîn! wærstû mîn vater oder mîn muoter, sô müest ich doch dîn âne sîn. owê, ungerne ich von dir scheide.’ hin reit er und bleip Rienolt ûf der heide.

Do erbeizte zuo der erde Rienolt der wîgant. der edele recke werde gurt sînem orse al zehant. dar ûf saz er manlîche, dô was ouch komen von Berne her Dietrîche.

Sper, helm unde schilt, als mir ist kunt getân, daz hete der recke milt ûf dem wale dort verlân. dar treip Rienolt der mære, mit dem sper traf er den Bernære.

Durch daz starke hârsnier er daz sper stach. nû sult ir gelouben mir, zuo den swerten wart in gâch. diu ors si zesamne truogen, mit den swerten si ûf einander sluogen,

Daz daz wilde viuwer ûz den swerten spranc. von Berne der tiuwer daz wâpen grimmeclîchen twanc mit manlîcher hende. er sluoc Rienolten durch helm unz ûf die zende,

Daz der recke mære von dem slage grôz mit clagelîcher swære nider von dem orse schôz. owê, do geschach im nie sô leide. Dietrîch reit nâch Witegen ûf die heide.

In begunde grîfen ein unmæzlîcher zorn. dô liez er nider slîfen dem orse in die sîten die sporn. ûf die heide er kêrte nâch Witegen, als in sîn herze lêrte.

Lûte ruofen begunde der künec von Rœmisch lant, als er almeiste kunde ‘nû bîte, Witege, wîgant, und hœre mîniu mære. jâ hân ich gerochen ein wênic mîner swære.

Helt, wære dir nû leide, sô ræchestû die nôt. Rienolt ûf der heide lît von mînen handen tôt. bistû ein recke küene und mære, sô richestû in’ sprach der Bernære.

Ie lenger sô ie mêre Witege gâhen began. Schemmingen mante er sêre, als ich vür wâr vernomen hân. owê, daz sach vil ungerne der unverzagte vogt von Berne.

‘Linse unde lindez heu daz wil ich dir geben, dâ mit ich dich wol gevreu’ sprach Witege ‘und nerstû mir daz leben.’ owê, sîne sprünge wâren wîte. ez truoc in von einem herten strîte.

Dô clagte der Bernære vil sêre disiu dinc ‘owê der leiden mære! dû tuost mir leit, Schemminc. des trûre ich in dem sinne. dû treist mir mînen vîant von hinne.

Daz clage ich immer mêre’ sprach der helt guot. Valken habt er an sô sêre daz er drâste daz bluot. heid, er begunde vaste gâhen. er was dem starken Witegen komen sô nâhen,

Daz zwischen in beiden kûm was rosseloufes wît. nû wil ich iu bescheiden, welt irz hœrn an dirre zît. si begunden beide gâhen. Witege was dem mere komen sô nâhen.

Er dâhte bî den zîten ‘da enist niht anders an. ich mac dir niht gestrîten: jâ herre, wie sol mirz ergân? sô mac ich ouch niht entrinnen. herre got, nû ruoche mir helfen hinnen.’

Ich sage iu unverborgen hie an dirre zît, dô Witege begunde sorgen umb sîn leben ûf der heide wît, in der vrist dô kom ein merminne. diu want Witegen an, als ich mich versinne.

Si nam den helt starke und vuorte in mit ir dan mit samt sînem marke, si nerte den vil küenen man. si vuorte in dâ ze stunde mit ir nider zuo des meres grunde.

Dô sîn der Bernære nimmer vor im sach, vil michel wart sîn swære, wand im leider nie geschach bî allen sînen zîten. er begunde nâch im in daz mer rîten.

Waz touc der rede mêre? unz an den satelbogen swamt der degen hêre, daz ich niht hân gelogen. owê, dô muoste er widerkêren: daz begunde im sîn herze vaste sêren.

Nider ûf dem sande erbeizt der helt starc. der künec von Rœmisch lande der lie ruowen daz marc und wolde ouch langer bîten, ob er Witegen inder sæhe rîten.

Dô Witege der mære kom an des meres grunt, vrou Wâchilt vrâgte in sunderbære ‘nû sage mir, helt, an dirre stunt, daz hôrte ich harte gerne: war umbe vlûhe dû den vogt von Berne?’

‘Daz hân ich âne schulde, vrouwe, niht getân. des Bernæres hulde ich leider niht enhân. owê, ich hân im getân vil ze leide: ich hân erslagen sînen bruoder Diether ûf der heide.’

‘Dû hâst vil zagelîche gevaren und getân. dem herren Dietrîche dem hiestû wol gesiget an. owê, zwiu bistû, degen hêre! nû muostû dich hüeten immermêre.’

‘Sô wil ich wider rîten und wil in bestân: ich muoz mit im strîten’ sprach der unverzagte man. ‘owê, daz ist nû ze spâte. die reise ich dir gar wider râte.’

‘Nû von welhen dingen hiete ich in hiute sô lihte erslagen? des müez mir misselingen!’ si sprach ‘daz wil ich dir sagen. dâ was daz edel gesmîde allez rehte ergluot an sînem lîbe.

Daz ist nû worden herte. des lâ dich, helt, an mich, verlorn wær dîn geverte: jâ slüege er endelîchen dich. er ist ergremet an disen zîten. dîn drîzic möhten im niemêr gestrîten.’

Hie mit disem mære hebe ich wider an und sage von dem Bernære. dô der unverzagte man Witegen ninder kunde vinden, dô kêrte er wider über die heide zuo den kinden.

Sîn clage was ûz der mâze grôz alsô man seit. ûf der selben strâze Rüedegêr im wider reit, Dietleip und Helphrîche. dô weinten si mitsamt Dietrîche.

Als der herre Dietrîch ûf daz wal wider reit, dô saz er über die künege rîch. vil michel was sîn herzeleit. owê, er kuste si in die wunden ‘daz wold got, læge ich tôt an disen stunden!’

Er sluoc sich in diu ougen vil vaste und in den munt. er sprach ‘offenbâr noch tougen gesiht man mich vür dise stunt gelachen nimmer mêre, od ich gereche mîne herzensêre.’

Mit triuwen sprach her Helphrîch als ein wîs man ‘ûz erwelter Dietrîch, ir sult iuwer weinen lân und traht ein anderz an disen sachen: si kan ân got niemen lebendec machen.’

‘Daz wolde got der rîche, und solde ich in ir leben’ sprach her Dietrîche ‘wol gesunt wider geben! nimmer müez ich guot erwerben, ich wold den worten iezuo vür si sterben.’

Die küenen recken werde, als man mir sagte sint, die bestatten zuo der erde Diethern und vroun Helchen kint. owê, mit trûrigem muote weinte dâ vil manic helt guote.

Ich gehôrt nie sicherlichen bî allen mînen tagen von heldn lobelîchen sô grôzez weinen unde clagen. owê, si weinten al gelîche die hôhen recken von Hiunischem rîche.

Rüedegêr und Dietleip und Gotel der marcman der clage was michel unde breit, als ich vür wâr vernomen hân. owê, ir vreuden si vergâzen, mit jâmer si ûf daz gras nidersâzen.

Si begunden jâmer schouwen, ir clage was vreissan. ‘owê mîner lieben vrouwen!’ sprach Rüedegêr der marcman ‘owê der herzenswære! unde owê der bitterlîchen mære,

Diu Etzel mîn herre nû leider hœret sagen! sich hebet ein solich werre, dâ von wir alle müezen clagen. owê, vervluochet sî diu reise! uns ist ûf gestanden nôt und vreise.’

Dô sprach von Lunders Helphrîch ‘wie lange sul wir clagen? ez ist vil unmügelîch. wir suln darumbe niht verzagen, ob uns ist geschehen vil leide. wir suln hinne rîten über heide.’

Mit jâmeriger swære, mit weinen und mit clagen muoste man den Bernære zuo dem orse hin tragen. owê, daz jæmerlîche scheiden, daz mohte hân beweinet ein heiden.

Die Dietrîches recken und ouch Etzeln man, die küenen und die kecken die riten trûreclîche dan vür Raben bî den stunden, dô si vil manegen edelen tôten vunden.

Man sagte dem Bernære vil gewalteclîch, daz in der stat wære der ungetriuwe Ermrîch. vor leide begund her Dietrîch switzen. her Rüedegêr sprach ‘sô sul wir in besitzen.’

Mit samt Dietrîche gâhte manic man vil gewalticlîche, alsô ich vernomen hân. vür Raben leiten si sich nidere: dâ tâten si den grôzen schaden sidere.

Der künic Ermrîche gebieten began vil gewalticlîche ‘beidiu mâge unde man, wol ûf und wert die veste!’ sprach der künic ‘daz ist uns daz beste.’

Daz tâten si alle gelîche mit williger hant. ez kom mit Ermrîche ûz dâ ze dem tore gerant wol aht tûsent degene. daz gesach her Helphrîch der bewegene.

Dô er Ermrîche dort her gâhen sach, harte manlîche Helphrîch der recke sprach ‘nû wol ûf alle an disen zîten! uns wellent starke vînde an rîten.’

Dietleip unde Rüedegêr, Wolfhart und Sintram und ander manic recke hêr, der ich genennen niene kan, die liezen vast dar strîchen. da bestuonden si den künic Ermrîchen.

Gegen einander si dâ ruhten, dar triben si diu marc. mit grimme si zuhten diu scharphen wâfen alsô starc. owê, wie si ûf einander miezen beidenthalp mit swerten und mit spiezen!