In historischer Schreibweise · Die Absatznummern verlinken einzelne Textstellen.
Der veröffentlichte Haupttext wurde vollständig mit den historischen Scans durch KI gegengelesen; keine menschliche Schlusskorrektur. Alle 4 relevanten Druckseiten des erhaltenen Haupttexts wurden mit gpt-5.6-luna (medium, Bilddetail original) am Scan gegengelesen und anschließend vollständig mit gpt-6-astra am Originalbild kontrolliert. Historische Schreibungen, überlieferte Lücken und die Abgrenzung des Editionsapparats bleiben erhalten. Dies ist eine KI-Gegenlesung, keine menschliche Schlusskorrektur. Erhaltener Schlussteil, Strophen 188–215; keine vollständige Fassung des Wunderers. Eine dokumentierte Lesefrage bleibt offen; siehe Prüfprotokoll.
Etzels Hofhaltung – Druckfragment bei Hagen 1855 · Teil 1
Etzels Hofhaltung.
(Holzschnitt)
188. Ich heisz herr Dieteriche . das loͤugnenn ich dir nicht . gott hert gewaltigliche . mich vnd die iunckfraw reich. das du vns treuwst zu henckenn . mich vnnd die iunckfraw seyn . wil ich dir es ein drencken . erst giltz das lebenn dein.
189. Ach neyn du tugent herre . so lasz genesen mich. so will ich yemer mere . furbasz auch lobenn dich . er schlug aber nyder . denn edlenn furstenn reich . nu stee du baldt auff wider . so sprach herr Dieterich.
190. Wann ich dich nit erschlahe . die weyl du vor mir leist . also herr dieterich iahe . ich gib dir doch kein frist . der todt wuͤrt dir gemessen . vil ee dann du selbs wilt . du woltst die iunckfraw essenn . dar vmb mann dich noch schilt.
191. Do stundt er auff gar kaumme . der wilde wunderer. mit fechten er sich saumet . sein wunden flussen seer . noch schlug er den von berne . ein wunden also weyt . das was sein letst verseren . es was dem wundrer leyt.
(Holzschnitt.)
192. Do gab der bernere : dem wundere eynen schlag : das ym seynn halszbandtschwere : viel vō dem halsz herab : mit dem halsz stundt er nacket : vnnd het noch auff sein huͤt : herr dieterich des lachet : der wundrer was vngemut.
193. Do hub er an zu bitten : das er ym geb geleyt : es es solt mit guttenn sitten : gesichert sein die meyt : do sprach herr dieteriche : schweyg still du helst sein nicht : du must vonn hynnen weichen : dich hilfft kein gab noch bitt.
194. Ein schyrme schlag so eben : diterich dem wundrer gab . vnnd traff ym denn halsz do neben : er hiewbs als her ab : das heubet mit dem hutte : das es viel auff die erdt : das es lag yn dem blute : des frewet sich der werdt.
195. Wiltu noch leut hie essen : so sprach herr dieterich : deynn lebenn ist kleyn gewesenn : fur war das freuw ich mich : auff hub er das heubte : den helm warff er do vonn : seins lebens was beraubte : der vngefuge man.
196. Er nam es bey dem hore . do was es also schwer . das glaubent mir fur ware . hett kaum getragen meer . vnnd truge es furbasse . in den palast weyt . do als gesyndt yn sasse . vnnd auch die schoͤne meyt.
197. Dem fursten kam entgegen . vil konig vnnd konigyn . mit freudt thett mann sich regen . yeglichs ausz krefftenn sein . die frauwenn yn vmbfyngen . vnd sprachen zu ym also . do der wundrer den todt ent pfynge . do waren wir alle fro.
198. Jederman kam gelauffenn . vor freudenn das geschach . vor ym wurden grosz hauffenn . das mann in kaum gesach . entpfyngen yn gar schone . konig ritter vnnd edelmann . wurden alsampt freuden reiche . yederman der sach yn an.
199. Weil er yn dancket schone . do kam die maget her . sie sprach das dir got lone . erst byn ich sorgen leer . von ir wart er vmbfangenn . sie sprach dein wunden sein mir leydt . die du von ym hast entpfangen . er danckt der reynen meyt.
200. Gebt mir das botten brote . zart iunckfrauw wunniglich . der wundrer der ist todte : sein haubt das tragen ich : der euch allzeytt wol essen . das thet ym nye kein gutt . ewersz leyts solt ir vergessen : nempt euch ein guten mut.
201. Er erbeyst euch nyemermere : so gewann ich euch eynn frid : er trawt vns beyden sere : zu hencken an eyn wyd : ich habs in vber habenn : der selbenn boͤsenn muͤe : gott thet mich krefftig labenn : ich hoff ers nymmer thu.
202. Die iunckfraw bandt ym abe : denn sein helm so gut : er sprach danck must ir haben : nun byn ich wol gemutt : du ernest mir hye mein lebenn : sie entpfyng den fursten schonn : sie sprach gott musz euch geben : wz ich euch guttes gan.
203. König Etzel der kam here : so gar yn kurtzer frist : er sprach das sein gut mere : das du genesen bist : das wir all gott dancken : vnnd auch der dein manheyt : nun haben wir freudt an wancken : mit diser schone meyt.
(Holzschnitt.)
204. Mann sasz wider zu tysche, als mann vor hett gethon, mann bracht wiltbret vnnd fische, vor freuden yederman, woltenn denn fursten schauwen, mann setzt in am hochsten ort, zu konig Etzels frawen, zu ym die iunckfraw dort.
205. Darnach die besten frunde, vnnd auch die besten geschlecht, die wurden alsampt vereynte, ausz koniglicher macht, die iunckfraw wunnigliche . gab dem berner trost . vnnd wardt gantz freudennreiche, das er sie het erlost.
206. Sie sprach ich musz vonn hynnen . in meines vatter landt . do hynn gedenck ich mit synnen . dietrich das sey ermant . das ir wyst meynen namen . lasz euch zu der letz . das solt ir euch nicht schamen . auff vrlaub ich das setz.
207. Das ich euch gerne liessen . golt silber als man thut . nun habs in kein verdryssen . ir habt seyn selbs genug . sie sie sprachen all gemeyne . zu der iunckfraw mynnigklich . wie sie hiesz mit namen . baldt thet sie nenuen sich.
(Holzschnitt)
208. Ich heisz fraw Seld furware . also byn ich genant . vnnd trag die kronn embore . in meines vatters landt . sey gesegnet die konnig herre . bot in ir weysse handt vnnd auch die frawenn sere . sie gieng do sie den berner fandt.
209. Vnnd gesegnet in gar schone . ir hant sie ym do bot . sie sprach das dir gott lone . bot ym ir mundlein rot . also mit grossenn erenn . danckt ir der furst so reiche . sie sprach dein lop wirt sich merenn . nyergant syndt man dein gleych.
210. Die iunckfraw sprach behende . nun musz ich baldt do von . wā es hat gar sein ende . herr dieterich du solt verstan . kum in meynes vatters lande . ich gered dirs auff meinn eydt . ich mach dirs vnter thane . vnd als zu dienst bereyt.
211. Also fur sie vonn danne . do sie was kommen her . denn frawenn vnnd denn mannen . was wunderliche mere . also kam sie heywe . in irs vatters landt . glaubet das es seye . als wir geschriben handt.
212. Nit lenger woltens bleybenn : die konig vnnd furstenn gutt : das wunder liesents schreiben : vnnd hielten das in hut : dar nach bgertents vrbaube : von konig Etzel her : konnig nun lassenn abe : es ist genug der eer.
213. Do sie nit bleiben wolten : do gab er vrlaub ynn : sie thetten als sie solten : gelobten ym zu dyen : als viel als sie hettenn : woltenn sie sein bereyt : wo er ir doͤrfft in nóten : vnd wenden als sein leyt.
214. Er dancket yn gar schoͤne : vnnd auch den frauwen reynn : do wart grosz gut verthane . ee das sie kommenn heym : vnnd auch herr dieterich : sagt hiltbrant die mer : das daucht yn wunderliche : das es geschehen wer.
215. Nun hat ein end das gdichte : wer das gehoͤret hott : mit warheyt ich das spriche : nun seindt sie alsampt todt : bisz an herr dieteriche : der ist bey leben doch : vnd streyt so krefftigliche : mit den wuͤrmen noch.
Jn der heuͤne weysz.