Titurel

1 Dô sich der starke Tyturel mohte gerüeren. er getorste wol sich selben unt die sîne in sturme gefüeren: sît sprach er in alter 'ich lerne daz ich schaft muoz lâzen: des phlac ich etwenne schône und gerne.

2 Môht ich getragen wâppen,' sprach der genende. 'des solt der luft sîn gêret von spers krache ûz mîner hende: sprîzen gæben schate vor der sunnen. vil zimierde ist ûf helmen von mînes swertes eke enbrunnen.

3 Obe ich von hôher minne ie trôst enphienge, und op der minnen süeze ie sælden kraft an mir begienge, wart mir ie gruoz von minneclîchem wîbe. daz ist nu gar verwildet mînem seneden klagendem lîbe.

4 Mîn sælde, mîn kiusche, mit sinnen mîn stæte, und op mîn hant mit gâbe oder in sturme ie hôhen prîs getæte. daz mac niht mîn junger art verderben: jâ muoz al mîn geslähte immer wære minn mit triwen erben.

5 Ich weiz wol, swen wîplîchez lachen enphæhet,

daz imêre kiusche unde stætekeit dem herzen næhet. diu zwei kunnen sich dâ niht gevirren, wan mit dem tôde al eine: anders kan daz niemen verirren.

6 Dô ich den grâl enphienc von der botschefte die mir der engel hêre .... enbôt mit sîner hôhen krefte, dâ vant ich geschriben al mîn orden. diu gâbe was vor mir nie menneschlicher hende worden.

7 Des grâles hêrre muoz sîn kiusche unde reine. ôwê, süezer sun Frimutel, ich hân niht wan dich al eine mîner kinde hie behabet dem grâl. nu enphâch des grâles krône und den grâl, mîn sun der licht gemâle.

8 Sun, du hâst bî dînen zîten schiltes ambet geurbort hurteclîchen. dîn rat was aldâ verklambet: ûz der rîterschaft muos ich dich ziehen. nu wer dich, sun, al eine: mîn kraft diu wil uns beiden enphliehen.

9 Got hât dich, sun, berâten fünf werder kinde: diu sint och hie dem grâl ein vil sælec werdez ingesinde. Anfortas und Trevrezent der snelle, ich mac geleben daz ir prîs wirt vor anderm prîse der helle.

10 Dîn tohter Schoysîâne in ir herze besliuzet sô vil der guoten dinge, dês diu werlt an sælden geniuzet: Herzelöude hât den selben willen: Urrepanse de schoyen lop mac ander lop niht gestillen.’

11 Dise rede hórten rîter unde frouwen. man mohte an templeisen manges herzen jâmer schouwen, die er dicke brâhte ûz manger herte, swenn er den grâl mit sîner hant und mit ir helfe rîterlîchen werte.

12 Sus was der starke Titurel worden der swache,

beidiu von grôzem alter und von siecheite ungemache. krumtel besaz dâ werdecliche den grâl ûf Muntsalvâtsche: daz was der wunsch ob irdischem rîche.

13 Dem wâren sîner tohter zwuo von den jâren, daz si gein höher minne an vriundes arm volwalsen wâren Schoysiânên minne schône gerte vil kûrge ûz mangen landen; des si doch einen fürsten gewerte.

14 Kîôt ûz Katelangen erwarp Schoysiânên. schôner maget wart nie gesehen sît noch ê bî sunnen noch bî mânên. ouch het er manger tugende genozzen sîn herze was gein hohem pris ie der kost und der tât unverdrozen.

15 Si wart im schône brâht und rîliche enphângen. der kûnec Tampunteire, sîn bruoder, kom ouch ze Katelangen rîche fürsten ungezalt dâ wâren: sô kostecliche hôchgezît gesach noch nie man bî mangen jâren.

16 Kîôt, des landes hêrre, pris het erworben mit milte und ouch mit ellen: sîn tât was vil unverdorben. swâ man hurtecliche solte strîten unde ouch durch der wîbe lôn gezimieret gein der tjoste rîten.

17 Gewan ie fürste lieber wîp, waz der dolte der herzenlîchen wûnne, als ez diu minne an in bêden wolte! ôwê des, nu nâhet im sîn trûren. sus nimet diu werlt ein ende: unser aller sûeze am orte ie muoz sûren.

18 Sîn wîp in ze rehter zît gewerte eins kindes. daz mich got erlâze in minem hûs eins solhen ingesindes, daz ich alsô tiure müese gelten! die wîle ich hân die sinne, sô wirt es von mir gewünschet selten.

19 Diu sûeze Schoysiânê, diu clâre und diu stæte, gebar mit tôde eine tohter diu vil sælden hæte.

an der wart elliu magtlich êre enstanden: diu phlac sô vil triuwen, die man von ir noch saget in manegen landen.

20 Sus was des fürsten leit mit liebe unterscheiden: sîn jungiu tohter lebte, ir muoter tôt, daz heter an in beiden. Schoysîânen tôt half im ûz borgen die flust an rechten frönden und gewin immer mère an den sorgen.

21 Do bevalch man die frouwen mit jâmer der erden. si muose gearômâtet und gebalsmet ê schône werden: durch daz man lange muose mit ir bîten. vil künge unde fürsten kom dar zer lîchlege an allen sîten.

22 Der fürste hête sîn lant von Tampunteire, von sînem bruoder, dem künc, den man dâ hiez von Pelrapeire. sîner kleinen tohter bat erz lîhen: er begunde sich des swertes, helmes unde schiltes verzîhen.

23 Der herzoge Manfilôt sach vil leide an sînem werden bruoder: daz was ein sûriu ougenweide. er schiet ouch durch jâmer von dem swerte, daz ir deweder hôher minn noch tjoste niht engerte.

24 Sigûne wart daz kint genant in der toufe, die ir vater Kîôt het vergolten mit dem tiuren koufe: wan er wart ir muoter dur si âne. die sich der grâl zem êrsten tragen lie, daz was Schoysîâne.

25 Der künec Tampunteire Sigûnen die kleinen zuo sîner tohter fuorte. [dô] Kîôt si kust, man sach dâ vil geweinen. Kondwîrâmurs lac dannoch an der brüstè. die zwuo gespilen wuohsen, daz nie wart gesaget von ir prîses vlüste.

26 In den selben ziten was Kastis erstorben der het ouch Herzelöuden ze Muntsalvatsch. die clären erworben Kauvoliz gap er der frouwen schöne, und Kingrivals: zin beiden truoc sin houpt vor fürsten die kröne.

27 Kastis Herzelöuden me gewan ze wibe, diu an Gahmorets arme lae mit ir magtuomlichem libe; doch wart si dâ frouwe zweiger lande, des süezen Frimutelles kint, de man von Muntsalvatsche dar sande.

28 Dô Tampunteire starp und Kardeiz der kläre in Brúbarz truoc die kröne, daz was in dem vünften järe daz Sigûne was aldâ behalten. dô muosen si sich scheiden, die jungen zwuo gespilen, niht die alten.

29 Diu künigin Herzelöude an Sigûnen dâhte: si warp mit al ir sinnen, daz man die von Brúbarz ir brâhte. Kondwirâmûrs begunde weinen, daz si gesellekeite und der stæten liebe an ir solte vereinen.

30 Daz kint sprach 'liebez veterlîn, nu heiz mir gewinnen mîn schrîn vollen tocken, swenn ich zuo mîner muomen var von binnen: sô bin ich zer verte wol berihtet. ez lebet manec rîter, der sich in mînen dienst noch verphlihtet.'

31 'Wol mich sô werdes kindes, daz ist alsô versunnen! got müeze Katelangen als hêrer frouwen an dir lange gunnen. mîn sorge slâfet, sô dîn sælde wachet. wær Swarzwalt hie ze lande, er wurd ze scheften gar durch dich gemachet.'

32 Kiôtes kint Sigûne alsus wuohs bî ir muomen. er kôs si für des meien blic. swer si sach, bî tounazzen bluomen: ûz ir herze blüete sælde und êre. lât ir lip in diu lobes jâr volwahsn, ich sol ir lobes sagen mêre.

33 [Swaz man an reinem wîbe sol ze ganzen tugenden mezzen an ir vil süezem lîbe was des ninder hâres grôz vergezzen, si reiniu fruht, gar lûter, valsches eine, der werden Schoysîânen kint, gelîcher art, diu kiusche junge reine.

34 Nu sulen ouch wir gedenken Herzelöude der reinen. diu kunde ir lop niht krenken. mit wârheit wil ich die lieben meinen. si ursprinc aller wîplîcher êren, si kunde wol verdienen daz man ir lop muos in den landen mêren.]

35 Diu magtuomlîche witewe, daz kint Frimutelles, swer bî ir jungen zîte sprach frouwen lop, dane erhal niht sô helles. ir lop daz fuor die virre in mangiu rîche, unze ir minne wart gedient vor Kanvoleiz mit speren hurteclîche.

36 Nu hœret fremdiu wunder von der maget Sigûnen. dô sich ir brüstel dræten unde ir reit val hâr begunde brûnen, dô huop sich in ir herzen hôchgemüete: si begunde stolzen [und] lôsen, und tet daz doch mit wîplîcher güete.

37 Wie . . . . . . Gahmuret schiet von Belacânen, und wie werdeclîchen er erwarp die swester Schoysîânen, und wie er sich enbrach der Franzoisinne, des wil ich hie geswîgen, und künden iu von magtuomlîcher minne.

38 Der Franzoisinne Anphlîsen wart ein kint gelâzen, erboren von fürsten künne und von der art, daz muose sich mâzen aller dinge dâ von prîs verdirbet. swenn alle fürsten werdent erboren, ir keiner baz nâch prîse wirbet.

39 Dô Gahmuret den schilt enphienc von Anphlîsen, diu werde küneginne im lêch diz kint. daz müezen wir noch prîsen: daz erwarp sîn wâriu kindes süeze. [er wirt] dirre âventiure ein hêrre, ich hân reht daz ich kint durh in grüeze.

40 Och fuor daz selbe kint mit dem Anshevln hin über in die heidenshaft zuo dem bärn Abkarîn, er brâht ez ze Wâlâis wider dannen, swâ kint genendekert erspoient daz sol helfen, op se inêr ge- mannen.

41 Ein teil ich wil des kindes art in benennen. sîn âne (der hiez Guruenanz von Grâharz) kunde îser zetrennen; des phlag er zer tjost mit manger hurte. sîn vater der hiez Gurzgri: der lac tôt durch Schoy de la kurte.

42 Mahaute hiez sîn muoter, Ehkunnes swester, des reichen phalenzgâven, den man nant ûz der starken Berbester. selbe hiez er Schionatulander sô hâhen pris erwarp bî sîner zît nie einer noch der ander.

43 Daz ich des werden Gurzgrien sun nît benande vor der maget Sigûnen, daz was des schult daz man ir muoter sande ûz der phlege von dem reinen grâlâ. ir hâchgeburt si zucket ouch her fur, unde ir künne daz lieht gemâle.

44 Al des grâlâs diet daz sint die erwelten, immer sæle hie unt dort an den stâten pris die gezelten. nu was Sigûne ouch von dem selben sâmen, der ûz von Muntsalvâtsche in die werlt wart gesæt, den die heil- haften nâmen.

45 Swâ des selben sâmen hin wart brâht von dem lande, daz muose werden berhaft und in vil reht ein schür ûf die schande, dâ von Kanyoleiz verre ist bekennet. si wart in manger zungen ie der triwen houptestat genennet.

46 Owol dich, Kanvoleiz, wie man spricht dîn stæte von herzenlîcher liebe, diu ûf dir geschach niht ze spæte! minne huop sich fruo dâ an zwein kinden [diu ergie] sô lûterlîche, al diu werlt möht ir truopheit drunder niht bevinden.

47 Der stolze Gahmuret disiu kint mit ein ander in sîner kemenâten zôch. dô Schîonatulander was dannoch niht starc an sînem sinne, er wart iedoch beslozzen in herzen nôt von Sigûnen minne.

48 Owê des, si sint noch ze tump ze solher angest. wan, swâ diu minne in der jugent begriffen wirt, diu wert aller langest. op daz alter minnen sich geloubet, dannoch diu jugent wont in der minne bant, minne ist krefte un- beroubet.

49 Owê, minne, waz touc dîn kraft under kinder? wan einer der niht ougen hât, der möht dich spüren, gienger blinder. minne, du bist alze manger slahte: gar alle schrîbær künden nimêr volschrîben dîn art noch dîn ahte.

50 Sît daz man den rechten münch in der minne und och den [wâren] klôsenære wol beswert, sint gehôrsam ir sinne, daz si leistent mangiu dinc doch kûme. minn twinget rîter under helm: minne ist vil enge an ir rûme.

51 Diu minne hât begriffen daz smal und daz breite. minne hât ûf erde hûs: [und] ze himel ist reine für got ir geleite.

minne ist allenthalben, wan ze helfe. diu starke minne erlamet an ir krefte, ist zwifel mit wanke ir geselle.

52 Ane wanc und âne zwifel diu beide was diu maget Sigûne und Schionatulander, mit leider; grôziu liebe was dar zuo gemenget. ich seit iu von ir kintlicher minne vil wunders, wan daz ez sich lenget.

53 Ir schemelîchiu zuht und diu art ir geslehtes (si wârn ûz lûterlicher minne erborn) diu twanc si ir rehtes, daz si ûzen tougenliche ir minne hâlen an ir clâren liben, und inne an den herzen verquâlen.

54 Schionatulander moht ouch sîn wîse von manger süezen botschaft, die Franzoyse kunegîn Anphlîse tougenliche enbôt dem Anschevîne: die erwarber unde wande in vil dicke ir nôt: nu wende ouch die sîne.

55 Schionatulander vil dicke wart des innen umb sînen œheim Gahmuret, wie wol er sprechen kunde mit sinnen, und wie er sich von kumber kunde scheiden: des jâhen im hie vil der toufbærn diet, als [tâten] dort die wer- den heiden.

56 Al die minne phlâgen und minne an sich leiten, nu hœret magtlich sorge unde manheit mit den arbeiten: dâ von ich wil âventiure künden den rehten, die ........ durch herzeliebe ie senende nôt erfûnden.

57 Der süeze Schîonatulander genante, als sîn gesellekeit in sorgen manecvalt in kûme gemante: dô sprach er 'Sigûne helferîche, nu hilf mir, süeziu maget, ûz den sorgen: sô tuostu helfîche.

58 Ducisse ûz Katelangen, lâ mich geniezen: ich hœre sagen, du sîst erboren von der art, die nie kunde verdriezen, sine wæren helfec mit ir lône, swer durch si kumberlîche nôt enphienc: dîner sælden an mir schône.'

59 'Bêâs âmîs, nu sprich, schœner vriunt, waz du meinst. lâ hœrn, ob du mit zühten dich des willen gein mir sô vereinest, daz dîn klagendiu bet iht müge vervâhen. dûne wizzest es vil rehte die wârheit, sone soltu dich niht vergâhen.'

60 'Swâ genâde wonet, dâ sol man si suochen. frouwe, ich ger genâden: des solt du durh dîne genâde geruochen. werdiu gesellekeit stêt wol den kinden. swâ reht genâde nie niht gewan ze tuonne, wer mac si dâ vinden?'

61 Si sprach 'du solt dîn trûren durch trœsten dâ künden, dâ man dir baz gehelfen mac danne ich: anders du kanst dich versünden, ob du gerst daz ich dir kumber wende: wan ich bin reht ein weise mîner mâge, lands und liute ellende.'

62 'Ich weiz wol, du bist landes und liute grôziu frouwe. des enger ich alles niht, wan daz dîn herze dur dîn ouge schouwe alsô daz ez den kumber mîn bedenke. nu hilf mir schiere, ê daz dîn minn mîn herze und die fröude verkrenke.'

63 'Swêr sô minne hât, daz sîn minne ist gewære deheime als lieben friunde als du mir bist, daz wort ungehêr wirt von mir nimer benennet minne got weiz wol daz ich nie bekande minnen flust noch ir gewinne

64 Minne, ist daz ein êr? mâht du minne mir bedîten? ist daz ein sie? kûmet mir minne, wie sol ich minne triuten? muoz ich si behalten bi den tocken? od flüget minne ungerne ûf hant durch die wille? ich kan ir wol locken.

65 'Frouwe, ich hân vernomen von wîben und von mænzen, minne kan den alten, den jungen sô schütlichen spannen, daz si mit gedanken sêre schützet: si trifft êne wenken, daz loufet, kriechet, flüget oder flûret.

66 Jâ erkande ich, sêeziu maget, ô wol minne von mænzen minne ist an gedanken: daz mag ich nu mit mir selbe betâen des betwinget si diu stæte liebe. minne stilt mir frôude ûz dem herzen, ez entdâte ein dîrbe.

67 'Schionatulander, mich 'twingent gedanke, sô du mir ûz den ougen kûmest, daz ich muoz sîn an frôuden diu kranke, unze ich tougenlîche an dich geblicke. des trûre ich in der wochen niht zeim mâl, ez erget alze dicke.'

68 'Sone darft du, süeziu maget, mich niht frâgen von minne: dir wirt wol âne frâge bekant minnen flust und ir gewinne. nu sich wie minne ûz fröude in sorge werbe: tuo der minne ir reht, ê diu minne uns beide in [den] herzen verderbe.'

69 Si sprach 'kan diu minne in diu herzen sô slîchen, daz ir man noch wîp noch diu magt mit ir snelheit entwîchen, weiz abe iemen waz diu minne richet an liuten die ir schaden nie gewurben, daz sie den fröude zebrichet?'

70 'Jâ ist si gewaltec der tumben und der grîsen. niemen als künstec lebet, daz er künne ir wunder volprîsen. nu sulen wir bêdiu nâch ir helfe kriegen mit unverscharter friuntschaft minn kan mit ir wanke niemen triegen.'

71 'Owê, kund diu minne ander helfe erzeugen, danne daz ich gæbe in dîn gebot mîn frîen lîp für eigen! mich hât dîn jugent noch niht reht erarnet. du muost mich under schiltlîchem dache ê dienen: des wis vor gewarnet.'

72 'Frouwe, als ich mit krefte diu wâpen mac leiten, hie enzwischen unde ouch dan mîn lîp wirt gesehen in [den] süe- zen sûren arbeiten, sô daz mîn dienst nâch dîner helfe ringe. ich wart in dîne helfe erboren: nu hilf sô daz mir an dir gelinge.'

73 Diz was der anevanc ir geselleschefte mit worten, an den zîten dô Pompeius für Baldac mit krefte het ouch sîne hervart gesprochen, und Ipomidôn der werde: ûz ir her wart vil niwer sper zebrochen.

74 Gahmuret ..... sich huop des endes tougen, et mit sîn eines schilde. er het och grôze kraft âne lougen: wan er phlac wol drîer lande krône. sus jaget in diu minn an den rê: den enphienger von Ipomidône.

75 Schîonatulander was leide zer verte, wan im Sigûnen minne hôhen muot und die fröude gar werte. doch schiet er von dan mit sînem mâge, daz was Sigûnen herzenôt, und diu sîne: in zwein reit diu minn ûf die lâge.

76 Der junge fürste urloup nam ze der maget tougenlîche. er sprach 'wê wie sol ich geleben daz diu minne an fröuden mich rîche schiere mache, und von tôde entscheiden? wünsche mir gelükes, süeziu maget: ich muoz von dir zen heiden.'

77 'Ich bin dir holt, getriwer friunt: nu sprich, ist daz minne? sus wil ich immer wünschende sîn nâch dem gewinne der uns beiden hôhe fröude erwerbe. ez brinnent elliu wazzer, ê diu liebe mînhalp verderbe.'

78 Vil liep beleip aldâ, lieb schiet von dannen. ir gehôrtet nie gesprochen von mageden, [von] wîben, [von] manlîchen mannen, die sich herzenlîcher kunden minnen. des wart sît Parzivâl an Sigûn zer linden wol innen.

79 Von Kingrivâls der künc Gahmuret sich verholne von mâgen und von mannen schiet, daz sîn vart den gar was diu vestolne. wan zweinzec kint von hôher art kurteise und ahtzec knappen ze îserân schilt het er erwelt ûf die reise.

80 Fünf schœniu ors und goldes vil, von Azagouc gesteine im volget ûf die vart, sîn schilt ander schilte gar eine. durch daz solte ein schilt gesellen kiesen, daz im ein ander [schilt] heiles wunschte, ob dirre schilt kunde niesen.

81 Sîn herzenlîche liebe unde ir minne iht fremde was noch worden nie durch gewonheit. im gap dar diu künegîn ir hemde, blanc sîdîn, als ez ir blenke ruorte. ez ruorte etwaz brûnes an ir huf: den puneiz vor Baldac erz fuorte.

82 Uz Norgâls gein Spâne [unze] hin ze Sibilje er kêrte, des genendegen Gandînes sun, der vil wazzers ûz ougen gerêrte, dô man friesch wie sîn vart nam ein ende. sîn hôher prîs wirt nimmer getoufter diet noch [den] heidenen ellende.

83 Daz rede ich wol mit wârheit, ninder nâch wâne. nu sulen wir ouch gedenken des jungen fürsten ûz Grâswaldâne, des Sigûne in twanc, sîn kiusche âmîe: diu zôch ûz sînem herzen die fröude, als ûz den bluomen [die] süez diu bîe.

84 Sîn lieplîchiu siecheit die er truoc von der minne, diu flust sîns hôhen muotes, .......... an sorgen gewinne, twanc den Grâharzoys vil manger pîne: er wære noch sanfter tôt als Gurzgrî von Mabonagrîne.

85 Wirt immer tlost mit hurte von überbrechens krache ûz sîner hant durch schilde bricht, sîn lîp ist zuo dem ungemache doch ze kranc: diu starke minne in krenket, und daz sîn gedanc nâch lieplicher liebes unvergetzen sô gedancket.

86 Swenne ander juncherreû ûf veldin aldô ze strâzen punierten unde ruupen, durch sende nôt sô minne er daz lâzen minne in lerte an staeten fröuden stechen. swâ kint lernt ûf stên an stüch, diu minnen se zum ersten dir kriechen.

87 Nu lâf in hôhe minnen: sô muoz er ouch denken, wier sich gein [der] hêhe ûf rihte unde im kôme alle valschet verkrenken sîn wernder prîs in jugent unde in alter. ich weiz den fürsten, solte er daz lern, man lerte ein beren ê den salter.

88 Schionatulander vil nœte truoc verborgen. ê daz der werde Gahmuret wurd inne al spehende der bel- baren sorzen, daz sîn liebster mâc sus ranc mit kummer. er qual et al die mânen, swie sich diu zit knop, [den] winder und den summer.

89 Von angebörner arte sîn wünschlich geschicke. sîn vel, diu liechten ougen, swaz man dâ kôs, des antlützes blicke, schiet dur nôt von lûterlichem glanze, des twanc in niht ein dürkelz wenken, ez tet starken lieb diu ganze.

90 Gahmuretes herze ouch ..... getwenget was von der minne ir hitze: [und] ir âsanc im hete under wiln besunget sîn lûter vel, daz ez mit truopheit kunde. minne helfe er hete ein teil enphangn, er wesse ouch ir twinc- liche stunde.

91 Swie listec sî diu minne, si muoz sich enblecken: swer treit der minne al spehende künstec ougen, dâ kan sich ir kraft niht verdecken. sist ouch ein winkelmez, hœr ich si zîhen: si entwirfet unde stricket vil spæh, noch baz dan spelten unde drîhen.

92 Gahmuret wart innen der helbæren swære, daz der junge talfîn ûz Grâswaldân was fröuden alsô lære. er nam in sunder ûf daz velt von strâze: 'wie vert sus Anphlîsen knabe? sîn trûren kumt mir niht ze mâze.

93 Ich trage die wâren phlihte al gelîch dîner pîne. der Rœmesche keiser und der admirât al der Sarrazîne möhtenz mit ir rîcheit niht erwenden, swaz dich bræht in siuftebæren pîn, daz muoz mich an fröuden ouch phenden.'

94 Nu sult ir wol gelouben dem werden Anschevîne, daz er gerne hulfe, ober möht, dem jungen seneden talfîne. er sprach 'ôwê durh waz hât sich geloubet dîn antlütze lûterlîcher blick? diu minn sich selben an dir roubet.

95 Ich spür an dir die minne: alze grôz ist ir slâge. du solt mich dîner tougen niht helen, sît wir sîn sô nâhe gemâge und bêde ein verch von ordenlîcher sippe, nâher dan von der muoter diu dâ wuohs ûz stelehafter rippe.

96 Du minnen ursprinc, [du] berndez saf minnen blüete! nu muoz mich erbarmen Anphlîse, diu dich durch ir wîplîch güete mir lêch: si zôch dich als si dich gebære, und het dich an ir kindes stat, als lieb du ir noch bist und ie wære.

97 Hilest du mich dîn tougen, dâ mite ist versêret mîn herze, daz dîn herze ie was, und hât sich dîn triwe geunêret, ob du mir sô grôze nôt entwildest. desn mag ich dîner stæte niht getrûwen, daz du sô wanklîche unbildest.'

98 Daz kint sprach mit sorgen 'sô sî mîn gedinge dîn fride und dîn hulde, und daz mich dîn zorn niht verlâz twinge.' ich hât dur zuht vor dir al mînen smerzen nu muoz ich dir Sigûnen nennen, dîn hât me gesiget mîn herzen.

99 Du maht, wilt du, ringen den last ungeliche, nu wis der Franzoysinne gemant: obe ich dîner sorge ie geträge, nim von ir ..... mich ûz krenken. ein slâfender leu wart nie als swære sô mîn wachendez gedenken.

100 Ouch wis gemant, waz mers und der lande ich durchstrichen durh dîn liebe hân, niht durch armuot. ich bin mâgen unde man entwichen. unde Anphlisen mîner werden frouwen. des sol ich alles wider dich geniezen: lâ dîne helfe schouwen.

101 Du maht mich wol enstricken von slôzlichen banden. wird iemer schiltes hêrre under helme und ûf kost in den landen. sol mîn helfec hant dâ prîs erringen, die wile wis mîn voget, daz dîn scherm mich erner vor Sigûnen twingen.'

102 'Ey kranker knabe, waz waldes ê muoz verswinden ûz dîner hant mit tjoste, solt du der ducissen minne bevinden! werdiu minne ist teilhaft ordenliche: si hât der sælige ellenthaft erworben ê der zagehafte riche.

103 Doch frôu ich mich der mære, daz dîn herze sô stîget. wâ wart ie boumes stam an [den] esten sô lobeliche erzwîget? si liubtec bluome ûf heide, in walde, ûf velde! hât dich mîn müemel betwungen. ôwol dich der lieplichen melde!

104 Schoysîâne ir muoter dâ für wart beruofen, daz got selbe und des kunst mit willen ir clârheit geschuofen:

Schoysîânen blic der sunnenbære, den hât Sigûn Kîôtes kint an ir, jehent ir erkantlîch mære.

105 Kîôt der prîs bejagende in der scharflîchen herte, der fürste ûz Katelangen, ê Schoysîânen tôt im fröude werte, ir zweiger kint ich sus mit wârheit grüeze, Sigûn diu sigehaft ûf dem wal, dâ man welt magede kiusche unde ir süeze.

106 Diu dir hât ane gesiget, du solt sigenunft erstrîten mit dienstlîcher triwe an ir [minne]. ouch wil ich des [willen] niht langer nu bîten, in dîne helfe ich bringe ir werden muomen. Sigûnen glanz sol dîne varwe erblüen nâch den bliclîchen bluomen.’

107 Schîonatulander begunde alsus sprechen. ‘nu wil mir dîn triuwe aller sorgen bant gar zerbrechen, sit daz ich mit dînen hulden minne Sigûnen, diu mich roubet nu lange ûf fröude und an frœlîchem sinne.’

108 Sich möht, oder wolte, wol helfe vermezzen Schîonatulander. ouch sule wir der grôzen nôt niht vergezzen, die Kîôts kint truoc unde Schoysîânen, ê daz si . . . . . trôst enphiene: diu muose fröuden sich ânen.

109 Wie diu fürstinne ûz Katelange betwungen was von der strengen minn (alsus het ir gedanc ze lange un- sanfte gerungen, daz siz vor ir muomen helen wolte), diu künegîn wart innen mit herzen schricke, waz Sigûne dolte.

110 Reht als ein touwee rôse unde al naz von rote, sus wurden ir diu ougen: ir muot, al ir antlütze enpfant der roete dô kunde ir kinche niht verdecken diu heptîchen liebe in ir herzen daz qual sus nâch kintlichem rechen.

111 Dô sprach diu küneginne durch liebe und durch triwe ’Owê Schoysîânen fruht, ich truoc ê alze vil ander muwe, der ich phlac bin nâch dem Anscheyne: nu wahset in mîn swere ein niwer dorn, sît ich kîuse [sus] an dir pîne.

112 An laude unde an liuten sprich waz dir werre: oder ist dir mîn trôst und ander mîner mâge sô verre daz dich niht ir helfe mac erlangen? war kom dîn sunneelicher blic? wê wer hât den verstolen dinen wangen?

113 Ellendiu maget, nu muoz mich dîn ellende erbarmen. man sol bî drier lande krôn mich immer zelen für die armen, ichn gelebe ê daz dîn kumber swinde, und ich diu rehten mære al dîner sorge mit [der] wârheit bevinde.’

114 ’Sô muoz ich mit sorge al mîn angest dir künden. hâstu mich deste unwerder iht, sô kan dîn zuht sich an mir gar versünden, sît ich mich dervon niht mac gescheiden. lâ mich in dînen hulden, süeziu minne: daz stêt wol uns beiden.

115 Got sol dir lônen: swaz ie muoter ir kinde mit minneelîchem zarte erbôt, die selben triwe ich hie vinde vil stætelîche an dir, ich vröuden kranke. du hâst mich ellendes erlâzen [wol]: dîner wîblichen güete ich danke.

116 Dînes râtes, dînes trôstes, dîner hulde bedarf ich mit ein ander, sît ich al gernd nâch friunde jâmer dulde, vil quelehafter nôt: daz ist unwendec: er quelt mîn wilde gedanke an sîn bant, al mîn sin ist im bendec.

117 Ich hân vil âbende al mîn schouwen ûz venstren über heide, ûf strâze unde gein den liechten ouwen, gar verloren: er komet mir ze selten. des müezen mîniu ougen friundes minne mit weinen tiure gelten.

118 Sô gên ich von dem venster .... an die zinnen: dâ warte ich ôsten westen, obe ich möhte des werden innen, der mîn herze lange hât betwungen. man mac mich vür die alten senden wol zelen, niht für die jungen.

119 Ich var ûf einem wilden wâge eine wîle: dâ warte ich verre, mêre danne über drîzec mîle, durch daz, ob ich hôrte sölhiu mære, daz ich nâch mînem jungen clârem friunde kumbers enbære.

120 War kom mîn spilende fröude? od wie ist sus gescheiden ûz mînem herzen hôher muot? ein ôwê muoz nu folgen uns beiden, daz ich eine für in wolte lîden. ich weiz wol daz in wider gein mir jagt sendiu sorge, der mich doch kan mîden.

121 Owê des, mir ist sîn kunft alze tiure, nâch dem ich dicke erkalte, und dar nâch, als ich lige in gnei- stendem viure, sus erglüet mich Schônatulander: mir gît sîn minne hitze, als Agremuntîn dem wurme salamander.'

122 'Owê,' sprach diu künegîn, 'du redest nâch den wîsen. wer hât dich mir verrâten? nu fürht ich die Franzoysinne Anphlîsen, daz sich habe ir zorn an mir gerochen: al dîniu wîslîchen wort sint ûz ir munde gesprochen.

123 Schionatulander ist hôch rîcher fürste. sîn edelkeit, sîn kiusche törst doch nimêr genendn an die getürste, daz sîn jugent nâch dîner minne spræche, op sich de Franze Anphlîsen haz an mir mit hazze niene ræche.

124 Si zôch daz selbe kint, sît ez der brüste wart enphüeret. gap si niht durch triegen den rât der dich hât als unsanfte gerüeret, du maht im, er dir vil fröude erwerben, sîstu im holt, sô lâ dînen wunschlîchen lîp niht verderben.

125 Biut im daz zêren, lâ wider clâren dîn ougen, [diu] wange, [dîn] kinne. wie stêt alsô junclîchen jâren. op sô liehtez vel dâ bî verlischet? du hâst in die kurzlîchen fröud vil sorge alze sêre gemischet.

126 Hât dich der junge talfîn an freuden verderbet. der mac dich wol an fröuden gerîchen: vil sælde unde minne ûf in gerbet hât sîn vater und diu talfînette Mahaude, diu sîn muoter was, und de künegîn sîn muome Schôette.

127 Ich klage et daz du bist alze fruo sîn âmîe. du wilt den kumber erben, des Mahaude phlac bî dem talfîn Gurzgrîe. dicke ir ougen habent an im erfunden, daz er den prîs in mangen landen hielt under helme ûf gebunden.

128 Schîonatulander an prîse ûf muoz stîgen. erst von den liuten erboren, die niht lânt ir prîs nider sîgen: er wuohs in breit gestrecket an die lenge. nu halt dâ zim die trœstlîchen fröud, unde er [der] sorge über dich niht verhenge.

129 Swie vil dîn herze under brust des erlache, daz hân ich niht vür wunder. wie kan er sich schicken under schiltlîchem dache! ûf in vil zähere wirt gerêret [der funken], die ûz helmen und eken springent dâ fiurîn regen sich gemêret.

130 Er ist ze tjost entworfen: wer kunde in sô gemezzen? an mannes antlütze gein wîplîcher güet ni minner vergezzen wart an muoter fruht, als ichz erkenne. sîn blic sol dîniu ougen gesüezen: ûf gelt dîne minne i’m nenne.’

131 Aldâ was minne erloubet mit minne beslozzen. âne wanc gein minne ir beider herze was minne unverdrozzen. ‘ôwol mich, muome,’ sprach diu herzoginne, ‘daz ich den Grâharzoys vor al der werlde nu mit urloube sô minne!’

132 Sus lâgen si unlange: do gehörten sie schiere, in heller süezer stimme ûf rôtvarwer vert nâch wunden tiere ein bracke kom hôchlûtes zuo zin jagende. der wart ein wile gehalten ûf: des bin ich durh friunde noch die klagende.

133 Dô si den walt alsus mit krache hörten erhellen, Schionatulander ûz kintlichem leben für die snellen was bekant; wan Trefrezent der reine der lief und spranc allen den vor, die des phlâgu ûf riters gebeine.

134 Nu dâhter 'obe den hunt iemen mac erloufen. riterlichiu bein die trage.' er wil . . . frôude verkoufen unde ein stætez trûren dran enphâhen. ûf spranc er gein der stimme, als er wolte den bracken ergâhen.

135 Sît in den witen walt niht mohte gekêren daz flûhtege wilt, wan her für den talfin, daz wil sîn arbeit gemêren: künftec trûren brâhtez im ze teile. nu daeter sich in einer dicken strut: sus kom jagende an dem seile

136 Des fürsten bracke, dem er enphuor ûz der hende nider ûf diu strâlsnitec mâl. daz si nimmer hunt mêre gesende, diu in dâ dem grôz gemuoten sande, von dem er jagte unze ûf den [stolzen Grahardeiz], daz dem vil höher fröuden sît erwande.

137 Dô er dur die dicke alsus brach ûf der verte, sîn halse was arâbensch ein borte geslagen mit der drîhen [vil] herte, dar ûfe kôs man tiure und lieht gesteine: die glesten [durh den walt] sam diu sunne. aldâ vienc er den bracken niht eine.

138 Waz er mit dem bracken begreif, lât ez iu nennen, gefurrierten kumber mit arbeit er muose unverzagetlîche erkennen, und immer mêr grôz kriegen et nâch strîte. daz bracken seil was rehte im ein urhap fröuden flustbærer zîte.

139 Er truoc den hunt ame arme Sigûnen der clâren. daz seil was wol zwelf klâfter lanc, die von vier varwe borte- sîden wâren, gel, grüene, rôt, brûn diu vierde, immer swâ diu spanne erwant an ein ander geworht mit gezierde.

140 Dar über lâgen ringe mit berlen verblenket; immer zwischenn ringen wol spanne lanc, niht mit stein verkrenket, vier blat, viervar wol vingers breit die mâze. gevâhe ich immer hunt an sölch seil, ez blîbt bî mir, swenn ih in lâze.

141 Sô manz von ein ander vielt, zwischenn ringen ûze und innen kôs man dran schrift wol mit kostelîchen dingen.

âventiure hôrte, obe ir gebietet. mit guldin nagelen wâren die steine vaste an die strunge gesetet.

142 Smârâde wâren die buochstabe, mit rûbin verhandet. adamant, kriselte, grânât dâ stunden nie seil baz gehundet wart, ouch was der hunt vil wol geselet: ir muget wol râten, welhez ich dâ neme, op wære der hunt der gegene gestilet.

143 Uf einem samît grâene als in molges-beim walde was din halse ein borte genet, vil stein von arde mannevalde drûf geslagen: die schrift ein frouwe lêrte. Gardeviaz hiez der hunt: daz kiut tuschen Hôete der verte.

144 Din herzogin Sigûne las avane der mære. 'swie ditze si ein bracken name, daz wort ist den werden gebür: man und wip, die hueten verte schône, die varent hie in der werlde gunst, und wirt in dort sache ze frou.

145 Si las mêr an der halsen, noch niht an dem seile. 'swer wol verte hûeten kan, des pris wirt getragen nimmer velle: der wonet in lûterem herzen sô gestarket, daz in nimmer ouge ersiht ûf dem unstâten wenkenden market.

146 Der bracke unde daz seil einem fürsten durch minne wart gesant: daz was von art under krône ein jungiu kûneiginne Sigûn las an des seiles unterscheide, wer was din kûnginne unde ouch der fürste: din stunden be- kântlich dâ beide.

147 Si was von Kanadie erboren, ir swester, Flôrîen, diu Ilinôte dem Britûn ir herze, [ir] gedanc und [ir] lip gap ze âmîen, gar swaz si hete, wan bî ligende minne: si zôch in [von kinde] unze an schiltlich vart und kôs in für alle gewinne.

148 Der holt ouch nâch ir minne under helm sîn ende. obe ich niht bræche mîne zuht, ich solte noch fluochen der hende diu die tjost ûf sînen tôt dar brâhte. Flôrî starp ouch der selben tjost, doch ir lîp nie speres orte genâhte.

149 Diu liez eine swester, diu erbet ir krône. Clauditte hiez diu selbe maget: der gap kiusche unde ir güet ze lône des vrömden lop und ouch der si bekande. des wart ir prîs beruofen in mangiu lant, daz den dâ niemen wande.

150 Diu herzoginne las von der magt an dem seile. die fürsten ûz ir rîche eins hêrren an si gerten mit urteile. sie sprach in einen hof ze Beuframunde. dar kômen rîche und arme [ungezalt]: man erteilte ir wale an der stunde.

151 Duc Ehkunahten de Salvâsch Flôrîen, den truoc si in ir herzen dâ vor, ouch kôs si in benamen ze âmîen. des stuont sîn herze hôher danne ir krône: Ehkunaht gerte [aller] fürsten zil: wan er phlac sîner verte vil schône.

152 Si twanc sîn jugent unde ouch daz reht von ir rîche: sît daz ir wart erteilt diu wal, nu welt ouch diu maget werdeclîche. welt ir tiutsch ir friundes namen erkennen? der herzoge Ehcunaver von Bluome diu wilde, alsus hôrt ich in nennen.

153 Sît er von der wilde hiez, gegen der wilde si sante in disen wiltlîchen brief, den bracken, der walt und gevilde phlac der verte als er von arte solte. ouch jach des seiles schrift daz sie selb wîplîcher verte hûeten wolte.

154 Schîonatulander mit einem vederangel vienc äschen unde vörhen, die wil si las, und der fröude den mangel,

daz er sit wart vil selten der geile diu herzogin löst ûf den strik, durch die schrift iz ze lesen an dem seile

155 Der was an die zeltstange vaste gebunden. nû müet ir ûf lassen daz si tet; öwe wan hete sis erwunden! Gardevîaz stracte sich mit strebene, ê diu herzoginne sprach nâch siner spise: ir wille im was ze eizen ze gebenne.

156 Zwuo juncfrouwen sprungen her ûz für die swære. ich klage der herzoginne blank hender: ob daz seil die zerfüere, waz mag ich des? ez was von stein herte. Gardevîaz zucte und spranc durch gâhen nâch buntwilles verte.

157 Er was ouch Eheunachte des tages alsô entrunnen. si rief die juncfrouwen ane: die heten des bracken spise gewonnen, si gâhten wider in daz gezelt vil balde. nu was er ûz geslossen durh die winden; man hœrt in dô schiere im walde.

158 Er brach halt der winden ein teil ûz der phaele. do er wider kom ûf die niuwe rôten vart, des nam in niht hæle, vil offenliche er jagte und niht verholne. dâ von geschach des werden Gurzgrien sun vil næte sit ze dolne.

159 Schionatulander die grôzen und die kleinen vische mit dem angel vienc, dâ er stuont ûf blôzen blanken beinen durh die kûele in lûtersnellem bache. nu erhœrt er Gardevîazes stîmme: diu erhal im ze ungemache.

160 Er warf den angel ûz der hant, mit snelheit er gâhte über ronen und ouch durch brâmen; dâ mit er doch dem bracken niene genâhte: den het im ungeverte alsô gevirret. daz er ninder spürte wilt noch hunt, und wart ouch von dem winde der hœre verirret.

161 Im wurden diu blôzen bein zerkratzet von den brâmen: die sînen blanken füeze an dem loufe ouch von stiften ein teil wunden nâmen. man kôs in baz, dann ê daz [erschozen] tier, wunde: er hiez si twahen, ê er kom underz zelt. sus vant er Sigûne dort unde,

162 Innerhalp ir hende als si wærn berîfet grâ, als eins tjostiures hant, dem der schaft von der gegen- hurte slîfet, der ziuschet über blôzez vel gerüeret. rehte alsô was daz seil durch der herzoginne hant gefüeret.

163 Si kôs im vil wunden an beinen unde an füezen: si klagt in, er klaget ouch sie. nu wil sich diz mære geunsüezen, dô diu herzogîn begunde sprechen hinze im nâch der schrifte am seil: diu flust muoz nu vil sper zerbrechen.

164 Er sprach 'ich vriesch ie wênec der seile überschribene. brievebuoch en franzoys ich weiz wol: solch kunst ist mir niht diu blibene: dâ læse ich an swaz dâ geschriben wære. Sigûne, süeziu maget, lâ dir [sîn] die schrift an dem seile gar unmære.'

165 Si sprach 'dâ stuant âventur geschriben an der strangen. sol ich die niht zende ûz lesen, mir ist nunmer mîn hant ze Kâtelangen swaz mir lemen rîcheit möhte gebîsten. und obe ich wirdec wâr ze nomen, dâ für wolt ich mich der schrifte âsten.'

166 Daz spriche ich, werder frunt, dir nach nîsamen ze vâre. ob wir beidiu junc solten leben zuo der zît unser künftigen fâre, sô daz dîn dienst doch gerte mîner minne, du muost mir daz seil ê erwerben, dâ Gardevîaz an gebunden stuant herre.'

167 Er sprach 'sô wil ich gerno umb daz seil alsô werben. sol man daz mit strîte erholen, dâ muoz ich an libe an prise verderben, oder ich bringe ez wider dir ze banden. wis genædec, süeziu maget, [unde] halt niht mîn herze sô lange in dinen banden.'

168 'Genâde und al daz immer maget sol verenden gein [ir] werdem clâren friunde, daz leist ich, und mæ mich des nie man erwenden, op dîn wille krieget nâch der strangen, die der bracke zôch ûf der verte, den du mir bræhte gevangen.'

169 'Dar nâch sol mîn dienst imêr stætelichen ringen. du biutest rîchen solt: wie lebe ich die zît, daz ez mîn hant mûeze bringen dar zuo daz ich die hulde dîn behalte? daz wirt versuochet nâhen und verre: [gelücke und] dîn minne mîn walte.'

170 Sus heten si mit worten ein ander ergetzet, und ouch mit guotem willen. anevanc vil kumbers, wie wart der geletzet! daz freischet wol der tumbe und ouch der grise, von dem unverzageten sicherboten, obe der sweben od sinke an dem prise.