In historischer Schreibweise · Die Absatznummern verlinken einzelne Textstellen.
Vorhandene Korpusfassung; für diese Bestandsveröffentlichung keine neue vollständige Scan-Gegenlesung. Ursprüngliche Qualitäts-, Quellen- und Fragmenthinweise bleiben in Text und Provenienz erhalten. Quelle/Attribution: TextGrid Repository, Digitale Bibliothek, auf Grundlage von www.editura.de; Karl Müllenhoff, Sagen, Märchen und Lieder der Herzogthümer Schleswig, Holstein und Lauenburg (Kiel: Schwerssche Buchhandlung, 1845). https://www.textgridrep.org/browse/smvp.0?mode=gallery Übernommene TextGrid-Struktur, Annotationen und Metadaten: CC BY 3.0 DE, https://creativecommons.org/licenses/by/3.0/de/. Die historischen Grundtexte werden vom Anbieter getrennt als gemeinfrei bezeichnet; die CC-Lizenz wird nicht auf diese Grundtexte übertragen. Änderungen: vorhandene TEI-/QMD-Gliederung und dort dokumentierte Korrekturen übernommen, QMD-Textkörper für dieses Archiv unverändert, öffentliche Metadaten ergänzt. Digitalisatbilder werden nicht kopiert.
236. Der betrügerische Wirt.
Dree Handwarksbursen köumen enmal innen groot Holt un verbistern dar in. Se löpen hin un hęr, inne Krüz un Quier un kunnen ne weller herut finden. Tauletz as se fœr Mödigheit ne mier gaan un staan kunnen, leggen se sik ünnern Boom daal und dachen: »Hier will wi starwen.«
Dar köum de Bös tau ęr un sä: »Wenn ji mien sien wüllt, so will ik ju helpen.« »Nä«, sä'n se all dree, »dat wüll wi ne; lewer wüll wi starwen.« Dar sä de Düwel: »Ik will ju uk helpen, wenn ji mi tau'n lebendigen Minschen verhelpen wüllt.« »Wo künn wi dat?« fröugen de Handwarksbursen. De Düwel sä: »Ji schüllt nu en Tied lang wider niks seggen, as de een wir drei, de anner ums Geld, un de drörre das ist recht. Dat schüllt ji so lang seggen, bet ji mi tau'n lebendigen Minschen verholpen hebbt.« Dar sä'n de dree: »Dat künnt wi woll, wennt wider niks is.« Dar geef de Bös ęr so vęl Geld, as se man ęwen slępen kunnen, un wies ęr ut't Holt na en Wiertshuus. Dar sä de Wiert: »Was beliebt, meine Herrn? Befehlen Sie zu essen und zu trinken?« »Wir drei«, sä de een. »Ums Geld«, sä de anner. »Das ist recht«, sä de drörr. As se nu wat ęten harrn, fröug de Wiert, op se uk tau Bett wulln, dar sä de een weller »Wir drei«, un de anner »Ums Geld«, un de drörr »Das ist recht.« De Wiert verwunner sik un füng an, allerlei mit ęr tau spręken, kunn awer wider niks ut ęr herutbringen, as »Wir drei«, »Ums Geld«, »Das ist recht.«
Dar wier bi den Wiert uk en Koopmann ankiert, de vęl Geld bi sik harr; dat lach den Wiert rech inne Ogen, un as he nu mark, dat de dree Handwarksbursen wider niks seggen kunnen, as »wir drei, ums Geld, das ist recht«, dar köumen em böse Gedanken. Dar bröch he inne Nach den Koopmann üm un nöum sien Geld, un den annern Morgen maak he Larm, de Koopmann wier ümbröch un dat harren de dree Handwarksbursen daan. Dar wörren se fastnamen un köumen in Vörhüer un de Richder fröug er: »Habt ihr den Kaufmann umgebracht?« Dar sä de een: »Wir drei«, de anner »Ums Geld«, un de drörr »Das ist recht.« »Nä«, sä de Richder, »wie sollte das wohl recht sein! Warum habt ihr das getan?« Un de Handwarksbursen antwuurden weller: »Wir drei, ums Geld, das ist recht.« Wider kunn de Richder niks herut bringen. »Nu«, sä he, »Ihr habt gestanden, euer vieles Geld zeugt wider euch; übermorgen sollt ihr hängen.«
So lang harren de dree Handwarksbursen noch gauden Maud hatt; as awer de letz Nach heran köum, dar wiern se doch in Angsten, awer kener harr dat Hart, wat anners tau seggen, as he laaft harr. Dar köum [TextGrid-Seitenmarker n="159"]
de Bös in ęr Gefängnis un sä: Morgen schöllt ji richt warren; wenn ji nu den Strick ümme Kęhl hebbt, so roopt: »Gna', wi sünd ünschüllig, de Wiert hett den Koopmann ümbröch, de Mann in rood Scharlaken is uns Tüg; denn kaam ik un will ju helpen.«
As nu Morgen wörr, wier de Wiert uk nieschirig, wo dat aflopen dä. He leet anspannen un föhr hin na'n Richtplatz. Dar stell sik en Mann in rood Scharlaken dich bi em un as nu de dree Handwarksbursen röupen: »Gna', wi sünd ünschüllig, de Wiert hett den Koopmann umbröch, de Mann in rood Scharlaken is uns Tüg«, un de Wiert nu sä: »So schall mi de Düwel halen, wenn dat waar is«, dar kreeg de in sien rood Scharlaken em mit twee Finger taufaten un fahr mit em dörch de Luff. De Wiert awer leet noch en Schau un dree Blautdröppen fallen un de dree Handwarksbursen wörren frielaten un reisten wider.
Durch Schullehrer Knees in Neumünster aus der Gegend von Oldenburg, vgl. oben Nr. 174. – Dieselbe Sage zuerst wohl in David. Chytraei epistola bei Samuel Meigerius de Panurgia lamiarum. Hamborg 1587, 4. Luther in seinen Tischreden erzählt auch diese Geschichte.