In historischer Schreibweise · Die Absatznummern verlinken einzelne Textstellen.
Der veröffentlichte Haupttext wurde vollständig mit den historischen Scans durch KI gegengelesen; keine menschliche Schlusskorrektur. Alle 16 relevanten Druckseiten des erhaltenen Haupttexts wurden mit gpt-5.6-luna (medium, Bilddetail original) am Scan gegengelesen und anschließend vollständig mit gpt-6-astra am Originalbild kontrolliert. Historische Schreibungen, überlieferte Lücken und die Abgrenzung des Editionsapparats bleiben erhalten. Dies ist eine KI-Gegenlesung, keine menschliche Schlusskorrektur. Eine dokumentierte Lesefrage bleibt offen; siehe Prüfprotokoll.
Inhaltsverzeichnis
Heldenbuch-Prosa
Quellabschnitt
Vorred zu dem Heldenbuch.
Dis buͦch seid, wie die heild har komen sind, der stond ein deil in disem buͦch, vnd ist zu wissend, das der andern heild vil dusent sind gewesen, die nit hie stont; vnd seit, wie all heild ab sind gangen vnd wie sú ein end hant genomen vnd von wem sú geborn sind oder wan(n)en.
Kúnig Erendelle von Triere, der was der erste heilt, der ie geborn wartt; der fuͦr úber mer, vnd do er vff das mer kam, do hette er gar vil kiele, wanne er was gar ein richer kinig. do gingen ym die kiele alsamen vnder; doch kam er mitt sim lib vsz, vnd kam ein vischer faren vnd halff dem heren vs. vnd also wz er lang by dem vischer vnd halff ym vischen; vnd hinden nach kam er gon Jherusalem vnd kam zú dem heilgen grab. do was sin frowe einz kingez dohtter, die was geheissen frowe Bride, vnd wz ouch die schônstte ob aln wiben. Vnd donach wartt ym geholffen von andern grossen heren, vnd kam wider gen Triere, vnd starp ouch zuͦ Triere vnd litt ouch zu Triere. vnd also ertrúncken ym al sin diener, vnd verlor grosz guͦtt vff dem mere.
Quellabschnitt
Von den landen vnd stetten, wie die vor zitten hand geheissen; vnd sind ouch die land vor zitten der heild gesin.
Vor zitten hies das land zu Kelle vnd zu Oche vnd dar by vmb vnd dumbe, das hiessz Grippigen-land. in disem selben lande worent vil heilde; der ein hiessz Luͦgeast (Lüdegast?), der ander Hug von Mentze, der dritt Orttewin von Buͦnne.
Das land, dz nuͦn heist Vngernland, das hiessz vor ziten Hunnenland. in disem land wz king Etzel ein here; ez stôssett an Oestrichland.
Das land vnd die statt Wurmez, das hiessz vor zitten Burginne das (Burgunden?) land. in dem selben land wz king Gibich ein here vnd frowe Kriemhild sin dohtter; der selben der waz ouch der rosegartten.
Es ist ouch zuͦ wissend, war vmb gott die cleinen gettwerch vnd die grossen risen vnd dar nach die heilde liessz werden. Zu dem ersten liessz er die gettwerch werden, vmb dez willen, daz das land vnd daz gebirge[n] gar wieste vnd vngebuwen wz, vnd vil guͦttez vnd (von?) gold vnd von silber vnd edel gestein vnd berlin dor mitz. vnd dar vmb mahtte er die gettwerch gar listig vnd wise, das sú al ding wol erkanten, wo zuͦ al ding guͦtt wz. sú kunden ouch wissen, wo zuͦ die stein weren guͦtt. ettelich stein, die gebent grosse sterke; ettelich stein werent guͦt, wen einer die stein by ym hatt, den mohtt nieman gesehen: das hiessz ein nebelkappen. vnd dar vmb gap got den gettwerchen kunst vnd wisszheit; vnd do von so buwettent sú gar húbsche berge; — vnd gop in adel, das sú kinge woren vnd heren also wol, also die heild, vnd gap in grossen richtuͦm. vnd do nuͦn got die risen liessz werden, das wz dar vmb, das sú soltten die wildin dier vnd die grossen wirme erschlahen, das die gettwerch deste sicherer werent vnd das land gebuwen mohtt werden. dar nach úber lúzel jor do wurdent die risen den gettwerchen gar leid duͦn, vnd wurden die risen bose vnd vngetruwe. dar nach beschuͦff gott die starken heild: dz was do zuͦ mol ein mittel folg vnder
Quellabschnitt
der driger hand folg. vnd ist zuͦ wissend, das die heilden gar fil jor gar getruwe worend vnd gar biderb; vnd dar vmb solttent sú den getwergen zuͦ hilff komen wider die vngetruwen risen vnd wider die wilden dier vnd wurme; wanne daz land waz in den zitten gerb vngebuwen vnd wieste. dar vmb mahtte got starg heilde vnd gap den heilden ein natture, daz ir muͦtt vnd su(i?)nne miestent ston vff manheid vnd vff ere vnd v̊ff stritten vnd beisen. do was ouch ettewie fil kinge vnd heren vnder den getwergen, die hetten ouch ettewie fil risen zuͦ dienern; wanne sú al wegen hettent rŭhe vnd wieste weld vnd gebirge nohe by ir woninge ligend. Es ist ouch zuͦ wissend, das die heild alwegend frowen zŭhtt vnd ere an sohend, vnd das sú wittewen vnd weisen beschirmeten, vnd das sú keiner frowen kein leid dottend, ez wer danne libz nott, vnd al wegen frowen zuͦ hilff komen, vnd daz sú vil manheid durch der frowen willen dotten in ernest vnd ouch in schimpff. Es ist ouch zuͦ wissen, daz die risen allesamen woren keiser vnd kinge vnd herzogen vnd grofen vnd heren vnd dienstlútte vnd ritter vnd knehtte, vnd woren all samen edel lútte, vnd wartt nie kein pure nie kein heild, vnd do von sind all heren vnd aller adel komen.
Hagen von Troͧwe, ein kiener heild.
Waltter von Kerlingen, ein heiltt.
Felcher von Altze, genand fideler: er fuͦrtte ein fidele in sim schild, dor von nante man in also. er wz frow Kriemhieltt swester suͦn.
Stieffung, ein king von Ypperland, daz litt in Vngernland.
Ein rise hiessz Asperion; der fuͦrtt zwey swertt in einer scheiden, do mit er vehtten kund.
Schrŭtthan, ein rise; dem warent die Prussen vntz an daz mer vndertan.
Herbotte, ein herzoge vnd ein starker heilt.
Wolffhart; der wz Hilttebrandez swester suͦn, vnd wz Amlung von Gartten sin vatter, vnd wz herzoge Brehtung sin grosz vatter von der muͦtter har. vnd Alphartt wz sin bruͦder; wz ouch ein kiener heild.
Quellabschnitt
Sigestap waz ouch Hilttbrandez swester suͦn, vnd waz Ameling von Gartten ouch sin vatter. nuͦn lid Gartten vnd Berne nohe bigenander.
Von Dennenmarg ein king wz, jung vnd hiess Frút.
Margrofe Riediger von Bechelor; dem gap king Ginter ein dohtter: daz wz king Gibichez suͦns dohtter.
King Hartung vsz Rússenland.
Der schôn Diettrich usz Rússenland.
Wittich, ein heiltt.
Wittich owe, sin bruͦder.
Jr vatter was genant Wieland vnd wz ein herzoge, vnd vertribend in zwen risen vnd gewanen im sin land an. do kam er zuͦ armuͦt, vnd do nach do kam er zuͦ king Elberich vnd wart sin geselle vnd wart ouch ein schmid in dem berge zuͦ Glockensassen. do nach do kam er zu king Hertuͦch, vnd von dez dohtter do mahtt er zwen sien.
Jtem ein heilt hiessz der getruwe Eckhartt von Brisach, von dem geslehtt der Harlinge; der waz ouch diz land in Eilsas vnd in Pris goͧwe. vnd do kam ein keiser, der hiesz keiser Ermendrich; derselbe hing die Harlunge. dem selben Eckehartt dem wurden enpfoln die jungen Harlunge; donach sluͦg er keiser E(r)mentrich zuͦ dode. der selb Eckehartt der sol noch ston vor frowe Fenuz berg, also man seit.
Ein heild hiesz Heime, was Adelgerz suͦn, einz herzogen, vnd hette iiij ellen bogen.
King Gintterz suͦn der ersluͦg den alten Hilttebrand vor der statt zuͦ Bernne. Do wurde(n) ouch all heild erschlagen.
Quellabschnitt
Heilde in Gripdenland, daz ist in dem land Kelle vnd dar by.
Ein heild hiesz Ludegast; der wartt von dem von Bernne erslagen.
vnd Hug von Mentz wartt ouch von dem Berner erslagen.
Orttewin wartt ouch von dem Bernner erslagen.
Helfferich von Bunne.
Diettlip von Stiere vz Stirmarg, der wz Bitterolffz suͦn, der waz vff der Duͦnowe gesessen.
Ecke vnd Vaso(l)t vnd Obendrott, die worend Menttigerz sien vs Cicilgenland; vnd Mentigerz wip hiess Gudengartt, die wz der driger suͦne muͦtter.
Frowe Heriche wz king Etzelz wip, die hette zwen sien, die ersluͦg Wittich vor Raben zuͦ dod in dem stritte.
Ruͦnze, die was Ecken vatter swester, vnd Mentiger waz ir bruͦder. die selb Ruͦntz hatte zwen sien: der ein hiess Zerre, der ander hiesz Welderich.
Ruͦnzen bruͦder Mentiger hat ouch zwen siene: der ein hiesz Ecke witt, der ander hisz Eckenod.
Ein heilt wz genant Adelger; der waz Heymen vatter.
Von Ottnid dem keiser.
Keiser Otnidez vatter der waz ein mehttiger king vnd hatte vil guͦtter land vnd lútte vnd wz gesessen in dem land Lamparten vff einer birge, hiesz Gartten, das noch hútt dez dagez in Lamparten lid. do nam der selb Ottnid ein wip, die was dez kingez von Rússen swester. vnd do sú lange bigenander gewaren, do hetten sú gernne ein kint gehaben: do mohtte ez nit sin. do botten sú got vmb ein kint: dz mohtt aber nit sin. das wuste king Elberich dz twerch wol, dz sú also got bottent; wanne er nohe by ym
Quellabschnitt
(yn?) gesessen was. er wz ouch gar wise von dem gestirnne vnd an kunst vnd wuste wol, das sú von dem manne kein kind wnrd machend; vnd wz ez king Elberich gar leid, das sie solten sterben on libez erben; wanne er fo(r)htte, daz ym bo̊se, vngetruwe nochgeburen in sin lande wurden gesettzet, dz ym schaden möhtte, vnd gedohtt: „du bist ein king vnd bist also guͦtt, also sie ez ist; weger, do werd dem lande ein here, wanne nit.“ vnd ging dar vnd nam ein fingerlin an sin hand: do waz ein stein ynne; wer das fingerlin oder den stein by im druͦg, den mohtte nieman gesehen: daz hiesz in den zitten ein nebel kappen. vnd fuͦr zuͦ der kingin, Ottnidez muͦtter, vnd kam zuͦ ir in ein kemnoͧtte, do sú an irm gebette was, vnd mohtte sin nit gesehen. nuͦn was king Elberich gar starg, das kam ouch von edelm gestein, vnd úber kam die kingin wider ieren willen. do wart sú keiser Ottnidez swanger. do seitte er ir, wer er wer, vnd gap ir dz fingerlin vnd seit ir, warvmb er ez geton hette, durch dez besten willen. vnd dar nach úber x ior, do waz der altt king Ottnid ein altt, swach mann, vnd gebott gott úber in, daz er starp; do enpfalch er sinen suͦn den kinge von Rússen; wanne er waz siner muͦtter bruͦder. vnd also viel das kingrich an den jungen heren Ottnid, vnd wartt dar nach Ro̊mscher keiser, vnd waz er king Elberichz liplicher suͦn, das nieman (wiste), wanne er vnd die kingin.
Derselb keiser Ottnid, Elberichz suͦn, was geborn vs Lampartten land, ein mehttiger king.
Kaiser Ottnidez muͦtter die waz king Elegastez swester von Rússen land. der selb king von Rissen der wartt zoruig úber sin swester Elberichz wegen. do dis Elberich befand, do brohtte erz mit sinen listen wider vmb zuͦ frintschafftten.
Dem selben keiser Ottnid, dem dient Rússen land vnd ouch daz land zuͦ Bernne. her Diettrich von Bern wartt dz selb land Bernne do nach úber zwey cᵒ jor.
Keiser Ottnid betwang die land von dem gebirge vntz an daz mer; ym diende ouch Rome vnd Latran.
Er waz gesessen do zuͦ mol in Lampartenlande vff
Quellabschnitt
einer vesten, die wz nohe gelegen by dem land Bernne. Ottnid hatt xij man sterg.
do hatte er vff der festen zu Gartten lxxij man; dz waren ein deil grosse heren vnd herzogen vn̄ grofen vnd dinstman, die ym nohe zuͦ gehortten von sibschaft. Keiser Ottnidez vatter vnd alz sin geslehtt fuͦrtten einen helffand an dem schiltte vnd vff dem helme.
aber do Ottnid Remscher keiser wartt, do fuͦrtte er einen swarzen adeler, also onch alle keiser noch dunt, die do Ro̊msche keiser sind.
Dise waren keiser Ottnidez diener vnd sin rot geben:
der king Elegast von Rússen; der waz siner muͦtter bruͦder;
der trosseesse ab Gartten; der wz keiser Ottnid(s) swester suͦn;
der margrofe von Thuͦschan vnd (der) keiser die woren zuͦn andern kinden;
herzog Gerwartt von Trowe; wz Ottnidz swoger;
do waz herzoge Zacheries; der wz gesessen zwischent der Ettsche vnd dem mer; der was von ym verlehent. der selb herzog dett Ottnid grosse frindschafft: er besteltte vil spisen vnd kiel, do er úber mer wollt farn.
do wz der king von Messin sin lieber diener vnd rott geb.
Keiser Ottnid nam ein elich wip ginsitt merez; das waz einz kingez dohtter; der waz ein heiden, gesessen zuͦ Rachaol, vnd wz sin lant geheissen Nider Surgenland, vnd in dem land lag ein stat, genant Suͦderz. er hatte aber ein statt, die was geheissen Mintabur. vnd in der selben statt do wz der king alwegen gewenlich mit sim wib vnd mit siner schonen dohtter Siderott. aber Ottnid nam ym die dohtter mit gewaltt vnd deifftt sú, vnd wartt sin elich wip. vnd do schickett ym der heyde zuͦ leid j risen vn̄ sin wip vnd zwen ling wurme; die sollten sú ziehen, vntz sú grossz wurden, heimlich in Ottnidez lande: also ouch geschach. die selben wurme woltte keiser Ottenid erslahen; vnd also drugen die wurm keiser Ottnid in den berg vnd ossend in, dz er starb.
Quellabschnitt
dar nach enpfand ez Wolff diettrich; der ersluͦg der wurm vil zuͦ dod, vntz an einen: den ersluͦg her Diettrich von Bernne dar nach wol úber lxxx jor. vnd do Wolff diettrich also die wurm erslagen hatte vnd sinen gesellen Otnid gerochen, do nam er Ottnidz wip zu der e; die hiess Siderott. Otnid waz in der eiltt, also Wolff diettrich; doch wz Ottnid viij jor eiltter.
Herzog Brehttung was ein richer, biderwer herzog vnd ein wiser man; was von Merian geborn, vnd hatte sehzehen sien: das woren all herzogen. vnd waz der vatter vnd die sienne all Húgel diettrich(s) vnd Wolff diettrichsz diener vntz an iren dott.
Herbrand wz Berttungez suͦn der eilste. der nam dez richen Wer(n)herez dohtter zuͦ Derenfels (Terfis?); die hiesz die schön Amige. Herbrand wartt ritter zuͦ Duͦschan vor dem closter. der was des altten Hilttbrandez vatter vnd minch Eilsams, und Amenold(s) von Gartten frowe die was sin dohtter.
Hache wz ouch Bertungez suͦn.
Brecheler wz ouch Berttungez suͦn.
B(r)echttung, der jung, wz ouch sin suͦn.
Hilttbrand, der junge, wz ouch sin suͦn.
Vnd sesse siner sien wurden erslagen von Wolffdiettrichs bruͦder Waszmuͦt vnd Bogen, by Wolffdiettrich vor Wolffdiettrichz vnd siner diener vesten.
Die andern fier siene komen dar von. Vnd also starp herzog Bertting, diser knaben vatter, in king Bogens vnd in king Wasemuͦtz gefengnisse. Dise zwen kinge woren Wolffdiettrichz brieder, wie wol sie Wolffdietrich vsz gestossen hatten von sim erbe vnd ym sin dienstlitt gefangen hetten; aber Wolffdiettrich betwang sú zuͦlest vnd loste sin dienstmanne wider, vnd besas er sin erb wider vmb.
Also wz der altt Hildbrand vnd sin geswister — die waren Hachen swester vnd siner andern geswister bruͦder kind.
Higeldiettrich(s) vatter was ein king in Kriechenlande, vnd waz ein guͦtter Kristen, vnd wz geheissen king Anzigus, vnd wz gesessen zuͦ Constantinopel vff einer vesten.
Quellabschnitt
vnd do er gestarp, do erbet Húgeldiettrich daz ganz kingrich vnd wz ouch zuͦ Constantnopel.
Vff den selben dag, do king Anzegus starp, do waz sin suͦn Higeldittrich ahzehen jor altt. vnd fuͦrtt king Anzigus ein rotten lowen in dem schiltt: das selb hat ouch sider gefiret sin suͦn vnd Wolffdiettrich vnd ir nachkomen.
Higeldiettrich der vorgenand erwarp sin frowe mit siden negen vff eim durnne. vnd die selb junfrowe er also erwarp; die waz genant Hiltteburg vnd ir fatter king Wolgunt vnd ir muͦtter Liebgartt, vnd woren gesessen vff einer birge genant Salnecke. also mahtte Hugdiettrich iij sienne mit der selben frowen Hiltteburg.
Der erste suͦn hiess Wolffdiettrich, wartt ein Römscher keiser vnd wartt dez Bernerz gross vatter:
Der ander suͦn hiessz Wasemuͦtt, ein king.
Der dirtt hiessz Boͧgen, ein king.
Wolffdiettrichz erste wip wz genant die ri(u?)che Eilse; dornoch wart sú genant Sigeminne, die schonste ob alln wiben.
Darnach mahtt Wolffdiettrich ein suͦn vnd eine[n] dohtter mit keiser Ottnidez selgen wip. das selb wip wz einz heiden dohtter ginsitt merez vsser Surgon land.
Der suͦn wart genannt Diettmar; vnd der selb dett den ersten stritt an die heiden vor dem closter zu Thuschan, do er ouch ritter wartt gemahtt, vnd wartt ouch in der selben wochen zuͦ keiser gemahtt: daz schuͦff Wolffdiettrich sin vatter vnd beschach mit aller firsten vnd heren willen. vnd also was frowe Siderott Diettmars muͦtter.
Wolffdiettrichz dohtter hiesz ouch frowe Sidrott.
Also mahtte der selb keiser Diettmar iiij siene. der erst Diettrich von Bernne; vnd wartt ym ouch der name „der her von Bernne.“ also wz Wolffdiettrich dez Bernerz gross vatter.
King E(r)menttrich vnd king Harlung woren ouch Diettmars sien. nuͦn hatte Diettrich von Bernne ein bruͦder genant Dietter; der wartt erslagen in sinen jungen tagen.
Ez ist zuͦ wissend, do des Berners muͦter den Bernner
Quellabschnitt
druͦg vnd sin swanger was worden von irme manne Diettmar, do ist zu wissend, das Machmett, also heissen ettlich besen geister an den selben zitten, do der selb Machemett mahtte sin gespenste, der schuͦff, daz dez Bernerz muͦtter einer nahtt getreimett in dem sloff, wie ir man by ir slieffe vnd in der selben zit wz Diettmar in einer reisen. vnd do sú erwachette, do greiff sú neben sich, do greiff sú vff ein holen geist. do sprach der geist: „du soltt dich nit fe(r)htten, ich bin ein gehúrer geist: ich loss dich wissen, den suͦn, den dr von Diettmar treist, der sol werden der sterkest geist, der ye oder iemer geborn sol werden, vnd von dem droͧm, also dir ist getreimet, dovon so wurtt im das fir vssz dem mund schiessen, so er zornig wúrtt, vnd gar ein biderber heillt.“ Vnd also buwett der dúfel ein guͦtte schon burg in drigen dagen: dz ist die burg zuͦ Bernne.
Hilttbrand vnd sin geswister sind herzog Brehttungez geslehtte.
Hilttbrand, der altt, wz Herbrandez suͦn.
Minch Eilsam was Herbrandez suͦn.
Amelott von Garttenz frowe wz Herbrandez dohtter.
vnd also was Hach vnd sin geswister diser vatter bruͦder. also wz herzog Brehttung diser grosz vatter, Hilttbrand(s) vnd siner geswister.
Amelott von Gartten hett Hilttbrandez vnd minch Eilsam(s) swester, mit der hette er dise nach geschriben siene; der waren drige, vnd wz Berttung iv grosz vatter:
der erst suͦn wz Wolffhartt, der ander Alphartt, der dirtt wz Sigestap. die drig waren Hilttbrand(s) swestersien.
Quellabschnitt
Das sind die heren vssz Niderland vmb Wurmez vnd Meintz vnd Kell vnd Och. dis land hiessz vor zitten Grippean. das selb land wz king Gipis von Wurmez; der hatte ein dohtter Kriemhiltt, die [die] pflanzett ein rose gartten wuneclich zu Wurmez an dem Rin.
Frowe Kriemhiltt nam Sifritt vs Niderland.
king Gintter wz king Gippis suͦn.
king Gernott wz king Gippis suͦn.
Giseler wz ouch sin suͦn, der wartt jung erslagen.
Feilcker von Altz(ei), ein fideler genant, der was Krimhiltt swester suͦn.
Sifritt ein king vsz Niderland, dez waz daz land Wurmez vnd do noheby, das land lag nohe by king Gibichez land. sin vatter hiessz king Sigemund vssz der Nibelunge. dem Sifritt wartt Kriemhiltt gemaheltt vnd wart in dem Rose gartten erslagen von dem Bernner.
King Gibich vnd sin dohtter Kriemhilt hettend ein fergen zuͦ Wurmez an dem Rin, der waz gar ein grosser, starker man vnd heilt, vnd der hatte zwölff sien. der selb ferg wz genat Nottbrehtt.
Von den heilden vnd von dem heren von der Húnen land, das selb land heissett nuͦn Vngern land vnd dz selb land wz king Etzelz vssz Vngernland.
Dise noch geschriben heren vnd heild waren alle king Etzelz diener vff die reise, also man in den Rosegartten zoch vmb die rosen striten. vnd hiess Ezelz frowe Heriche.
Diettrich von Bernne wz Diettmarz suͦn.
Hilldbrand waz Herbrandez suͦn.
minch Eilsam Hillbrandez bruͦder.
Amelung von Gartten der waz Alpharttz vnd
Quellabschnitt
Wolffharz vatter, dem wartt enpfohlen dez Bernerz land vnd sin erb vnd ouch frowe Ůtte sinz swogerz Hilttbrandz wip. do sprach Amelung von Gartten zuͦ Hilttbrand sim swoger, das er ym liess enpfoln sin Alphortt vnd Wolffhartt sin siene.
Dez Berners erste wip hiessz Herttelin, die wz dez kingez dohtter von Porttugal. er waz gar ein biderwer king. er vahtt al wegen an die heiden vnd wartt ouch von den heiden erslagen. also kam king Goldemar vnd stal ym sin dohtter, das die altt kinginne von leid starp. do kam der Berner vnd nam sú Goldemar wider vmb mit grosser arbeit. doch bleip sú lutter vnd rein von Goldemar. also do dis erste wip gestarp, do nam er das ander wip, die hiessz Herrott vnd wz king Etzelz swester dohtter vsz Vngern land. vnd wz der Bernner salb fird gebruͦder, der ein hiessz E(r)mentrich, der ander king Harlung, der dirtte Dietter der jung[e, der] erslagen wartt.
Ez ist zu wissend, daz der vor geschriben Ementrich hatte einen marschalg, der sin oberster waz daz land zu besorgend. der waz geheissen der getruwe Sibiche. der hatte gar ein schone wip, vnd sú waz ouch gar biderb. vnd die selb die hatte Ementrich zu mal gernne besloffen. vnd er ging ir lange zitt nach, vnd sú woltt sin willen nit duͦn. do ging Ementrich vnd schickett Sibich gar verre, das er mieste xij wochen vsz sin; vnd die wil do fand der keiser einen fund vnd leitt an mit andern frowen, daz sú ein hoff an leittent, vnd hatte ouch bestellet mit ettlichen frowen vnd ouch mit sinen dienern, das sú ym hilfen wege suͦchen, wie er sú úber keme. also nuͦn der hoff wartt gemahtt, ez mohtt nit gond; do wartt aber ein hoff gemahtt, vnd do noch zwenne: vnd an dem fierden hofe do wartt ein fund gedohtt mit besen wiben, das sú mieste sinen willen duͦn, zuͦ Badoͧwe; vnd das mieste sú duͦn úber irz herzen willen. vnd mit grossem leid, vnd also wartt die frowe gar vngemuͦtt vnd betriebtt eweclich vntz an irn dott. do nuͦn Sibich ir man erheim kam, do fing die frowe an vnd seitt ym, wie die sach ergangen waz. do sprach ir man: „nuͦn bin ich ie vnd ye gewesen ein biderb getrwe man vnd wartt mir der namme geben „der getruve Sibich:“ nuͦn wil ich
Quellabschnitt
werden ein vngetruwer man vnd wil werden (ge)heissen der vngetruwe Sibiche.“ vnd ving do an vnd sprach zu sim heren, keiser Ementtrich: er soltte sins bruͦder kinden ir land vnder ston vnd soltte in ein slossz nach dem andern angewinen. das waz daz land in Prisszgoͧwe vnd vmb Brisach. wanne sin bruder Harlung hatte gelossen zwen sien, dz waren zwen starg junge kinge, vnd waz ynnen zu vogette geben ir land zuͦ besorgend vnd zuͦ eim zuͦhtt meister ein her, der waz ein heild vnd waz genant der „getruwe Eckhartt.“ der waz gesessen vff einer birge nidewendig Brisach. der was der jungen Harlung zuͦhtt meister.
¶ also schúckett der keiser nach den jungen Harlungen, sinz bruͦder kint, vnd hiessz sú erhenken; vn̄ das beschach. nuͦn waz vff den dag der getruwe Eckhartt nit doheim by innen vnd wz geritten ein reisz wo hin, das er in ir land besorgette. dar nach enpfand ez Eckartt schier, vnd gieng dar vnd befalch vnd besatte alle slossz, das sú nieman sollten inlossen. also reid der getruwe Eckhartt zuͦ dem Bernner in sin land vnd seitte ym die mere. do fuͦr der Bernner vnd Eckhart in Ementrichz land, vnd gewanent ym das slossz an, do er vff sas, vnd ersluͦgen ouch gar fil hundertt heild. do kam der keiser vnd Sibich zu fuͦsse dar von. darnach sluͦg er dem Bernner ettewie fil heild zuͦ dode vnd ving ir wol ehttewe. do hette ouch keiser Ementrich zwen siene, der hatte der Bernner den einen ouch gefangen. also schikkett der Bernner zu sim bruͦder king Ementrich, daz er ym soltt sin diener lassen [soltt] lidig, so woltt er im sin suͦn ouch lidig lon. do enbott der keiser Ementrich sim bruͦder wider vmb, er mohtt mit sim suͦn dun, wz er woltte, do lege ym kein nod an; wollt er sin viij heild han, so mieste er ym als sin land lidig lossen, vnd darzuͦ sin suͦn ouch lidig, vnd zuͦ fuͦsse en weg go(n). do wuste der Bernner nit wol, wie er duͦn soltte, vnd nam sin rott geben. do sprachen sin rott geben, ez were weger, er ferlúr sin heild, denne sin lant; so mieste er doch ein arm mensch sin. do sprach der Bernner: „daz wel got nit! do ist ir dol (dolest?) keiner vnder den viij heilden, lege er allein gefangen, eb ich in liess doͧtten, ich ginge e
Quellabschnitt
von alm mime lande.“ vnd also gap der Bernner dem keiser sin suͦn vnd sin land wider, vnd loste sin heild, vnd ging er vnd sin diener zuͦ fuͦsz en weg. do kamen sú gen Bechelor zuͦ margrof Ruͦdigerz wip. die gap in allen zuͦ essend vn̄ zuͦ trinken. vnd do gingen sú firbas in ein ander slossz. do kam der margrofe Ruͦdiger on al geferd geritten: do sach er die heren an ein fenster ligen. do reid er in dez wurttez hus, do sach er den Bernner: do knuwett der margrof nider. do sprach der Berner: „stont vff, ich bin ein arm man.“ vnd seit ym, wie ez ergangen waz. do sprach der margrofe zuͦ dem wurtte: „gip ym zuͦ essend vnd trinkend genuͦg.“ do enbott der margrof Ruͦdiger dem kinge Etzel, wie ez vmb die heren ergangen waz. do kam king Etzel mit vil luttez vnd fuͦrtte den Bernner vnd sin heild vnd den Hilttbrand mit ym vff sin burg zu frowe Herchin, king Ezelz wip. nuͦn was frowe Herche gar ein stoltz kindig wip. do nuͦn der Bernner wol viij dage do waz gewesen, do hatte sú den Bernner neben sich, vnd sprach also zuͦ dem Berner: „sustu Berner, min here Ettzel hatt einer swester dohtter, die soltt man lange beratten han, do kund sú nit iren glichen úber komen. nuͦn hat min her vil kingrich vnd vil landez von heren, rittern, knehtten, die ym verbunden sind zuͦ dienend; do wil ich dir ahtten, das dir dry kingrich werden. min her hatt doch on das genuͦg. so bekomestu dinz leidez wider vmb.“ do nam sich der Bernner zuͦ berotten mit dem Hilttbrand. do riet im Hiltbrand: sit ein mol daz ez also ergangen were, vnd ouch dz sú ein wol geborn wip were vnd ym wol gezem, so wer ez weger, er dette ez, wenne nit. also wartt die brut (brutloft?) vollendett, vnd wartt ein grosser hof gemahtt, vnd kamen vil heren vnd heild do hin. do schickett der king vssz in Vngernland, also wite ez waz, wenne ez sin eigen land was, nach allen hengesten vnd rossen, die man iergen kund finden vnd gap dem Bernner vnd allen sinen dienern ross vnd pferd, vnd gap inn wol xviij dusend der besten heild, vnd gewanend do dez Bernerz land alz wider vmb. also kam der Bernner wider zuͦ sim land vnd lútten.
Quellabschnitt
Wie alle heild ein end namen vnd alle erslagen wurden, vnd wie Diettrich von Bernne ferlorn ist worden, dz nieman weisz, wo er ist komen.
Es ist zu wissend, do king Etzel sin frowe Heriche gestarp, do nam er dar nach king Gibichez dohtter, dz wz frowe Kriemhiltt, die vormals king Sifritz wip wz in Niderland, der do erslagen waz von dem Bernner in dem Rosen gartten. daz muͦtte frowe Kriemhiltt gar sere, vnd wartt dez Bernerz vnd aller Wilfinge figend, die do vss der Hunen land waren. do vand sú ein boͧsen fund, wie daz die Wilfinge erslagen wurdend, vnd dar vmb so nam sú king Etzell, wanne er was der richste vnd der gewaltigeste king, vnd sú meinte, daz er den Wilfingen aller bast mohtt wider ston, vnd mahtt ein grossen hoff vnd dett den schrigen yn alle land zu allen heilden. do komen alle heild do hin. das wz zuͦ Ofen in der statt, die litt in Vngern land, vnd dz selb land wz king Etzelz. do hatte sie gar ein grossen has vnd nid heimlich in jrm herzen an die Wilfing vs Hinen land, vnd wz dar vmb, daz sú hatten iren man erslagen in dem Rose gartten, dz wz Sifritt der hirnin vsz Niderland. also waz der hoff geleid zuͦ Ofen; die selb statt wz ouch king Etzelz. do ging die kingin zu Hagen fon Droͧwe vnd batt in, dz er die heild zuͦ im neme vnd ein gereisse ane finge vnd ein hader, also dz die Húnschen heild al erslagen wurden. do sprach Hagen: daz kund er mit kein eren an gefohen; wer ez aber, daz den stritt ieman an finge, so woltt er sin aller bestez duͦn. do nuͦn fro Kriemhiltt sach, dz Hagen nit wider sin ere wolt duͦn, do hatte die kingin ein jungen suͦn von zehen joren, zuͦ dem sprach (sú): „louff, slach Hagen an ein backen; ez ist gner, der dortt sizett.“ do ging der knab vnd sluͦg in an ein backen. do sprach Hagen: „dz wil ich dir gern verttragen vmb din kindheitt; wer ez aber, das du mich me sliegest, ich mohtt dirz nit vertragen.“ do wz sú fro, vnd sprach aber zum kind: „louff vnd slach in ander werb.“ der knab dett daz in sin muͦtter hiess. do er in nuͦn aber hatte geslagen, do stund Hagen vff: „daz hastu nit von dir selber getan.“ vnd nam dz kind by dem hor vnd sluͦg ym dz hoͧbtt ab.
Quellabschnitt
¶ Do wuͦste jederman vff, vnd einer, vnd aber einer, do zwen, do drige, bitz man ez vmb en dunb in dem öbern sal gewar wartt, vnd do in der stat, vnd do vmb. vnd do lieffen die heild al zuͦ samen vnd sluͦg je einer den andern zuͦ dode, vszgenomen der Hilttebrand, der hieg vnd stach sich vsser in, doch so wurden ym zwo wunden gehoven in sin hoͧbtt.
¶ Do wz der Bernner in der stat in einem andern huse vnd wuste nit vmb die sach, vntz dz Hilttbrand wund zuͦ ym kam vnd ym die mer seitt. do lieff der Bernner bald vnd woltt luͦgen, wz der mer wer. do vand er frowe Kriemhild zwen brieder; die ving er vnd band in al fier zuͦ samen vnd ging do enweg. do noch kam frowe Kriemchiltt vnd fand ir zwen brieder also gebunden ligen: do lag ein swertt neben in, do nam sú das swertt vnd hiege in beiden dz houbtt ab also gebunden. do kam der Bernner vnd woltte han besehen die zwen gebunden man: do wz in beiden dz hoͧbtt ab. do sach er frow Krimhiltt for ym gon: do hatte sú ein swertt in der hend. do sprach er: „ir hand den zweigen dz hoͧbtt ab geslagen.“ do sprach sú „io.“ do nam er daz swertt vnd hieg sú mittel ynne enzwey. also wartt gar vsser mossen fil heild erslagen. also reit der Berner vnd Hiltbrant enweg. die selben wunden woltten Hilttbrand nie geheilen vntz in sin dott.
¶ Vnd do nach wartt aber ein stritt bered, der geschach vor Bernne. do wartt der altt Hilttbrand erslagen vnd king Gintter, das wz frowe Krimhilt bruͦder. vnd do kam ie einer an den andern, vntz sú all erslagen wurden, alle die heild, die in aller welt worend, vntz an den Bernner. do kam ein cleinz getwerch vnd gien(g) zuͦ dem Berner vnd sprach zuͦ ym: „Berner, Berner, du soltt mit mir gon.“ do sprach der Berner: „wo sol ich hin?“ do sprach aber dz twerch: „du soltt mit mir gon, din rich ist nit me von diser weltt.“ also ging er enweg, vnd weis nieman, wo er komen ist, vnd ob er noch leb, oder wo er vff ertrich hin komen sige. vnd vff den selben dag wurden all heild abe geton vnd erslagen, vnd wz niergen keiner me in aller weltt.
¶ Man meint ouch, der getruwe Eckart sú noch vor frowe Venuz berg, vnd solle ouch do sin vntz an den jungesten dag.