Wolfdietrich

1 Ûf Kunstenobel ze Kriechen ein gewalteger künic saz. an dem tugent noch êre noch manheit nie vergaz sîn meister und sîn schepfer, der in dâ werden liez. an im gebrast niht mêre wan daz er ein heiden hiez. 2 Im dienten durch Kriechen der Bulgerîe walt: von hiunischem gemerke betwanc ez sîn gewalt. im dienten mit gewalte kriechischiu künicrîch. er saz ûf Kunstenobele und hiez hêr Huge Dietrich. 3 Botelunges swester von den Hiunen was sîn wîp. diu het guote witze und tugentlichen lîp. si was alles wandels und missewende frî. si truoc ouch bî dem Kriechen schœner süne drî. 4 Si wâren liep der frouwen und ouch dem künege rîch. durch die grôzen liebe hiez mans alle Dietrich. dô si der süne zwêne bî dem künege gewan, dô gienc den künic rîchen aber ein hervart an. 5 Die volbrâhte er mit êren und gewan ouch helde genuoc. dô weste niht der Krieche daz si den dritten truoc. mit Berhtunge von Mêrân er dô die hervart swuor, der was sîn rât getriuwer: von rehte er mit im fuor. 6 Dô wolte er sînem friunde, einem künege leit tuon, von Tenemarke Fruoten sîner swester suon. dô sprach der künic rîche ze Berhtunge von Mêrân ‘wem sol ich mîne liute und mîne bürge lân? 7 Mîn lant und mîn erbe, ouch mîn künicrîch und mîn liebe frouwen?’ sprach Huge Dietrich.

dô sprach der vil getriuwe ‘wer möhte ez baz behaben? bevilh ez mîme gesellen, dem herzogen Saben, 8 Elliu dîniu rîche, diu dir undertænic sint, dar zuo mîne frouwen und dîn vil lieben kint.’ den rîchen fürsten Saben hiez er dô für sich gân: allez daz er hête daz machet er im undertân. 9 Kint und künicrîche, wîp und al sîn lant bevalh erm ûf sîn triuwe: daz was niht wol bewant. als im den rücken kêrte der liebe hêrre sîn, er trat gezogenlîchen für die künigîn. 10 Er sprach ze sîner frouwen ‘nu mîn hêrre sî geriten, nu solt du niht zürnen, ich wil dich etewes biten’. si sprach gezogenlîchen ‘ich zürne wider dich niht, wilt du gefüeger dinge muoten, ez geschiht. 11 Du maht aber ûf mîn triuwe solher bete gern, daz ich ê mit dir zurnde, ê ich wolte dich gewern.’ er sprach valschlîchen ‘diu bete ist ûf geschoben: ich getar gên dir niht muoten, du wellest zorn verloben.’ 12 Dô sprach diu wol gezogene ‘diu bete erloubet sî. ich weiz dich sô getriuwen, ich bin lasters von dir frî. dîn hêrr hât mich enpholhen dir ûf die triuwe dîn: ich weiz dich sô getriuwen, du vârest niht der êren mîn.’ 13 Dô sprach der valsches rîche ‘ich sage dir waz ich wil. du hâst urloup mir ze zürnen. nu bite ich ouch niht vil. ich hân mich mînes hêrren ûf diser verte verzigen: er kumet doch nimmer widere: nu lâ mich bî dir ligen.’ 14 Der frouwen dô vor zorne ir herze in jâmer brach. dô flôz ir von den ougen über die brust ein bach. si sprach ‘du hâst zerbrochen an mir die triuwe dîn. und sent in got her widere, ich klagez dem hêrren mîn.’ 15 Dô er ir angest hôrte, dô tete er alse ein man der wol mit valschen listen sîn rede verkeren kan. dô sprach er zühticlichen ‘ich het ez niht geruocht: du solt niht zürnen, frouwe, ich hân dich niuwan dâ mite versuocht.’ 16 Ich hân wol versuochet dîn stæte und dîne tugent. du hâst in dînem herzen bêde kiusche und ganze tugent.

swaz ich mit dir geschimpfe, daz solt du mir vertragen. du solt keine untriuwe mînem hêrrn von mir niht sagen.’ 17 Si sprach ‘hâst duz in spotte gegen mir gereit, sô wirt es mînem hêrren von mir niht geseit. ich wil dir des mîn triuwe und mîn wîplich êre geben: gewehenest dus ie mêre, ez gêt dir an dîn leben.’ 18 Dô hôrte er an ir worten daz ir wille was niht guot. er dâhte ‘ich hân geheret daz siz niene tuot. ich getar niht mêre erzürnen hie mite daz schœne wîp, und sagt siz mînem hêrren, ez gât mir an den lîp.’ 19 Dô nâhente ez dem jâre, daz daz dritte kindelîn geboren solte werden von der edeln künigîn. si was ein heideninne und geloubte doch an got: swâ si vor vorhte mohte, dâ leist si sîn gebot. 20 Si lac eines nahtes in ir bette unde slief. si was niht vol entslâfen, unz ir ein stimme rief ‘frouwe, du solt wachen, diz schrecken mir vertragen: nu du an got geloubest, ich sol dir guotiu mære sagen. 21 Dîn man und du sît heiden, doch tregest ein kindelîn: got wil dich niht erlâzen, ez müeze cristen sîn.’ si sprach ‘wie gerne ich leiste sîn bete und sîn gebot, sol ich michs an dich lâzen unde an dînen got.’ 22 Er sprach ‘disiu mære alsô wâriu sint, daz du an dem fünften morgen, frouwe, gewinnst ein kint, daz dir dîn schepfer under dîn herze hât gefrumt. du solt ouch daz niht lâzen, swann ez zer welde kumt: 23 Über ein halbe mîle sitzt ein guoter man: du solt mit dînem kinde ze dem einsidele gân. daz solt du im bringen an einem morgen fruo und solt in des niht irren, swaz er mit dem kindel tuo.’ 24 An dem fünften morgen kam si ûz aller nôt. dô si sich vermohte, si tete swaz er gebôt. si truoc ûz der bürge ir kindelîn verstoln und gienc zem klûsenære verborgen und verholn. 25 Si enweste war si solte und gienc doch rehte dar. er was ouch dâ gesezzen mêr danne vierzic jâr. als diu küniginne ze dem hiuselîne gienc, der selbe klûsenære si minnicliche enphienc.

26 Er hiez si flîziclîchen gote. willekomen sîn. ‘dîn sun sol cristen werden: gip mir daz kindelîn.’ si werte sich des lange: daz kint si im doch liez; si sach daz harte ungerne, daz erz in daz wazzer stiez. 27 Dô sach si ob dem wâge schînen kerzen lieht. die ez im hulfen toufen, der ensach si leider niht. daz kindel er in sîden vil schône dô bewant und gap ez sîner muoter wider in die hant. 28 Dô sprach er zuo der frouwen ‘sî dir liep daz kindelîn, so behalt unz an sîn alter daz toufgewæte sîn. ich wil dir sagen, frouwe, swaz im dar von geschiht, und sî dir liep daz kindel, sô vlîus daz gwæte niht. 29 Swenn du in in sorgen sendest, sô legez an sînen lîp.’ ‘sô wirt ez im ze kleine, fürhte ich’ sprach daz wîp. ‘ez wirt in sînem alter ein ungefüeger man: swie enge ab ez dich dunke, sô legt erz doch wol an. 30 Swenn erz in strîte füeret, sô ist sîn lîp gesunt. von deheiner slahte wâfen wirt er nimmer wunt. von wazzer noch von fiure verliust er sînen lîp.’ ‘sô wil ich imz gerne behalten’ alsô sprach daz wîp. 31 ‘Ich wil dir sagen mêre, wie lange ez dir sol leben. ich wil im ie zem jâre eines mannes sterke geben: von der gotes gâbe wirt er fünfzic jâr alt und fünfzic manne sterke hât sîn lîp gewalt. 32 Du solt umb in niht sorgen: er kumt vil dicke in nôt, er kumet ouch vil ofte daz im nâhen ist der tôt, und wil dir sagen mêre, daz er mit sîn eines hant ein schœne küniginne erstrîtet unde ein lant.’ 33 Si hete wol geleistet ein bezzer gewant. dô vorhte si des sêre, si wurde drinne erkant. daz sol des wurmes vindes êrste âventiure sîn: noch lebte ûf Garte in sorgen diu arme künigîn.

34 Dô wuohs der junchêrre. des phlac sîn muoter wol mit muoterlicher triuwe, als ein frouwe ir kindes sol. als vil gerne liep den frouwen ir jungiu kindel sint, der selbe was ir lieber dann ander ir kint. 35 Si hete in gote ergeben und dem tiuvel gar benomen. dô nâhente ez dem jâre, daz der künic solte komen. do enweste er niht dâ heime des jungen sunes sîn. dô wuohs ouch volliclichen daz liebe kindelîn. 36 Die boten vaste gâhten gegen dem künege rîch. si sageten im diu mære, diu wâren wünniclîch. ‘nu gip uns, hêrre, miete: du hâst ein schœnen suon.’ mit freuden sprach der Krieche ‘daz wil ich gerne tuon.’ 37 Dô was im liep zem wîbe und zem kinde: er hete es reht. dô truoc man im engegene den wünniclichen kneht. daz kint was alsô schœne, daz erz vil gerne sach, und freute sich sîn herze, des im sîn muoter jach. 38 Dô sazte man den kleinen, daz er bî der tavele stuont. dô er geloufen mohte, als noch diu kindel tuont, dô gap man im durch liebe brôt in sîne hant: swelch hunt im aber daz zucte, den warf er an die want. 39 Dô daz die liute ersâhen, si segenten alle sich. die wîsen alle sprâchen ‘got behüete mich! vil ungefüege sterke hât dîn vierthalbez jâr.’ durch des kindes wunder fuor vil der liute dar. 40 Swer dô des kindes sterke bî der schœne ane sach, der segente sich durch wunder: ze dem künege maneger sprach diu wort, als man dâ sprichet, diu gar unnütze sint: ‘hêr künec, nu heizt in tœten: er ist des ûbeln tiuvels kint. 41 Ir sult daz gelouben, erst von dem tiuvel komen. wâ solte er dise sterke anders hân genomen? læst du den tiuvel wahsen, dir wirt dâ von sorge bekant: kumt er ze sînen jâren, er verderbet liute unt lant.’

42 Der künic disiu mære hôrte ungerne sagen. do begunde er an dem kinde schœne und sîn lîp klagen. daz erz verrechen solte, daz gienc im an sîn leben: vor ungehiuren dingen er wolt im niht fride geben. 43 Dô sante er heimlîchen nâch dem ungetriuwen Saben. dô sprach der künec ‘ich wæne wir übel gehüetet haben. mîn êre muoz ich vliesen und daz kindelîn. ouch sprechent alle liute daz ez nie wurde mîn.’ 44 Do gedâhte im aber Saben, der ungetriuwe lîp, wie er die lüge erfunde, dâ mit er erzürnt daz wîp. er hete in sînem herzen behalten manegen tac wie er irz ûf gebüebe, daz si bî im niht lac. 45 Dô sprach er zuo dem künege ‘hêrre, ich sage dir daz, swaz ich eins nahtes hôrte, do ich bî der frouwen saz: si sprach “und wolte der tiuvel immer bî mir sîn!” von den selben sachen ist komen daz kindelîn.’ 46 Dô dâhte er aber widere ‘hân ich daz ûf si gelogen, si saget liht die wârheit, sô bin ich gar betrogen. du solt mich drumb niht melden, daz si sô hât getobet: ich soltz niht haben gesaget; daz hete ich ir gelobet.’ 47 Dô sprach der künec ‘mich dunket daz unschuldic sî daz wîp. doch rât uns, hêrre Saben, daz wir im benemen den lîp. rât wie werde dem kinde sîn schœner lîp benomen, daz ez dem wider werde, von dem ez sî bekomen.’ 48 Dô sprach der valsche Sabene ‘wol ich gerâten kan. heize dir gewinnen Berhtungen von Mêrân. du hâst ir ninder zwêne, die dir getriuwer sîn. den heiz verholne tœten daz kleine kindelîn. 49 Geschiht ez offenlichen, die liute unnütze sint, si zihent dich vil lîhte, du habest ertôt daz kint. du solt im verholne heizen nemen sîn leben.’ er sprach ‘ich wil dir volgen, du hâst guoten rât gegeben.’ 50 Dô sprach aber Saben ‘des râts tuon ich mich abe. du solt mich des niht zihen, daz ich dirz gerâten habe.’

ûz dem selben râte er sich dar umbe nam: er wolt daz die getriuwen wurden an einander gram. 51 Berhtunc der wart heimliche zuo dem künege brâht. dô sprach der alte wîse ‘wes ist nu gedâht? hêrre, lât mich hœren, waz disiu mære sint.’ mit jâmer sprach der Krieche ‘du solt tœten mir mîn kint 52 Heimliche und sô verholne, daz sîn niemen werde gewar.’ dô sprach der vil getriuwe ‘seht, daz behüete ich gar. ich wil an sînem tôde vil gar unschuldic sîn. mir wære leit swer tôte den erbehêrren mîn.’ 53 Der künec sprach ‘nu gedenke, Berhtunc von Mêrân, daz ich niht sô getriuwes in mînem rîche hân, und lâz mich des geniezen, daz man dir triuwe giht. du solt daz kindel tœten.’ er sprach ‘ich entet sîn niht.’ 54 ‘Unser zweier triuwe ie mêre gescheiden sint. du hâst ûf Lilienporte sehszehen schœniu kint, unlânge junchêrren, unde ein schœnez wîp: die heize ich alle tœten, du ennêmest dem kinde sînen lîp. 55 Die dir suln liep von rehte und ouch billiche sîn, die heize ich alle hâhen an die zinnen dîn, und ze aller vorderst dir ouch selben nemen daz leben.’ ‘ich wil gelt sô grôzen niht wider daz eine geben,’ 56 So gedâhte der getriuwe: ‘ez ist niht alsô guot. ich tuo swaz er mich heize: vil grimme ist sîn muot. ê danne er mich hienge, mîniu kint und mîn wîp, wolt er michs niht erlâzen, ich nême im ê den lîp.’ 57 Dô sprach er zuo dem künege ‘welt ir michs niht erlân, sô wil ichz gerne ertœten’ sprach Berhtunc von Mêrân. ‘sît ir niht welt erwinden oder ez geschehe, sô solt ir mirz antwurten, daz ez nie man ersehe.’ 58 Des gâben si dô triuwe an einander dâ. Berhtunc wær aber gerner gewesen anderswâ. daz ist diu ander sorge, daz erleit daz kindelîn. noch lebte ûf Garte in jâmer diu arme künigîn.

59 Der künec sprach zuo Berhtungen ‘ich hân mich wol bedâht, wie wir daz kint gewinnen: du solt wachen dise naht. dir muoz der torwarte als undertænic sîn: swenne dichs gelustet, er læt dich ûz unt în. 60 Deheinen kamerære lâz ich ligen vor der tür. alsô daz kint entslæfet, sô solt du treten dar für. swenne si in der bürge alle entslâfen sint und mîn frouwe entslæfet, sô gibe ich dir mîn kint.’ 61 Dô tete der vil getriuwe, als in der künic hiez. er schuof mit dem torwarte, daz ern în und ûz liez. dô tete der vil getriuwe, als in sîn hêrre bat: dô si in der burc entsliefen, für die kemenâte er trat. 62 Dô retten mit einander der man und ouch daz wîp. si heten grôzen jâmer umbe des kindes lîp. der künec sprach zuo der frouwen ‘wâ næm duz kindelîn, du ennæmestz von dem tiuvel?’ ‘nein’ sprach diu künigîn. 63 Dô sprach der künec mit zorne ‘ez sol niht lenger leben. ich wil im ouch mîns erbes nimmer halbe stat gegeben. im wirt ouch von mir nimmer beidiu burc unt lant: swaz ich im erbes gæbe, daz wær übele gewant.’ 64 Dô sprach diu frouwe in zorne ‘daz ist als du wilt. nu ist manec wol geborne, der nimmer füeret schilt. als muoz er ouch vertrœsten sich lîhte der gâbe dîn. der in dâ hât beschaffen, der bewâr daz kindelîn.’ 65 ‘Er sol riuten unde bouwen, von arte ist daz sîn reht. wer liez im sîn künicrîche? er mac niht küneges kneht gesîn mit sînem lîbe: er hât niht küneges muot. er sol in dem walde liute morden umbe ir guot.’ 66 Dô sprach diu frouwe in jâmer ‘lîhte im baz geschiht: swes im got wil gunnen, des mac man im nemen niht. waz ouch ûz im sol werden, daz ist dir unbekant: sîn eines lîp erstritet ein künegîn unde ein lant.’

67 ‘Wilt aber daz gelouben?’ sprach er zer künigîn. si sprach ‘mir ist getroumet, daz ez sol alsô sîn.’ dô sprach aber der Krieche ‘sol im geschehen daz heil, sô lâze er sînen bruodern al hie sîn dritteil. 68 An einem künicrîche. hât er immer lant genuoc, und kan er daz ervehten, sô ist er harte kluoc. ich gibe dir des mîn triuwe und lâze ez ouch wâr, daz er aller mîner lande geniuzet nimmer umbe ein hâr, 69 Noch nimmer teil gewinnet, und solte er immer leben. ich verbîutz ouch mînen kinden, daz si im ihtes geben, swanne sô ich sterbe, dehein des landes mîn.’ ‘sô müeze im got genâden’ sprach aber diu künigîn. 70 Dô swuor bî den zîten dehein künec deheinen eit, swaz er in triuwen lobte, ez wær diu wârheit. dô kerte sich hin umbe diu frouwe unde slief, und sleich er ûz der decke: Berhtunge er lîse rief. 71 Er rûnte durch die porte ‘Berhtunc, bist du dâ?’ dô sprach mit lîsem worte der vil getriuwe ‘jâ.’ ‘weist du ob in der bürge die liute entslâfen sint?’ ‘hêrre, ez wachet niemen, nu emphelhet mir daz kint.’ 72 Der künic dennoch vorhte, ez wacht sîn liebez wîp. dô greif er undr die hülle an ir munt und an ir lîp. sîn hant ez allez suochte swaz man an frouwen siht: swie dicke ers aber ruorte, si erwachte leider niht. 73 Dô gienc er zuo dem bette, dâ lac daz kindelîn, daz er verstelen wolte der lieben muoter sîn. do getorste er nie gerüeren daz kleine kindelîn: er vorhte obe erz wacte, ez wact die muoter sîn. 74 Er gedâhte in sînem muote ‘und wirt daz kindel lût, so erschriet ouch diu muoter, sô liep ist ir daz trût, und bringet mich ze schanden: noch lieber vlüre ichz leben. ich wil ez rehte ermorden und wil imz alsô tôtez geben.’ 75 Ze sînes bettes houpte suocht er sîn gürtelgewant, nâch walhischem site namer ein mezzer an die hant. er sprach ‘wilt du weinen, unreinez kindelîn, unz an die hant daz mezzer stich ich in daz herze dîn.’

76 Dô zucte er ûz dem bette daz kint, dâ er ez vant. durch sînen tôt daz mezzer truoc er an der hant. got gap im dâ ze heile daz daz kindel slief: anders het erz ermordet. Berhtunc im aber rief 77 ‘Wie lange wilt du bîten? ez ist gên dem tage. gip mir daz kint bî zîten, daz ich ez fürder trage, ê dan diu frouwe erwache und uns melde des morgens schîn.’ vil sanfte sprach der Krieche ‘nu nim hin daz kindelîn.’ 78 Berhtunc der getriuwe sînen hêrren enphienc. von der kemenâten er vil lîse gienc. do er kam für daz gewelbe, dô gienc er nâher baz unz für die burcporten: ûf daz ros er gesaz. 79 In sînen regenmantel want er daz kindelîn. er sprach ze dem torwarten ‘und gewehenest du mîn, ich slahe dir abe daz houbet und wirf dich in den graben: verswîgst ab du die reise, du maht sîn frum gehaben.’ 80 Swie ebene ab er sich sazte, der reise in doch verdrôz. der torwarte im legte daz kindel in die schôz. er reit über die brücke, im lûhte des morgens schîn: reht an der burclîten erwacht daz kindelîn. 81 Dô rief ez in den sorgen, alse ein kindel tuot, daz ouch ze solhem tôde hât deheinen muot. ez sprach erbermicliche ‘muoter, decke mich.’ der alte sprach in zorne ‘ich enruoche, und friuset dich.’ 82 Als im der liehte morgen und ouch diu sunne erschein, er gedâhte an sîne triuwe, dô was er alters ein. als der sunnen blicke durch die liehten wolken brach, er was geriten sô verre, daz in niemen sach. 83 Die stige und ouch die strâze er durch vorhte vermeit. durch walt und durch gevilde er mit im schâches reit. do erwachete in den stunden vil gar daz kindelîn. do vergaz ez sînes frostes und spilte mit den ringen sîn. 84 Alsô daz kleine kindel sîner sorgen gar vergaz, dô greif ez an die ringe und sprach ‘waz ist daz?’ des halsperges schœne daz kindel nie verdrôz. daz ersach der Krieche: sîn jâmer wart vil grôz.

85 Ez lûhte im under d’ougen sîn lîp als der snê: swaz daz kint gelachte, daz tete dem alten wê. er dâhte ‘ob ich dich tôte, daz ergie mir nimmer wol. mîn herze ist sô betrüebet, ich wen mit dir ersterben sol.’ 86 Dô fuorte arz ûf die heide an ein vil grüenez gras in ein frômde wilde, dâ niemen bî in was. er sazte ez ûf den anger, dô zôch er ûz daz swert: daz kint wolt er des tôdes durch den hêrren hân gewert. 87 Daz swert begunde er schouwen, dô was sîn herze verzagt. daz habet ir wol geheret, vil dicke ist daz gesagt: swem got sîn leben wil fristen, niht leides dem geschiht. sîn hende ez wolden tœten, dô gestatz sîn herze niht. 88 Dô sprach er wider sich selben ‘wie ist mir sô geschehen? ich hân vor mîner hende wol hundert man gesehen, die ich alle hân ertœtet und mit mîner hant erslagen: daz ich nu bin sô blœde, daz wil ich gote klagen. 89 Daz ich dich niht tar tœten, wâ von kumet mir daz?’ daz kindel er dô fuorte mit zorne fürbaz. er gedâhte in sînem herzen ‘ez hât dir got gegeben. du bist wæn alsô sælic, du solt behalten dîn leben. 90 Ê danne ich von dir scheide, doch wirt dir dîn lîp benomen. ich wil durch dîn sterben ze einem brunnen komen. du muost dich selbe ertrenken in dem wazzer, liebez kint: daz kumt von liehten rôsen, die enmitten drinne sint. 91 Ich weiz wol daz dich triuget dîn jungiu kintheit, daz dîn tœrschiu jugent dich dar in verjeit. der brunne ist tief al umbe, und wil du, kindelîn, die rôsen brechen drinne, zwâr du vellest dar in. 92 Sô wil ich danne schouwen, wie der tôt dir sî beschert. ist dann dîn vater ein tiuvel, er hât dich schiere ernert.’ mit grimmigem muote kam er dar gerant an eine wisen grüene, dâ er den brunnen vant. 93 Mit jâmerlichem herzen erbeizte er ûf daz gras. dennoch im harte swære umb des kindes sterben was. er sazte ez über den brunnen: het aber daz kindelîn gegriffen nâch den rôsen, sô wærz gevallen dar în.

94 Ez kam von sîner sælde, die rôsen ez vermeit. dô gienc ez von dem brunnen hin ûf den anger breit. durch sîne kurzwîle viel ez ûf daz grüene gras. ez ahtes harte kleine daz ez alters ein dâ was. 95 Berhtunc der getriuwe was listic unde karc. sîn ros in loubes dicke und sich selben er verbarc. er sprach ‘nu wære ich gerne disen tac bî dir: ich fürhte, ob dir iht werre, du vliehest her ze mir. 96 Ich wil doch bî dir wachen zwâre dise naht. du muost benamen sterben, so ich dich als verr hân brâht. ich wil grôz wunder hînte an dînem lîbe sehen: und gelebest ouch du unz morgen, ez mac fürbaz geschehen.’ 97 Daz kint was alters eine und hete kumbers niht. ez warte des genâden von dem man wunder siht. der phlac sîn wol mit triuwen, sîn helfe ez niht betrouc. daz wîp was im ze verre, der brüstelîn ez souc. 98 Er saz unz an den abent, diu sunne gar verswant. dô brach der liehte mâne durch die wolken sâ ze hant. dô huop sich zuo dem brunnen durch hitze manic wilt. dô was aber niemen des kindes frideschilt. 99 Swaz wildes ezzen niuzet, daz mac wazzers niht enbern. genas daz kleine kindel, des muoste ez got gewern. zuo dem brunnen liefen lewen bern wiltswîn: mitten under dem gewilde saz daz kindelîn. 100 Swaz wildes wazzer wolte, daz muoste et allez dar. ze jungest kam geloufen der wolve ein michel schar in starkem hungers gîte, als man si loufen siht. der hunger twanc si sêre und tâten dem kinde niht. 101 Von süezes lîbes smacke wart in daz kindel kunt. von grôzer hungers nôte iegelîches wolves munt daz kindelîn beginte: undr in allen ez dâ saz. sô sat wart iegelîcher, daz er des kindes niht enaz. 102 Si sâzen zeinem ringe umb daz kint ûf daz gras. Berhtunc durch daz wunder hin nâch geslichen was. er sprach ‘nu muoz ich schouwen, daz ich noch nie gesach: mich wundert daz die wolve dir tuont kein ungemach.’

103 Diu ougen in ir houpten brunnen alse ein kerzenlieht. der arme was ein tôre und vorht sine vinde niht. er gienc ze iegelichem und greif im mit der hant, wâ er ir liehtiu ougen in ir kopfen vant. 104 Swes er mit in begunde, des muostens im vertragen. sus gienc er undr in umbe, unz ez begunde tagen. swelher sich sîn dâ werte, den sluoc er daz er dâ lac. der wunder lacht dô Berhtunc die naht unz an den tac. 105 Mit jâmer sprach der wise ‘dirst der lîp vil unbenomen. dir müezen disiu zeichen von gotes güete komen. ich wil daz wol gelouben, und werst du’s tiuvels barn, du wærest von den wolven erstorben und vervarn. 106 Ob ich nu hete den willen daz ich gerne tôte dich, des ist mir niht ze muote, ich fürhte ez riuwe mich. sît dir die argen wolve fride habent gegeben, wes solte ab ich dich zihen, ichn lieze ouch dich nu leben.’ 107 Dô in der morgen lûhte, dô mêrt sich sîn gewin, des armen ûf der heide: die wolve liefen hin. dô sprach der reine guote ‘ich wil fristen dînen lîp: ich wil durch dich wâgen mîniu kint und ouch mîn wîp.’ 108 Er sprach ‘ich weste et gerne, von wem du wære behuot. ich wil dich doch versuochen, als man die kristen tuot’. er macht von holze ein kriuze und stiez daz in den sant. er sprach ‘und bist ein tiuvel, sô brichet ez din hant.’ 109 Für ez in die erde er daz kriuze stiez. daz kint was sô gehiure, daz ez niht stecken liez. ez schowetz in manegen enden, vil lange ez ane sach und hete ez in der hende, daz ez niht zerbrach. 110 ‘Ich sihe wol daz der tiuvel an dir unschuldec ist. ich wæne du sîst kristen, dich hat beschaffen Crist. bist aber du ein heiden, doch wil ichz lâzen sîn. ich wil dich lenger fristen, vil liebez kindelîn. 111 Nu versuonen wir uns hiute, ich was dir gester gram.’ daz kint er von der erde ûf sînen arm nam: ‘dô du under disen wolven bist beliben gesunt,’ er sprach ‘du lebest noch lenger’ und kustez an den munt.

112 ‘Ich wil durch dînen willen mich vertriben lân, und wil ouch durch dich wâgen allez daz ich hân. ich wil durch dich nu wâgen mîn wîp und mîniu kint, die stete und ouch die bürge, die mir undertænic sint. 113 Ich weiz wol daz diz zeichen von guoten dingen vert, daz du under disen wolven den lîp hâst ernert. Ân dînes vater willen wirst du noch ein künic rîch: nu muost ouch immer mêre heizen der Wolf hêr Dietrich.’ 114 Er truoc in zuo dem rosse, ûf er dô mit im saz. vor sînes hêrren vorhte wurden im diu ougen naz. er sprach ‘mir möht noch lieber sîn dîn eines tôt, dan ich und mîn geslehte lîden immer mêre nôt.’ 115 Sus reit er in den sorgen und fuorte den hêrren sîn ze einem wildenære, der hete ein hiuselîn, sô sîne jegere dicke daz gejeit ze lange triben und in dem walde benahten, daz si danne dô beliben. 116 Dô reit er ze dem hûse und klopfete an die want. dô kam der wildenære an die strâze dâ zehant. do enphienc er vlîziclîchen den vil getriuwen degen: wan er mit freuden dicke was in dem hûse dâ gelegen. 117 Er sprach zem wildenære ‘guot man, wâ ist dîn wîp? nu wil ich versuochen iuwer zweier lîp. durch iuwer beider triuwe bin ich ze iu geriten: ich wil durch hôhe miete iuch betelicher dinge biten. 118 Den hof hab dir für eigen, dâ du inne bist gewesen, und swaz du von dem walde nutzes maht gelesen; daz dorf daz hie zuo hœret, daz sol dîn eigen sîn, daz du mir nu behaltest daz schœne kindelîn. 119 Ob dich die liute frâgen, wâ du habest daz kint genomen, ich meine ob ez sî funden, des lâ dich niht überkomen daz ich ez her fuorte; daz solt ouch niemen sagen. du solt des swern tiure, ez hab dîn wîp bî dir getragen. 120 Du solt im ouch mit teilen daz beste daz du hâst. frouwe, ich wil dirs lônen, daz duz niht verderben lâst.’ daz kindel sî dô nâmen, dan reit der fürste rîch: nu ist ûz der dritten sorgen der Wolf Dietrich.

121 Als ez mit grôzem jâmer wart der frouwen tac, dô greif si an daz bette, dâ daz kint ê vordes lac. dô lûhte ir mit jâmer der schœne morgen lieht: si suochte ir liebez kindel: dô vant siz leider niht. 122 Si warf an sich ein hemede, ûz dem bette se spranc: ir kindelîn si suochte under bette und under banc. mit jâmer sprach diu frouwe ‘owê deich ie wart geborn! war sol ich gotes arme? ich hân mîn kint verlorn.’ 123 Vor leide dô diu frouwe viel ûf den estrich. ir klage unde ir weinen was alsô jâmerlich: si sprach ‘war sol ich arme? daz ich sô unsælic bin! waz touc ich nu ze lebene? Tôt, nu nim mich al hin.’ 124 Si schrei mit lûter stimme, daz man ir wart gewar. die in der bûrge wâren, die liefen alle dar. die si dâ ane griffen, die kunden ir niht gehaben: si viel under si dar nidere, daz man si muoste laben. 125 ‘Getôrste ich dich schelten, vil ungetriuwer man, unreinez küneges künne, war hâst mîn kint getân? ez ist erstorben leider, und ist daz gewesen dîn rât. du valscher ungehiure, wie wol du weist werz hât!’ 126 ‘Du zihest mich unrehte’ sprach der künic rîch. ‘solt ich mîn kint ertœten, daz wære unmügelich. wilt du michs niht erlâzen, ich sage dir, warz ist komen: von dem duz hâst erworben, der hât ez ouch zuo im genomen.' 127 ‘Iezuo sprichst du rehte’ alsô sprach diu künigîn. ‘ich hânz von keinem manne erworben: ez was dîn. du hast michs ouch beroubet. daz erbarme got! swenn ez diu welt gefreischet, sô bist du der liute spot, 128 Und bist ouch zeinem künege immer mêre enwiht. sô man ander künege prîset, sô hât man dich verniht. und gibe dir des mîn triuwe, daz du mirz hâst benomen: dar umbe ich an dîn bette wil nimmer mêre komen.’

129 Dô wart dem künege leide, diu frouwe quelte ir lîp. er weste wol ir übel; vil zornic was daz wîp. in heimlichem râte er dô ze Sabenen sprach ‘nu müeze ez got erbarmen, daz ichs kindes ie gesach!’ 130 Mit zorne sprach dô Sabene ‘Berhtunc von Mêrân, der hât an dem kinde und an dir übel getân, daz er dirz hât ermordet und im genomen daz leben: und bist du rehte sinnic, du solt nimmer imz vergeben.’ 131 ‘Owê’ sprach der Krieche, ‘war umbe redest du daz? nu erbat ich in des kûme; wurd ich im nu gehaz, daz wære ein grôze untriuwe, und bræhtest duz dar zuo, ich hân es lützel êre, swaz ich im dar umbe getuo.' 132 ‘Jâ wil ich dich berihten’ sprach der ungetriuwe Saben. ‘er möht wol iuwer beider dâ mite geschônet haben. er soltz wol hân gefristet doch einen halben tac. ze solhen untriuwen niemen wol gesprechen mac. 133 Ich gibe dir des mîn triuwe, Berhtunc ist dir gram. swie sêre er sich des werte, er tet aber eime alsam. er ist als ungetriuwe, hêr Huge Dietrich, daz er geruowet nimmer, im enwerd dîn künicrîch.’ 134 Dô sprach der künec mit zorne ‘gip mir dînen rât. sît er die untriuwe an mînem kinde erzeiget hât und ir noch gert ze tuonne, wie ich mich gerechen müge, daz ich in alsô verderbe, daz er niht mêre entüge.' 135 ‘Daz wil ich dir râten: send einen boten dar, bit in durch dînen willen daz er ze hove var. enbiut im, du welst machen ritter, dêst mîn rât, so beginnt er mit im füeren die tiuristen die er hât.’ 136 Der bote ûf Lilienporte ze Berhtunge wart gesant. Berhtunc der gelobete die hovevart al zehant. er sprach ‘wir suln schouwen mînes hêrren hôchzît: wol dan mit mir, junchêrren, ob ir gerne ritter sît!’ 137 Von maneger hande varwe gap er rôt gel unde blâ. hundert swertdegene die wolte er machen dâ. ze hove er der getriuwe und ouch der milte hiez, dâ von daz er sich niemen dâ überschallen liez.

138 Do gedâhte im der wîse ‘ez mac sô niht gesîn. ob mich beginnet frâgen mîn hêrre umbz kindelîn, sô muoz ich heizen schrîben wâ von ez sî genesen, ob er iht deste holder sînem kinde welle wesen.’ 139 Do gewan er ein getriuwen, der im daz allez schreip, von welher hande sache dem kindez leben beleip, von êrste unz zuo dem læsten allez bediuticlîch, und daz er wart geheizen der Wolf hêr Dieterich. 140 Dô kam ze hove der fürste und wart enphangen wol, als noch ein biderbe dicke von einem künege sol. er kam so werdiclîche daz er schône wart vernomen: der künic sprach ze Saben ‘Berhtunc der ist komen. 141 Nu solt du mir aber râten, wâ von daz geschehe, daz wir in sô betriegen, daz man in gevangen sehe. Berhtunc hât von liuten ze hove grôzen schal.’ ‘deheiner slahte wâfen lâ du in tragen in den sal. 142 Berhtunc ist sô kreftic, und setzt er sich ze wer, ê dan man in gevâhe, er lestert al dîn her. und wil dir râten mêre: swenn er ze tische gât, daz er sich nider gesetzet und dîn truhsæze vor im stât, 143 Sô solt du disiu mære sagen der künigîn, daz si über Berhtunc schrîe, er ertôt dîn kindelîn. ir sult bêde wâfen schrîen dristunt. ir sult ez mit geschreie tuon den liuten allen kunt. 144 Sô sols an dîner hende den sal al umbe gân. vor Berhtunges tische hebt daz dritte rüefen an: “wâfen über Berhtunc hât ermort daz kindelîn!” sehzic halsperge heiz dringen nâch dir în.’ 145 In den palas wîten sazt man die tavel breit. wîziu tischlachen spæhe wurden dar ûf geleit. dô hiez man Berhtunge, den fürsten von Mêrân, und ouch die hêrren alle in den palas ezzen gân. 146 Dô stuonden kamerære, der maneger umbe sluoc und werten daz man’n helden ir swêrt niht nâch truoc. alse iegelîcher gesaz an sîne stat, der künec mit valschem muote Berhtungen sitzen bat.

147 Er sprach ‘Berhtunc, sitze, edel fürste, und bîte mîn: sô wil ich zuo dir setzen dîn frowen, die künigîn.’ Berhtunc ims wol dancte; der künec der gie zehant in eine kemenâten, dâ er die küniginne vant. 148 Er sprach ‘ir sult iuch rechen, vil edeliu künigîn. ich wil dich ûf den wîsen, der ermort dîn kindelîn.’ mit jâmer sprach diu frouwe ‘jâ, hêrre, wer ist daz? zwar dem sul wir beide mit willen tragen haz. 149 Maht du an die wârheit bringen, wer mir hât daz leit getân? ‘ich wil iu in nennen, ez ist Berhtunc von Mêrân. den sul wir hiute vâhen und benemen dar umbe den lîp.’ ‘du tuost im vil unrehte’ sprach daz tugenthafte wîp. 150 ‘Si habent dîner êren wênic danne gedâht, die dich mit lügemæren habent ûf den fürsten brâht. du volgest allez Sabenen, der wirt iu nimmer holt. Berhtungen den getriuwen du nihtes zîhen solt. 151 Weist du waz dir Berhtunc, der fürste von Mêrân, êren unde guotes und vil liebes hât getân? ob er niht mêre hête, wan daz er mich dir gap, du solts im immer danken unz an dîn selbes grap. 152 In mîne kemenâten het in sîn zuht gewent. Botelunge mînem bruoder wart ich von im entspent. do erwarp er mich im selben, sich, und gap mich dir dô: wilt du des niht gedenken, wie tuost du danne sô, 153 Swenn du des Berhtungen niht geniezen lâst, daz du lant und bürge und dîn êre von im hâst. swenn dir Berhtunc aleine mit triuwen abe gât, sô wizz daz al dîn êre gar ein ende hât.’ 154 Dô sprach der künec mit zorne ‘er giltet disen mort, swie wol du habest gesprochen hiut disen tac sîn wort. du muost doch über in schrîen: er nam dir dîn kindelîn.’ ‘nein ich ûf mîne triuwe’ alsô sprach diu künigîn. 155 ‘Jâ wil ich im niht râten an sîn êr noch an sîn leben. bist an dem kinde schuldic, daz wil ich dir vergeben, durch daz ez Berhtunge an sîn êre niht engê: ich wil an dînem bette dar umbe slâfen alse ê.’ 156 Dô sprach der künic rîche ‘des maht du mir niht versagen. ich hôrt dich sô jæmerliche dîn liebez kindel klagen:

wilt du niht über in schrien, ich nime dir dînen lîp.’ ‘ich riefe ê fünfstunt wâfen’ sprach daz schœne wîp. 157 Dô sprach der künec zer frouwen ‘nu bereitet iuch dar zuo.’ ‘nu sol daz got wol wizzen, daz ichz wil ungerne tuo.’ do zewarf si ir gebende und zefuorte ouch ir hâr: von klegelîcher swære wart si übele gevar. 158 Der künec schrei dô vil lûte und mit im diu künigîn, dô si zuo des sales porte mitalle drungen în, ‘wâfen über Berhtunc hât ermordet unser kint! daz klage wir gote von himele und allen den die hinnen sint.’ 159 Daz dritte rüefen lûte vor Berhtunge geschach. die halsperge dringen man nâch dem künege sach. dô saz ir iegelîcher und sach den andern an: der künec hiez Berhtunc vâhen und alle sîne man. 160 Dô man Berhtungen in sînen zühten vie, zehant sprach der guote ‘nu bin ich übele hie. ich wânde daz mir dienest und triuwe solte fromen: nu enmac mir hie dewederez ze deheinen staten komen. 161 Ich muoz durch triuwe lîden, swaz ze lîden mir geschiht. swie man die an mir brichet, so enbriche ich ir doch niht. nu wænent alle liute, ich hab mînen hêrrn erslagen: west ich von im iht guotes, des wolt ich iu doch niht sagen.’ 162 Berhtungen den getriuwen man in ein kerker stiez. der sînen liute deheinen man ungevangen liez. alrêrst het Berhtunc sorge durch den lieben hêrren sîn, und lebte noch ûf Garte diu arme künigîn.

163 Berhtunc dô gevangen mit sînen helden lac. diu reine küniginne ir aller schône phlac. âne des küneges willen hetens alles des genuoc, des man ûf ir tavele ezzen oder trinken truoc. 164 Sus lâgen si gevangen vier mânôt oder mê. Berhtungen tet der kumber durch sîne triuwe wê. der künic hiez gebieten durch elliu sîniu lant, daz si ze hove kæmen, den gerihte wære erkant, 165 Hin ze Kunstenopele für die burc ûf den plân; dâ wolte er heizen rihten über Berhtunc von Mêrân. er verbôt den hêrren allen daz si kæmen gar, noch dehein gewæfen bræhten mit in dar. 166 Den künic muostens fürhten, wan er in gewaltic was. in sîdîner wæte erbeiztens ûf daz gras. dô fuorte ouch niemen ringe wan der küene Baltram, Berhtunges swâger, dem was der künic gram. 167 Der was ouch dâ verholne, daz in dâ niemen sach. ze liebe und ze hilfe ez Berhtunge geschach. der künec erbarmicliche im do rihten bat. den ungetriuwen Saben sazt der künec an sîne stat. 168 Der saz ûf sînem stuole, die krône er im verlêch. sînes künicrîches er sich durch in verzêch. der vil ungetriuwe Saben winkt im mit der hende dar: er rûnte im in sîn ôre ‘nu nim vil rehte war: 169 Læst du im vorsprechen, sô mac er vil wol genesen. er hât im selbe schiere die besten ûz gelesen.’ der künic dô die sînen bat und ouch gebôt, daz nieman mit worten hulfe Berhtungen ûz der nôt. 170 Dô sâzens ame gerihte, die man welte dâ zer kûr. Saben gebôt dem künege daz er Berhtunc bræhte für

mit ruofen und mit geschreie, als er ê het getân, und daz er die küniginne ouch hieze mit im gân. 171 Der künec sich niht ensûmte: ûf sîn burc er dô getrat, die huotære ûf Kunstenobele er vlîziclîchen bat daz si ze liehte bræhten den gevangen man, und in gebunden bræhten für sîn gerihte dan. 172 Dô sprach zuo dem künege diu edel künigîn ‘nu lâz in noch geniezen der guoten triuwe sîn. er hât dir wol gedienet, des solt in geniezen lân: lâ mich Berhtunge sprechen, ich wil eine zuo im gân.’ 173 Dô sprach der künec mit zorne ‘frouwe, ich gan ius wol.’ dô gienc diu küniginne zuo im über daz hol. dô brâhte man Berhtungen ûz der vinster an daz lieht: diu frouwe gruozte in schône: dô antwurt er ir aber dâ niht. 174 ‘Wilt du mir niht danken?’ alsô sprach diu künigîn. ‘wes môhte mich gelusten, vil liebiu frouwe mîn? het ich die welt versenket, ich wære genuoc beschrît. nu sihe ich wol, frouwe, daz ir ungetriuwe sît.’ 175 ‘Jâ solt du mirz niht verwîzen, jâ tete ichz âne danc. dir ist leider niht gewizzen, daz michs dîn herre betwanc. swaz ich habe begangen, daz solt du mir vergeben und sage mir diu mære, ob daz kint habe sîn leben.’ 176 Dô kêrte er sich hin umbe und enbôt ir kleinen gruoz. ‘hâst du sîn êre, ich valle dir an dînen fuoz.’ dô wolte zuo der erde diu frouwe sîn gesigen: lachende sprach der alte ‘ich lâze iuch dâ niht ligen. 177 Seht waz ir mir dar umbe ze einer miete gebet: ich gibe iu des mîn triuwe, daz iuwer kint noch lebet.’ si halsete unde kusten mê danne tûsent stunt: si sprach ‘ûf dîne triuwe, und ist er aber noch gesunt?’ 178 ‘Ir klaget dan ander swære, ir sult daz kint niht klagen. frouwe, ich liez ez lebendic, ir sultz ab niemen sagen. in mîner vancnüsse ich deste senfter slief, daz ich in lebendic weste: nu nemet hin disen brief. 179 Den sult ir mir behalten, ich sül sterben oder genesen. swenn ich iuch iuwer triuwe ermane, sô heizt in lesen.’

der künec rief lûte ‘ist er noch niht ûz der steinwant?’ die hende man im vaste hinder sînen rucken bant. 180 Er sprach ‘sol man mich binden als ein übersagten diep? swie übele man mich handelt, daz ist mînem hêrren liep. nu engilte ich anders niht wan der triuwen mîn. swaz ich begie ie übeles, daz was in dem dienste sîn.’ 181 Man fuorte für gerihte den fürsten von Mêrân. dô muoste er für Saben mit gebunden handen stân. si schriwen als si vor tâten, umbe ir kindelîn, und swaz vor hete geweinet, daz lacht dar nâch diu künigîn. 182 Die frouwen hiez man sitzen. dô muoste der künic klagen über den getriuwen, er het im sîn kint erslagen. dô sprach der ungetriuwe, des küneges vormunt: ‘lougenst oder gihstu, Berhtunc? daz tuo uns nu kunt.’ 183 Mit witzen sprach der alte ‘owê, geselle Saben, ir sît ze künege worden, ir sult mîn gnâde haben. des mich mîn hêrre zîhet, dâ bin ich unschuldec an. ich getar gereden niht mêre, nu gebt mir einen man, 184 Der mit sînen worten sî hiut mîn frideschilt.’ dô sprach aber Sabene ‘sô nim swen du nu wilt.’ vil wê tet sînem herzen, daz die hende heten bant. dô suochte er undr in allen: deheinen man er vant, 185 Der sîn wort torste gesprechen; nieman er brâhte dar. si sprâchen heimlîchen ‘ez ist uns verboten gar.’ dô stuont er vor gerihte als ein vil ellender man: er sprach ‘swie wol ich selbe mîn wort gesprechen kan, 186 Sô wil ez niemen hœren. wâfen über die friunde mîn, daz si mich alters eine in disen nœten lâzen sîn!’ dô kam ouch zuo der sprâche hêr Baltram gerant: im volgten hundert ritter, die fuorten alle stahelgewant. 187 Mit hundert halsbergen erbeizte er ûf daz gras. der künec sach im vil leide, daz er alsô wol dâ was. sîn halsberc im vor zorne an sînem lîbe erklanc: durch die rote für gerihte er zuo Berhtungen dranc. 188 ‘Bist du verteilet iezuo, Berhtunc von Mêrân?’ ‘nein, ich stân hie gebunden als ein helfelôser man.’

er sprach ‘bist du gebunden, und hâst mir daz verholn, gelîche einem diebe, wâ ist daz du hâst verstoln?’ 189 Dô sprach der vil getriuwe ‘si sagent ûf mich mort. des entredete ich mich vil gerne, niemen sprechen wil mîn wort.’ ‘owê’ sprach der küene, ‘war zuo sol fürsten lant?’ Baltram sneit mit zorne Berhtungen abe diu bant. 190 Dô rief von Bulgerie der küene Baltram ‘jâ habent des edele fürsten immer laster unde scham, daz si verderben lâzen einen fürsten guot. und tuot man im daz hiute, daz man iu morgen tuot.’ 191 Daz im iemen helfen wolte, des wurdens alle frô. si gestuonden alle gelîche Baltramen dô. er sprach ‘swerz gerne tæte, man môht wol ûf mich sagen daz ich alle künege und keiser hete erslagen.’ 192 Dô sprach vil zorniclîche der küene Baltram ‘swaz küniges gerihtes ich aber ie vernam, sô dûht mich zwâr kein teidinc alse ungereht. hêr künec, des solte iu hengen weder ritter noch der kneht, 193 Daz ir Saben volget, einem ungetriuwen man, der bî Botelunge fürsten ambet nie gewan. jâ wart er zen Hiunen nie grâven genôz. daz ir in hie über uns ziehet, daz ist ein laster grôz. 194 Zwâre ir müezet hœren mînes swâgers wort: mit swerte muoz er rechen daz ir in zîhet mort. daz müezt ûf in erziugen oder gên im behaben. nu bestêt er iuwer einen, ir sît ez oder Saben. 195 Mit swerte und ouch mit schilte wil er sich des mordes wern: swer in des hiute zîhet, ûf des hals wil er daz bern daz er des nie gedâhte, oder er wirt schuldic gar.’ die rîchen zuo den armen sprâchen ‘er hât wâr.’ 196 Der künic sprach heimlichen ‘wiltu vehten mit im, Saben?’ ‘nein, hêrre, dez kint ist iuwer, ir sultz ûf in behaben.’ dô sprach der künec mit zorne ‘nu sint die ræte enwiht. daz kint hiez ich in tœten: ich viht mit im dar umbe niht.’ 197 Dô sprach aber Saben ‘sô sult irn der rede begeben. wir kunnen mit keinem rehte dem manne benemen daz leben.’

du sprichst, du welst in lâzen gar unschuldic sîn, ob er halt hete ermordet daz kleine kindelîn.’ 198 Dô sprach der künec mit witzen ‘Berhtunc, mir ist vil leit, daz ich dir hân geholfen in dise arbeit. ich enweiz, hâst du schulde: ich wil dich ledec lân sîn. swaz ich nu drumbe tæte, sô wær doch vlorn daz kindelîn.’ 199 Berhtunc rief vil lûte ‘nu sî des got gelobt, hêr künec, daz irs gedenket und niht immer tobt! unverdientez laster tuot den getriuwen wê. frou künegîn, nu heizt sehen waz an iuwerm brieve stê.’ 200 Dô suochts in in dem stûchen, dô si den brief vant, einem kappelâne gap si’n in die hant. als er den brief schouwete und vor ir ûf gebrach, der frouwen gap ern widere, dô er die schrift ersach. 201 Diu frouwe sprach mit zorne ‘ir sît ein müelich man. habt ir den brief geschouwet, sagt uns waz stêt dar an.’ ‘sô wunderlîche ræte dar ane mîn ouge siht: tuot swaz ir wellet, frouwe, ich lise iu dise brieve niht.’ 202 Swaz pfaffen si in dô zeiget, die tâten alle sam, und wurden in ir herzen dem künege drumbe gram. si torsten vor dem künege des brieves niht gelesen. si gedâhten ‘er ist zornic und læt uns niht genesen.’ 203 Einem kappelâne gap diu frouwe den brief dar. si sprach ‘nu nemet des brieves durch mînen willen wâr.’ si sprach ‘ir sult mir sitzen hie vil nâhen bî. hêr pfafe, nu saget mir rehte waz dar ane geschriben sî.’ 204 Und saget ir mir niht rehte waz an dem brieve stê, ich nim iu iuwer pfarre und tuo iu dar zuo vil wê. und sult in sagen sô lûte, daz man in wol verneme, hab iemen misserâten, daz er sich hiute scheme.’ 205 Dô sprach der pfaffe lûte ‘an disem brieve stât geschriben daz unser junchêrre noch lebendic ist beliben. ez genas ab nie sô kûme ein kleinez kindelîn.’ ‘daz sint vil guotiu mære’ sprach aber diu künigîn. 206 ‘Frouwe, ez ist von dem künege unserm hêrren komen, daz dem kleinen kinde der lîp solt sîn benomen.

der gebôt ez Berhtunge, daz er im neme den lîp, od er hieng vor Lilienporte sîn kint und ouch sîn wîp. 207 Mîn hêrre ûz sînem bette daz kindelîn verstal und gap ez Berhtunge, der truoc ez durch den sal. dô fuorte erz ûz der bürge. do ez ertôt solt haben sîn hant, do enmohte er vor der triuwe, die er in sîm herzen vant. 208 Er fuorte ez zeinem brunnen, der stuont rôsen vol, daz ez sich hete ertrenket; daz bewarte ez aber vil wol. het ez gesuocht die rôsen, ez wære gevallen drîn. dô huop sich von dem brunnen daz kleine kindelîn. 209 Ungâz und ungetrunken saz ez eine einen tac in regen und in winte, daz sîn leider niemen phlac. ân aller slahte hilfe saz ez als ein weiselîn.’ ‘des müeze ez got ergetzen’ sprach diu künigîn. 210 ‘Dô saz ez undern wolven, frouwe, ein lange naht. wolt got deheines tôdes dô an im hân gedâht, sô wære ez dâ erstorben: die wolve tâten im niht. swie kûme ez sich gefüege, ez hât noch an freuden pfliht. 211 Berhtunc stuont sô nâhen, daz er diu wunder sach, daz alsô menegiu zeichen an dem kinde geschach. dô huop er von der erde daz kleine kindelîn und kuste ouch vil dicke den lieben hêrren sîn. 212 Er sprach “swie mir gelinge, dir ist der lîp ernert. ich weiz wol daz diz zeichen von guoten dingen vert. du erstirbest nimmer, du gewinnst ein künicrîch.” dâ von wart er geheizen der Wolf hêr Dieterich.’ 213 Dô wart under der krône Saben alsô heiz, daz im durch die stirne vor vorhte dranc der sweiz. er wære michels gerner alswar gewesen: ‘frowe, bî iuwern hulden, der brief ist gar gelesen.’ 214 Dô sprach der künec mit witzen ze Berhtunge von Mêrân ‘ich vienc dich ze unrehte, ich bin selbe schuldic dran. ich bin selbe schuldic an mînem lieben sun. nu rich dich swie du wellest: mich hiez ez Saben tuon.’

215 ‘Solt ich in diser welte leben tûsent jâr, sô wolte ich mich an Saben niht lâzen umbe ein hâr. er kumt ouch nimmer mêre an die hulde mîn.’ nu ist Berhtunc erlœset ûz der grôzen sorge sîn.

216 Dô sprach der künec mit zorne ‘nu rich dich an dem man und lâz in des engelten, des er uns hât getân. er hete drîe tôde ûf dînen lîp bereit. ez wirt ouch im von rehte, daz er dir ûf hete geleit.’ 217 ‘Du solt dich an im rechen’ sprach diu künigîn. ‘jâ gruop er dir die gruoben, dâ muoz er selbe în, radebrechen oder hâhen oder brennen ûf der hurt: zuo der marter alle wolt er dich hân gefuort.’ 218 Berhtunc nam dô Saben und fuorte in von dan. niuwan durch sîne schœne beweinte in manic man. dô wîste er im den galgen, die hurt und ouch daz rat: er was als ungetriuwe, daz nieman umb in dô bat. 219 Dô sprach Berhtunc der guote ‘wie nu, geselle Saben? nu muost du in die gruobe, die du mir hâst gegraben. dar in hât dich gevellet dîn ungetriuwer site. du hâst des niht gedienet, daz iemen umb dich bite.’ 220 Dô sprach der ungetriuwe ‘ich enruoch waz mir geschiht, wilt du dich erbarmen über mîn leben niht. bist aber du getriuwe, so erbarmest lîhte dich: geselle unde hêrre, erbarm dich über mich.’ 221 ‘Wir sîn von kindes jugende gesellen her gewesen, und gunte es mir mîn hêrre, ich liez dich gerne genesen’ alsô sprach der vil getriuwe Berhtunc von Mêrân, ‘und wolte ouch verkiesen, daz du mir hâst getân.’

222 Dô sprach aber Saben ‘gesell, wilt du mich nern durch geselliclîche triuwe, lâz dir daz lant verswern, nimmer dar ze komene, die wîle und du lebest, daz du durch dîne triuwe mir disen mort vergebest. 223 Und tuoz durch dîne güete und erner mir mînen lîp. habe dir mîn fürsten ambet, lâ mich und ouch mîn wîp von allem mînem erbe mit einem stabe gân.’ ‘jâ hât mir’ sprach der guote ‘diu frouwe niht getân.’ 224 Dô nam er sîn gesellen und fuorte in bî der hant, dâ er den künic sitzent und ander fürsten vant. er sprach zuo dem künege ‘lâ mîn gesellen leben. ich hân mînen zorn lâzen, nu solt du im ouch vergeben.’ 225 Dô sprach der künec mit zorne ‘ich enruoch waz du’m getuost. ich sag dir daz du dich immer vor im hüeten muost. swaz du in nu langer fristest, daz ist ûf den schaden dîn.’ ‘er muoz entriuwen hangen’ sô sprach diu künigîn. 226 Dô sprach Berhtunc mit zühten ‘frowe, lât iuweru zorn. ich wilz nu wider bringen, daz ir hetet von im verlorn. des lât mich geniezen, edel küniginne rîch, und nert mir mîn gesellen, als liep iu sî Wolf Dieterich.’ 227 Dô sprach diu küniginne ‘wilt du daz ich in ner, sô solt du im gebieten daz er diu lant verswer und ouch den hof mir rûme; anders mac ez niht geschehen. ich wil in mit mîn ougen nimmer ane gesehen.’ 228 Dô sprach der künec in zorne ‘er sol verswern diu lant. * sîn lant habe dir ze lêhen und die dar inne sint.’ ‘nein ich’ sprach der getriuwe, ‘sîn wîp diu tregt ein kint. 229 Ich wil mich underwinden der frowen die wîl si lebet, und wil daz ir des kindes erbe eht niemen gebet. ich wil si beide ziehen. stirbt aber daz kindelîn, sô teile ich mit der muoter; daz ander sî ouch mîn.’ 230 Des dankete im der valsche: diu lant er dô verswuor. urloup nam er zen fürsten, zen Hiunen er dô fuor. dô danktens alle gelîche Berhtunge von Mêrân, daz er an sîme gesellen het alsô wol getân.

231 Berhtunc sich berihte und fuor heim in sîn lant. sînen junchêrren nam er dâ’r in vant. er kleite in liehter wâte den lieben hêrren sîn, neben im vil gelîche sîn sehzehen kindelîn. 232 Dô kam er mit freuden wider ûf den hof geriten, als dô die fürsten phlâgen, in fürstenlîchen siten. aller fürsten schallen was gegen im ein wint, dô er ze Cunstenobele brâht diu sibenzehen kint. 233 Vil rehte frœlîchen enphiengs diu künigîn. si sprach ‘nu sage an, guoter, wâ ist mîn kindelîn?’ dô sprach der getriuwe ‘nu seht wâ er dort gât, der lengist und der grœzist, der undr in allen stât! 234 Die andern sint dîn dienest unde ouch mîniu kint, diu wol in niun jâren über in elter sint. sô wol hât er gewendet sîniu kleinen jâr, daz er sich mit in allen roufen wol getar. 235 Ich wil iu sagen, frouwe, ein armman in zôch, den er vil harte roufte, daz er z’walde vor im flôch. swenn er in iht erzurnte, er sluoc im einen slac, swann er in mohte erlangen, daz er vor im lac. 236 Sich verbarc ouch vor im dicke des armmannes wîp. si klagten ouch mir beide, si behielten küme den lîp. dem tiuvel ûz der helle wurdens nie sô gram: si kusten mich vor liebe, dô ich in von in dâ nam.’ 237 Sîn vater wolte in triuten, er was im liep genuoc: daz kint in niht erkande, den vater ez von im sluoc und stiez im mit dem fuoze ein ungefüegen stôz: ‘jâ kumst du nimmer mêre’ sprach der vater ‘ûf mîne schôz.’ 238 Berhtunc gedâhte an sîn êrste hovevart. sîne helde er dô für brâhte, mit den er gevangen wart. er sprach ‘hêr künec, ergetzet dise geste ir schaden. si wurden mit mir gevangen, ich hete si ouch her geladen. 239 Si wolten harte gerne dô hie ritter worden sîn.’ ‘ich wils ir schaden ergetzen’ alsô sprach diu künigîn. swaz ritter haben solden, des wurden si bereit, satel unde schilde und drier hande kleit.

240 Diu kastelân ieglichem wurden gegeben starc, dar zuo knehte, kleider, ieglichem vierzic marc. diu hôchzît dâ werte wol fünfzehen tage. do vergaz diu küniginne ir jâmerlichen klage. 241 An dem fünfzehenden morgen sprach diu küniginne rîch ‘wem welle wir enphelhen, der dâ heizt Wolf Dieterich?’ dô sprach der künec mit witzen ‘ir sult Berhtunge bîten, daz er den knaben ziehe: er hât doch vil nôt durch in erliten, 242 Do er sîner triuwen êrste an im niht vergaz. des sul wir im bêde danken, wan sîn phliget ouch niemen baz.’ im gap diu küniginne den junchêrren an die hant. dô sprach der vil getriuwe ‘zwiu sol er mir âne lant? 243 Swaz ir mir bevelhet an im, dâst niht verlorn’. dô sprach der künic ‘zwâre, Berhtunc, ich hânz versworn. sîn teil geb ich im gerne, ich entar vor’n eiden mîn. daz ichz verswuor als sêre, daz macht diu muoter sîn. 244 Diu sprach, er solte ervehten ein künegîn unde ein lant. zwiu solte im dann daz mîne? alsô sprach ich sâ zehant’. diu frouwe sprach mit zorne ‘solt er mir anders leben, er nimt im lîhte selbe, well wir im niht geben.’ 245 Dô sprach der künec mit witzen ‘swaz er behaben kan, des solt du dich underwinden, Berhtunc von Mêrân. kumt er ze sînen jâren, ist daz er strîtes gert, sô hân ich im behalten ein harnasch unde ein swert, 246 Dâ er sich sîner vinde vil wol inne erwert, und ein ros, dâ in niemen ouch gâhes ûf ervert. und gebent im sîne bruoder niht swaz im rehte sol, und ist er danne biderbe, er gewinntz in abe vil wol. 247 Dar zuo solt du im helfen, ich enphilh dirn umbe daz, bit in daz er belibe mit sîn bruodern âne haz. bit si dazs im ouch gerne geben sîn dritten teil, od si werden im iht alle, und sol er haben heil. 248 Ich bevilh dir nâch mîm tôde allez daz ich hân, fürste vil getriuwe, daz si dir undertân, daz du ez rehte teilest under mîniu kindelîn, und bevilhe dir dîn frouwen ouch ûf die triuwe dîn’.

249 Dô sprach Berhtunc mit witzen ‘sô gibe ich im diu kint, diu mîn und mînes wîbes von gotes genâden sint: vil lieber junchêrre, diu sîn iu undertân, dar zuo dien ich iu selbe, und wahset ir ze man.’ 250 Berhtunc bat urloubes, des werte man in dô. dô fuor er mit sîn kinden ze lande und was vil frô, daz er behalten hête daz leben dem künege rîch. nu ist aber ûz einer sorgen der Wolf hêr Dietrich.

251 Berhtunc nam mit triuwen daz liebe kindelîn und bevalh ez ûf die sêle der lieben frouwen sîn. er sprach ‘der selben triuwen du imer geniezen muost, daz du unserm erbehêrren als dînem kinde tuost.’ 252 Dô was ouch Berhtunge harte wol dâ mite. er lachete vaste dicke sînes hêrren site, daz er in der bûrge niemen niht vertruoc, daz er sô manegen starken roufete unde sluoc. 253 Ouch wart er in der bûrge sô frevel und müelich, daz si alle wâfen schriuwen über den Wolf Dietrich. swenn in hêr Berhtunc wolte umb sîn ungefüege slân, sô muosten si in immer rehte binden unde vân. 254 Als si in ouch gebunden, sô sluoc er in ze fromen: des muoste er der unfuoge deste schierer abe komen. er sluoc in harte dicke, die slege im tâten wê. swaz er im ouch verlobte, daz brach er nimmer mê. 255 Sus nâhete ez dem tôde, als ez noch vil dicke tuot, daz si alle müezen sterben, si sîn übel oder guot, arme betelære und edele künege rîch: als lac ouch an sîm ende Huge Dieterich.

256 Dô bevalh er Berhtunge bürge unde lant, sîne süne alle drie und die frouwen bî der hant. dô sprach gezogenlîchen Berhtunc von Mêrân ‘swer mir niht envolget, umb den nime ich mich niht an.’ 257 Sus wart der künec vil schiere verklaget und ouch verswigen. des muoste vil der lande nâch im verwüestet ligen. dô der trôst des landes verschiet und ouch verstarp, der ungetriuwe Saben umb sîner frouwen hulde warp. 258 Dô wart dem lande jâmer und mort alrêrste gefrumt. owê daz man die frouwen sô lîhte überkumt! si frâgete Berhtunge, ob er hulde solte haben: ez wurbe umbe ir hulde der ungetriuwe Saben. 259 Dô sprach Berhtunc mit zorne ‘welt ir im nu vergeben, unde wolt in, frouwe, vor niht lâzen leben? und gewinnt er hulde, iuch und iuwer kint er verderbet mich und alle, die iu holt mit triuwen sint.’ 260 Dô sprach diu küniginne ‘sol ich dâ von getreten? die hôhsten in dem lande habent mich umb in gebeten, daz ich im gebe hulde, swaz dich nu dunke guot.’ ‘ez gerouwet iuch alrêrste, frouwe, ob ir ez tuot.’ 261 ‘Sît daz du mirz verbiutest, sô wil ouch ichz niht tuon.’ ‘und tuot irz, er verderbet iuch und iwern sun.’ daz si imz verlobte und im doch hulde gap, des muoste si verliesen den rehten leitestap. 262 Als der ungetriuwe ir hulde dô gewan, dô begunde er râten ûf Berhtunc von Mêrân, und begunde ouch râten ûf die edel künigîn, wie er die verstieze und ir vil liebez kindelîn. 263 Dô sprach der vil getriuwe ‘nu si im hulde hât gegeben, nu ræt er ûf mich sêre, daz ez mir gât an mîn leben. nu sol man nimmer mêre gelouben an ein wîp. wâfen über mich selben, wan nam ich im niht sînen lîp?’ 264 Swer die argen diebe und ungetriuwen spart, die verkêrent sich vil selten, daz solt ich wol hân bewart. zwiu wolte ich den ze neren, der mir ungetriuwe was? nu muoz ez gote erbarmen, daz er vor mir ie genas.’

265 Do verstiez man Berhtunge von dem râte sâ zehant. der frouwen und der kinde sich Saben underwant. er truoc an mit den hêrren beidiu tac und naht: dâ erz hin bringen wolde, dâ hete erz schiere brâht. 266 Zuo den junchêrren sprach er dô alle zît ‘ir sult vil rehte wizzen, hêrre, wer ir sît. von iuwer muoter valsche ist der dritte künec enwiht; dens iu dâ zelt ze bruoder, der ist iuwer bruoder niht. 267 Si traht ûf iuwer êre beidiu naht unt tac, und ist stæte an dem râte wie si iuch verderben mac. verstôzt si von der bürge, s’ ist ûf iuwern schaden hie, und nemet ir al daz erbe, daz ir iuwer vater lie. 268 Dâ von ir in den landen die liute hazzic sint. des si iu dâ giht ze bruoder, der ist ein kebeskint. dâ mite wart zerstoeret iuwers lieben vater ê. got gebe daz ir geschaffet, daz ez ir übele gê.’ 269 Die junchêrrn beide wânden, er hete des wâr. des wart daz wîp verderbet von sînen lügen gar. und ouch dem armen kinde verriet er sîn künicrîch: diu künegîn ward verstôzen und ir sun Wolf Dietrich. 270 Die junchêrrn bêde sprâchen zuo ir muoter dô ‘wir sîn eines dinges worden harte unfrô: sol der Wolf Dietrich niht unser bruoder sîn?’ ‘jâ er ûf mîne triuwe’ sprach aber diu künigîn. 271 ‘Er ist niht vaterhalp, muoter, mînes vater kint. daz sagent uns die liute, die des wol bewîset sint. wir enmügen ouch uns entriuwen vor dir niht bewarn.’ dô sprach der elter bruoder ‘du solt von dem hûse varn. 272 Waz solt dir küneges erbe? du bist niht künigîn. daz du bî grôzem gelte den lieben vater mîn und uns sô hâst verhuoret, daz sol dir niht gefromen: nu hebe dich zuo dem manne, den du dir dâ hâst genome 273 Mit jâmer sprach diu frouwe ‘nu sî ez gote geklagt, daz du mich des solt zihen; wer hât dir daz gesagt? owê mir, ach daz Sabene mîn hulde ie gewan, und daz ich niht envolgte Berhtunge von Mêrân.’

274 ‘Got erbarme’ sprach der junge ‘daz ir unser muoter bint alsô rehte unreine und daz wir ie wurden kint. habt ir im niht gevolget, daz wirt wol widertân: hebt iuch gên Lilienporten und volgt Berhtungen von Mêrân.’ 275 Mit jâmer sprach diu frouwe ‘sun, lâ mich bî dir hie unde ouch bî dem erbe, daz mir dîn vater lie. het ich man bî sînem lebene, des wolt ich mich harte schemen: wan ich wil nâch sînem tôde zwâre deheinen nemen.’ 276 Dô sprach der künec mit zorne ‘ich sage dir waz du tuo. du belîbest hie niht langer danne unz morgen fruo. dîn rîchiu morgengâbe ist mîns bruoder unde mîn: du wirst ûf diser bûrge nie mêre künigîn.’ 277 ‘Nu müeze ez gote erbarmen daz ich Saben ie gesach, daz ich von sînen schulden hân disen ungemach!’ swen si gebiten mohte, daz was gar verlorn: die junchêrren wolten nie gelâzen iren zorn. 278 Man liez ir vil kûme ir ros und ir gewant. swaz sô man in der kamere des rîchen schatzes vant, des wolte man der frouwen niht einer marke lân. si muoste als arme rîten ze Berhtunge von Mêrân. 279 Si reit vil barmiclîchen unz zuo der porten în. dô sagete man Berhtungen ‘dâ kumt diu künigîn.’ er sprach ‘sô lît enwâge swaz wir der erbe haben. ich wæn, si habe verstôzen der ungetriuwe Saben.’ 280 Iedoch er gegen der frouwen mit sînen helden gienc und ouch mit sînem wîbe die künegîn er enphienc. dô sprach er zuo dem kinde ‘nu wol dan, hêrre mîn! mit mir du solt enphâhen die lieben muoter dîn.’ 281 Dô sprach der junchêrre ‘nu ist doch mîn muoter hie. si kam in einem jâre für Lilienporte nie.’ er wânde ez wær sîn muoter daz Berhtunges wîp: von dem selben wâne besvâret wart sîn lîp. 282 Dô sprach der vil getriuwe ‘zwâr s’ist dîn muoter niht, und dient dir doch vil gerne, swâ dir sîn nôt beschiht.

als tuon ouch ich zewâre, swâ dir sîn wirdet nôt: der aber dîn vater solt heizen von rehte, der ist tôt.’ 283 Sô wart der rede ir beider vor jâmer gar geswigen. diu freude in ir herzen diu muoste gar geligen. iedoch was im vil leide, swie er wære ein kindelîn. dô lief er für die porte und enphienc die muoter sîn. 284 Berhtunc mit schœnen zühten zuo der frouwen sprach ‘waz welt ir, küniginne, in mîn armez obedach?’ si sprach ‘wir müezen suochen die friunde als wir si haben: mîn kint hânt mich verstôzen und hât in daz gerâten Saben.’ 285 ‘Des lône im got von himele, daz er iuch verstôzen hât. er tuot an iu vil rehte, sît iu versmâht mîn rât. swer getriuwen friunden volget, des volgen wirt vil guot: wer sol sich an den lâzen, der nie gewan getriuwen muot?’ 286 ‘Mir ist geschehen übele’ sprach dô diu künigîn. ‘gedenke an dîne triuwe und lâ mich bî dir sîn, und lâz mich bî dir lîden, fürst, swaz dir geschiht.’ ‘entriuwen’ sprach der alte, ‘ir belibet bî mir niht.’ 287 Iuwer süne bêde die habent mêr dan ich. Saben hât daz rîche, des bestât nu lützel mich. ir woltet mir niht volgen, nu habt ouch iu den schaden. der mich ie hete ze vinde, den habt ir ze hûs geladen.’ 288 Dô sprach erbarmiclîchen diu küniginne hêr ‘nu tuo mir swaz du wellest, ich hân et niemen mêr.’ mit zühten sprach der alte ‘ir sult gote wilkomen sîn. nu sît in mînem lande frouwe und künigîn.’ 289 Mit zühten sprach der junge ‘frowe, ir sult sîn wilkomen ze mînes vater hûse. swaz ich iu mac gefromen, und daz ich iu mac gedienen, daz tuon ich alle zît. ich diene iu deste gerner daz ir mîn muoter sît.’ 290 Diu frowe gesweic vor jâmer, daz si nie wort gesprach. dô trôste si der alte und fuorts an ir gemach. mit guoter handelunge man dô der frouwen phlac. der junge erbeite kûme, unz ez wart des morgens tac. 291 Do betwanc in ouch der alte daz im vorhte was bekant, daz er im alle morgen muost reichen sîn gewant.

er tete ez durch sîn liebe, swa er sich an im vergaz, daz in in frömden landen dienstes luste dester baz. 292 Des morgens vor dem bette er eines mâles stuont und warte im mit dienste, als die kamerære tuont, unz er alles dinges ze der kirchen was bereit: swaz er haben solde, daz hete er ane geleit. 293 Ûz der kemenâte wolte er vor im gân. mit zühten sprach der junge ‘hêrr, ir sult stille stân: ir müezet mînes dienstes ie mêre wesen frî, ir saget mir wer ich selbe und mîn geslehte sî.’ 294 Lachende sprach der alte ‘nu bist duz doch mîn kint. du bist mir zwâre lieber dann dine bruoder sint.’ ‘swiget’ sprach der junge, ‘der schimpf ist gar enwiht. sît ir mîn vater hiute und wârt sîn gester niht? 295 Ich wil iuch fragen, hêrre, ir sult mich berihten gar, in welhem lande ich rehte nâch mînem vater var, oder wâ i’n tôten vinde; der reise ist mir vil gâch. bin ich von edelem künne, ich wil ouch tuon dar nâch.’ 296 Dô werte des der alte, wan er’s tôdes wære gewert. er truoc under üehsen des edeln fürsten swert. er sprach ‘nu frâg die frouwen diu gester în dâ reit: diu erkennt wol dîn geslehte und saget dir die wârheit.’ 297 Von im begunde er strichen, nihtes niht er in dô bat. sich freute dô der alte daz der junge von im trat: ûz der kemenâten er von sînem meister gie. iedoch sprach er mit vorhten ‘daz swert daz lâz et hie.’ 298 ‘Entriuwen’ sprach der junge, ‘daz wil ich iu widersagen: warnt iuch eins andern swertes, ditz wil ich selbe tragen.’ er truoc vil zorniclîche daz swert in sîner hant: hin gie er in daz münster, dâ er sîn muoter vant. 299 Er sprach ‘nu saget mir, frouwe, und heizt ir ein künigîn, wizzt ir ob ir erkennet den lieben vater mîn? sît aber ir mîn muoter und bin ich iuwer kint, ir sult mich dar wîsen dâ mîne friunde sint.’ 300 ‘Ir vart sô zorniclîchen’ sprach diu frouwe guot, ‘und bin doch des geloubic daz ir mir niht entuot:

ich kan dir niht bewîsen nu mêre der friunde dîn, wan ich bin dîn muoter und du mîn kindelîn.’ 301 ‘Mac aber ein kint von muoter âne vater komen?’ ‘entriuwen’ sprach diu frouwe, ‘des hân ich niht verno von vater und von muoter wirt wol ein kint geborn: den vater den aber du hête, den hâst du leider vlorn.’ 302 ‘Sô saget mir wâ der sturbe oder wâ der sî gewesen, und saget ir mir unrehte, ich lâze iuch niht genesen.’ si sprach ‘vil lieber hêrre, ir sult mir niht entuon: von allen vier enden sît ir eins küneges sun. 303 Dîn vater und dîn muoter was künec und künigîn. du solt ouch von rehte gewalteger künic sîn. dîn vater was ze Kriechen ein gewalteger künic rîch: der saz ûf Cunstenobele und hiez Huge Dietrich.’ 304 Si sprach ‘ir sît gelêret, nu nemet den brief enhant.’ sîn leben und sîn sterben er dran geschriben vant; wie Berhtunc in ernerte, an dem brieve er daz las, wâ von er was verrâten und wâ von er genas. 305 Dô neigte er sîner muoter daz houbet in die schôz. dô wart ir beider weinen und ouch ir jâmer grôz: er halstes unde kustes, ir kleider wurden naz. durch sînes meisters liebe des swertes er vergaz. 306 Der muoter er die tavele in den buosem wider stiez. dô suochte er Berhtungen, daz swert er ligen liez. dô bôt er sînem meister vil senelîchen gruoz: er kuste im an die hende und neic im ûf den fuoz. 307 ‘Got müeze dir vergelten, fürste von Mêrân, meister unde hêrre, daz du mir hâst getân. ich hân von dîn genâden mîn êre und ouch mîn leben. ich wil mich, lieber meister, in dîne genâde geben. 308 Ich hân vil rehte erfrâget, von wanne ich bin bekomen. mir wart unbillîchen mîn erbeteil genomen. weiz got, mir giltet Sabene den ungetriuwen rât, daz er mich und mîne muoter alsô verstôzen hât! 309 Sô bin ouch ich gewahsen vil nâch zem starken man. man muoz ouch mir von rehte mîn erbeteil verlân. zwâr ich geruowe ouch nimmer, ich gewinne ein künicr alrêrst wil in die sorge Wolf hêr Dietrich.

VIII. 310 Mit jâmer sprach der alte ‘du hâst manheit unde tugent: in dînem grôzen lîbe hâst du ze kleine jugent. ez schadet dînen sælden in dîner kintheit, daz du strebest alze früeje nâch seneder arbeit.’ 311 Mit zühten sprach der junge ‘swer gerne hât gemach, der versuochet selden frömdez obedach. swer aber in dem alter wil mit gemache leben, der muoz in sîner jugende nâch dem hûsrâte streben. 312 Du solt mich des niht irren al die wîle ich tüge, ich versuoche in mîner jugende waz ich erwerben müge. ez müezen mîne bruoder mîne vinde sîn, si enlâzen mir mîn erbe und ouch der muoter mîn.’ 313 Mit jâmer sprach der alte ‘swaz ich sage, daz ist wâr. ich was vor urlouge geruowet vierzic jâr. ich muoz in mînem alter mit dir haben ungemach. nu muoz ez gote erbarmen daz ich Saben ie gesach ! 314 Ûf den wil ich dir helfen und ûf die bruoder dîn, si tuon dir danne rehte und der frouwen mîn. sol aber ez dir iht helfen, (du wilt nâch strîte toben dâ vor der êzîte,) du solt mir daz verloben 315 Daz du iht vehtest, swâ wir komen in den strît. ich sæhe ab ez vil gerne, nu ist sîn noch niht zît. des habe wir site ze Kriechen, er muoz volwahsen gar, daz im iemen swert erloube, ern hab vier und zweinzic jâr.’ 316 ‘Nu swîc’ sprach der junge, ‘und sih ich dich in der nôt, ê ich dich sterben lieze, ich læge ê bî dir tôt. ich wil entriuwen vehten umb mîn selbes künicrîch: ich erloube mir ez selbe’ sprach Wolf Dietrich. 317 ‘Triuwen’ sprach der alte, ‘ich tar ez dir niht wern. wir kumen doch wol widere, wil uns got von himele nern.

uns dien daz lant ze Kriechen oder wir verliesenz leben. alrêrst muost du nu hœren waz ich dir wil ze stiure gebe 318 Sebzehen junchêrren, die liebsten die ich hân: mîne süne sint si alle und sint dir undertân: si müezen aber alle mit dir füeren sturmgewant, iegelicher tûsent ritter und ein vanen an der hant. 319 Ouch wil ich, lieber hêrre, dir mêren dîne schar in snêwîzen ringen ouch mit tûsent dar. ich gibe dir die helde unde ein banier lieht: die sint sô ûz gesuochet, daz si dir entwichent niht. 320 In der zwelften wochen sint si dir bereit. sô rechen wir mit zorne beide unser leit, ez enkume von ungelücke, man geb uns ein künicrîch.’ ‘got lône dir der gâbe’ sprach Wolf Dieterich. 321 Dô muosten sich bereiten die recken in die nôt. si kâmen ûf Lilienporten des tages, als er gebôt, die edelen und die küenen, die Berhtunc dâ gerne sach: ir deheinem eines ringes noch eins riemen nie gebrach. 322 Mit freuden sprach der junge ‘si sint vil frœlîch komen, und wird ich ze hêrren immer, ez sol in allen fromen: swes ir einer muotet, des wil ich im niht versagen. nu welhez ist diu brünne, die ich sol selbe tragen?’ 323 Er sprach ‘ich gæb dir gerne dînes vater swert. dâ wærest du ze strîte vil wol mite gewert. des solt du mich erlâzen, des mac niht gesîn: got vellet dich vil lîhte, füerstuz ûf die bruoder dîn.’ 324 ‘Triuwen’ sprach der Krieche, ‘ich bin ouch mîns vater sun. doch wil ich in mit dem swerte deheinen schaden tuon.’ dô hiez er im gewinnen ein ander klingen lieht und einen halsberc guoten, der was aber sô veste niht. 325 Do urloubte er in den ringen sich von der muoter sîn. dô sprach diu küniginne ‘nu schône der bruoder dîn. lâz si des niht entgelten, ob si ungetriuwe sint: ir sît doch alle drie wan zweier liute kint. 326 Swaz ich dir hân behalten, daz ist dir noch niht guot, sît daz du ûf dîne bruoder hâst urlouges muot.’

‘möhten wir si twingen, daz tet mînem herzen wol. wol mich’ sprach Wolf Dietrich, ‘daz ich mit in vehten sol! 327 Iedoch leist ich vil gerne, muoter, dîn gebot.’ dô kuste si den lieben und bevalh in dicke got. vil lûte rief der alte ‘junchêrre, rûmt daz loch. waz tuot ir tâlanc drinne? sûgt ir iuwer muoter noch? 328 Ich hân iuwern bruodern offenlîche widerseit. si bringent vil der vinde ûf daz gemerke breit. wir vehten nâch dem rehte, daz sol uns got beschern: mit drîzic tüsent helden wil man uns daz gemerke wern.’ 329 ‘Nu lât die vanen fliegen mit freuden über velt. mir wirt an den tôten mîner lande widergelt. gan mir got gelückes, mir wirt ein künicrîch. nu sul wir mit freuden vehten!’ sprach Wolf hêr Dieterich. 330 Diu schœnen castelâne si den recken zugen. die vanen über die heide gewalticlîche flugen. dâ muoste man gedranges sîn ûf den staten: baz dan über ein raste kôs man der schefte schaten. 331 Mitten in Kriechen si gewalticlîche riten, daz si des niemen irte, vil gar ungestriten. ‘entriuwen, mir git niemen’ sprach der Krieche ‘ein künicrîch. ich wil mînen teil verbrennen’ sprach Wolf Dietrich. 332 Dô fuorens unverborgen durch der Kriechen lant: den âbent und den morgen huop sich roup und brant, unz an dem vierden tage gên dem morgen fruo, dô zugen ouch die künege mit grôzer menege zuo. 333 Vil gewalticlîche kreftic was ir her. si fuorten in der dicke drîzic tüsent oder mêr. gên dem morgensterne, als der tac ûf brach, ietwedere ir beider huote man ûf einander stên sach. 334 ‘Seht ir’ sprach zuo dem künige der ungetriuwe Saben, ‘waz wir an Berhtungen her geheien haben? mit solher schar grôzer dient er iuwerm vater nie mêr; und sol er leben lange, er tuot uns grôz herzensêr.’ 335 Dô sprach mit frömdem muote Berhtunc von Mêrân ‘nu suln ouch wir die Kriechen ûf die rede bestân.

des sol sich hiute getrôsten der ritter und der kneht, daz uns got immer danket, wir strîten umb daz reht.’ 336 Die schar bêdenthalben zesamene kêrten dô. die sich dô strîtes trôsten, die wurden alle frô. zesamene si dô drungen, die schefte brâchens gar: ir wîse si dô sungen in beidenthalp der schar. 337 Dô huop sich beidenthalben angest unde nôt. dâ muosten liehte ringe von bluote werden rôt, dâ gegen einander drungen die schar gemeiniclîch: dô streit vor Berhtungen der Wolf hêr Dietrich. 338 Die sprizen gên den wolken in von den handen flugen. dô si die schefte brâchen, diu scharfen swert si zugen, und erbeizten von den rossen nider ûf daz gras. si muosten alle wîchen swâ Wolf Dietrich was. 339 Er hiuw dâ bêdenthalben lucken unde phat. si nâmen alle ir ende, swenn der junge hin getrat. die schar durchbrach der Krieche und Berhtunc dâ drîstunt: swen er niht sluoc ze tôde, der wart doch sêre wunt. 340 Unz ûf den swertvezzel sluoc er manegen durch den helm. dô wart mit mannes bluote begozzen gar der melm. ‘nu fliehe wir’ sprach Saben zuo dem künege rîch, ‘ditz ist der übel tiuvel, ez wart nie Wolf Dietrich.’ 341 Dô wurden liehte ringe von bluote rôt gevar. des muoste ouch im entwichen diu krefticlîche schar. doch rach er mit grimme alrêrste sînen zorn: dô wuot er durch die tôten in bluote unz über die sporn. 342 Dô wart von lebenden liuten diu heide schiere blôz. daz bluot durch liehte ringe vast ûf die erde gôz. über den jungen Kriechen dô vil maneger schrei: des tages sluoc Wolf Dietrich vil manigem sîn houpt enzwei. 343 Berhtunc und sîn hêrre die gâhten über velt, si wolten Saben suochen: dô was lære sîn gezelt. dô si in niht enfunden, grôz was ir ungehabe: si sluogen nider die hütten und den rossen die halsen abe. 344 Swaz si der flieher funden, ir deheiner der genas. si betungten mit den tôten daz velt und ouch daz gras. die vînde jagete niemen wan Berhtunc von Mêrân und sîner süne zehene: daz wârn sîn einlif dienstman.

345 Als si beidenthalben vaste mit einander striten, dô was ouch mit den künegen Saben ûf daz velt geriten. si warten wie ez ergienge dem krefticlîchen her: dar ane si sâhen beide, dazz flôch ân alle wer. 346 Sus habeten ûf der heide die zwêne künege rîch. ‘nu wer sint jene drie’ sprach Wolf hêr Dietrich, ‘die ich dort ûf der warte sihe bî einander haben?’ ‘jâ sint ez dîne bruoder und der ungetriuwe Saben.’ 347 ‘Si mugen uns niht entrinnen’ sprach er, ‘nu wol dan!’ ‘du maht ir niht erriten’ sprach Berhtunc von Mêrân. ‘daz aber ich Sabene hete’ sprach Wolf hêr Dietrich, ‘dar umb wolt ich verliesen ze Kriechenz künicrîch.’ 348 Swie vil man im ez werte, doch reit er über velt. dô riten ouch die drie baz vor im danne enzelt. Wolf Dietrich rief vil lûte ‘ungetriuwer Saben, ich wil dir fride gebieten, du maht wol stille haben.’ 349 Dô sprach der ungetriuwe ‘des mac nu niht gesîn. jâ fürhte ich Berhtungen und die untriuwe dîn.’ mit zorne sprach der Krieche ‘wer gap dir aber heil, daz du mir solt verirren mîn rehtez erbeteil?’ 350 Oder wer hât dir erloubet über mîne muoter zuht? daz muost du mir büezen, und hilft dich niht dîn fluht.’ dô sprach aber Saben ‘man hât dich wol gewert. dir hât der künec geschaffen sîn harnasch und sîn swert. 351 Dâ hâst du, mordere, immer ane genuoc. dar zuo ist dir bevolhen sîn ros daz in dâ truoc. diu gâbe ist dir nützer dan elliu künicrîch.’ ‘mir sol noch mêre werden’ sprach Wolf Dietrich. 352 Dô sprach aber Sabene ‘reit dan ûf unser leben. dir und Berhtunge well wir fride geben und welln dir mite teilen, daz man dir des besten giht.’ Berhtunc sprach ‘valscher hovewart, er gert dîns frides niht.’ 353 Sus wart ein michel schelten mit zorne under in. dô kêrten dise widere und jene riten hin. vil lûte rief dô Saben ‘ich sage dir waz du tuo: helt, ob du ie biderbe wurdest, nu bit uns hie unz morgen fruo.’

354 ‘Entriuwen’ sprach der Krieche, ‘daz wil ich wol bewarn.’ sîn ros was erstrecket, er kunde ir niht ervarn. do er sîn niht mohte erriten noch der künege rîch, dô weinte alrêrst vor zorne der Wolf hêr Dietrich. 355 Dô riten die hergesellen wider ûf daz wal. swaz si der vînde funden, die sluogen si ze tal. mit zorne sprach der junge ‘und wilt du meister mîn, wir suln der vînde bîten und hie unz morgen sîn.’ 356 ‘Daz wil ich widerrâten’ sprach Berhtunc von Mêrân. ‘si bringent fruo here baz danne tûsent man, die halsberge füerent und tuont uns grôzen schaden. ich wæne wir sîn bêde ûf grôzen jâmer her geladen.’ 357 ‘Verzaget niht als schiere’ sprach der Wolf hêr Dietrich. ‘ich muoz den lîp verliesen, ichn gewinne ein künicrîch.’ mit zorne sprach der alte ‘sol ich dir die wârheit sagen?’ die wir ze strîte brâhten, die sint alle erslagen. 358 Ich fuorte dir ze strîte sehzehen mîniu kint: diu sint bî dir erstorben daz ir wan zehene sint. wilt du nu selbe zwelfte ein ganzez her bestân? nu viht mit swem du wellest, du hâst wan einlif man.’ 359 Nu enwelle got von himele’ sprach Wolf Dietrich, ‘daz die sô hôhe kouften mîn armez künicrîch! mir sol niht an den mînen sô grôzer schade geschehen. ich geloube niht ir tôdes, du lâzest michs ê sehen.’ 360 Dô fuorte sâ der wîse sînen hêrren bî der hant, dâ er gesach die tôten: die het er schiere erkant. dô er ir antlitze als sêre verschrôten sach, er viel ûf iegelichen: vor leide er niht ensprach. 361 Dô brach ern abe die helme, si wârn ze tôde wunt. do enliez er ir deheinen, er kuste in an den munt. sîn herze was betrüebet, sîn ougen wurden naz: Berhtunc durch sînen hêrren der kinde gar vergaz. 362 Dô zôch er den jungen von sînen kinden hin. dô sprach er zuo dem hêrren ‘wâ ist nu iuwer sin? welt ir die hêrrn beweinen, die mir dâ sint erslagen? mîniu kint si wâren, lât mich diu selbe klagen.’

363 Mit jâmer sprach der Krieche ‘jâ riuwet mich mîn leben. die wîle daz ich lebte hetest du mîrs gegeben: ich wolte ez nemen für Kriechen und für elliu künicrîch, daz mîne gesellen lebten’ sprach Wolf Dietrich. 364 ‘Sît aber du die hêrren von mir hâst verlorn, Berhtunc, lieber meister, rich an mir dînen zorn: du hâst von mînen schulden vlorn dîniu kindelîn. dir sî vor gote erloubet, slah mir abe daz houbet mîn. 365 Durch got solt du mich tœten, sît ich des hân begert.’ dô wolte er durch sich selben gestochen hân sîn swert. vil schiere gesach der alte daz im sîn ernest was: dô zucte er im die klingen und warf si ûf daz gras. 366 Er sprach ze sînem hêrren ‘des jâmers ist genuoc. lât si die frowen beweinen diu si in ir lîbe truoc.’ der junge sprach ‘mîn swære was ie unklegelich. alrêrst bin ich in sorgen’ sprach Wolf hêr Dieterich. IX. 367 Mit zorne sprach der alte ‘nu lâz die klage sîn: mîn und mînes wîbes wârn diu kindelîn. nu hilf mir selbe râten und lâzen wir den zorn: swaz wir dar umbe tæten, doch wæren si verlorn. 368 Ja ist unser beider helfe an in niht verdorben gar. uns wahsent ander liute und koment ouch andriu jâr. ez kan uns niht gehelfen, swaz wir weinen diu kint. si werdent ouch niht lebendic, die erstorben sint.’ 369 ‘Ich sage dir’ sprach der alte, ‘wilt du nu volgen mir (nu volge mir mit willen, daz beste râte ich dir): ich wil mit dir verderben, dir enwerd dîn künicrîch.’ ‘ich tuon swaz du gebiutest’ sprach Wolf Dietrich.

370 ‘Ich sage dir’ sprach der alte, ‘und beweinest du diu kint, diu in dînem dienste alhie erstorben sint, wilt du si langer weinen, ich diene dir nie mêr.’ ‘sô muoz ich mit dir lachen’ sprach der künic hêr. 371 ‘Ditz wal wir müezen rûmen’ sprach Berhtunc von Mêrân. ‘du hâst ûf diser erde niuwan einlif dienstman. dâ mite sul wir entwichen, ez ist nu fliehens zît: uns kument wol tûsent ritter, den hab wir deheinen strît.’ 372 Mit jâmer sprach der junge ‘solt ich nu dîniu kint ungerochen lâzen, diu bî mir erstorben sint, wem lieze ich mîne gesellen und mîne dienstman?’ ‘wir suln niht stætes zürnen’ sprach Berhtunc von Mêrân. 373 ‘Ich sage dir’ sprach der alte, ‘sî wir hie unz ûf den tac, sô kumet sô vil der vînde, daz in niemen entrinnen mac. nu flieh wir z’unser vesten, daz ist wîslich.’ ‘ich fliuhe vil ungerne’ sprach Wolf Dietrich. 374 ‘Du solt von rehte fliehen, wir haben deheine wer. du hâst ouch wol gehœret: zwên sint eines her. sô koment vil lîhte tûsent und vehtent alle ûf dich. war umbe wilt du tœten dich selben unde mich? 375 Wir suln ze walde fliehen’ sprach Berhtunc von Mêrân. ‘du maht mit eilf gesellen niht tûsent man bestân, unde habe wir danne ouch deheinen ganzen schilt.’ mit jâmer sprach der Krieche ‘ich volg dir swes du wilt.’ 376 ‘Sô sul wir’ sprach der alte ‘ûf die burc ze Lilienport. wir haben an den Kriechen begangen grôziu mort.’ ‘ja enruochte ich’ sprach Wolf Dietrich ‘und werden si mir holt, wær Kunstenopel mîn eigen und aller Kriechen golt.’ 377 ‘Ich sage dir’ sprach der alte, ‘ich hân alles des genuoc, des man hundert rittern ûf tavele ie getruoc. des gibe ich dir dâ heime vil genuoc wol fünf jâr: welt aber ir iht mêre, daz bringet selbe dar. 378 Die wîle uns wert diu spîse, diu lîpnar und der wîn, sô sul wir vor den vînden alles stürmens sicher sîn. ist daz man uns besetzet, wir gemüen daz künicrîch.’ ‘ûf der burc wil ich ersterben’ sprach Wolf Dietrich.

379 Si bewâgen sich der genge die naht unz an den tac. dô gienc in vor der alte, der sîner kinde phlac. si erstrichen daz gebirge, daz was et hôch genuoc: Berhtungen muoten sêre die ringe die er truoc. 380 ‘Du maht mir niht gevolgen’ alsô sprach hêr Dietrich. — ‘ich enruoch waz mir geschiehe, hetest du ein künicrîch.’ — ‘swîc’ sprach der junge ‘und nim vil rehte war: ich sihe ein fiuwer blicken, dâ ligt wan der vînde schar. 381 Ê ich ûf Lilienporte hin în kume geriten, wærn ez niht guote friunde, mit in wurde gestriten.’ ‘entriuwen’ sprach ein ander, ‘ich sihe ouch dort ein lieht. sint ez die rehten vînde, so geniset ir einer niht.’ 382 ‘Zwâre ich sol ersterben, ich besehe dan wer si sint.’ er spranc in sîner brünne spilnde alse ein kint ze tal die hôhen lîten huop er sich vor in dan, daz im gevolgten küene sîn einlif dienstman. 383 Dô dûhten in ie cleine die ronen und ouch die graben: ê si im ze helfe kâmen, er hete den strît erhaben. Berhtunges süne gemeine nâch im die lîten sprânc: do ervorhten in die vînde, dâ sô manic brünne erklanc. 384 Ê si sich ûf gerihten ze strîte al gelîch, dô hete ouch si erschrecket Wolf hêr Dietrich. si liezen bî den fiuwern ir halsberge unde ir ros: si vorhten niuwan des lîbes und entrunnen ûf ein mos. 385 Fünfzic kastelâne si funden dâ stân, der nâmen niuwan einlif die einlif dienstman. den zwelften nam ouch selbe der Wolf Dietrich. si liezen dâ den vînden manegen halsberc wünniclîch. 386 Mit jâmer sprach der alte ‘wir suln gên der veste varn. wir vinden morgen geste, des müge wir niht bewarn. aller mîner lande ich nie mêre geniezen mac: man besitzt uns ûf der bürge, ê ez morgen werde tac.’ 387 In was gelâget hiute; doch kômens ûf Lilienport. vil schiere der wahtære vernam des meisters wort. ouch hôrte in ûf der zinne wol diu frouwe sîn: si zelte durch die porten niuwan zehen kindelîn.

388 Den eilften si dô frâgte ‘Berhtunc, wâ’st unser her? mit jâmer sprach der alte ‘wir haben iezuo niht mêr. swaz uns ist erstorben, daz ist unklagelîch. gehabe dich vil wol, frouwe: ez lebt noch Wolf Dietrich.’ 389 Si sprach vil klagelîche ‘wâ sint nu mîniu kint?’ mit zorne sprach der alte ‘ich weiz wol wâ si sint. si habent wol vergolten ir tôdes herzensêr. ich wirf dich über die mûre, gedenkst ir immer mêr. 390 Swaz wir zwei klagen solten, daz wirt er eine klagen. nu trœste mînen hêrren, dem müeze wirz vertragen, daz er der kinde tôde vergezze durch uns zwei. mich müet der jâmer immer, daz er sô lîte ob in schrei.’ 391 Sus volgete im diu frouwe, der kinde si vergaz. verborgenlîchen tougen wurden ir ougen naz. dô wart in der bürge diu klage unmâzlîch: niemen klagte als sêre, als der Wolf Dietrich. 392 Sus werte ir aller jâmer unz an den fünften tac. doch verklagten si die tôten, die niemen erwecken mac. an dem fünften morgen huop sich ein grôzer schal: von den argen vînden wart vol dâ berc unt tal 393 Geleit unde erfüllet, die burc al umbelegen. si muosten von der veste der reise sich bewegen. die wahter riefen lûte ‘nu wacht und hüetet wol! daz velt und daz gebirge ist allez vînde vol.’ 394 Do erschrac an sînem bette der fürste von Mêrân. dô trat er in daz venster und erkante manegen man, vil manigen der geste, die fuorten frömdez dach. sîn herze erschrac vil sêre, dô er sô vil der geste ersach. 395 Dô gienc er über daz bette, dâ sîn hêrre ûf lac. den weckete er vil sanfte ‘nu wol ûf, ez ist tac. dîne bruodr uns habent besezzen, alrêrste geschiht uns wê: ez ligent vor mîner bürge fünf tûsent oder mê.’ 396 Dô warf er einen mantel über sîne brust blôz. si trâten in daz venster, die menege sâhens grôz, die vor der mûre lâgen, die zwêne künege rîch: ‘nu bin ich êrste in sorgen’ sprach Wolf Dietrich.

X. 397 ‘Swîc’ sprach der alte ‘und gehabe dich noch wol. sînes leides niemen sich ze übele gehaben sol. der man sol sînes liebes ouch niht sîn ze frô. swaz wir dar umbe tæten, sô wære im doch alsô.’ 398 Mit zorne sprach der junge ‘sît mir got hât gegeben, daz si kumen sint sô nâhen, sô wil ouch ich mîn leben wâgen und mîn êre umb mîn künicrîch. got lât mich niht verderben’ sprach Wolf hêr Dietrich. 399 Die in der bürge wâren, die rihten sich ze strît, und was doch ungesperret ir tor ze aller zît. si liezen nider die brucke und giengen für daz tor: swes si in der bürge luste, daz funden si dâ vor. 400 Swie grôz ir menege wære, doch was ez ungelîch. dâ sigete ouch vil dicke Wolf Dietrich. von starker patalje huop sich vil ofte nôt. die vînde gestriten selten, ir belibe wol zweinzic tôt. 401 Sus wart von den wirten der geste vil gevalt. die wunt dannen kâmen, die lâze ich ungezalt. alsô erwerten die wirte den frömden gar, daz dô durch sturmes willen kam deheiner dar. 402 Dô wart ein fride gemachet und ein gesprâchtac. Saben der teidinge und meister Berhtunc phlac. ‘ich râte dir daz beste’ sprach der ungetriuwe Saben, ‘des solt ouch du mir volgen, wilt du den lîp behaben. 403 Berhtunc, ich wil dir râten, und wilt du gerne leben, du solt dîn junchêrren und die burc den künegen geben.’ ‘nu enwelle got von himele’ sprach Berhtunc von Mêrân: ‘er hât sich gar ze verre ûf die triuwe mîn verlân.’ 404 Saben sprach ‘die künege zwên eide habent gesworn, daz si daz velt iht rümen, diu burc werd ê verlorn.

dich und dînen hêrren und elliu dîniu kint diu hæht man an die zinnen und die ûf der bürge sint.’ 405 Mit jâmer sprach der alte ‘des muoz ich mich bewegen. sô bin ich doch in triuwen und in êren tôt gelegen.’ der fride niht langer werte, dô reit er wider în und sagete disiu mære dem lieben hêrren sîn. 406 Swes dô die künege swuoren, des liezens allez wâr. si lâgen vor der bürge unz in daz vierde jâr. dô wart des jungen riuwe und ouch sîn jâmer grôz, daz er alsô sterben solte; des verligens in verdrôz. 407 Von sorge wart er wîse, als die jungen tuont, vil fruo an einem morgen er für Berhtungen stuont. dô sprach vil barmiclîchen Wolf hêr Dietrich ‘mit ruowe erwirbet niemen êr noch künicrîch.’ 408 ‘Nu sage an’ sprach der alte, ‘waz wilt du deich nu tuo? west ich wie ichz erwurbe, dâ hulf ich dir gerne zuo.’ mit jâmer sprach der Krieche ‘got müeze dich bewarn: ez ergê swie got welle, ich muoz leider von dir varn.’ 409 Mit zorne sprach der alte ‘nu enweist du war du solt. daz du der rede erdenkest, ich wird dir nimmer holt. swelch vogel ze fruo fliuget ûz dem neste sîn, dem mac wol misselingen: als geschiht dir, hêrre mîn.’ 410 Mit zühten sprach der Krieche ‘mir sint mîn vedern lanc und sint alsô gewahsen, daz si mich niht dunken kranc. der sterkist und der lengist ich undr iu allen bin: als mich diu sorge twinget, ich gewinne ouch lîhte sin. 411 Erloube mir die reise. war umbe tuost du daz, sol ich bî dir verderben? waz ist dir dester baz? ich wolte gerne lœsen dich und dîniu kint, diu durch mich in die sorge und angest komen sint. 412 Dô sprach der getriuwe ‘wes hâst du dir gedâht, daz du dich underwindest, daz du niht volenden maht? und daz du dirz gedenkest, dar an tuost unwitziclîch.’ ‘waz touc et unversuochet?’ sprach Wolf hêr Dietrich. 413 ‘Ich wil die welt durchrîten und dar zuo elliu lant, mir werde ûf diser erde eteswâ ein künec bekant,

der sô gewaltic heize, des dienst wil ich ouch sîn, daz er mir rehtes helfe an den argen bruodern mîn. 414 Hilft er mirs betwingen, dar umb wird ich sîn man. ich wil ein teil des landes durch sînen willen enphân.’ ‘weiz got’ sprach der alte, ‘du rîtest manegen tac: den künic weiz ich nindert, der dir gehelfen mac.’ 415 ‘Swic’ sprach der Krieche, ‘wie môhte daz geschehen? ich wil ez niht gelouben, ich wil ez ê besehen. waz touc daz leben dem kinde, ez ensî ouch muotes frî? ob du indert keinen wizzest, den sage mir wâ der sî.’ 416 ‘Sît du niht wilt erwinden’ sprach Berhtunc von Mêrân, ‘du wellest helfe suochen, sô weiz ich einen man: wær er uns niht ze verre, er lôste uns hie mit her.’ ‘den selben wil ich suochen, und wære er über mer. 417 Den solt du mir zeigen und sîn lant wâ ez lît.’ ‘daz heizet Lamparten und heizt er Ortnît. kein künec mac sich im glîchen, sô mehtic ist sîn her. ein frouwen mit gewalte nam er eim künege über mer. 418 Der selben küniginne gehalf im ein getwerc: im ist vil wol kündic swaz decket tal unt berc. swes ouch den künec gelustet, daz muoz benamen ergân: swâ gegen er sich geneiget, daz mac vor im niht gestân.’ 419 Mit zühten sprach der Krieche ‘nu erloub mir daz ich var. ob ichs halt niht bedôrfte, doch sô wolte ich dar, daz ich den künec gesæhe, von dem ich hœr wunder sagen.’ si enwesten aber leider daz in der wurm het hin getragen. 420 Mit witzen sprach der alte ‘diu reise ist dir ze grôz. du vindest nindert strâze noch keine stige blôz. du kumest ouch harte dicke daz du mir der wârheit gihst: du muost sehs wochen rîten, daz du lant noch liute sihst. 421 Ez heizt diu Romante, daz lant noch liute enhât. du vindest nindert huobe noch acker wol besât. hebst du dich ûf die strâze, kint, ez geriuwet dich.’ dô sprach aber der junge ‘hêrre meister, trœstet mich.’ 422 ‘Jâ muoz ich’ sprach der alte ‘dar umb die reise wern. du maht dich ûf der strâze vor hunger niht ernern.

gelîche den vihes herden dâ gênt die wilden leun.’ ‘du maht mir’ sprach der junge ‘von tieren niht gedreun.’ 423 ‘Sît du niht wilt beliben’ sprach Berhtunc von Mêrân, ‘sô gibe ich dir vil gerne, daz ich dir behalten hân: Valken den vil guoten, den wîln dîn vater reit: in manegem volcwîge ze sige dar ûf er streit. 424 Sînen helm, sîne brünne, sînen schilt und ouch sîn swert, daz hân ich dir behalten, ob dîn wille des nu gert.’ ‘den schilt man entriuwen an mîm halse nimer gesiht. war umb solt ich den füeren? mir wart sîn ampt noch niht. 425 Ein schilt kius ich mir selbe’ sprach der junge man. ‘ich wil durch übermüete elliu wilde tier bestân. man vermisset sîn doch lützel, swelhez dâ wirt erslagen. swelch sich wert aller lengist, des sigel wil ich tragen. 426 Ich wil des swern eide, oder ich gelige tôt, daz ich durch sîne êre immer mêre ûz aller nôt wil sîn genôzen helfen und wil in triuwe swern.’ mit jâmer sprach der alte ‘nu müez dich got mir nern. 427 Und wilt du niht beliben, vil lieber hêrre mîn, ganc balde und nim urloup von der lieben muoter dîn!’ dô giengen sie dâ beide dâ er sîn muoter vant. mit jâmer sprach der alte ‘iwer sun wil in diu lant.’ 428 ‘Nu enwelle got von himele’ sprach dô diu künigîn. ‘er sol vil vaste wallen, liebiu muoter mîn.’ si sprach ‘sun unde hêrre, wem lâst du danne mich?’ ‘mînem meister Berhtunge wil ich bevelhen dich.’ 429 ‘Got müeze dir behalten, vil liebez kint, dîn leben. swaz ich dir hân behalten, daz wil ich dir nu geben. nu muoz ich immer weinen mîn leit ze grôzem schaden.’ si sprach zuo dem jungen ‘nu reiche mir mîn laden.’ 430 Ir herze wart durchbrünstic, dô si diu kleider vant. si sprach zir lieben kinde ‘nu habe dir ditz gewant.’ swie und si dâ geweinte, sîn ouge wart nie naz: daz gewant begunde er schouwen: ‘muoter, zwiu’st mir daz? 431 Ich næm vil michels gerner ein herten halsberc lieht. gip ez swem du wellest, muoter, ich wil sîn niht.’

‘jâ solt du dran gelouben, sun, ez ist dir guot, swâ du wilt einic rîten; ze kindisch ist dîn muot.’ 432 ‘Jâ bin ich dem gewante gar ein ze grôzer kneht: an lenge und an der wîte ist ez mir nindert reht.’ si sprach ‘nu gip mirz widere, tuot ez dir indert wê. als liep ich dir ie wurde, lâ sehen wie ez dir stê.’ 433 Dô volgete er der muoter und nam ez in die hant. dô meinte er daz im wære ze wênic daz gewant. die wât er an sich sloufte, dô warts im gar ze wît: er sprach ‘nu sage mir, muoter, ist ez guot für keinen strît?’ 434 Si sprach ‘ez wære als lange niht gelegen in mîner laden. dir kan fiur noch wazzer noch anders niht geschaden. swâ ez hin gereichet, dâ wirst ouch nimmer wunt, und bist vor allem wâfen dar inne sicher unde gesunt. 435 Du hâst über dîn herze der sælden tach geslouft. daz sint diu selben kleider, dâ du inne bist getouft: du solt an got gelouben, sô wirt dir dîn künicrîch.’ ‘nu geruoche er mich behüeten’ sprach Wolf hêr Dietrich. 436 Do hiez er im gewinnen sîns vater sturmgewant. sîn muoter vil geweinte, dô si im die riemen bant. si wâren alle verzwivelt an dem küenen degen hêr und wolten ouch des wænen, si gesehen in nimmer mêr. 437 Alsô man dô mit jâmer in der bûrge innen wart, daz der junchêrre wolt ûf die senenden vart, die alten zuo den jungen mohten weinen niht verlân: ez trûrte ab niemen als sêre als sîn einlif dienstman. 438 Der alte sprach zem jungen ‘nu gedenke an unsriu jâr. kumst du ze frömden liuten, so vergizzest unser gar. in dîner kindes jugende geliebt dir lîhte ein wîp. dâ von sô hebet dich ringe, und verliesen wir den lîp.’ 439 ‘Du getrouwest mir vil übele’ sprach Wolf Dietrich. ‘der mir die schœnste gæbe und tûsent künicrîch und dar zuo lant und bûrge, swaz ir in der welte sint, ich wil nimmer wîp gewinnen, ich lœs dich ê und dîniu kint.’

440 ‘Des gip mir dîne triuwe’ sprach Berhtunc von Mêrân, ‘daz du der niht enbrechest.’ dô wart ein eit getân: den swuor er ûf sîm swerte. den eit er stæte lie: swie guote state ers hête, den eit gebrach er nie. 441 ‘Ich sage dir’ sprach der alte, ‘mîn armuot diu ist starc. doch hân ich dir behalten goldes drîzic marc, ob dich got gesendet under eines wirtes dach, daz du doch des êrsten habest dâ mite gemach, 442 Nu solt dich niht entrihten, dîn ros ist alze snel. an dem satele hanget wînes zwei parel und ouch von jegerspise anderhalp ein bulge vol. swenn dir des zerinnet, got dich berâten sol. 443 Ich enmac dir vor der porte ze keinen staten komen. rît als dich got bewîse, du hâst ein dichs an genomen. als man dich frâgt der mære, sô du rîtest für daz tor, sô sprich “ich binz ein hüeter und sol wachen hint hie vor.” 444 Welnt si dich lîhte vâhen, sô bist ouch du niht kranc. du erwerst wol dînen mantel âne ir aller danc.’ dô man im sînen Valken ûf den hof gezôch, ein mensche ie daz ander vor grôzem jâmer vlôch. 445 Vor jâmer mohte niemen den andern sehen an. dô kusten in vil dicke sîn einlif dienstman. si wurfen ûf die porte: ir jâmer wart vil grôz: als fuor er über die brücke sîner kindelîne blôz. 446 Dô er alsô balde von der veste reit, im sâhen nâch die sînen, den was von herzen leit. dô kêrte er gegen den vinden einem degene gelîch: alrêrst wil in die sorge Wolf hêr Dietrich.

447 Dô wart ein michel frâgen wer er wære, und von wanne er rite. er sprach zen huotæren ‘ich hüete vor der bûrge, diu was iezuo ûf getân: Wolf Dietrich wil entrinnen und sîn einlif dienstman.’ 448 Dô reit er durch die vinde daz in dâ niemen vienc. swer aber im ze nâhen inder an dem wege gienc, den lazte er als unschône, daz ern nihtes mêre enbat: man truoc in danne tôten, er kam nimmer von der stat. 449 Dô reit er vor dem walde die naht unz an den tac. der huote gên den vinden er alters eine phlac. des tages wol zweinzic tôten sant er in in daz her: dô sis innen wurden, si fluhen âne wer. 450 ‘Nu müeze ez gote erbarmen’ sprach der ungetriuwe Saben, ‘daz wir sô lasterlichen alle hie gehüetet haben, daz uns ist entrunnen Wolf Dietrich: er gewinnet lîhte widere alters ein sîn künicrîch.’ 451 Dô kêrte er ûf die strâze des andern morgens fruo. er wolte gên Lamparten, dâ rihte ouch er sich zuo. den tac unz an den âbent er vaste für sich reit: vil schiere wart er irre, des muoste im wesen leit. 452 Dô twanc in des der âbent, er moht niht fürbaz. daz er dar hete gefüeret, ein lützel er des az: er enmohte von der müede, als manegem noch geschiht. swie wê der slâf im tæte, doch sô slief er allez niht. 453 Dô machete er ein fiuwer, daz übr al den walt erschein. die ronen ungefüege truoc er dar alters ein. do versuochte er vil des wildes durch sînen tumben sin: vil gern het ers bestanden, deheinz bestuont aber in.

454 An dem dritten morgen dô zôch er fürbaz, swie wê diu reise im tæte, wie selten er vergaz, er gedâhte an Berhtunge, sînen meister von Mêrân: er bevalch gote vil dicke sîn einlif dienstman. 455 Unz an den fünften morgen der küene degen reit. die strâze und ouch die stîge er vil gar vermeit. aller hande wildes sach er vil manege schar. sîn ros begunde müeden, des wart er trûric gar. 456 Dô muote in harte sêre sîn starkiu arbeit. an allen sînen freuden was im widerseit. in begreif grôziu swære, des enkunde er niht bewarn, daz er in der wilde muost âne strâze varn. 457 ‘Nu müeze ez gote erbarmen’ sprach der Wolf Dieterich. ‘ich lâze in disem walde allez mîn künicrîch.’ dô zôch er abe die brünne und warfs ûf einen ron. mit trûriclichem muote sô schiet er dar von. 458 ‘Owê’ sprach der Krieche ‘wie sol ich mich ernern? ich mac mich alsô blôzer der vinde niht erwern. mînes vater erbe wartet mir niht mêr. wem sol ich dich nu lâzen?’ sprach der künic hêr. 459 Harte barmiclîche er von dem geserwe flôch über ronen und über steine. sîn ros er mit im zôch. dô hete er im der müede vil gerne gemachet buoz: wol drîer raste lenge gienc er neben im ze fuoz. 460 Mit stecken und mit ruoten sluoc er im manegen slac. von hunger und von müede daz ros im dâ erlac: im mohte niht gehelfen, swaz er im slege sluoc: sô liep was im sîn Valke, daz er den satel truoc. 461 Dô bant er in vil vaste ûf den rucken sîn. er kam ûf ein gebirge, dâ lûht in der sunnen schîn. da erhôrte er eine stimme diu vil lûte erschal, daz ir aldâ antwurte beidiu berc unt tal. 462 ‘Sô ungehiurem ruofe wart nie niht mêre gelîch. ich wæn ditz sî diu helle’ sprach Wolf hêr Dietrich. ‘nu hân ich leider niemen, der mir diu mære ervar. nu ergê mir swie got welle, ich muoz et selbe dar.

463 Ich wæn wol daz die tiuvel mir hie vil nâhen sint. ich hœr Lûcifern schrien und elliu sîniu kint.’ sîn ros daz treip er nidere die lîten hin ze tal: vor hunger und vor durste si bêdiu tâten manegen val. 464 Mit jâmer sprach der Krieche ‘got mir ein stîc bescher, dâ ich den tiuvel vinde! swie kleine ab sî mîn wer,’ man sol mir daz gelouben, ich muoz den tiuvel sehen: sol aber ich nu ersterben, daz muoz alhie beschehen.’ 465 Die lîten zôch er nidere, ein wazzer er ersach. ‘wâfen’ sprach der Krieche, ‘wie ein ungefüeger bach!’ die ungefüegen helle und die tiuvel dier dâ vant, die wârn des meres ünde und sluogen an die steinwant. 466 Mit vallen und mit strûchen sô kam er an den sant ûf die ebenen erde nider an daz lant. dâ stuont ein grüene linde, dar undr ein anger was: im gienc unz an die gürtel die bluomen und daz gras. 467 Ez gap gesmac vil süezen die rôsen und der klê. ‘ôwol mich’ sprach der Krieche, ‘swie halt ez mir ergê, got hât mînem rosse weide alhie beschert: mir ist vil deste sanfter daz ez sich ernert. 468 Ez wirt hie von dem anger fürbaz niht gezogen. nu wil ich ouch hie slâfen ûf mînem satelbogen. sol ich vor hunger sterben, sô lig ich hie lieber tôt dan ûf der bœsen erde: ditz gras ist rôsen rôt. 469 Sît ich die grüenen linden und den anger funden hân, (ich enmac vor hungers nœte weder rîten noch gân) wâ môhte ich baz ersterben? ez ist hie sô wunniclîch.’ do entslief in senenden sorgen der Wolf hêr Dietrich. 470 Der durst und ouch der hunger het im nâch benomen den lîp. ûz des meres grunde gienc ein ungehiurez wîp: si truoc an ir lîbe von schuopen eine hût. si sach ouch dem gelîche sam si wære des tiuvels brût. 471 Mit langem wazzermiese si gar bewahsen was, als in dem wazzer wahset vil ungefüegez gras. ir hiengen von dem kinne die grânen unz ûf den fuoz. swie ungestalt si wære, si het dannoch senften gruoz.

472 Si was an allen enden vil slîmic unde naz. ir hâr gienc über die versen und dannoch fürbaz. ir was diu ougengruobe wol einer spannen wît, wol zweier vinger tiefe, aldâ daz ouge lît. 473 Ir munt was als ein schaffel, ir zene wol spannen lanc, ir füeze als ein schuvel: vil unsælic was ir ganc. ir was ouch ir stirne wol einer ellen breit. dô si den degen wacte, daz was im vil leit. 474 Si trat über den Kriechen und zôch im ûz sîn swert. si sprach ‘nu weiz et niemen wes du hâst begert. du suochest âventiure’ sprach daz wilde wîp: ‘er wær doch harte übele, swer dir nu nâme dînen lîp. 475 Nu hâst in dîner jugende vil wünneclîchiu lide. west ich obe du edel wærest, ich gæb dir gerne fride.’ sîn swert daz barcs vil schiere, wan daz kund si wol. si verbarc sich selbe hinder eines boumes hol. 476 Dô der Krieche erwachte und des swertes niht ensach, dô want er sîne hende, vil barmiclîche er sprach ‘weiz got, mir sint diebe hie nâhen bî gewesen. fund ich noch iht gehiures, sô môhte ich noch wol genesen.’ 477 Dô nam er sîne brieve mit jâmer in die hant. alle sîne swære er dar ane geschriben vant. diu frouwe lîse hôrte, unz daz er gar gelas allez daz an dem brieve von im geschriben was. 478 Dô alle sîne swære gelas Wolf Dietrich, do gesprach ûz dem boume diu küniginne rîch. mit gremelîchem muote diu küniginne sprach ‘wer hât dir erloubet ditz ligen und den gemach?’ 479 Vil schiere blicte er umbe: dô diu frouwe im wart erkant, dô viel im vor vorhten der brief ûz der hant. der Krieche sprach mit vorhten ‘waz mac ez dir geschaden? ich bin mit ungemache an dise stat geladen. 480 Du maht mit senften worten mir wol sprechen zuo, und lâz mich des geniezen, daz ich dir nihtes tuo. ist aber diu grüene linde und diser anger dîn?’ ‘jâ er ist mîn eigen’ sprach diu künigîn.

481 ‘Daz ich hie hân geslâfen, daz lâzet âne zorn, und helfet mir gerihtes, ich hân mîn swert verlorn. daz wart mir ûz der scheide gezogen dô ich dâ lac.’ si sprach ‘ich hilf dir gerne, swes ich dir gehelfen mac. 482 Und hetest du iemen friunde, dir wurde lîhte baz. ich sihe wol’ sprach diu frouwe, ‘dir gewirret etewaz. nu sage’ sprach diu frouwe, ‘waz ist aber dîn nôt? du hâst gesundez herze und lîst doch schiere tôt. 483 Ez ist doch vil übele, ob du verderben solt. ich trowet dir wol helfen, wær ich dir anders holt.’ ‘mir gewirret an dem herzen noch an dem lîbe niht: ez kumt von arbeite, daz man mich als blœden siht. 484 Got, sît ich sol ersterben, sô lâz ez schiere sîn! iedoch genæse ich lîhte, het ich spîse unde wîn. ze mîner erzenie hœrt lützel meisterschaft: der durst und ouch der hunger benimt mir mîne kraft.’ 485 ‘Ich erkenne wol die salben, die dîn herze haben sol. drîzic tûsent ritter die ernerte ich eine wol.’ mit jâmer sprach der Krieche ‘sîstu ein gehiure wîp. und ob du an got geloubest, so erner mir mînen lîp.’ 486 ‘Mir ist vil unmære, ob du tôter hie gelîst. mîn helfe frumt dir kleine, du sagest mir wer du sîst.’ ‘mîn vater was ein Krieche und was ein künic rîch: er saz ûf Kunstenopele und hiez Huge Dietrich. 487 Nu habent mich verstôzen die argen bruoder mîn.’ ‘daz habe ich wol gehœret’ sprach diu künigîn. ‘alle mîne helde ich von in verlorn hân. si habent mir ouch besezzen mîn einlif dienstman. 488 Nie mêre ichz überwinde, ligent si ze Kriechen tôt.’ si sprach ‘wilt du mir volgen, si kument wol ûz der nôt. swaz dir dîne friunde râten, dâ bist unverdorben mite. wil du genesen gerne, sô tuo des ich dich bite. 489 Daz du mich nemest ze wîbe, ich gib dir driu künicrîch.’ ‘nein ich, ûf mîne triuwe’ sprach Wolf Dietrich. ‘nu lâ mich alhie sterben, ich enruoch waz mir geschiht: des übelen tiuvels muoter kumt an mînen arm niht.

490 Daz ich dir versage sô schiere, daz lâ dir niht wesen zorn. ich hân dich und alle frouwen unz an mînen tôt versworn. ob du begünnest zürnen, wie solte ich mich ernern? næm aber ich alle frouwen, dannoch muoz ich dich verswern. 491 Der tiuvel ûz der helle kæm wol zer hôchzît.’ vor freuden wart ir mündel wol drîer spannen wît. sus trat si ûf hôher: diu frouwe schœner was. si slouft sich ûz den schuopen und warf si ûf daz gras. 492 Si lûhte ûz allen wîben, als diu sunne lieht. aller megede schœne was gên ir gar enwiht. des hungers und des durstes er durch ir schœne vergaz: ‘ich wæne’ sprach der Krieche ‘mir geviel nie frouwe baz. 493 Mîn muot ist mir gehœhet, du gevellest mir sô wol. nu erbarme ez gote von himele, daz ich dich niht nemen sol. nu sitze nider, frouwe, durch got und trœste mich.’ si sprach mit süezen worten ‘sag an, waz irret dich?’ 494 ‘Ich hân gesworn des eide, frouwe wol getân, daz ich nimmer wîp gewinne, ich lœse ê mîne man.’ ‘ich sage dir’ sprach diu frouwe ‘und wilt du gerne leben, betwingest du dîne bruoder, du solt mir einen geben. 495 Ob ich dich bæte, hêrre, umb dîn eines lîp, des wil mir got niht gunnen, du nimst ein ander wîp. nu lâ mich dînen bruoder füern an des meres grunt: ich mache im tegelîche wol tûsent wunder kunt. 496 Swaz daz mere bedecket, daz stêt in mîner hant. dar zuo ob dem wâge hân ich wol drîzic lant. alle schrâwazen wil ich im ze eigen geben und elliu merwunder: wie môhte er schôner leben?’ 497 ‘Entriuwen’ sprach der Krieche ‘ich gib dir den bruoder mîn. des maht du ûf mîn triuwe gar âne zwîvel sîn, und mac ich in betwingen, vil schœniu frouwe hêr.’ dô sprach diu küniginne ‘ich bite dich nihtes mêr. 498 Ich erkenne eine spîse, diu ist nütze unde guot, diu dir an dem lîbe und dem herzen sanfte tuot, die du vil sanfte füerest mit dir in der taschen dîn. si müet ouch dich niht sêre, si ist weder spîs noch wîn.

499 Wilt du mirz loben bî triuwe, so belîbest sorgen frî. du gip der spîse niemen, wan der getriuwe sî. ich sage dir von der wurzen, diu hât solhe meisterschaft: swenn du ir geniuzest, sô hâst du eins lewen kraft. 500 Dir ist dar ûf dîn houbet * gelegen. ir stêt vil in der welte, man solte ir schône phlegen.’ si fuorte in zuo dem boume, dâ si die wurze ersach. si lêrt in daz ers erkande, ewa ers immer mêre gesach. 501 Als er der wurze ein wênic genam in sînen munt, ‘ôwol mich’ sprach der Krieche, ‘nu bin ich aber gesunt. mir gewirt an mînem lîbe niht sô grôz als umbe ein hâr: al mîne sterke, frouwe, die hân ich wider gar. 502 Ir sult mir, frouwe, râten, sît ir sô getriuwe sît, wie ich wider ze sîner sterke bringe mîn ravît.’ si sprach ‘der selben wurzen solt du im ouch geben ein teil: sô gewinnt ez sterke widere und wirt frô unde geil.’ 503 Ez wart zehant versuochet, sîn ros wart wider starc. in einem frechen muote vant er aber sîn marc. swie mager ez aber wære, jedoch truoc ez in dan: dô kam ûz sînen sorgen der helfelôse man. 504 Mit zühten sprach der Krieche ‘frowe, ist dir iht bekant, welhen wec man rîtet in der Lamparten lant?’ ‘du vindst deheine strâzen, rît niuwan bî dem mer, du sihest Lamparten schiere: got dir gelücke dâ bescher. 505 Du solt dich, hêrre, hüeten, daz lant ist âne fride: dâ vant man ê gerihte bî dem halse und bî der wide. du wirdest nimmer irre’ sprach diu küniginne rîch. nu ist aber ûz den sorgen der Wolf hêr Dieterîch.

XII. 506 Von dannen er dô kêrte durch den grüenen walt, als in diu frouwe lêrte, die stige manicvalt bî dem mere vil nâhen durch daz wilde lant. die stige und ouch diu strâze im wârn vil unbekant. 507 Des reit er ofte irre, als ich vernomen hân. an dem vierden morgen dô kam der küene man in eine starke wilde: dâ hôrte er sêre klagen; dâ was ein maget vil schœne mit gewalte hin getragen. 508 [unleserlich] in dem lande fünfzic schâchman: [unleserlich] in dem walde schaden vil getân. ze velde und ûf der strâzen roubten si daz lant: daz was den lantliuten mit schaden wol bekant. 509 [unleserlich] kom der degen küene al eine zuo geriten. [unleserlich] hie von dem recken mit ellen wart gestriten! als in die schâchere zuo in sâhen komen, [unleserlich] sprach besunder, als wir daz hân vernomen. 510 [unleserlich] her vert ein recke, der füert ein harnasch an, [unleserlich] solt ir wizzen alle, daz selbe wil ich hân.’ [unleserlich] sprach aber der ander ‘er dunkt sich nie sô starc, [unleserlich] muoz mir in der wilde lâzen hie sîn marc.’ 511 [unleserlich] nemet mir des helmes’ sprach der dritte dô. [unleserlich] sprach ez der vierde ‘sô bin ich des swertes frô.’ [unleserlich] wart dâ geteilet swaz er mohte hân. [unleserlich] si ersach der recke, er ilte durch den tan. 512 [unleserlich] den schâchæren wart dem degen ger. [unleserlich] wart vil schiere gezucket swert schilde unde sper. [unleserlich] bî dem fiure sâzen und schreiten dâ die meit, [unleserlich] sluoc er vier und zweinzic, als uns ist geseit. 513 [unleserlich] im entrunnen, si wurden aber wunt. [unleserlich] wart diu maget ledic an der selben stunt.

dô lief si gegen dem recken, danken si im began: si sprach ‘got müeze iu lônen, vil wunderküener man.’ 514 Do erbeizte er zuo der erde der küene degen starc. er huop die maget edele für sich ûf daz marc. dô kêrte er durch die wilde, als uns daz ist bekant, zuo einem riutære, den er dâ nâhen vant. 515 Dem bevalch er die frouwen, als wir vernomen hân. dâ mite kêrte dannen der vil küene man. dô sagte im niemen mære, im was ouch unbekant wie berihtet wære liute unde ouch lant. 516 Swâ er ûf der strâzen für die liute reit, die wâren sô betrüebet daz in niemen freit. dô frâgete er ouch niemen, sus kam er in daz lant: Ortnides tôt des küneges der was im unbekant. 517 An einem morgen früeje do gevienc der küene man einen wec vil engen, der truoc in in den tan. daz kam im ze sorgen: der walt vil dicke was, wan dâ was vil tiure beidiu velt unt gras. 518 Des reit er ofte irre als vil dicke noch geschiht. der edele fürste küene der het der spîse niht. swâ er die nahtselde het durch daz lant genomen, dâ wart er ie berâten, als wir daz hân vernomen. 519 Dô reit der küene recke allen den tac, daz er in dem walde vil kleiner spîse phlac. dô ez gienc an den âbent, dô vant der küene man einen riutære, als ich vernomen hân. 520 Der half im mit der spîse und frâgte den küenen degen, wes er in dem walde des tages het gephlegen, daz er alsô spâte wære zuo im komen. alrêrst sagt er im mære, als wir daz hân vernomen. 521 Er sprach ‘ich bin von Kriechen komen in ditze lant, ich wolte ouch gegen Garte. nu tuo mir daz bekant wâ ich die rehten strâze rît von dir aldâr.’ er sprach ‘vil lieber hêrre, der bewîse ich iuch vil gar.’ 522 Der riuter der gienc danne mit im in den tan. er wîste in ûf ein strâze, den ûz erwelten man.

dô was ez worden vinster. daz er niht dâ beleip, des nimt mich immer wunder, waz in von danne treip. 523 Doch kêrte er durch die wilde durch daz gebirge dan. gegen dem Gartsêwe gâhen er began. jâ reit er in dem walde des nahts vil kumberlîch. nu ist aber ûz einen sorgen der Wolf hêr Dieterîch. XIII. 524 Den Gartsê hôrte er diezen, vinster was diu naht. von den wahtæren hôrte er einen braht unde ein küniginne vil jâmerlîchen klagen: dar begunde er gâhen, ê dan ez wolte tagen. 525 Do erbeizte er von dem rosse und wîste ez durch den tan. aber klagen sêre hôrte der küene man. er gedâht ‘bist du gevangen, sô hilfet dir mîn lîp.’ jâ klagete Ortnîden sîn vil schœnez wîp. 526 Dô was im unkunde diu burc und ouch daz lant. dô kam der edle recke ze Garte für gerant. sîn ros daz bant er balde, als wir hœren sagen. er huop sich zuo der mûre und hôrt die frouwen klagen. 527 Si klagete jâmerlîche, ir klage diu was grôz. ‘nu bin ich hie ze Garte vil maneger freuden blôz. himelischer keiser, waz het ich dir getân, daz du mich hâst gescheiden von mînem lieben man?’ 528 Der gewan mich mit nœten verre in der heiden lant. alle mîne mâge sint mir vil unbekant. ich was ein heideninne und er ein kristenman, wan ich durch sînen willen den reinen touf gewan. 529 Nu muoz ich mich sîn ânen, daz wil ich klagen Crist, der ob aller welte vil gar gewaltec ist.’ hie klaget vil klagelîchen diu küniginne rîch: daz hôrte bî der mûre Wolf hêr Dietrich.

530 ‘Sît ich verloren habe mînen lieben man, sô wil ich mich ervallen, wan mir got leides gan.’ hie wart mit sînem schilte Wolf hêr Dietrich. do behabete ein juncfrouwe die küniginne rîch. 531 Diu was tougenlîche mit ir gegangen dar. si nam der küniginne mit ganzen triuwen war. ‘klagt mæziclichen, frouwe, iuwern lieben man: jâ lebt noch got der rîche, der iuch wol ergetzen kan.’ 532 ‘Wie möhte ich werden ergetzet des lieben hêrren mîn? ich wæn daz in der welte iht sô biderbe müge sîn. er jach daz in der welte indert wære sîn gelîch, wan einer von Salnecke, heizt Wolf hêr Dietrich. 533 Der ist dâ ze Kriechen gar ein gewaltic man. im dient gewalticlîchen gevilde und manic tan. dô Ortnît mîn hêrre ze jungest von mir reit, waz er guoter mære mir von dem recken seit!’ 534 Alrêrst sprach bî der mûre Wolf hêr Dietrich ‘klaget mæziclîche, küniginne rîch.’ do erschamte sich diu werde und wolte danne gân. durch aller frouwen güete bat er si stille stân. 535 ‘Ir sult mich lâzen hœren umb wen ir jâmer traget. wer was der ellensrîche, den ir sô sêre klaget?’ si gedâhte, ez wære ir hêrre, Ortnît ir lieber man, und hete durch versuochen dise frâge dâ getân. 536 Trahene von ir ougen die vielen hin ze tal. die nazten im die hende vor dem wîten sal. diu naht diu was niht vinster, si kôs den küenen degen: dô het diu küniginne sich freuden gar bewegen. 537 ‘Bist duz, mîn lieber hêrre?’ sprach daz reine wîp. ‘waz tet mîn armer dienest wider dînen lîp, daz du mich sô versuochest? nu melde dich enzît, und scheide mich von jâmer, hôher künec Ortnît. 539 Nu muotet mîn ze wîbe der grâve Herman, der bî dînen zîten ie dir was undertân. gedenke, künic hêre, wie stât dir daz an, und scheide mich von nœten, vil tugentlîcher man.

539 Nu muoz ich tegelîchen lîden vil grôze nôt, daz mir nu endiclîche vil lieber wære der tôt. jâ muotet mir ze wîbe, der undr Ortnîden saz: rîcher got von himele, dir sî geklaget daz. 540 Sît Ortnît mîn hêrre ze jungest von mir schiet, sît het ich leider niemen, der ihtes mich beriet. des ist mir sorge und jâmer ze allen zîten kunt. man gît mir mînes geldes niuwan kupfers hundert pfunt. 541 Dâ muoz ich mich zem jâre mit nœten mit betragen. swaz ich und mîne frouwen mit handen mac bejagen, daz ist mîn gelt zem jâre, des ich mich neren muoz. der süeze got von himele, der tuo mir sîn schiere buoz. 542 Nu gedenke, künic hêre, do ich êrste bî dir lac, wie rehte tugentlîche dîn küener lîp mîn phlac! ich leist durch dînen willen gar eine herte vart: dar an solt du gedenken, vil edeliu fürsten art.’ 543 ‘Ich binz niht iuwer hêrre, ich bin ein vertribner man, der weder lant noch liute noch erbe nie gewan. gar ânê mîne schulde sô bin ich vertriben: mir ist sicherlîchen niht wan schilt und sper beliben. 544 Dar zuo mîn ros gesatelt, des muoz ich mich begân. ich bin in disem lande gar ein ellender man. ich klaget iu gerne, frouwe, mîne grôze nôt: nu ist iuwer manicvelter umb des edelen hêrren tôt.’ 545 ‘Waz möht ir, ellensrîcher, iurs leides mir geklagen? man hât in manegen landen von mir einer vil ze sagen. man saget in disem lande mînes hêrren tôt: des lîde ich hie ze Garte jâmer und grôze nôt.’ 546 ‘Nu sagt mir, küniginne, wie mac ez umbe in stân?’ ‘ich sante ûz disem hûse ein wol begarten man, der wolte an den wurmen rechen sînen zorn: dâ von hân ich den lieben hêrren mîn verlorn.’ 547 Er sprach ‘durch âventiure bin ich her komen: iuwer klage, frouwe, hân ich wol vernomen: ichn reche iuch an den wurmen, si müezen mich nâch im trage mich erbarmet harte sêre sus getânez klagen.’

548 ‘Daz wil ich widerrâten’ sprach frou Liebegart. ‘zwelf manne sterke het Ortnît mîn zart: den hât der würme einer in den stein getragen. ir muget wol hie belîben, lât mich in eine klagen. 549 Wâ mite het ich verdienet’ sprach daz reine wip ‘daz ir durch mînen willen solt wâgen iuwern lîp? daz geverte ist nâch den würmen vil swinde in den tan: ich wil iu, degen, râten daz ir hie sult bestân.’ 550 Dô sprach der riter edele ‘des mac niht ergân. ich bestân si endiclichen, vind ich si in dem tan. sît si sich mordes vlîzent, si lâzent mir ir lîp. der mære sult ir bîten, vil tugentrîchez wip.’ 551 Urloup gerte er dannen, si bat in stille stân. ‘saget mir, riter edele, wie ist iuwer name getân? durch iuwer tugende willen nennt iuch, küener man, deich got umb iuwer êre dest baz geflêgen kan.’ 552 Er sprach ‘küniginne, des enmac niht wesen. ich muoz ê dâ ze walde sterben oder genesen.’ er gie ze sînem rosse, des habe er immer danc: gewâpent âne stegreif er in den satel spranc. 553 Sêre weinende sprach frou Liebegart ‘owê mînes hêrren, ditz gelîchet sîner vart! wilt du mich baz versuochen?’ sprach aber daz reine wip. ‘got durch sîne güete behalte dînen lîp!’ 554 Ein puneiz ûf dem rosse tet er ûf dem graben harte baldecliche, als wirz vernomen haben. er neic der küniginne: von danne was im gâch. im tet diu tugentrîche vil manegen segen nâch. 555 Dô kêrte er von der bürge durch den vil tiefen tan her nider gên der Etsche, dâ vant der küene man die rehten lantstrâzen; die reit der helt sâ: Wolf Dietrichs âventiure ist aber einiu dâ.

XIV. 556 Ze berge bî der Etsche gâhen er began harte baldiclichen gegen Triente dan. dâ sâzen arzliute an der selben stunt: dô tâten im die armen. ir grôzen jâmer kunt. 557 ‘Got willekomen, hêrre, her in ditze lant, ob iuch got von himele ze helfe uns hât gesant. uns hât ein wurm wilder ze leide vil getân: er hât hie verderbet wol fünf hundert man. 558 Daz sult ir helfen rihten, vil hôch geborner helt. ze vogte und ouch ze hêrren uns allen sît erwelt. er hât uns verderbet den künic Ortnît: der was ein kint der jâre, sîn lop was worden wît.’ 559 Ez wurden sicherlichen schilte dar getragen mit schatze für den recken, als wir hôrten sagen. ‘iur guot sult ir behalten’ sprach der werde degen: ‘ich hân durch gotes willen der reise mich bewegen.’ 560 Do beleip der ritter edele unz an den dritten tac. sîn und sînes rosses vil güetlich man dâ phlac. si dienten im mit vlîze, daz was michel reht: daz tet mit guotem willen manec ritter unde kneht. 561 Eins tages gên der nône (ze ruowe was der mân) dô begunde er frâgen gên dem wilden tan. er bat daz si im tæten des wurmes vart bekant: dô zeigten se im bî dem Mersê zuo der steines want. 562 Urloup nam dô ze Triende Wolf hêr Dietrich. dô gâhte über die heide, der helt vil lobelîch. er kêrte ûf eine strâze in den wilden tan: dâ vant er sicherlichen einen tôten man.

563 Der was dem wurme enpfallen in der selben stunt. er beizte zuo der erde, grôz jâmer wart im kunt. er sprach ‘owê, recke, dîn kumber ist mir leit. du maht wol edele wesen: sîdîn sint dîniu kleit. 564 Du maht sicherlichen wol fürsten künne sîn.’ er vant an sîner hende zwei rîchiu vingerlîn. stucke von gewande lâgen umbe den kreiz: bluotic was diu strâze, in begôz ein angestsweiz. 565 Eines wîbes stimme die hôrte er sêre klagen: diu was in den zîten mit sorgen umbetragen. diu was ein grævinne: wie kunde ir leider wesen? eines degenkindes diu frouwe was genesen. 566 Der vor im lac tôter, der was gewesen ir man. si hete sich verloufen von den liuten in den tan. dar ilte baldiclichen der degen ûz erkant. si bôt ûz unkreften im ir vil wîzen hant. 567 Ir was von unkreften ir sprâche gar gelegen. daz begunde erbarmen den ûz erwelten degen. dar nâch in kurzer wîle diu frouwe sich versan: si begunde zehant vrâgen den ritter wol getân. 568 Dô sprach gezogenlîche der fürste vil stolz ‘saget mir, frouwe edele, wer brâhte iuch in daz holz?’ ‘hêrre, mir nam ein der würme den aller liebsten man, den in diser welte dehein frouwe ie gewan. 569 In einem boumgarten hiut morgen daz geschach. dâ von sicherlichen mîn vreude aldâ zerbrach: er was milte des guotes und gar ein werder man. ich stal mich vor den liuten dâ her in disen tan. 570 Freude ist mir gezucket, nu hân ich funden nôt’ sprach diu tugentrîche, ‘nu nâhet mir der tôt.’ dô sprach der ritter edele ‘frowe, ir mugt wol genesen. ob sîn got geruochet, ich sol iuwer amme wesen.’ 571 Dô sprach ûz unkreften diu frouwe lobesam ‘owê, ritter edele, dâ habe ich gên iu scham.’ ‘schame ist hie zergangen’ sprach Wolf hêr Dietrîch, ‘jâ hilfe ich iu ûz sorgen, ob ich bin sinnerîch.’

572 Von der steinwende gâhen er began. in sînem helme balde wazzer brâhte er dan. hie labte sich diu frouwe, daz tuon ich iu bekant: ir half ûz unkreften dâ des fürsten hant. 573 Von harnesch wart er geblôzet, sîn cursît von im gezogen. si was von des recken helfe unbetrogen. mit kinde mitalle truoc er si al zehant zuo einem riutære, den er nâhen bî im vant. 574 ‘Phlic mir der frouwen’ sprach Wolf hêr Dietrîch ‘mit vil grôzen êren: ich tuon dich guotes rîch.’ dô sprach der wirt zem gaste ‘allez daz ich hân, daz sî mîner frouwen mit dienste undertân.’ 575 Dô sprach zem riutære der vil küene man ‘wirt, durch dîne triuwe sî dir kunt getân: du solt daz kindel toufen, tuo sô tugentlîch, nenn ez nâch mînem vater Huge Dietrîch.’ 576 Ir wart von dem wirte mit êren wol gephlegen. urloup nam von in beiden dô der werde degen. wider zuo dem tôten gâhte er al zehant. sîn ros der edele ritter dannoch gebunden vant. 577 Er sprach ‘owê recke, nu riuwet mich dîn leben. got ruoche dîner sêle ein ringe wîze geben.’ sus klagete er jâmerlîche des edelen grâven lîp: er sprach ‘ich vant in noeten hiut dîn schœnez wîp.’ 578 Hie brach er über den tôten beidiu loup unt gras. dô gâhte er nâch dem wurme, dem er unwæge was. diu naht begreif mit krefte den ûz erwelten degen: er het sicherlichen slâfes sich bewegen. 579 Dâ mite der degen küene reit et al die naht. er hôrte in dem walde von vogele süezen braht. diu naht was gar vinster, des reit er kumberlîch: nu ist aber in sorgen Wolf hêr Dieterîch.

XV. 580 Er reit durch ein gevelle gegen einer steinwant: in luste sêre slâfens, daz tuon ich iu bekant. nu im der tac erlûhte, als wir nu haben vernomen, dô was der degen küene ûf eine heiden komen. 581 Da erbeizte er von dem rosse nider ûf daz lant, unde leit sich slâfen in sînes schildes rant. dâ slief der degen küene wol ûf den liehten tac. der wurm gienc von dem loche, da er aber der weide phlac. 582 Durch sîne snabelweide gie er von dem neste dan. ein getwerc von dem steine rüefen dô began ‘wachâ, degen mære, jâ ist ez an der zît: du manest mich grôzer leide umb den künic Ortnît. 583 Der kam durch die würme dâ her in disen tan. hie verlôs ouch sîn leben der ûzerwelte man. Ortnît der vil edele verlôs hie sînen lîp: den weinet noch ze Garte Liebgart sîn schœnez wîp.’ 584 Dannoch slief underm schilte der wunderküene man. der wurm gâhte balde zuo im durch den tan. dannoch slief vil sêre diu edele fürsten art. daz getwerc begund sich roufen bî dem hâre unt bart. 585 ‘Owê, wilt du niht wachen, wunderküene man, sô lebt niemen in der welte der die würme türre bestân. owê, wilt du niht wachen, wer sol uns fride geben? od wer richt nu die armen, verliusest du daz leben?’ 586 Dannoch slief ûf dem schilde der küene degen stolz. der wurm gâhte balde zuo im durch daz holz. daz ros daz brach den zoum und lief den wurm an: ez treip in von dem hêrren mit strîte in den tan.

587 Swanne ez den wurm wilden getreip verre dan, sô lief ez zuo dem hêrren, als ich vernomen hân, und wolte in gerne wecken, daz tuon ich iu bekant: ez sluoc in mit dem fuoze ûf des schildes rant. 588 Ez leit von dem wurme vil ungefüege nôt: daz sult ir gelouben: vil nâch was im der tôt. er begunde im zerren sîn vil schœnez vel: doch was ez in den zîten vil küene unde snel. 589 Ez het den wurm grôzen verre dan getriben. nu was der degen küene al eine hie beliben: der was nu erwachet; hœrt wie er dô sprach, dô er sîn ros daz guote naz von bluote sach. 590 ‘Wê deich niht hân gewachet’ sprach der küene man, ‘jâ het ich dir geholfen, als du mir hâst getân. ich sihez an dînem sweize, du bist gewesen in nôt: wan got und dîn helfe wir wæren bêdiu tôt. 591 Nu hân ich dîner triuwe und ouch der helfe dîn genozzen daz ich hiute hân daz leben mîn. ich sihez an dîner gebære, der wurm ist hie gewesen. nu hât uns got geholfen, daz wir sîn genesen.’ 592 Er riht sich von der erde, als ich vernomen hân. den zoum den machte er balde und legt in dem rosse an. er maz des wurmes füeze, vil eislich was sîn ganc: die klâ vor dem riste wârn dûmellen lanc. 593 Dô sprach der ritter edele ‘sich, waz sol ditze wesen ? der tiuvel ûz der helle, wer kund dar vor genesen ? wære ich alsô tôte beliben in diseme tan, wer hœte danne erleset mîn einlîf dienstman ? 594 Die liez ich dâ ze Kriechen in vil grôzer nôt. si ringent tegelîchen niuwan umbe den tôt. hêrre got von himele, lâ mich die zît geleben, daz ich in trôst mit freuden noch einest müeze geben!’ 595 Dô gurte er sînem rosse vil snelliclichen baz. in einem grimmen muote er dar ûf gesaz. dô kêrte nâch dem wurme der degen lobelîch: nu wil in die sorgen Wolf hêr Dietrîch.

XVI. 596 Dô kêrte er gegen der wilde durch daz gebirge dan gên der steinwende, als ich vernomen hân. da erbeizte der ritter edele nider ûf daz lant. sîn ros er harte snelle zuo einem boume bant. 597 Dô gienc er gên dem berge, der vil küene degen. er het vil sïcherlichen strîtes sich bewegen. dô er kam zuo dem loche, als ir wol habt vernomen, in einem grimmen muote was der helt dar komen. 598 ‘Hêr wirt, sît ir hie heime?’ sprach der küene man, ‘jâ wellent iuch die geste mit strîte hie bestân. nu wert iuch manlichen’ sprach der küene degen. ‘ir geltet mir die tôten, die vor iu sint gelegen.’ 599 Der jungen wâren fünviu, diu grinen den ritter an. der alt was niht dâ heime, der was nâch spîse gegân. ‘waz solte ich an iu welfern êren hie begân? jâ wil ich nâch dem alten, der hat uns leide vil getân.’ 600 Dô kêrte er von den jungen ûz der steines want wider gên dem walde: dô hôrte er zehant vor im in dem walde ein vreislîchen sturm, den vaht ein lewe wilder, daz ander was der wurm. 601 Dô fuorte er an dem schilde den lewen von golde rôt. dô sach er dort den wilden stân in grôzer nôt. ‘mac ich dir niht gehelfen, ich wil dir widersagen, deich dich nie mêre gemâlet an mînem schilte welle tragen.’’ 602 Daz sper ze sîner hende gevienc der küene man. mit einer starken tjoste rant er den wurm an. daz sper ze manegen stücken vor sîner hende brast: er kund sîn niht gewinnen: daz betûrte sêre den gast.

603 Do erbeizte der ritter edele nider ûf daz lant. sîn ros er harte balde zuo einem boume gebant. daz swert ze beiden handen sluoc er ûf den wurm. er kund sîn niht gewinnen: der gast huop den sturm. 604 Daz swert ze drîen stücken als ein aphel hin gespranc. dô het der ritter edele vil manigen gedanc. ûf racte er sîne hende ‘vil genædiger got, du maht mir wol gehelfen, ich stên hie in grôzer nôt. 605 Hilf, got von himele, genædiclicher Crist, hilf an disen zîten, sît du gewaltic bist, und ist daz ich tôter belîbe in diseme tan, so berât doch dâ zen Kriechen mîn einlif dienstman. 606 Die sint ouch verdorben, verliuse ich hie mîn leben. süezer Crist von himele, ich hân mich dir ergeben. ez stêt an disen zîten umb mich vil kumberlîch.’ alrêrste ist in noeten Wolf hêr Dietrich.