In historischer Schreibweise · Die Absatznummern verlinken einzelne Textstellen.
Der veröffentlichte Haupttext wurde vollständig mit den historischen Scans durch KI gegengelesen; keine menschliche Schlusskorrektur. Vollständiger erhaltener Haupttext der historischen Ausgabe, auf allen 105 Seiten mit Luna medium am Originalscan gegengelesen. Lesarten, Einleitung und Register sind nicht Bestandteil dieses Lesetexts. Historische Textlücken bleiben markiert. Keine menschliche Schlusskorrektur; dokumentierte unsichere Lesungen bleiben nachvollziehbar.
Mich hât ein jâmer dar zuo brâht daz ich der rede hân gedâht die man uns von den alten seit, der tugent noch die krône treit. man prüevet sô der alten tugent, daz mir grüset abe der jugent vil dicke, sô ich hœren muoz von edeler jugent unedelen gruoz. mân phliget nû maneger hande schimph daz wilent was ein ungelimph dô triwe unt êre krône truoc ob allen dingen, nû ist gnuoc geseit ân disem mære. bîspil sie sint ze swære ze sagen, swâ man sich dâ bî niht bezzert; lâze wir sie vrî unt grîfe wir daz mære ân dar umbe ich der rede began. Ez hete der künec Artûs hie vor ze Karidôle hûs. daz stuont, als ir wol hât vernomen, daz niemen kan ze ende kômen: swer iht dâ geruochte der vant daz er suochte, wan dâ was guoter knehte kraft, die ir von getihtes meisterschaft alle wol erkennet, swâ man der keinen nennet, meister Gotfrît unt hêr Hartman von Eschenbach hêr Wolfram
die hânt ius kunt getân, des sule wirs ungenant lân belîben unde sage wir daz des iegelicher vergaz, von einem ritter alsô guot, daz mir daz ungemach tuot daz keiner sîn gedâhte unt er sô manegen brâhte ze nôt der durch manheit ûz nâch âventiure reit. Er tete wunder durch diu wîp, volkomen was im der lîp. ein künegin in ze vriunde nam, die dühte er alsô lobesam, daz si im gâp êre unde guot. wirdikeit unt hôhen muot, sterke unde minne. daz was ein gotinne. der selben vrowen hulde mit rehte kleiner schulde verlôs er, als ich iu sage, ditz kam an einem phinztage daz der ritter unverzeit ûz nâch âventiure reit bî sînem hûse in einen walt die wege wâren manecvalt. dô kam er an ein strâze getriben wol ze mâze, diu was grasec unt enge. sîn rîten was unlenge, ê si in wîset in ein tal. dâ hôrte er wunneclichen schal: videlen unde singen, herphen suoze erklingen, rotten unde phîfen. do begunde in begrîfen ein muot der in sô hôhe wac, daz allez trûren sîn verphlâc. nû reit er vrœlich ûf daz zil dâ er die wunne unt daz spil
hôrte in dem walde. vogele manecvalde hôrt er mit sange reiten ein widergelt den seiten. dar inne ein schoener brunne spranc der küele durch die bluomen dranc. dâ sach er ûf daz enge velt geslagen ein wunneclich gezelt, dâ sâzen vrowen under. âne man besunder was dar ein hôchzît geleit mit manec vrowen schôn bekleit, daz schuof ein richiu künegin. diu hôchzît solde alsô sin, daz kein man dâ wære wan koche unt kameraere: sô man ezzen wolde oder betten solde, sô dienten sie mit zuhten dâ unt von den vrowen ie sâ. dar kam der hôchgemuote. er gedâhte imz ze guote daz er dar wære geriten, diu reise im bezzer wære vermiten! dô erbeizte er ûf daz gras, sîn biten dâ niht langer was unz daz er sîn ors gebant. zuo den vrowen er ze hant in daz schoene gezelt gie. nû hæret wie man in enphie. in gruozte guotliche diu küneginne riche dar nâch die schoenen vrowen klâr die mit ir wâren komen dar. des genâdet ern mit witzen diu künegin bat in sitzen, des was er ir gehôrsam, durch geselleschaft in nam ein vrowe, diu in satzte zuo ir unt in ergazte
als si beste künde mit rede lange stunde. si seite im mære unde er ir: sô süeze rede vernâme wir nie als dâ von in geschach. ietwederez dâ verjach ze sagen des besten von minne daz sie westen, dar ûf stuont ir beider sin. den wechsel tribens under in, unz den tugenthaften man diu vrowe vrâgen began obe er ie gesæhe, des er mit wârheit jæhe, ze keinen zîten anderswâ sô schoene vrowen als dâ. der hübesche der klâre sprach „swaz ich mîner jâre geslizzen hân unz an die zît sô gesach ich vor noch sît sô schoenes niht als ich hie sihe (mit wârheit ich iu des vergihe) wan eine vrowen die ich sach.“ ditz gerou in sêr dar nâch: der vrowen sîn het er verjehen, dâ muoste im leide von geschehen unt wart betrüebet im der sin. dô mohte ez niht hin wider in. nû wart er alsô missevar, daz es diu vrowe wart gewar daz er der rede sêre erkam. vil michel wunder si des nam, si sprach „waz ist iu geschehen? ich hân iuch schamerôt gesehen. ir sprecht ir habet schoener wîp gesehen den mîner vrowen lîp: mugt ir des niht geziugen hân, sô sule wirz belîben lân in guote unt in geselleschaft.“ „vrowe, ez hât kleine kraft
swaz ir mir tröstes muget gegeben, ich waene an mir ein swaerez leben sich muoz verenden sunder danc.“ er tete dar nâch unde in twanc der jämer, des er sich versach, des selben schaden der im geschach daz er die vrowen sîn verlôs diu in vür alle man erkôs ze minne ûf der erde. er hete ouch grôze werde von ir unz an dise zît, des muoste er arebeit lîden sît. urloup er von der vrowen nam, als sînen crên wol an zam, unt reit vil trûreclîche unt niht als vröuden rîche ze sînem hûs gên Muntabel. grüene rôt blâ unde gel hete er von saphîr ein gaden, dâ wart mit zuhten în geladen sîn vrowe dicke, sô in twanc ir minne sîn unt gedanc. in dirre kemenâten stuont vil wol berâten ein bette mit gewæte, von tiuren geræte alsô was ez erziuget, obe daz buoch niht liuget, sô was ez umbe vangen mit guldînen spangen. in diu selben goltbant was geleget manec jochant. unt ander manec edel stein dâ in der kemenâten schein. solt ich ze rehte tuon bekant von dem selben bettegewant unde ouch von dem umbehanc, sô wurde diu rede ze lanc; daz lâze ich niwan daz man hât gehoeret vil von richer wât.
ie doch swer an dem bette lac unt niht enrette den künde niemen gesehen, ouch wil ich iu vîir wârheit jehen : swer müede unt kranc dar ane kam der wart gesunt unt wunnesam. nû vernemet vür baz. der herre gie in sîn palas, als er ê vil dicke tete, mit maneger hande bete wünschte er sîner vrowen, dô lie si in beschouwen daz si sîn versprechen mit übele wolde rechen. ie doch kam si zuo im dar în, si sprach „war tet ir den sîn, daz ir mich hât ân nôt verlorn ? mich riwet daz ich iuch hete erkorn, sît daz mir ân iu gebrast, nû sît ir iemêr mîn ein gast. ir wârt mir âne mâze liep, swie ich iuch lâze. des hât ir uns entsetzet; nû wirde ich lîhte ergetzet iwer unde ir niemer mîn, der schade sol iwer eine sîn.“ er sprach „vrowe unt sol der zorn nû gên mir niht sîn verkorn, war zuo wær mir den der lîp ? gedenket, sælden rîchez wîp, iwer güete unt tuot genâden schîn.“ si sprach „des enmac niht sîn, ich ensol vor mîner meisterschaft. mîn orden hât grôze kraft. die wîle unt ir mîn hæt geswigen sô wært ir mîn niemer verzigen; nû hât ir iuch berüemet mîn, des müeze wir gescheiden sîn. doch muet mich sêre ob iwern lîp iemêr âne mich kein wîp
geminnet ûf der erde, ich wæne ouch des niht werde. sehet rehte: swie ir sît gewesen iwer beste zît an dem lîbe vollekomen, diu schœne wirt iu gar benomen unt wert ein sölh bilde gar ungestalt unt wilde, iu belîbet aber inne kraft unde sinne unt iwer manlicher muot. sehet waz ir dar umbe tuot: in disem bilde ir sterbet, ob ir niht hulde erwerbet.“ nâch dem worte al ze hant vor sînen ougen si verswant. nû nam der tugenthafte man sich grözen siechtuomes an, ie doch sîne grözen schaden dâ mite er was überladen vuogte er swâ er mohte gelimphen, als im tohte. dô man in nider geleite, daz gesinde allez seite wie siech ir herre wære, daz wart ein lantmære. dar kâmen mâge unde man, vil michel wunder sie des nam daz sich sîn lîp entrihte zir aller angesihte. sîn leit begunt sich mêren, wan sich muost verkêren beidiu varbe unt sprâche. durch sîner vrowen râche mit ir zornes gewalt er wart sô übele gestalt, daz ich es niht gesagen kan, sô schiuzlich wart er getân. alsô lac er, daz ist wâr, vor leide wol ein halbez jâr,
daz er nihtes began. einen muot er dô gewan, er gedâhte ich wil mich niht verligen. ich hân mich noch niht verzigen genâden, wan mîn vrowe sprach, dô ich si ze jungest sach, daz zeichen müeste ich iemêr tragen, moht ich ir hulde niht bejagen. nû wil ich niht verderben, ich wil umb hulde werben, des sol mich niht betragen, ich wil den lîp wâgen: durch mîner vrowen êre wil ich iemêr mêre suochen âventiure oder ich wirde gehiure’. nû hete er dâ erzogen (daz sage ich vür wâr ungelogen) einen boc starc unde gröz, den des vür wâr nie verdrôz er vuor mit sinem herren nâhen unde verren unt half im ûz maneger nôt, dô im gezîlt was der tôt. er hete in sînem wâpenroc geleget von golde einen boc unt ûf dem schilde alsam; alsô verwandelt sich sîn nam, daz er der ritter wart genant mit dem bocke über alliu lant. Er huop sich ûf die strâze, im was vil gar ze mâze swer strîten wolde umb êre, sô gerte er nihtes mêre wan daz er prîs erwürbe oder mit êrën stürbe, dô vuorte er ein gesellen der im half ervellen manegen risen grözen unt ungevuoge stözen,
ez wære wilde oder zam, swaz sie mit übele ane kam, daz was sîn boc den er zôch, durch kein vreise nie gevlôch der boc noch sîn herre eines schaftes verre. wol ein jâr er alsô reit, daz er gedulteclichen leit sîner vrowen harmschar. * dô sande si ir boten dar ze sîner heimüete, si wolde noch ir güete an ir niht vergezzen. eins tages was er gesezzen under einer linden vor dem graben, dô sach er zelten âne traben ein juncvrowen hôchgemuot, ein phert rôt sam ein bluot reit si über den anger her. er gedâhte in sînem muote wer mac gesîn disiu meit? si ist ze wünsche wol bekleit’. gen der meide er dô gie, gar tugentlichen ers enphie. si sprach „gote ich danken sol, mir ist gelungen harte wol daz ich iuch hie vunden hân. ir sult iuch niht verdriezen lân unt welt ir iwer vrowen iemer beschowen, so leistet als si iu nû hât enboten als an dem brieve stât, ir sult in eigenlîchen lesen, welt ir, ir muget noch wol genesen. nû gebet mir urloup, herre mîn, ich mac niht langer hie sîn“ sprach diu juncvrowe gemeit. sus nam si urloup unde reit, den brief er dô ûf brach. nû hœret wie er sprach:
iu hât iwer vrowe enboten daz si an der minne goten ein urloup habe gewunnen daz si ir wellen gunnen (unt ouch die gotinne) daz si iuch aber minne, ob ir ein âventiure muget erwerben hiure ze Britanje, in dem lande. geschiht ez âne schande daz iu got die saelde git daz ir der âventiure strît alsô mit êre(n) dâ bejaget, sô merket waz iu sî gesaget: dô sult ir rîten al ze hant mit geziugen in ein lant, daz heizet Fluratrône, dâ treit iur vrowe die krône, unt sehet wer des geziuge sî. der besten von dem hove dri bringt ir die gevangen, so ist iwer leit zergangen: verendet irz, iu wirt der lîp wider unt iwer schoenez wîp.’ nû vröwet er sich der boteschaft, si gap im ellen unde kraft, vil kûme er des enbeite daz er sich ûz bereite des jâres dô diu winderzît lie dem sumer den strît unt sich diu wunne manecvalt wider huop in dem walt, von grüenem loube ein schoene dach, die dürren wisen man dô sach mit bluomen bestecket unt schône überdecket mit einer wunneclichen wât als si der liehte meie hât bereit unt wunneclichen schal, daz nû der walt al erhal
mit manegem vogelsange. dö sümte sich niht lange mit dem bocke der helt, üf den tröst het er erwelt ein äventiure als ir der degen al den meien wolde phiegen, daz was ein wunderlicher site, sin boc vuor im allez mite, des er selden vergaz, swenne er üf sin ors saz. nü huop er sich von hûse gên dem künege Artûse ze Britanje dem riche. harte ritterliche vuor er ze Karidôle hin, üf äventiure stuont sin sin. vür einem walde üf einen plân dâ sluoc der ritter ungetân üf sîn pavilûne, mit einem vrömden zûne hiez er sich umbe machen, der was von drin Sachen: stahel îsen unde holz, nû hœret wie der ritter stolz disen zûn volbrâhte, als er im gedâhte: al umbe unt umbe ez wâren sper, üf tjustieren stuont sîn ger. Dô kam dem künege maere wie ein ritter wære geriten in sîn riche hochvertecliche unt sich al dâ üf einen plân vor dem walde hæte nider lân mit sîner pavilûne, man seite im von dem zûne den er hete al umbe sich. „triwen, sô versihe ich mich“ sprach der künec Artûs „daz er sî her ze hûs
durch äventiure geriten.“ „sô wirt er ouch niht vermiten“ sprâchen dô geliche arme unde riche. des antwurt her Keie, der unbetwungen leie, „herre, sol ich riten dar, daz ich rehte umb in ervar waz sîn ârende sî, daz er sich iu sô nâhen bî hât geleit ûf disen plân? ist ez in hôchvart getân oder durch äventiure gewin, sô tjustiere ich wider in, daz ez in lihte bevilt; ich verhowe im den schilt oder er sage mir wer er ist. ich bringe iu in kurzer vrist diu maere von dem gaste.“ der künec sprach „sô vaste sol man sich niht versprechen, waz weit ir an uns rechen, ê daz ir wizzet obe sîn muot gên uns sî übel oder guot? gar tugentlichen man in sol enphâhen. mir gevellet wol daz man in alles des gewer des er hie nâch êren ger.“ dô sprach diu milde künegin „nû hœret ouch den mînen sin. ich wil dar senden eine maget diu uns diu maere schiere saget wes er geruoche hie ze hûs.“ dô sprach der künec Artûs „vrowe, ir hât ez wol bedâht.“ dô wart ein schœne phert brâht einer juncvrowen, diu solde riten schowen unde ervarn diu maere wer der ritter wære.
ein garzûn kluoger sinne den schuof diu küneginne mit der meide ûf daz velt. dô sie sâhen daz gezelt unt diu sper umbe stân, dô sprach diu maget lobesam „hie mac wol sîn ein ritter guot. in hât ein michel übermuot her gewîset in daz lant. wil er mit sîn eines hant disiu sper gar vertuon, sô wirt hie prîs unde ruon bejaget ê daz ende von eines mannes hende.“ nu erbeizte zuo der erde diu schoene unt diu werde vür (?) daz gezelt unde sprach, dô si den ritter ane sach „ritter, hoeret wes ich ger unt war umbe ich bin komen her. der künec unt diu künegin von den gegrüezet sult ir sîn, sie hânt mich zuo iu gesant durch waz ir sît in ir lant sô vrömdelîche geriten unde ir hof hât vermiten. ich sol iuch laden in ze hûs. der milde künec Artûs hât iu enboten: swes ir gert des sult ir sîn gewert.“ dô sprach der ritter unerkant „juncvrowe, ich bin in daz lant niht durch armuot geriten, ich wil in nihtes biten. mir ist von im sô vil geseit daz manec ritter unverzeit ûz sînem hove rîte nâch âventiure strîte; nû hât mich diu selbe ger von mînem hûse gewîset her,
daz daz wunder ie geschach daz ich ir keinen nie gesach unt man sie zallen ziten siht in den landen riten ûf âventiure bejac. ich hân ir nû vil manegen tac gewartet unde truoc ie leit daz mir ir keiner wider reit, nû mich diu tugenthafte schar alsô hât vermiten gar unt ir mir her sît gesant, sô hân ich âventiure ein phant begriffen richez, daz ir sît. daz geloubet âne widerstrît unt lât iuch niht belangen, ir müezet sîn gevangen allen disen meien gai, ez sî dan daz ez sô gevar daz mir ein ritter ane gesige, daz ich tôt vor im lige, oder mich sô betwinge, daz ich lebens an in dinge, swem aber ich des vor bestân der muoz iuch hie beliben lân mir gevangen ûf daz zil daz ich iuch selbe lâzen wil.“ dô sprach diu minnecliche maget „edeler ritter unverzaget, ich zime iu gevangen niht. ûf âventiure geschiht sult ir keinen zwivel hân. ich sage iu daz sunder wân: ez hât der künec Artûs sô guote ritter ze hûs, daz man iuch âventiure wert vür die mâze unde ir gert. nû lât mich riten wider hin. wie zaeme iu obe diu künegin sôlh ungevuoge ûf iuch klaget daz ir ir vienget eine maget
in ir eigen lande die si iu durch triwe sande? des sult ir haben rât, baz daz iwern êren stât.“ der ritter bat si sitzen, er sprach „ir hât mit witzen iwer boteschaft geworben, dar ane ist niht verdorben.“ waz ir gestüele mohte sîn daz tuot daz buoch schîn: ez wären bluomen unde gras, dar über gespreitet was ein gulter von samîde. daz ich so gar vermïde ze sagen von der rîcheit diu an daz zelt was geleit unt welcher ahte ez wære, daz wurde ein langez mære. nû brâhte man in trinken dar. * dar ane vil manec edel stein (?) ieclicher nâch sîn arde schein. * dô sie getrunken, sâ diu maget sprach „lieber herre, saget, scheide ich noch mit hulden hin?“ „nein, alsô stât niht mîn sin, ez mac iur wille niht geschehen, man muoz ê âventiur hie sehen, iwer garzûn sunder wân den sult ir senden hin dan, unt sage daz ir gevangen sît niwan ûf âventiure strît unt daz ich anders niht enger wan daz man mich des gewer.“ dô si die rede alsô vernâm, si sprach „geselle, var hin dan unt sage wie ich dir sî benomen unt daz der ritter her sî komen
niwan ûf âventiure gewin, dâ bi sage der künegin daz si die guoten ritter man ich wære gerne hin dan.“ dô nam er urloup unt huop sich ze Karidôl, sô wæne ich. mit vrâge gruozte in manec man, vür den künec gie er stân. der sprach zuo im „geselle, saget, wâ hât ir gelân die maget diu mit iu ze walde reit?“ er sprach „herre, mir ist leit daz ich diu mære sagen sol unde ist anders dan wol. der ir mir âne sehet komen mit gewalte ist si mir genomen.“ „wie oder wer? nû saget an!“ „herre, niwan ein man.“ „war umbe?“ „ûf âventiure.“ „sô dir got gestiure, nû sage rehte wâ ist er hin?“ „von im ich nû gescheiden bin.“ „kanstû uns der strâze bewarn?“ „herre, ir muget wol schône varn: ich wise iuch dâ ir den man mit den ougen sehet an. dâ er sich erste nider lie die stat verwandelt er nie unt wil den meien wesen dâ (giht er) unt niht anderswâ unt wil gerne schowen wer im die junevrouwen mit strite ane gewinne; er enhât si durch minne gevangen niht wan ûf die ger daz man in âventiure gewer.“ der künec sprach „weiztû wer er sî?“ „herre, ich bin sins namen vrî. daz sult ir âne zorn lân: solt ich ein jâr bi im bestân,
er müezte ân mîne vrâge wesen, ich lobetez mohte ich sus genesen. ich gehörte nie bi mînen tagen von solher kreâtiure gesagen wan, als ich iu bediute, von dem den in dem riute hêr lwein unt Kalokrêant bi den wilden tieren vant. ist er es niht, daz wæne ich wol daz er sîn bruoder wesen sol.“ „nû sage, wie ist sîn schilt getân?“ „diz weiz ich wol sunder wân. er ist von lasiure gesteinet unt iûre, die riemen daz sint borten, ûzen ûf den orten ein list von silber drûf geslagen, in mohte ein künec mit êren tragen, dar inne ein tier von golde rîch einem zamen bocke gelîch.“ ein ritter sprach „erst mir bekant. mit dem bocke ist er genant unt ist der küeneste man des ich künde ie gewan. mit im ein zamer boc vert, der in vil dicke hât ernert in angestlichen sturmen, vor grözen lintwurmen wart im kein vreise ze gröz, ez lebet küme sîn genôz. er sleht die risen âne wer, er eine ist zwelfen ein her. ich wil iu sagen vür wâr, er vaehte lihter ein jâr dan er ruowet einen tac. ôwê, waz er gevehten mac! rîcher künec Artus, iu enkam noch nie ze hûs ein âventiur sô swære. ich rede ez âne gevaere.“
dô sprach der herre Walbân „welt ir sîn eine niht bestân? „nein ich, herre, sammer got! weder durch bete noch gebot bestân ich in eine.“ sie sprâchen alle gemeine daz er an disem mære eins bœsen trôstes wære. der ritter kurzlîchen sprach „waz mîn ouge ie gesach daz kan mir niemen widersagen. nû lât mich sîn einen zagen unt vart hin zuo dem selben man. swelher im gesiget an gen dem wil ich dan treten ûf die wâge ungebeten unt wil in al ein bestân, des bite ich niemen mich erlân.“ dô wart ein michel gebreht, dô ruofte manec guoter kneht „wâ nû sper unde swert? harnasch ors mîn herz begert, daz ich die âventiur bejage.“ der ritter dûhtes alle ein zage an den selben stunden, dar nâch sie schiere bevunden daz sîn mære ungelogen ir keinen hæte betrogen. nû kam der herre Segremors ze aller vordrist ûf sîn ors. dô gâhet er ze velde dan unt dar nâch vil manec man, rehte als er bereit wart sâ huop er sich ûf die vart. der ritter mit dem bocke was in sînem rocke geriten an ein warte. dô sach er îlen harte die ritter alle durch den melm, dâ lühte manec liehter helm.
dô kêrte er wider al ze hant, er sprach „mîn îsengewant sol man mir bereiten her, beidiu schilt unde sper. ich gesihe her ritter gâhen, die muoz ich enphâhen.“ zwelf knappen hete er dâ, den gebôt er ie sâ daz ir sehs mit im riten unde alle gewin vermiten unt kein ors dâ rüerten, wan daz sie sper vüerten: sô er einz vertâte, daz er ein ander hæte. wol gewâfent wart der helt, waz tuge sunder gezelt? sîn harnasch was harte guot, selbe truoc er hôhen muot. die ritter ilten vaste her. dô nam er schilt unde sper, hie mite kêrte er vür daz zelt gên dem ritter ûf daz velt. dô in her Segremors ersach, dô hielt er hôhe unde sprach „ritter, iu sî widersaget umb der küneginne maget die ir hie gevangen hât, ob ir si gâhes niht enlât.“ er sprach „ez ist mir ungedâht. ich hânz ze disen maeren brâht, daz ich vil gerne erkande, ob man iur keinen mande, wie man zer tavelrunde stat verdienen künde mit ritterlicher manheit. wert iuch, ir hât mir widerseit.“ dô wart in zuo ein ander ger; under die arme sie diu sper sluogen mit kreften, mit zwein scharfen sceften
riten sie ein ander an. dô wart ein solhiu tjust getân, daz der herre Segremors al dort gelac, ûf im sîn ors. dar nâch kam hêr Karidant, den stach er von dem ors ze hant. dar nâch kam hêr Pontifier, sîn ors vuor sam ein tier, er hete grimmelichen site: im vuor stæte ernest mite, daz in sach niemen lachen wan von zwein sachen: swâ man kirchen brande oder helme alsô entrande, daz daz bluot dar ûz wiel unt der man tôt dar under viel, der beider in sô wol gezam, daz im ein lachen den entran. sîn ernest mohte in niht bewarn, durch den schilt unt durch den arm stach in des bockes herre von dem ors sô verre, daz im der swindel sâ ze stunt die sêle zucte vür den munt, sus zeiget er sîn gwonheit. swelher im dâ wider reit den schiet er von dem orse hin, schône reit er under in, sam ez sîn schimph wære. vil manec ors lære sach man dâ verlâzen loufen ûf der strâzen diu er hete erledigot, ez dühte in allez noch ein spot, dô diz allez was getân, der künec unt hêr Walbân kämen ûf daz velt dâ, mit in reit der selbe man des ê sô vil gespottet wart, er sprach „mich dunkt ûf dirre vart
der ritter mit dem bocke hab liehte wâfenrocke geselwet ûf der erde, noch rîtet er vil werde! nû schowet, mîn hêr Walbân, daz ich niht gelogen hân. ob es niht laster waere, wie gerne ich in verbaere! sît aber ich in gesehen hân, sô wil ich ez hinz gote lân “ an dem worte ersprenget er, vor in allen er sîn sper vertete; ich lâze ez âne haz daz er dem ritter vor gesaz. der ritter mit dem bocke sâ sprach zuo den sînen „wâ ein ander sper? daz sol ich hân, diz ist ûf einem helt vertân.“ sîn kamphgeselle kêrte, als in sîn manheit lêrte, unz im ein ander sper wart, dô kêrte er wider ûf die vart. iegelicher vunf sper vertete nâch ritterlicher ger dem andern ûf dem schilde, der tjuste sie bevilde, dô griffen sie zen swerten. ein ander sie dô werten vil grimmer slege herte. der ritter sich doch werte, daz in niemen torste sagen dâ ze hove vür einen zagen. dô wart er leider an der stunt durch sîn halsperge wunt obe der hosen in daz bein. ein grôziu manheit an im schein: alsô wunt er dâ vaht, unz in beiden diu naht des tages lieht mit vinster nam. dô schieden sich die zwêne man
mit ir beider muotes kür, dar umbe: swelher dâ verlür, swie manlich ez geschaehe, daz ez niemen saehe. der ritter mit dem bocke reit ze ruowe nâch der arebeit in sîn gezelt an sîn gemach. dô in diu juncvrowe sach, vil schöne si im engegen gie, gar tugentlîche si in enphie, si sprach „lieber herre, durch got ich bite iuch verre daz ir mich lât rîten.“ „nein vrowe, ir müezet biten des meien an ein ende, hie wirt von miner hende etliches rant verhowen. hêrn Erec wil ich schowen, den saehe ich gern, mir ist geseit sô vil von sîner manheit. hêr Iwein unt hêr Gâwân, als ich von den vernomen hân, die erledigent iuch wol. dâ bi ich getrowen sol mîn bocke daz sîn löwe uns wênic abe erdröwe. der stêt noch hie gebunden unt wirt ze disen stunden niemer abe gelâzen, ich sæhe ê ûf der strâzen hêrn Iweins geverten, den löwen: sô muoz beherten mîn boc daz ich an im weiz. swie sîn muoter waere ein geiz, sô trowe ich im sô vester wer, daz er mich vor dem löwen nêr. ir sult mit vröuden hie bestân, ich wil iuch in den êren hân, daz iu niemen nihtes tuot daz iu betrüeben muge den muot.
an den selben stunden die tôten unt die wunden hiez der künec Artûs alle vüeren in sîn hûs. mit jämer sie dô vuoren, die ritter tiure swuoren er müezte in allen tuon den tôt oder sie bræhten in ze nôt. Dô der künec Artûs mit den sînen kam ze hûs bereit was daz ezzen. dô sie nû gesezzen obe dem tische wâren, dô sach man in gebâren als im nie kein swære des tages geschehen wære, alsô gap der wîse mit vröuden dâ sîn spise. dô sie nû gezzen hâten in eine kemenâten besande er dô ze stunde die von der tafelrunde. dô sprach der künec rîche „ich bite iuch alle gelîche daz ir mir râ tet dar zuo: ich wolde gerne morgen vruo enbizen ûf der heide dâ mir sô vehte leide von einem manne ist geschehen, als ir wol alle hât gesehen, unt sage iu vür baz mînen muot. ob ez iuch alle dunket guot, sô sol diu milte künegin mit ir vrowen ouch dâ sîn, uns werde wol oder wê. ze hûse kume ich niht mê ê diu âventiure ende hât, unt ist ez iwer aller rât.“ sie sprâchen „herre, ob ir daz tuot, daz dunkt uns ritterlich unt guot.
man gebôt den kameraeren daz sie des vlîzic wæren unt bereiten sich dar zuo, der künec vvolde morgen vruo enbizen vor dem walde. die koche ilten balde, sie begunden sêre gâhen, dô sie den tac sâhen, ze walde als in geboten was. dô wart geslagen ûf daz gras manec hütte unt gezelt, wol gezieret wart daz velt mit siden unt mit golde, als ez der künec wolde unt diu künegin rîche, vil hôchverteclîche alsus bereiten sie sich dar der âventiure nemen war. dô der künec ze velde kam unt manec ritter lobesam, dô mohte man wol schowen manec schoene vrowen gekleidet wol in rîche wât: phelle unde sigelât, hârmin bunt unde grâ, liehte zobel sach man dâ, manec guldîne wât. ich wæne diu werlt zergât, als diu âventiure giht, daz man niemer gesiht sô gar ein wunnecliche schar als mit der künegin kam dar. Hie wâren sie ze velde kômen mit rîcheit, als ir hât vernomen. man sanc in ein messe vruo, die ritter drungen alle zuo. dô sie den segen enphiengen, ze tische sie dô giengen, dâ sie nû gesâzen unt mit vröuden âzen.
dô der imbîz geschach, der künec stuont ûf unde sprach „ir herren, arme unt rîche, man sol zuhtecliche die âventiure enphâhen unt niemen sich vergâllen. unt woldet ir mit ganzer schar alle gewâpent rîten dar, daz missezæme. ich wil iu sagen: swer die âventiure wil bejagen, mich dunkt daz wol gezæme daz er ê urloup næme zuo mir unt zuo der künegin.“ sie sprâchen alle „daz sol sîn.“ dô disiu rede was getân, ûf stuont der herre Walbân unt gie gezogenliche vür die künegin rîche, die hende leite er vür sich. „genâde, vrowe, geweret mich urloubes daz ich die maget an dem ritter unverzaget hiute vorder, swiez ergât, dar nâch diu âventiure stât.“ dô sprach diu milte künegin „got müeze iwer geleite sîn, hêr Walbân, des sît ir wol wert hie unt swâ ir gnâden gert.“ hie mite gie er al ze hant dâ er sîne knappen vant. sîn harnasch was im bereit, dô er den hete ane geleit, ûf sîn ors er dô saz. geviel ie liuten ritter baz dan er, des enweiz ich niht. als uns diu âventiure giht, alsus vuor hêr Walbân ze velde, als ich geseit hân. dô in des bockes herre rîten sach von verre,
dô hete er sich gewâfent wol, als ein ritter guot sol. ûf sîn ors er dô saz, die strâze er gên im maz wol ûf daz halbe teil. got gebe in beiden heil! hie rîtent zwêne vrume man in strîtes gir ein ander an. dô sie sô nâhen kâmen, daz sie sich wol vernâmen, dô sprach der herre Walbân „diz ist sêre missetân, edel ritter höchgemuot, daz ir dem künege leide tuot an sîner juncvrouwen. dar zuo hât ir verhowen im guote ritter unde erslagen. den schaden wil er noch verklagen, gebt ir der âventiure zil hiute, als ich iu sagen wil, daz ir gevangen welt sîn des küneges unt der künegin. ich lobe iu hulde âne haz ir beider, unde leist ir daz.“ dô sprach der herre Gauriel „ich hân gevarn von Muntabel durch âventiure in daz lant. wirt der hof an mir geschant, daz ich ir hie niht vinden sol, daz zimet anders dan wol den von der tavelrunde; unt weste ich wâ ich vunde iendert sô guote ritter mê, dar hæte ich mich verrihtet ê. ich wil iuch lâzen schowen daz mir die juncvrowen mit rede niemen vüeret hin (des willen ich noch staete bin!) noch mit stichen noch mit siegen die wîle ich mac den lîp geregen.
sît ir dar umbe her komen, als ich von iu hân vernomen, der bete werdet ir entwert, seht ob ir iht anders gert.“ dô sprach der herre Walbân „sô sule wirz anders verstân.“ er nam daz ors mit den sporn, vil ebene hete er in erkorn al mitten ûf dem schilde, ir ietweder zilde daz man diu sper ze stucken sach in den lüften vlucken. in was zuo ein ander ger. „sperâ her, sperâ her!“ ir wart zerbrochen sunder zal von in beiden ûf dem wal vaste unz ûf mitten tac. nâch der âventiure sac sie rîcher tjoste phlâgen, unz in diu ors erlâgen unt ouch deweder enmohte geriten als im tohte. zahî, wie dâ geriten was! sie erbeizten ûf daz gras, under die schilde sie sich bugen, zwei scharfiu swert sie zugen. hie liefen zwêne küene man mit grimmem muote ein ander an. die siege giengen dicke, daz die viures blicke in obe den helmen glesten. man lobet sie vür die besten: weder dem andern iht verlêch geltes er in niht verzêch, mit grimme galt er im ze hant. wan ir guot îsengewant sô wære ietwederes ende gelegen ins andern hende. der ein den andern dicke sluoc, des er langer nie vertruoc
unz an des kreizes ende, ze hant wider hende sluoc er in daz selp hin dan. ich wæne daz ein bezzer man vil wênic hæte gescheiden dâ under in beiden, dô sluogens ritterliche siege unde stiche von bitterem muote; in wîslicher huote vâhtens allen den tac, daz ich daz wol gesprechen mac noch gesagen vür die wârheit welher manlicher streit, unz sie diu sunne verlie unt der âbent ane gie. dô sprach der herre Walbân „hie muoz nû gâhes ergân swaz nû hie geschehen mac.“ dem ritter gap er einen slac ûf den helm also vaste, daz daz viur erglaste unt ez im in daz houbet hal, daz er küme vermeit den val. erzürnet wart her Gauriel, ein ritter küene unde snel, er zerbrach mit grimmem muot herren Walbânes huot mit einem vreislichen slac, daz er ûf der erden lac unt viel in den helm, sus lac er in dem melme. der ritter mit dem bocke sprach „herre, mir ist ungemach daz ir hie alsô liget. saget, hân ich iu ane gesiget? ich lâze iuch vil gerne leben, welt ir iuch gevangen geben.“ vil küme sprach her Walbân „herre, ich bin iu undertân
sicherheit, daz muoz nü sin. ouch endurfet ir iuch min niht schamen zuo gevangen.“ sus was ir strît ergangen an den selben stunden, die helme sie abe bunden. dô der herre Walbân sine kraft wider gewan, ze handen sie sich viengen, in daz gezelt sie giengen dâ diu juncvrou inne was durch die maneger ûf daz gras von orse wart gescheiden. si gie gên in beiden, si sprach „ôwê nû mir, herre mîn, daz ir engeltet mîn unt manec man der mîn vrume nie gewan! daz tuot mich vröuden laere, verborgen herzen swaere muoz ich iemêr dar umbe hân.“ dô sprach mîn her Walbân „daz sol man lâzen âne haz : uns gebiut diu âventiure daz, man muoz lîden ungemach.“ der ritter mit dem bocke sprach „unt westet ir, hêr Walbân, waz leides ich verborgen hân, ob ir mich zornic saehet, ich weiz wol daz ir jaehet daz ez mir nôt taete unt swaz ich jâmers haete. niht mêre ich iu sagen sol vôn mînem leide, ir muget ez wol bevinden, sule wir beide leben, wil mir got die saelde geben daz ich mit miner hende die âventiur volende alz ich si her genomen hân, sô mac mîn swaere wol zergân.
swaz aber ich iu hân gesaget, mir ist liep ob irz verdaget.“ „herre“ sprach hêr Walbân „swaz ich hie vernomen hân daz kan ich harte wol verdagen. herre, geruochet mir nû sagen, sol ich bî iu bestân oder hin ze hove gân, daz man mich dâ gesunden sehe ? ich waene wol daz iemen jehe daz ez sus sî ergangen, daz ir mich gevangen hât also gesunden âne grôze wunden.“ hie mite was er im bereit, mit urloup er ze hove reit, der künec unt diu künegin hiezen in wilkomen sîn unt vrâgten in der maere wie ez ergangen waere. „ich wânde hiute zeiner stunt daz ir tôt oder wunt laeget ûf der heide. dô geschach mir nie sô leide, vil manegen muot ich gewan wie ich mich an dem selben man geraeche nâch den êren mîn unt wil daz iemêr werbent sîn.“ dô sprach der herre Walbân „ich wil im wesen undertân die wîle ich sîn gevangen bin, des hân ich muot unde sin. unt sage iu vür die wârheit: swaz ich unz her ie gestreit, sô kam ich nie in solhe nôt, ich wânde kiesen den tôt. daz des selben niht ergie, durch sîne tugent er daz lie.“ Melianz, der küene man, urloup zer âventiure nam
daz er si morgen wolde vordern, als er solde. der künec sprach „nû sit gewert, her Melianz, des ir gert, unt sit gewis swem hie daz heil gevelt daz dem der beste teil in sînem namen des lobes stât daz iemen hie ze hûse hât unt dar zuo lôn von mîner hant, des sî mîn triwe iur aller phant.“ des morgens vil vruo vil wol bereite sich dar zuo herre Melianz der degen, wan er hete sich verwegen eins strîtes durch êre, ouch muote in vil sêre des küneges unt der künegin leit; dar umbe er ûf die heide reit des tages umbe die zît sô sich heben sol der strît. Nû erzeiget aber sînen site Keie dâ er seiden mite werdez lop bejagete. des morgens dô ez tagete dô hete er sich vür genomen, daz er was ze velde kômen an urloup durch den selben haz: in muote tete ez iemen baz. dô sîn der ritter war genam der dar ûf âventiure kam, dô sprancte er durch die snüere, durch Keien ungevüere von dem orse er in stach, daz man in dort ligen sach. nû wolde er wider in sîn zelt, dô sach er balde über velt Melianzen zuo rîten, dô muozte er aber strîten. dô kêrte er ûf die heide. gên ein ander beide
kêrten dô die degene, vaste verwegene wâren sie ûf ritterschaft. sie heten ellen unde kraft, daz sie vaste gesâzen, ein ander tjust sie mâzen mit zorne unt mit solher kraft, daz ietwederes schaft zebrochen in die lûfte spranc. doch Melianzen misselanc, wan er durch die selben nôt von dem orse viel vür tôt. dar nâch kam her Lirnual, den stach er von dem ors ze tal. hêr Dodines der wilde kam her ûf daz gevilde, sîn sper er ûf im zerbrach, hie mite man in ouch vallen sach von dem orse ûf den plân, daz was im sêlden ê getân, den tac er nû allen reit, daz er mit swerte niht enstreit niwan daz er tjustierte. ein site in hôhe zierte: swelhen er dâ nider stach nâch dem er niht umbe sach, er lie in ligen oder gân, kein âhte wolde er sîn niht hân. des reit er unz ez âbent wart ûf sîner ritterlicher vart, dô schiet er von dem strîte. in dirre meien zîte tete er ûf der heide dem künege harte leide an manegem ûz genomen man der laster dâ von im gewan. nû liefen dâ kroiiere; der wolden wol viere hêrn Keien ors vâhen, sie begunden dâr gâhen
dä er lac versunken unt was vil nähe ertrunken; dö hülfen sie im ûz dem mos unt sazten in üf sin ros unt vuorten hin niemens trût als ein unsûbre brût. dö wart ein michel zuolouf. er sprach „mir ist der selbe kouf ze michelen schaden komen, den maneger hie hât genomen, ich hân in tiur vergolten, vervluochet unt bescholten sî diu muoter diu in truoc! ich hân sîn iemêre genuoc daz er dâ lit vor dem holz. ôwê daz iemêr ritter stolz sîn êre an in wâget! vil sêre mich betrâget sîn in disem lande, wir haben sîn iemêr schândet.“
Nû was ûf âventiure des hoves beste stîure von dem lande geriten. sie vuoren allez ungestriten, daz sie in den stunden niht âventiure vunden. welt ir hoeren wer daz si? daz wären guoter ritter drî: hêr Gâwân unt hêr Iwein, in der selben rotte schein Erec, der ritter guot, sie heten alle einen muot. eins tages an einem morgen dô lâgens unverborgen vor einem walde, der was grôz, dâ ein schoenez wazzer vlôz. Erec, der ritter balt, gie von in in den walt
durch âventiure schowe, dô reit ein juncvrowe zuo im her ein engez phat. gegen der meide er dô trat. „got halte iu reine minne! sît ir ein gotinne“ sprach er „oder sît ir gesant durch âventiure in diu lant? ald obe ir iemens hilfe gert, sô sît ir von mir gewert.“ diu maget wart der rede vrô unt antwurte im alsô: „welt ir dar ane staete sîn, sô enbiutet iu diu vrowe mîn dienest gnâde unde guot.“ er sprach „daz waere ein swacher muot ob ich iu iht gehieze unt daz niht wâr lieze. nû sult ir rîten mit samt mir. hie nâhen bî dâ vinde wir mîn ors unt zwêne ritter guot, den mit willen der muot ûf âventiure stât.“ „got mich her gesendet hât“ sprach diu maget lobesam. bî dem zoume er sî nam unt vuort daz schoene magedîn hin ze den gesellen sîn. die ritter gên ir giengen, die maget sie enphiengen mit worten alsô suoze, daz ir von dem gruoze verswant aller ungemach, dô si die ritter ane sach. dô sprach Erec, der ritter guot, „ich waene daz unser muot sich mit vröuden endet, disiu maget ist gesendet daz si ritter haben sol, sô kan ich uns gerâten wol:
sô sule wir riten mit samt ir, einen boten sende wir ze Britanje in daz lant uns werden ritter nâch gesant von der tafelrunde. uns kumt in kurzer stunde manec ûz genomen ritter guot dem ze strîte stêt sîn muot.“ dô sprach diu maget wol getân „ez endet wol ein man * * * ir ist vater unt muoter tôt, des lîdet si vil michel nôt. nû hœrt die grôzen meine. von dem wîzen steine ist ein grâve genant, des gegent stœzet an ir lant, der kêrte sîne sinne an mîner vrowen minne daz si in ze manne næme. si sprach „daz missezæme mînen hôhen êren der rede wil ich enbêren.“ dô der schenke gehôrte daz daz ir diu rede unmære was, dô kêrte er umbe sînen muot, als der ungetriuwe tuot, unt nam von im miete, daz er ims verriete, er sprach zuo im „herre, mîn vrowe machet verre des wir an si muoten. nû hân ich mich eins guoten bedâht aber hin zuo ir: herre, welt ir volgen mir, sô sult ir ir ze wîbe jehen unt sprecht daz habe ich gesehen unt ziuhet baltliche vür arme unt vür rîche
mit ir ze tädinge, ich behabes iu in dem ringe.“ des ist ein tac gesprochen, der sol in dirre wochen sich enden, des wart ich gesant in des küneges Artus lant. dâ hat ein ritter hiure genomen ein âventiure unt hât ir alsô dâ gephlegen daz ritter tôt sint gelegen wunt unt ouch gevangen; diu ist noch unzergangen, unt durch die selben arebeit ich âne kemphen danne reit.“ Erec fil de roi Lac was der herzoginne mâc. er des vil stille gedagete, dô in diu maget sagete von welcher hande mære si âne kemphen wære von dem lande geriten unde wie dâ was gestriten unt welchen prîs der eine man an manegem ritter dâ gewan. diu sippe wart durch daz verswigen: er hæte ir gerne nû verzigen, ob ez die vuoge hæte daz er'z ân laster tæte. er sprach zer maget „vrowe mîn, moht ez mit keinem vuoge sîn daz wir den kamph zugen vür?“ „anders niht dan daz verlür mîn vrowe ir êr“ so sprach diu maget. er sprach „nû hât ir uns gesaget ein mære daz uns nâhen gât. des gebet mir beide iwern rât, hêr Iwein unt hêr Gâwân, waz mir daz beste sî getân.“ alsô was ir beider rât: „vil wol an iwern êren stât
daz ir iwer wârheit behalt unt vart mit ir durch den walt.“ sie bevulhen gote ein ander dâ, zuo den orsen iltens sâ. hie wart ein scheiden under in: Erec unt daz magedin riten sunder schanden gên ir vrowen lande, hêr Gâwân unt hêr Iwein kêrten gên Britanje heim. sie riten tac unde naht, sô sies an der orse mâht beste state vunden. diz zôch sich gên den stunden daz sich in dem meien diu âventiur wolt zweien. sie kâmen dar als ich iu sage: der meie hete sîner tage dan noch unverslizzen drî. dâ huop sich michel vehten bî. Eins âbents dô man wazzer nam ûf den hof geriten kam hêr Iwein unt hêr Gâwân; daz wart dem kûnege kunt getân, des vrôwet er sich unt was sîn vrô, mit willen enphienc man sie dô. er saget in gar diu mære wie ez ergangen wære. dô sprach der truhsæze „wær er der rede gemæze, sô riwe mich sîn êre von herzen niht sô sêre der tiufel dern her brâhte der nême in in sîn âhte.“ dô sprach mîn herre Walbân „wær ez umb iuch alsô getân! wan ir sit als ir dâ sit: man weiz wol daz ir ie nît
guoten knehten hât getragen.“ Keie sprach „des muget ir dagen, trût mîn, hêr Walbân! ir muget ez âne zorn lân, wan ir sit niht sô gar gescheiden missewende bar von im, ir muget ez übersehen waz im von mir ist geschehen!“ der wehselrede sie geswigen. „unt weste ich reht daz er gesigen solde an allen strîten, ich wil niht langer bîten“ sprach der herre Gâwân, „ich wil morgen in bestân, unt mac ez mit urloube sîn.“ „hie ist ein wunder worden schîn daz ich nie vernomen hân (ich wæne diu werlt wel zergân!), daz hie sô maneges mannes heil ein ritter hin hât sunder teil“ sprach dô mîn herre Iwein. „diu âventiure sî uns zwein erloubet, sît si noch stât unde uns got gesendet hât her ze disen tagen drîn.“ der künec unt diu künegin gâben in urloup unde ir segen unt bâten got ir êren phlegen unt mit gemeinem munde swer dâ gesprechen kunde. dô sprach der herre Gâwân „ein teil ich mich versprochen hân. sît ez nû ist geschehen mir, hêr Iwein, daz verkieset ir: ich hân die âventiure genomen vor iu, des wil ich widerkomen. ir sult von rehte strîten vor, iwer lob vert sô hôhe enbor, daz ich iu der êren wol gân unde ouch gunnen sol.“
Iwein der tugent riche sprach gar zuhtecliche „waz sol disiu rede sîn? weder schimphet ir mîn oder welt ir mich ervarn?“ „dâ vor sol mich bewarn von himele der rîche Krist, wan nû lutzel iemen ist bezzer ritter den ir sît, daz wârt ir ie sunder nît. ouch gan ich iu des siges baz dan mir selben, wizzet daz.“ nû schiet den kriec under in der künec unt diu künegin sô, daz der werde Gâwân den ritter solt von êrst bestân. dô was ir ruowe niht ze lanc. smorgens dô der vogelîn sanc sich mit dem tage erschalte, der künec niht langer twalte, er hiez singen unde enbeiz. der ritter willen er sich vleiz dâ her von jugende sîne tage. nâch der âventiure sage, dô der imbiz wart getân, do bereite sich hêr Gâwân, als er beste mohte unt sînen wirden tohte, sô wart er gezieret unt schône geflorieret als sînen êren wol gezam. der ritter mit dem bocke kam gên im geriten ûf den plân. dô wart des tages von in getân ein sô ritterlicher strît, daz man von der selben zît unz her ze disen tagen noch dâ von hât ze sagen. dô sie ze samene kâmen, daz sie diu wort vernâmen,
dô sprach der herre Gâwân „waz iu der künec haet getân unt diu künegin lobesam [... Überlieferungslücke ...] daz ir ir juncvrouwen hât gevangen hie an dirre stat.“ alsus antwurt er ze hant: „ich hân der âventiure phant behalden hie ûf daz zil, swer si mit ritterschefte wil ledigen, daz was ie mîn ger. welt ir si loesen, sô wol her!“ dô sprach der herre Gâwân „guoten willen ich des hân.“ dô sach man zimier vliegen unt sich zwên ritter smiegen ebene under die schilde, ietweder daz spilde des er wol meister mohte sîn, daz teten sie ouch dâ wol schîn. ir tjoste wart sô veste, daz künde unde geste alle gelîche jâhen die ez hôrten unde sâhen daz niemen künde kiesen gewinnen noch verliesen, sô eben was ir ritterschaft gelîcher kunst gelîcher kraft. dô sie der sper zerbrâchen vil, dô spilden sie ein ander spil: sie zugen von den siten zwei swert. dô wart ein strîten ze rosse herte unt angestlich, doch behuoten sie sich daz sie diu ros dâ bî vermiten, swie wol ir scharfiu swert sniten. ir hurten wart grimmelich, manec slac unde stich gie in von handen obe den schildes randen,
dô sie ein ander drungen. diu swert ofte erklungen ûf ir liechten îsenwât, daz mich des sêre wunderôt wie sie ez erwerten, die winde von den swerten vlugen in dicke vür den munt. dô wart ietwederem kunt des er ê nie gewan künde von keinem man. den langen tac unz an die naht vâhten sie mit solher mâht als sie ez ane hüeben, sie begunden beide üeben ein vil nîtlichez spil, als ich iu nû sagen wil. der ûz erwelte Gâwân wolt den ritter gerne hân des lebens dâ gescheiden (in stuont gelîche beiden der muot als sie gedâhten, dar umb sie beide vâhten unt des niht langer bîten), er stach im in die sîten ein gevüege wunden. an den selben stunden als er der wunden enphant, daz swert sluoc er im von der hant. dô er daz swert von im geschiet, dar ane sûmet er sich niet, vil vaste er sluoc unde stach, daz er nie kein wort gesprach: er wolde im gerne gelten die wunden âne schelten. Gâwân schirmde vaste, er wânde von dem gaste al dâ geligen tôt, er was in angestlicher nôt. er sprach „hât ir durch wirdikeit die âventiure her geleit,
sô missezimet ob ich den lîp von iu als ein ænec wîp âne wer verliesen sol, daz stêt iu anders den wol.“ er sprach „ir sît niht âne wer: mich genüegte ob mir ein hêr disen schaden hæte getân den ich von iu eine hân, ez mac iu wæger niht wesen. nû sichert, obe ir weit genesen.“ hêr Gâwân sprach „ich sol den strît gerne lân, es ist zît.“ sus nam er sîne sicherheit. die stolzen ritter gemeit riten guotlich über velt in des ritters gezelt. dô wart dem ritter Gâwân hôhe êre dâ getân: diu maget in schône umbe vie, si sprach „hêr Gâwân, wie hât sich daz* gevüeget daz ie die liute genüeget iwer manheit unze her?“ er sprach „wer wære aber der dem niemer misselinge? obe ein man betwinge ein lant mit sîner manheit, solt erm dar umbe nemen leit, obe er zeiner stunde bezzern ritter vunde dan er? geloubet daz, daz wære ein wunderlicher haz.“ die zwêne ritter milde schûtten in die schilde ir hamasch unt verbunden hêrn Gauriels wunden. nû sande mîn hêr Iwein sînen boten zuo in zwein, einen knappen kluogen, der kunde rede genuoge.
als er in daz gezelt gie, der wirt in vil schône enphie. er danket im unt sprach ze hant „herre, mich hât her gesant mîn hêr, her Iwein umbe daz: er weste gerne vür baz wie der strît gescheiden wære under iu beiden.“ der ritter sprach zem knehte „geselle, ich sage dir rehte, mir ist der strît nâch heile komen: mir hæt den lîp nâhen genomen der ûz erwelte Gâwân, daz wolde ich niht gerochen hân anders, swie ez noch ergât, dan ez got gevüeget hât, daz ich sîge an im gewan. mir selben ich des iemêr kan gesagen volleclichen danc. daz swert im von der hende spranc; wære ez im alsô beliben, ich wære in arebeit getriben.“ der knappe sprach „herre, ich sol iu sagen, ob ir mirs gunnet wol, daz iu mîn herre enboten hât sîn muot unt sînes leben stat, daz er wil morgen ûf dem plân iuch unt iwern boc bestân.“ der ritter sprach „des bin ich vrô. vart hin unt saget im alsô daz ich sîn gerne warten wil, ez ist gar mînes herzen spil: er unt sîn löwe, ich unt mîn boc. ez wirt lihte valwer loc geroet, ê wir uns scheiden hie. ich gehörte noch gesach in nie mit dem ich gerner, obe ich mac, vertriben morgen den tac.“ hie mite der kneht urloup nam unt seite do er hin wider kam
sîn herren disiu maere daz mîn hêr Gâwân wære gevangen unde wol gesunt, der ritter mit dem bocke wunt ein wênic in die sîten. „unt wil doch morgen strîten mit iu, ob irz geruochet, oder swer ez an in suochet.“ des vröwet sich hêr Iwein, der ie in ganzer tugende schein, er hiez im sînen harnasch vegen, wan er hete sich verwegen eins strîtes, als er dicke phlac. dô der morgenliehte tac belûhte berc unde tal, verwâpent wart er ûf dem sal, ein schoenez ors zôch man im dar. er eine hâte ein ganze schar erzieret dâ er inne schîn, alsô vuor er ze velde hin. dô huop sich mit im ûf die vart der löwe der sîn geselle wart, dô er in dem walde sluoc den wurm; ein ander sie ze trôste erkurn, des half er im verenden sît manegen angestlichen strît. der ritter mit dem bocke kam gegen im harte vreissam, er unt sîn boc ze strîte gar. nû hoeret wie diu selbe schar mit grimme an ein ander vaht den tac nâhe unz an die naht, sie gerten von den tieren vrîdes durch tjustieren an den selben stunden, dô wurden sie gebunden von ir beider knehten, die wîle sie ane vehten mit den swerten wæren daz sie diu tier verbaeren.
sie liezen ritterlîchen gên ein ander strîchen, diu tjust was unvergebene. diu sper mit kreften ebene sancten sie gelîche dô weder ze nider noch ze hô, sie trâfen schôn zen brüsten wol nâch ir gelusten mit ritterlichen witzen. wie künde in vor gesitzen ein man der sin niht künde oder sîn êrst begunde ze rehte dan unde dar? ir hende wurden dicke bar der sper, doch was ir dâ sô vil, daz ich es niht sprechen wil, diu sie verteten in kurzer zît des tages ân ir beider strît. nû hœret wie in dâ geschach. dô der boc sô lange sach den herren ûf der ritterschaft, dô brach er mit grôzer kraft beidiu keten unde bant. dô lie man den löwen ze hant. der boc doch gevurdert sich daz er einen starken stich in vil grôzem zorne stach mit einem horne hern Iweins orse durch daz bein, dô erbeizte hêr Iwein. der ritter mit dem bocke sprach, dô er in ze vüezen sach „ich ze rosse unt ir ze vuoz daz wære ein spot, ich wæne ich muoz zuo iu ûf die erde.“ des vröwet sich der werde, dô er von dem orse saz. der löwe sîn selbes niht vergaz, er erzeicte gâhes sîn gewon: ê er erbeizte dâ von,
dô begreif er sîn genuoc, dem orse zarte er einen buoc von dem lîbe âne wer. got sî der dise ritter ner! sie haben gehilfen angestlich gên ein ander dunket mich, sie zugen zwei scharfiu swert, diu wâren hôhes geltes wert. hie wart ein als herter strît, daz bî dirre liute zît die man nû in dirre werlde siht solher niemer mêr geschiht von wârheit, des verwæne ich mich. manec slac unde stich geschach des tages von in zwein. mit kreften mîn hêr Iwein sluoc ûf den ritter vaste, daz daz viur erglaste unt daz er strûchte ûf ein knie, daz was im ê geschehen nie. des nam der boc guote war, mit zorne huop er sich dar unt stiez den ritter werden nider zuo der erden. dô er den ritter gevalte, der löwe niht langer twalte, er bestuont boc unde man, unz sîn herre ûf kam. doch vurdert er sich schiere ze hilfe sînem tiere, des vorhte er âne werden, vil schiere er von der erden was hîn wider in die nôt, als im sîn manheit gebôt. der löwe was sînes herren vrô, sie hûlfen beide ein ander dô. man sach in grôzem grimme bîzen unde limmen unt ungevuoge stôzen dise kamphgenôzen.
der löwe was al die stunde mit wite ginendem munde mit vür gezogen brâwen mit üz gestracten klâwen in aller der gebaere sam er der tiufel wære. ouch was vil wol dâ vorne der boc mit sînem horne; sîn schimph was unsüeze: im sniten sîne vüeze als ein geslifniu barte, vil ungevuoge unt harte trat er an dem strîte, sô er niht hete wîte, daz er gestôzen künde die vinde als er in gunde, swâ aber er wîte mohte hân dâ künde im niht wider stân. ich gehörte sît noch ê sô angestlichez strîten mê als dô von in vieren, die ritter mit den tieren wâren alsô vreissam, daz ich iu niht gesagen kan ir getât besunder wan sie teten wunder, dô wart gevohten genuoc: der eine stach, der ander sluoc, der dritte stiez, der vierde brach, wie gar unguotlich dem geschach den er bereichte mit der klâ! sus was diu kurzewîle dâ. der löwe lief den ritter an, des er arebeit grôz gewan, unt zarte im sîn îsen, daz dô begunde rîsen diu ringge nider ûf daz gras. der boc der sîn gehilfe was stiez den löwen dô ze tôt. des wart bleich unde rôt
von leide mîn hêr Iwein, im tete daz scheiden under in zwein alsô inneclichen wê, den boc valte er ûf den klê mit einem slage vreissam, daz er dâ sîn ende nam. dô disiu tier gelâgen tôt, dô huop sich angest unde nôt under disen zwein mannen, daz ietweder dannen mit dem leben ie bekam vil michel wunder des nam den künec unt die ez sâhen, gemeine sie des jâhen sie müesten beide sterben, sô grimmic was ir werben, sus wâren disiu tier verlorn. ietweder wolde sînen zorn an dem andern überkomen, daz solde in beiden hân benomen den lîp, wan es niht wolde got daz ez geschehen solde, sus was daz werben under in. die schilde würfen sie nû hin. dô nam mîn herre Iwein daz swert ze sînen henden zwein unt tete swinde siege grôz, alsô tete sîn kamphgenôz. sie sluogen âne guot (?). wær in der lîp sô niht behuot, sie wæren beide tôt gelegen, hêrn Iwein, den werden degen, den rou sîn löwe sô sêre, daz er nâhen lîp unt êre dar umbe hæte verlorn. den ritter hete er erkorn ûf dem helme mit dem slac, daz er nâhen ûf der erde lac unt im daz swert ze stucken spranc. dô muozte er under sînen danc
dem ritter siges jehen, daz was im selden ê geschehen, der künec milde unde guot wart des vil sêre ungemuot, er hiez im sinen harnasch dar bereiten. „swie ez nû gevar, ich wil selbe nû besehen waz hie wunders welle geschehen, sit daz dem ritter niemen kan an dirre zît gesigen an.“ hie wart der künec Artûs verwâpent in sin selbes hûs von maneger vrowen hende, sie strikten imz gebende unt sîn wâfenriemen. ich wæne wol daz iemen gesæhe sider oder ê gewâpent keinen künec mê beidiu mit gunst unt mit gebete als in dô manec vrowe tete. sie gâben alle sîne lide in den wâren gotes vride, sus vuor der künec rîche ze velt vil lobelîche. Nû wart dem ritter kunt getân der in dâ wolde bestân daz wære der künec hêre. er sprach „er sol sîn êre bringen an sîn ende, swer im daz erwende mit willen sunder nôt der muoz lesterlichen tôt in dirre werlde kiesen. ich wolde ê verliesen den lîp, ê ich den künec reine bestüende: ich bin ze kleine sîner tugende unt alle die von den ich hôrte sagen ie. hân ich wider in iht getân des wil ich ze buoze stân
ze sinen hulden, als er wil, des neme selber im ein zil, swie er biutet sô wil ich.“ hie mite entwâpente er sich, sînen helm er abe bant, daz swert leite er von der hant dar zuo schilt unde sper, gegen dem künege reit er âne wer mit blôzer hant. er sprach „herre über diz lant sit ir unde muget ouch wol, ze rehte man iuch êren sol, des bin ich vlîzic sunder wân.“ „dâ hât ir iuch versümet an“ sprach der künec guote mit zornigem muote. „mir geschach nie von einem man sô leide als ir mir hât getân: swaz in mîn hûs gehœret daz hât ir gar zerstœret unt miner êre alsô vil, daz ich benamen niemer wil verklagen unz an mînen tôt. daz tuot mir vil grôzenôt, ich mac niht iwer vriunt wesen, nû wert iuch, obe ir weit genesen.“ dô sprach der ritterliche degen „herre, ich hân mich des verwegen daz ich mit iu niht strîten wil: an iu lît êren sô vil. ich halte hie sunder wer. nû rihtet eine alsam ein her nâch iwem gnâden, des ger ich, unt wizzet, herre, daz ich mich gen iu an nôt niht hân bewart: mir wart geboten disiu vart bî dem lîbe, ez tete mir nôt. ich wolde kiesen den tôt, ê ichz hæte vermiten ichn wære ûf âventiure geriten
in iwer lant. ez stêt mir sô, daz ich kunde niemer werden vrô, hæt ich die âventiure verlân. nû wil ich iu ze buoze stân, dar ûf bin ich komen her. nû vernemet wes ich ger: daz ir mir werbt umb hulde. ich wil vür mine schulde gern: swie mîn vrowe mir gebiutet alsô büeze ich ir.“ dô sprach der künec wandeis ân „ich muoz ez lîhte varn lân daz mir von iu ist geschehen. ouch wil ich der wârheit jehen, ir sît an manheit vollekomen, sô hân ich von iu vernomen alsô bescheidenlichiu wort, daz iu sper unt swertes ort von mir ân zorn sî verzigen: ir welt mit guot mir ane gesigen.“ der künec zuo dem ritter sprach „Vart mit mir, vil guot gemach schaffe ich iu nâch arebeit.“ er sprach „herre, ich bin bereit des unt swes ir ane mich geruochet, daz leiste ich.“ hie mite riten sie von dan in daz gezelt des vrönden man. dô wurdens alle gelîche vrô, sie gedâhten daz ir zorn alsô mit guote wære ergangen. sie wurden wol enphangen durch ir höhe wirdikeit die got an sie hete geleit, ganzer tugende grözen last. mit dem künege reit der gast danne unde sîn gezoc; dô wart der löwe unt der boc gên ein ander verkorn, sie liezen über al den zorn.
sus wart der küneginne maget erlediget, als ich iu saget, von dem künege ân allen strit. der riter hete ir die zît in den êren sô gephlegen, daz ir wunsch unde ir segen sîn vür den selben tac mit triuwen iemêre phlac. dô der künec ze hove kam unde er disen guoten man mit im ze hove brâhte, vil maneger zuo gâhte der den ritter wolde sehen von dem daz wunder was geschehen. sich huop dâ michel schouwen, dô sie die juncvrouwen vuorten vür die künegin. diu hiez si willekomen sîn unt gruozte sunder den gast (ganzer tugende ir nie gebrast): „mit mînem gruoz sî iu genigen mînes rehtes unverzigen.“ dô sprach der ritter guote mit wol verdâhtem muote „ich suoche gnâde vür reht. hân ich oder kein mîn kneht an iwer meide missevarn, des ger ich niht langer sparn, daz heizet rihten hie ze hant, des lîde ich buoze sunder phant.“ diu maget sprach „er hât mîn sô gephlegen, daz ich wil wesen vrô sîns heiles, swâ daz mêret sich; er hât also behalten mich, daz im got ze lône gebe der vröuden krône.“ der künec sprach „ich hân in her beleitet unt bin sîn gewer iwer hulde ân allen haz, durch mîne liebe leistet daz.“
dô sprach diu milde künegin „vrowen zorn sol schiere sîn verlâzen, alsô hoere ich sagen. ich wil niht mêre von im klagen dar ûf daz er mich einer bete gewer vür allez er mir tete.“ dô sprach der tugenthafte man „vrowe swaz ich geleisten kan des wil ich gerne sîn bereit ze dienste iwer wirdikeit. sprechet wes ir an mich gert: mac ez sîn, sô sît ge wert.“ „ich ger von iu ze buoze niht wan geselleclicher phliht, dâ eret ir den künec mite, enphâhet nâch der besten site ein jâr zer tavelrunde stat, daz ist des ich iuch bat.“ „des ir dâ gert des wære ich vrô, moht ich mit volge körnen alsô zuo der tugenthaften schar; sô hân ich leider mich sô gar vor missewende niht bewart. vrowe, ich bin ûf einer vart, daz ich ze buoze sol gestân des ich al dort begangen hân; wirde ich der ledic als ich ger, sô wil ich gerne körnen her, swaz ir mir dan gnâden tuot mac ichz gedienen, daz ist guot. ich man iuch, mîn her Walbân, der triwen die ich von iu hân, her Gâwân unt her Iwein, muget ir des körnen über ein daz ir mit mir von hinnen vart, vor grôzem schaden ir mich bewart.“ die ritter sprâchen alle drî „habet ir leit unt muget es vrî werden, obe wir mit iu varn, sô sule wirs niht langer sparn,
wir sîn mit iu bereit unt leisten unser sicherheit.“ der künec unt diu künegin sprâchen „des enmac niht sîn. ez wæren kranke sinne, ob wir iuch liezen hinne alsô schiere rîten. geruochet hie bîten, unz iu gemach geschæhe, daz daz laster iemen sæhe daz ir alsô hinne vart mit unkreften unbewart.“ dô sprach der ritter wol bedâht „der ruowe ist gnuoge an einer naht, mit iwern hulden lât mich varn, mir schadet sol ichz langer sparn.“ daz urloup wart im gar verseit unt mit bete nider geleit sîn reise küme vier tage. daz lobet er mit solher klage, daz sie des alle wunder nam daz er sô sêre ilte dan. nû schuof man im solh gemach, daz niemen baz geschach al dâ in gastes wîs. des gap er lop unde prîs dem künege unt der künegin unt al der messenîe sîn. Den ritter sule wir ruowen lân, wie aber Erec habe getân welt ir daz hoeren sô gedaget, ez wirt iu hie gesaget. Dô in diu maget brâhte ze lande als si gedâhte, dô wart er schœne enphangen. hie kam gen im gegangen diu herzoginne rîche unt gruozte in tugentliche,
si hiez in willekomen sîn unt sprach „sol mir der swære mîn iemer von iu werden buoz, des neige ich iu ûf den vuoz, unt gebietet al ze hant über liute unt über lant.“ „vrowe, ich vihte niht umb guot, mir lît tegelich mîn muot daz ich durch hôhe wirdikeit allen vrowen sî bereit: swâ sie ze nôt bedürfen mîn dâ wil ich keimphe sîn.“ die naht wart er behalten: solt er ze rehte walten Rôme unt aller rîche, sô wizzet wærlîche man kunde sîn ân allen wân die naht niht baz gephlegen hân. des morgens vil vruo sie bereiten sich dar zuo, dô sanc man ein messe în. Erec ûf heiles gewîn vernams în guoter andâht. dar nâch wart im gebrâht sîn ors unt sîn îsenkleit; dô lêrte în dîu gewonheit daz er schiere was dar în: ûf einen kamph stuont sîn sîn. hie mite kâmens în den kreiz, sie nâmen wîten puneiz. Erec was schône geziert, sich selben er rotieret ' în dem satele vaste. sie wünschten dem gaste gemeine alles guotes, er dühte sie des muotes sô rîche, daz er wære leides ungebaere. der schenke was ein grôzer man, er reit Ereken an
mit ellen unde mit kraft, einen ungevüegen schaft stach er ûf sînem schilde enzwei, des ahte er niht umbe ein ei. Erec sîn sper ouch zebrach, daz man die sprîzen hôhe sach vliegen în die lüfte, nâch ritterlichem gufte wart dâ vil wol gestochen unt manec sper zerbrochen. Erec ûf ritterschaft ein kranz tete wol vierzic sper unganz în alsô rîcher tjuste, daz sie des alle gelüste die în dâ sâhen rîten daz sie în zallen zîten ûf ritterschaft solden sehen, im wart dâ ganzes lobes gejehen. starc unt grôz nam er ein sper, ûf den schenken reit er mit kraft unt mit gewalte, Erec den schenken valte mit orse mit alle, ê er sich von dem valle erholte, hâte em tôt getan, daz wolde er durch sîn êre lân. Erec der werde erbeizte zuo der erde, unz der schenke sich versan, dô lief er Ereken an mit einem scharfen swerte; vür baz den er gerte vant er in Ereken hant. durch die buckel über den rant wart vil gestochen unt geslagen. dewederen ich vür einen zagen wil hân: dâ schein ir beider tât, daz noch dâ von ze rede stât. der grôze schenke vaste sluoc ûf Ereken genuoc,
unz im sin schilt verhowen wart, Erec mit listen hete gespart beidiu kunst unde kraft, do erzeicte er sîne meisterschaft, wan er im durch den helm sluoc den er ûf dem houbet truoc einen vreislichen slac ze tal dâ im daz leben lac. dô der grâve daz ersach wie sînem kemphen geschach, des wart betrüebet im der muot unt gap lîp unde guot in der herzogin gewalt, zir gebôte er sich stalt unt diente ir vür den selben tac. hie mite man Ereken phlac dar nâch unt man im gunde, swaz man im êren kunde erbieten des wart niht verlân, dar zuo wart im ûf getân daz er muoten solde ze lône swaz er wolde. dô sprach der hôchgemuote „hân ich iu ze guote mit mînem dienest iht getân, vil guot reht ich des hân, wan ich bin einer iwer mâc, mîn vater hiez der künec Lac.“ dô sprach diu vrowe ze hant „sô sît ir Erec genant der ouch Mâbonagrine brach die âventiur dâ von geschach vil leide maneger vrowen. daz ich iuch sol schowen des wil ich iemêr wesen vrô.“ vor liebe kuste si in dô unt umbevîe in ze hant. „got hât iuch her gesant mir ze vröuden unt ze trôst, daz ir mich hât erlôst.
er sprach „vrowe, ich bin bereit ze dienest iwer wirdikeit, des kan mich niemen erwenden. hie mite sule wirz enden, ein urloup wolde ich von iu hân, ob ich ze Karidôl den man vinde von dem uns diu maget sô starkiu maere hât gesaget. mich wundert sêre siner kraft unt siner grôzen ritterschaft, im muoz saelde sîn beschert; obe er von Britanje vert der âventiure genôzen hin, daz ist hôher wirde gewin, den ritter mac man gerne sehen.“ diu vrowe sprach „ich wil iu jehen, er ist ein man von hôher âht.“ sus vuor er wol ze mitter naht. Nû reit er naht unde tac, daz er keiner ruowe phlac, unz er ze Karidôle kam. dâ vant er disen guoten man in vil grôzer wirdikeit. die viere heten sich bereit als sie wolden riten, Erec bat sie biten, unz im diu ros geruoten, des begunde er an sie muoten. „unde lât mich kômen ze kraft, sô wil ich durch geselleschaft mit iu riten in daz lant daz Fluratrône ist genant.“ mit guotem willen sie sîn biten drî tage unde riten al vünve von dem lande. swer sie ze rehte erkande, ob er ir tugende solde zeln sô künde er niemer vünve weln der aller herzen waeren sô gar unwandelbaere.
also ritens durch diu lant, im selben was vil unerkant war er sich verrihte. eins tages von geschihte dô wider vuor in ein kneht, des hâr was eben unde sleht, wol halber grâ was im der loc, fritschâl von Gent was sin roc, von Ipper blâ sin schaprûn, er was ein hübescher garzûn. sie gruozten in besunder. er sprach „mich nimet wunder wer iuch her hâbe gesant in diz unkunde lant. ich sihe an vier Schilden ir varet von dem milden unt dem rîchen künege Artûse; ich hân in sînem hûse gesehen solhe êre, daz im iemêr mêre heiles wünschen sol mîn munt. sô ist mir an dem vünften kunt, sîn herre ist von Muntabel unt ist geheizen Gauriel.“ der ritter mit dem bocke sprach „wære ez iu niht ungemach, sô saget uns waz iur ambet sî.“ der knabe was des muotes vrî, er sprach „herre, ich bin ein man der herren guot verdienen kan mit kunste als ich iu sagen sol. ich kan von wâpen sprechen wol unt vuor ie wîte durch diu lant. der ist mir âne mâze erkant wan einz von dem ich hân vernomen, dâ künde ich leider nie în komen, daz ist Fluratrône genant, unt ist dar umbe alsô gewant, daz niemen dar în komen kan (daz geloubet sunder wân)
wan die man gerne dar în lât, bewart ez zallen ziten stât.“ der ritter sprach „geselle guot, nû sage uns von der huot wie daz lant sî bewart unt wâ mite ez sî verspart, daz dâ niemen în kan komen wir hæten gerne vernomen wer die liute în lâze, habe ez keine strâze, die sult ir uns machen kunt: sô gemiete ich iuch ze stunt, daz ir der miete werdet vrô.“ alsô antwurte er im dô: „moht ez iuch iht geprîsen, ich künde iuch wol erwîsen vür wâr an des landes tor. herre, dâ ligent vor zwêne lintwurme, die hebent die sturme. obe ir den gesiget an, sô wizzet daz ich iu enkan gegeven hilfe noch rât, wie ez iu innerhalp ergât des enist mir niht bekant.“ dô sprach hêr Gauriel ze hant „mügt ir uns wîsen an daz tor, lât uns dar în oder dâ vor geschehen swaz got welle, sô wizzet, mîn geselle, ich gibe iu ros unde kleit diu nie wurden âne geleit unt rôtes goldes zehen marc.“ er sprach „diu strâze ist nie sô karc, ich welle iuch wol wîsen dar, unde wizzet vür wâr daz ich iu mit triuwen bin.“ die miete gap er im hin; der [muet] was er vil gemeit, er saz ûf unde reit
der miete ze lône dä hin gen Fluratrône. er vuor mit im, als ich iu sac, unz an den vunfzehenden tac. dô kömens ûf einen berc, dä sähen sie daz mûrwerc dä mite daz lant beslozzen was; ez lûhte sam ein spiegelglas unt was von mermelsteine gar, dä von was ez sô wunnevar. der knabe sprach „hœrt mîn worte. ze Fluratrône die phorte seht ir hie mit ougen an. got gebe iu heil als ich iu gân! wan ich kume dar näher niht, unz ich gesihe waz iu geschiht, daz ich diu maere breite swar mich got [hin] leite.“ hie mite begundens gâhen dä sie die phorten sähen. nû kämen vȏr ûf den wec hêr Gauriel unt Erec. dô sie die wurme hôrten, ir gemach sie störten unt huoben sich zem strîte hêr vür an die wîte. hêr Gauriel, der küene man, reit den grôzen wurm an mit einer vesten tjuste. vil ebene ûf die brüste mit grôzen kreften er in stach, daz daz sper durch in brach vaste zweier ellen lanc. mit zorne er sich umbe swanc, dô nam er ros unde man, balde gâhen er began hin wider gên der mûre. diu vart waere im sûre worden wen hêr Walbân, der kêrte in under ougen an
unt stach in ûf die stirne, vil ebene gên dem hirne het er den stich geneiget. sîn manheit er erzeiget: vil balde er von dem orse spranc, daz sîn halsperc erklanc, er zôch ein swert mit nîde, vil herte was sîn snîde, den wurm er enzwei sluoc; er lie den ritter den er truoc. in tete daz vorder teil die nôt, ê sie ez sluogen ze tôt, daz in sô wê nie geschach, des ietweder verjach. hêr Iwein wart der nôt erlân, Erec unt hêr Gâwân den andern wurm ersluogen tôt, sie liten ouch vil michel nôt. dô die wurme veranten, mit willen sie dô ranten ze der phorten, diu was ûf gespart: si wart vor des nie bewart wan mit der zweier wurme wer. sie ahten niht unt obe ein her vür die phorten kaeme daz ez den sige dâ naeme an die wurme vreissam, die sluogen dô die vier man. dô sie kämen dar in, ein torwarte hinder in beslôz die phorten veste dar ûf daz er die geste behielte ûf ir schände in sîner vrowen lande, dô rehte ersach der hübesche Inan wer den sige dâ gewan, dô wart im harte leit daz er mit in niht vol reit, er gedähte ,wie ist mir geschehen? daz ich daz lant niht sol sehen
daz muoz ich iemere klagen. mir ist geschehen als allen zagen/ also reit er klagende dan, dö enweiz ich war er kam. nu riten die ritter halt durch einen wunneclichen walt wol üf zwo mile. in einer kurzen wile dö kämens an ein wazzer gröz da michel ungeverte vlöz daz wazzer üf unt ze tal; von unden vreislichen schal hörte man dä, stözen manec stein grözen. Erec der guote mit ritterlichem muote sprach ze sinen gesellen „ratet wie wir wellen gebären mit dem vurte.“ sim ros er baz gurte, er sprach „weit irz geruochen, den vurt wil ich suochen uns allen durch geselleschaft, ich getrowe mines rosses kraft ez helfe mirz verenden.“ also wolt er gewenden an daz wazzer vreissam. daz ersach ein weideman bi im in dem walde. er ruofte unt lief balde; dö schrei er so grimme daz sunder siniu stimme erhal in dem wilden tan. Erec gähen began unt vrägte waz im waere, oder obe in iemen jagete, daz er so sere klagete sin leit in unzuhte. er sprach „ichn bin in vluhte.
diu unzuht sult ir übersehen, ich wil iu vür wär jehen war umbe ich sô gâhe: iu was der tôt vil nâhe, wær iwer reise vollekomen, daz hæte iu, herre, benomen ân allen zwîvel daz leben, iu enwelle got gelücke geben, sô kunnet ir niht genesen.“ „nû sage an, wie mac daz wesen?“ „dâ hât geseit ein mære des landes phortenaere daz wir alle sêre klagen: daz die wurme sint erslagen dâ mite daz lant was behuot. des sî wir alle in unmuot. von niemen erz gesagen kan wan daz ez teten vunf man, die sint an disen walt getrabet. der wirt vil schiere umbe habet, ich hân ez wol vernomen. ir muget von dem lande körnen niemer ane gewinne, ir sît beslozzen hinne mit slôze sô gewarsam daz niemen wol zerbrechen kan.“ dô sprach der ritter Erec „geselle, wise uns ûf den wec den sie dâ her ritent: sît daz wir müezen striten, daz ist bi dirre zîte sam lasterlichiu bîte.“ dô sprach der weidenaere „nû hoeret disiu mære. welt ir gerne strîten, sô sult ir balde riten bî dem wazzer hin ze tal, ir hoeret schiere einen schal dâ sie über die brücke varnt unt sich umbe den walt scharnt
vür kumet in die brücke: est bezzer zenge lücke dan an der wite diu wer gên einem kreftigen her. doch sult ir wizzen, herre guot, diu brücke ist zaller zit behuot. ouch ich iu sagen kan: zwêne risen vreissam die hüetent ir nû lange mit ir stahelstangen unt snident zallen ecken. iu eilenden recken gebe got die sigenunft! mich türet iwer herkunft, ir sit sô rehte ritterlich, dar umbe riwet ir mich.“ Erec niht langer beit, ze sînen gesellen er dô reit unt saget in diu maere daz in dem lande wære grôz geschrei über sie. „wir halten al ze lange hie! ein brücke über daz wazzer gât; nû ist des weidemannes rât daz wir dar balde rîten unt an der brücke strîten.“ des volgten sie dô alle unt gähten zuo dem schalle der ûf sie dâ was erhaben, zwêne vreisliche knaben sâhens an der brücke stân, die wolden niemen über lân. der ritter mit dem bocke sprach, dô er die risen ane sach „hie stânt zwei angestlichiu kint diu guot ze mîdenne sint, welnt siez dem lîbe enblanden. sie tragent in den handen zwô ungevüege ruote, die koment in ze guote!“
dô die risen sâhen die ritter zuo in gâhen, der eine vür die brücke gie, den andern er dar ûf lie, daz er der brücke wielte unt daz her enthielte, unz er dise betwinge oder swie im nû gelinge, daz lobet er im mit sicherheit, des muoste er anesehendez leit dulden harte schiere. hêr Gaurjel bat die viere sin gesellen bite hân, er sprach „ir sult mich lân versuochen waz der gröze man uns hie wil gewinnen an.“ dô sprancte er gên dem risen hin. als ichsîn bewiset bin, der rise sprach „wiu häst dû mir? von waz geschihte kumet ir in dise arebeite, daz ir âne geleite sô rehte törlichen vart? ir hât iuch selbe missewart.“ dâ sprach der herre Gauriel „ir saget uns âne nôt ein spel, welt ir uns betwingen, daz muoz mit andern dingen oder hie mit strîte wesen, nû wert iuch, obe ir welt genesen.“ ze stunt dô er daz wort gesprach, mit grimme er ûf den risen brach einen stich unkleine, in dem linken ahselbeine dâ beleip sîn sperîsen. daz vrumte dem wîsen, die tjûste er sô swinde nam, daz der rise vreissam versûmte sich ze lange: ern vâlte mit der stange.
nü erbeizte üf daz lant der ritter, sâ ze hant von der siten er ein swert zôch, dô was er ane gewert nâch sînem willen zaller nôt, manegen wîzen halsperc rôt tet er dô üf der brücke mite in zorne unde in unsîte. der rise sluoc in üf den schilt, daz ez alle die bevilt die den slac sâhen daz er in mohte enphâhen. dem risen er nâch der hende sluoc dô er die stange inne truoc, er sluoc in durch den ellenbogen, dô er die stange hete erzogen, daz si im über den rücke hie. den risen ein tobezorn bevie, er wolde in allen gâhen den ritter zuo im vâhen. hêr Gauriel der reine versneit in an dem beine, daz er niht langer mohte gestân, er viel nider als ein ran. er sprach „hoert, nû lât mich leben. in iwer gnâde ich wil mich geben, des setze ich iu ein werdez pfant mîne triwe in iwer hant.“ dô der ander rise gesach wie sînem gesellen geschach, dô lief er über die brücke, si moht ze kleinen stücken sâ zerrivern von den triten, er lief in swinden unsiten unt sâumte sich niht lange. der rise mit der stange wolde den ritter hân erslagen, daz muoz ich noch hiute klagen, doch was der herre Gauriel ein ritter küene unde snel,
er sluoc dem risen abe ein bein, dô viel er nider als ein stein. nû sluoc der ungevüege man alsô ligende hin dan den ritter üf den rücke mit sînem stahelstücke; waer ez im stênde geschehen, er hæte des tôdes sich versehen. nû sâumte er sich niht langer dô, von dem lîbe schiet er sâ daz houbet mit dem swerte, alsus er vinde werte, dô er nû des strîtes phlac mit dem der dâ tôt gelac, dô wolt diu ganze menigin zuo im über die brücke hin; daz underkâmen schiere dise ritter viere: hêr Iwein unt hêr Gâwân santen von der brücke dan manegen tôten unde wunt der dâ körnen was gesunt, Erec unt hêr Walbân von den wart wunder getân. ze sînen gesellen er dô spranc, sîn swert üf manegem helme erklanc. dô die selben geste den strît alsô veste mâhten under dem here unt mit vreislîcher were sluogen manegen werden man, ein ritter gâhen dô began gen Friapalatûse, zuo der künegin hûse seit er diu selben maere daz an der brücke waere ein harte vreislîcher strît. „unt wizzet, vrowe, daz dâ lît manec edel ritter tôt unt tuont vunf man die nôt,
daz wir des alle müezen jehen die ir gebaerde hân gesehen sie habe der tiuvel her gesant. swem iht anders si bekant der geloube swaz er welle, sie varnt wan von der helle, ir site sint sô vreislîch.“ dô sprach si „nû bescheide mich, unde kanstû mir sagen waz sie an den schilden tragent bescheidenliche.“ „ich enkan. wan under in ist ein man, der hât die risen beide erslagen, des wâpen kan ich wol gesagen: einen boc von golde er treit, sô ist umbe rant geleit ein liste von silber wîz. unt haet got selber sînen vlîz geleit an eines mannes muot dar zuo daz er im wære guot ze kemphen an des tiuvels schar, die manheit hete der selbe gar.“ dô erlachte diu künegin, si sprach „sô sol vil schiere sîn von in gescheiden der strît, des dühte hiute lange zît manegen ritter lobesam dem er sît den lîp benam.“ diu künegin gie ze râte in eine kemenâte mit ir juncvrowen. si sprach „nû muget ir schowen daz man in allen rîchen ein ritter im gelîchen niht vunde als ich mir hân genomen, der ist uns her ze hûse komen unt ist genant her Gauriel. sît ich von im ze Muntabel schiet mit swærem herzeleit, er hât michel arebeit
erliten ê er si komen her. ich bin nû vröuden sîn gewer unt wil in mit guoten siten ergetzen swes er hât erliten.“ si sprach zer meide ze hant diu im dâ vor was bekant „dû solt vil balde rîten dâ die ritter strîtent unde scheide den strît, des ist harte guotiu zît daz man in nû scheide, liebe âne leide sage den gesten unt daz sie sich des besten versehen an allen dingen, in sol hie wol gelingen. dû solt sie vüeren in die stat, schaff in ein wunneclichez bat, mîn herren soltû selbe baden, ergetze in arebeit unde schaden alsô, daz sîn gesellen sehen, daz sie dâ heime mugen jehen, daz er die grözen arebeit an uns niht habe misseleit.“ si gap ir ouch ein salben. „bestrich in allenthalben ainnerlich unt begarwe, sô verwandelt sich sîn varwe unt wirt ein man als ich in sach, dô ich ze jungest wider in sprach. dû solt in bringen badegewant, sage in daz habe ich in gesant, dû solt in bringen ouch vil drât harte guote lînwât von sîden wîz als ein swan gewurht als ich in des gan.‘* hie mite diu juncvrowe gemeit mit dem ritter sâ dô reit vil balde zuo dem strîte. sie kâmen dar bezîte.
sie erbeizten nider ûf daz gras, der strît von in vil schiere was gescheiden gar ze guote. diu maget hôchgemuote underkam die arebeite, si sprach „ich bin geleite der unkunden geste staete unde veste.“ dô si zen herbergen kam unt in den harnasch abe nam, si hiez dâ bat bereiten unt sprach „nâch arebeiten tuot der gemach dem lîbe wol, mit guoten zuhten ich daz sol iu vüegen sô ich beste kan, est mich also geboten an.“ des herren si sich underwant, mit der salben si ze hant allenthalben in bestreich, zir aller angesihte entweich sîn antlutze griwelich, hie verwandelte er sich unde wart der schoenste man des man künde ie gewan. daz sähen die gesellen sîn; ein grôziu zuht wart an in schîn: ir keiner nie kein wort gesprach wan daz er den andern âne sach unt seiten in ir herzen danc gote daz in sô wol gelanc. die naht behielt si sie wol, als man liebe geste sol mit werder handelunge hân, daz wart in allez wol getân, dô diu naht ein ende nam unt der liehte morgen kam, diu künegin hiez machen von wunderlichen sachen ûf dem wunneclichen plan ein gestüele wol getân.
dô daz gestüele was bereit mit micheler richeit, dô hete diu künegin gesant ir boten wîte in daz lant. von ir gebête unt gebote kämen ir der minne gote unt die gotinne die der werden minne wielten in den landen unt alle nôt erkanden diu von sender arebeit [… Überlieferungslücke …] . ritter unde vrowen mohte man wol schowen, geste maneger hande von manegem wilden lande, dâ saz diu künegin gemeit mit micheler wirdikeit. Elseten sandes einen boten daz si die geste hinz den goten brahte, daz sie mohten sehen daz ir gerihte wære geschehen daz im dô wart ûf erleit dô im hulde was verseit. Elate vuort die ritter dan ze hove, als ich vernomen hân. man enphie sie liepliche, diu küneginne riche kustes alle gemeine unde manegiu veine diu mit ir dar komen was ûf daz wunnecliche gras. die gote unt die gotinne erloubten in die minne, ein ander nämen sie zer ê. wâ wart ie vrowen hulde mê sô ritterliche bejaget als von dem ritter ist gesaget ? dar kämen mâge unde man. swaz man an der brücke gewan
schaden der wart dä verkorn, die veigen muosten sîn verlorn. sie verkurn dä ir schulde unt teten im alle hulde, âne haz unt âne nît werte disiu höchzît ich wæne wol vierzehen tage; nâch der âventiure sage was der vröuden sunder zal in dem wunneclichen tal. dô der hof ein ende nam, dô wæren gerne von dan die von der tavelrunde. dô nâmen sie ze stunde hêrn Gauriel besunder. sie sprâchen „uns hât wunder wie iwer wille sî getân, daz sult ir uns wizzen lân. welt ir hie belîben bî disen schoenen wîben unt durch werde minne der schoenen gotinne [… Überlieferungslücke …] sô sult ir uns urloup geben.“ „herre, gedenkt ân ritters muot“ sprach Erec, der ritter guot, [… Überlieferungslücke …] „unt traget noch ritterlichen muot von lande durch lant. ûf âventiure bekant ein man sol ein vrumen lîp niht lân verderben umbe ein wîp noch durch ein liebez anesehen. mir was vil nâhe alsô geschehen in den selben zîten dô ich vrowen Enîten von êrst ze hûse sazte: -ir liebe mich entsazte von manlicher wirdikeit. des was ir mîn laster leit
unt klaget ez durch ir güete; daz enkande mîn gemüete unt vuogte ir michel ungemach, unz ich die triwe an ir sach, des ich dô sicher wolde sîn: sî taete ez durch die minne mîn.“ also antwurte er in: „ich sage iu wes ich vlîzic bîn. mac ich mit guoten minnen ein urloup gewinnen, ich wil mit iu ze lande: mich dûhte ein houbetschande unt unritterlicher sîn schiede ich âne buoze hîn der selben schulde die ich begie, dô ich die juncvrowen vie; . des wil ich ze buoze stân daz ich wider sî hân getân, ez enwende mich den der tôt oder ander êhaft nôt.“ nû giengen sie zer künegin. er sprach „vrowe, sît ich bin sicher iwer hulde gar, obe ich iendert missevar, sol ichs dan aber hân verlorn?“ sî sprach „ez ist gar verkorn allez übel under uns zwein. ich bin des komen über ein mit mîner genôzschaft: diu suone hât nû ganze kraft, ir sult landes unde mîn iemer gewaltic sîn.“ er sprach „genâde, vrowe, als ich iu wol getrowe, ein urloup wolde ich gerne hân. ich hân ein teil missetân : dô ich in mîner buoze schein, dô vuor ich von mînem heim ze Britanje in daz lant; dâ wart ze boten mir gesant
ein juncvrowe, die ich vie unt von mir niht enlie ê diu âventiure ende nam. dô ich hulde dâ gewan, dô bôt ich mine sicherheit der edelen künegin gemeit: gewunne ich iwer hulde, daz ich vür die schulde mich antwurte wider dar unt mit der tugenthâften schar ein jâr zer tavelrunde si; geleiste ich daz, sô bin ich vrî, daz ich niemen niht ensol, sô zime ich hie ze herren wol.“ da sprâchen sin gesellen zuo „des zimet wol daz ein vrowe tuo gên liebem amîse daz in den landen prise sîn êre unt sîne wirdikeit.“ dô sprach diu künegin gemeit „ir sult wizzen, herre mîn, swaz ir welt daz sol sîn.“ ouch bat in diu guote mit einvaltigem muote, sô daz jâr næme ein ende, daz er kæme. „niemen mich erwenden mac vür daz zil einen tac.“ si nam in sunder unde sprach „ich wil dir vüegen ein gemach, herre, durch die liebe dîn. swâ dû an heimelîche mîn gedenkest dâ bin ich dir bî, unt sich daz ez mit vuoge sî in dem mânôt zeiner zît gar tugentlîchen sunder nît.“ si gap im ein vingerlîn. „dâ bî soltû gedenken mîn: ez ist dir guot vür manec nôt unt vür unrehten tôt,
vergift unt aller zouberlist dâ mite gar verdorben ist, sîns steines kraft ist sô guot, er git gelücke unt hôhen muot.“ er was ir liep, daz tete si schîn, si kuste in unt die gsellen sîn. Nû nâmen urloup von dan mit êrēn dise vunf man unt riten durch diu riche harte müezecliche, obe sie in den stunden iht âventiure vunden. nû truoc sie ein strâze getriben wol ze mâze in ein unkundez lant, daz was Pronaias genant, dar inne die heiden lâgen unt grözer unvuor phlâgen: beidiu mit roube unt mit brant heten sie verwuost daz lant unt den künec vermezzen mit here da besezzen. dâ vâhtens manegen herten strît mit den heiden in der zît unt ersluogen ir ân zal ze tôt, dem künege hulfenz üz der nôt. der danket in vil sêre unt erbot in gröze êre, dar zuo liute unde lant sazte er allez an ir hant. mit urloup kêrten sie von dan, als ich ez vernomen hân, harte ritterlîche ze Britanje dem rîche, des milden küneges lande. durch hübescheit man erkande nie künec alsô verre: der tavelrunde herre was ganzer vröude ein bernder ast, keiner tugende im gebrast.
dô sie begunden nähen, dö ilte ein knappe gähen unt saget dem künege maere daz ze lande waere körnen diu geselleschaft die mit âventiure kraft von dem lande wären geladet. er sprach „herre, swaz iu schadet der ritter mit dem bocke hie, dô diu âventiure ergie, daz muget ir gerne übersehen, ein wunder ist an im geschehen: ein vrowe het in vervluochet, diu hät in nü beruochet, daz er ist der schœnste man des man künde ie gewan. ich sage iu endeliche, ein schœne künecriche hät er dar zuo erworben, ob im der lip erstorben in solher mäze waere, daz waere ein übel maere. er hät den wünsch an [dem] guote unt volleist an dem muote, ze wibe ein gotinne, er phliget vil höher minne.“ dô sprach der künec ie sâ „weder ist er beliben dä oder kumet er mit in?“ dô sprach diu milde künegin „er hät gelobet er kaeme her. ich weiz wol, daz leistet er.“ gezogenlichen sprach der kneht „jä herre, min vrowe hät reht. er kumet mit in unde wil hie beliben üf daz zil als ez der tugenthafte man lobete, dô er hulde gewan.“ von den maeren wurden vrö die besten alle geliche dö
unt vrâgten in dô vür baz „wie oder umbe waz moht ir so lange üz gesin?“ „daz sage ich uf die triwe min. ez teten wege lenge unt ander manec gedrenge, grözer äventiure last, der uns seiden gebrast.“ der maere lôst dâ manec man. „ich sage iu wä sie huoben an. ze Fluratröne vor dem tor da lägen zwene wurme vor, die sluogen sie ze tôt, dar näch kämen sie ze nôt an einer brücke mit were von einem kreftigen here; zwene risen ungetel sluoc dä min her Gauriel beide mit siner haut, dô wart ervohten daz lant dä er herre wesen sol. ez wart uns dâ erboten wol.“ er Seite in von der höchzit unt wie ze Pronaias der strit von in verendet waere, dô kämen in dem maere die herren üf den hof geriten. dô wart langer niht gebiten, sie wurden wol enphangen, geloufen unt gegangen wart dô gen in gemeine, gröze unde kleine, unt sageten dö den herren danc daz in so ofte wol gelanc. dô wart der ritter wol gesehen, sie muosten im geliche jehen alte unde junge daz bezzer wandelunge an manne nie geschaehe den man noch lebendic saehe.
Ez was des järes in der zît dô kraft an tagalde lît ze walde unt zuo gevilde mit vederspil mit wilde. der künec unt diu künegin berieten sich ouch under in einer tagalde, daz sie vor dem walde ein gebeize wolden hân unt daz ze liebe wære getân den rittern unt den vrowen. man liez in zwein owen die herberge vähen; sie wären alsô nähen, sie schiet niwan ein rein, der was ze gröz noch ze klein. dâ wart von hunden grözer schal unt hiez in dem vröuden tal. der künec wolde einhalp sîn mit rittern unt diu künegin mit vrowen an der andern sit, sie slizzen wunnecliche ir zît. dô sie kämen vür den walt mit vröuden richer tagalt, als uns hie saget daz mære, vil manec sparwære geworfen wart hin unde dar unt schriren dicke ,wartâ war‘. dô sie über heide riten geschart, über ahsel vil gesprochen wart hübeschlich von minne üz tugentlichem sinne. sus wart von in gebeizet unde üf minne gereizet manec herze in werder aht. sie wären dâ wol siben naht vor dem walde in vröuden zer, nâch wünsche ein üz erweltez her was täglich ingesinde dâ. daz hân wir selden anders wâ
von künegen ê gelesen als ez dâ ist gewesen; künec Artûs der wîse tet nâch der werlde prîse, als ich ez vernomen hân. ich sage iu obe ich kan wie der âventiure geschach. an einem morgen dô man sach die sunne durch die wölken brehen dô gie durch âventiure spehen der ritter mit dem bocke dan in den walt unt zwêne man mit im durch ir hübescheit. von âventiur grôz arebeit vüogt in ein vrömediu geschiht. ouch verswige ich iu niht wer die zwêne mohten sîn. ein ritter hiez Pliamîn unt was ouch dâ ze lande ein gast, keiner tugende im gebrast, unt Erec fil de roi Lac, der ganzer manheite phlac. Dô dise ritter drie mit süezer banekîe giengen in dem walde, dô sâhen sie vil balde an der selben stunde einem leithunde volgen einen alten man. dô er in nâhen began, sie gruozten in guotliche. dô sprach der leides riche „iu sî genâde gesaget.“ „wannen hât ir her gejaget“ sprach Erec ze hande „oder von welhem lande? jaget ir tier oder hirz?“ der alte sprach „geloubet mirz, ob iuch der mære niht bevilt, ich jage ein angestlichez wilt
mit vil grôzen sorgen hiute den vierden morgen.“ die herren vrâgten mære wie sînem geverte wære. „sî ez ûf âventiure wân, daz sult ir uns wizzen lân, ez mac iu lîhte gevrumen unde wol ze staten kumen.“ „got beriet mich nie sô wol“ sprach der jeger, „obe ich sol iu klagen mîne arebeit. ez kam daz mîn herre reit, der grâve von Asteriân, als er ê dicke hete getân, durch jagen in den walt unt vuorte manegen ritter balt unt manec vrowen wol getân an einem morgen dô wir lân nâch einem hirze solden, als wir in gerne wolden mit vröuden gevâhen, dô begunde uns nâhen beidiu laster unde leit. in dem walde zuo uns reit ûf einem wisent ein grôzer man, zangesihte er uns nam mînes herren liebez kint: dâ von er unt die sînen sint mit herzenleide umbvangen. nû lât iuch niht belangen! alsus nam er uns die meit, daz ez manec ritter unverzeit mit den ougen ane sach, daz uns sô leide nie geschach. dô ersprancte manneclich nâch (alsô tete ouch ich) der man als er best mohte, swer dâ ze jagen tohte, er waere kleine oder grôz. dô wart von hunden michel dôz,
wir schuoren alle ûf in, die juncvroun vuorte er et hin. dô mir daz ros abe gie, ûf die vüeze ich mich lie. alsus hân ich her gejeit“ sprach dô der unverzeit, „ich wil ouch niht erwinden, ich muoz si wider vinden.“ die stolzen ritter unverzeit sprâchen „iwer arebeit well wir iu helfen slîzen, nû gê wir enbîzen.“ sie âzen unde ir îsenkleit daz was in schiere bereit, daz schûtten sie vil balde an unt vuoren mit dem jeger dan. dô gap im hêr Gauriel ein ros starc unde snel. dô er sô wol geriten wart, dô rihte er wider ûf die vart. die ritter mit im ritten, nâch âventiure sitten sie jageten starclîche verre in ein rîche vür einen walt wilde. gar âne gevilde was er zweier mîle breit, dâ vor des niemen in reit, daz iemen vernaeme wie ez im dar inne kaeme. vor dem walde ein hûs lac, dâ saz ein wirt der des phlac daz er die geste wol enphie: niemen er dâ vür lie ern bôt die herberge im an, er was ein êren richer man. der selbe wirt eins nahtes gie an ein zinne, dô verlie der tac die naht gewaltic sîn, lieht was des mânes schîn.
dô hörte er jagen al dort her den leithunt. er gedâhte wer mac hie ze dirre zîte jagen?’ er hiez im sîn harnasch tragen, vil snelle was er dar in unt reit ze velde ûf den gewin obe in got beriete hilfe gernder diete. dô hörte er an des hundes schal daz sie her jageten durch ein tal. nû sach in an des mânes schîn der hübesche mîn her Pliamîn, vil ebene hete er in erkorn, er nam daz ors mit den sporn unt sprancte da er den ritter sach; ein halbiu tjuste dô geschach, ie doch tjustierte er wider in. alsô was des wirtes sîn: swelher sîn sper ûf mir vertuot der ist lîhte dester baz gemuot, daz wil ich vüegen âne schaden, ich mac sie dester baz geladen’, mit willen vâlte er alsam, Pliamîn die tjuste nam, daz im daz sper al dâ zebrach. der ritter kerte al dar nâch ûz ûf den sâmen unde hielt. Erec der maneger tugende wielt sprancte, ez was im ungemach, ûf dem wirt sîn sper er brach sô, daz daz sîne ganz beleip. der ritter mit dem bocke treip sîn ors mit swinden siegen, er sprach „sol niemen iuch erwegen?“ sîn sper mit kreften wart vertân, der ritter valles gar erlân. nû kerte er vil balde wider, daz sper lie er vallen nider unt bat sie willekomen sîn. dô sprach der hübesche Pliamîn
„eines ich hie vrâgen muoz. saget an, herre, ist iwer gruoz alle zît âlsus getân? sô sol man in noch baz hân den keinen den ich hân vernomen. ûf waz sît ir ze velde komen? oder wie, ist iu daz sper sô zart? daz hât ir drî tjust bewart! oder kumet ez von ungeschiht?“ er sprach „ich sage iu anders niht wan: mohte ich oder künde ich baz, ich haete iu lihte erboten daz. durch ritters êre ruochet ir hinte belîben bî mir, ich vüege iu sô ich beste mac die ruowe unz an den tac. ob langer ir belîbet hie, sô wizzet daz an gesten nie sô rehte liebe mir geschach.“ der ritter mit dem bocke sprach „des ir uns bitet des solde wir billicher biten dan ir. ritter, swes ir an uns gert des sult ir alles sîn gewert.“ nû vuorte er die herren dan ze hûse, als ich vernomen hân, man schuof in allen den gemach, daz gesten nie baz geschach. dô sie der ritter brâhte heim, wie sîn hübescheit erschein an maneger handelunge! zwô schœne maget junge kâmen harte schiere, mit den giengen viere gelîche wol der selben jugent. ich kan ir schœne unde ir tugent mit rede niht volenden’ wol wan als ich iu bescheiden sol: die zwô wâren des wirtes kint, so enweiz ich wer die viere sint;
ob sie den zwein sint undertân daz schiet niwan ir gân unt mêre, dô sie âzen, daz sie oberhalp sâzen, ir kleit wâren gelîche. ez wart nie künec sô riche, solde er sie hân gesehen, er müeste von schulden jehen er wære dester baz gemuot. daz mir diu rede sô sanfte tuot von in, dâ bi erkenne ich daz: swer sie sach dem was baz. diu kint begunden gâhen zem wirte unde enphâhen sînen harnasch nâch ir site. „nü merket rehte wes ich bite“ sprach der wirt zen kinden, „ir sult iuch underwinden der herren unde enphâhet sie. ich gesach tiurre ritter nie, des wart ich hinte wol gewar; sie sint der tavelrunde schar, man sol sie mit den besten hân, sie varnt ûf âventiure wân.“ der wirt schiere wart gewert des er dô bat unde gert. nü muget ir gerne hœren mir. nü nâmen ie zwô den ir unde vuorten sie ie sâ in eine kemenâten dâ dâ diu edel wirtin saz; diu ouch des niht vergâz, sie enphie die herren als wol, daz man ir unt dem wirte sol heiles wünschen hin ze gote daz si sô gar nâch sîm gebote ir êren unde ir wirdikeit solher vuoge was bereit. der wirt zuo den gesten gie, den sîn tugent niht verlie,
er hiez in trinken bringen, mit hübeschen tädingen kürzte er in die stunde als er beste kunde, unz daz ezzen was bereit, wirtschaft nâch sîner gwonheit: man gap in wilde unde zam. dar nâch der wirt urloup nam der vrâge daz sie im sageten waz sie in daz lant jageten sô sorclîchen balde gên dem versprochen walde. „nü lât iuch niht betriegen. man welle iu dan liegen, sô ist iu vil ungeseit waz man dar inne bejeit weder übel oder guot, trûren oder höhen muot, ernest oder tagalt. er heizet der versprochen walt: ir kam keiner wider nie swaz ir dar in reit oder gie. daz râte ich ûf die triwe mîn, ir lât der reise ein ende sîn.“ sie sprâchen „herre, iwer rât ist als iwern êren stât. uns ist ein juncvrowe genomen unt ist diu in den walt komen, des bewîset uns der hunt. anders ist uns niht kunt umb der juncvrowen arebeit wan daz er ein wisent reit der den schaden hât getân dem grâven von Asteriân ze sîner angesihte. des getrowe wir daz rihte got unt uns wîse dar dâ wir ir werden gewar : sô muoz er si her wider geben oder es gilt unser leben.“
der wirt sprach „ich kenne in wol. er ist ganzer manheit vol unt ist des waldes herre, nâhen unde verre suocht er âventiure. got gebe iu ze stiure sîne hilfe unt sînen segen: diu vart ist ungewegen.“ nû wâren bette dâ bereit diu sie nâch ir arebeit hârte guot dühte. dô sie der tac belühte, sie bereiten sich zer verte, diu reise dühte herte den wirt von tugentlicher art. dô er die ritter von der vart mit rede niht kunde bringen, er sprach „ich wil dingen, ob iu gelinge ûf dem wege, daz ir geruochet mîner phlege unt mich dâ mite êret, sô ir her wider kêret.“ sie lobeten, obe in got den lîp behielte unt wider gæbe daz wîp, daz sie in dan niht vermiten, sus nâmens urloup unde riten. dô sie ze velde kâmen dân, do geriet mit vil klaffen an der hunt nâch sinem tiere. sie wâren harte schiere hin zem walde in die nôt dâ in vil nâhen was der tôt. Nû riten sie vil unlanc des waldes, ê sie ane spranc manec tier unde wurm. einen angestlichen sturm vâhtens guote wîle des waldes wol zwô mîle, daz sie in vester wêre riten unt allez umbe den lîp striten.
dâ sluoc diu ellenthafte schar manegen wurm ungevar, löwen unt leoparte bekumbertens [vil] harte, bern unde wolfe. man seit von Witolfe daz wære ein rise vreissam; dâ hân ich kein gelouben an wan daz er harte schiere von als manegem tiere sunder dankes wære verzert. unt wolt sie got niht hân ernert, sô kundens niemer sîn genesen, got muoz in genaedic wesen der herze noch sô höhe stê, daz ez in über arebeit gê daz sie der werlde lop bejagen. daz bispel vrumet keinen zagen wan dem • der höhes muotes sî. got stêt dem rehten gerne bî, daz erschein wol an dem strîte: sie sluogen sich ze wîte an einen wert wunnevar dâ liezen sie diu tier gar. vil michel wunder sie des nam daz weder tier noch wurm kam zuo in an daz gevilde unt ir doch in der wilde diu gröze unmäze was. sie erbeizten an daz gras unt riten eine kurze stunt, biz der jeger unt der hunt der verte sich verrihten dar ûf sie sich verphlihten. sie jageten an ein swarzez mos dâ weder liute noch ros sich ane erbaldete nie. ein wunder erkum sie hie: swâ man daz mos ruorte, daz bidemet unde vuorte
sich selbe halber mile breit; daz was mit zouber bereit, dâ lac ein hûs inne, dem sach man die zinne glîzen unde schînen von liehten rubînen, karfunkel unt jochande. in disem engen lande sach man die naht sam den tac von dem gesteine daz dar an lac. nû wart der herren innen dort her von der zinnen der wirt von dem walde, er hiez bejagen balde ein ors harte wunneclich. hie mite wâpente er sich unt reit daz ungeverte als einen wec herte, wan eines Salamanders vel was sînes satels panel, des mohte er niht versinken noch in dem mose ertrinken, er hete ouch manheit unde kraft, dô kêrte er gên der ritterschaft. der ritter mit dem bocke sprach. dô er in her varen sach „kumt er her an die wite, er muoz mir pittn strîte. er gesiht noch hiut die stunde, daz slahen zuo dem munde[?] gilt zu allen potten. hæt er den Rîn zuo dem Roten erleitet umbe sîn hûs, er müeste uns doch her ûz dise juncvrowen geben oder ez gêt im an sîn leben.“ starc unt grôz nam er ein sper, ûf den wirt reit er mit kraft unde mit zorn. vil ebene hete er in erkorn,
sô swinde er dô ûf in stach, daz man in dort ligen sach mit orse mit alle; in dem selben schalle twanc er in dô sicherheit, ez waere im liebe oder leit. do diu sicherheit was getân, zuo den herren gie er dan unde enphie sie alle wol, als man edele herren sol, unt vuort sie mit im in daz hûs. der milde künec Artûs wær dâ mit êren gesezzen, swie höhe er was vermezzen, sô schön was ez geziert unde geflorieret von gemaelde unt von golde, als man ez wünschen solde. wie Troje wart zerstoeret, als ir wol hât gehoeret, daz lange beschach hie bevor, dô Paris Achilles [und] Hektor unt manec man verlôs den lîp umb Helenam, daz schoene wîp, daz stuont gemâlet über al in dem wunneclichen sal, den bowet diu gotin Pallas, diu des wirtes muoter was. man schuof den herren guot gemach, über unlange dar nâch dô kam diu juncvrowe. als ein rôse in dem towe sô lühte ir antlutze klâr, wan si was ze wünsche gar. si enphie die herren schône (daz ir got iemer lône!) unt kustes alle besunder unt sprach „ez ist ein wunder daz got mit iu hât geworht daz ir âne alle vorht
in diz lant sit komen unt niht schaden hât genomen. ie doch sô hôrte ich sagen ie daz got die sînen nie verlie.“ nû was daz ezzen bereit, als uns diu âventiure seit, man gap in alles des die kraft daz man dâ heizet wirtschaft, sie trunken unde âzen, ir leides sie vergâzen. der wirt was ein vrumer man, daz schein vil wol dar an, er erbôt in tugent unt êre. des dankten sie vil sêre. des morgens vil vruo sie bereiten sich dar zuo als sie wolden riten unt dâ niht langer biten. der wirt was mit in bereit, er behielt sîn sicherheit. mit urloup vuoren sie von dan vür manegen wurm vreissam, unz sie kâmen alle dar dâ des waldes herre wart gewar der grözen unmäze diu dâ ûf der strâze von den tieren lac tôt, als sie die herren mit nôt sluogen durch ir libes nar. daz gras was allez bluotvar ze beider site umbe sich des waldes einen breiten strich die strâze ûz an die wîte. ich wil von dem strîte sagen unz an mîn ende. „wie erwerten iu die hende die unmäze?“ sprach des landes voget. „unt hæte hie durch gezôget der tiuvel mit sîner manegin, daz wunder moht niht grœzer sîn
den ir hât erzeiget hie: ich sach grœzer wunder nie.“ dô sprach der ritter Pliamîn „sol daz ein michel wunder sîn ob sich ein man des tôdes wert? mit were sich maneger hât ernert in angestlichen nœten! swer vrumen man wil tôten die wîle er unbetwungen stât, sô weiz niemen wiez ergât. man sol gên ungewizzenheit ie mit were sîn bereit, unt geloubet daz der beste list diu were gên boesen liuten ist. hie ist grôz wunder niht geschehen. ez ist ein wunder, welt irs jehen, swâ edel ritter hôchgemuot sô wider ritters orden tuot, daz er âne were den lîp lât gewalten als ein wîp.“ mit sô getâner wehselzâl die herren riten durch daz wal alsô, daz die wurme hie in kein leit geteten nie: daz schuof des wirtes gewalt. doch lâgen sie vil manecvalt bî in in der dicke mit swærem aneblicke in allen den gebæren sam sie tôt wæren. unz in der wirt erloubte, vom leger sich dô stroubte, maneger hant kunder, der in dem walde wunder erzogen was mit listen, daz sie daz lant gevristen gewaltes unt der mære welh leben dar inne wære. diz was gestanden alsô hie, daz man kein âventiure nie
dar inne gesuochte wan die drî. des selben ist ez hiute vrî, der wirt sî lebendic oder tôt, er was erlâzen sît der nôt daz niemen in sîn lant reit wan die drî ritter unverzeit nâch âventiure, als man phlac. Diz zôch sich vaste ûf den tac hin gêgen spaeten undern. den wirt begunde wundern wie in gelungen waere, der ritter êrbaere gie sehen an ein zinne. nû vrôwet sich herze unt sinne do er sach sîn liebe geste. „hiute ist mir der beste tac betaget“ sprach er „den ich gelebet hân unz her: ich sihe die lieben geste mîn sô vrô, in mac gelungen sîn. nû bin ich der nie niht verlôs.“ er stuont unz er vil ebene kôs an der schare vorne den wisent mit dem hôrne unt den ritter der in reit. hin wider er zem bette schreit, er sprach zuo der vrowen „nû wachâ, wiltû schowen!“ si sprach „waz sint diu mære dîn?“ „dâ koment die lieben geste mîn, ich hân sie sunder erkorn. sie hânt gewunnen niht verlorn: der ritter der die maget vie den bringent sie gevangen hie. durch mîne liebe bereite dich zir gruoze, alsô wil ich.“ einem knehte ruofte er dar, er sprach „heiz sich bereiten gar swer ze rosse komen muge alsô, daz er ze bûhurt tuge.“
dô wart bereit schiere vil rîcher baniere, wol vierzic oder mêre durch der geste êre kâmen al dâ ûf den plân. wie künde er sîne geste hân enphangen hübeschlicher? was iemen êren rîcher mit sô vil habe als der wirt, des weiz ich niht, wan daz verbirt ze prüeven aller meister wort. got gebe im noch der saelden hort! dâ wart gebûhurdieret mit orsen wol gezieret von sîdinen decken, diu swert mit scharfen ecken der sach man dâ niht enbart. dâ wart unvuoge gespart; was dâ iemen der ir phlac mit êren, daz man swîgen mac. sus vuorte er sie ze hûse mit baniere sûse. des was der wisent ungewon, dicke schûhte er dâ von, er schûhte maneges schildes blic; nû was sîn sô gewaltic des waldes herre, daz er hie zeltende under im gie. der bûhurt werte unz an daz tor. dô sie erbeizten dâ vor, dô kam diu wirtin gegân mit maneger vrowen wol getân, si nam die meit an die hant unt sprach „ir hât wol gewant nâch êren iwer ungemach, unt geloubet daz ich nie gesach sô liebe geste mêre, daz hûs hât iemêr êre sô rîcher âventiure. got gebe iu ze stiure
ze dirre werlde guot heil dar zuo sînes riches teil. daz heil ist allem heile obe: gotes gunst der werlde lobe.“ waz mac ich nû sprechen mê? wan als wol unde baz dan ê wart ez in erboten dâ. sie wolden morgen ie sâ mit dem tage sîn geriten, do erbat sie küme daz sie biten diu wirtin gewizzen unz daz sie enbizzen. hie was daz danken harte grôz daz von aller munde vlôz, als ir êren wol gezam, mit urloup vuoren sie von dan. ein strâze truoc sie gên dem mer. dâ lâgen zwei grôziu her ze velde in den zîten, als sie wolden strîten. der wilde künec Geldipant wolt mit werlicher hant die gotin betwingen, mit strîte überringen daz si in næme ze man, dâ wolde si niht komen an diu edel gotin Jûnô. si was der herren râtes vrô, si enphie sie als wol als man edel herren sol, si gap in silber unde golt unt alsô hêrlichen solt (daz geloubet sunder wân), daz ich es niht gesagen kan. des hülfen sie ir ûz der nôt, den künec ersluogen sie ze tôt unt sînes heres âne zal, alsô behielten sie daz wal. mit urloup vuoren von dan, als ich ez vernomen hân,
der tavelrunde geverten. mit vröuden sie kêrten ze Britanje dem lande dâ man ir tugent erkande. An einem morgen in der zît sô man zem êzzen wazzer gît kâmens ûf den hof geriten. gar mit tugentlichen siten wurden sie enphangen, hie kam gên in gegangen diu künegin unde ir vrowen gar. daz kint die tugentrichen schar reht als ein engel zierte unt schöne geflorierte. hie mâhte sich ze stunde der jeger mit dem hunde [wider] heim gên Asteriân. ein botenbrôt er gewan: er seite in liebiu maere, daz ir tohter waere ze Britanje in dem lande unt wie er nâch ze phande in den walt was geriten unt wie sêre dô striten die si erlediget hâten. vil guotes sie den bâten, der grâve unt diu graevin satzten allen ir sin unt begunden ahten wie sie sich ûz gemâhten mit rîchem gewande unt wie sie âne schande dem milden künege Artûse schöne kaemen ze hûse. phellel unde sigelât, drîzic ritter einer wât vuort der grâve dâ hin, dô vuorte diu graevin drîzic juncvrouwen, die man vil wol schowen
al da mit êren mohte, als ez in beiden toltte, dô diu reise lustsam hin ze Karidôle kam, dô wurden sie enphangen: ez mohte noch belangen ze sehen den der vröuden gert. wir sin leider ungewert also volkomener tugent, uns enbristet an der jugent daz man von den alten hât ze sagen die wîl diu werlt stât. sie heten kurzewîle vil von in allen ûf daz zil daz der herre Gauriel, ein ritter küene unde snel, urloup dô næme; in dûhte daz er kæme heim ze der jârzît, obe in keiner leie strît irret ûf der strâze. doch was ez in der mâze daz er kûme heim gerîte, unt swaz er vürbaz gebîte, sô müeste er hân misseseit sîner vrowen, daz wære im leit. An einem morgen vrüo dô bereite er sich dar zuo daz er urloup wolde nemen, als er solde. dô der ritter lobesam ûf den hof geriten kam, do besande er die besten die ez kunden unde gesten kunden wol erbieten unt bat sie daz sie im rieten dar zuo: er wolde varen heim, daz was mîn her Îwein, Erec unt hêr Gâwân, Meljanz unt hêr Walbân,
Wigalais unt Tristrant, Garel unt Kalôkreant, Lanzelot unt Parille unt der wilde Dodines, Partriban unt Parcinier kämen dar mit richer zier unt der schoene Parzivâl unt Daniel von Plüental. den herren leget er dô vür vil gar sînes willen kür unt wes er willen hæte. dô kam vrowe Elæte geriten zuo dem ringe, mit vröuden gedinge enphie er schœne die maget unt die von den ich hân gesaget. si seite im liebiu mære, daz sîn vrowe wære siben naht von hûse gevarn „unt wil iu leides gar bewarn ze Friapalatûse in ir eigen hûse. des ist ein tac gesprochen: über drî wochen sult ir ir hie bîten, die wîle niendert rîten, wan, als ich iu geseit hân, swaz iu hie guotes ist getân unt noch geschiht in disen tagen des wil mîn vrowe gnâde sagen dem künege unt der künegin. dar umbe ich her gesendet bin dar zer tavelrunde schar unt al der messenîe gar.“ nû vuorten si die herren hin zem künege unt der künegin schœne unt niht ze drâte zuo ir kemenâte. dâ vunden sies beide mit liebe sunder leide
bi handen bevangen, unt wâren gegangen an ein zinne dâ man sach swaz in dem hove geschach über ein wurzgarten der banekie warten, als ir die ritter phlâgen die selden sich verlâgen durch slâf an dem morgen. man sach sie unverborgen baneken unde strîchen gar geselliclichen, er wære eigen oder vrî, hie zwêne dort drî, hie viere dort ehte. schalleclich gebrehte hôrte man vil kleine, süeze rede reine wart gesprochen unde geseit. nû sach diu künegin die meit mit den herren zuo gân, si bat den künec stille stân. dô sprach gezogenlîche diu milde diu rîche diu reine diu gehiure „dort kumt ein âventiure, die müge wir gerne schowen. ein schoene juncvrowen vüeret harte schœne der wirt von Fluratrône dar zuo der besten ein schar, diu kumt niht âventiure bar.“ dô sprach der künec hêre „von swannen si mir kêre, man sol si schœne enphâhen.“ dô si kam sô nâhen, sie gruozten si beide sô, ez mohte ein trüric herze vrô von dem gruoze worden sîn. des genâdet in daz magedîn,
si sprach „herre unt vrowe, durch iwers hoves schowe ist dicke gearbeitet, den sîn sîn geleitet als er iuch beide hât getân der mac vil gerne bestân an sînem wîsære. wer kunde sunder swære sô grözer vröuden hân gedâht ân got al eine, als er hât brâht an iu über alliu lant? vil manegem dem ir unerkant sît unt der iuch nie gesach unt dem nie liep von iu geschach der vröwet sich der wirdikeit die got an iuch hât geleit. ich sol iu sagen mære genâde lop unt êre von einer edelen künegin der bote ich zuo iu beiden bin: diu wil iuch, künec Artûs, gesehen selbe hie ze hûs unt wil iu danken, obe si kan, daz mînem herren unde ir man ze liebe geschîht hie ze hûs. si ist von Friapalatûs ein edeliu gotinne, durch ir werde minne hât mîn her hêr Gauriel geborn von Muntabel michel arebeit erliten, nû hât erz allez überstriten. si wil in selbe holen hie, swaz er ungemaches ie durch si leit des wil si in ergetzen, alsô stêt ir sin.“ der künec unt diu künegin vröuten sich ûf den gewin. dô über den hof wart vernomen daz âventiure wære komen,
dö gap man wazzer unde enbeiz. Nû vernemet wie man sleiz mit solhen vröuden dâ die zît, daz uns noch hiute vröude gît. dar ane man ouch merken sol daz uns ir tugent alsô wol ze sagen unt ze hoeren tuot unt daz doch niemen kan den muot betwingen, daz wir nâch in leben. waz hât unz die untugent geben daz man sô dicke machet schîn jugent sol daz bezzer sîn' ? Dô der imbîz was getân, dô gie von Asteriân der grâve unt diu grâevîn zem künege unt der künegin mit einer süberlichen schar, sîn ritter unde ir vrowen gar. als sie dar wâren komen unt wolden urloup hân genomen, dô sprach diu künegin hêre „durch mînes hoves êre sult ir die wîle hie bestân.“ dô sprach der von Asteriân daz er vil gerne tæte des in diu vrowe bâete. nû vröuten sich die besten gar daz diu küneginne dar ze komen willen hæte, als in juncvrowe Elaete al dâ kunt hete getân. nû wil ich iuch wizzen lân, nâch der juncvrowen sage über sibenzehen tage breiten sich diu mære. der künegin kameraere unt der marschalc kâmen, sie gerten unde nâmen ze herbergen in ein owe, als in gebôt ir vrowe,
vor einem walde ûf ein gras. in den drîn tagen was von in gebowen, der ez sach daz er anders niht enjach, er muoste in guoter liste jehen. unt wære ez eines jâres geschehen von hundert zimmermannen, sie wolden dar umb dannen komen, daz iemêr mære von in ze sagen wære. an dem vierden morgen vruo dô sach man balde riten zuo ir gesindes eine schar, dô die selben kâmen dar, wol hundert soumære (daz wart ze hove mære) tribens aber vür baz. nû wil ich iu sagen daz waz sie dar ûf brâhten, daz sie sô sêre gähten: guot bettegewæte unt ander hûsgeræte, kophe unt tischlachen von rîchlichen sachen, schüzzel unt becher swære; man sach ir wênic lære, sô daz dâ niht zerunne. vröude unde wunne huop sich dâ als ez solde. von silber unt von golde was allez daz geschirre. dâ gie seiden irre geschirres der truhsæze die wîle daz man æze. dô kom ein schare von kochen; hæt ich der zal gesprochen, sô dûhte iuch an dem mære daz ez gelogen wære. dô kam ein schare ze vuoze, die triben vil unsuoze
vier risen lange. ir starke stahelstange sie über ahsel truogen, daz selbe her sie sluogen mit ir geiselriemen. ein wunder was daz iemen sie des betwingen solde ze varen als er wolde, wan sie wâren wilde. manec wunderlichez bilde vuor in der reise; sie dühte hiute ein vreise ze sehen, swâ sie wæren, mit solhen ungebaeren. man gap in ein halp ûf dem plân dâ sie gemach solden hân unt ir herberge sunder. ez wâren merwunder maneger hande geschaft. man sach dâ wunders die kraft: man sach dâ sumelich gân der doch kein houbet nie gewan unt truogen hürnîne bogen. ich waere sêre an in betrogen! sie schuzzen swaz sie wolden unt swaz sie treffen solden. man sach dâ manegen rûhen man der ander kleit nie gewan niwan als in sîn selbes hâr hete bekleidet über jâr. dô man die wunderliche diet dâ der herberge beriet, dô schuofens ir gemach, dar kam vil maneger der sie sach, als man hie wol hoeren mac. diz zôch sich ûf den tac dô diu küneginne kam mit einer reise lobesam. man kôs ir reise vaste wol ûf eine raste,
swer si in der werlde sach, daz der anders niht enjach wan daz er wol geswüere daz daz gestirne vüere unt ûf der erde swebete geliche als ez lebete. ir schare was lanc unde breit, sie vuorten harte richiu kleit. … dô diu vrowe stæte kam geriten ûf den plân unt sich dâ nider hete gelân, dô vuor der künec Artûs unt diu künegin von hûs mit rittern unt mit vrowen enphâhen unde schowen die unkunden geste. sie vuorten von der veste wol tüsent ritter oder mê gên der vrowen ûf den klê. hie mite was ouch hêr Gauriel … dâ geschach guotlicher nie umbevâhen ritters lîp dan in daz minnecliche wîp umbevîe unt kuste. der gebærde geluste vil manegen ritter der ez sach, daz ez im in sîn herze brach. nü hœret rehte: in swelher zer ze samen kâmen disiu her beidenthalp ân allen haz, doch schieden sie sich michel baz. man gap dâ grôze wirtschaft unt alles des die überkraft des man zuo der werlde gert, des wart man dâ gewert. wir müezen manegez verdagen. man hôrte singen unde sagen unt aller hande seitenspil unt ander kurzewîle vil.
sich huop bûhurt unde tanz, getriwelichen vröude ganz, daz man unz an den suontac wol dâ von sagen mac. sich huop dâ maneger hande leben, man sachs in hôhen vröuden sweben. diu edel küneginne diu rihte dar ir sinne daz si den hof geêrte, ir selbes lop mêrte, wan si mâhte vaste laere die hundert soumaere der wir ê gewuogen die daz geschirre truogen. dô hiez si teilen âne zil rîcher kleinaete vil. diz werte vierzehen tage; nâch der âventiure sage swes iemen bat daz was getân, dô nam von Asteriân der grâve unt sîn gesinde urloup mit sîme kinde unt vuor in vröuden ze hûs, dô vuor gên Friapalâtûs diu edel küneginne mit vröuden gewinne. dô sie urloup nâmen unt heim ze lande kâmen, dô lebten sie mit êren.
Diz ruoche got gemêren den kristen ûf der erde, dem man nâch sînem werde: swenn sîn lîp ûf erstât, daz dem der sêle werde rât.