Iwein

I W E I N. Swer an rehte güete wendet sîn gemüete, dem volget sælde und êre. des gît gewisse lêre küne c Artûs der guote, der mit rîters muote nâch lobe kunde strîten. er hât bî sînen zîten gelebet alsô schône daz er der êren krône dô truoc und noch sîn name treit. des habent die wârheit sîne lantliute: sî jehent er lebe noch hiute: er hât den lop erworben, ist im der lîp erstorben, sô lebt doch iemer sîn name. er ist lasterlicher schame iemer vil gar erwert, der noch nâch sînem site vert.

ein rîter, der gelêret was unde ez an den buochen las, swenner sîne stunde niht baz bewenden kunde, daz er ouch tihtennes pflac (daz man gerne hœren mac, dâ kêrt er sînen vlîz an: er was genant Hartman und was ein Ouwære), der tihte ditz mære. Ez het der küneec Artûs ze Karidôl in sîn hûs zeinen pfingesten geleit nâch rîcher gewonheit ein alsô schœne hôchzît daz er vordes noch sit deheine schœner nie gewan. deiswâr dâ was ein bœser man in vil swachem werde: wan sich gesament ûf erde bî niemens zîten anderswâ sô manec guot ritter alsô dâ. ouch wart in dâ ze hove gegebn in alle wîs ein wunschlebn: in liebte den hof unde den lîp manec maget unde wîp, die schœnsten von den rîchen. mich jâmert wærlichen, und hulfezt iht, ich woldez clagen, daz nû bî unseren tagen selch freude niemer werden mac der man ze den zîten pflac.

doch müezen wir ouch nû genesn. ichn wolde dô niht sîn gewesn, daz ich nû niht enwære, dâ uns noch mit ir mære sô rehte wol wesen sol: dâ tâten in diu were vil wol. Artûs und diu kûnegin, ir ietwederz under in Sich ûf ir aller willen vleiz. dô mân des pfingestages enbeiz, männlich im die freude nam der in dô aller beste gezam. dise sprâchen wider diu wîp, dise banecten den lîp, dise tanzten, dise sungen, dise liefen, dise sprungen, dise schuzzen zuo dem zil, dise hôrten seitspil, dise von seneder arbeit, dise von grôzer manheit. Gâwein ahte ûf wâfen: Keû legt sich slâfen ûf den sal under in: ze gemache ân êre stuont sîn sin. der kûnec und diu kûnegin die heten sich ouch under in ze handen gevangen und wâren gegangen in eine kemenâten dâ und heten sich slâfen sâ mê durch geselleschaft geleit dan durch deheine trâkheit.

sie entsliefen beidiu schiere. dô gesâzen ritter viere, Dodines und Gâwein, Segremors und Îwein, (ouch was gelegen dâ bî der zuhtlôse Keiî) Ûzerhalp bî der want: dez sehste was Kâlogrêant. der begunde sagen ein mære, von grôzer sîner swære, von cleiner sîner vrümekheit. dô er noch lützel het geseit, do erwachte diu künegin und hôrte sîn sagen hin in, und lie ligen den künce ir man unde stal sich von im dan, und sleich zuo in sô lise dar daz es ir kein wart gewar, unz si in kom vil nâhen bî und viel enmitten under si. niuwan ein, Kâlogrêant, der spranc engegen ir zehant, er neic ir unde enpfienc si. do erzeicte aver Keiî sîn alte gewonheit: im was des mannes êre leit, unde beruoft in drumbe sêre unde sprach im an sîn êre. er sprach 'her Kâlogrêant, uns was ouch ê daz wol bekant daz undr uns niemen wære sô höfsch und als êrbære

als ir wænet daz ir sît. des lâzen wir iu den strit von allen iweru gesellen, ob wir selbe wellen: Iuch bedunkt man süln iu lâ. . ouch solz mîn vrouwe dâ vür hân: sî tæte iu anders gewalt: iwer zuht ist sô manecvalt, und ir dunket iuch sô volkomen. deiswâr ir hât iuch an genomen irne wizzet hiute waz. unser kein was sô laz, heter die künegin gesehn, im wær diu selbe zuht geschehn diu dâ iu eime geschach. sit unser keiner sîne sach, od swie wir des vergâzen, daz wir stille sâzen, dô möht ir ouch gesezzen sîn.' dô antwurt im diu künegin. sî sprach 'Keiî, daz ist dîn site, und enschadest niemen mê dâ mite danne dû dir selbem tuost, daz dû den iemer hazzen muost deme dehein êre geschiht. dû erlâst dîns nîdes niht daz ingesinde noch die geste: der bœste ist dir der beste und der beste der bœste. eins dinges ich dich trœste, daz man dirz immer wol vertreit. daz kumt von dîner gwonheit,

daz dus die bœsen alle erlâst und niuwan haz ze den vrumen hâst. Dîn schelten ist ein prîsen wider al die wîsen. dune hetest ditz gesprochen, dû wærst benamen zebrochen; wand wir daz wizzen vil wol daz dû bist bitters eiters vol, dâ dîn herze inne swebt und wider dînen êren strebt. Keîî den zorn niht vertraoc, er sprach 'vrouwe, es ist genuoc. ir habt mirs joch ze vil geseit: und het irs ein teil nider geleit, daz zæme iuwerm namen wol. ich enpfâhe gerne, als ich sol, iwer zuht und iuwer meisterschaft: doch hât sî alze grôze kraft. ir sprechet alze sêre den rittern an ir êre. wir wârens von iu ungewon: ir werdet unwert dervon. ir strâfet mich als einen kneht. gnâde ist bezzer danne reht. ichn habe iu selhes niht getân, ir möhtet mich wol leben lân: und wær mîn schulde grœzer iht, so belibe mir der lîp niht. vrouwe, habet gnâde mîn, und lât sus grôzen zorn sîn. iwer zorn ist ze ungenædeclich: nien brechet iuwer zuht durch mich.

Mîn laster wil ich vertragen, daz ir rnochet gedagen. ich kume nâch mînen schulden gerne ze sînen hulden: nû bitet in sîn mære, des ê begonnen wære, durch iuwer liebe volsagen. man mac vil gerne vor iu dagen. sus antwurte Kâlogrêant. 'ez ist umb iuch alsô gewant dazz iu niemen merken sol, sprecht ir anders danne wol. mir ist ein dinc wol kunt: ezn sprichet niemannes munt wan als in sîn herze lêret. swen iuwer zunge unêret, dâ ist daz herze schuldec an. in der werlde ist manec man valsch und wandelbære, der gêrne biderbe wære, wan daz in sîn herze enlât. swer iuch mit lêre bestât, deist ein verlorn arbeit. irn sult iwer gewonheit durch nieman zebrochen. der humbel der sol stechen: ouch ist reht daz der mist stinke swâ der ist: der hornûz sol diezen. ichn möchte niht geniezen Iwers lobes und iuwer vriuntschaft: wan iuwer rede hât niht kraft:

ouch wil ich niht engelten swaz ir mich muget schelten. war umbe solt ir michs erlân? ir hât ez tiurerm man getân. doch sol man ze dirre zît und iemer mêre swâ ir sît mînes sagennes enbern: mîn vrouwe sol mich des gewern daz ichs mit hulden über sî. dô sprach der herre Keiî 'nû enlânt disen herren mîne schulde niht gewerren: wan dien hânt wider iuch niht getân. mîn vrouwe sol iuch niht erlân irn saget iuwer mære; wan ez niht reht wære, engultens alle sament mîn. dô sprach diu guote künegîn 'herre Kâlogrêant, nû ist iu selbem wol erkant, und sît erwahsen dâ mite, daz in sîn bœse site vil dicke hât entêret und daz sich niemen kêret an deheinen sînen spot. ez ist mîn bete und mîn gebot daz ir saget iuwer mære; wandez sîn Freude wære, Heter uns die rede erwant.' dô sprach Kâlogrêant 'swaz ir gebietent, deist getân. sît ir michs niht welt erlân,

so vernemet ez mit guotem site, unde mietet mich dâ mite. ich sag iu deste gernier vil, ob manz ze rehte merken wil. man verliuset michel sagen, man enwellez merken unde dagen. manec biutet d'ôren dar: ern nemes ouch mit dem herzen war, sone wirt im niht wan der dôz, und ist der schade alze grôz: wan sî vliesent beide ir arbeit, der dâ hœrt und der dâ seit. ir mugt mir deste gernier dagen, ichn wil iu keine lüge sagen. ez geschach mir, daz ist wâr, (es sint nû wol zehen jâr) daz ich nâch âventiure reit, gewâfent nâch gewonheit, ze Breziljân in den walt. dâ wârn die wege maneevalt: dô kêrt ich nâch der zeswen hant ûf einen stîc den ich vant. der wart vil rûch und enge: durch dorne und durch gedrenge sô vuor ich allen den tac, daz ich vür wâr wol sprechen mac Daz ich sô grôz arbeit nie von ungeverte erleit. und dô ez an den âbent gienc, einen stîc ich dô gevienc: der truoc mich ûz der wilde, und kom an ein gevilde.

dem volgte ich eine wile, niht vol eine mîle, unz ich eine burc ersach: dar kêrt ich durch mìn gemach. ich reit engegen dem bürgerstor: dâ stuont ein rîter vor. er hete, den ich dâ stênde vant, einen mûzerhabech ûf der hant: ditz was des hûses herre. und als er mich von verre zuo ime sach rîten, nûne mohter niht erbîten und liez mir niht die muoze daz ich zuo sîme gruoze volleclîche wære komen, erne hete mir ê genommen den zuom unde den stegereif. und alser mich alsô begreif, do enpfîenc er mich als schône als ime got iemer lône. nû hienc ein tavele vor dem tor an zwein ketenen enbor: dâ sluoc er an daz ez erhal und daz ez in die burc erschal. Dar nâch was vil unlanc unz daz dort her vür spranc des wirtes samnunge, schœne unde junge junkherren unde knehte, gecleidet nâch ir rehte: diu hiez mich willekomen sîn. mînes rosses unde mìn

wart vil guot war genommen. und vil schiere sach ich komen, dô ich in die burc gienc, eine juncvrowen diu mich enpfienc: ich gihe noch als ich dô jach, daz ich nie schœner kint gesach. diu entwâfente mich. und einen schaden clage ich (des enwunder niemen), daz der wâfenriemen alsô rehte lützel ist, daz sî niht langer vrist mit mir solde umbe gân. ez was ze schiere getân: ichn ruochte, soldez iemer sîn. ein scharlaches mântelîn daz gap sî mir an. ich unsæliger man, daz sî mîn ouge ie gesach, dô uns ze scheidenne geschach. wir zwei beliben eine. do verstuont sich wol diu reine Daz ich gerne bî ir was: an ein daz schœneste gras daz diu werlt ie gewan, dâ vuorte sî mich an, ein wênec von den liuten baz. daz liez ich weizgot âne haz. hie vant ich wîsheit bî der jugent, grôze schœne und ganze tugent. sî saz mir güetlichen bî: und swaz ich sprach, daz horte sî

und antwurt es mit güete. ezn betwanc mîn gemüete unde bekumbert mînen lîp nie sô sêre magt noch wîp und entuot ouch lîhte nimer mê. ouwê immer unde ouwê, waz mir dô vreuden benam ein bote der von dem wirte quam! der hiez uns beidiu ezzen gân: dô muose ich rede und Freude lân. dô ich mit ir ze tische gienc, der wirt mich anderstunt enpfenc. ezne gebôt nie wirt mêre sîme gaste grœzer êre. er tet den stîgen und den wegen manegen güetlichen segen, die mich gewîset heten dar. hie mite sô übergulterz gar, daz er mich ir nie verstiez und mich sô güetlichen liez Mit der juncvrouwen ezzen. ouch enwart dâ niht vergezzen wirn heten alles des die kraft daz man da heizet wirtschaft. man gap uns spîse, diu was guot, dâ zuo willigen muot. dô wir mit vreuden gâzen und dâ nâch gesâzen, und ich im hâte geseit daz ich nâch âventiure reit, des wundert in vil sêre, und jach daz im nie mêre

dehein der gast wære komen von dem er hæte vernomen daz er âventiure suochte, und bat daz ich des geruochte, swenn ich den wec dâ wider rite, daz ich in danne niht vermite. dâ wider het ich keinen strît: ich lobet ez und leistez sit. dô slâfennes zît wart, do gedâht ich an mîne vart. und dô ich niene wolde noch beliben solde, dô wart der rîterlichen magt von mir gnâde gesagt ir guoten handelunge. diu süeze und diu junge diu lachet unde neic mir. seht, dô muose ich von ir. Daz gesinde daz bevalch ich gote: ze mînes wirtes gebote dâ bôt ich mich vil dicke zuo. dan schiet ich und reit vil vruo ze walde von gevilde. dâ râmet ich der wilde und vant nâch mitten morgen in dem walde verborgen ein breitez geriute âne die liute. dâ gesach ich mir vil leide eine swære ougenweide, al der tiere hande die man mir ie genande,

vehten unde ringen mit eislichen dingen. dâ vâhten mit grimme mit griulîcher stimme wisente und ûrrinder. dô gehabt ich hinder, und rou mich daz ich dar was komen. und heten sî mîn war genommen, sone triut ich mich niht erwern, wan ich bat mich got genern. vil gerne wold ich von dan. do gesach ich sitzen einen man in almitten under in: daz getrôste mir den sin. dô ich aver im nâher quam und ich sîu rehte war genam, Dô vorht ich in alsô sêre als diu tier, ode mêre. sîn menneschlich bilde was anders harte wilde er was eim Môre gelich, michel unde als eislich daz ez niemen wol geloubet. zwâre ime was sîn houbet grœzer danne eim ûre. ez hete der gebûre ein ragendez hâr ruozvar: daz was im vast unde gar verwalken zuo der swarte an houbet unde an barte, sîn antlütze wol ellen breit mit grôzen runzen beleit.

ouch wâren ime diu ôren als eime walttôren vermieset zewâre mit spannelangeme hâre, breit alsam ein wanne. dem ungevüegen manne wâren granen unde brâ lanc rûch unde grâ; diu nase als eim ohsen grôz, kurz, wît, niender blôz: daz antlütze dürre, vlach; (ouwî wie eislicher sach!) diu ougen rôt, zornvar. der munt hât ime gar Bêdenthalp der wangen mit wite befangen. er was starke gezan, als ein eber, niht als ein man: ûzerhalp des mundes tür ragten si im her vür, lanc, scharpf, grôz, breit. im was dez houbet geleit daz ime sîn rûhez kinnebein gewahsen zuo den brüsten schein. sîn rüke was im ûf gezogen, hoveroht und ûz gebogen. er truoc an seltsæniu cleit: zwô hiute het er an geleit: die heter in niuwen stunden zwein tieren abe geschunden. er truoc ein kolben alsô grôz daz mich dâ bi im verdrôz.

dô ich im alsô nâhen quam daz er mîn wol war genam, zehant sach ich in ûf stân unde nâhen zuo mir gân. weder wider mich sîn muot wære übel ode guot, desn weste ich niht die wârheit, und was iedoch ze wer bereit. weder erne sprach noch ich. do er sweic, dô versach ich mich daz er ein stumbe wære, und bat mir sagen mære. Ich sprach 'bist übel ode guot?' er sprach 'swer mir niene tuot, der sol ouch mich ze vriunde hân.' 'mahtû mich danne wizen lân, waz créatiure bistû?' 'ein man, als dû gesihest nû.' 'nû sage mir waz dîn ambet sî.' 'dâ stên ich disen tieren bî.' 'nû sage mir, tuont sî dir iht?' 'sî lobtenz, tæt ich in niht.' 'entriuwen vürhtent sî dich?' 'ich pflege ir, und sî vürhtent mich. als ir meister unde ir herren.' 'sage, waz mac in gewerren dîn meisterschaft und dîn huote, sîne loufen nâch ir muote ze walde und ze gevilde? wan ich sihe wol, sî sint wilde, sine erkennt man noch sîn gebot. ich wânde niht daz âne got

der gewalt iemen töhte dêr sî betwingen möhte âne sloz und âne bant.' er sprach 'mîn zunge und mîn hant, mîn bete unde mîn drô, die habent mirs gemachet sô daz sî bibende vor mir stânt und durch mich tuont unde lânt. swer ouch anders under in solde sîn als ich bin, Der wære schiere verloren.' 'herre, vürhtents dinen zorn, so gebiut in vride her ze mir.' er sprach 'niene vürhte dir: sine tuont dir bî mir dehein leit. nû hân ich dir vil gar geseit swes dû geruochtest vrâgen: nune sol dich niht betrâgen dûne sagest mir waz dû suochest. ob dû iht von mir geruochest, daz ist allez getân.' ich sprach 'ich wil dich wizzen lân, ich suoche âventiure.' dô sprach der ungehiure 'âventiure? waz ist daz?' 'daz wil ich dir bescheiden baz. nû sich wie ich gewâfent bin: ich heize ein rîtr und hân den sin daz ich suochende rîte einen man der mit mir strîte, der gewâfent sî als ich. daz prîset in, ersleht er mich:

gesige ich aber im an, sô hât man mich vür einen man, und wirde werder danne ich sî. sî dir nû nâhen ode bî kunt umb selhe wâge iht, daz verswic mich niht, unde wîse mich dar, wand ich nâch anders nihte envar.' Alsus antwurt er mir dô. 'sît dîn gemüete stêt alsô daz dû nâch ungemache strebest und niht gerne sanfte lebest, ichn gehôrt bî mînen tagen nie selhes niht gesagen waz âventiure wære: doch sag ich dir ein mære, wil dû den lîp wâgen, sone darftû niht mê vrâgen. hie ist ein brunne nâhen bî über kurzer mile drî: zwâre unde kumestû dar und tuostû ime sîn reht gar, tuostû dan die wider kêre âne grôze dîn unêre, sô bistû wol ein vrum man: dâne zwîvel ich niht au. waz vrumt ob ich dir mêre sage? ich weiz wol, und bistû niht ein zage, so gesihestû wol in kurzer vrist selbe waz diu rede ist. noch høre waz sîn reht sî. dâ stêt ein capelle bî:

diu ist schœne und aber cleine. kalt unde vil reine ist der selbe brunne: in rüeret regen noch sunne, nochn trüebent in die winde. des schirmet im ein linde, Daz nie man schœner gesach: diu ist sîn schate und sîn dach. si ist breit hôch und alsô dic daz regen noch der sunnen blic niemer dar durch kumt: irn schadet der winter noch envrumt an ir schœne niht ein hâr, sine stê geloubet durch daz jâr. und ob dem brunne stêt ein harte zierlicher stein, undersatzt mit vieren marmelinen tieren: der ist gelöchert vaste. ez hanget von eim aste von golde ein becke her abe: jane wæn ich niht daz iemen habe kein bezzer golt danne ez sî. diu ketene dâ ez hanget bî, diu ist ûz silber geslagen. wil dû danne niht verzagen, sone tuo dem becke niht mê, giuz ûf den stein, der dâ stê, dâ mite des brunnen ein teil: zwâre, sô hâstû guot heil, gescheidestû mit êren dan. bin wiste mich der waltman

einen stîc ze der winstern hant: ich vuor des endes unde vaut der rede eine wârheit als er mir hâte geseit, Und vant dâ grôz êre. man enhœret nimer mère, diu werlt stê kurz ode lanc, sô wûnneclîchen vogelsanc als ich ze der linden vernam, dô ich derzuo geriten quam. der ie gewesen wære ein tôtriuwesære, des herze wære dâ gevreut. sî was mit vogelen bestreut daz ich der este schîn verlôs und ouch des loubes lützel kôs. dâ wâren niender zwêne gelich: ir sanc was sô mislich, hôch unde nidere. die stimme gap hin widere mit gelîchem galme der walt. wie dâ sanc sange galt! den brunnen ich dar under sach, und swes mir der waltman jach. ein smâreides was der stein: ûz iegelîchem orte schein ein alsô gelpfer rubîn, der morgensterne möhte sîn niht schœner, swenner ûf gât und in des luftes trüebe lât. dô ich daz becke hangen vant, dô gedâht ich des zehant,

sît ich nâch âventiure reit, ez wære ein unmanheit Obe ich dô daz verbære ichn versuochte waz daz wære; und riet mir mîn unwîser muot, der mir vil dicke schaden tuot, daz ich gôz ûf den stein. do erlasch diu sunne diu ê schein, und zergiene der vogelsanc, alss ein swarz weter twanc. diu wolken begunden in den selben stunden von vier enden ûf gân: der liehte tac wart getân daz ich die linden kûme gesach. grôz ungnâde dâ geschach. vil schiere dô gesach ich in allenthalben umbe mich wol tûsent tûsent blicke: dar nâch sluoc alsô dicke ein alsô krefteger donreslac daz ich ûf der erde gelac. sich huop ein hagel unde ein regen, wan daz mich der gotes segen vriste von des weteres nôt, ich wær der wîle dicke tôt: daz wart alsô ungemach daz der walt nider brach. was iender boum dâ sô grôz daz er stuont, der wart blôz und loubes alsô lære als er verbrennet wære.

Swaz lebte in dem walde, ez entrünne danne balde, daz was zehant tôt. ich hete von des weteres nôt mich des lîbes begebn unde enaht niht ûf mîn lebn; und wære sunder zwîvel tôt: wan der hagel und diu nôt in kurzer wile gelac, und begunde liechten der tac. dô diu vreise zergiene und ez ze wetere geviene, wær ich gewesen vür wâr dî dem brunnen zehen jâr, ichn begübbe in nimer mê: wan ich hetez baz gelâzen ê. die vogeley kômen widere: ez wart von ir gevidere diu linde anderstunt bedaht: sî huoben aber ir süezen braht und sungen verre baz dan ê. mirn wart dâ vor nie sô wê, desn wær nû al vergebben. alsus het ich besezen daz ander pardise. die selben freude ich prîse vür alle die ich ie gesach. jâ wând ich freude ân ungemach unangestlichen imer hân: seht, dô trouc mich mîn wân. Mir nâhte laster unde leit. nû seht wâ dort her reit

ein rîter: des geverte was sô grimme und alsô herte daz ich des wânde ez wære ein her. iedoch bereite ich mich ze wer. sîn ros was starc, er selbe grôz; des ich vil lützel genôz. sîn stimme lûte sam ein horn: ich sach wol, ime was an mich zorn. als ab ich in einen sach, mîn vorhte und mîn ungemach wart gesenftet iedoch, unde gedâht ze lebenne noch, und gurte mîne rosse baz. dô ich dâ wider ûf gesaz, dô was er komen daz er mich sach. vil lûte rief er unde sprach, do er mich aller verrest kôs 'rîter, ir sit triuwelôs. mirn wart von iu niht widerseit, und habent mir lasterlichez leit in iuwer hôchvart getân. nû wie sihe ich mînen walt stân! den habent ir mir verderbet und mîn wilt ersterbet und mîn gevügele verjagt. iu sî von mir widersagt: ir sult es mir ze buoze stân ode mir den lîp lân. Daz kint daz dâ ist geslagen, daz muoz wol weinen unde clagen: alsus clag ich von schulden. ichn hân widr iuwern hulden

mit mînem wizzen niht getân : âne schulde ich grôzen schaden hân. hien sol niht vrides mêre wesn : wert iuch, ob ir welt genesn.' dô bôt ich mîn unschulde und suochte sîne hulde : wan er was merre danne ich. done sprach er niht wider mich, wan daz ich mich werte. wand ich mich gerne nerte, dô tete ich daz ich mohte; daz mir doch lützel tohte. ich tjostierte wider in : des vuort er mîn ros hin. daz beste heil daz mir geschach, daz was daz ich mîn sper zebrach. vil schône satzte mich sîn hant hinderz ros an daz lant, daz ich vil gar des vergaz ob ich ûf ros ie gesaz. er nam mîn ros und liez mich ligen. mir was gelückes dâ verzigen. done muot mich niht sô sêre, ern bôt mir nie die êre daz er mich wolde ane gesehn. dô ime diu êre was geschehn, Do gebârter rehte al diu gelich als im aller täglich zehenstunt geschæhe alsame. der prîs was sîn, und mîn diu schame. swaz ich doch lasters dâ gewan, dâ was ich ein teil unschuldec an.

mir was der wille harte guot: done mohten mir diu werc den muot an im niht volbringen: des muost mir misseligen. dô mir des rosses wart verzigen, ichn moht niht imer dâ geligen: dô geruocht ich gên von dan als ein êrlôser man unde gesaz ab zu dem brunnen. der unzuht sult ir mich verkunnen, swie niugerne ich anders si, und sæz ich iemer dâ bi, ichn begübbe in nimer mêre: ich engalt es ê sô sêre. dô ich gnuoc lange dâ gesaz unde betrahte daz waz mir ze tuonne wære, mîn harnasch was ze swære daz ichz niht gênde enmohte getragen: nû waz mag ich mêre sagen? wan ich schuttez abe und gienc dan. ich gnâdelôser man gedâhte war ich kêrte, unz mich mîn herze lêrte, Daz mir an mînen wirt geriet, von dem ich des morgens schiet. swie ich dar kom gegangen, ichn wart niht wirs enpfangen danne ouch des âbents do ich dâ reit: daz machet aber sîn hövescheit. wære mir diu êre geschehn als in dem lastr ich wart gesehn,

mîn handelunge wær gnuoc guot. alsus trôstens mînen muot, er und mîn juncvrouwe. daz sî got iemer schouwe! ich hân eim tôren glîch getân, diu mære der ich laster hân, daz ich diu nien kunde verdagen: ichn wolts ouch ê nie gesagen. wære mir iht baz geschehen, des hôrtent ir mich ouch nû jehen. sî iwer deheime geschehen baz, ob er nû welle, er sage daz. dô rechente der herre Îwein ze kûnneschaft undr in zwein: er sprach 'neve Kâlogrêant, ez richt von rehte mîn hant swaz dir lasters ist geschehn. ich wil ouch varn den brunnen sehn, und waz wunders dâ sî. dô sprach aver Keiî ein rede diu im wol tohte; wan ers niht lâzen mohte, Geschach ie man kein vrûmekheit, ezn wær im doch von herzen leit. 'ez schînet wol, wizze Krist, daz disiu rede nâch ezzen ist. irn vastet niht, daz hœr ich wol. wînes ein becher vol der gît, daz sî iu geseit, mêre rede und manheit dan vierzec unde viere mit wazzer ode mit biere.

sô diu katze vrizzet vil, zehant sô hevet sî ir spil: herre Îwein, alsô tuot ir. râch ich iu wol, sô volget mir. iu ist mit der rede ze gâch: slâft ein lützel dernâch. troume iu danne iht swâre, sô sult irs iu zwâre nemen eine mâze. ode vart iuwer strâze mit guotem heile, und gebt mir niht ze teile swaz iu dâ êren geschiht, und enzelt mir halben schaden niht. 'her Keiî,' sprach diu künegîn, 'iwer zunge müez gunêret sîn, diu allez guot gar verdagt und niuwan daz bœste sagt daz iuwer herze erdenken kan. doch wæn ich dar an Der zungen unrehte tuo: iwer herze twinget sî derzuo. dazn dunket keiner schalkheit vil: nû muoz sî sprechen swaz ez wil. ichn mac sî niht gescheiden, wan übel geschehe in beiden. ich wil iu daz zwâre sagen, dem ir den vater het erslagen, dern vlizze sich des niht mêre wie er iu alle iuwer êre benæme, danne sî dâ tuot. iu habt ez eine, werde iuz guot.

her Îwein lachet unde sprach 'vrowe, mirn ist niht ungemach swaz mir her Keiî sprichet: ich weiz wol daz er richet an mir mîn ungewizzenheit. im ist mîn ungevüege leit: dien wold er mich niht verdagen. ouch kan erz mir wol untersagen mit selher vuoge als er ie pflac, die niemen wol gezürnen mac. mîn her Keiî der ist sô wîs und hât selh êre und selhen prîs daz man in gerne hœren sol; und hân ich nû wâr, daz wizt ir wol. ich wil des iemer sîn ein zage daz ich im sîniu wort vertrage. ouch enhebt er niht den strît der den êrsten slac gît Und in der ander vertreit: sô ist der strît hin geleit. ichn wil mich mit dem munde niht glichen dem hunde, der dâ wider grînen kan, sô in der ander grînet an. hie was mit rede schimpfes vil. ouch hete der kûnec ûf sîn zil geslâfn und was erwachet sâ, unde enlac niht langer dâ. er gienc hin ûz zuo in zehant, dâ er sî sament sitzen vant. si sprungen ûf: daz was im leit. er zurnde durch gesellekheit:

wander was in weizgot verre baz geselle danne herre. er saz zuo in dâ nider. diu künegin seit im her wider Kâlogrêandes swære und elliu disiu mære. nû hete der künec die gwonheit daz er nimmer keinen eit bî sînes vater sêl swuor wan des er benamen volvuor. Utpandragôn was er genant. bî ime swuor er des zehant (daz hiez er über al sagen) daz er in vierzehen tagen und rehte an sant Jôhannes naht mit aller sîner maht Zuo dem brunnen wolde komen. dô sî daz hâten vernomen, daz dûhtes rîterlichen guot: wan dar stuont ir aller muot. ichn weiz wem liebe dran geschach: ez was hern Îwein ungemach, wand er sich hâte an genommen daz er dar eine wolde komen. er sprach 'ich mac daz niht bewarn, und wil der künec selbe varn, mir wirt mîn rîterschaft benomen. mir sol des strîtes vûrkomen mîn her Gâwein: des ist zwîvel dehein, alsô schiere so er des gert, ern werdes vûr mich gewert.

entriuwen ez sol anders varn: ich kan daz harte wol bewarn, swer vierzehen tage erbitet, daz er vor mir niht enstritet. wan ich sol in disen driu tagen des endes varn, und niemen sagen, in den walt ze Breziljân, suochen unz ich vunden hân den stîc den Kâlogrêant sô engen und sô rûhen vant. und dâ nâch sol ich schouwen die schœnen juncvrouwen, des êrbæren wirtes kint, diu beidiu alsô hövesch sint. So gesihe ich, swenne ich scheid dan, den vil ungetânen man der dâ pflegt der tiere. dar nâch sô sihe ich schiere den stein unde den brunnen: des müezen sî mir gunnen daz ich in eine begieze, ich engeldes oder genieze. desn wirt nû niemen zuo gedâht unz ichz habe volbrâht: bevindent siz sô ez ergât, des wirt danne guot râht. alsus stal er sich dan und warp rehte als ein man der êre mit listen kunde gevristen, und kom dâ er die knappen vant. den besten nam er dâ zehant,

den er niht verdagte. vil stiller ime sagte daz er im sîn gereite ûf sîn pfert leite: er wolt ze velde rîten und sîn dâ ûze bîten unz erm sîn harnasch bræhte nâch. er sprach 'nû lâ dir wesen gâch, und sich daz duz wol verdagest. zwâre ob duz iemen sagest, so ist iemer gescheiden diu vriuntschaft undr uns beiden.' Sus reit er ûz und liez in dâ. vil schiere brâhter ime nâ sîn ros und sîn isengwant. nû wâfent er sich zehant, er saz ûf unde reit nâch wâne in grôz arbeit, und erstreich grôze wilde, walt unde gevilde, unz er den engen stîc vant den sîn neve Kâlogrêant alsô kûme durch gebrach. ouch leit er grôzen ungemach unz daz er ûz ze velde quam. die guoten herberge er dô nam, daz im von wirte selch gemach eines nahtes nie geschach. des morgens schiet er von dan und vant den griulichen man ûf jeneme gevilde stên bî sînem wilde:

und vor sîm anblicke segent er sich vil dicke, daz got sô ungehiure deheine crêatiure geschepten ie geruochte. der bewist in des er suochte. vil schiere sach her Îwein den boum, den brunnen, den stein, und gehôrte ouch den vogelsanc. dô was sîn twelen unlanc Unz daz er ûf den stein gôz. dô kom ein siusen unde ein dôz und ein selch weter dar nâch daz in des dûht daz im ze gâch mit dem giezen wære gewesn: wan er entriut nimê genesn. dô daz weter ende nam, dô hôrter daz geriten quam des selben waldes herre. der gruozt in harte verre als vîent sînen vîent sol: ouch verstuont her Îwein wol daz er sich weren solde, ob er niht dulden wolde beide laster unde leit. ir ietweder was bereit ûf des anderen schaden: sî hete beide überladen grôz ernst unde zorn. sî nâmen d'ors mitten sporn: sus was in zuo ein ander ger. ir ietweder sîn sper

durch des andern schilt stach ûf den lîp daz ez zebrach wol ze hundert stücken. dô muosens beide zücken diu swert von den sîten. hie huop sich ein strîten daz got mit êren möchte sehn, solt ein kampf vor im geschehn. Über die schilte gienc diu nôt, die ir ietweder vür bôt, die wile daz die werten: sî wurdn ab mit den swerten zehouwen schiere alsô gar daz si ir bêde wurden bar. ich machte des strites harte vil mit worten, wan daz ich enwil, als ich iu bescheide. sî wâren dâ beide, unde ouch niemen bî in mê der mir der rede gestê. spræche ich, sît ez niemen sach, wie dirre sluoc, wie jener stach, ir einer wart erslagen: dern mohte niht dâ von gesagen: der aber den sige dâ gewan, der was ein sô hövesch man, er hete ungerne geseit sô vil von sîner manheit dâ von ich wol gemâzen mege die mâze ir stiche und ir slege. wan ein dinc ich iu wol sage, daz ir deweder was ein zage

(wan da ergienc wehselslege gnuoc), und daz der gast dem wirte sluoc durch den helm einen slac zetal unz dâ daz leben lac. und alser der tôtwunden rehte het enpfunden, Dô twanc in des tôdes leit mêre dan sîn zageheit daz er kêrte und gap die vluht. her Îwein jagt in âne zuht engegen sîner burc dan. ez hete der halptôte man ze vliehenne ein gereiten muot: ouch was sîn ros alsô guot daz er vil nâch was komen hin. do gedâhter Îwein, ob er in niht erslüege od vienge, daz ez im danne ergienge als im her Keiî gehiez, der niemens ungespottet liez: und waz ime sîn arbeit töhte, so er mit niemen enmöhte erziugen dise geschiht (wan dâne was der liute niht), sô spræcher im an sîn êre. des begunder im vil sêre ze slage mite gâhen, unz sî die burc sâhen. nû was diu burestrâze zwein mannen niht ze mâze: sus vuoren si in der enge beide durch gedrenge

unz an daz palas. dâ was vor gehangen ein slegetor: dâ muose man hin durch varn unde sich vil wol bewarn Vor der selben slegetür, daz man den lîp dâ niht verlür. sweder ros od man getrat iender ûz der rehten stat, dazz ruorte de vallen und den haft der dâ alle dise kraft und daz swære slegetor von nidere ûf habte enbor, sô nam ez einen val alsô gâhes her zetal daz im niemen entran. sus was beliben manec man. dâ reit der wirt vor im in. der het die kunst und den sin daz im dâ von niht arges war: wander meistert ez dar. ez was swære unde sneit sô sêre daz ez niht enmeit ezn schriete îsen unde bein. nune kunde sich der herre Îwein niht gehüeten dâ vor unde valte daz tor, und sluoc zen selben stunden dem wirte eine wunden, unde genas als ich iu sage. er hete sich nâch dem slage hin vür geneiget unde ergebn: alsus beleip im daz lebn,

dô daz tor her nider sleif, deiz im den lîp niht begreif. Ez sluoc, als ich vernomen habe, daz ros ze mittem satel abe, und schriet die swertscheide und die sporn beide hinder der versenen dan: er gnas als ein sælec man. dô im daz ros tôt lac, done mohter, als er ê pflac, niht vürebaz gejagen: ouch het er den wirt erslagen. der vlôch noch den ende vor durch ein ander slegetor und liez daz hinder ime nider: done mohte der gast vür noch wider. sus was mîn her Îwein zwischen den porten zwein beslozzen unde gevangen. swie sêre im missegangen an der vancnüsse wære, doch was sîn meistiu swære daz er im vor dan alsô lebendec entran. ich wil iu von dem hûse sagen dâ er inne was beslagen. ez was, als er sît selbe jach, daz er sô schœnez nie gesach weder dâ vor noch sît, hôch vest unde wît, gemâlet gar von golde. swer drinne wesen solde

Âne vorhtliche swære, den dûhtez Freudebære. dô suochter wider unde vür und envant venster noch tür dâ er ûz möhte. nu gedâhter waz im töhte. dô er mit selhen sorgen ranc, dô wart bî ime niht über lanc ein türlîn ûf getân: dâ sach er zuo im ûz gân eine rîterliche magt, hete sî sich niht verclagt. diu sprach zem êrsten niht mê wan 'ouwê, riter, ouwê! daz ir her komen sît, daz ist iuwer jungeste zît. ir habet mînen herrn erslagen. man mac sô jæmerlichez clagen an mîner lieben vrouwen und ame gesinde schouwen, und sô grimmelichen zorn, daz ir den lîp hânt verlorn. daz si iuch nû niht hânt erslagen, daz vristet niuwan daz clagen daz ob mîne herren ist: sî slahent iuch ab an kurzer vrist.' er sprach 'so ensol ich doch den lîp niht verlieren als ein wîp: michn findet niemen âne wer.' sî sprach 'got sî der iuch ner: Ern beschirme iuch eine, ir sît tôt. doch gehabte sich ze grôzer nôt

nie man baz danne ir tuot: ir sît benamen wol gemuot. des sol man iuch geniezen lân. swie leide ir mir habt getân, ichn bin iu doch niht gehaz, und sage iu mêre umbe waz. mîn vrouwe het mich gesant ze Britanje in daz lant. dô sprach ich den künec von ir: herre, daz geloubet mir, ich schiet alsô von dan daz mir dâ nie dehein man ein wort zuo sprach. ich weiz doch wol daz ez geschach von mîner unhövescheit. alsô het ich ûf geleit, ich wære ir grüeze wætlich wert, als man dâ ze hove gert: ich weiz wol, des engalt ich. herre, dô gruoztet ir mich, und ouch dâ niemen mêre. do erbutet ir mir die êre der ich iu hie lônên sol. herre, ich erkenn iuch wol: iwer vater was, deist mir erkant, der künec Vriên genant. ir sult vor schaden sicher sîn: her Îwein, nemet ditz vingerlîn. Ez ist umben stein alsô gewant: swer in hât in blôzer hant, den mac niemen, al die vrist und er in blôzer hant ist,

gesehen noch gevinde. sam daz holz underr rinden, alsame sît ir verborgen: irn durfet niht mê sorgen.' alsus gap siz im hin. nû stuont ein bette dâ bî in: daz was berihtet alsô wol als ein bette beste sol, daz nie küneec bezzer gwan: dâ hiez sî in sitzen an. und dô er was gesezen, sî sprach 'welt ir iht ezzen?' er sprach 'gerne, der mirz gît.' sî gienc und was in kurzer zît her wider komen unde truoc guoter gâchspise gnuoc: des sagterr gnâde unde danc. dô er gaz unde getranc, dô huopz gesinde grôzen schal ze bêden porten über al, als si imz niht wolden vertragen der in den herren hete erslagen. sî sprach 'her Îwein, hœret ir?' sî suochent iuch. nû volget mir, und enkumt niht ab dem bette. iu stêt ditz dinc ze wette Niuwan umbe daz lebn. den stein den ich iu hân gegebn, den besliezt an iuwer hant. des sî mîn sêle iuwer pfant daz iu niht leides geschijt, wande iuch nieman ensiht.

nû wâ mite möht iu wesen baz? dan dazs iu alle sint gehaz, und ir sî seht bî iu stân unde drônde umbe iuch gân, und sî doch sô erblindent daz si iuwer niene vindent, und sît doch rehte under in. ouch tragent sî in vür iuch hin, sine liebe gesellen, als si in begraben wellen, mînen herren, ûf der bâre. sô beginnen sî iuch zwâre in manegen ende suochen: desn durft ab ir niht ruochen. tuont alsus und sît genesn: ichn tar niht langer bî iu wesn. und vunden sî mich hinne, daz kœme uns zungewinnc. sus hete sî urloup genommen. die liute die dâ wâren komen zuo dem vordern bürgetor, die vunden dâ vor daz ros halbez abe geslagen. wer moht in daz widersagen? Wan sî wolten daz gewis hân, und wurde de porte ûf getân, daz si in drinne vunden. in vil kurzen stunden brâchens beider pote dan, und vunden doch dâ nieman wanz halbe ors innerhalp der tür voñ mitteme satele hin vür.

do begunden sî vor zorne toben und got noch den tiuvel loben. sî sprâchen 'warst der man komen, ode wer hât uns benomen diu ougen und die sinne? er ist benamen hinne: wir sîn mit gesehnden ougen blint. ez sehent wol al die hinne sint: ezn wær dan cleine als ein mûs, unz daz beslozen wær ditz hûs, sone möht niht lebendes drûz komen: wie ist uns dirre man benomen? swie lange er sich doch vriste mit sînem zouberliste, wir vinden in noch hiute. suochent, guote liute, in winkeln und under benken. erne mac des niht entwenken erne müeze her vür.' sî verstuonden im die tür. ein dinc was ungewâlich: sî giengen slahende umbe sich Mit swerten sam die blinden. solden si in immer vinden, daz heten sî ouch dô getân. daz bette wart des niht erlân sîne ersuochtenz undr im gar. bi sîner gnist nim ich war, unz der man niht veige enist, so erneret in vil cleiner list. dô er in disen sorgen saz, nû widervuor im allez daz

daz im sîn vriundin diu magt vordes hâte gesagt. er sach zuo im gebâret tragen den wirt den er hete erslagen. und nâch der bâre gienc ein wîp, daz er nie wîbes lîp alsô schœnen gesach. von jâmer sî ûz brach ir hâr und diu cleider. ezn dorft nie wîbe leider ze dirre werlde geschehn: wand sî muose tôten sehn ein den liebesten man den wîp ze liebe ie gewan. ezn möchte nimmer dehein wîp gelegen an ir selber lîp von clage selhe swære, der niht ernst wære. ez erzeikten ir gebærde ir herzen beswærde An dem libe und an der stimme. von ir jâmers grimme sô viel sî dicke in unmaht: der liehte tac wart ir ein naht. sô sî wider ûf. gesach und weder gehôrte noch ensprach, sone sparten ir hende daz hâr noch daz gebende. swâ ir der lîp blôzer schein, da'rsach sî der herre Îwein: und dâ was ir hâr und ir lich sô ģar dem wunsche gelich

daz im ir minne verkêrte die sinne, daz er sîn selbes gar vergaz und daz vil kûme versaz sô sî sich roufte unde sluoc. vil ungerne er ir daz vertraoc: sô wolder dar gâhen und ir die hende vâhen, daz sî sich nien slüege mê. im tete der kumber alsô wê an dem schœnen wibe daz erz an sime libe gerner hæte vertragen. sîn heil begunder gote clagen, daz ir ie dehein ungemâch von sînen schulden geschach. sô nâhen gienc ime ir nôt, in dûhte des daz sîn tôt Unclâgelîcher wære dan ob sî ein vinger swære. nû ist uns ein dine geseit vil dicke vür die wârheit, swer den andern habe erslagen, und wurder zuo ime getragen, swie langer dâ vor wære wunt, er begunde bluoten anderstunt. nû seht, alsô begunden im bluoten sîne wunden, dô man in in daz palas truoc: wan er was bî im der in sluoc. dô daz diu vrouwe gesach, sî rief sêre unde sprach

'er ist zwâre hinne und hât uns der sinne mit sime zouber âne getân. die ê daz suochen heten lân, die begunden suochen anderstunt. daz bette wart vil dicke wunt, und durch den kulter, der dâ lac, gienc manec stich unde slac: ouch muoser dicke wenken. in winkeln, under benken, suochten sin mitten swerten, wande sî sîns tôdes gerten alsam der wolf der schâfe tuot: vor zorne tobet in der muot. ze gote huop diu vrouwe ir zorn. sî sprach 'herre, ich hân verlorn Vil wunderliche minen man: dâ bistû eine schuldec an. dû hetest an in geleit die kraft und ouch die manheit daz im von gehiuren dingen niene mohte misseligen. ez ist niuwan alsô komen: der im den lîp hât genommen, daz ist ein unsihtiger geist. got herre, wie wol dû weist, swer ez anders wære niuwan ein zouberære, des heter sich vil wol erwert. im was ouch dirre tôt beschert. daz hœret er und ist uns bi. nû kieset ouch wie küener sî:

sît er mînen herren hât erslagen, wie mac er ouch dar an verzagen ern lâz sich ouch ein wip sehn? wand waz möht im von der geschehn?' dô sî gesuochten genuoc und in sîn stein des übertruoc daz im niht arges geschach, wand in dâ nieman ensach, do gelac daz suochen under in. ir tôten truogen sî hin ze münster, dâ manz ambet tetē mit vollem almuosn unde gebete. dar nâch truogen si in ze grabe. von ir grôzen ungehabe Wart dâ ein jæmerlîcher schal. diu juncvrouwe sich dô stal von deme gesinde dan und gruozte den verborgen man und trôst in als ein hövesch magt. ouch enwas der herre niht verzagt: im hete diu minne einen muot gegeben, als sî manegem tuot, daz er den tôt niht entsaz. doch hal er die maget daz daz er sîner vîendinne truoc sô grôze minne. er dâhte 'wie gesihe ich sî?' nû was im sô nâhen bî diu stat dâ man in leite, daz er sam gereite hörde alle ir swære sam er undr in wære.

mit listen sprach er alsô. 'ouwê, ditz volc ist starke unvrô: mir gêt ze herzen ir elage nâher danne ich iemen sage. möht ez mit vuoge geschehen, sô wolt ich harte gerne sehen ir gebærde und ir ungehabe, die ich dâ hœre bîme grabe.' die rede meinder niender sô: wan ern gæbe drumbe niht ein strô, ob sî mit glîchem valle dâ zehant alle Lægen ûf den bâren, die dâ gesinde wâren, âne diu vrouwe eine. diu nôt enwas niht cleine, daz er sî hôte und niene sach. nû buozte si im daz ungemach, wande sî nâch siner bete ein venster ob im ûf tete, und liez si in wol beschouwen. nû saher die vrouwen von jâmer lîden michel nôt. sî sprach 'geselle, an dir ist tôt der aller tiureste man, der rîters namen ie gewan, von manheit und von milte. ezn bereit nie mit schilte kein rîter alsô volkomen. ouwê wie bistû mir benomen? ichn weiz war umbe ode wie. der tôt möhte an mir wol hie

büezen swaz er ie getete, unde gewert mich einer bete, daz er mich lieze varn mit dir. waz sol ich, swenn ich dîn enbir? waz sol mir guot unde lip? waz sol ich unsæligez wip? ouwê daz ich ie wart geboren! ouwê wie hân ich dich verlorn? ouwê, trûtgeselle. got versperre dir die helle Und gebe dir durch sîne kraft der engel genôzschaft: wan dû wær ie der beste.' ir jâmer was sô veste daz sî sich roufte und zebrach. dô daz her Îwein gesach, dô lief er gegen der tür, als er vil gerne hin vür zuo ir wolte gâhen und ir die hende vâhen. dô daz diu juncvrouwe ersach, sî zôch in wider nude sprach 'saget, wâ wolt ir hin, ode wâ habt ir den sin genommen der iu ditz geriet? nu ist vor der tür ein michel diet: diu ist iu starke erbolgen. irn wellent mir folgen, sô habt ir den lîp verlorn.' alsus erwant in ir zoru. sî sprach 'wes was iu gedâht? wær iwer gedanc volbrâht,

sone hetent ir niht wol gevarn. ichn trûwe iun lîp niht bewarn, ezn sî dan iuwer wille. durch got sitzent stille. er ist ein vil wîser man der tumbe gedanke verdenken kan mit wîslicher tât: swes sin aber sô stât Daz er an allen dingen wil volbringen mit den werken sînen muot, daz enist niht halbez guot. gedenkt ir keiner tumpheit, der muot sî gar hin geleit: habt ir ab keinen wîsen muot, den volvüeret, daz ist guot. herre, ich muoz iuch eine lân und vil drâte wider gân hin zuo dem gesinde. ich vürhte, man bevinde daz ich zuo iu gegangen bin. vermissent sî mîn under in, sô verdenkent sî mich sâ. hin gienc sî unde liez in dâ. swie im sîne sinne von der kraft der minne vil sêre wæren überladen, doch dâht er an einen schaden, dazer niht überwunde, den spot den er ze hove vunde, sô er sînen gelingen mit keinen schînlichen dingen

niht erziugen möhte, waz im danne töhte elliū sîn arbeit. er vorhte eine schalkheit: er weste wol daz Keiî in niemer gelieze vrî Vor spotte und vor leide. dise sorgen beide die tâten ime gelîche wê. vil schiere wart des einen mê: vrou Minne nam die obern hant, daz sî in vienc unde bant. • si bestuont in mit überkraft, und twanc in des ir meisterschaft daz er herzeminne truoc siner viendinne, diu im ze tôde was gehaz. ouch wart diu vrouwe an im baz gerochen danne ir wære kunt: wan er was tœtlichen wunt. die wunden sluoc der Minnen hant. ez ist der wunde alsô gewant, sî wellent daz sî langer swer dan von swerte ode von sper: wan swer von wâfen wirt wunt, der wirdet schiere gesunt, ist er sîm arzâte bî: und wellnt daz disiu wunde sî bî ir arzâte der tôt unde ein wahsendiu nôt. ê hâte sich Minne nâch swachem gewinne

geteilet an manege stat, da es sî nieman enbat: von danne nam sî sich nû gar unde kêrte sich dar Mit aller ir kraft, ze diu daz ir meisterschaft dâ deste merre wære. ein dinc ist elagebære : sît Minne kraft hât sô vil daz sî gewaltet sweme sî wil und alle künege die nû sint noch lîhter twinget danne ein kint, sô ist sî einer swachen art, daz si ie sô deumüete wart daz sî iht bœses ruochet und sô swache stat suochet, diu ir von rehte wære smæhe unde unmære. sî ist mit ir süeze vil dicke under vüeze der Schanden gefallen, als der zuo der gallen sîn süezez honec giuzet und der balsem vliuzet in die aschen von des mannes hant: wan daz wurde alswâ baz bewant. doch enhât sî hie niht missetân: wir sulen sî genesen lân. si erwelte hie nû einen wirt deiswâr von dem sî niemer wirt geswachet noch gunêret. si ist rehte zuo gekêret:

si belibet hie mit êren: sus solde sî zuo kêren.. Dô man den wirt begruop, dô schiet sich diu riuwige diet. leien unde pfaffen die vuoren ir dinc schaffen: diu vrouwe beleib mit ungehabe al eine bî dem grabe. dô sî her Îwein ab ersach, unde ir meinlich ungemach, ir starkez ungemüete unde ir stæte güete, ir wîplîche triuwe und ir senlîche riuwe, dô minnet er sî deste mê, und ime wart nâch ir alsô wê daz diu Minne nie gewan grœzern gwalt an keinem man. er gedâhte in sînem muote ‘eiâ herre got der guote, wer gît sô starke sinne daz ich die sô sêre minne diu mir zem tôde ist gehaz? od wie möhte sich gevüegen daz daz sî mir gnædec würde nâch alsô swærer bürde mîner niuwen schulde? ich weiz wol daz ich ir hulde niemer gewinnen kan: nû sluoc ich doch ir man. ich bin ouch ze sêre verzagt, daz ich mir selbe hân versagt.

Nû weiz ich doch ein dinc wol, des ich mich wol trœsten sol: wirt mîn vrouwe Minne rechte ir meisterinne als sî mîn worden ist, ich wæne sî in kurzer vrist ein unbilliche sache wol billich gemache, ezn ist nie sô unmügelich, bestêt sî sî alsô mich unde geræt ir her ze mir, swie gar ich ir hulde enbir, und het ich ir leides mê getân, sî müese ir zorn allen lân und mich in ir herze legen. vrou Minne muoz sî mir bewegen: ichn triut mit mîner vrümekheit ir nimmer benemen ir leit. weste sî ouch welch nôt mich twanc ûf ir herren tôt, sô wurdes deste bezzer rât, und westes wie mîn muot stât, daz ich ze wandel wil gebn mich selben unde mîn lebn. sit nû Minne unde ir rât sich mîn underwunden hât, sô hât sî michel reht dâ zuo daz sî der zweier einez tuo, daz si ir râte her ze mir ode mir den muot beneme von ir: Wan ich bin anders verlorn. daz ich ze vriunde hân erkorn

mine tôtvîendinne, dazn ist niht von mîne sinne: ez hât ir gebot getân: dâ von sol sî mich niht lân als unbescheiden under wegn. ouwî wan solde sî nû pflegn gebærde nâch ir güetel Freude und guot gemüete daz zæme mîner vrouwen baz dan dazs ir selber ist gehaz. die marter und die arbeit die sî an sich selben leit, die sold ich billîcher enpfân. ouwê waz hât ir getân ir antlütze unde ir schœniu lîch, der ich nie niht sach gelîch? ichn weiz waz sî zwâre an ir goltvarwen hâre und an ir selber richet, daz sî den lîp zebrichet. dâ ist sî selbe unschuldec an: ouwê jâ sluoc ich den man. disiu zuht unt dirre gerich gienge billîcher über mich: ouch tæt sî got erkennen daz mir an mîn selbes lîbe baz. ouwê daz diu guote in selhem unmuote Ist sô rehte wünneclich! nû wem wære sî gelich, enhete sî dehein leit? zwâre got der hât geleit

sîne kunst und sîne kraft, sînen vlîz und sîne meisterschaft, an disen loblichen lîp: ez ist ein engl und niht ein wîp.' her Îwein saz verborgen in freuden unde in sorgen. im schuof daz venster guot gemach, des er genôz daz er sî sach: dâ wider vorhter den tôt. sus heter wûnne unde nôt. er saz dâ und sach sî ane unz an die wîle daz sî dane wider durch daz palas gie. ouwî wie kûme er daz verlie, dô er sî vür sich gên sach, daz er niht wider sî sprach! dô muoserz doch durch vorhte lân. die porte wurden zuo getân, dâ sî durch was gegangen: unde er was alsô gevangen daz im aber de ûzvart anderstunt versperret wart. daz was ime alsô mære: wan ob ietweder porte wære ledeclîchen ûf getân, und wærer dâ zuo ledec lân Aller sîner schulde alsô daz er mit hulde vüere swar in dûhte guot, sone stuont doch anders niht sîn muot niuwan ze belîbenne dâ. wær er gewesen anderswâ,

sô wolder doch wider dar. sîn herze niender anderswar stuont niuwan da er sî weste: diu stat was ime diu beste. sus was mîn her Îwein mit disen nœten zwein sêre bedwungen. swie wol im was gelungen, sô wærer doch gunêret, wær er ze hove gekêret âne geziuc sînre geschiht: wand man geloupt imes niht. dô begunde in dô an strîten zuo den anderen sîten daz im gar unmære elliū diu êre wære diu im alswâ möchte geschehn, ern müese sîne vrouwen sehn, von der er was gevangen. schiere kom gegangen diu guote maget diu sîn pfac. sî sprach 'ich wæne ir swæren tac und übele zît hinne tragt.' er sprach 'daz sî iu widersagt: Wan ichn gwan liebern tac nie.' 'liebern? sagent, herre, wie mac sich daz gevüegen? wan die iuch gerne slüegen, die seht ir hie umbe iuch gân: mac ein man danne hân guoten tac und senfte zît der ûf den lîp gevangen lît,

ern wære danne des tôdes vrô?' er sprach 'mîn muot stêt niender sô daz ich gerne wære tôt, und vreu mich doch in mîner nôt, und habe daz hiute getân und hân ouch noch ze freuden wân.' dô ez ir halbez wart gesagt, do erkante wol diu wîse magt daz er ir vrouwen meinde, als si im sît bescheinde. sî sprach 'ir mugt wol wesen vrô: wan ich gevüegez wol alsô mit etlîchem dinge daz ich iuch hinnen bringe noch ode vruo verholne.' er sprach 'vüer ich verstolne ze vüezen von hinnen, des müese ich wol gewinnen laster unde unêre: swenn ich von hinnen kêre, daz bevindet al daz lant.' sî sprach, und nam in bî der hant, 'Deiswâr ichn heize iuch niender varn und wil iu gerne bewarn den lîp sô ich beste kan. mîn her Îwein, nû gêt dan dâ iwer gewarheit bezzer sî:' und vuorte in nâhen dâ bî dâ im allez guot geschach. sî schuof im allen den gemach des im zem lîbe nôt was. sî pflac sîn daz er wol genas.

dô er guot gemach gewan, dô gienc sî von ime dan und tete daz durch allez guot: vil starke ranc dar nâch ir muot daz er herre wurde dâ. zuo ir vrouwen gienc sî sâ: der was sî heimlich genuoc, sô daz sî gar mit ir truoc swaz sî tougens weste, ir næhest und diu beste. ir râtes unde ir lêre gevolget sî mêre dan aller ir vrouwen. sî sprach 'nû sol man schouwen alrêrst iuwer vrûmekheit dar an daz ir iuwer leit rehte und redelîche tragt. ez ist wîplich daz ir clagt, und muget ouch ze vil clagen. uns ist ein vrumer herre erslagen: Nû mac iuch got wol stiuren mit einem alsô tiuren.' 'meinstuz sô?' 'vrouwe, jâ.' 'wâ wære der?' 'eteswâ.' 'dû tobest, ode ez ist dîn spot. und kêrte unser herre got allen sinen vlîz dar an, ern gemachte niemer tiurern man. dâ von sol sich mîn senediu nôt, ob got wil, unz an mînen tôt nimmer volenden: got sol mir den senden,

daz ich nâch mime herren var. dû verliusest mich gar, ob dû iemer man gelobest neben im: wan dû tobest.' dô sprach aber diu magt 'iu si doch ein dinc gesagt, daz man iedoch bedenken sol, ir vervâhetz übel ode wol. ezn ist iu niender sô gewant, irn wellet brunnen und daz lant und iuwer êre verliesen, sô müezt ir etswen kiesen der iun vriste unde bewar. manec vrum riter kumt noch dar der iuch des brunnen behert, enist dâ niemen der in wert. und ein dinc ist iu unkunt. ez wart ein bote an dirre stunt Mîme herren gesant: dô er in dô tôten vant und iuch in selher swære, do versweic er iuch dez mære und bat ab mich iu daz sagen daz nâch disen zwelf tagen unde in kurzerme zil der küneec Artûs wil zem brunnen komen mit her. enist dan niemen der in wer, so ist iuwer êre verlorn. habt ab ir ze wer erkorn von iwern gesinde deheinen man, dâ sît ir betrogen an.

und wære ir aller vrümekheit an einen man geleit, dazn wær noch niht ein vrum man. swelher sich daz nimet an daz er der beste sî von in, dern tar niemer dâ hin dem brunnen komen ze wer. sô bringt der künec Artûs ein her, die sint zen besten erkorn die ie wurden geboren. vrouwe, durch daz sît gemant, welt ir den brunnen und daz lant niht verliesen âne strît, sô warnet iuch der wer enzît, und lât iuwern swæren muot. ichn râtez iu niuwan durch guot.' Swie sî ir die wârheit ze rehte hete underseit und sî sich des wol verstuont, doch tete sî sam diu wîp tuont: sî widerredent durch ir muot daz sî doch ofte dunket guot, daz sî sô dicke brechent diu dine diu sî versprechent, dâ schiltet sî vil manec mite: doch dunketz mich ein guot site. er missetuot, der daz seit, ez mache ir unstætekheit: ich weiz baz wâ von ez geschiht daz man sî alsô dicke siht in wankelm gemüete: ez kumet von ir güete.

man macs ûz übelem muote bekêren wol ze guote unde niht von guote bringen ze übelem muote. diu wandelunge diu ist guot: ir dehein ouch anders niht entuot. swer in danne unstæte giht, des volgære enbin ich niht: ich wil in niuwan guotes jehn. allez guot müez in geschehn. diu vrouwe jæmerlichen sprach 'nû clag ich gote mîn ungemach, daz ich nû niht ersterben mac. daz ich iemer keinen tac Nâch mîme herren leben sol, dâ mite enist mir doch niht wol. und möht ich umben tôt mîn lebn âne houbetsünde gegebn, des wurd ich schiere gewert, od ichn vunde mezzer noch swert. ob ich des niht gerâten kan ichn müeze mit eim andern man mînes herren wandel hân, sone wilz diu werlt sô niht verstân als ez doch gote ist erkant: der weiz wol, ob mîn lant mit mir bevridet wære, daz ichs benamen enbære. nû rât mir, liebe, waz ich tuo, hœret dehein rât dâ zuo. sit ich ân einen vrumen man mîn lant niht bevriden kan,

so gewinn ich gerne einen, und anders deheinen, den ich sô vrumen erkande daz er mîme lande guoten vride bære und doch mîn man niht wære.' si sprach 'daz sî iu widerseit. wer wær der sich sô grôz arbeit iemer genæme durch iuch an, erne wære iuwer man? ir sprechet als ein wip. gebt ir im guot unde lîp, Ir mugt ez dannoch heizen guot oberz willeclîchen tuot. nû habent ir schœne unde jugent, geburt rîcheit unde tugent, und mugt ein alsô biderben man wol gwinnen, obes iu got gan. nûne weint niht mêre und gedenkt an iuwer êre: zwâre, vrouwe, des ist nô. mîn herre ist vür sich einen têt: wænt ir daz elliu vrünekheit mit im ze grabe sî geleit? zwâre des enist sî niht, wand man noch hundert ritter siht die alle tiurre sint dan er ze swerte schilte unde sper.' 'dû hâst zwâre misseseit.' 'vrouwe, ich sage die wârheit.' 'der zeige mir doch einen.' 'liezt ir iuwer weinen,

Deiswâr ich vunde iun harte wol. 'ichn weiz waz ich dir tuon sol: wan ez dunket mich unmügelich. sich, got der gebezzer dich, ob dû mir nû liegest und mich gerne triegest. 'vrouwe, hân ich iu gelogen, sô bin ich selbe betrogen. nû bin ich ie mit iu gewesn und muoz ouch noch mit iu genesn: Verriet ich iuch, waz wurde mîn? nû müezt ir mîn rihtære sîn: nu erteilet mir (ir sît ein wîp), swâ zwêne vehtent umbe den lîp, weder tiurre sî der dâ gesiget ode der dâ sigelôs geliget. 'der dâ gesigt, sô wæn ich. 'vrouwe, ez ist niht wænlich: wan ez ist gar diu wârheit. als ich iu nû hân geseit, rehte alsô hât ein man gesiget mîneme herren an. daz wil ich wol mit iu gehabt: wan ir hânt in begraben. ich geziuges iu genuoc, der in dâ jagte unde sluoc, der ist der tiurer gewesn: mîn herre ist têt und er genesn.' daz was ir ein herzeleit, daz sî deheiner vrümekeit iemen vür ir herren jach. mit unsiten sî zir sprach

und hiez si enwec strichen: sine woltes nemelichen nimmer mære gesehn. sî sprach 'mir mac wol geschehu von mînen triuwen arbeit und doch nimmer dehein herzeleit, wan ich sî gerne lîden wil. zwære ich bin gernier vil Durch mîne triuwe vertriben dan mit untriwen beliben. vrowe, nû gên ich von iu hin: und sô ich hin vertriben bin, sô nemt durch got in iuweru muot waz iu sî nütze unde guot. daz ich iu gerâten hân, daz hân ich gar durch guot getân: und got vüege iu heil und êre, gesehe ich iuch nimmer mære.' sus stuont sî ûf und gienc dan zuo dem verborgen man. dem brâhtes bœsiu mære, daz ir vrouwe wære unbekêriges muotes: sine kunde sî deheines guotes mit nihte überwinden: sine möhte dâ niht vinden niuwan zorn unde drô. des wart der herre unvrô. diu maget und her Îwein begunden ahten undr in zwein daz siz noch versuochten baz, ob sî ir vrouwen haz

bekêrte mit guote ze senfteren muote. dô diu vrouwe ir magt vertreip und sî eine beleip, do begundes sêre riuwen daz sî ir grôzen triuwen Wider sî sô sêre engalt, wand si ir vluochet und sî schalt. si gedâhte 'waz hân ich getân! ich solte sî geniezen lân daz sî mir wol gedienet hât. ich weiz wol daz sî mir den râd niuwan durch alle triuwe tete. swâ ich gevolget ir bete, daz enwart mir nie leit, und hât mir ouch nû wâr geseit. ich erkenne lange wol ir muot: sî ist getriuwe unde guot. ich hân sî übele lâzen. ich möchte wol verwâzen mîne zornige site: wan dâ gewinnet niemen mite niuwan schande unde schaden. ich solte sî her wider laden: daz kœme mir vil lîhte baz. ich was ir âne schult gehaz. mîn herre was biderbe gnuoc: aber jener der in dâ sluoc, der muose tiurre sîn dan er: erne het in anders her niht mit gewalt gejagt. sî hât mir dar an wâr gesagt.

swer er ist der in sluoc, wider den hân ich schulde gnuoc daz ich im vîent sî: ouch stêt unschulde dâ bî, Der ez rehte wil verstân: er hât ez werende getân. mîn herre wolt in hân erslagen: heter im daz durch mich vertragen und het in lâzen genesn, sô wær ich im ze liep gewesn: wan sô wærer selbe tôt. daz ern sluoc, des gie im nôt.' sus brâht siz in ir muote ze suone und ze guote, und machte im unschult wider sî. dô was gereite dâ bî diu gwaltige Minne, ein rehtiu süenærinne under manne und under wîbe. si gedâhte 'mit mîme libe mac ich den brunnen niht erwern: mich muoz ein biderbe man nern, ode ich bin benamen verlorn. weizgot ich lâze mînen zorn, ob ez sich gevüegen kan, und enger niuwan des selben man der mir den wirt erslagen hât. ob ez anders umb in stât alsô rehte und alsô wol daz ich im mîn gunnen sol, sô muoz er mich mit triuwen ergetzen mîner riuwen,

und muoz mich deste baz hân daz er mir leide hât getân.' Daz sî ir magt ie leit gesprach, daz was ir alsô ungemach daz siz vil sêre clagte. morgen, dô ez tagte, dô kom sî wider gegangen und wart baz enpfangen danne sî verlâzen wære. ir benam diu vrouwe ir swære mit guotem antpfange. sine saz bî ir niht lange unz sî sî vrâgen began. sî sprach 'durch got, wer ist der man den dû mir gester lobtest? ich wæne dû niht tobtest: wan ez entohte deheime zagen dêr mînen herren hât erslagen. hât er die burt und die jugent und dâ zuo ander tugent, daz er mir ze herren zimt, und swenn ez diu werlt vernimt, daz sî mirz niht gewîzen kan ob ich genommen habe den man der mînen herren hât erslagen, kanstû mir daz gesagen daz mir mîn laster ist verleit mit ander siner vrûmekheit, und rætestû mirz danne, ich nim in zeinem manne.' sî sprach 'ez dunket mich guot und gan iu wol daz ir den muot

Sô schône hât verkêret. ir sît mit im gêret und endurft iuchs niemer geschamen.' sî sprach 'nû sage mir sinen namen.' 'er heizet, vrouwe, Îwein.' zehant gehullen sî in ein. sî sprach 'jâ ist mir kunt sîn name nû vor maneger stunt: er ist sun des kûnec Vrîênes. entriuwen ich verstênes mich nû alrêrst ein teil: und wirt er mir, sô hân ich heil. weistû aber, geselle, rehte ob er mich welle?' 'er wolte wærez nû geschehn.' 'sage, wenne mag ich in gesehn?' 'vrouwe, in disen vier tagen.' 'ouwê, durch got waz wil dû sagen? dû machest mir den tac ze lanc. nim daz in dînen gedanc daz ichn noch hiute od morne gesehe.' 'wie welt ir, vrouwe, daz daz geschehe? ich entrœst iuch niht dar an: sô snel ist dehein man noch niht âne gevidere dazz hin und her widere möht komen in sô kurzer vrist. ir wizzet wol wie verre ez ist.' 'sô volg et mîme râte. mîn garzûn loufet drâte: Im endet ie ze vuoze ein tac daz einr in zwein gerîten mac.

ouch hilfet im der mânschîn: er lâze de naht ein tac sîn. ouch sint die tage unmâzen lanc. sag im, er hâts iemer danc, und daz ez im lange vrumt, ob er morgen wider kumt. heiz in rüeren diu bein, und mache vier tage ze zwein. er lâz im nû wesen gâch, unde ruowe dar nâch swie lange sô er welle. nû liebe imz, trûtgeselle. sî sprach 'vrowe, daz sî getân. ouch sult ir ein dinc niuwet lân: besendet iuwer liute morne unde hiute. ir næmet übele einen man, dâne wære ir rât an. swer volget guotem râte, dem misselinget spâte. swaz der man eine tnot, enwirt ez dar nâch niuwet guot, sô hât er in zwei wîs verlorn: er dultet schaden und vriunde zorn. sî sprach 'trûtgeselle, ouwê, ich vürht ez mir niht wol ergê: ezn ist lihte niht ir rât.' 'vrouwe mîn, die rede lât. Irn habet niender selhen helt ern lâze iuch nemen swen ir welt, ê er iu den brunnen bewar. diu rede ist ûz ir wege gar.

ouwî sî sint des vil vrô daz sî der lantwer alsô über werden müezen: sî bietent sich zuo iuwern vüezen, swenne si iuwer rede vernement, und bitent iuch daz ir in nement. sî sprach 'nû sende den garzûn hin: die wîle wil ouch ich nâch in mînen boten senden, daz wir die rede verenden.' sî het in schiere besant: wan er was dâ zehant. der garzûn tete als si im beschiet, er hal sich als sî im geriet: wander was gemachet unde bereit zaller guoter kûndekheit, er kunde ir helfen liegen und âne schalkheit triegen. dô sich diu vrouwe des versach daz dâ niender geschach, daz der garzûn wære under wegen, do begunde de magt des rîtlers pflegen als ir got iemer lône. sî bât in harte schône. ouch was dâ bereit wol drier hande cleit, Grâ, härmin, unde bunt: wan des was der wirt zaller stunt gewarnet als ein hövesch man der wol des lîbes pflegen kan und ders ouch guote state hât: dô welte si ime die besten wât

unde leit in die an. des andern âbents giene sî dan dâ sî ir vrouwen eine vant, unde machte sî zehant von freuden bleich unde rôt. sî sprach 'gebent mirz botenbrôt: iuwer garzûn ist komen.' 'waz mære hâstû vernomen?' 'guotiu mære.' 'sage doch, wie?' 'dâ ist ouch mîn her Îwein hie.' 'wie mohter komen sô vruo?' 'dâ treip in diu liebe derzuo.' 'sage durch got, wer weiz ez doch?' 'vrouwe, ezn weiz niemen noch, niûwan der garzûn unde wir.' 'wan vüerstun danne her ze mir? gene enwe, ich beites hie.' dô diu maget nâch im gie alsô gemeliche, do gebârte sî geliche als sî mit bœsem mære zuo im gesendet wære. sî hiene daz houbet unde sprach trûreliche, dô si in sach 'Ichn weiz waz ich tuon sol. mîn vrouwe weiz iuch hinne wol: ir ist ûf mich vaste zorn, ich hab ir hulde verlorn, daz ich iuch hie behalten hân, und enwil mich doch des niht erlân sîne welle iuch gesehn.' 'ê des niht ensüle geschehn,

ich lâze mir ê nemen den lîp. 'wie möhte iu den genemen ein wîp?' 'sî hât doch volkes ein her.' 'ir geneset wol âne wer: ich hân des ir sicherheit; daz iu deheiner slahte leit nû von ir mac geschehn. sî wil iuch niuwan eine sehn. ir müezet ir gevangen wesn: anders lât si iuch wol genesn.' er sprach 'sî vil sælcc wîp, ich wil gerne daz mîn lîp immer ir gevangen sî, und daz herze dâ bî.' sus stuont er ûf und gie dan mit freuden als ein sælec man, und wart doch undâre enpfangen: dô er kom gegangen, weder si ensprach noch enneic. dô sî alsô stille sweic, daz begund im starke swâren, unde enweste wie gebâren, Wan er saz verre hin dan und sach sî bliuclîchen an. dô sî beidiu swigen, dô sprach diu magt 'her Îwein, wie sît ir sô verzagt? lebt ir ode habt ir munt? ir sprâchet doch in kurzer stunt: wenne wurdent ir ein stumbe? saget durch got, war umbe vlieht ir ein sô schœnez wîp? got hazze iemer sînen lîp

der âne danc deheinen man, der selbe wol gesprochen kan, ze schœnem wibe ziehe, der sî sô sêre vliehe. ir möhtent sitzen nâher baz: ich geheize iu wol daz, mîn vrouwe enbîzet iuwer niht. swem von dem andern geschiht sô leide als ir ir habt getân, und sol man des genâde hân, dâ zuo hœret bezzer lôn. ir habt den küne c Ascalôn, ir vil lieben man, erslagen: wer solt iu des gnâde sagen? ir hât vil grôze schulde: nû suochet ouch ir hulde. nû bite wir sî beide daz sî ir leide geruoche vergezzen. dô wart niht mê gesezzen: Er bôt sich drâte ûf ir vuoze und suochte ir hulde unde ir gruoz als ein schuldiger man. er sprach 'ichn mac noch enkan iu gebieten mêre wandels noch êre, wan rihtet selbe über mich: swie ir welt, alsô wil ich.' 'welt ir allez taz ich wil?' 'jâ, michn dunkets niht ze vil.' 'sô nim ich iu lihte den lîp.' 'swie ir gebietet, sælec wîp.'

'nû waz hulfe danne rede lanc? sit ir iuch âne getwanc in mîne gewalt hât ergebn, næme ich iu danne dez lebn, daz wære harte unwiplich. her Îwein, niene verdenket mich, daz ichz von unstæte tuo, daz ich iuwer alsus vruo gnâde gevangen hân. ir hât mir selch leit getân, stüende mir mîn ahte und mîn guot als ez andern vrouwen tuot, daz ich iuwer niht enwolde sô gâhes noch ensolde gnâde gevâhen. nû muoz ich leider gâhen: wandez ist mir sô gewant, ich mac verliesen wol mîn lant Hiute ode morgen. daz muoz ich besorgen mit eim manne der ez wer: der ist niendr in mîne her, sit mir der künec ist erslagen: des muoz ich in vil kurzen tagen mir einen herren kiesен ode daz lant verliesen. nune bit ich iuch niht vürbaz sagen (sit ir mînen herren hânt erslagen, sô sit ir wol ein sô vrum man, ob mir iuwer got gan, sô bin ich wol mit iu bewart vor aller fremden hôchvart.

und geloubet mir ein mære: ê ich iwer enbære, ich bræche ê der wîbe site: swie selten wîp mannes bite, ich bæte iuwer ê. ichn nœtlîche iu niht mê): ich wil iuch gerne: welt ir mich?' 'spræch ich nû, vrouwe, nein ich, sô wær ich ein unsælec man. der liebste tac den ich ie gwan, der ist mir hiute widervarn. got ruoche mir daz heil bewarn, daz wir gesellen müẹzen sîn.' dô sprach diu künegîn 'ouwî, mîn her Îwein, wer hât under uns zwein Gevüeget dise minne? es wundert mîne sinne, wer iu geriete disen wân, sô leide als ir mir hât getân, daz ich immer wurde iuwer wîp.' 'mir rietz niuwan mîn selbes lîp.' 'wer rietz dem lîbe durch got?' 'daz tete des herzen gebot.' 'nû aber dem herzen wer?' 'dem rieten aber diu ougen her.' 'wer riet ez den ougen dô?' 'ein râd, des mugt ir wesen vrô, iuwer schœne und anders niht.' 'sît unser ietwederz giht ez sî des anderen vrô,' sprach diu küneginne dô,

'wer ist der uns des wende wirn geben der rede ein ende? dazn vüeget sich niht undr uns drin: nû gên wir zuo den liuten hin. ich habe gester besant die besten über mîn lant: vor den suln wirz niht stillen. ich hân in mînes willen ein teil dar umbe kunt getân. die suln wir an der rede hân: zwâre ez vüeget sich diu baz.' nû tâten sî ouch daz. dô sî sich ze handen viengen unde in daz palas giengen, Und sî hern Îwein gesâhen, benamen sî des jâhen, sine sæhen nie sô schœnen man. dâne lugen sî niht an. ouch.enwart nie rîter anderswâ baz enpfangen dan er dâ. si besâhn in als ein wonder und sprâchen alle besunder 'wer brâhte disen rîter her? ob got wil, ez ist der den mîn vrouwe nemen sol.' in behagt nie rîter alsô wol. alsus vuorten sî in durch die liute enmitten hin, und gesâzen beide an einer stat. diu vrouwe ir truhsæzen bat daz er ir rede tæte und sî des alle bæte

daz sî ez liezen âne zorn: sî het ir disen man erkorn. sî sprâchen, ez wær âne ir haz und in gevielen dehein baz. ein ros daz willelichen gât, swer daz mit sporn ouch bestât, sô gêt ez deste baz ein teil. sî mohtn ir willen unde ir heil ir lîhte gerâten. ich wæn sî rechte tâten: wan dûht siz alle missetân, sî wolt in doch genommen hân. Dô der truhsæze getete sîner vrouwen rede nâch ir bete, und dô sî ouch hôrten sagen, ez kœme inner zehen tagen der kûnec Artûs dar mit her: vund er den brunnen âne wer, sô wærer benamen verlorn: wan er hete der vart gesworn; und als in rechte wart geseit des rîtters burt und vrûmekheit zuo der schœne die sî sâhen, von rechte sî des jâhen, ez wære vrume und êre. waz sol der rede mêre? wan ez was michel vuoge. dâ wâren pfaffen gnuoge: die tâten in die ê zehant. sî gâbn im vrouwen unde lant. vrou Laudîne hiez sîn wîp. sî kund im leben unde lîp

wol gelieben mit ir tugent. dâ was diu burt unt tiu jugent, schœne unde rîcheit. an swen got hât geleit triuwe und andern guoten sin, volle tugent, als an in, und den eins guoten wîbes wert, diu niuwan sînes willen gert, suln diu mit liebe lange lebn, den hât er freuden vil gegebne. Daz was allez wænlich dâ. hie huop sich diu brûtluoft sâ. des tôten ist vergezen: der lebende hât besezen beidiu sîn êre und sîn lant. daz was vil wol zuo im bewant. ezn wart vordes noch sît volleclicher hôchzit ime lande nie mêre. dâ was wûnne und êre, freude und michel rîterschaft, und alles des diu überkraft des man zem lîbe gerte. ir rîterschaft diu werte unz in daz lant vuor der kûnec Artûs, alser swuor, zuo dem brunnen mit her. dô bedorfter guoter wer: im entoht ze herren niht ein zage. ezn kom dar nie in eime tage sô manec guot rîter alsô dô. nû was der herre Keiî vrô

daz er ze spottenne vant. er sprach 'her Kâlogrêant, wa ist iuwer neve her Îwein? ez schînet noch als ez dô schein und ich wænez immer schîne: sîn rede was nâch wîne, dô er iuch hie mit wordten rach. wie er sluoc und wie er stach! Wær im ein trinken noch getragen, er hete zwelf risen erslagen. sîner manheit der ist vil. zwâre ober iuch rechnen wil, sô sûmet er sich. der iuch dâ richet, daz bin ich. ich muoz et aver die nôt bestân, als ich vil dicke hân getân dâ ich vür mînen vriunt stuont. ichn weiz war umbe sî ez tuont, ode waz sî an in selben rechent, die alsô vil gesprochen von ir selber getât, sô ins nieman gestât. ez ist ze vehtenne guot dâ nieman den widerslac tuot. nû ist er uns entwichen, im selben lasterlichen. er vorhte, wærer her komen, wander sichz het an genommen, er müese de nôt vor bestân. ich hetes in doch vil wol erlân. ez swachet manec bœse man den biderben swâ er iemer kan:

ern begêt deheine vrümekeit, und ist im gar ein herzeleit sweme dehein êre geschiht, nû seht, des entuon ich niht, wan ich eim iegelîchen man sîner êren wol gan: Ich prîs in swâ er rehte tuot, und verswîg sîn laster. daz ist guot. ez ist reht daz mir gelinge: wan ezn sprichet vonme dinge niemen minre danne ich. iedoch sô vürdert er sich, swâ sich der bœse selbe lobt; wand niemen vür in gerne tobt, dêr sîne bôsheit prîse. her Îwein ist niht wîse: er möchte swîgen als ich. diu rede dûht sî gemelich, daz er sich dûhte alsô guot: wan alsô schalclichen muot gewan nie rîter dehein. dô sprach mîn her Gâwein 'wie nû, mîn her Keiî? nû sprechent ir doch, ir sît vri valscher rede: wie schinet daz? ir zeigt doch iezuo grôzen haz diseme guoten knehte. nû tuot ir im unrehte. crn gedâhte iuwer nie wan wol, als ein rîter sandern sol: und daz er nû niht komen ist, daz hât im lîhte an dirre vrist

ein selch unmuoze benomen daz er niht mohte komen. durch got ir sult die rede lân. her Keiî sprach 'daz si getân: Ich wând ich reite rehte dran. alsô gerne mac ein man übele tuon alsô wol: sit ez niemen reden sol, ichne gewehenes niemer mêre. nû, daz sin iuwer êre.' der küneec Artûs nam in die hant daz becke dêr dâ hangen vant, und schuof ez vol des brunnen, und wolde rehte erkunnen ob daz selbe mære wâr ode gelogen wære durch daz er was komen dar, unde begôz den stein gar. dô wart daz weter alsô grôz daz es alle die verdrôz die dar komen wâren: und daz si genâren, des heten si verzwivelt nâch. dô wart hern Îweine gâch gewâfent von der veste; wander sâ wol weste, ern beschirmte sinen brunnen, er wurd im an gewunnen. ouch habte her Keiî alsô gewâfent dâ bi. der hete der êrsten tjost gegert: der hete ouch in der küneec gewért.

nû kom her Îwein balde dort ûz jenem walde Ze velde gewalopieret, in engel wîs gezieret. in enirte ros noch der muot: wan diu wâren beidiu guot. sîme herzen liebe geschach, dô er jenen halden sach der allez guot verkêrte, dô in got sô gêrte daz erm solte gelten sîn ungevûegez schelten und sînen tågelîchen spot. des lobet er got. ouch sag ich iu ein mære: swie schalkhaft Keiî wære, er was iedoch vil unervorht. enheten sîn zunge niht verworht, sone gwan der hof nie tiurern helt. daz mugent ir kiesen, ob ir welt, bî sînem ampte des er pfîac: sîn hete niht einen tac geruochet der kûnec Artûs ze truhsæzen in sîme hûs. nû wârens undr in beiden des willen ungescheiden: ir ietweder gedåhte sêre ûf des andern unêre: ir gelinge was ab mislîch. diu tjost wart guot unde rîch, unde der herre Keiî, swie bœse ir wænet daz er sî,

Er zestach sîn sper unz an die hant. dâ mite wart ouch er gesant ûz dem satele als ein sac, daz ern weste wâ er lac. dochn wolter ime niht mêre tuon dehein unêre, wan daz er schimpflichen sprach, dô er in vor im ligen sach 'war umbe ligt ir dâ durch got? nû wârn sî doch ie iuwer spot den âne ir schulde misselanc. vielt ir sunder iuvern dane? michn triege danne mîn wân, ir habt ez gerne getân: ezn mohte iu anders niht geschehn. ir woltet niuwan gerne sehn welch vallen wære. ez ist doch lasterbære.' er nam daz ors, dô erz gewan, und vuortez vür den künee dan. er sprach 'ditz ros hân ich genommen: heizet eteswen komen von iuwerme gesinde, der sichs underwinde. ich enger niht iuwer habe, ichn gewinne ius anders abe.' des gnâdet er im verre. er sprach 'wer sît ir, herre?' 'ich bin ez Îwein.' 'nû durch got.' 'herre, ich bin ez sunder spot.' Nû saget er im mære wie er worden wære

herre dâ ze lande. sîner êrn und Keiî schande vreuten sî sich alle dô: dochn was dâ niemen alsô vrô alsô mîn her Gâwein: wan ez was ie undr in zwein ein selleschaft âne haz, und stuont vil verre deste baz ir ietweders wort. noch lac der herre Keiî dort gar ze spotte in allen: wander was gefallen ûf den lîp vil sêre. und wære ein selch unêre an eim biderben man gesehn der im vil manegiu was geschehn, der sich lasters kunde schamen, der hæte benamen die liute gevlohen iemer mê. ez tete im an dem libe wê, ez was im anders sam ein bast: wandez hete der schanden last sînen rûke überladen. ez enkund im niht geschaden an sînen freuden alsô daz er iender unvrô gegen eime hâre wurde dervon: wan er was lasters wol gewon. Sus hete der strît ende mit sîner missewende und mit lasterlichem schalle. die andern muosen alle

hern Îwein wol gunnen sîns landes und sîns brunnen und aller sîner êren: sine möhtens im gemêren, in was anders niht gedâht. sus het erz umb sî alle brâht. nû reit der künee Artûs durch sîne bete mit im ze hûs. dazn irte unstate noch der muot dane wurde handelunge guot; daz er âne sîn lant nie bezzer kurzwile vant: wan dem was et niht gelich, unde ist ouch unmügelich daz im ûf der erde iht geliches werde. diu künegin was des gastes vrô: ze hern Îweine sprach sî dô 'geselle unde herre, ich gnâde dir vil verre unsers werden gastes hie. zwâre dû hâst ie mêre lôn wider mich.' von schulden vreute sî sich: wan sî was unz an die zît niuwan nâch wâne wol gehît: Nu enwas dehein wân dar an. alrest liebet ir der man. dô ir diu êre geschach daz sî der künee durch in gesach, dô hete sî daz rehte ersehn daz ir wol was geschehn,

und hete ouch den brunnen mit manheit gewonnen und wert ouch den als ein helt. si gedâhte 'ich hân wol gewelt.' der gast wirt schiere gewar, enist er niht ein tôre gar, wie in der wirt meinet; wander im bescheinet an etelicher swære, ist er im unmære: und geherberget ein man dâims der wirt wol gau, deme gezimet deste baz sîn schimpf unde sîn maz. ouch enwirt diu wirtschaft nimmer guot âne willigen muot. nû vant der künec Artûs were und willen dâ ze hûs. unde mîn her Gâwein, an dem niht tes enschein ern wære hövesch unde guot, der erzeicte getriuwen muot hern Îwein sîme gesellen; als ouch die wîsen wellen, Ezn habe deheiniu grœzer kraft danne unsippiu selleschaft, gerâte sî ze guote; und sint sî in ir muote getriuwe undr in beiden, sô sich gebrooder scheiden. sus was ez under in zwein: der wirt und her Gâwein

wârn ein ander liep genuoc, sô daz ir ietweder truoc des andern liep unde leit. hie erzeigte sîne hövescheit her Gâwein der bescheiden man, unde ich sage iu war an. diu maget hiez Lûnete, diu sô bescheidenlichen tete daz sî von grôzer herte hern Îweinen nerte mit ir vil guoten witzen. zuo der gienc er sitzen und gnâdet ir vil sêre, daz sî sô manige êre hern Îwein sime gesellen bôt: wan daz er mislicher nôt âne kumber genas und dâ ze lande herre was, daz ergienc von ir schulden. des gnâdet er ir hulden. wan zwâre ez ist guot, swer gerne vrûmeclîchen tuot, Daz mans ime gnâde sage, daz er dar ane niht verzage (wan dâ hœrt doch arbeit zuo); und swer ouch dankes missetuo, daz man dem erbolgen sî: der ziuhet sich ouch lihte derbî. her Gâwein sprach 'vrou Lûnete, iuwer râd und iuwer bete hât mir liebes vil getân an dem besten vriunde den ich hân.

er hât mirz allez wol geseit, wie im iuwer hövescheit dise êre hât gevüeget, der in durch reht genüeget. er hât von iu ein schœne wip ein rîchez lant unde den lîp und swes ein man zer werlte gert. wær ich sô biderbe und sô wert daz mîn gêret wære ein wîp, ichn hân niht liebers danne den lîp: den gæbe ich iu ze lône um mîns gesellen krône, die er von iuwern schulden treit.' hie wart mit stæter sicherheit ein selleschaft undr in zwein. vrou Laudîne und her Îwein die buten in ir hûse dem kûnige Artûse selh êre diu in allen muose wol gefallen. Dô sî dâ siben naht gebiten, dô was ouch zît daz sî rîten. dôs urloup nemen wolden, die dâ rîten solden, her Gâwein der getriuwe man vuorte hern Îweinen dan von den liuten sunder. er sprach 'ezn ist niht wonder umb einen sæligen man der dar nâch gewerben kan und dem vrûnkheit ist beschert, ob dem vil êren widervert.

doch ringet dar nâch allen tac manec man sô er meiste mac, deme doch dehein êre geschiht: der hât der sælden niht. nû ist iuwer arbeit sæleclîchen an geleit: iu hât erworben iuwer hant ein schœne wîp unde ein lant. sît iu nû wol geschehen sî, sô bewaret daz dâ bî daz iuch iht gehœne iuwers wîbes schœne. geselle, behüetet daz enzît daz ir iht in ir schulden sît die des werdent gezigen daz sî sich durch ir wîp verligen. kêrt ez niht al an gemach; als dem hern Êreke geschach, Der sich ouch alsô manegen tac durch vrowen Ênîten verlac. wan daz er sich erholte sît als ein rîter solte, sô wære vervarn sîn êre. der minnet et ze sêre. ir hât des iuch genüegen sol: dar under lêr ich iuch wol iuwer êre bewarn. ir sult mit uns von hinnen varn: wir suln turnieren als ê. mir tuot anders iemer wê daz ich iuwer künde hân, sol iuwer rîterschaft zergân.

vil manec beschirmet sich dâ mite: er giht ez sî des hûses site, ist er êliche gehît, daz er danne vür die zît sül weder rîten noch gebn: er giht er sül dem hûse lebn. er geloubet sich der beider, vreuden unde cleider die nâch rîterlichen siten sint gestalt ode gesniten: und swaz er warmes an geleit, daz giht er ez sî wirtes cleit. er treit den lîp swâre, mit strûbendem hâre, barschenkel unde barvuoze. und daz ist ie der ander gruoz Den er sime gaste gît: er sprichet 'sît der zît daz ich êrste hûs gewan (daz geloubt mir lützel ieman) sone wart ich nie zwâre des über ze halbeme jâre ichn müese koufen daz korn. hiure bin ich gar verlorn (mich müet daz ichz iu muoz elagen): mir hât der schûr erslagen den besten bû den ich hân. ich vürhte ich müeze dez hûs lân. etswie ernert ich den lîp, wan daz ich sorge um mîn wîp: diene weiz ich war ich tuo. dâ hœret grôz kumber. zuo,

swere daz hûs haben sol: jane mac niemen wizen wol waz ez muoz kosten. ich wære wol enbrosten der werlt an andern dingen, möht ich dem hûse geringen.' sus beginnt er trûren unde clagen unde sime gaste sagen sô manec armez mære daz im lieber wære wærer nie komen dar. der wirt hât wâr, und doch niht gar. daz hûs muoz kosten harte vil: swere ez ze rechte haben wil, Der muoz diu dicker heime sîn: sô tuo ouch under wîlen schîn ob er noch rîters muot habe, unde entuo sich des niht abe ern sî der rîterschaft bî diu im ze suocheinne sî. ich rede als ich erkennen kan. nû durch wen möhte ein vrumer man gerner werden sînen lîp danne durch sîn biderbez wîp? hât er sich êren verzigen und wil sich bî ir verligen, unde giht des danne, gelîch eim bösen manne, daz erz ir ze liebe tuo, dâne gezieh sî niemer zuo: wan ir ist von herzen leit sîn unwirde und sîn verlegenheit.

swie rehte liep er ir sî, sî müet, ist err ze dicke bî. manec ziuhet sich daz an, durch die vorhte des man, daz sis niht verdrieze: swaz er ab des genieze ober sich bî ir verlît, daz haber eine âne nît. iu hât verdienet iuwer hant eine künegin unde ein lant: sult ir nû dâ verderben bî, sô wæn ich daz noch rîcher sî Âne huobe ein werder man. her Îwein, dâ gedenket an, und vart mit uns von hinnen, und gwinnet mit minnen der küneginne ein urloup abe zeime tage der vuoge habe, und bevelhet ir liut unde lant. ein wîp die man hât erkant in alsô stætem muote, diun darf niht mêre huote wan ir selber êren. man sol die huote kêren an irriu wîp und an diu kint, diu sô einvaltec sint daz sî eins alten wîbes rât gebringen mac ze missetât. ir hât alsô gelebt unz her daz ich an iu niht wandels ger, nâch êren als ein guot kneht: nû hât ir des êrsten reht

daz sich iuwer êre breite unde mêre. irte iuch etswenne dez guot michel harter danne der muot, nû mugt ir mit dem guote volziehen dem muote. nû sît biderbe und wol gemuot: sô wirt diu ritterschaft noch guot in manegem lande von uns zwein. des volget mir, her Îwein.' Nû versuochter zehant an die vrouwen daz er vant: wan dô sîn bete was getân, done hete sî des deheinen wân daz er ihtes bæte wan daz sî gerne tæte. daz geweren rou sî dâ ze stat, dô er urloubes bat daz er turnieren müese varn. sî sprach 'daz sold ich ê bewarn:' done mohte sis niht wider komen. sus wart dâ urloup genommen zeime ganzen jâre. ouch swuor sî des, zwâre, unde beliber iht vûrbaz, ez wære iemer ir haz. ouch swuor er, des in diu liebe twanc, in dûht daz eine jâr ze lanc, unde ern sûmde sich niht mê, er kœme wider, möhter, ê, esn latzte in êhaftiu nôt, siechtuom vancnüsse ode der tôt.

sî sprach 'iu ist daz wol erkant daz unser êre und unser lant vil gar ûf der wâge lit, enkumt ir wider niht enzît, daz ez wol geschaden mac. hiute ist der ahte tac nâch sunewenden: dâ sol daz jârzil enden. Sô kumt benamen oder ê: ode ichn warte iwer niht mê. unde lât ditz vingerlîn ein geziuc der rede sîn. ichn wart nie manne sô holt dem ich ditz selbe golt wolde lîhen ode gebn. er muoz wol deste baz lebn der ez treit und an siht. her Îwein, nune verliesetz niht. sînes steines kraft ist guot: er gît gelücke und senften muot: er ist sælec der in treit.' nû was der küne c Artûs bereit: der schiet mit urloube dan. nû reit diu vrouwe mit ir man wol drî mîle ode mê. daz scheiden tete ir herzen wê, als wol an ir gebærden schein. daz senen bedachter Îwein als er dô beste kunde: mit lachendem munde truobetn im diu ougen. der rede ist unlougen,

er was gewelner künne was daz er sich muste schenken ze hant vor der künne Artus, die vrouwe wiere ze hūs. dô träge sich vron Minne der ich von minne sinne Nū geantwurtan kan si sprach 'sage ane, Hartman, gibestú daz der künne Artus bern Íweinen vuort ze hūs und liez sin wip wider varn?' done kund ich mich niht baz bewarn, wan ich sagt ez vür die wârheit: wand ez was mir vür wâr geseit. si sprach, und sach mich twerhes an, 'dune hâst niht wâr, Hartman.' 'vrowe, ich hân entriuwen.' si sprach 'nein.' der strit was lanc undr uns zwein, unz si mich brâhte ûf die vart daz ich ir nâch jehnde wart. er vuorte dez wip unde den man, und volget ime dewederz dan; als ich iu nû bescheide. si wehselten beide der herzen under in zwein, diu vrouwe und her Íwein: im volgte ir herze und sîn lip, und beleip sîn herze und daz wip. dô sprach ich 'vrou Minne, nu bedunket mine sinne daz mîn her Íwein si verloru, sit er sîn herze hât verkorn:

wan daz gap im ellen unde kraft. waz touc er nû ze rîterschaft? er muoz verzagen als ein wîp, sît wîbes herze hât sîn lîp Und sî mannes herze hât: sô üebet sî manliche tât und solde wol turnieren varn und er dâ heime dez hûs bewarn. mir ist zwâre starke leit daz sich ir beider gwonheit mit wehsel sô verkêret hât: wan nune wirt ir dewederes rât.' dô zêch mich vrou Minne, ich wære kranker sinne. sî sprach 'tuo zuo dînen munt: dir ist diu beste vuore unkunt. dichn ruorte nie mîn meisterschaft: ich bin ez Minne und gibe die kraft daz dicke man unde wîp habent herzelôsen lîp und hânt ir kraft doch deste baz.' done torst ich vrâgen vûrbaz: wan swâ wîp unde man . âne herze leben kan, daz wonder daz gesach ich nie: doch ergienc ez nâch ir rede hie. ichn wẹiz ir zweier wehsel niht: wan als diu âventiure giht, sô was her Îwein âne strît ein degen vordes und baz sît. her Gâwein sîn geselle der wart sîn ungevelle.

durch nôt bescheid ich iu wâ von: wan diu werlt ist des ungewon, Swer vrumen sellen kiese, daz er dar an verliese. zwâre geschach ez ê nie, ez geschach doch ime, und sage iu wie. her Gâwein was der höschste man der rîters namen ie gewan: engalt er sîn, daz was im leit; wan er al sîn arbeit ime ze dieneste kêrte, wier im sînen prîs gemêrte. swâ sî turnierens pflâgen, des sî niht verlâgen, dâ muost selch rîterschaft geschehn die got mit êren möchte sehn: dâ vürdert er in allen wîs und alsô gar daz im der prîs aller oftest beleip; unz er der tage ze vil vertreip. im gienc diu zît mit vreuden hin. man sagt daz mîn her Gâwein in mit guoter handelunge behabte unde betwunge daz er der jârzal vergaz und daz gelübede versaz, unz ez ein ander jâr gevienc und vaste in den ouwest gienc. nû wâren sî beide mit vreuden sunder leide von eime turneie komen und het her Îwein genommen

Den pris ze beiden sîten. nû was mit hôchzîten ir herre der kûnec Artûs ze Karidôl in sîme hûs. dô sluogens ûf ir gezelt vür die burc an daz velt. dâ lâgen sî durch ir gemach, unz sî der kûnec dâ gesach und die besten alle mit vrœlichem schalle: wand im was komen mære wie in gelungen wære: er sagt in gnâde unde danc, daz in sô dicke wol gelanc. swer gerne vrûmeelichen tuot, der deme gnâdet, daz ist guot: in gezimt der arbeit deste baz. swâ man mit worten hie gesaz, diu rede was von in zwein. nû kom mîn her Îwein in einen seneden gedanc: er dâht, daz twelen wær ze lanc, daz er von sînem wîbe tete: ir gebot unde ir bete diu heter übergangen. sîn herze wart befangen mit senlîcher triuwe: in begreif ein selch riuwe daz er sîn selbes vergaz. und allez swîgende saz. Er überhörte und übersach swaz man dâ tete unde sprach,

als er ein tôre wære. ouch nâht im bœse mære. im wissagte sîn muot, als er mir selbem dicke tuot: ich siufte, sô ich vrô bin, mînen kûnftegen ungewin: sus nâht ime sîn leit. nû seht wâ dort her reit sîns wîbes bote, vrou Lûnete, von der râte und von der bete daz von êrste was komen daz si in hâte genommen. sî gâhte über jenez velt unde erbeizt vür din gezelt. als schiere sî den kûnec sach, dô kom sî vür in unde sprach 'kûnec Artûs, mich hât gesant mîn vrouwe her in iuer lant: unde daz gebôt sî mir daz ich iuch gruozte von ir, und iwer gesellen über al; wan einen: der ist ûz der zal: der sol iu sîn unmære als ein verrâtære. daz ist hie der herre Îwein, der niender in den siten schein, dô ich in von êrsten sach, daz untriwe ode ungemach Ieman von im geschæhe dem er triwen verjæhe. sîniu wort diu sint guot: von den scheidet sich der muot.

ez schînet wol, wizze Krist, daz mîn vrouwe ein wîp ist, daz sî sich gerechen niene mac. und vorht er den widerslac, sô heter sis vil wol erlân daz er ir lasters hât getân. in dûht des schaden niht genuoc daz er ir den man sluoc, erne tæte ir leides mære unde benæme ir lîp und êre. her Îwein, sît mîn vrouwe ir jugent, schœne, rîcheit, unde ir tugent, wider iuch niht geniezen kan, wan gedâht ir doch dar an waz ich iu gedienet hân? und het sî mîn genozzen lân; ze welhen staten ich iu quam, dô ich iuch von dem tôde nam. ez wære umb iuch ergangen, het ichz niht undervangen. daz ichz ie undervienc, daz iuwer ende niht ergienc, des wil ich iemer riuwec sîn: wan diu schult ist elliu mîn; wan daz ichz durch triuwe tete. ez vuocte mîn rât und mîn bete Daz sî leit und ungemach verkôs daz ir von iu geschach: wand ich het ir ze vil geseit von iuwer vrümekeit; unz sî iu mit vrîer hant gap ir lîp unde ir lant,

daz ir daz soltet bewarn. nû hânt ir sô mit ir gevarn daz sich ein wîp wider die man niemer wol behüeten kan. zwâre uns was mit iu ze gâch. dâ stüende bezzer lôn nâch danne uns vou iu geschiht: ouch gehiezt-irs uns dô niht. mîner vrouwen wirt wol rât, wan daz ez lasterlichen stât zwâre unde ist unbillîch: sî ist iu ze edel und ze rîch daz ir sî kebsen soldet, ob ir erkennen woldet waz rîters triuwe wære. nû ist iu triuwe unmære. doch sulent ir in allen deste wirs gefallen die triuwe und êre minnent und sich des versinnent daz nimmer ein vol vrumer man âne triuwe werden kan. nû tuon ich disen herren kunt daz sî iuch haben von dirre stunt Vür einen triuwelôsen man (da ir wurdet, dâ was ich an ensament meineide und triuwelôs beide); und mac sich der künec iemer schamen, hât er iuch mêre in rîters namen, sô liep im triuwe und êre ist. ouch sulent ir von dirre vrist

mîner vrouwen entwesen: sî wil ouch ân iuch genesen. und sendt ir wider ir vingerlîn: daz ensol niht langer sîn an einer ungetriuwen hant: sî hât mich her dernâch gesant. von herzeleide geschach im daz daz er verdulte unde versaz daz siz im ab der hant gewan. sî neic dem künege und schiet von dan. daz smæhen daz vrou Lûnete dem herren Îweine tete, daz gæhe wider kêren, der slac sîner êren, daz sî sô von ime schiet daz si in entrôste noch enriet, daz smæhliche ungemach, dazs im an die triuwe sprach, diu versûmde riuwe und sîn grôziu triuwe sînes stæten muotes, diu verlust des guotes, Der jâmer nâch dem wibe, die benâmen sime lîbe beide freude unde den sin. nâch eime dinge jâmert in, daz er wære etswâ daz man noch wîp enweste wâ und niemer hôte mære war er komen wære. er verlôs sîn selbes hulde: wan ern mohte die schulde

ûf niemen anders gesagen: in het sîn selbes swert erslagen. ern ahte weder man noch wîp, niuwan ûf sîn selbes lîp. er stal sich swîgende dan (daz ersach dâ nieman) unz er kom vür diu gezelt ûz ir gesiht an daz velt. dô wart sîn riuwe alsô grôz daz im in daz hirne schôz ein zorn unde ein tobesuht, er brach sîn site und sîne zuht und zarte abe sîn gewant, daz er wart blôz sam ein hant. sus lief er über gevilde nacket nâch der wilde. dô diu juncvrouwe bereit, dô was dem künege starke leit hern Îweines swære, und vrâgte wâ er wære (Er wold in getrœstet hân) unde bat nâch ime gân. und als in nieman envant, nû was daz vil unbewant swaz man ime dâ gerief, wander gegen walde lief. er was ein degen bewæret und ein helt unerværet: swie manhaft er doch wære und swie unwandelbære an lîbe unde an sinne, doch meistert vrou Minne

daz im ein krankez wip verkêrte sinne unde lip. der ie ein rehter adamas riterlicher tugende was, der lief nû harte balde ein tôre in dem walde. nû gap im got der guote, der in ûz siner huote dannoch niht vollecliche enliez, daz im ein garzûn widerstiez, der einen guoten bogen truoc: den nam er im und strâlen gnuoc. als in der hunger bestuont, sô teter sam die tôren tuont: in ist niht mêre witze kunt niuwan diu eine umbe den munt. er schôz prislichen wol: ouch gienc der walt wildes vol: Swâ daz gestuont an sin zil, des schôz er ûz der mâze vil. ouch mouse erz selbe vâhen, âne bracken ergâhen. sone heter kezzel noch smalz, weder pfeffer noch Salz: sin salse was diu hungernôt, diuz im briet unde sôt daz ez ein süeziu spise was und wol vor hunger genas. dô er des lange gepflac, er lief umb einen mitten tac an ein niuweriute. dane vander nie mê liute

wan einen einigen man: der selbe sach im daz wol an daz er niht rehtes sinnes was. der vlôch in, daz er genas, dâ bî in sin hiuselîn. dane wânder doch niht sicher sin unde verrigelt im vaste de tür: dâ stuont im der tôre vür. der tôre dûht in alze grôz: er gedâhte 'tuot er einen stôz, diu tür vert ûz dem angen, und ist um mich ergangen. ich arme wie genise ich?' ze jungest dô verdâhter sich 'ich wil im mînes brôtes gebn: sô lâf er mich vil lîhte lebn.' Hie gienc ein venster durch die want: dâ durch rahter die hant und leit im ûf ein bret ein brôt: daz suozt im diu hungers nôt; wand er dâ vor, daz got wol weiz, sô jæmerliches nie enbeiz. waz welt ir daz der tôre tuo? er az daz brôt und tranc dâ zuo eines wazzers daz er vant in einem einber an der want, unde rûmtez im ouch sâ. der einsidel sach im nâ und vlêget got vil sêre daz er in iemer mêre erlieze selher geste; wand er vil lützel weste

wie ez umbe in was gewant. nu erzeicte der tôre zehant daz der tôre und diu kint vil lîhte ze wenenne sint. er was dâ zuo gnuoc wîse daz er nâch der spîse dar wider kom in zwein tagen, und brâhte ein tier ûf im getragen und warf im daz an die tür. daz machte daz er im her vür deste willeclîcher bôt sîn wazzer unde sîn brôt: erne vorht in dô niht mê und was im bezzer danne ê, Und vant ditz ie dâ bereit. ouch galt er im die arbeit mit sînem wiltpræte. daz wart mit ungeræte gegerwet bî dem viure. im was der pfeffer tiure, daz salz, unde der ezzich. ze jungest wenet er sich daz er die hiute veile truoc, unde kouft in beiden gnuoc des in zem lîbe was nôt, salz unde bezzer brôt. sus twelte der unwise ze walde mit der spîse, unze der edele tôre wart gelîch ein môre an allem sîme lîbe. ob im von guotem wîbe

ie dehein guot geschach, ob er ie hundert sper zebrach, gesluoc er viur ûz helme ie, ob er mit manheit begie deheinen loblichen pris, wart er ie hövesch unde wîs, wart er ie edel unde rîch, dem ist er nû vil ungelîch. er lief nû nacket beider, der sinne unde der cleider, unz iu zeinen stunden slâfende vunden Drie vrouwen dâ er lac, wol umb einen mitten tac, nâ ze guoter mâze bî der lantstrâze diu in ze rîten geschach. und alsô schiere do in ersach diu eine vrouwe von den drin, dê kêrte sî über in und sach in vlîzeclîchen an. nû jâch des ein ieglich man wie er verloren wære: daz was ein gengez mære in allem dem lande: und daz sî in erkande, daz was des schult; und doch niht gar. sî nam an im war einer der wunden diu ze manegen stunden an im was wol erkant, unde nande in zehant.

sî sprach her wider zuo den zwein 'vrouwe, lebt her Îwein, sô lit er âné zwîvel hie, oder ichn gesach in nie.' ir höfscheit unde ir güete beswârten ir gemüete, daz sî von grôzer riuwe und durch ir reine triuwe vil sêre weinen began, daz eim alsô vrumen man Diu swacheit solte geschehn daz er in den schanden wart gesehn. ez was diu eine von den drin der zweier vrouwe under in: nû sprach sî zuo ir vrouwen 'vrouwe, ir mugt wol schouwen daz er den sin hât verlorn. von bezzern zühten wart geboren nie rîter dehein danne mîn her Îwein, den ich sô swache sihe lebn. im ist benamen vergebnn, ode ez ist von minnen komen daz im der sin ist benomen. und ich weiz daz als mînen tôt daz ir alle iuwer nôt, die iu durch sînen übermuot der grâve Âliers lange tuot und noch ze tuonne willen hât, schiere überwunden hât, ober wirdet gesunt. mir ist sîn manheit wol kunt:

wirt er des lîbes bereit, er hât in schiere hin geleit: und sult ir ouch vor ime genesn, daz muoz mit siner helfe wesn. diu vrouwe was des trôstes vrô. sî sprach 'und ist der suht alsô daz sî von dem hirne gât, der tuon ich im vil guoten rât, Wand ich noch einer salben hân die dâ Feimorgân machte mit ir selber hant. dâ ist ez umbe sô gewant daz niemen hirnsühte lite, wurd er bestrichen dâ mite, erne wurde dâ zestunt wol varende unde gesunt.' sus wurden sî ze râte und riten alsô drâte nâch der salben alle drî: wand ir hûs was dâ bî vil kûme in einer mîle. nû wart der selben wîle diu juncvrouwe wider gesant, diu in noch slâfende vant. diu vrouwe gebôt ir an daz lebn, dô sî ir hâte gegebn die bühsen mit der salben, daz si in allenthalben niht bestriche dâ mite. wan dâ er die nôt lite, dâ hiez sî sî strîchen an: so entwiche diu suht dan,

under wær zehant genesn. dâ mite es gnuoc möhte wesn, daz hiez sî an in strichen, und daz si ir nämelîchen bræhte wider daz ander teil: daz wære maneges mannes heil. Ouch sante sî bî ir dan vrischiu kleider, seit von gran und cleine lînwât, zwei, schuohe und hosen von sei. nû reit sî alsô balde daz sî in in dem walde dannoch slâfende vant, und zôch ein pfert an der hant, daz vil harte sanfte truoc (ouch was der zoum rîche gnuoc, daz gereite guot von golde), daz er rîten solde, ob ir daz got bescherte daz sî in ernerte. dô si in ligen sach als ê, nûne tweltes niuwet mê, si hafte zeinem aste diu pfert beidiu vaste, und sleich alsô lîse dar daz er ir niene wart gewar. mit ter vil edelen salben bestreich si in allenthalben über houpt und über vüeze. ir wille was sô süeze daz si daz alsô lange treip unz in der bühsen niht beleip.

des wær doch alles unnôt, dâ zuo und man irz verbôt; wan daz si im den willen truoc, esn dûhtes dannoch niht genuoc, Und wær ir sehsstunt mê gewesn: sô gerne sach sî in genesn. und dô siz gar an in gestreich, vil drâte sî von im entweich, wand sî daz wol erkande daz schemelichiu schande dem vrumen manne wê tuot, und bare sich durch ir höfschen muot, daz sî in sach und er sî niht. sî gedâhte 'ob daz geschiht daz er kumt ze sinnen, und wirt er danne innen daz ich in nacket hân gesehn, sô ist mir übele geschehn: wan des schamt er sich sô sêre dazer mich nimmer mêre willeclichen an gesiht.' alsus enoucte sî sich niht unz in diu salbe gar ergienc und er ze sinnen gevienc. dô er sich ûf gerihte und sich selben ane blihte und sich sô griulichen sach, wider sich selben er dô sprach 'bistuz Îwein, ode wer? hân ich geslâfen unze her? wâfen, herre, wâfen, sold ich dan nimmê slâfen!

wand mir mîn troum hât gegebn ein vil harte rîchez lebn. Ouwî waz ich êren pfлак die wîl ich slâfende lac! mir hât getroumet michel tugent: ich hete geburt unde jugent, ich was schœne unde rîch und diseme lîbe vil unglich, ich was hövesch unde wîs und hân vil manegen herten prîs ze rîterschefte bejagt, hât mir mîn troum niht missesagt. ich bejagte swes ich gerte mit sper und mit swerte: mir ervaht mîn eines hant ein schœne vrowen, ein rîchez lant; wan daz ich ir doch pfлак, sô mir nû troumte, unmanegen tac, unze mich der kûnec Artûs von ir vuorte ze hûs. mîn geselle was her Gâwein, als mir in mime troume schein. sî gap mir urloup ein jâr (dazn ist allez niht wâr): do beleip ich langer âne nôôt, unz sî mir ir hulde widerbôt: die was ich ungerne âne. in allem disem wâne sô bin ich erwachet. mich hete mîn troum gemachet zeime rîchen herren. nû waz möhte mir gewerren,

Wær ich in disen êren tôt? er hât mich geffet âne nôt. swer sich an troume kêret, der ist wol gunêret. troum, wie wunderlich dû bist! dû machest rîche in kurzer vrist einen alsô swachen man der nie nâch êren muot gewan: swenner danne erwachet, sô hâstû in gemachet zeime tôren als ich. zwâre doch versihe ich mich, swie rûch ich ein gebûre sî, wær ich rîterschefte bî, wær ich gewâfent unde geriten, ich kund nâch rîterlichen siten alsô wol gebâren als die ie rîter wâren.' alsus was er sîn selbes gast, daz im des sinnes gebrast: und ober ie rîter wart und alle sîn umbevart die heter in dem mære alss im getroumet wære. er sprach 'mich hât gelêret mîn troum: des bin ich gêret, mac ich ze harnasche komen. der troum hât mir mîn reht benomen: swie gar ich ein gebûre bin, ez turnieret al mîn sin. Mîn herze ist mîne lîbe unglich: mîn lîp ist arm, mîn herze rîch.

ist mir getroumet mîn lebn? ode wer hât mich her gegeben sô rehte ungetânen? ich möchte mich wol ânen riterliches muotes: libes unde guotes der gebrist mir beider. als er diu vrischen cleider einhalp bî im ligen sach, des wundert in, unde sprach 'ditz sint cleider der ich gnuoc in mîne troume dicke truoc. ichn sihe hie niemen des sî sîn: ich bedarf ir wol: nû sint ouch mîn. nû waz ob disiu sam tuont? sît daz mir ê sô wol stuont in mîne troume rîch gewant.' alsus cleiter sich zehant. als er bedahte de swarzen lîch, dô wart er eime riter glîch. nu ersach diu juncvrouwe daz daz er unlasterlichen saz: sî saz in guoter kûndekheit ûf ir pferit unde reit, als sî dâ vür wære gesant und vuorte ein pfert an der hant. weder si ensach dar noch ensprach. dô er sî vür sich rîten sach, Dô wærer ûf gesprungen, wan daz er was bedwungen mit selher siecheite daz er sô wol gereite

niht ûf mohte gestân sô er gerne hete getân, unde rief ir hin nâch. dô tete sî als ir wære gâch und niht umb sîn geverte kunt, unz er ir rief anderstunt. dô kêrte sî sâ unde antwurt ime dâ. sî sprach 'wer ruofet mir? wer?' er sprach 'vrouwe, kêret her.' sî sprach 'herre, daz sî.' sî reit dar, gehabt im bî. sî sprach 'gebietet über mich: swaz ir gebietet, daz tuon ich,' und vrâget in der mære wie er dar komen wære. dô sprach her Îwein als ez ouch wol an im schein 'dâ hân ich mich hie vunden des lîbes ungesunden. ichn kan iu des gesagen niht welch wunders geschiht mich dâ her hât getragen: wan daz kan ich iu wol gesagen daz ich hie ungerne bin. nû vüeret mich mit iu hin: Sô handelt ir mich harte wol, und gedienez immer als ich sol.' 'rîter, daz sî getân. ich wil mîn reise durch iuch lân: mich het mîn vrouwe gesant. diu ist ouch vrouwe über ditz lant:

zuo der vüer ich iuch mit mir. ich râte in wol daz ir geruot nâch iwer arbeit. sus saz er ûf unde reit. nû vuorte sî in mit ir dan zuo ir vrouwen. diu nie man alsô gerne gesach. man schuof im guoten gemach von cleidern spîse unde bade, unz daz im aller sîn schade harte lützel an schein. hie het her Îwein sîne nôt überwunden unde guoten wirt vunden. diu vrouwe ouch des niht vergaz sîne wolte wizzen daz wâ ir salbe wære. mit eime lügemære bereite sich diu wîse magt. sî sprach 'vrouwe, iu si geclagt wie mir zer bühsen ist geschehn. ez hât der rîter wol gesehn wie nâch ich ertrunken was. ez was wonder daz ich gnas. Ich kom in michel arbeit, dô ich über daz wazzer reit die hôhen brüke hie bî. daz dez ros unsælec sî! daz strûchte vaste an diu knie, alsô daz ich den zoum verlie unde der bühsen vergaz und selbe kûme gesaz.

do enpfils mir in den wâc zetal, und wizzet daz mich nie kein val starker enmuote. waz hilfet elliū huote? wan daz man niht behalten sol, daz verliuset sich wol.' swie vil gevüege wære ditz guote lügemære, doch zurnte sî ein teil. sî sprach 'heil und unheil diu sint uns nû geschehn: der mac ich beider nû wol jehn. den schaden suln wir verclagen, des vrumen gote gnâde sagen. ich hân in kurzen stunden einen rîter vunden und mîn guote salben vlorn. der schade sî durch den vrumen verkorn. niemen habe seneden muot umb ein verlornez guot des man niht wider müge hân.' hie mite was der zorn ergân. Sus twelte mîn her Îwein hie unz in diu wilde varwe verlie, unde wart ein schœne man. vil schiere man im dô gewan daz beste harnasch daz man vant und daz schœnest ors übr al daz lant. sus wart bereitet der gast daz im nihtes gebrast. dar nâch eines tages vruo sach man dort rîten zuo

den grâven Âliern mit her: ouch satzten sich ze wer die riter vorme lande unde ir sarjande, unde mîn her Îwein, der zaller vorderste schein. si wârn ê vaste in getân, und heten joch die wer verlân, und alsô gar übergiten daz si von vrevellîchen siten vil nâch ê wâren komen: nû wart der muot von in genommen, dô si den gast sâhen zuo den vînden gâhen und sô manliche gebâren. die ê verzaget wâren, die sâhen nû alle ûf in und geviengen manlichen sin. dô liez er sine vrouwen ab der were schouwen Daz dicke kumet diu vrist daz selch guot behalten ist daz man dem biderben manne tuot. sine rou dehein daz guot daz si an in hete geleit: wand sîn eines manheit diu tetes unstetelîchen an einen vurt entwîchen. dâ erkoverten si sich. hie slac, dâ stich. nû wer möhte diu sper elliū bereiten her

diu mîn her Îwein dâ brach? er sluoc unde stach, und die sine alle, daz jene mit maneges valle muosen unstatlichen von dem vurte entwîchen und in den sige lâzen. die der vluht vergâzen, die wurden âne zagen alle meisteil erslagen und d'andern gevangen. hie was der strît ergangen nâch hern Îweines êren. si begunden an in kêren den lop unde den prîs, er wære biderbe hövesch unde wîs, unde in möhte niht gewerren, heten sin zeime herren Ode einen im gelîchen. sî wunschten vlizeclîchen daz sî des beidiu zæme daz in ir vrouwe næme. sus wart dem grâven Âliere ungenædeclichen schiere gevangen unde erslagen sîn her. dannoch entwelter ze wer mit einer lützelē kraft, und tete selhe rîterschaft die nieman gevelschen mohte. dô daz niht langer 'entohte, dô muoser ouch entwîchen, und vlôch dô werlîchen

gein einer sîner veste die er dâ nâhen weste. dâ er zuo dem hûse vlôch, dâ was der burcberc sô hôch, beidiu sô stechel und sô lanc, daz in sunder sînen danc her Îwein ergâhte an dem tor: dâ vienc er in vor und nam des sîne sicherheit daz er gevangen wider reit in der vrouwen gewalt, diu sîn dâ vor sô dicke engalt und ir verwüestet hëte ir lant. er satzte ir gisel unde pfant daz er al sîn schulde buozte unz ûf ir hulde. Ezn wart nie riter mêre erboten grœzer êre dan mîme hern Îweine geschach, dô man in zuo rîten sach und sînen gevangen man eneben ime vuorte dan. dô in diu grævinne enpfie unde engegen ime gie mit allen ir vrouwen, dô mohte man schouwen vil vriuntliche blicke. si besach in dicke und dicke: und wolter lones hân gegert, des wærer dâ gewert: sîne versagt im lip noch guot. sone stuont ab niender sîn muot:

ern wolde dehein ander lôn. dô diu vrowe von Nârisôn ir nôt überwant von gehülfiger hant, do begunder urloubes gern. desn wolte sî in niht gewern: wan an im stuont al ir muot. si bedûhte des, er wære guot ze herren in ir lande: und endûhtez sî niht schande, sî hete geworben umb in. und mich entriege mîn sin, swie ez doch deheiniu tuo, dâ hœret grœzer wîsheit zuo Dazs umbe den wurben von deme sî niht verdurben, dan sî sich den liezen erwerben von deme sî müesen verderben. sî bat in mit gebærden gnuoc; daz er doch harte riuge truoc. beide gebærde unde bete die man im durch belîben tete, daz was verlorn arbeit: wan er nam urloup unde reit, unde snochte dâ zehant den næhsten wec den er vant, und volget einer strâze. lûte âne mâze hôrter eine stimme clägelich und doch grimme. nune weste mîn her Îwein von wederm sî wære von den zwein,

von wurme ode von tiere: er bevandez aber schiere. wan diu selbe stimme wist in durch michel waltgevelle hin dâ er an einer blœze sach wâ ein grimmer kampf geschach, dâ mit unverzagten siten ein wurm unde ein lewe striten. der wurm was starc unde grôz: daz viur im ûz dem munde schôz. im half diu hitze unde der stanc, daz er den lewen des betwanc Daz er al lûte schrê. hern Îwein tete der zwivel wê wederm er helfen solde, und bedâht sich daz er wolde helfen dem edelen tiere. doch vorhter des, swie schiere des wurmes tôt ergienge, daz in daz niht vervienge, der leu bestüend in zehant. wan alsô ist ez gewant, als ez ouch undern liuten stât: sô man aller beste gedienet hât dem ungewissen manne, sô hüeter sich danne daz ern iht beswiche. dem was ditz wol geliche. doch dâhter als ein vrumer man, er erbeizte und lief den wurm an und sluoc in harte schiere têt und half dem lewen ûz der nôt.

dannoch do er den wurm ersluoe, dô beter zwivel genuoe daz in der lewe wolde bestân: daz wart im anders kunt getân. sich bôt der lewe an sinen vuoz und zeict im unsprechenden gruoze mit gebærde und mit der stimme. bie liez er sine grimme und erzeict im sine minne als er von sime sinne Aller beste mohte und eime tiere tohte. er antwurt sich in sine pflege, alser in sit alle wege mit sime dienst êrte und folgt im swar er kêrte und gestuont im ze aller siner nôt, unz si beide schiet der tôt. der lewe und sin herre die vuoren unverre unz er ein tier ersmahte. nû twanc in des sin ahte, beidiu der hunger und sin art, dô er des tieres innen wart, daz er daz gerne wolde jagen. dazn kunderme anders niht gesagen, wan er stuont und sach in an und zeicte mit dem munde dan: dâ mite teterz im kunt. dô gruozten als ein suochhunt und folgt im von der strâze wol eines wurfes mâze,

dâ er ein rêch stênde vant, unde vienc ouch daz zehant und souc im ûz daz warme bluot: dazn wær sîm herren doch niht guot. nû schant erz dâ erz weste veizt und aller beste, und nam des einen brâten dan. nû gienc ouch diu naht an. Er schurft ein viur und briet daz und az ditz ungesalzen maz âne brôt und âne win: ezn moht et dô niht wæher sîn. daz ime dâ überiges schein, daz az der lewe unz an diu bein. her Îwein legt sich unde slief: der lewe wachet unde lief umb sîn ros unde umb in. er hete die tugent und den sin daz er sîn huote alle zît, beidiu dô unde sit. daz was ir beider arbeit, daz er nâch âventiure reit rehte vierzehen tage, und daz mit selhem bejage der wilde lewe disem man sîne spise gewân. dô truoc in diu geschiht (wandern versach sichs niht) vil rehte an sîner vrouwen lant, dâ er den selben brunnen vant, von dem im ê was geschehn, als ich iu hân verjehn,

grôz heil und michel ungemach. als er die linden drobe sach, und dô im dâ zuo vor erschein diu kapelle unde der stein, dô wart sîn herze des ermant wie er sîn êre und sîn lant Hete verlorn und sîn wîp. des wart sô riuwec sîn lîp, von jâmer wart im sô wê, daz er vil nâch als ê von sîme sinne was komen, unde im wart dâ benomen des herzen kraft alsô gar daz er zer erde tôtvar von dem orse nider seic. und als er vür sich geneic, daz swert im ûz der scheide schôz: des güete was alsô grôz deiz im durch den halsperc brach und eine grôze wunden stach, daz er vil sêre bluote. des wart in unmuote der lewe, wânde er wære tôt, und was im nâch dem tôde nôt. er rihte dez swert an einen strûch und wolt sich stechen durch den bûch, wan daz im der herre Îwein dannoch lebende vor scheîn. er riht sich ûf unde saz unde erwante dem lewen daz daz er sich niht ze tôde stach. her Îwein clagte unde sprach

'unsælec man, wie verstû nû! der unsæligeste bistû der ie zer werlde wart geboren. nû wie hâstû verlorn Diner vrouwen hulde! jane wær diu selbe schulde zer werlte niemens wan dîn, ezn müese sîn ende sîn. er ist noch baz ein sælec man der nie deheine gewan dan der êre gewinnet und sich sô niht versinnet daz ers behalten künne. êre unde wünne, der hât ich beider alsô vil daz ichz gote clagen wil daz ich ir ie sô vil gewan, ichn solte stæte sîn dar an. wær mir niht geschehen heil und liebes ein vil michel teil, sone west ich waz ez wære: âne senede swære sô lebt ich vrîliche als ê: nû tuot mir daz senen wê. daz mir daz solte geschehn daz ich muoz an sehn schaden unde schande in mîner vrouwen lande! ditz ist ir erbe und ir lant: daz stuont ê in mîner hant, daz mir des wunsches niht gebrast: des bin ich alles worden gast.

ich mac wol clagen mîn schœne wîp: war umbe spar ich den lîp? Mîn lîp wære des wol wert daz mich mîn selbes swert zehant hie an im ræche und ez durch in stæche. sit ich mirz selbe hân getân, ich solts ouch selbe buoze enpfân (nû gît mir doch des bilde dirre lewe wilde, daz er von herzeleide sich wolde erstechen umbe mich, daz rehtiu triuwe nâhen gât); sit mich mîn selbes missetât, mîner vrouwen hulde, unde dehein ir schulde, ân aller slahte nôt verlôs, und weinen vür daz lachen kôs.' dô disiu grôze clage geschach, daz gehörte unde sach ein juncvrouwe, diu leit von vorhten grœzer arbeit danne ie dehein wîp, wand si gevangen ûf den lîp in der kapellen lac. und dô er dirre clage pfac, dô sach si hin vür durch eine schrunden an der tür. si sprach 'wer claget dâ? wer?' 'wer vrâget des?' sprach aber er. si sprach 'herre, daz hie clagt. daz ist ein alsô armiu magt

Daz von deheiner sache von manegerm ungemache deheiniu armer möhte lebn. er sprach 'wer möhte iu gebn sô grôzen kumber als ich hân? ir mugt wol iuwer clage lân: wan der vervluochte daz bin ich. sî sprach 'daz ist unmügelich daz iuwer kumber müge sîn des endes iender sam der mîn. ich sihe wol daz ir stêt unde ritet unde gêt swar iuch iuwer wille treit: sô ist mir daz vür geleit, ich bin alsô gevangen, verbrant ode erhangen wird ich morgen an dem tage. nieman ist der mich übertrage mirne werde der lîp benomen. er sprach 'vrowe, wie ist daz komen?' sî sprach 'hab ich deheine schulde, got welle daz ich sîne hulde niemer gewinne. vür eine verrâtærinne bin ich dâ her in geleit: daz lantvolc hât ûf mich geseit eine schult sô swære: und ob ich schuldec wære, sô wær ich grôzer zühte wert. ez nam in dem jâre vert Des landes vrouwe einen man: dâ missegienc ir leider an:

die schulde legent sî ûf mich. nû herre got, waz moht ich daz ir an im missegie? zwâre geriet ich irz ie, daz tet ich durch ir êre. ouch wundert mich ie mêre daz ein alsô vrumer man sô starke missetuon kan: wander was benamen der beste den ich lebende weste. ouch enist ez von den schulden sîn: ez ist von den unsælden mîn. alsus ring ich mit sorgen. sî beitet mir unz morgen; sô nement sî mir ouch den lîp. wan ich bin leider ein wîp, daz ich mich mit kampf ih wer: so enist ouch niemen der mich ner. er sprach 'sô lâze ich iu den strit, daz ir angesthafter sît dan ich, sît ez sô umbe iuch stât daz ez iu an den lîp gât, ob ir iuch niht mugt erwern.' sî sprach 'wer möchte mich ernern? der joch den willen hæte daz erz gerne tæte, wer hete dannoch die kraft ern dulte dirre meisterschaft? Wan ez sint drî starke man die mich alle sprechent an. ich weiz ir zwêne, und ouch niht mê, an den sô volleclichen stê

diu tugent und diu manheit, die sich sô starke arbeit durch mich armen næmen an. daz sint ouch zwêne selhe man, ir ietweder slüege âne wer disses volkes ein her; und weiz ez ouch als mînen tôt, west ir ietweder mîne nôt, er kœme und væhte vür mich. der dewedern mach ich ze disen zîten niht hân, und muoz mir an den lîp gâu: ouch entrûw ichs niemen wan den zwein. dô sprach her Îwein ‘nû nennet mir die drî man die iuch mit kampfe sprechent an: und nennet mir danne mê die zwêne umbe diez sô stê, der ietweder sô vrum si daz er eine væhte wider drî.’ sî sprach ‘ich nennes alle wol. die drî der gewalt ich dol, der ein ist truhsæze hie, und sîne bruoder, die mir ie wâren nîdec unde gehaz, wand mich mîn vrouwe hâte baz Danne sî mir iht gunden, und habent sî des überwunden daz sî nû wol übersiht swaz mir leides geschijt. dô mîn vrouwe ir man nam, der ir nâch wâne wol gezam

und sî dar nâch niht wol enlie, dô begâben sî mich nie mit tägelîcher arbeit, sine zigen mich der valscheit daz ez schüefe niuwan mîn list daz ez ir sus missegangen ist. und swaz ouch mir dâ von geschiht, sône lougen ich des niht ezn vuocte mîn rât und mîn bete daz siz ie umb in getete; wand ich mich wol umb in versach, geschæhez als ez doch geschach, sî hetes vrume und êre. nû velschent sî mich sêre, ich habe sî verrâten. wand sî mir dô tâten michel unreht unde gewalt, dô wart mîn leit vil manecvalt, unde ich arme verlorne vergâhte mich mit zorne. wan daz ist gar der sælden slac, swer sime zorne niene mac gedwingn, ern überspreche sieh. leider alsô tet ich mich. Ich hân mich selben verlorne. ich sprach durch mînen zorn, swelhe drî die tiursten man sich von dem hovē næmen an daz siz bereiten wider mich, einen rîter vund ich der mit in allen drin strite, ob man mir vierzec tage bite.

der rede giengen si dô nâch: wand mir was gewesn ze gâch: man liez mich ir niht wandel hân, und enwart ouch des niht erlân ichn schüef in rehte sicherheit daz ich der rede wære bereit als ich dâ hete gesprochen, daz ich in sehs wochen mich mit kampf löste. die zwên der ich mich trôste, die reit ich suochende in diu lant, daz ich ir dewedern vant. dô suocht ich den künec Artûs, und envant dâ nieman zê hûs der sich ez wolde nemen an: sus schiet ich âne kempfen dan. des wart ich sô ze spotte hie daz ez mir an mîn herze gie. sus wurfen si mich dâ her in, als ich des beitende bin daz sich mîn lip sol enden: wan die mirz hulfen wenden, Die sint mir nû vil ungereit. mir hulfe von dirr arbeit sweder ez weste von in zwein, her Gâwein ode her Îwein. 'welhen Îwein meinet ir?' sprach er. si sprach 'herre, daz ist der durch den ich lîde disiu bant. sîn vater ist genant der künec Vrîên. der kumber dâ ich inne stên,

der ist von sînen schulden. mir was ze sînen hulden alze liep und alze gâch, und ranc starke dar nâch daz er herre wurde hie leider als ez ouch ergie. er behagte mir ze gâhes wol: wan swer den man erkennen sol, dâ hœret langer wîle zuo. ich liept in leider alze vruo: ich wânde er kunde lônên baz. mîn rât vuoct ime daz daz sichs mîn vrouwe underwant und gap im lîp unde lant. nû hât er uns beswîchen im selben schedelîchen. ez ist sîn unsælekheit: wan des swüer ich wol einen eit, mîn vrouwe ist ein sô ødel wîp daz er niemer sînen lîp Bestætet ûf der erde ze hôheren werde: sî ist sô schœne und sô rîch, wær sî sîme lîbe gelîch, sô vreuter sich daz siz tete. dô sprach er 'heizt ir Lûnete?' sî sprach 'herre, jâ ich.' er sprach 'sô erkennet mich: ich bin Îwein der arme. daz ez got erbarme daz ich ie wart geboren! nû wie hân ich verlorn

miner vrouwen halde! sit diu selbe schulde niemens ist wan min, der schade sol ouch min eines sin: ichn weiz wem ich si märe gebe. jane müet mich niht wan daz ich lebe: ouch sol ich schiere töt ligen. zwäre ich trûwe wol gesigen an den rîtern allen drin, die iuch geworfen hânt her in: und swenn ich iuch erlœset hân, sô sol ich mich selben slân. min vrouwe muoz doch den kampf gesehn: wander sol vor ir geschehn. ichn weiz waz ich nû märe tuo wan daz ich ir morgen vruo über mich selben rihte und zuo ir angesichte Durch ir willen lige töt: wand ez muoz doch min senedu nôt mit dem tôde ein ende hân. ditz sol allez ergân daz si niht wizzen wer ich si, unz ich erstirbe und die dri an den ich iuch rechnen sol: sô weiz min vrouwe danne wol, bevindet siz, wer ich bin und daz ich lip unde den sin vor leide verlorn hân. diu râche sol vor ir ergân. ê ist reht daz ich in lône der êrbæren krône

die ich von iuwern schulden truoc. ich hete êren genuoc: waz half mich daz ich golt vant? ez ist et vil unbewant ze dem tôren des goldes vunt: er wirfet ez doch hin zestunt. swie ich zuo mir selben habe getân, ir sult iedoch gewis hân, ichn lâze iuch niht under wegen. wan dô ich tôt wære gelegen, dô hulft ir mir von sorgen: alsô tuon ich iu morgen.' nu entwâfent er sîn hqrbet: nû wartz im ouch geloubet daz er her Îwein wære. geringet wart ir swære: Von freuden sî weinde und sprach als siz ouch meinde 'mirn mac nû niht gewerren, sit daz ich minen herren lebende gesehen hân. ez was mîn angest und mîn wân daz ir wæret erslagen. ichn hôrte dâ ze hove sagen von iu dehein daz mære daz iuwer iht wære.' er sprach 'mîn vrou Lûnete, wâ was der noch ie tete des alle vrouwen ruochten die sîn dienst suochten, mîn lieber herre Gâwein, der ie nâch vrouwen willen schein,

ie ranc und noch tuot? het ir im gesaget inwern muot, er hete iuch alles des gewert des ir an in hetet gegert.' sî sprach 'het ich den vunden, sô het ich überwunden mîne sorgen zehant. daz ich sîn dâ niene vant, daz was wunderliche komen. in was diu künegin genommen. daz hete ein riter getân: den woltens alle gelastert hân, und was in den selben tagen, dô ich dar kom durch clagen, Her Gâwein nâch gestrichen. ich liez dâ wærlichen umb die vrouwen grôz clagen, unde ouch umb sîn nâch jagen. sî vorhten daz sî daz wip verlûrn, und dâ zuo er den lîp; wand er niht wider wolte komen, er erviere wie sî wære genommen.' nû was im daz mære durch sînen sellen swære. er sprach 'nû müez in got bewarn. vrouwe, ich muoz hinnen varn und mich bereiten dar zuo. und wartet mîn morgen vruo: ich kume ze guoter kampfzit. und alsô hövesch sô ir sit, sone saget niemen wer ich sî. zwâre ich slahe sî alle drî,

ich hilfe iu von dirre nôt, ode ich gelige durch iuch tôt.' sî sprach 'lieber herre, sô stüendez iuch ze verre ze wâgen ein als vordern lîp umb ein alsus armez wîp. mir wær der rede gar ze vil: und wizzet daz ich immer wil 4320 . den willen vür diu werc hân: ir sult der rede sîn erlân. iwer lebn ist nützer danne dez mîn. und möht ez ein wâge sîn, Sô torst ich iuch wol bîten: ditz ist gar wider den siten daz ein kämpfe drî man. diu liute habent sich joch dar an daz zwêne sîn eines her: sô wære ditz gar âne wer. verlürt ir durch mich den lîp, sone wart nie kein armez wîp sô unsælec als ich, und slüegen ouch danne mich. so ist bezzer mîn verderben danne ob wir beidiu sterben.' er sprach 'diu rede sol bezzer wesn: wan wir sulen beidiu gnesn. zwâre ich wil iuch trœsten wol, wan ichz ouch bewæren sol. ir hât sô vil durch mich getân: ob ich deheine triuwe hân, sone sol ich daz niht gerne sehn daz iu kein schade mac geschehn

dâ ichz kan erwenden. diu rede sol sich enden: sî müezen iuch lâzen vrî, ode ich erslahe sî alle dri.’ nû was ir durch ir vrümekheit ir êre unde ir vrume leit. sî wære gerne genesn, und möht ez alsô sîn gewesn daz er den lip niht verlür. sît ab er mit vrîer kür Den kampf wolde bestân, sô lie siz sîn und muosez lân. nû entwelter dâ niht mê (sîn lewe volget im als ê) und reit unz er ein hûs sach. dâ was guot rîters gemach. diu burc was harte veste und alle wîs diu beste vür stürme und vür mangen: den berc hete bevangen ein burcmûre hôch unt dic. doch sach vil leiden anblic der dâ wirt was genant: im was diu vorburc verbrant unz an die burcmûre gar. nû kom min her Îwein dar, als in der wec lêrte. dô er ze dem hûse kêrte, dô wart diu brûke nider lân, und sach entgegen im gân sehs knappen wætlîche: sî zæmen wol dem rîche

von aller ir getât an ir libe und an ir wât. von den wart er wol enpfangen. vil schiere kom gegangen der wirt als ein bescheiden man: der gruozt in unde vuort in dan ûf daz hûs an guot gemach, da er rîter unde vrouwen sach Eine sûberliche schar. dô nam er ir beider war, ir gebærde unde ir muotes: dône vander niht wan guotes. swer ie kumber erleit, den erbarmt des mannes arbeit michel harter dan den man der nie deheine nôt gewan. der wirt het selbe vil gestriten und ûf den lîp vil geriten, und geloupte dem gaste vil diu baz; wander allez bi ime saz unz daz er entwâfent wart. der wille was dâ ungespart von manne und von wîbe, er wart sîme lîbe ze dienste gekêret und über state gêret. sî wurden vil vaste ze liebe deme gaste alle wider ir willen vrô: wand ir herze meindez niender sô. in hete ein täglich herzeleit vil gar ir freude hin geleit;

dâ er niht umbe enweste, er als ander geste. ouch enhet ir vrede unde ir schimpf deheiner slahte gelimpf. diu trügevrede ist ein niht, diu sô mit listen geschiht, Sô der munt lachet und daz herze krachet vor leide und vor sorgen. ouch ist ez unverborgen, ezn kiese listvreude ein man der sich iht versinnen kan, und welch freude des herzen ist. ouch half si unlange ir list: diu vorhte und die sorgen die ûf ten tac morgen heten wip unde man, die sigten ir freuden an. daz trûren behapte den strit, und verkêrte sich, in kurzer zît danne iu iemen kan gesagen, in ein weinen unde ein clagen diu freude der man ê jach. als daz her Îwein ersach, er vrâgte den wirt mære, waz im geschehen wære. er sprach 'sagt mir, herre, durch got waz iu werre, und waz dirre wehsel diute: daz ir und iuwer liute sô niuweliche wâren vrô, wie hât sich daz verkêret sô?'

dô sprach der hûsherre 'waz uns arges werre, der mære endurfet ir niht gern. iedoch enwelt irs niht enbern, Sag ich iu unser arbeit, so beswært ez iuch: daz ist mir leit. ez ist iuch nützer verswigen, und vreut iuch mitten sæligen. ich bin der Unsælden kint: mit ten die unsælec sint muoz ich leider sîn unvrô: wan ez geziuhet mir alsô.' dô bat der gast unz an die stunt daz im der wirt tete kunt alle sine swære. er sprach 'mir ist unmære der lîp immer mêre: wand ich alte ân êre, und mir wære bezzer der tôt. ich lîde laster unde nôt von einem sô gewanten man daz ich mich gerechen niene kan. mir hât gemachet ein rise mîne huobe zeiner wise und hât mich âne getân alles des ich solde hân, unz an die burc eine; und sag iu doch wie cleine alle mine schulde sint. ich hân ein tohter, ein kint: daz ist ein harte schœniu magt: daz ich ime die hân versagt,

dar umbe wüestet er mich. zwære ê verlius ich Daz guot und wâge den lîp, ê si immer werde sîn wîp. dâ zuo hab ich sehs kint, die alle ritter sint: die hât er gar gevangen, und hât ir zwêne erhangen daz ichz ane muose sehn. wem möhte leider geschehn? er hât ir noch viere: die verlius ich aber schiere. wan die selben vüeret er vür die burc morgen her: die wil er vor mir tœten und mich dâ mite nœten daz ich im ir swester gebe. got welle daz ichz niht gelebe und sende mir hînaht den têt. er giht (daz ist mîn meistiu nêt), swenn er mirs an beherte, mit selhem ungeverte weller ir ze wibe haben rât, und dem bœsten garzûn den er hât dem weller si gebn. mac mir danne mîn lebn niht wol unmære sîn? der rise heizet Harpîn. hab ich den lasterlîchen spot verdienet iender umbe got, wold er daz rihten über mich unde lieze den gerich

Über mîn unschuldigen kint, diu biderbe unde guot_sint! dô der gast sîn ungemach beidiu gehôrte unde gesach, daz begund im an sîn herze gân. er sprach 'wie habt ir daz verlân irn suochtet helfe unde rât dâ sî iu ze suochen stât, in des kûnec Artûses lande? ir habet dise schande âne nôt sô lange erliten. ir soltet dar sîn geriten: er hât gesellen, under den ir het vunden eteswen der iuch des risen belôste.' er sprach 'der mir ze trôste dâ wære der beste und kœme, oberz weste, und hete ich in dâ vunden, dern ist ze disen stunden niht dâ ze lande. der kûnec treit ouch die schande der er vil gerne enbære. welt ir ein vremde mære hœren, daz wil ich iu sagen. ez kom in disen selben tagen ein riter geriten dar und nam des vil rehte war daz er zer selben stunde die von der tavelrunde Umbe den kûnec sitzen sach. er erbeizte unde sprach

'ich bin ûf gnâde her komen. herre, ich hân von iu vernomen die milte und die vrûmekheit, ich gedinge mir sî unverseit ein gâbe der ich von iu ger: nâch der bin ich komen her.' dô sprach der kûnec Artûs 'swaz ir gebietet hie ze hûs, des sît ir alles gewert, ist daz ir betelîches gert.' er sprach 'daz sult ir an mich lân. als ich von iu vernomen hân, sô müese iu daz missezemen, woldet ir iht ûz nemen. swaz ez nû sî des ich bite, dâ êret mich mite und lât die bete her ze mir, wand ich ir anders gar enbir.' daz widerreite der kûnec Artûs. alsus schiet er ûz sîme hûs vil harte zornliche dan. er sprach 'ez ist vil manec man an disem kûnige betrogen: diu werlt hât vil von im gelogen. man sagt von sîner vrûmekheit, ezn wurde riter nie verseit swes er in ie gebæte. sîn êre sîn unstæte, Dem er wol gevalle.' ditz bâgen hôrten alle. die von der tavelrunde. sî sprâchen mit ein munde

'herre, ir habet missetân, welt ir den riter alsus lân. weme habt ir ouch iht verseit? lât ez an sîne hövescheit. er gelîchet sich wol einem man der betelîche biten kan. scheidet er von hinnen mit selhen unminnen, ern sprichet nimmer mêre dehein iuwer êre.' der küneec sich bedâhte und schuof daz man in brâhte, unde gelobet im des stæte, ze leistenne swes er bæte. ouch endorfter mêre sicherheit: wan sîn wort daz was ein eit. dô bat er als ein vrâvel man daz er müese vüeren dan sîn wip die küneginne. daz hete die sinne dem künege vil nâch benomen. er sprach 'wie bin ich überkomen! die disen rât tâten, die hânt mich verrâten.' dô in der riter zürnen sach, dô trôster in unde sprach 'Herre, habent guote site, wand ich ir anders niht enbite niuwan mit dem gedinge, ob ich sî hinnen bringe; ir hât der besten ein her: ob ich si in allen erwer

die mir durch si rîtent nâch. ouch ensol mir niuwet wesen gâch, niuwan als alle mîne tage; und wizze wol swer mich jage daz ich sin wol erbite und nimmer gerîte deste drâter umb ein hâr. nû muose der kûnec lâzen wâr daz er gelopte wider in: er vuorte de kûneginne hin. unde dô si schiet von dan, dô sach si jæmerlichen an alle die dâ wâren, und begunde gebâren als ein wip diu sêre sorget umb ir êre, unde mantes als si kunde mit gebærde und mit munde, daz man si ledeget enzît. der hof enwart vor noch sit sô harte nie beswæret: doch wârens unerværet die si dâ vüeren sâhen. dâ wart michel gâhen: Ez rief dirre und rief der 'harnasch unde ros her:' und swer ie bereit wart, der jagte nâch ûf die vart. si sprâchen 'es wirt guot rât, sit erz uns sô geteilet hât: er vüeret si unverre, ezn si daz unser herre

mit im wider uns sî. dô sprach der herre Keiî 'in beschirmt der tiuvel noch got, der uns disen grôzen spot an mîner vrouwen hât getân, ezn müez im an sîn êre gân. ich bin truhsæze hie ze hûs, unde ez hât der künec Artûs verschuldet umbe mich wol daz ich gerne ledegen sol mîne vrouwen sîn wîp. zwâre ez gêt im an den lîp: ern vüert sî sunder mînen danc nimmer eines ackers lanc. weizgot, wester mich hie, ern wære her ze hove nie ûf sus getâne rede komen: ich sol sim schiere hân benomen. iu solte versmâhen daz gemeine nâch gâhen. waz sol dirr ungevüeger schal, daz dirre hof über al Durch einen man wil rîten? ich getrûw im wol gestrîten: ich eine bin im ein her. ern gesetzt sich nimmer ze wer, swenn er daz siht daz ich ez bin: unde waz hulfez in? ir mugt wol alle hie bestân, sît ichz mich an genommen hân: ich erlâze iuch aller arbeit. hie mite was ouch er bereit

unde was der êrste an in: ouch geriet der êrste ungewin ze sînen unêren, als er den gast bat kêren. daz was in einem walde. ouch kêrter alsô balde: mit grôzen kreften stach er in enbor ûz dem satele hin, daz im ein ast den helm gevienc und bî der gurgelen hienc. und wan daz in sîn geverte der übele tiuvel nerte, sô wær er benamen tôt: doch leit er hangende nôt. er wart doch leider ledec sît: doch hienc er dâ unz an die zît daz er vor in allen leit laster unde arbeit. der næhste was Kâlogrêant der in dâ hangende vant Niht anders wan als einen diep: dern lôst in niht, ez was im liep. der gâhte ouch an den gast: vil lützel doch des gebrast daz im niht same geschach, wandern ouch dernider stach. die in sît hangen sâhen, den benam daz gâhen, der unwille, und sîn schalkheit, daz dâ männlich vür reit. in erreit ûfme gevilde Dodines der wilde

unde brach ûf im sîn sper: dâ mite wart ouch er gesetzet ûf daz gras als lanc sô daz sper was. Segremors erreit in dô: dem geschach rehte alsô. dar nâch erreit in Hênete, demer alsam tete. Pliopleherîn und Mîllemargot die wurden beide ir selber spot mit selhem ungevelle, und Îdêrs ir geselle. daz ich sî alle nenne die ich dâ erkenne, daz ist alsô guot vermiten: wan alle die im nâch riten die streuter nâch ein ander. nieman envander Der die vrouwen lôste. ir wære komen ze trôste mîn her Gâwein, der ie in rîtters êren schein: done was er leider niender dâ. er kom aber sâ morgen an dem næhsten tage, unde durch des kûneges clage sô ist er nâch gestrichen und wil im nâmelichen wider gewinnen sîn wip ode verliesen den lîp. ich suocht in in den selben tagen, als ich ez gote wil clagen.

daz ich in dâ niht envant. ez ist mir sô umb in gewant daz er mir müese gestân ze mime kumber den ich hân: mîn wîp ist sin swester. ich kom alrest gester: und sît ich sin âne komen bin, so ist aller mîn trôst hin. enmuoz ich niht wol sorgen? wan nû verlius ich morgen alle mîn êre. nû erbarmt ez sêre den rîter der des lewen pfîac. er sprach 'ich sol um mitten tac morgen komen an eine stat dar mich ein vrouwe komen bat Diu mir vil gedienet hât, und der ez an den lîp gât, enkum ich dar niht enzît. ob ir des gewis sît daz uns der rise kume vruo, swenn ich mîn reht getuo daz ich im an gesige, ob ich vor im niht tôt gelige, daz ich umbe den mitten tac dannoch hin komen mac dar ich mich gelobet hân, sô wil ich in durch iuch bestân und durch iuwer edel wîp: wan mir ist mîn selbes·lîp niht lieber danne·ir bruoder·ist.' nû kom gegangen an der vrist

des wirtes tohter und sîn wip. nu gesach er nie kindes lîp schœner dan diu selbe magt, enhete sî sich niht verclagt. nu enpfingen sî in beide wol, als man lieben gast sol. dô sprach der wirt mich dunket guot daz ir vil dienesthaften muot traget iwerme gaste. er hât sich alsô vaste unser swære an genommen, wir suln sî mit im überkomen, geruochets unser trehten. er spricht er welle vehten, Er welle durch uns tôt ligen ode dem risen an gesigen, dem ich sô vil vertragen muoz. nû gnâdet im ûf sinen vuoz: daz ist mîn bete und mîn gebot. her Îwein sprach 'nu enwelle got daz mir diu unzuht geschehe daz ich ze mînen vüezen sehe diu mîns hern Gâweins swester ist. jâ wære des, wizze Krist, dem künige Artûs ze vil. ich sol unde wil gedienen immer mêre daz sî der grôzen êre mich armen man erlâze: mich gnüeget rehter mâze. ich sag iu wie ich in bestê. als ich iu gelobte ê,

kumt er vruo ze selher zit, swenne sich endet der strit, daz ich umbe mitten tac ir ze helfe komen mac der ichz ê gelobet hân, sô wil ich in durch inuch bestân, durch mîner vrouwen hulde, und durch iwer unschulde. des trôstes wurden si vrô unde machten im dô beide freude unde spil. und sîne dûhte niht ze vil Deheiner der êren die si mohten kêren im ze sînen hulden: si dûhte ez wær von schulden. si prîsten sêre sînen muot: er dûhtes biderbe unde guot und in alle wîs ein hövesch man. daz kurn si dar an daz der lewe bi im lac und anders sites niene pflac niuwan als ein ander schâf. guot spise und dar nâch senfter slâf diu wâren im bereit hie, und erwachte dô der tac ûf gie, und horte eine messe vruo unde bereite sich derzuo als er kempfen wolde den der dâ komen solde. als er dô niemen komen sach, daz was im leit, unde sprach

'herre, nû wær ich iu bereit: iu ist der lîp unverseit: wâ ist der dâ komen sol? mîn tweln enkumet mir niht wol: ich sûme mich vil sêre. ez gêt an al mîn êre swaz ich nû hie gebîte: ez ist zît daz ich rîte.' diu drô tet in wê, und wurden trûrec als ê. Vil müelich was in ein dinc: sîne westen welch gerinc in aller beste êrte, der im den muot bekêrte. wan der wirt bôt im sîn guot: er sprach 'sone stât niht mîn muot daz ich ûf guotes miete den lîp iht veile biete,' und widersaget im dô gar. des wurden harte riuwevar der wirt und daz gesinde, diu vrouwe mit ir kinde. ez wart vil dicke von in zwein sîn bester vriunt her Gâwein an der bete genant und er bî ime gemant; und manten in sô verre, daz got unser herre im sælde und êre bære der barmherze wære: erbarmet er sich über sî, dâ stüende gotes lôn bî.

daz beweget im den muot: wan er was biderbe unde guot. man sagt daz in bedwunge din tiure manunge, dô er ir dürfte rehte ervant und im sô dicke wart genant got under Gâwein: wan swederm er under den zwein Grœzern unwillen trœc, dem dienter gerne genuoc. des wart sîn muot zwivelfhaft. er dâhte 'ich darf wol meisterschaft, sol ich daz wægest ersehn. mir ist ze spilne geschehu ein gâch geteiltez spil: ezn giltet lützel noch vil, niuwan al mîn êre. ich darf wol guoter lêre. ich weiz wol, swederz ich kiuse, daz ich an dem verliuse. ich möht ir beider gepflegn, ode beidiu lâzen under wegn, ode doch daz eine, sô wær mîn angest cleine: sus enweiz ich mîn deheinen rât. ich bin, als ez mir nû stât, gunêret ob ich rîte und geschendet ob ich bîte. nune mag ichs beidiu niht bestân und getar doch ir dewederz lân. nû gebe mir got guoten rât, der mich unz her geleitet hât,

daz ich mich beidenthalp bewar sô daz ich rehte gevar. ichn wil benamen die niht lân der ich mich ê geheizen hân und diu ir angest und ir leit niuwan von mînen schulden treit: Wan liez ich die danne, wie zæm daz guotem manne? doch wære diu eine magt dâ wider schiere verclagt, wider dem schaden der hie geschiht, gieng ez mir an die triuwe niht. sô wærre ouch dirre wirt wol wert, der ouch mîner helfe gert, und hern Gâweins swester kint, diu mir ze herzen gênde sint durch die selben und durch in dem ich wol schuldec bin daz ich im nihtes abe gê daz im ze dieneste stê. muoz ich si under wegen lân, sô habent si des immer wân daz ich des libes si ein zage. nû schiet den zwivel und die clage der grôze rise des si dâ biten: der kom dort zuo in geriten und vuorte sine gevangen. an den het er begangen grôze unhövescheit. in wâren aller hande cleit ze den zîten fremde, niuwan diu bœsten hemde

din ie küchenkneht getruoc. sî treip ein warc, der sî sluoc mit siner geiselruoten daz sî über al bluoten. Die herren riten ungeschuoch: ir hemde was ein sactuoch, gezerret, swarz, unde grôz: die edelen riter wâren blôz an beinen unde an armen. den gast begunde erbarmen din grôze nôt die sî liten. ir pfert wâren, din sî riten, tôtmager unde kranc: ir ietwederz strûchte unde hanc. die vüeze wârn in unden zesamene gebunden und die hende vaste ze rûke mit baste. den gurren die sî truogen hin, den wârn die zagele under in zesamene gevlohten, daz sî niene mohten ein ander entwichen. dô sî sô jæmerlichen ir edel vater riten sach, daz im sîn herze niene brach von jæmer, des wundert mich: wandez was wol jæmerlich. sus vuorters vür daz bürgetor: dâ hörten sî in ruofen vor, er hienges alle viere, ob man sî niht vil schiere

mit ir swester lōste. dô sprach der sî dâ trōste, Der riter der des lewen pfлак 'zwāre, herre, ob ich mac, ich ledige unser sellen. got sol disen vellen: er ist ein unbescheiden man. mich sterket vaste dar an iwer reht, und sîn hōchvart, daz diu ie sō grōz wart. ern kan sich lasters niht sehamen, daz ers ir burt unde ir namen niht kan geniezen lān, swaz si ime joch hæten getān. ichn sol kein riter schelten: iedoch sold er engelten siner ungewizzenheit. zwāre, mac ich, ez wirt im leit. er hete in kurzen stunden den helm ûf gebunden und was vil schiere gereit: daz lêrt in diu gewonheit. sîn ros sahër bî im stān, er hiez die brüke nider lān. er sprach 'ditz sol sich scheiden unser eime ode uns beiden nāch schaden und nāch schanden. ich getrūwes mînen handen daz ich sîn drō genidere. zwāre er muoz iu widere iuwer süne gesunde gebn, ode er nimt ouch mir daz lebn:

Und sweder der sol geschehn, daz hât man schiere gesehn. sus was im an den risen gâch: sîn lewe folgt im allez nâch. dô in der rise komen sach, daz was sîn spot, unde sprach 'ouwê, ir vil tumber man, waz nemet ir iuch an daz ir sô ungerne lebt und sus nâch tem tôde strebt? daz ist ein unwiser rât: und swer iu daz gerâten hât, dem ist iuer leben leit, und wil sich mit der wârheit vit wol an iu gerochen hân swaz ir im leides habt getân, und hât sich ouch gerochen wol, wand ich daz schiere schaffen sol daz ir im niemer mê getuot enweder übel noch guot.' 8. 188 des antwurt im her Îwein sô. 'riter, waz touc disiu drê? lât bœse rede und tuot diu were: ode ich entsitze ein getwerc harter dan iuvern grôzen lip. lât schelten ungezogeniu wip: dien mugen niht gevehten. und wil sîu unser trehten nâch rechtem gerichte pflegn, sô sît ir schiere gelegn.' Nû hâte dem risen geseit sîn starke und sîn manheit

waz im wâfen töhte und wer im geschaden möhte: in dūhte er hete wâfens gnuoc an einer stange die er truoc. nū vreute sich her Îwein daz er ungewâfent schein. undern arm sluoc er mit guotem willen daz sper und nam daz ors mitten sporn, und het in ûf die brust erkorn und stach im einen selhen stich daz daz îsensper sich lōste von dem schafte und ime lîbe hafte. ouch sluoc ime der rise einen slac, daz ich daz wol sagen mac, het in daz ors niht vür getragen, daz er im hæte geslagen ab einen slac als er dô sluoc, es wær ze dem tôde genuoc: dô truoc in daz ors dan unz daz er daz swert gewan. sâ kêrter wider ûf in, unde gestiurt in des sîn sin sîn kraft und sîn manheit, dô er wider ûf in reit, daz er im eine wunden sluoc. dô in daz ros vür truoc, Dô sluoc ime der rise einen slac, daz er dâ gar gestraht lac vor ûf dem rosse vür tōt. dô sach der lewe sîne nōt

und lief den ungevüegen man vil unsitelichen an und zart im cleit unde brāt als lanc sô der rüke gāt von den ahseln her abe, unz daz der michel knabe als ein ohse erluote, und wancte diu ruote die er dā ze were truoc. und dô er nāch dem lewen sluoc, do entweich im der lewe dan, und entraf den lewen noch den man. im wart ze dem slage sô gāch daz er sich neicte dernāch und ouch vil nāch dernider lac: ê er erzüge den andern slac, dô hete sich her Îwein mit vil grôzen wunden zwein an im vil wol gerochen und daz swert durch in gestochen dā vor dā daz herze lît. dô was verendet der strît, und viel von der swære als ez ein boum wære. von des risen valle vreuten sî sich alle, Den wol dar an was geschehn. sî heten heiles gesehn den rîter der des lewen pflac: wand sî lebten vür den tac ān angest unde ān nôt, dô der rise gelac tôt:

des gnâdeten si ime gnuoc, dem hern Îweine der in sluoc. ouch gerter urloubes sâ: wander hete sich dâ niht ze sûmen mêre, ob er sîn êre an ir behalten wolde der er dâ komen solde ze helfe umbe mitten tac, diu dâ durch in gevangen lac. der wirt begund in starke biten (daz wær alsô guot vermiten) daz er dâ ruowen wolde: ern mohte noch ensolde. dô antwurt er und sîn wîp beidiu guot unde lîp beide in sîne gewalt. daz gnâden wart vil manecvalt, daz er dâ hôte von in zwein. dô sprach mîn her Îwein 'welt ir mich geniezen lân ob ich iu iht gedienet hân, sô tuot ein dine des ich bite: dâ ist mir wol gelônet mite. Hern Gâweinen minn ich: ich weiz wol, alsô tuot er mich: ist unser minne âne kraft, sone wart nie guot gesellechaft. den ernst sol ich im niuwen swâ ich mac entriuwen. herre, zuo dem ritent ir unde grüezent in von mir,

und vüerent mit iu iweriu kint diu dâ hie erlediget sint, und daz ir swester mit in var, und vüert ouch daz getwerc tar, des herre dâ hie lit erslagen, und sult im des gnâde sagen swes ich iu gedienet hân: wan daz hân ich durch in getân. vrâger iuch wiech si genant, sô tuot im daz erkant daz ein lewe mit mir si: dâ erkennt er mich bi. daz gelobte der herre, und bat in des vil verre, swenn er ze dem brunnen gestrite, daz er dar wider rite: er schüef im guoten gemach: mîn her Îweîn dô sprach 'mîn rîten ist mislich. ich kume iu gerne, lânt si mich mit ten ich dâ striten sol: ich getrûwe abe in des wol, Mugen si mirz ane striten, sine lânt mich niender rîten. dô bat dâ man unde wip daz got sin êre und sinen lîp vriste unde behuote: mit lîbe und mit guote stüenden si in ze gebote. alsus bevalch er si gote, im wârn die wege wol knüt, und was ouch deste kurzer stant

zuo der kapellen komen. dô was diu juncvrouwe genomen her ûz dâ sî gevangen lac (wand ez was wol um mitten tac), und wârn ir in den stunden die hende gebunden, ir cleider von ir getân und niuwan ir hemde an verlân. und diu hurt was bereit untz viur dar under geleit, unde stuont vrou Lûnete ûf ir knien an ir gebete und bat got der sêle pflegn und hete sichs lîbes bewegn. dô sî sich misetrôste daz sî nû niemen lôste, dô kom ir helfære, und was im vil swære ir laster unde ir arbeit die sî von sîneu schulden leit. Ouch hete min her Îwein grôzen trôst ze den zwein, daz got und ir unschulde den gewalt niene dalde daz im iht missegienge, und daz in ouch vervienge der lewe sîn geverte daz er die magt ernerte. nâ gâhte er sêre mitten sporn: wær sî wære verlorn, wær er iht langer gewesn. er rief und sprach lât genesn,

übeliu diet, dise magt. zwaz man hie ûf si clagt, des wil ich in ir schülden stân: und sol si dâ zuo kempfen hân, sô wil ich vehten vür si. dô daz gehörten dise drî, daz versmâhet in vaste: doch entwichen si dem gaste und machten im den wec dar. nû namer umbe si war, und suochtes mitten ougen, die sin herze tougen zallen zîten an sach unde ir ouch ze vrowen jach. schiere saher si sitzen, und was von sinen wîzen vil nâch komen als ê: wand si sagent, ez tuo wê; Swer sime herzenliebe si alsô gastlichen bi. nu begunder umbe sehouwen und sach vil juncvrouwen, die ir gesindes wâren: die hórter gebâren harte clâgelichen. si bâten got den rîchen, si sprâchen 'got herre, wir biten dich vil verre daz dû uns rechest an deme der uns unser spilen neme. wir heten ir vrume und ere: nune habe wir niemen mære

der dâ ze kemenâten umbe uns türre râten daz uns mîn vrouwe iht guotes tao, als beide spâte unde vruo diu vil getriwe Lûnete unser liebiu spile tete. ditz machet im sinen muot ze vehten starc unde gnot, und reit dar dâ er si sach. er hiez si ûf stên unde sprach 'vrouwe, zeiget mir die die iuch dâ kumbernt, sint si hie: und heizt iuch drâte ledec lân, ode si müezen von mir hân den strît den ich geleisten mac.' und sin leu, der sin dâ pfac, Der gesach vil schiere sinen haz unde gestuont hin nâher baz. nû was diu reine guote magt von vorhten alsô gar verzagt daz si vil kûme ûf gesach: do gevienc si kraft unde sprach 'herre, daz vergelt iu got: der weiz wol daz ich disen spot und dise schande dulde ân alle mine schulde; und bites unsern herren daz si iu müezen werren niuwan als ich schuldec si, und zeicte si im alle dri. dô sprach der truhsæze 'er ist gnuoc tumpræze

der her kumt sterben durch dich. nû ist ez gnuoc billich, swer selbe des tôdes ger, daz mans ouch den gewer, und der ouch danne vehte sô gar wider dem rehte. wan ez hât allez ditz lant ir untriuwe wol erkant, wie si ir vrouwen verriet daz si von ir êren schiet. zwâre, herre, ich râte iu daz daz ir iuch bedenket baz. ich erban iu des vil sêre daz wir iu iuwer êre- Mûezen nemen untten lip umb ein sô ungetriuwez wip. nû seht daz unser drî sint: und wært ir niuwet ein kint, ir möhtet wol die rede lân diu iu an den lip muoz gân. dô sprach der riter mittem leun 'ir muget harte vil gedreun: ir müezet mich bestân ode die juncvrouwen lân. mir hât diu unschuldige magt bi dem eide gesagt daz si wider ir vrouwen si aller untriuwen vrî und daz si ir nie getæte deheine misseræte. waz von diu, sint iuwer drî? wænt ir daz ich eine si?

got gestuont der wârheit ie: mit ten beiden bin ich hie. ich weiz wol, si gestênt mir: sus bin ich selbe dritte als ir. dar an lit, wæn ich, grœzer kraft danne an iwer geselleschaft. dô sprach der truhsæze 'swes ich mich vermæze wider unsern herren got, des gevieng ich schaden unde spot. herre, zuo dem drôt ir mir: ich getrûw im helfe haz dan ir. Ich sihe iuch ein geverten hân, den sult ir hôher heizen gân, iuwern lewen der hie stât: der andern wirdet guot rât. hien vihtet niemen mit in zwein, dô sprach min her Iwein 'der leu vert mit mir alle zît: ichn vüere in durch deheinen strit, ichn trib ia ouch von mir niht: werent iuch, tuot er in iht. dô riefens alle under in, ern tæte sinen lewen hin, mit im envæhte niemen dâ, unde zwâre er müese ouch sâ. die juncvrouwen brinnen sehn. er sprach 'desn sol niht geschehn.' sus muose der lewe hôher stân: dochn mohter des niuwet lân ern sæhe über den rûke dan sinen herren wider an.

sus sint diu wort hin geleit, und wurden ze strîte gereit. sî wâren alle viere ze orse komen schiere und liezen von […]ander gân, dazs ir puneiz möhten hân, und triben alle drî dan wider ûf ten einen man, swaz d’ors mohten gevarn. dar under muoser sich bewarn Dar nâch als ein wîser man der sîne rîterschaft wol kan und sîne kraft mit listen ze rehten staten vristen. sî brâchen ûf im alle ir sper: daz sîn behielt aber er unde warf daz ros von in unde leisierte hin von in eines ackers lanc, und tete schiere den wanc und lîmte vaste sîn sper: vor ûf sîne brust her, als in diu gwonheit lêrte. und dô er zuo in kêrte, dô muot in mittem swerte der truhsæze, als er gerte, von sînen bruodern zwein. dô nam ern underz kinnebein, rehte vliegent stach er in enbor über den satel hin, daz er ûf dem sande gelac unde alles des verpflac.

des im ze schaden mohte komen. der trôst was den zwein benomen: wand er lac lange âne sin. nû riten wider ûf in die zwêne die noch werten, und pflâgens mitten swerten als guote riter solten. daz wart in wol vergolten, Wande ie sîn einer slac vaste wider ir zwein wac. er bedorfte wol kraft unde wer: wan zwên sint immer eines her. die vrouwen bâten alle got dazz sîn gnâde und sîn gebot in ze helfe kêrte, und ir kempfen êrte, daz er in ze trôste ir gespiln erlôste. nu ist er sô gnædec und sô guot und sô reine gemuot daz er niemer kunde sô manegem süezen munde betelichiu dinc versagen. ouch wâren sî niuwet zagen die dâ mit im vâhten, wande sî in brâhten in vil angestliche nôt. unde zwâre âne den tôt bekumberten si in sêre: dochn mohten si ime dehein êre vürnames an gewinnen. nû kom ze sinen sinnen

der truhsæze widere und enlac niht mê dâ nidere: er bürte schilt unde swert und gienc ze sînen bruodern wert. dô dûhte den vren er hete zît sich ze hebenne an den strit, Und lief ouch sâ den gênden man vil unbarmeclichen an unde zarte dez îsen. man sach die ringe risen sam sî wæren von strô. sus entworhter in dô, wand er in gar zevuorte, swaz er sîn bernorte. vor im gewan vrou Lûnete vride von des lewen bete. diu bete was niuwan der tôt: des vreut sî sich, des gienc ir nôt. hie lac der truhsæze: nû wart der lewe ræze ze sînen kampfgenôzen, die manegen slac grôzen heten enpfangen unde gegebn. werten sî nû wol daz lebn, daz was in guot vür den tôt: wand sî bestuonden michel nôt. nû wâren zwêne wider zwein: wand ezn mohte her Îwein den lewen niht vertriben: dô liez erz ouch belîben. er hete sîn wol enborn, und lie'z ouch âne grôzen zorn

daz er in sine helfe spranc: ern sagtes ime danc noch undanc. sî vâhtens bêdenthalen an, hie der lewe, dort der man. Ouch ensparten sî lip noch den muot: soltens dâ von sîn behuot sî wâren werhaft gennoc: unde ir ietweder sluoc dem lewen eine wunden. dô er der hete enpfunden, dô wart er ræzer vil dan ê. ouch tete hern Îweine wê daz er den lewen wunden sach. daz bescheinter wol: wander brach sine senfte gebærde, von des leun beswærde gewan er zornes alsô vil daz er si brâhte ûf daz zil daz sî gar verlurn ir kraft und gehabt vor im zagehaft. sus wârens überwunden iedoch mit vier wunden die si ime hâten geslagen. dochn hôrt in dâ niemen clagen deheinen der im geschach, niuwan des lewen ungemach. nû wasez ze den ziten site daz der schuldegære lite den selben tôt den der man solte lîden den er an mit kampfē vēr gerihē sprach, ob ez alsô geschach

daz er mit kampfē unschuldec wart. dazn wart ouch hie niht gespart: Si wurden ûf den rōst geleit. vroun Lûneten wârn gereit die juncvrouwen alle, mit manegem vuozvalle gnâdeten si ime sêre unde buten im al die êre der er von in gernochte und vûrbaz danne er suochte. vrou Lûnete was vil vrô: wand ez gezôch ir alsô. si gewan ir vrouwen hulde und hete âne schulde erliten kumber unde nôt: des ergatzte sîs unz an ir tôt. noch erkand in dâ wip noch man, und schiet al lîhte von dan; niuwan eine vrou Lûnete, diu daz durch sîn gebot tete daz si in nieman ennante. daz in diu niht erkante diu doch sîn herze bî ir truoc, daz was wûndêrs genuoc. doch bat si in vil verre, si sprach 'lieber herre, durch got belîbet hie mit mir: wand ich weiz wol daz ir und iuwer leu sît starke wunt: lât mich iuch machen gesunt.' sus sprach der namelôse dô. 'ichn gwinne gemach nochn werde vrô

Niemer mê unz ûf ten tac daz ich wider haben mac mîner vrouwen hulde: der mangel ich ân schulde. sî sprach 'wie selten ich daz wip, beide ir muot und ir lîp, immer geprîse (wand si enist niht wîse) diu einem alsô vrumen man als iu noch hie schînet an ir hulde iemer widerseit, ob sî niht grôz herzeleit ûf in ze sprechenne hât. 'niemer werde mîn râd, ir wille enwære ie mîn gebot: und gebiet ir unser herre got daz sî mich bedenke enzît. den kumber der mir nâhen lît, den sag ich niemen, wizze Krist, wan dem er doch gewizzen ist, swie nâ er mîne herzen gê. sî sprach 'ist er dan iemen mê gewizzen ân iu zwein?' 'nein ez, vrowe,' sprach her Îwein. sî sprach 'wan nennet ir sî doch?' er sprach 'vrouwe, nein ich noch: ich muoz ir hulde ê haben baz.' sî sprach 'nû saget mir doch daz, wie sît ir selbe genant?' er sprach 'ich wil sîn erkant Bî mîne leun der mit mir vert. mirn werde ir gnâde baz beschert,

sô wil ich mich iemer schamen mîns lebennes und mîns rehten namen: ich wil mich niemer gevreun. ich heize der rîter mittem leun: und swer iu von disem tage ihlt von eime rîter sage des geverte ein lewe sî, dâ erkennet mich bi. diu vrouwe sprach 'wie mac daz komen daz ich von iu niht hân vernomen und daz ich iuch nie mê gesach?' der rîter mittem leun dô sprach 'daz iu von mir niht ist geseit, daz machet mîn unwerdekheit. ich möchte mittem muote mit libe und mit guote gevrumet hân diu mære daz ich erkander wære. wirt mîn gelücke alsô guot sô mîn herze unt der muot, ich weiz wol, sô verdien ich daz daz ir mich erkennet baz. 'irn sît danne ein bœser man danne ich an iu gesehen kan, sô sît ir aller êren werter und des ich ê hân gegert, des bæt ich aber, hulfez iht. mich dunkt, ich überwinde niht Daz laster unt tie schande, swer iuch tûz mîne lande alsô wunden siht varn. er sprach 'got mûez iuch bewarn

unde gebe iu sælde und êre : 0000 ichn belibe hie niuwet mêre. diu vrouwe aber dô sprach 'sît ir versprechet mîn gemach, so ergib ich iuch in gotes segn: der kan iuwer baz gepflegn 0000 und ruoche iu durch sîne güete iuwer swærez ungemüete vil schiere verkêren ze vreuden unde ze êren. von danne schiet er trûec dô 0100 und sprach wider sich selben sô 'vrowe, wie lützel dû weist daz tû den slüzzel selbe treist! dû bist daz sloz und daz schrinn dâ êre unt tiu Freude mîn 0100 inne beslozzen lît. nû heter rîtennes zît: im envolget von dang weder wip noch man, niuwan eine Lûnete, 0200 diu ime geselleschaft tete einen guoten wee hin. dâ gelobtes wider in daz sî allez wâr liez: mit ir triuwen sî gehiez 0200 Daz sî sîn wol gedæhte und ez ze rede bræhte umbe sîne swære. so getriuwe und sô gewære was diu guote Lûnete 0300 daz sî daz willelichen tete.

des gnâdet er ir tûsentstunt. nû was der leu sô starke wunt daz er michel arbeit ûf dem wege mit ime leit. dô er niht mêre mohte gân, dô mioser vôn dem rosse stân, und las zesamne mit der haut mies und swaz er lindes vant: daz legter allez under in in sînen schilt und huop in hin ûf daz ros vür sich. daz leben was gnuoc kumberlich. sus leit er arbeit genuoc, unz daz in der wec truoc dâ er eine burc sach. dar kêrt er durch sîn gemach, und vant beslozzen daz tor, und einen knappen dâ vor. der erkante wol sîns herren muot: sîn herze biderbe unde guot daz wart wol an dem knappen schîn: er hiez in willekomen sîn ze gnoter handelunge. ouch wæn ich in betwunge Diu vil wegemüediû nôt daz er nam daz man im bôt. man mac den gâst lîhte vil geladen der belîben wil. im wart daz tor ûf getân: dô saher entgegen ime gân riter unde knehte, die in nâch sînem rehte

enpfngen unde gruozen und im vil gerne buozten kumber unde sîne nôt, als in ir herre gebôt, der selbe engegen ime gienc unde in vrœliche enpfienc unde schuof im selch gemach daz er wol an den werken sach daz sîn wille und sîn muot was reine unde guot. im wart vil harte drâte ein heimlich kemenâte ze sîner sunder bereit, sîn leu dar in zuo im geleit. dar inne entwâfent man in, und sante der wirt hin nâch zwein sînen kînden, daz niemen mohte vinden schœner juncvrouwen zwô; den bevalch er in dô, dazs im sîne wunden salbetn unde bunden. Ouch wonte in ir gemüete ze schœner kunst diu güete daz sî in schier ernerten unde sînen geverten. dô twelter vierzehen naht, unz daz er sînes libes maht wol widere gewan, ê daz er schiede von dan. do begunde der tôt in den tagen einen grâven beclagen

und mit gewalte twingen ze nôtigen dingen, den von dem Swarzen dorne. des was er der verlorne: wand er muos im ze suone gebn beide gesunt und sin lebn, dêr dannoch lebendige hie zwô schœne juncvrouwen lie. nû wolde diu alte die jungen mit gewalte von dem erbe scheiden, daz dienen solt in beiden; dâ zuo diu junger sprach 'swester, ditz ungemach daz sol dir got verbieten. ich wânde mich genieten groezers liebes mit dir. swester, dû bist mir ze ungnædiges muotes. wil dû mich mînes guotes Und mîner êren behern, des wil ich mich mit kampfē wern: ichn vihte niht, ich bin ein wip: daz als unwerhaft ist mîn lip, dâne hâstû niht an: zwâre ich vinde wol den mân der mir durch sîne hövescheit die gnâde niemer widerseit ern beschirme mich vor dir. swester, dû muost mir mîn erbeitel lân oder einen kempfen hân.

ich suoche den küne c Artûs und vinde ouch kempfen dâ ze hûs der mich vor dîner hôchwart durch sîn selbes tugent bewart. ditz gemarhte diu unguote unde ahte in ir muote waz si dar umbe tæte: und durch ir karge ræte sô sweic si derzuo und kom ze hove vor ir sô vruo daz ir mîn her Gâwein wart. diu junge greif die nâchwart: daz machet ir kintheit, dazs ir ir willen hete geseit. dô diu junge kom hin nâ, dô vant si die alten dâ. diu was ir kempfen harte vrô: doch gelobet ez her Gâwein sô Daz si ez niemen solte sagen. nû was in den selben tagen diu küneginne wider komen, die Meljaganz hete genommen mit michelre manheit. ouch was in niuweliche geseit von dem risen mære, wie er erslagen wære, den der riter mittem lewen sluoc. des genâdet er im gnuoc mit wordn und mit muote, Gâwein der guote, wand erz durch sînen willn tete. ouch was des rîtlers bete.

daz manz in wizen solte lān: daz hete sîn niftel getān: und dō siz im gesagte, wie tiurer clagte daz er sîn niht erkandel wand er sich niht ennande. er erkant in bī dem mære, und enweste doch wer er wære. dō ze hove kom diu magt, als ich iu hān gesagt, und einen kempfen suochte, des niemen sī beruochte, dō clagtes harte sēre ir guot und ir ēre: wan an dem ir trōst lac, der sprach 'vrouwe, ich enmac Iu ze staten niht gestān, wand ich grōz unmuoze hān von anderen dingen: diu muoz ich volbringen. wæret ir mir ē komen ē ich mich hete an genommen ander hande arbeit, iu wær mîn helfe bereit.' dō sī dā kempfen niene vant, dō kom sī zehant vür den künec Artūs. sī sprach 'sīt ich hie ze hūs niht kempfen mac gewinæen, dochn wold ich niht von hinnen ichn næme urloup von iu. ouch ensol ich von diu

mîn rehtez erbe niemen lâu daz ich hie niemen vunden hân. mir ist sô grôziu manheit von dem rîter geseit der den lewen mit im hât: vind ich den, sô wirt mîn rât. tuot mîn swester wider mich gnâde, daz ist billich: sô mac si mit minnen vil wol von mir gewinnen swaz si des mînes ruochet, swâ siz ze rehte suochet: nimt si mir dar über iht, dazn lâze ich âne clage niht. Wan diu alter weste daz si der aller beste von dem hove wolte wern, do begunde si vil tiure swern, sine teilte ir niemer niht mite. dô sprach der küneec 'sô ist hie site, swer ûf den anderen clage, daz er im wol vierzec tage kampfes muoz bîten. si sprach, wolt iemen strîten; daz er dâ zehant strite, wand sis niht langer enbite. dô daz den küneec niht dûhte guot; dô bekêrte si ir muot: wand si was des ân engest gar daz si iemen bræhte dar der ir kempfen überstrite, ob si joch ein jâr bite.

nû wart der kampf gesprochen über sehs wochen: daz geschuof der küne c Artûs. nû nam sî urloup dâ ze hûs und bat ir got ruochen und vuor ir kempfen suochen. sus reit sî verre durch diu lant, daz sî dewederez envant, den man noch diu mære wâ er ze vinden wære, und muote sî ir irrevart daz sî dâ von siech wart. Sus kom sî nâch vrâge zeinem ir mâge und begund im ir geverte sagen, ir kumber und ir siecheit clagen. dô er ir arbeit ersach, er behabtes dâ durch ir gemach, unde sante, als sî in bat, sîn selbes tohter an ir stat, diu vür sî suochende reit und gewannes michel arbeit. sus reit sî allen einen tac, daz sî geverten niene pflac, unz daz ez an die naht gienc. einen wec sî dô gevienc: der truoc sî in einen walt. diu naht wart vinsten unde kalt, ez kom ein regen unde ein wint, ich wil geswigen umb ein kint daz ê nie kumber gewan: ez wære ein wol gemuot man

erværet von der arbeit. selhes kumbers den sî leit, des was ir lîp sô ungewon daz sî verzagte dâ von. der wec wart vinsten unde tief, daz sî got ane rief daz er ir nôt bedæhte und sî zen liuten bræhte. und dô sî wânde sîn verlor, dô hôrte sî ein horn Blâsen von verre: des gestiurtes unser herre, daz sî des endes kêrte dar nâch als sî lêrte von dem horne der schal. hin wiste sî ein tal des endes dâ diu burc lac. der wahter, der der were pfac, der ersach sî vil drâte. ein gast der alsô spâte und alsô müeder kumt geriten, den mac man lihte des erbiten, ob er niht grôze unmuoze hât, daz er des nahtes dâ bestât. sus beleip sî ouch mit kurzer bete. dô man ir ze gemache tete swaz man guotes mohte, daz ir ze nemenne tohte, und nâch ezzenne wart, den wirt wundert umb ir vart, und vrâgte sî mære waz ir gewerp wære.

diu juncvrouwe dô sprach 'ich suoche den ich nie gesach und des ich niht erkeune. ichn weiz wie ichn iu nenne: wandern wart mir nie genant. ern ist mir anders niht erkant wan daz er einen lewen hât. nune hab ich sîn deheinen rât: Man sagt von im die manheit, und sol ich mîn arbeit iemer überwinden, sô muoz ich in vinden.' der wirt sprach 'ir sît unbetrogen: ern hât iu niht von im gelogen der iu tugent von im seit, wande mich sîn manheit von grôzem kumber lôste. got sant in mir ze trêste. wie gern ich dem stige iemer mêre nîge der in her ze mir truoc! wand er mir einen risen sluoc. der hâte mir mîn lant gar verwüestet unde verbrant, und sluoc mir zwei mîniu kint: und vieriu, diu noch lebende sint, diu heter mir gevangen und woldes hân erhangen. ich was et niuwan sîn spot. dô sante mir in got, daz er mich an ime rach. er sluoc in, daz ichz an sach,

hie vor mîn selbes bürgetor: dâ lit noch sîn gebeine vor. er schuof mir michel êre: got pflege sîn swar er kêre.' der mære vreute sich diu magt. sî sprach 'lieber herre, sagt, Dô er hie von iu ledec wart, wizzet ir war dô sîn vart wurde? des bewiset mich.' er sprach 'vrouwe, nein ich zwâre, und ist mir daz nû leit. aber ûf ten wec den er dâ reit, dar wîs ich iuch morgen vruo. nû waz ob iu got dâ zuo selbe sînen râd gît?' nû was ouch slâfennes zit. morgen, dô ez was ertagt, dô bereite sich diu magt nâch im ûf die strâze, rehte nâch der mâze dâ ir der wec gezeiget wart, und was ouch ûf der rechten vart, diu sî zuo dem brunnen truoc, dâ er den truhsæzen sluoc und sîne bruoder überwant. liute die sî dâ vant, die sagten ir daz, unde rite sî vürbaz, wolt sî wizzen mære war er gekêret wære, daz kund ir lîhte diu gesagen durch die er sî het erslagen.

sî sprach 'nû sagt mir wer diu sî.' sî sprâchen 'si ist hie nâhen bî, ein juncvrouwe, heizt Lûnete: diu stêt an ir gebete In der kappeln hie bî: dar ritet unde vrâget sî. swes iu diu niht gesagen kan, des bewîset iuch hie nieman.' dô sî sî vrâgende wart ob sî iht weste sîne vart, dô hiez ir vrou Lûnete, diu gerne höveschlichen tete, ir pfert gewinnen. sî sprach 'ich wil von binnen mit iu rîten an die stat dar er mich mit im rîten bat, dô er vür mich gestreit unde ûz diseme lande reit.' alsus bewîste sî sî dar und sprach 'vrowe, nû nemet war, an dirre stat dâ liez ich in: war ab stüende sîn sin, des enwolter mir niht sagen. und ein dinc wil ich gote clagen: er und sîn lewe wâren wunt sô sêre daz er zuo der stunt mohte gevarn unverre. daz in unser herre vor dem tôde bewar! ez ist an sime libe gar swaz ein riter haben sol. zwâre ich gan iu beiden wol

daz ir in gesunden vindt, wand ir danne überwindet Mit im alle iuwer nôt. weizgot, vrouwe, ich wære tôt, wær er mir niht ze helfe komen: alsus werde iu benomen al iuwer swære. swaz ich guoter mære von iu vernime, des vreu ich mich. hie mite schieden sî sich. und diu dâ suohte, der was gâch: der rechten strâze reit sî nâch, unz sî die burc ane sach, dâ im vil michel gemach ûffe geschehen was, wan er dâ lac unz er genas. nû reit sî gegen dem bürgetor. dâ mohte sî wol vor von rîtern und von vrouwen ein selch gesinde schouwen daz wol den wirt êrte; zuo dem sî drâte kêrte und vrâget in mære ob im iht kunt wære umb in den sî dâ suohte. der wirt dô des geruohte daz er engegen ir gienc und sî vrœliche enpfienc, und bôt sî die herberge an. sî sprach 'ich suoche einen man, unz ich den niht vunden hân, sô muoz ich gnâde und ruowe lân:

Nâch dem wart mir gezeiget her.' 'wie ist des nam?' sprach aber er. sî sprach 'ich bin nâch im gesant, und wart mir anders niht genant, wan daz ein lewe mit im ist.' er sprach 'der hât an dirre vrist von uns hie urloup genommen. ichn kunde in nie des überkomen daz er hie langer wolde wesn. er und sîn leu sint wol genesn. sî lâgn ê beide sêre wunt: nû varent sî vrô und wol gesunt. welt ir in schiere errîten, sone sult ir ouch niuwet bîten. setzt iuch rehte ûf sîne slâ: und gerâtet ir im rehte nâ, sô habt ir in vil schier errîten.' done wart ouch dâ niht mê gebîten: sine mohte zeltens niht gehabt, si begunde schi足ften unde draben, unz daz sî in ane sach. sô liebe als ir dar an geschach, als liebe müeze uns noch geschehn, daz wir uns alse liebe gesehn. si gedâhte in ir muote 'rîcher got der guote, wie sol ez mir nû ergân, sît ich den man vunden hân? nû hân ich michel arbeit an ditz suochen geleit: Ich dâhte ê niuwan dar an, ob ich vunde disen man,

wie sælec ich wære, und daz ich mîne swære gar hete überwunden. nû hân ich in vunden: alrêrst gêt mir angest zuo, wie er wider mich getuo. ob er mir helfe widerseit, waz touc dan mîn arbeit?' disen segen tete sî vür sich. 'herre got, nû lêre mich die rede der ich genieze, daz in mîn niht verdrieze und daz er mich niht entwer. ob mir verliuset des ich ger mîn ungelücke ode sîn zorn, sô hân ich mîn vinden vlorn. got gebe mir sælde unde sin.' zehant reit si eneben in. sî sprach 'got grüeze iuch, herre. ich hân iuch harte verre ûf gnâde gesuochet: got gebe daz irs geruochet.' er sprach 'ichn habe gnâden niht: swem mîns dienstes nôt geschieht und swer guoter des gert, dern wirt es niemer entwert.' wand er ir daz wol an saeh daz sî nâch im ungemach Ûf der verte hete erliten, do begunde ouch er ir heiles biten. er sprach 'vrouwe, mir ist leit al iuwer arbeit:

und swâ ich die erwenden kan, dâne wirret in niht an. dô neic sî im unde gote und bôt sich ime ze gebote und gnâdet ime vil verre. sî sprach 'lieber herre, diu bete enist niht umbe mich: si ist verre werder danne ich diu mich nâch iu gesendet hât. ich sag iu wie ez umb sî stât. sî lidet von gewalte nôt. ir vater ist niulîche tôt, und wil si ir swester enterben und dâ von verderben daz sî ein lützel alter ist. des hât sî kûme gewonnen vrist: über sehstahalbe wochen sô ist ein kampf gesprochen zwischen in beiden: sô wil sî sî scheiden von ir erbeteile, ezn stê dan an ir heile daz sî den kempfen bringe dar der sî gewaltes bewar. nû hât sî des gewîset diu werlt diu iuch prîset, Daz si iuch ze trôste hât erkorn; unde enhât daz niht verlorn durch hôchvart noch durch trâheit daz si niht selbe nâch iu reit: sî was ûf ten wec komen: êhaftiu nôt hât irz benomen,

wan sî leider ûf der vart von der reise siech wart, unde ist alsô under wegn mit mînem vater belegn. der sante mich her an ir stat: nû bit ich iuch als sî mich bat. sî hiez mich iuch, herre, manen harte verre. sît daz iuch got sô gêret hât daz alsô gar ze prîse stât vür manegen rîter iuwer lîp, sô êret got und diu wîp: sô sît ir hövesch unde wîs. nû geruochet iuvern prîs an iu beiden mêren, den iuvern an den êren und den ir anme guote. swes iu nû sî ze muote, des bewîset mich bî gote. er sprach 'dane hât sich der bote niht versûmet umb ein hâr. der alte spruch der ist wâr: swer guoten boten sendet, sînen vrumen er endet. Ich kiuse bî dem boten wol wie man die vrouwen weren sol. ich tuon vil gerne swes sî gert, sô verre mich der lîp gewert. nû rîtet vür und wîset mich: swar ir mich wîset, dar var ich. sus wart der bote enpfangen, und was gar zergangen

ir zwivellichiu swære. vil manec wehselmære sagtens ûf ter heide: sus vertriben sî beide mit niuwen mæren den tac. nû sâhen sî wâ vor in lac ein burc ûf ter strâze, den liuten wol ze mâze die herbergen solden, als ouch sî gerne wolden. diu burc stuont besunder, und ein market drunder: dâ kômen si in geriten. do enpfingen sî mit unsiten al die in den strâzen stuonden unde sâzen. sî möhten wol erschricken von ir twerhen blicken. sî kêrten in den rûke zuo, sî sprâchen 'ir kumt her ze vruo: man hât iuwer wol rât. und westet ir wiez hie stât, Ir wæret vür gekêret. ir werdet hie lützel gêret. weme sît ir hie willekomen, ode waz hât ir iuch an genommen mit iuwer reise dâ her? nû wer ist hie der iuwer ger? ir wæret anderswâ baz. iuch hât rehte gotes haz. dâ her gesendet beide zallem iwerme leide.

ir sît uns unwillekomen. dô sî ditz hâten vernomen, dô sprach der rîter mittem leun 'waz touc ditz schelten unde dreun, ode war an verschult ich daz? verdient ich ie iuwern haz, daz ist unwizzende geschehn. unde ich wil iu des bejehn bî der rehten wârheit: ichn kom nie her durch iuwer leit: mac ich, ich scheide von hinnen mit iuwer aller minnen. aller liute beste, enpfâht ir iuwer geste alle sament else mich, daz ist untrœstlich einem her komen man der iuwer niht gerâten kan. nu gehôrte ein vrouwe disen zorn: diu was ûz der stat geboren; Vür die sîn strâze rehte gienc, als er den burcwe c gevienc. diu winct ime von verre. sî sprach 'lieber herre, die rede die man hie tuot, die tuot man niuwan durch gnot. niene zûrnt sô sêre. sî riuwet iuwer êre und ditz rîterliche wîp. ir müezet vliesen den lîp (daz enkunt ir niemer bewarn), welt ir ûf die burc varn.

jane redent siz durch deheinen haz, wan dazs iu des gunden baz daz ir dise burc mitet unde noch fürbaz ritet. wand uns ist ein gebot gegebē über guot und über lebn, daz sich hie vor wip noch man neme deheinen gäst an ūzerhalp dem bürgetor: hien herberget niemen vor. got sol iuch dervor bewarn: ich weiz wol, sult ir volvarn, daz ez iu an den lip gāt. erwindet noch, daz ist mīn rāt, unde ritet vürbaz. er sprach 'mich hulfe lihte daz, folgt ich iwerme rāte: nū ist ez aber ze spāte. War möht ich nū geritten? ich muoz des tages hie biten. si sprach 'mües ich iuch dannē sehn, leider des niht mac gescheln, her wider ūz kēren nāch iuwern ēren, sô helf mir got, des vrent ich mich. alsus reit er vür sich, unz in der torwarte sach. der winet im dar unde sprach 'wol her, riter, wol her! wand ich iuch des zwāre gewer daz man iuch hie vil gerne siht: ezn hilfet iuch aber niht.'

nâch disem antpfange sûmtern unlange, ern tæt im ûf die porte. mit manegem drôworte enpfie'n der portenære.: daz was im unmære. er sach in schalolichen an als ein ungetriuwer man: er sprach 'ich hân daz wol bedâht daz ich iuch hân her in brâht: ahtet selbe umb de ûzvart.' nâch im was daz tor bespart. ern ruohte waz er im sprach, dô er deheine vreise sach weder in der burc noch dervor. nû saher inrehalp dem tor Ein witez wercgadem stân: daz was gestalt unde getân als armer liute gemach; dar in er durch ein venster sach wurken wol driu hundert wip. den wâren cleider untter lip vil armeliche gestalt: irn was iedoch deheiniu alt. die armen betenouch den sin daz gnuoge worhten under in swaz iemen wurken solde von sîden und von golde. gnuoge worhten an der rame: der werc was aber âne schame. und die des niene kunden, die lâsen, dise wunden,

disiu blou, disiu dahs, disiu hachelte vlahs, dise spunnen, dise nâten; und wâren doch unberâten: in galt ir arbeit niht mê wan daz in zallen zîten wê von hunger und von durste was und daz in kûme genas der lîp der in doch nâch gesweich. sî wâren mager unde bleich, sî liten grôzen unrât an dem lîbe und an der wât. ez wâren bî ir viure under wîlen tiure Vleisch mitten vischen. sî muosen verwischen wirtschaft und êre: sî rungen mit sêre. ouch wurden sî sîn gewar. wârens ê riuwevar, ir leides wart nû michel mê. in tete diu schame alsô wê daz in die arme enpfliên, wan in die trehene vielen von den ougen ûf die wât. daz ir grôzen unrât iemen vremder hete gesehn, dâ was in leide an geschehn. in viel daz houbet zetal, und sî vergâzen über al des werkes in den hendên. von den êllenden

wolt er den portenære gerne vrâgen mære, wand er dâ niemen anders sach: der schalc dô schalclichen sprach. dô er engegen dem tor gienc, der schalc in schalcliche enpfienc: er sprach ûz schalkes munde so er schalclichest kunde. 'her gast, ir woldet vür daz tor. niht: dâ ist ein nagel vor. ez ist iu anders untersehn: iu sol hie iuwer reht geschehn, Ê iu din porte werde enspart. man muoz iuch ziuwer ûzvart anders beleiten: man sol iuch ê bereiten maneger unêren: man sol iuch ê lêren dise hqvezuht baz. wie gar iuwer got vergaz, daz ich iuch brâhte her in! ir scheidet mit unêren hin. dô sprach der rîter mittem leun 'ir mugt mir harte vil gedreun: michn bestê grœzer nôt, zwâre, sô lige ich niemer tôt. wan besluzstû vaste din tor? zwâre, wær ich dâ vor, ich wolde doch her wider in. daz ich zuo dir gegangen bin, daz ist durch vrâgen getân. vriunt, dû solt mich wizen lân,

wie stêtz um disiu armwîp? in sint die sîten und der lîp gestalt vil wol dia gelîch, wærens vrô unde rîch, sî wæren harte wol getân. der vrâge hiez er sich erlân, er sprach 'ich sag in ein bast. wænet ir, her gast, daz mich niht betrâge iuwer müezegen vrâge? Ir vlieset michel arbeit. der rîter sprach daz ist mîr leit und gienc lachende dān, als der sich mittem bœsen man mit wordē niht beheften wil: er hete sîn rede vür ein spil. er ersuochte want unde want, unz er die hûstûre vant, unde gienc zuo in dar in. swie gar von armuot ir sin wære beswæret, doch wârens unerværet. im wart al umbe genigen, und liezen ir were ligen die wile daz er bî in saz: ir zuht von art gebôt in daz. ouch nam er war daz lützel hie überiger rede ergie, der doch gerne vil geschih dâ man vil wibe ensament siht: wan dâ wonte in armuot bescheiden wille unde guot.

si wurden dieke schamerôs, dô er in seinen dienst bôt, diu ougen trüebe unde naz, die wiler under in saz. ouch muot in sêre ir arbeit. er sprach 'enwærez in niht leit, sô het ich gerne vrâge iwer ahte unde der mâge. Ist iuch diu armuot an geboren, sô hân ich minen wân verloren. ich sihe wol daz iu wê tuot diu schame der selben armuot: und ich versihe michs dâ von: swer ir von kinde ist gewon, dern schamt sich ir sô sêre niht als man hie an iu gesiht. nune sagt mir minre noch mê wan rehte wiez dar umbe stê. weder hât iu ditz lebn geburt ode unheil gegeben?' ditz was der einer antwurt. 'unser lebn und unser burt diu suln wir iu vil gerne sagen, gote und guoten luten clagen wie uns grôz êre ist benomen und sîn in disen kumber komen. herre, ez ist unser lant der Junevrouwen wert genant und lit von hinnen verre. des selben landes herre gewan den muot daz er reit niuwan durch sîne kintheit.

suochen âventiure: und von des weges stiure leider uns sô kom er rehte alsam ouch ir dâ her, und geschach im als ouch iu geschiht. wan dâne ist widerrede niht Irn müezet morne vehten mit zwein des tiuvels knehten. die sint alsô manhaft, und hetet ir sehs manne kraft, daz wære ein wint wider in. got eine mæc iu helfen hin, ober imz enblanden wil: wand im ist nihtes ze vil: ezn kan ouch âne in niht gesehn. wir müezen morne an iu gesehn den jâmer unz an dise vrist an manegem hie geschehen ist. sus kom mîn herre her geriten und solte mit in hân gestriten. sîn wille unde sîn muot der was bereit unde guot: done was sîn alter vür wâr niuwan ahtzehen jâr, und was des libes alsô kranc daz er des siges âne danc und ungestriten muose jehn, und wær dâ tôter gesehn, wan daz er sich von disen unsæligen risen lôste als ich iu wil sagen. sî heten in anders erslagen,

wan daz er in über den eit gap gîsel unde sicherheit daz er in zînst sin lebn. er muoz in elliu jâr gebn Drizec mæge dâ her die wile sî lebent und er. unde gesigte ab dehein man iemer dîsen beiden an, sô wæren wir aber erlâst. diu rede ist leider âne trôst: wan zuo aller ir kraft sô sint sî ze manhaft daz in iemer dehein man den sige müge behaben an. wir sin die selben zinsgebn und hân ein kumberliches lebn. wir leiten riuweliche jugent: wan sî sint ân alle tugent. den wir dâ sin undertân: sine kunnen uns niht geniezen lâ aller unser arbeit. swaz uns vür wirt geleit, daz müez wir allez liden. von golde und von sîden wurken wir die besten wât die iemen in der werlte hât: nû waz hilfet uns daz? wirne lebn niht deste baz. wir müezen starke enbland den armen unde den handen, ê wir sô vil erwerben daz wir niht hungers sterben.

man lônet uns als ich iu sage: nû sprechet wer von dem bejage Riche wesen kunde. man gît uns von dem pfunde niuwan vier pfenninge. der lôn ist alze ringe vür spîse und vür cleider: des sîn wir ouch der beider vil rehte dürftiginne. von unserme gewinne sô sint sî worden rîche, und wir leben jæmerliche. nu erbarmet in ir ungemach: er siufte sêre unde sprach 'nû sî got der süeze der iu vrouwen büeze iuwer unwerdez lebn, und ruoche iu sælde und êre gebn. mir ist iuwer kumber leit: und wizzet mit der wârheit, sô sêre erbarmet ir mich, ich benæme iun gerne, möht ich. ich wil gên unz ich vinde des hûses ingesinde, wie daz gebære wider mich. din rede ist nie sô angestlich, und wil mir got gnædec wesn, sô trûwe ich harte wol genesn. sus bat er ir got pflegen: ouch gâben si im vil manegen segen. sus begunder suochende gân und sach ein schœne palas stân:

Dar úf giene er schouwen mit siner junevrouwen, und envant dar úffe wip noch man: nú volget er ein wanke dan, der in einen wec leite über des palases breite: wan dó het erz ersuoehet gar. uú nam er einer stiege war: diu selbe stiege wist in in einen boumgarten hin: der was sô breit und sô wit daz er ê noch sit deheinen schœnern nie gesach. dar in hete sich durch gemach ein altherre geleit: dem was ein bette bereit, des wære gewesen vrô diu gotinne Jûnô, dô si in ir besten werde was. diu schœne bluot, daz reine gras, die báren im vil süezen smac. der herre hêrlîche lac. er hete ein schœnen alten lip: und ich wæne wol, sî was sîn wîp, ein vrouwe diu dâ vor im saz. sine mohten beidiu niht baz nâch sô alten jâren getân sîn noch gebâren. und vor in beiden saz ein magt, diu vil wol, ist mir gesagt, Wâlhisch lesen kunde: diu kurzte in die stunde.

ouch mohte si ein lachen vil lihte an in gemachen: ez dûht si guot swaz si las, wand si ir beider tohter was. ez ist reht daz man si kröne, diu zuht unde schœne, hōhe geburt unde jugent, rîcheit und kiusche tugent, güete und wîse rede hât. ditz was an ir, und gar der rât des der wunsch an wibe gert, ir lesen was et dâ vil wert. dô si den gast ersâhen, dô begundens gâhen, diu vrouwe unde der herre, engegen im gnuoc verre unde enpfîngen in alsô wol als ein wirt den gast sol, der im willekomen ist. dar nâch het in in kurzer vrist entwâfent diu junge sô guoter handelunge was gnuoc ein ellenden man. dâ nâch gap si im an wize linwât reine, geridieret cleine, und ein sâmit's mantellîn: dar under was härmin, Als ez ob hemde wol stât. des rockes heter wol rât, wand ez ein warmer âbent was. an daz schœneste gras

daz er in dem boumgarten vant, dar vuorte sin bî der hant, und sâzen zuo ein ander: alrêrst dô bevander daz bî ir wûnneclîcher jugent wonte güete und michel tugent. ich wæne man an kinde niemer mêre vinde süezer wort noch rehter site: sî mohte nâch betwingen mite eines engels gedanc, daz er vil lihte einen wanc durch sî von himele tæte; wand sî sîner stæte ein selhen minnen slac sluoc, die er in sime herzen truoc, möht die ûz sime gemüete deheines wîbes güete iemer benomen hân, daz hete ouch sî benamen getân. und het er sî nie gesehn, sô wær im vil baz geschehn: wand im tete daz scheiden wê. ern erkunte sît noch ê âne sin selbes wîp nie süezer rede noch schœnern lîp. Dô sich die viere gesunderten sô schiere, dô mohtens undr in beiden wol glîche sîn gescheiden des muotes sam der jâre. ich versihe mich wol zwære,

ir herze wâren mislich. diu zwei jungen senten sich vil tougen in ir sinne nâch redelicher minne, unde vreuten sich ir jugent, und reiten von des sumers tugent und wie sî beidiu wolten, ob sî leben solten, guoter Freude walten. dô reiten aber de alten, sî wæren beidiu samt alt und der winter wurde lihte kalt: sô soltens sich behüeten mit rûhen vuhshüeten vor dem houbetvrose. sus schuofen sî ir koste ze geviere und ze gemache: sî ahten ir sache nâch dem húsrâte, nû wasez ouch alsô spâte daz im ein bote seite sîn ezzen wære bereite. nû giengen sî ouch ezzen, und enwart des niht vergezen, Si buten deme gaste volleclichen vaste alsô grôz êre daz ez nie wirt mêre sime gaste baz erbôt des was er wert und was im nôt. dâ was mit volleclicher kraft wurde unde wirtschaft.

dar under dâhter iedoch ez vert allez wol noch: nû vürht ich aber vil sêre daz ich dise grôz êre vil tiure gelten müeze (der antfanc ist ze süeze), als mir der arge schalc gehiez, der mich in die burc liez, des wirtes portenære, unde ouch nâch dem mære als mir die vrouwen hânt gesagt. gehabe dich wol, wis unverzagt: dir geschiht daz dir geschehen sol, und anders niht, daz weiz ich wol. dô si vol gâzen unde unlange sâzen, dô bette man in, den gesellen allen drin, durch ir gemach besunder. swer daz nû vür ein wonder iemer ime selben sagt daz im ein unsippiu magt Nahtes alsô nâhen lac mit der er anders niht enpfac, dern weiz niht daz ein biderbe man sich alles des enthalten kan des er sich enthalten wil. weizgot dern ist aber niht vil. diu naht diu gienc mit senften hin: got der müeze vüegen in des morgens bezzer mære danne er getrœstet wære.

morgen, dô ez tac wart under sîn êrste vart dem heiligen geiste mit einer messe leiste, dô wolter urloup hân genomen dô sprach der wirt die her sint komen und riter wâren als ir, die habent alle sament mir geleistet mîne gewonheit; daz in grôzer arbeit aller dickest ergie. zwêne risen die sint hie: desn ist dehein mîn gast erlân erne müese sî bestân; daz sî noch niemen überwant und ist iedoch alsô gewant: wære dehein sô sælec man der in beiden sigte an, dem müese ich mîne tochter gebn; und solte mich der überlebn, Der gwünne michel êre (ichn habe niht kindes mêre) und wurd im allez ditz lant ouch ist ez leider sô gewant: die wil sî unerwunden sint, sône mac ich mîn kint deheinem manne gegebn wâget, riter, daz lebn nû ist iu lihte guotes nôt: werdet riche, od liget tôt waz ob iu sol gefallen der prîs vor in allen?

ja gelinget eime dicke an zwein. des antwurte im her Îwein diu geliche als er wære verzagt. 'iwer tohter ist ein schœniu magt unde ist edel unde rîch: sone bin ich niender dem gelîch daz ich ir möhte gezemen. ein vrowe sol einen herren nemen: ouch vind ich ein wîp wol, swenn ich wîp nemen sol, dâ mir mîn mâze an geschîht. ichn ger iuwer tohter niht. ouch enwil ich niemer mînen lîp gewâgen umbe dehein wîp sô gar ûzer mâze daz ich mich slahen lâze sô lasterliche âne wer: wan zwêne sint eines her. Sold ich joch einen bestân, dâ müeze ich angest zuo hân.' dô sprach der wirt 'ir sit verzagt: daz ir mir iuwer krankheit sagt, ich weiz wol wâ von daz geschîht. irn wert iuch mîner tôhter niht, niuwan durch iwern verzagten muot. nû vehtent: daz ist alsô guot: wan ezn si daz iuch diu ner, si slahent iuch âne wer.' dô sprach der gast 'ditz ist ein nôt, herre, daz man iuwer brôt mit dem lîbe zinsen sol. nû kumet mir daz alsô wol

daz ich enzît strîte sô daz ich iemer bite, sît mir ze stritenne geschiht. nûne sûmter sich niht ern wâfente sich zehant, und nâch dem orse wart gesant. daz was die naht sô wol bewart daz ez nie bî im enwart gekunrieret alsê schône. daz ims doch got niht lône der daz sô vlizeclîchen tete! wand ez was ân des gastes bete. der dinge verkêret sich vil, daz ein dem andern schaden wil und daz er im vil gar gevrumt: swelch dienest sô ze staten kumt Daz erm liep unde guot sô wider sînen willen tuot, des lôn wirt von rechte kranc. ern darf nieman gesagen danc umb sînes rosses gemach, wand ez im ûf den wân geschach daz ez in dâ solte bestân: und ist daz sî betrouc ir wân, zwâre, dazn wirt mir niemer leit: nû was der gast wol bereit: ouch kômen die risen mit wer, sî mohten ervehten wol ein her. sî wârn gewâfent sêre sô daz an in niht mêre blôzes wan daz houbet schein, und die arme unt tiu bein.

die kolben die sî truogen, swelhes endes sî die sluogen, dane mohte niht vor bestân, und heten grôzen mort getân. unde als sî den grôzen leun mit sînen wîten keun bî sînem herren sâhen stân und mit sînen langen clân die erde kratzen vaste, dô sprâchen sî ze dem gaste 'herre, waz wil der leu? uns dunket daz er uns dreu mit sînem zornigen site. jane vihtet iu hie niemen mite, Der leu enwerde in getân. solt ir uns mit im bestân, sô wæren zwêne wider zwein. dô sprach her Îwein 'min leu vert mit mir durch daz jâr: ich enheiz in vür wâr niemer von mir gân und sihe in gerne bî mir stân. iehn vür in ûf deheinen strit: sît ab ir mir erbolgen sit, von swem iu leide mac geschehn, daz wil ich harte gerne sehn, von manne ode von tiere.' do bewâgen sî sich schiere, sine væhten niemer wider in, ern tæte sînen lewen in. dô muoser sînen lewen lân: der wart dâ in ein gadem getân,

dâ er wol durch die want sach den strît der in dem hove geschach. die zwêne ungevüegen man die huoben ime den strît an. got müeze des gastes pflegn: der strît der was ungewegn: ern bestuont nie sô grôze nôt. den schilt den er vür bôt, der wart schiere zeslagen. ern mohte niuwet an getragen daz im wol geschirmen möhte unde vür die kolben töhte. Man sach den helm risen und anders sîn îsen als ez von strô wære geworht. dem edeln riter unervorht vriste sîn manheit und sîn sin daz er sô lange vor in unerslagen werte: ouch galt er mittem swerte under wilen einen slac der vil wol ze staten lac. dô dise slege herte der lewe sîn geverte beide gehörte unde gesach, dô muot in sîn ungemach. dône vant er loch noch tür daz er kœme hin vür, und suochte al umbe unz er vant bî der erde an der want eine vûle swelle. der getriuwe hergeselle

der kratzet unde beiz dan holz und erde, unz er gewan ein vil gerûme ûzvart, diu vil harte drâte wart ir eime ze leide. got velle sî beide! sines herren arbeit, die er ie durch in geleit, der lônder im dâ. er begunde sîne scharfen elâ In sînen rûke heften und warf in mit kreften rûkelingen under sich. über den gienc der gerich, wand er in beiz unde brach swâ er in blôzen sach, unz er nâch helfe schrê. done twelt sîn selle niuwet mê, wan er geloupte sich des man und lief drâte den lewen an, und wolt in gerne haben erslagen, hetez im sîn herre vertragen. sît er in erlôste, kom er im nû ze trôste, zwâre, des heter michel reht. als schiere so im des tiuvels kneht sînen rûke kêrte, daz in got sô gêrte, dô sluoc er in kurzen stunden im vil manege wunden: in die arme und in diu bein und dâ er ungewâfent schein,

dâ gap er im vil manegen slac, wan jener der dâ nider lac, dern moht im niht ze staten komen: wand im hete der leu benomen sô gar die kraft untten sin daz er vür têt lac vor in. dô vâhten si in dô an, beide der lewe untter man, Und heten in vil schier erslagen, und doch unglich eine zagen: wander gap in manegen herten streich, sit daz im diu helfe entweich, der ander lebte dannoch: der muose sich in iedoch gar in ir genâde gebn: dô liez er in durch got lebn. daz sich des portenæres drô unde sîn spot alsô ze freuden hât gekêret, des si got iemer gêret. dô er den sige dâ gewan, dô bôt in der wirt an sine tohter und sîn lant. dô sprach er 'wære iu daz erkant wie gar mîne sinne eins andern wîbes minne in ir gewalt gewonnen hât, sô hetent ir des gerne rât daz ich iemer wurde ir man, wand ich niemer werden kan stæte deheinem wîbe wan ir einer libe

durch die mîn herze freude enbirt. 'ir müezt sî nemen,' sprach ter wirt, 'ode ir sit gevangen; und wære iu wol ergangen daz ich ir iu sô willec bîn. hetet ir sælde unde sin, Sô bæt ir mich des ich iuch bite. er sprach 'jâ wærent ir dâ mite beswichen, daz wil ich iu sagen, wand ich nû in disen tagen einen kampf muoz bestân, den ich alsô genommen hân daz in der küneec Artûs muoz sehn: er sol in sîme hove geschehn. wurde sî danne mîn wîp unde verlür ich den lîp, sô wurde sî gunêret.' der wirt sprach 'swar ir kêret, daz ist mir gar unmære, und muoz mir wesen swære daz ichs ie iuch an gebôt, wand ich iuch unz an mînen tôt ir harte gerne erlâzen sol.' er gast vertraoc den zorn wol. er sprach 'lieber herre, nû man ich iuch vil verre, bedenket iwer hêrschaft, daz iwer gelübde habe kraft. sît ich hie gesiget hân, sô sult ir iwer gevangen lân alle ledec durch mich.' der wirt sprach 'daz ist billich'

und liez si ûz den banden sâ, und behabte den gast bi im dâ unz an den sibenden tac, daz man ir dô vil schône pfлак Und si vil riche cleite unde pfert bereite, daz si wol mohten rîten. in den sô kurzen zîten gewunnens wider ir lîp und wurden diu schœnsten wîp diu er ie mê gesach. daz schuof in daz kurze gemach. dô reit er mit in von dan und brâhtes als ein hövesch man vil rehte an ir gewarheit. und dô er wider von in reit, vil tiure si got bâten, als si von rehte tâten, umbe ir herrn und umbe ir trôst, der si dâ hete erlôst von michelme sêre, daz er im sælde und êre und rehtes alters ein lebn und sîn riche müese gebn. nû wer moht im gedreun, dô er gesunden sînen leun von dem strîte brâhte? dar er dâ vor gedâhte, dar kêrter nû zehant, dâ er die junevrouwen vant, die ir niftel siech liez, der er den kampf vür si gehiez:

diu wiste in die vil rehten wege, und vundens in ir vater pflege. Nune twelten sî niht lange dâ: wan in was diu kampfzit alsô nâ daz in der tage zuo ir vart enweder gebrast noch über wart, und kômen ze rehten ziten. ir swester, ir widerstrîten, vundens an der kampfstat. her Gâwein, der sich helen bat, der hete sich selben sô verholn und hete sich vor enwec gestoln, und hórten in des alle jehn, ern möhte den kampf niht gesehn vor ander unmüezekheit. alsus heter sich entseit, und hete sich wider gestoln dar mit vremden wâfen. alsô var daz in dâ niemen ân die magt erkante: der het erz gesagt. nû saz der künec Artûs unde von sime hûs sîn massenie gar, die gerne wolden nemen war wie dâ wurde gestritten. nû kom ouch dort zuo geriten diu junevrouwe und her Îwein. der lewe envuor niht mit in zwein (den heter under wegen lân: ern wolt in niht zem kampfe hân), und enwas ouch niemen dâ bekant wie der riter wære genant.

Nû riten sî beide in einen rine: ez dûht sî alle sament ein dinc vil harte clagebære, ob es niht rât wære ir einer enwurde dâ erslagen: den müese man wol iemer clagen; wand sî nie gesâhen, des sî alle jâhen, zwêne rîter gestalt sô gar in Wunsches gewalt an dem lîbe und an den siten; und begunden den küne c biten daz er die altern bæte daz siz durch got tæte unde der jungern teilte mite. daz verzêch sî im mit selhem site daz er die bete muose lân. sî wolte daz gewis hân, ir kempfe wurde sigehaft, wande sî wol sîne kraft erkande und sich des trôste daz er sî gar erlôste. dô der küne c Artûs ersach dazz niemen an die suone sprach, dô hiez er rûmen den rine: nû was ez doch ein starkez dinc ze sehenne ein vehten von zwein sô guoten knechten (wandezn tuot dem biderben man niht wol,) der sandern tôt sehen sol); Daz doch dem einem wæge was, ob joch der ander genas.

machet ich ditz vehten von disen guoten knehten mit wordn vil spæhe, waz töhte diu wæhe? wand iu ist ê sô vil geseit von ietweders vrümekheit daz ich iu lihte mac gesagen daz si niender zwein zagen des tages gelîch gebârten und daz als ê bewârten daz diu werlt nie gewan zwêne strîtiger man nâch werltlîchem lône. des truogens ouch die krône rîterlîcher êren, die ietweder wolde mêren mit dem andern an dem tage, daz ich ez gote immer clage daz die besten gesellen ein ander kempfen wellen die iender lebten bî der zît. sweder nû têt gelît von des anderen hant, und im dâ nâch wirt erkant wen er hât erslagen, daz wirt sîn êwigez clagen. möhten sî nû beide gesigen ode beide sigelôs geligen Ode abe unverwâzen den strît beide lâzen, sô sî sich erkennt beide, daz wær in vür die leide

daz liebest und daz beste. jane wâren sî niht geste des willen, sam der ougen. ir ietwederm was tougen daz in kempfen solde ein man der liebest den er ie gewan. sît daz der kampf wesen sol, sô zimet in daz beiden wol daz sî enzît striten. wes mugen sî iemer bîten? dâ ist diu state unde der muot. ouch wâren d'ors alsô guot daz sî daz niht ensûmde. ir ietweder rûmde dem andern sînen puneiz von im vaste unz an den kreiz: der was wol rosseloufes wît. ze rosse huop sich der strît. sî mohten wol striten, wand sis ze den zîten niht êrste begunden. wie wol sî striten kunde ze rosse und ze vuoze! ez was ir unmuoze von kinde gewesen ie: daz erzeigten sî wol hie. Ouch sî in daz vür wâr geseit: ez lêret diu gewonheit einen zagehaften man daz er getar unde kan baz vehten danne ein küener degn der es niht hât gepflegn.

dô was hie kunst unde kraft: sî mohten von rîterschaft schuole gehabet hân. zwâre man muose in lân von rîterschefte den strît, swaz rîter lebte bî der zît. nune sûmden siz niht mēre: diu ros wurden sēre mit den sporn genommen. man sach sî dort zesamne komen und vîentliche gebâren, die doch gesellen wâren. ez dunket de andern unde mich vil lîhte. unmügelich daz iemer minne unde haz alsô besitzen ein vaz daz minne bî hazze belîbe in einem yazze. ob minne unde haz nie mê besâzen ein vaz, doch wonte in disem yazze. minne bî hazze alsô daz minne noch haz gerûmden gâhes daz vaz. ‘Ich wæne, vriunt Hartman, dû missedenkest dar an. war umbe sprichestû daz daz beide minne unde haz ensamt bûwen ein vaz? wan bedenkestû dich baz? ez ist minne und hazze zenge in einem yazze.

wan swâ der haz wirt inuen ernstlicher minnen, dâ rûmet der haz vroun Minnen daz vaz: swâ abe gehûset der haz, dâ wirt diu minne laz. nû wil ich iu bescheiden daz, wie herzeminne und bitter haz ein vil engez vaz besaz. ir herze ist ein gnuoc engez vaz: dâ wont ensamt inne haz unde minne. sî hât aber underslagen ein want, als ich iu wil sagen, daz haz der minne niene weiz. sî tæte im anders alsô heiz daz nâch schanden der haz müese rûmen daz vaz; und rûmetz ouch vroun Minnen, wirt er ir bî im innen. diu unkünde was diu want diu ir herze underbant; Daz sî gevriunt von herzen sint und mit gesêhnden ougen blint. sî wil daz ein geselle den anderen velle: und swennern überwindet und dâ nâch bevindet wen er hât überwunden, sone mac er von den stunden niemer mêre werden vrô. der Wunsch vluochet im sô:

im gebrist des leides niht, swenn im daz liebest geschiht. wan sweder ir den sige kôs, der wart mit sige sigelôs. in hât unsælec getân aller sîner sælden wân: er hazzet daz er minnet, und vliuset so er gewinnet. ir ros diu liefen drâte. ze vruo noch ze spâte sô neicten sî diu sper und sluogens ûf die brust her, daz sî niene wancten. sine bürten noch ensancten enweder ze nider noch ze hô, niuwan ze rehter mâze alsô als ez wesen solde und ir ietweder wolde sînen kampfgesellen ûf den sâmen vellen; Daz ietweders stich geriet dâ schilt unde helm schiet: wan dâ râmet er des man der den man vellen kan. daz wart dâ wol erzeiget: wandez was geneiget ir ietweder alsô sêre daz er dâ vor nie mêre sô nâhen kom dem valle, ern viele ouch mit alle. daz ir ietweder gesaz, daz enmeinde niht wan daz

daz diu sper niht ganz beliben: wand sî kômen dar getriben mit alsô manlicher kraft daz ir ietweders schaft wol in hundert stücke brach, und daz männlich dâ jach ern gesæhe schœner tjost nie. ez lief kreierende hie behender garzûne gnuoc, der ietweder truoc driu sper ode zwei. man hôrte niht wan ein geschrei, 'wâ nû sper? wâ nû sper? ditz ist hin, ein anderz her.' dâ wart vil gestochen und gar diu sper zebrochen diu sî dâ haben mohten. heten sî dô gevohten Ze rosse mitten swerten, des sî niene gerten, daz wære der armen rosse tôt: von diu was in beiden nôt daz sî die dörperheit vermiten und daz sî ze vuoze striten. in heten diu ros niht getân: sî liezen an den lîp gân. ich sage iu waz sî tâten, dô sî zesamne trâten, die zwêne kampf wîsen. sî sparten daz îsen dâ mit ir lîp was bewart: diu swert wurden niht gespart.

sî wâren der schilte ein ander harte milte: den schilten wâren sî gehaz. ir ietweder bedâhte daz, 'waz touc mir mîn arbeit? unz er den schilt vor im treit, sô ist er ein sicher man. die schilte hiuwen sî dan. sine gernochten des nie. daz sî niderhalp der knie deheiner slege tæten war, dâ sî der schilte wâren bar. si entlihen kreftiger slege mê dan ich gesagen mege, âne bürgen unde pfant, und wart vergolten dâ zehant. Swer gerne giltet, daz ist guot: wan hât er borgennes muot, sô mac er wol borgen. daz muosen sî besorgen, swer borget und niht gulte, daz er des lihte engulte. borgtens âne gelten, des vorhten sî engelten; wand ers dicke engiltet swer borc niene giltet. sî hetens dâ engolten, dane wurde borc vergolten; dâ von ir ietweder galt daz ers an lobe niht engalt. sî muosen vaste gelten vür des tôdes schelten

und vür die scheltære bœser geltære. si entlihen bêde ûz voller hant, und wart nâch gelte niht gesant: wand sî heten ûf daz velt beide brâht ir übergelt unde vergulten an der stat mê und ê dan man sî bat. verlegeniu müezekheit ist gote unde der werlte leit: dane lât sich ouch niemen an niuwan ein verlegener man. swer gerne lebt nâch êren, der sol vil starke kêren Alle sîne sinne nâch eteslichem gwinne, dâ mit er sich wol bejage und ouch vertribe die tage. alsus heten sî getân: ir leben was niht verlân an deheine müezekheit. in was beiden vil leit swenne ir tage giengen hin daz sî deheinen gewin an ir koufe vunden, des sî sich underwunden. sî wâren zwêne mære karge wehselære und entlihen ûz ir varende guot ûf einen seltsænen muot. sî nâmen wuoher dar an sam zwêne werbende man:

sî pfâgen zir gewinne harte fremder sinne. dehein kouwman hete ir site, ern verdurbe dâ mite: dâ wurden sî rîche abe. si entlihen niemen ir habe, in enwære leit, galt er in. nû sehent ir wie selch gewin iemen gerîchen mege. da entlihen sî stiche unde slege beide mit swerten und mit spern: desn moht sî nieman gewern Vol unz an daz halbe teil: des wuohs ir êre und ir heil. ouch was ir wehsel sô bereit daz er nie wart verseit manne noch wibe, sine wehselten der lîbe arbeit umb êre. sine heten nie mêre in alsô kurzen stunden sô vollen gelt vunden: si entlihen nie einen slac wan dâ der gelt selb ander lac. die schilte wurden dar gegebn ze nôtpfande vür daz lebē: die hiuwens drâte von der hant. done heten sî dehein ander pfant niuwan daz îsen alsô bar: daz verpfanten sî dar. ouch enwart der lîp des niht erlân ern müese dâ ze pfande stân:

den verzinsten si sâ. die helme wurden eteswâ vil sêre verschrôten, daz die meilen rôten von bluote begunden, wande si vil wunden in kurzer stunt enpfingen, die niht ze verhe giengen. sich huop wider morgen mit manlichen sorgen Dirre angestlicher strit, und werte harte lange zît, unz vol nâch mittem tage, daz von ir deweders slage dehein schade mohte kômen in hete diu müede benomen sô gar den lîp und die kraft daz si des dûhte ir rîterschaft diu wære gar ân êre, und envâhten niuwet mêre. ez wart dâ von in beiden ein vil gemüetlich scheiden, und satzten sich ze ruowe hie unz si diu müede verlie. diu ruowe wart vil unlanc unz îetweder ûf spranc und liefen aber ein ander an. si wâren zwêne vrische man beide des willen unttter kraft. ezn wac ir erriu rîterschaft engegen dirre niht ein strô, der si begunden aber dô.

ir slege wâren kreftec ê, nû kreftiger, und wart ir mê. ouch sach disen kampf an manec kampfwise man: ir deheines ouge was vür wâr weder sô wîse noch sô clâr, heter genommen ûf sînen eit ze sagenne die wârheit Weder ir des tages ie gewonnen hete bezzer hie alsô grôz als umb ein hâr, desne mohter vür wâr ir dewederm nie gejehn: ezn wart nie glicher kampf gesehn. nû sorget man unde wîp umb ir êre und umb ir lîp: und möhten siz in beiden nâch êren hân gescheiden, daz heten sî gerne getân, und begunden rede drumbe hân. wand wer möhte daz verclagen, sweder ir dâ wurde erslagen od gekrenket an den êren? der künece begunde kêren bete unde sinne, ober deheine minne vunde an der altern magt, diu sô gar hete versagt der jungern ir erbe. diu bete was unbederbe: si versagt im sô mit unsiten daz er sis niht mê wolte biten.

dō aber diu junger ersach der guoten riter ungemach, daz truobte si in ir sinnen: und dō sî mit minnen nieman gescheiden mohte, dō tete sî als ir tohte. Diu edele und diu schœne, diu gewizzen, diu unhœne, diu süeze, diu guote, diu suoze gemuote, diu niuwan süezes kunde, mit rōtsüezem munde lachte sî die swester an. sî sprach 'ê ein sus gêret man den tōt in mîneme namen kür ode sîn êre verlür, mîn lîp und unser beider lant wæren bezzer verbrant. ziuch dich mit guoteme heile ze mînem erbeteile. dir sî verlâzen âne nît beide lant unde strît. deiswâr sît ichs niht haben sol, ichn gan es niemen alsô wol. heiz den kampf lâzen sîn: ir lebn ist nützer danne dez mîn. ich bin noch baz ein armwip danne ir deweder den lîp durch mich hie sül verliesen. ich wil ûf dich verkiesen. ir willen dâ nieman ensach wan der ir guotes drumbē jach.

den künec sî alle bâten und begunden râten daz erz durch got tæte unde ir swester bæte Daz sî der jungeren doch daz dritte teil od minre noch ir erbeteiles wolde gebn: ez gienge den rîtern an daz lebn, ir einem ode in beiden, sine wurden gescheiden. daz hete sî lihte getân, wold es der künec verhenget hân. done wolt ers niht volgen: er was sô sêre erbolgen der altern durch ir herten muot: in dūht diu junger alsô guot daz er sî nôte verstiez, wand sî sich vil gar verliez ze sînem hoverehte. dise guoten knehte die heten deme langen tage mit manegem riterlichen slage nâch êren ende gegebn, und stuont noch ûf der wâge ir lebn, unz daz diu naht ane gieñc und ez diu vînster undervienc. sus schiet sî beide diu naht, und daz ir ietweders maht wol dem andern was kunt, daz sî beide dâ zestunt an ein ander genuoete. und sit ez sich wol gevuocte

daz siz mit êren mohten lân, sô liezen siz wol understân Unz an den anderen tac, si tâtten als er ie pfлак der ie rehten muot gewan: swie leide dem biderben man von dem andern geschiht, kumt ez von muotwillen niht, ober den willen trüege daz er in gerne slüege, sone ist er im doch niht gehaz, unde behaget im baz dan dâ bi ein bœser man des er nie schaden gewan. daz wart wol schîn an in zwein. sich verkunde mîn her Îwein wider sînen kampfgenôz, wan deiz vür eine gâbe grôz ir ietweder haben wolde, ober wizzen solde wer der ander wære. sîniu wehselmære begunder wider in hân. er sprach 'wir haben et verlân unser häzlichez spil: ich mac nû sprechen swaz ich wil. ich minnet ie von minner maht den liehten tac vür die naht; dâ lac vil minner freuden an, und vreut noch wip unde man. der tac ist vrœlich unde clâr, diu naht trüebe unde swâr,

Wand sî diu herze trüebet. sô der tac üebet manheit unde wâfen, sô wil diu naht slâfen. ich minnet unz an dise vrist den tac vür allez dazder ist: deiswâr, edel riter guot, nû habet ir den selben muot vil gar an mir verkêret. der tac sî gunêret: ich hazz in iemer mêre, wand er mir al mîn êre vil nâch hete benomen. diu naht sî gote willekomen: sol ich mit êren alten, daz hât sî mir behalten. nû seht ob ich von dem tage niht grôzen kumber unde clage wol von schulden haben mege. und wærer langer drier slege, die heten iu den sige gegebn und mir benomen daz lebn: des erlât mich disiu liebiu naht. diu ruowe gît mir niuwe mâht: dâ nâch gêt ein swære tac; daz ich den aber vehten mac. nû muoz ich aber sorgen ûf den tac morgen. got enwelle michs erlân, sô muoz ich aber bestân Den aller tiuresten man des ich ie künde gewan.

dâ hœret weizgot sorge zuo: got sî der sîne gnâde tuo. den ich dâ meine, daz sit ir. got der bewar mir minen lip und mîn êre: ichn vorhte ir ê nie sê sêre. und wizzet daz ich nie gewan ze tuonne mit deheinem man den ich sô gerne erkande. ir möhtent âne schande mir wol sagen iuweren namen. 'ichn wil mich wider iuch niht schamen,' sprach mîn her Gâwein. 'wir gehellen beide in ein. herre, ir habent mir des verdigen: unde hetent ir geswigen, die rede die ir habent getân die wold ich gesprochen hân. daz ir dâ minnet, daz minn ich: des ir dâ sorget, des sorg ich. ez ist hiute hin ein tac den ich wol immer hazzen mae: wand er hât mir die nôt getân der ich ie was erlân. mir benam deiswâr nie mêre ein man alsô sêre mîne werliche maht: und möhtet ir vor der naht Ze zwein slegen hân gesehn, sô müese ich iu des siges jehn. ich hân der naht kûme erbiten. swaz ich noch hân gestriten,

so gewan ich nie sô grôze nôt. ich vürhte laster ode den tôt von iu gewinnen morgen. wir sîn in glîchen sorgen. und sî iu daz vür wâr geseit daz ich iu durch iuwer vrûmekheit. al der êren wol gan der ich niht sêre engelten kan. mîn herze ist leides überladen, daz ich ûf iuweren schaden immer sol gedenken. swa ez mich niht süle krenken, da geschehe iu allez des ir gert. des sît ir weizgot wol wert. ich wolde daz ez wære alsô daz dise juncvrouwen zwô heten swaz sî dûhte guot, und daz wir dienesthaften muot ein ander müesen tragen. ich wil iu minen namen sagen. ich bin genant Gâwein. 'Gâwein?' 'jâ.' wie wol daz schein disen unsenften tac! manegen vîentlichen slac hân ich von iu enpfangen. iwer haz ist gegangen Über iuwern gwissen dienstman. unde ichn zwîvel niht dar an, swaz ir mir leides hânt getân, des wær ich altes erlân, het ich mich enzit genant. wir wâren wilen baz erkannt.

herre, ich bin ez Îwein. dô wonte under in zwein liebe bî leide. sî vreuten sich beide daz sî zesamne wâren komen: daz ir dehein hete genommen des andern dehein arbeit, daz was ir beider herzeleit. beide trûren unde haz rûmten gâhes daz vaz, und richseten drinne vrende unde minne. daz zeikten sî wol under in: diu swert wurfen si hin und liefen ein ander an. ezn gelebte nie kein man deheinen lieberen tac, und enweiz ouch niht ob iemen mac alsô lieben gelebn als in dâ got hete gegebn. sî underkusten tûsentstunt ougen wangen unde munt. dô der kûnec die minne und diu kûneginne Von in zwein gesâhen, und vriundes umbevâhen, des wundert sî sêre, und entwelten niht mêre, si begunden dar gâhen, wand sî sî gerne sâhen sô vriuntliche gebâren. und wer sî beide wâren,

dazn was dâ nieman erkant, wan als man ez sit bevant. ouch heten dīe helme unt tiu naht ir gesiune bedaht unttes kampfes grimme verwandelt ir stimme, daz si dâ wæren unerkant, enheten si sich niht genant. 'ei,' sprach mîn her Îwein, 'der tac der dâ hiute schein, daz swert daz den slac truoc den ich hiute ûf iuch sluoc, diu müezen gunêret sin. her Gâwein, lieber herre mîn, waz mac ich sprechen mêre. wan daz ich iuch êre ● als iuwer rîtr und iuwer kneht? daz ist mîa wille und mîn reht. ir hânt mich ofte gêret und ze guote gekêret mîn dinc sô vollelichen daz man mir in den rîchen Mêre guotes hât gejochn danne es âne iuch wære geschehn. ob ich dâ wider möhte iuch gêren als ez töhte, des wold ich iemer wesen vrô: nune mac ich anders wan alsô daz ich iuwer Îwein iemer schîne, unde ie schein, niuwan hiute dîsen tac, den ich wol heizen mac

die gallen in dem jâre: wand ezn wart zwâre weder mîn hant noch mîn swert wie der unmâzen wert daz sî iu ie geslüegen slac. ich verwâze swert untten tac: sô sol mîn ungewizzen hant ir geltes selbe sîn ein pfant, dazs iu daz ze wandel gebe dazs iu diene unz ich lebe. her Gâwein, doch enmôhtent ir niht baz gerochen sîn an mir: wand sî hât mich gunêret und iuwern prîs gemêret. sî hât sich selbe sô gewert daz iu der sige ist beschért. ich sichr in iuwer gebot: wan daz weiz unser herre got daz ich sigelôs bin. ich scheid iwer gevangen hin.' 'Herre und lieber selle, nein,' sprach mîn her Gâwein. 'daz sich dehein mîn êre mit iuwerm laster mêre, des prîses hân ich gerne râ, des mîn vriunt laster hât. waz töhte ob ich mich selben trüge? swaz êren ich mich ane züge, sô habent sî alle wol gesehn waz under uns ist geschehn. ich sicher unde ergibe mich: der sigelôse der bin ich.'

her Îwein sprach aber dô 'ir wænet lihte daz alsô disiu sicherheit geschehe daz ich ir iu ze liebe jehe. wært ir mir der fremdest man der ie ze Riuzen hûs gewan, ê ir mich sô bestüendent mê, zwâre ich sichert iu ê. von rehte sicher ich von diu. 'nein, herre geselle, ich sicher iu, sprach mîn her Gâwein. sus werte under in zwein âne lösen lange zît dirre vriuntlicher strit, unz daz der küneec unt tiu diet beide vrâgten unde riet. waz under disen liuten diu minne möhte diuten Dem hazze alsô nâhen den si ê dâ sâhen; des man im schiere verjach. sin neve her Gâwein der sprach 'herre, wir sulnz iu gerne sagen, daz ir uns niene habent vür zagen, ode daz des iemen wân habe daz wir mit dirre vuoge iht abe des strites komen wellen. wir wâren ê gesellen: daz was uns leider unkunt hiute unz an dise stunt: nune wont niht hazzes bi uns zwein. ich iuwer neve Gâwein

hân gestriten wider in dem ich dienesthafter bin danne in der werlte ieman, unz er mich vrâgen began wie ich wære genant. dô im mîn name wart erkant, dô nanter sich sâ, und rûmte vîentschaft dâ, und gehellen iemer mêre in ein. ez ist mîn geselle Îwein. und geloubet mir daz ich iu sage: het erz gehabt an dem tage, mich hete brâht in arbeit mîn unreht und sin vrûmekheit. diu juncvrowe hât rehtes niht, vür die man mich hie vehten siht: Ir swester ist mit rehte hie. sô half ouch got dem rehten ie: des wær ich tôt von siner hant, het ez diu naht niht erwant. sît mir geviel daz unheil, sô ist mir lieber ein teil nâch grôzem ungeyelle daz mich mîn geselle habe überwunden danne erslagen. die rede begunder Îwein clagen und wart von leide schamerôt, daz er im der êren bôt ein lützel mêre danne gnuoc. daz êren er im niht vertraoc: wan reit er wol, sô reit er baz. hie was zorn âne haz.

der rede vil dâ geschach, daz man ir ietwedern sach des andern prîs mêren mit sîn selbes êren. des vreute der kûnec sich er sprach 'ir müezent ane mich disen strît lâzen beide, durch daz ich iu bescheide daz iuch des wol gnüeget und ez ouch mir wol vüeget.' diu rede wart im bevolhen gar. die juncvrouwen lâter dar. er sprach 'wâ ist nû diu magt diu ir swester hât versag Niuwan durch ir übermuot ir erbeteil unt taz guot daz in ir vater beiden lie?' dô sprach sî gâhes 'ieh bin hie.' dô sî sich alsus versprach und unrehtes selbe jach, des wart der kûnec Artûs vrô: ze geziuge zôch ers alle dô. er sprach 'vrouwe, ir hât verjehn. daz ist vor sô vil diet geschêhn das irs niht wider muget komen: und daz ir ir habt genommen, daz müezet ir ir wider gebn, welt ir nâch gerichte lebn.' 'nein, herre,' sprach sî, 'durch got. ez stêt ûf iuwer gebot beide guot unde lip. jâ gesprichet lîhte ein wîp

des sî niht sprechen solde. swer daz rechen wolde daz wir wip sprechen, der müese vil gerechen. wir wîp bedurfen alle tage daz man uns tumbe rede vertrage; wand sî under wîlen ist herte unde ân argen list, geværlich und doch âne haz: wan wirne kunnen leider baz. swie ich mit worten habe gevarn, sô sult ir iuwer reht bewarn, Daz ir mir niht gewalt tuot. er sprach 'ich lâze in iuwer guot, und iuwer swester habe daz ir. der strît ist lâzen ze mir: ouch hât sich diu guote mit einvaltem muote sô gâr her ze mir verlân: diu muoz ir teil ze rehte hân. gehellen wir zwêne in ein (ez giht mîn neve Gâwein daz er den sige verlorn habe), sô kument ir des strites abe mit schanden unde ân êre. sus ist ez iemer mêre iuwer pris und iuwer heil, lât irr mit minnen ir teil. ditz reiter, wander weste ir herze alsô veste an hertem gemüete, durch reht noch durch güete

enhete siz nimmer getân. sî muose gewalt od vorhte hân: nu gewan sî vorhte von drô, 'nû tuot dermite,' sprach sî dô, 'weder minre noch mê wan daz iu rehte stê. beide ich wil und muoz sî wern, sît daz irs niht welt enbern. ich teile ir liute unde lant: des sît ir bürge unde pfant.' Dê sprach der küneec 'daz sî getân. wandez an in was verlân, sô wart ez wol verendet, verbürget unde verpfendet, daz sî ir erbeit enpfienec. der küneec sprach, dô ditz ergiene 'neve Gâwein, entwâfen dich: so entwâfen ouch her Îwein sich: wan iu ist beiden ruowe nôt.' dô tâten sî daz er gebôt. nû was der leu ûz komen, als ir ê habent vernomen, dâ er dâ in versperret wart, und jagte ûf sines herren vart, unz si in zuo in sâhen dort über velt gâhen. do bestuont dâ niemen mêre: sî vorhten in sô sêre. dâ vlôch man unde wîp durch behalten den lîp, unz daz her Îwein sprach 'ern tuot iu dehein ungemach:

er ist mîn vriunt und suochet mich. dô verstuondens alrêrst sich daz ez der degen mære mittem lewen wære, von dem sî wonder hôrten sagen und der den risen het erslagen. 'geselle,' sprach her Gâwein dô, 'ich mac wol iemer sîn unvrô, Daz ich iu sus gedanket hân des ir mir guotes hânt getân. den risen sluogent ir durch mich: des ruomte mîn niftel sich: wand ir enbutet mirz bî ir. ez het durch mich, seit sî mir, der riter mittem leun getân: irn woltet sî niht wizzen lân wie ir wærent genant. dô neic ich umbe in elliū lant, ichn weste war ode wemē, wan ich meintez hin ze deme der durch mich bestuont die nôt: unde esn letze mich der tôt, ich verdienez als ich sol. ich erkenne iuch bî dem lewen wol. sus lief ter lewe zuo im her: sîme herren zeict er vreude unde vriuntschaft mit aller der kraft als ein stumbez tier dem man vriuntschaft erzeigen kan. zehant wart in beiden ein ruowe besecheiden,

dâ in gnâde unde gemach zuo ir wunden geschach. arzte gewan her Gâwein, im selben unde in zwein, ze heilenne ir wunden. ouch pfîac ir zallen stunden Diu kûnegin untter kûnec Artûs. des biuten sî daz siechhûs vil unlange stunt ê daz sî wâren gesunt. dô hern Îweine wart gegebn kraft unde gesundez lebn, noch wâren im die sinne von sîner vrouwen minne sô manegen wîs ze verhe wunt, in dûhtê, ob in ze kurzer stunt sîn vrouwe niene lôste mit ir selber trôste, sô müeser schiere sîn tôt. in twanc diu minnende nôt ûf disen gæhen gedanc. 'ich trîbez kurz ode lanc, sone weiz ich wiech ir minne iemer gewinne, wan daz ich zuo dem brunnen var und gieze dar und aber dar. gewinne ich kumber dâ von, sô bin ich kumbers wol gewon und lîd in gernner kurzer täge danne ich iemer kumber trage. doch lîd ich kumber immer mê. ir getete der kumber ouch sô wê

daz ich noch ir minne mit gewalt gewinne. mit sime leun stal er sich dar, daz des niemen wart gewar Dâ ze hove noch anderswâ, und machte kumbers weter dâ. daz wart als ungehiure daz in dem gemiure niemen triute genesn. 'vervluochet müezer iemer wesn,' sprach dâ wîp unde man, 'der ie von êrste began bûwen hie ze lande. ditz leit und dise schande tuot uns ein man, swenner wil. bœser stete der ist vil: iedoch ist ditz diu bœste stat dar ûf ie hûs wart gesat. daz waltgevelle wart sô grôz, untter sûs untter dôz werte mittem schalle, daz er die liute alle gar verzwivelen tete. dô sprach vrou Lûnete 'vrouwe, kumt vil drâte der dinge ze râte, wâ ir den man vindt mit tem ir überwindet disen schaden und ditz leit. der ist iu weizgot ungereit, man ensuoch in danne verre. irn möhtet schande merre

niemer gewinnen, swenn er scheidet binnen Alles strites erlân, der iu ditz laster hât getân. ditz geschiht aber morgen: irn wellet besorgen dise selben sache, man enlât iuch mit gemache niemer mêre gelebn.' 'mahtû mir nû rât gegeben?' sprach diu vrouwe zuo der magt. 'nû si dir min nôt geclagt, wan dû mines dinges weist alsô vil sô iemen meist.' sî sprach 'vrouwe, ir habt den rât der iu wol baz ze staten stât. ich bin ein wîp: næm ich mich an ze râtenne als ein wiser man, sô wær ich tumber daune ein kint. ich lîde, unt t'andern die hie sint, daz mir ze lîdenne geschiht, unz man noch dirre tage siht wer iu rât vinde von iuwerme ingesinde, der dise bürde an sich neme und der uns ze schirme zeme. ez mac wol sîn daz ez geschiht: iedoch verwæn ich mich es niht.' sî sprach 'dû solt die rede lân: ichn habe gedingen noch wân daz ich in iemer vinde in mînem gesinde:

Und râth dar nâch daz beste. si sprach 'der danne weste den riter der den risen sluoc und der mich lasters übertruoc, dêr mich von dem rôste hie vor iu lôste, der iu den selben suohte, ob er ze komenne ruochte, sone wærez niender baz bewant. doch ist mir ein dinc wol erkant: ezn hulfe niemannes list, unz im sîn vrouwe ungnædec ist, daz er vüere durch in weder her ode hin, ern tæte im danne sicherheit daz er nâch rehter arbeit mit allen sînen dingen dâ nâch hulfe ringen, ober durch in iht tæte, daz er wider hæte sîner vrouwen minne. diu vrouwe sprach 'die sinne der mir unser herre gau, die kêr ich alle dar an, beide lîp unde guot, daz ich im ir zornmuot vertrîbe, ob ich iemer mac. des enpfâh et mînen hantslac, dô sprach aber vrou Lûnete 'ir sît süeze und iuwer bete. Welch guot wîp wære von den siten, die ir ze vlize begündet biten,

diu iht versagen kunde eim alsô süezen munde? ob es iu âne valschen list earnest wirt oder ist, sô muoz er wol ir hulde hân. ichn mac iuch des niht erlân irn geheizet imz mit eide ê daz ich von iu scheide.' des eides was si vil bereit. vrou Lûnete gap den eit, und wart vil gar ûz genommen daz im ze staten mohte kommen nâch dem si dâ solde varn. si sprach 'vrouwe, ich muoz bewarn mit selhen witzen den eit daz mich deheiner valscheit iemen zihe dar an. er ist ein harte stæter man nâch dem ich dâ riten sol, und bedarf dâ stæter rede wol. welt ir nâch im senden, diu wort mit werken enden. der ich zem eide niht enbir, sô sprechet, vrouwe, nâch mir.' die vinger wurden ûf geleit: alsus gap si den eit. 'ob der riter her kumt und mir ze minner nôt gevrûnt, Mit tem der leu varend ist, daz ich ân allen argen list mine maht und minen sin dar an kêrende bin

daz ich im wider gewinne siner vrouwen minne. ich bite mir got helfen sô daz ich iemer werde vrô, und dise guote heiligen. dône was niht verswigen des er bedurfen solde den sî bringen wolde. sich underwant vrou Lûnete der reise die sî gerne hin reit diu guote mit vrœlichem muote; und was ir dô ze der stunt lützel dar umbe kunt, dô sî der vart begunde, wâ sî in vunde, und wart ir kurzliche kunt ir vil sæliger vunt, wan si in bî dem brünnen vant. er was ir bî dem leün erkant; ouch erkante sî ir herre, dô er sî sach von verre. mit guotem willen gruofter sî sî sprach 'daz ich iuch alsô bî vunden hân, des lob ich got.' 'junevrouwe, daz ist iuer spot: Ode hât ir mich gesuochet?' 'jâ, herre, ob irs gernochet.' 'waz ist daz ir gebietet?' 'dâ habt ir iuch genietet, ein teil von iuwern schulden, und von ir unhulden

von der iu diente ditz lant und diu mich ûz hât gesant, einer langen arbeit: sine welle brechen, ir eit; diu mich dâ ûz gesendet, sô hân ich ouch volendet die rede alsô verre daz ir aber mîn herre werden sult in kurzer vrist, alse sî mîn vrouwe ist. hie was grôz Freude von in zwein. dône wart mîn her Îwein vordes nie alsô vrô. von grôzen freuden kuster dô siner juncvrouwen munt hende und ougen tûsentstunt. er sprach 'ir habt bescheinet vil wol wie ir mich meinet. ich vürhte sêre, und ist mîn clage, daz mir des guotes ode der tage ode beider zerinne ê ich die grôzen minne ze rehte umb iuch verschulden müge als ez dem dieneste tüge Den ir mir nû ~~habt~~ getân. sî sprach 'die angest magt ir lân: ir gewinnet tage und daz guot, het ich verdient den mot, daz mir gnâde wurde sehin und sweme ir gnæde woltet sin. ichn hân niht baz wider iuch getân, irn welletz danne baz enpfân,

dan der des andern guot entnimt, swenn ez ze geltenne gezimt, daz er im geltes ist bereit. ir entliheth mir michel arbeit, dô ich wære verbrant, ob irz niht hætet erwant. vür minen lîp was iuwer lebn ûf die wâge gegebnn: dô gâbet ir mir disen lîp. ez verdienten niemer tûsent wîp, die gnâde dier mir habt getân. er sprach 'die rede sult ir lân. ir habt vaste überzalt: mir ist vergolten tûsentvalt swaz ich ie durch iuch getete. nû sagt mir, liebe vrou Lûnete, weiz si doch daz ich ez bin? si sprach 'daz wære der ungewin. sine weiz von iu, geloubet mirz, zer werlde mêre wan daz irz der rîter mittem lewen sît. si bevindetz noch ze guoter zit. Dô riten si ze hûse dan, und in bekom dâ wîp noch man daz envuocte ouch anders niht niuwan ein wonderlich geschiht, daz si dâ niemen rîten sach. unz si ergriffen ir gemach. dô gienc vrou Lûnete dâ si an ir gebete ir vrouwen alters eine vant, unde saget ir zehant

daz er komen wære. done hete sî dehein mære. alsô gerne vernomen. sî sprach 'nû sî er willekomen. ich wil in harte gerne sehn, swie daz mit vuoge mac geschehn. gene hin zuo im unde erwar, wil er her, od sol ich dar? daz sî: wan ich bedarf sîn. er gieng nâch mir, bedorfter mîn. vil schiere brâht in vrou Lûnete. er vuor swie in diu varen tete, gewâfent daz im nihts gebrast. si enpfie den wirt vür einen gast. und bî dem êrsten gruoze viel er ir ze vuoze und enhete doch deheine bete. dô sprach vrou Lûnete 'vrouwe, heizt in ûf stân: und als ich im geheizen hân; Sô sult ir lœsen den eit ich sag iu mitter wârheit daz diu helfe untter rât niuwan an iu einer stât. sî sprach 'nû bewîs et mich: durch sinen wîllen tuon ich swaz ich mac unde sol. sî sprach 'vrouwe, ir redent wol: nûne hulfe im niemen baz. sîn vrouwe, diu im ist gehaz, gebietent ir, diu lât ir zorn: gebietent ir, er ist verloren,

und möht in daz wol wesen leit. irn habt mitter wârheit keinen bezzern vriunt dan er ist. ez wolde unser herre Krist, und wiste mich ûf die vart, daz er sô gâhes vunden wart, daz diu fremde von iu zwein wurde gesamenet eneîn. sone sol iuch dan kein ander nô gescheiden nimmer âne der tô. nû haltet iwer gewârheit unde lœsent den eit. vergebent im sîne missetât, wand er kein ander vrouwen hât. noch gewinnet noch gewan. ditz ist her Îwein iuwer man. diu rede dûht si wunderlich, und trat vil gâhes hinder sich. Si sprach 'hâstû mir wâr geseit, sô hât mich dîn karkheit wunderlichen hin gegeb'n. sol ich dem vürdermâle lebn der ûf mich kein ahte enhât? deiswâr des het ich gerne rât. mirn tete daz weter nie sô wê ichn woltez hân geliten ê danne ich ze langer stunde mines lîbes gunde deheinem sô gemûten man der nie kein ahte ûf mich gewan, und sage dir mitter wârheit, entwunge mich niht der eit,

sô wærez unergangen. der eit hât mich gevangen: der zorn ist mînhalp dâ hin. gedienen müez ich noch umb in daz er mich lieber welle hân danner mich noch hât getân.' der herre Îwein vrœlîchen sprach, dô er gehôrte unde gesach daz im sîn rede ze heile sluoc, und der kumber den er truoc, daz der ein ende solde hân 'vrouwe, ich habe missetân: zwâre daz riuwet mich. ouch ist daz gewonlich daz man dem sündigen man, swie swære er schulde ie gewan, Nâch riuwen sünde vergebe, und daz er in der buoze lebe daz erz niemer mê getuo: nune hœret anders niht dâ zuo: wan kum ich nû ze hulden, sine wirt von mînen schulden niemer mêre verlorn.' sî sprach 'ich hân es gesworn; ez wær mir liep ode leit, daz ich mîner gwârheit iht wider komen kunde.' er sprach 'ditz ist diu stunde die ich wol iemer heizen mae mîner vreuden ôstertae.' dô sprach diu künegin 'her Îwein, lieber herre mîn,

nû begêt genâde an mir. von mînen schulden habet ir grôzen kumber erliten: nû wil ich iuch durch got biten daz ir ruochet mir vergeb'n, wand er mich, unz ich hân daz lebn, iemer mêre riuwen muoz. hie viel sî ûf sînen vuoz und manet in vil verre. 'stêt ûf,' sprach der herre. 'irn habt deheine schulde: wan ich het iuwer hulde niuwan durch mînen muot verlorn.' sus wart versûenet der zorn. Hie gesach vrou Lûnete die suone diu ir sanfte tete. swâ man unde wip, habent guot unde lîp, schœne sinne unde jugent, ân ander untugent, werdent diu gesellen die kunnen unde wellen ein ander behalten, lât diu got alten, diu gwinnent manege süeze zît. daz was hie allez wænlich sît. hie was vrou Lûnete mite nâch ir dienesthaften site. diu hete mit ir sinne ir beider unminne brâht залlem guote, als sî in ir muote

lange hâte gegert. ir dienst was wol lones wert: ouch wæn ich daz sis alsô gnôz daz sî des kumbers niht verdrôz. ez was guot leben wænlich hie: ichn weiz ab waz ode wie in sît geschæhe beiden. ezn wart mir niht bescheiden von dem ich die rede habe: durch daz enkan ouch ich dar abe iu gesagen niuwet mære, wan got gebe uns sælde und êre.